ألذ و أسهل عجينة سمبوسك


         وصفة : منى                 2007/06/10                 126 تعليقات
ألذ و أسهل عجينة سمبوسك

السمبوسك واحدة من أطيب و أشهى المقبلات الشامية الي لازم تكون حاضرة ع كل سفرة و بكل عزيمة , و هي وصفة ألذ و أسهل عجينة سمبوسك ممكن تحضريها في مطبخك , مقاديرها متوفرة دوما و الحشوات ما الهن نهاية , انت و زوءك و افكارك و ابتكارك . , جبنة , لحمة , دجاج , خضار , لحم بعجين , اجبان مشكلة , ما في حدود للحشوات .
مرات كتير بحضر الوصفة و برتب الحبات بعد ما تجهز على طبق مغطى بورق نايلون و بفرزهن , و بس ما تجمد القطع على الاخير بعود برتبهن بتوبروير و بفصل بين الطبقة و التانية بنايلون , وقت الي بدي بطلعهن و بخليهن برة التلاجة شي ربع ساعة و بعدها ع القلي فوراً .
العجينة سهلة كتير , انتبهي وقت تحضريها لهي الشغلة لحتى تنجح معك , حطي الطحين و الملح في وعاء و صبي فوقه الحليب المغلي , و مو بالعكس و الا رح تتشقق العجينة و تعزبك كتير .و وقت القلي لا تكتري القطع , حطي كم قطعة كل مرة لحتى تقرمش الحبات و يبقى لونها اشقر و بيفرفح القلب .
بالصحة و الهنا

-المقادير:

2 كوب طحين
ربع كوب زيت زيتون أو زيت ذرة
ثلاث أرباع كوب حليب
رشة ملح
- طريقة التحضير :

• يمزج الطحين و الملح في وعاء كبير ثم تعمل حفرة في منتصف الطحين .

• يوضع الحليب و الزيت في وعاء صغير على النار و يترك حتى يغلي , يصب المزيج في الحفرة و يقلب بالشوكة حتى تختلط السوائل بالطحين و يترك حتى تهدأ حرارته قليلاً ثم يفرك الطحين ثم يعجن الكل لمدة 5 دقائق حتى تتشكل لدينا عجينة ناعمة و متماسكة .

• إذا كانت العجينة جافة يمكن إضافة ملعقة كبيرة من الماء بالتدريج حتى الحصول على عجينة ناعمة , و إذا كانت العجينة لينة أكثر من المطلوب تضاف رشة من الطحين بالتدريج حتى الحصول على عجينة متماسكة لان كمية السائل تعتمد على نوعية الطحين و الفصل و لكن بصورة عامة كل كوب من السوائل يأخذ كوبان من الطحين .

• تلف العجينة بورق نايلون كي لا تجف أثناء العمل و يمكن تحضير العجينة مسبقاً و تركها مغطاة ثم استعمالها في اليوم التالي .

• تقطع العجينة إلى كرات صغيرة أو كبيرة حسب الذوق , ترق كل كرة بالشوبك حتى الحصول على دائرة و كل ما كانت العجينة أرق كانت السمبوسك ألذ و مقرمشة أكثر .

• تحشى الدوائر بحشوة حسب الرغبة ثم تقفل جيداً و يمكن استعمال آلة السمبوسك لتسهيل العمل و الحصول على أشكال جميلة و متناسقة للسمبوسك .

• تصف قطع السمبوسك على طبق مستو مغطى بنايلون كي لا تلصق .

• يوضع الزيت على نار متوسطة و يحمى ثم تقلى قطع السمبوسك حتى تشقر و تصبح ذهبية اللون .

• ترفع السمبوسك من الزيت و توضع على ورق ماص و تقدم ساخنة أو فاترة حسب الرغبة .

أفكار لحشوات السمبوسك :

- حشوة الجبنة : 2 كوب من الجبنة مع حبة بركة و القليل من الفليلفة الحمراء الناعمة أو النعناع أو البقدونس المفروم .

- حشوة اللحمة : تقلى بصلة كبيرة بالزيت حتى تشقر ثم يضاف ربع كيلو من اللحمة و يقلب حتى يجف مرقه و يتبل بالبهار المشكل و الملح , يبعد عن النار و يضاف جوز مجروش أو صنوبر محمص .

التعليقات

  1. linda 10 June 2007

    فايتة جوعانة
    و بس شفت الوصفة جعت اكتر
    يعطيكي العافية ست الستات
    بس بدي اسألك ما بعرف ازا فهمت صح حطيتي الحليب بعد ما غلى مباشرة ولا تركتيه شوي ليصير فاتر
    معلش استحمليني شوي
    جزاك الله خير

  2. منى 10 June 2007

    الله يعافي قلبك و بدنك و ينولك كل الي ببالك :)
    شوفي ليندا , منحط الحليب و الزيت على النار و بس ما غلوا مع بعض و قبل ما يفور الحليب نبعده عن النار و منحطه فوق الطحين ,,
    هلا رح يصير المزيج سخن شوي لهيك فيك بالأول تخلطيهم بالشوكة و بس ما اختلطوا ببعضهم رح تخف درجة الحرارة و رح يصير فيك تعجنيهم بإيدك ..

    و اي سؤال انا بخدمة الناس الطيبة ;)
    نورتي

    • سدرة 18 July 2013

      كيفك اخت منى
      اكلاتك بجننو جربت السمبوسك طيب كتير تسلم ايدك
      بس كنت حابة اشترك بموقع لقمة طيبة ما عرفت كيف
      ياريت تقليلي كيف لان عم يقلي الصفحة محظورة وشكرا الك

      • منى 18 July 2013

        هلا حبيبتي , صحة و عافية و الف الف هنا ع قلبك
        يا ترى قصدك صفحة لقمة طيبة ع الفيس بوك , ما كتير فهمت ..

  3. أم عباده 25 December 2007

    الله يعطيك العافيه
    أنا عادة ما بحط حليب والعجين بيكون بس بالماء ممكن تقوليلي شو ميزة الحليب يعني بيأثر على الطعمة ولا شو؟؟ظ

  4. منى 25 December 2007

    مية أهلا و سهلا فيك أخت ام عبادة أخت جديدة و عزيزة في الموقع :)

    أختي الحليب حيعطيها طعم ألذو كمان حيكون لون العجين كاشف أكتر و بيشهي أكتر من لما بتستعملي الماء

    أختي جربيها و ان شاء الله رح تعجبك كتير:)

  5. نور 3 May 2008

    الله يعطيك العافية .. الوصفة روعة .. جربتها اليوم وظبطت معي .. مشكووووووووورة أختي :)

  6. منى 4 May 2008

    مية اهلا و سهلا فيك نور :) هنا و عوافي يا رب على قلبك و ان شاء الله تجربي غير و صفة و تكون على زووءك كمان ;)

  7. رانيا 18 May 2008

    تسلمى يداك يا منى بجدتجنن ان شاء الله بجربها :)

  8. منى 19 May 2008

    جربيها رانيا و ان شاء الله رح تعجبك كتير , هل الوصفة انتشرت بكل عيلتي و كل الي جربها حبهااا كتير ;)

  9. سارونات 5 August 2008

    السلام عليكم و رحمة الله و بركاته
    ما شاء الله الصورة راح تحكي و اللون بيجنن ان شاء الله راح جرباو فكرة الحليب بتعطيه طعم كتير حلو بس بدي اسال ازا جربتابالماي شو بعمل يعني بحط ماء فاتر و الزيت لحاله او بس بدل الحليب بالزيت و اتبع نفس الخطوات و كم راح تصير كمية الماء
    و شو بالنسبة لتفريز العجينة هل منقدر نحفظها و كيف و كمان سمعت انهم بيحطو السمبوسك جاهزة بالفريزر و بعدين بس بيطلعوها و بيخلوها شوي و بيقلوها شو رايك
    و كمان لو ممكن افكار لحشوات مختلفة للسمبوسك ضروري و كيف بتنعمل حشوة السبانخ
    و الله حاسة حالي صايرة ثرثارة بس بلش احكي ما بقدر وقف مشان الله تسامحيني على اسئلتي لكتيرة
    ربنا يوفقك و يسهل دربك
    سلام

  10. سارونات 15 August 2008

    السلام عليكم ورحمة الله و بركاته

    اختي منى بشو لزقتيها بطحين مخلوط مع ماء صح ازا هيك فكم بتكون كمية الطحين بالموازة مع الماء و هل لازم يكون الماء دافئ او بارد
    كمان شو الافضل انو نقليها مباشرة او نخليها ترتاح و هل بالفترة بين الحشو و القلي بنخليها متل ما هي او نغطيها بنايلون حتى ما تنشف
    سامحيني على الاسئلة لكتيره
    بالتوفيق
    سلام

  11. قهوه مُره 12 September 2008

    السمبوسه بتجنن…تسلم إيدك يامنى …

  12. adfd2006 17 November 2008

    جربتها و طلعت تحفة,و مش شربة زيت ولا حاجة, و مقرمشة و طعمها يجنن, الف شكر يا منى على الوصفة دي و تسلم ايدك :)

  13. منى 19 November 2008

    هلا سارونات :)
    اذا جربتيه بالمي تبدلي كمية الحليب بالمي , فيك تحضري السمبوسك و تحفظيه في الفريزر و لما حابة تجربيه ممكن تطالعيه و تخليه ليفك عنه التلج بس شوي و بعدها تقليه
    حشوة السبانخ نفس حشوة فطاير السبانخ و هي موجودة يقسم المعجنات و الخبز

    اختي ما لزقتها بشي لحالها بتلزق مع بعضها و ما في داعي للعزاب ..

    القلي متل ما بتحبي , اذا عندك عزيمة حضريها قبل بيوم و احفظيها فيالبراد مغطاية كتير منيح و بعدها ااقليها :zzz

  14. منى 19 November 2008

    هلا اختي قهوة :)
    الله يسلمك و هنا و عافية يا قمر

  15. منى 19 November 2008

    هلا رنونة :)
    الله يسلمك حبيتي , كتير انبسطت انها عجبتك و طلعت على زووءك
    و كمان انبسطت انك خبرتيني , هناااا

  16. ميسونو 12 December 2008

    العزيزة منى
    أولاً كل عام وأنتِ بخير
    ثانياً اسمحي لي أن أناديك صديقتي لأنك أصبحت بالفعل صديقتي دون أراك أو تريني
    ثالثاً لا بد أن يضيفوا لأنواع الإدمان المعروفة عالمياً نوعاً جديداً اسمه إدمان موقع لقمة طيبة
    رابعاًبيكفي حكي وإليك سؤالي واستفساري:
    أبحث عن عجينة سمبوسك لا نقليها بل نخبزها بالفرن.
    فأرجو المساعدة مع الشكر الجزيل سلفاً.

  17. منى 13 December 2008

    مية هلا ميسون:)
    و انت بالف الف خير و ان شاء الله ينعاد عليك و كل عيلتك بالخير و البركة يا حق
    خليلي عينك على الرد الحلو و انا صار الي فترة بشوف اسمك بين المتصفحين و كنت حابة اتعرف عليك اكتر ;)
    العجينة الوحيدة الي ممكن تنشوى و تطلع طيبة هي الباف باستري , صار جربت كتير بس ما عم تطلع طيبة كتير :roll
    من فترة شفت وصفة فيها السمبوسك بينشوى و بعجينة عادية , اذا جربتها و طلعت طيبة اكيد ببقى بنزل الوصفة
    نورتي اختي و ان شاء الله تبقى مبسوطة معنا و نشوفك دايما :zzz

  18. نور الأسلام 21 February 2009

    تحياتي اخت منى انا بحب كتير السمبوسك شهيتيني عليها انا ساويتها مره بالزمانات لكن استوت من بره بس من جوه ما استوت ليش ما بعرف لكن رح جربها بطريتك ان شاء الله

  19. منى 22 February 2009

    هلا نور :)
    ان شاء الله تجربيها و بتزبط معك , اما اذا استوت من برة و من جوى لا معناها ان النار كانت قوية كتير ;)

  20. نور الأسلام 17 March 2009

    مرحبا منى اليوم جربت السمبوسك وطلعت العجينه ممتازه وكتير طيبه :zzz بس بدي اسالك شو الفرق بين ان نضع الحليب والزيت على الطحين مباشرة دون مانخليه على النار :? شكرا الك كتير

  21. منى 18 March 2009

    هلا نور :) عافية و صحة و هنا
    الغلي رح يخلي العجينة طرية و سخنة و تنمد معك أحسن و حتى بتفرق بعدها بالطعم , هي الطريقة رح تخلي فيهافقاعات صغيرة لمن تجي تقليها و بيطلع منظرهاو كمان طعمتها بتجنن ;)

  22. ام احمد الغالي 25 July 2009

    يسلمو يا احلى منى بلعالم
    انا كتير كتير مشتهيه اعمل سمبوسك وتنجح معي
    كل مرة ما بتطلع بلشكل اللي بتمناه هالمرة رح جرب طريقتك ويارب اعتمدها
    ساويت دفتر وسميتواكلات لقمه طيبه والمبدعه منى :zzz وعم حط فيه هالوصفات الرائعه الله يسلم دياتك يارب

  23. منى 28 July 2009

    ان شاء الله تجربها و تشوفي شو سهلة هل العجينة و ممتازة من كل النواحي , خفيفة و مقرمشة و ما بتشرب زيت و لونها حلو , المهم انك تقليها على نار وسط لقوية و باذن الله بتطلع يممي ;)

  24. شفاء 16 August 2009

    انا دخلت لاعمل السمبوسك اتذكرت اني نسيت اتشكرك عليه لما عملته المرة الماضية

    لانه طلع كتير طيب وبشهي وتغير شكل عن الرقائق

    خاصة انو انا عندي بالبيت اله شعبية كبيرة كتير
    لدرجة انو جوزي بيقلي بكرة برمضان مافي داعي تطبخي بكفي سمبوسك وشوربة:zzz

    مشان هيك صرت احاول اغير بالحشوات

    يعني حشوة اللحمة صرت اضيفلها جزر مكعبات مسلوق وبازيلا وشوية بقدونس بتطلع كتيير كتيير طيبة

    وصرت اعمل حشوة بطاطامسلوقة وجبنة صفرا

    واذا عندك افكار تانية لحشوات ياريت تضيفيها
    لانك متل مالك شايفة ادمان سمبوسك

    مع كل الشكر الك ولجهودك

  25. منى 16 August 2009

    هنا و الف عافية و صحة يا حق .

    فيكي كمان جبنة بيضا و قشقوان مع زعتر اخضر فريش

    فيكي بصلة و لحمة و فليلفة و جزر مبشور

    فيكي لحمة و بصل و جوز

    انت بقى و افكارك و هادا بحر ما بيخلص :)

  26. TENDERNESS 23 August 2009

    كل عام وانتم جميعا بالف خير

    اليوم ان شاء الله رح جربها شكلها كتير زاكية :)

  27. آرام 12 September 2009

    مرحبا أخت منى
    مهما شكرتك ما راح أوفيك حقك .. وفضلك علي محفوظ طول العمر .. أخيراً عملت سمبوسك .. نفذت الوصفة حرفياً وعملت نص بلحمة ونص بجبنة .. طلع لذيذ جداً ومقرمش وأكتر من رائع وفرحتي به لا توصف .. بنفس الليلة عملت وصفتين الباتون ساليه والسمبوسك .. أعطوني ثقة كبيرة بالنفس وصار عندي إحساس أنو ما عاد في وصفة صعبة علي .. مشكلتي الوحيدة في الوصفتين كانت بتشكيل العجينة .. أصابع الباتون ساليه طلعت متل أغصان الشجر :grin وكرات عجينة السمبوسك تحولت معي تحت الشوبك إلى كل الأشكال التي تخطر ببالك إلا الدائرة :grin وبالنهاية طلعت قطع السمبوسك عجيبة غريبة .. على كل حال أنا ما كتير بيهمني الشكل .. المهم الطعم كان رائع .. والفكرة من أسهل ما يكون :zzz
    بس عندي سؤال أختى بالنسبة للمعجنات .. ليش بعض العجائن بتحتاج خميرة وغيرها لأ :?

  28. منى 12 September 2009

    هلا حنان :)
    اتمنى تجربيها و تكون يممي و زاكية و على زووءك

  29. منى 15 September 2009

    هلا ارام :)
    بالاول الف صحة و هنا على السمبوسكات لو شو ما كان شكلهم يكون , و تاني شي برافو عليك ان هل الوصفات الي ممكن تعتبرها شوي صعبة , او بالاحرى جديدة , ما عم تلغي فكرة تجربتهم , و تالت شي لازم خبرك اني عن جد استمتع بقراءة تجاربك لان احسها بث حي و مباشر من جهة و من جهة تانية بتذكرني بحماستي لما بحضر وصفة لاول مرة و كيف ببقى اتنغم فيها اذا نجحت , أو حاكلها يعني حاكلها اذا نو .

    بالنسبة للاشكال العجيبة , شايف السمبوسكات الي فوق و شكلهم حلو و مرتب و متكيات بفخر على الطبق , هدولة اكيد مو من ابداعاتي الهندسية , عندي قوالب بلاستيك كتير رخاص , يمكن التلاتة ب 25 ليرة , هنن الي بشتغل عليهم و في منهم متل الشكلين الي بالصورة , شي مثلث و شي نصف دائرة , لو جبتهم رح يسهلوا عليك كتير و بتطلع السمبوسك معك بتشبه السمبوسك , شكلا و طعما

    العجائن الي نضيف الها الخميرة بيكون المطلوب منها ان يكون قوامها فيه شي متل الاسفنج , لهيك الخميرة رح تساعد و تعمل فقاعات بقلب العجين لحتى يطلع الشي الي عم نخبزه خفيف و نافش .

    اخر الشي حاكيت خالو مروان و سالته عن الكتاب , طلعت انا فهمانة غلط و الي فكرته جزء تاني هو كتاب تاني , يعني الكتاب الي عندك هو الجزء الوحيد و ما في غيره و انا اسفة للخبطة الي اتسببت فيها :roll

  30. رامة 29 September 2009

    السلام عليكم
    أنا كتير بحبك ست منى وبحب كلماتك الحلوة
    وكمان بحب أكلاتك الطيبة :roll
    جربت السمبوسك وبنفس الخطوات
    هو عم يطلع طيب منظره حلو كتير
    لكن .. للأسف عم يطلع معجن شوي
    :sigh
    يا ترى لماذا

  31. منى 30 September 2009

    هلا رامة :)
    يمكن عم يطلع معجن لان سميك , السمبوسك لازم ترقيه كتير و بهيك بيطلع مقرمش و طيب و مستحيل يكون في اي اثر للتعجين ;)

  32. Amar 6 October 2009

    العنوان مضحك لكنني قمت بعمل دراسة مقارنة بين عجينة السمبوسك التي في الموقع أي الطريقة السورية وبين عجينة الساموسا الهندية والنتيجة كالتالي:
    العجينة السورية أطيب وأسهل بالتعامل وكانت مقرمشة وسطحها أملس.
    العجينة الهندية التعامل معها صعب جدا وتحتاج لقوالب وكانت مقرمشة أيضا لكن سطحها ليس أملس.
    السؤال المهم؟؟أذكر أن السمبوسك الذي تعده أمي يجب أن يكو ن مقرمش وسطحه ليس أملس والقشرة ليست رقيقة أي أقرب بالقوام للعجينة الهندية.
    مقادير العجينة الهندية كما يلي:
    1/2 cup all purpose flour
    1/2 tablespoon samolina
    1/4 teaspoon salt
    1 tablespoons+ 1 teaspoon oil
    1/4 cup -1tablespoon warm water
    تعجن لمدة عشر دقائق وتترك لترتاح لعشرين دقيقة ثم يتم العمل بها.
    شكرا.

  33. منى 7 October 2009

    مممم , على فكرة انا كتير بعمل اخت هل الدراسة لما بيكن جاي على بالي جرب وصفة جديدة .
    السمبوسك يا قمر غير البرك بالسماكة , السمبوسك رقيق والبرك شوي اسمك , بس الاتنين ناعمين من برة و ملسين و مقرمشين :roll

    فيكي تشوفي طريقتي بالسمبوسا الهندية [URL=http://www.l2ma.com/content/view/465/2/]على هل الرابط[/URL]

  34. Amar 7 October 2009

    مممممم، أوكي اتفقنا انو سماكة السمبوسك غير سماكة البرك، السؤال هون ،هل في طريقة للبرك بحيث انو تنعمل مشوية بالفرن؟ وهل استعمال عجينة الشيشبرك مناسب للشوي بالفرن؟
    وشكراً.

  35. حورية عبودي 11 February 2010

    يسلمو على هالوصفة الحلوة

  36. منى 13 February 2010

    هلا قمر :)
    اي في طريقة للبرك المشوية , اذا ربنا راد بنزلها قريب .
    في ناس بتشوي الشيشبرك بالفرن , انا ما بحب اشويهن , هيك بحس بتتغير طعمة الشيشبرك ;)

  37. منى 13 February 2010

    هلا حورية :)
    الله يسلمك , ان شاء الله تجربيها و تكون متل ما بتحبي و اطيب ;)

  38. shimOoO 13 July 2010

    ماشاءالله فعلا اللون بيفتح النفس ان شاءالله راح اجربها برمضان او قبل واردلكو خبر وماتخافي خالتو منى راح ادعيلك انشاءالله :)

  39. shimOoO 13 July 2010

    اه نسيت أسألك هلا لو عملتها العجينة وغلفتها وحطيتها بالفريزر بتفتفت او بتتغر؟ وحابة اعطي نصيحة لاخواتي اللي في المنتدى والك بدل ماتقلوها ممكن وهيا لسى عجينة ومحشيةممكن تدهن بالزيت سواء بالزيتون او الذزة وجه وضهر وبتنشوي شوي والنتيجة رووووعة طبعا اللي بتعمل رجيم واللي بيعانو من الكوليسترول العالي راح تنفعهم كتيير وماتنسوني من صالح دعائكم شيمو :)

  40. roroo51 1 August 2010

    كتير بتشهي شكرا
    بس انا كتير عبتطلع معي العجينة سميكة
    يعني بستخد الشوبك و بساويها رقيقة و بترجع بتسمك :cry
    شو الحل برأيك؟

  41. Jassy 7 August 2010

    السلام عليكم ورحمة الله

    لما مريت وقريت هالوصفة عدة مرات، كان كتير جاي عبالي أعملها بس اليوم لحتى قررت، رح قلك منى بصراحة أنا قلت لحالي: شو هالوصفة الغريبة؟ أوكي رح جرب بس ما اتوقع تطلع احسن من اللي انا بعملها، يله بجرب وما زبطت برجع بعمل عجينتي (طحين وماء وزيت وبيضة) .. ((صحي ليه مافي بيض هون؟)).
    معاذ الله ما كون واثقة بوصفاتك :roll عسلامتك ..
    حطيت الكميات تمام متل ما كاتبة … ولا لاقي سحر ! … العجينة لحالها انعجنت وما اخدت معي 30 ثانية ولحالها انعملت وما احتاجت شي زيادة لا طحين ولا مي. وجهزت محل فرد العجينة وكالعادة مسحت المحل والشوبك بالطحين … أتاري العجينة مااااااا بتلزق بشي .. معقووووول ؟
    ويا عيني ما أحلى فردها، ما بترجع بعد الترقيق بالشوبك لتصغر كالعادة. يعني ما بعرف شو بدي قول، عملتون وقليتون وأكلناهون وأنا لسه مصدومة :upset
    شكرا كتير كتير معلمة منى :)
    وعالقلي يا عييييني عالعجينة، لا معجنة ولا مشربة زيت ومقرمشة وطرية ما قاسية وطيبة.
    الله يجزيك كل الخير يا رب

  42. منى 13 August 2010

    بتعرفي ان ردك واحد من احلى الردود الي وصلتني :)

    حسيت حالي معك و على فكرة كتير احيانا بيصير معي متلك , بجرب و انا مو كتير واثقة و ممكن احيانا النتيجة تفاجئني

    الف الف هنا و صحة على البك و الب العيلة و اا كتير مبسوطة ان الوصفة عجبتك و كانت متل ما بتحبي و الف شكر الك لردك و كلمك الي اجى فيه و ربي دوما يديم المعروف ;)

  43. منى 13 August 2010

    هلا رورو :)
    بدك تطولي بالك عليها و ترقيها أكتر كمان لحتى تصير رقيقة متل ما بدك , ما الها غير حلة و كمان ممكن تخليها ترتاح شوي و ترجعي ترقيها ;)

  44. ToTia 15 August 2010

    ياسلام يبدو اكلة ولا أطيب

  45. منى 16 August 2010

    ان شاء الله تجربيها و تطلع على زووءك ;)

  46. منى 16 August 2010

    هلا شيمو :)

    شكرا كتير للاضافة , ان شاء الله يستفادوا منها الاخوات ;)

    بينفع تشيليه للفريزر , جلديه و لما حابة تستعملي طالعة كم واحدة على منشفة مطبخ نظيفة و خليها نص ساعة مش اكتر او ااقل و اقليها :zzz

  47. فرفوشة 20 August 2010

    وأخيرا جربت الوصفة
    فعلا طلعت روعة وطيبة
    يسلم إيديك يارب ويجزيك الخير يامنى
    ما شاء الله
    شي قليته وشي بالفرن وكله طلع طيب :)
    هش ومقرمش :eek

    وبالنسبة للحشوات بحب أضيف للي ذكرتيه وذكرته الأخت شفاء
    حشوة الدجاج المسخن
    اللي هي بصلة ودجاج مسلوق وسماق وليمون وأنا بضيفلا بهار وشطة.

    وحشوة الخضار المشكلة مع النقانق المقطع والقليل من الصويا صوص.

    وحشوة الخضار(بصل وبطاطا مبشورة وجزر مبشور وملفوف مفروم ناعم وفليفلة خضرا) مع شرايح زيتون وجبنة شيدر مبشورة

    حبيت أفيد بوصفاتي متل ما استفدت من الوصفات

    شكرا للجميع :zzz

  48. أمــ نــــدى 15 September 2010

    يعطيك العافيه مني
    مثل ما خبرتك من قبل , أنا جربتها وكلمة روعه قليله عليها ..
    جزاك الله خيرا
    لكن اذا سمحتي , أنا حابة أشارك معكم بوصفاتي
    لكن مش عارفه أبدأ منين , رجاء افادتي

  49. منى 16 September 2010

    هلا ام ندى :)
    الف صحة و هنا يا رب على البك و الب مين داقها :zzz

    ممكن تبعتي الوصفات عن طريق اتصل بنا و انا ان شاء الله رح انشرهم باسمك

    هلا فيك اختي 8)

  50. منى 16 September 2010

    هلا فرفوشة :)
    مممم , شكل هل الحشوات بيشهي و خصوصا الخضار ,مممم , رح جربها و خبرك ان شاء الله ;)

    شكرا كتير الك و ممنوتك على الاضافات اللذيذة

  51. أمــ نــــدى 16 September 2010

    شكرا لك منى
    جزاك الله خيرا
    أنا بعت الوصفات مع الصور وان شاء الله يوصلوا
    ويعجبوكي

  52. سدومه 22 September 2010

    جدا جدا رااااااائعه فوووق الوصف

    تسللم ايديك

    وتقبلوني ضيفه جديده عليكم :p

  53. منى 24 September 2010

    هلا ام ندى :)
    الوصفات وصلوا و شي بيشهي , رح نزلهم بكرة ان شاء الله , الف الف شكر الك ;)

  54. منى 25 September 2010

    هلا سدومة :)
    مية اهلا و سهلا فيك أختي ببيتك و مطرحك نورتي و الف صحة و هنا على السمبوسك :)

    اتمنى تبقي معنا على طول

  55. رهف مهتدي 6 October 2010

    مسا الورد والفل والياسمين عالجميع:

    وسلامي الكبير لأختي منى امبارح باليل جربتها وكانت ممتازة هي أول مرة بعمل السمبوسك وأكيد مو أخر مرة

  56. إسراء 18 October 2010

    بتجنن هي العجينة زوجي كتير حبها يسلموا هالديات يا ست منى ……. :)

  57. منى 25 October 2010

    هلا رهف :)
    الف الف صحة و هنا على البك حبيبتي , كتير مبسوطة انها عجبتك , صحتبين و عافية

    على فكرة اختك حكت مع اية , صحة و هنا على كل شي , ممنوتك لثقتك في :zzz

  58. منى 25 October 2010

    هلا اسراء :)
    الف الف صحة و هنا على البك و الحمد لله انها عجبت الباشا ;)

  59. نجمة 4 January 2011

    يسلمو ايديك اش هيك وصفة بتجنن برمضان كل يومين اسويه ماشاالله شقد حبوه الولاد وابوهم جزاك الله كل خير :grin

  60. منى 4 January 2011

    ان شاء الله صحتين و الف عافية يا رب بكل لقمة على البك و الب كل العيلة واحد واحد :)

  61. noura 10 January 2011

    مرحبى منى كيفك حبيبتي بدي انا عملت السمبوسة شي 3 مرات هي طلعت ممتازة من ناحية القرمشة والسهولة بالشغل بس حسيتا بتشرب زيت شوي واستغربت لما ئريت ردود الصبايا ئنو ابدا مابتشرب فئلت لاسئلك شو السبب يارترى- علما ئنو انا اخدي ئيدي كتير على عمل السمبوسة دائما بعمل سمبوسة البف بتطلع ناشفة من الزيت تماما بس بتغلبني شوي بئليا لانو بتنفخ بالزيت متل البالونة وبتصير مابتئلب معي للجهة التانية مشان تاخد لون فبصير بضل عم رش فوئا زيت مشان يصير لونا دهبي -مشان هيك طريئتك بالسمبوسة ريحتني كتير بالئلي بتئلب بسرعة وبتاخد لون بسرعة بس مشكلة ئنو حسيتا غابي زيت شوي وطبعا صفيتا مظبوط وحطيتا على ورق نشاف وكل شي -معلش اتحمليني طولت عليكي بعرف ريت كذا رد عم يسئلوكي على برك الجبني المئلية تبعت المطاعم بسوريا مو موجودة بالموقع لسا صح؟؟وشكرا كتير لئلك

  62. noura 14 January 2011

    عزيزتي منى عم استنى ردك وينك؟؟؟

  63. منى 15 January 2011

    هلا نورا :)

    اتوقع انك زدت كمية القطع وقت القلي لان هل العجينة ما بتشرب زيت نهائيا ;) اكيد بتعرف ان الزيت لازم يكون حامي قبل ما نقلي السمبوسك , و اذا انت فرضا حطيتي 8 قطع كل مرة , قللي الكمية ل 5 قطع , و ان شاء الله بتكوني رضيانة عن النتيجة ;)

    تكرم عينك اختي ,س مو هلا لان شوي مشغولة , باذن الله فترة تانية بنزل البرك

    مية اهلا و سهلا فيك و ايا سؤال تاني من عيوني

  64. foton 6 February 2011

    :? :? :cry gtfrr5e4

  65. منى 7 February 2011

    هااااا

    شو في :roll

  66. مرجانة البحور 21 April 2011

    هاى اول مشاركة اللى مع انى من متابعات موقعك من أول ما فتحتيه

    ماشاء الله على هالابداع يسلموو دياتك يا قمر

  67. منى 22 April 2011

    هلا فيك مرجانة :)

    منورة , ابقي طلي دوما و شرفينا برد حبيبتي ;)

  68. بنت دير عطية 27 April 2011

    السلام عليكم : كيف صحتك اخت منى ان شاء الله تكوني بخير وكل اهل سورية بخير وامان يا رب وبشكرك ع هالدعوة الحلوة اولاً وع هالاكلات الطيبين كتير :) المشكلة انو انا بحب الشغل بالمطبخ وهالاكلات كتير وما عم يمشي الحال مع الرجيم :sigh ؟؟؟شو بدنا نعمل دخيلك 8) والله شي بشهي ومو بس يم يمي ويممممممممممممممممممممممي ويمي يمممممممممي

  69. بنت دير عطية 14 June 2011

    السلام عليكم كيفك يا غالية ان شاء الله تكوني انت والاهل بخير يارب :roll انا جربت هالعجينة الطيبة وكمان عطيت الطريقة لأمي بس مشان الامانة قلتلها من الموقع وحكيتلها قديش حلو وهي كمان جربتها وبتقلك يسلمو ايديكي والله يجزيكي الخير ووصتني ابعتلك سلام .اليوم كمان خالتي داقتها عند امي وطلبت الطريقة 8) .طولت عليكي بس طمنينا عنك والله يفرجها آآآآآآآآآآآمين

  70. areej 19 June 2011

    تسلم ايديكي ست منى بالفعل العجينة رائعة وسريعةوأهم شي انها بتزبط وبتشتغلي فيها فورا على نفس المقادير

  71. مسك الايمان1 8 July 2011

    يسلوا ايديك يا رب اول مرة بجرب شي من النت بس عن جد شي بياخد العقل بعدين العجينة كتثر طرية قبل القلي يعني لاحالها بتحكيلك انا راح ازبط وبعد القلي مقرمشة [B]الله يطعميك ثمرات الجنة [/B]

    حابه اضيب حشوه كتير طيبة هي بصل وزيت قلي وفليفة خضراء مبروشة وكزبره خضرا وبعدين نضيف عليهم الصنوبر المقلي كتثر طيبة دلتني عليها صاحبتي ( كتثرمعدله )الله يدلها على الخير

  72. منى 17 July 2011

    هلا مسك :)
    الله يبل قلبك , على هل الدعوة الكريمة من اخت كريمة , انت كمان اختي :)

    شكرا كتيررر للحشوة شكلها بيشهي كتير , ممنونتك حبيبتي و منورة الموقع ;)

  73. فستق و بندق 30 July 2011

    السلام عليكم شجعتوني حتى اجربها ان شاء الله اليوم بجربها واقلكم على النتيجة على المساء ان شاء الله

  74. فستق و بندق 30 July 2011

    السلام عليكم
    جربت اليوم السمبوسة وطلعت ماشاء الله عاشت ايدك اخت منى بارك الله بك
    سبحان الله اني كنت من اجرب شي وصفة وما تظبط يصير عندي فد حالة احباط فظيعة بس من قريت الوصفة وقريت الردود اتشجعت كثير فبارك الله بكم جميعا والشكر الجزيل للاخت منى

  75. ام جواد 4 August 2011

    يسلم هالايدين يامنى

  76. QueenNour1 4 August 2011

    مرحبا منى

    كل وصفاتك بتاخد العقل، الله يعطيك العافية و يخليلنا ياكِ يارب…

    ياريت تحطيلنا وصفة السمبوسك اللي بتنشوى بالفرن، لأنه خفيفة كتير على المعدة و خاصة لـرمضان… شكراً كتير إلك. و يسلموا إيديكِ على هالوصفات و الأفكار الجديدة.

    نور

  77. QueenNour1 4 August 2011

    منى، شو الحل إذا كانت العجينة رخوة!؟ ضليت ضيف طحين و لسه هي رخوة!!؟؟ ما عرفت ليش ما ظبطت معي!؟ يا ريت ادليني شو أعمل لأنه و الله هلكت و ما مشي الحال
    :cry :? :upset

    بس بدي ألفت نظرك إنه أنا عايشة بـأميركا :)

    شكراً كتير سلفاً و رمضان مبارك على الجميع…

    • منى 29 December 2013

      هلا نور
      اتوقع انك سخنتي الحليب و الزين في قدر و على هل القدر ضفتي الطحين , و المفروض انك تحطي طحين في وعاء و تصبي عليه السائل المغلي , هل التفصولة الصغيرة بتعمل فرق , لان المقادير الي فوق ع التكة و بتزبط ان شا الله كنتي بالقمر

      ايا سؤال تاني من عيوني

  78. lulu 14 August 2011

    على فكرة عجينة هالسمبوسك بتاااخد العقل شوماحكيت قليل عليها… الله يسلم دياتك اخت منى..ماعذبتني العجينة أبدا وطلعت مقرمشة ولذيذة .. اما بالنسبة للموقع بشكل عام فانا من اشد المعجبات ومين مابيسألني من وين عم تجيبي هالوصفات بقلهم مالكم غير لقمة طيبة موقع توب بكل تفاصيله يعطيكي الف عافية.. 

  79. ورد 27 October 2011

    الله يسلم هالايدين يارب من جد شي اكتر من رائع اليوم جربتا مع اني ماكنت واثقة كتير انو تنجح معي لانو اغلب الاحيان مابنجح معي الشي الجديد بس من جد العجينه ولا اروع من هيك يعني انا وعبشتغل فيا حبيت اطول وحبيت تكون الكميه اكتر وزوجي كتير عجبتو مع انو مابعجبو اي شي بس المزوء ياست منى مابيطلع منو الا كل الزوء يسلمو ايديكي والله يوفقك يارب على اهالاكلات اللذيذة

  80. منى 29 October 2011

    هلا ورد :)
    كتير مبسوطة انك اتشجعتي و جربتيها و بالفعل ممكن احيانا ياف من تجربة شي جديد , الحمد لله انها كانت تمام و عجبت الباشا

    منورة حبيبتي

  81. منى 29 October 2011

    هلا لولو :)
    ممنوتك حبيبتي على ردك و كل الكلام الي فيه , ان شاء الله الف عافية على البك
    شكرا للدعاية و الله يديم هل الود و ان شاء الله بتبقي معنا على طول

  82. منى 29 October 2011

    هلا نور :)
    و الله حبيبتي صار جربت اكتر من مرة بس ما عم حب الننتيجة و عم يبقى المقلي غير , بس حاطة الفكرة بذهني و ان شاء الله تزبط معي قريب ;)

  83. منى 29 October 2011

    هلا ام جواد :)
    يسلم ايديكي مية هلا فيك

  84. منى 29 October 2011

    هلا اختي فستق و بندق :)
    الحمد لله انها زبطت معك و كانت على زووءك , مبسوطة كتير انها عجبتك , هنا حبيبتي

  85. منى 30 October 2011

    هلا اريج :)
    صحتين و الف عافية يا رب , و كتير انبسطت انها زبطت معك و مقاديرها كانت تمام , هنا و صحة ;)

  86. sweetlole 18 March 2012

    مرحبا ست منى ريتو تسلم هالايادي على هل الاكلات الطيبة والله مو عرفانة شلون بدي اتشكرك انا مو مصدقة انو في هيك موقع عن اكلاتنا الحلبية وفرتي علي تلفونات كتير لامي مشان اسألا عن الطبخات اللي ماكنت اعرف منا غير شلون بتتاكل هههه وهلا بالغربة عم ابدع بالطبخات لحالي والحمدلله عم اتعلم شوي شوي وبفضل هالموقع الحلو رحاكون شيف نظامي تقبشي قلبي شغلك مرتب ومنظوووم :grin

  87. sweetlole 18 March 2012

    يسلمو هالايديييين

  88. منى 22 March 2012

    الله يخليك , اديه مبسوطة بردك و تواجدك معنا , منورة حبيبة قلبي , انا الي حابة اشكرك على ردك و كلامك و ان شاء الله تجربي من الوصفات و تكون متل طبخات ماماتك الغالية :)

  89. ام شهلا 24 March 2012

    حبيبتي شكرا عترحيبك من هلا ورايح الله يعينك بتليتي بوحدة نقاقة وفضولية بدي عزبك معي شوي الله يخليكي بالنسبة للبرغل فيني اعملو بالخلاط العادي مشان يجهز للكبة ؟
    لانو بالغربة صعب نحصل ماكينة وجوزي من عشاق الكبة وحابة اعملو ياها ياريت تدليني عطريقة اعمل فيا البرغل ويسلمووو كتير

  90. ام شهلا 24 March 2012

    مدام منى حضرتك حلبية ولا شامية ؟ طبخك حلبي بس حكياتك شامية وبالحالتين انتي احلى منى بالعالم
    :roll

  91. منى 26 March 2012

    هلا ام شهلا و مية السلامة بهل القامة :)
    فيك تستعملي برغل ناعم كتير بتنقعيه بشوية مي باردة و بعدها بتضريبيه كم ضربة على محضرة الطعام و بتدعكيه مع البرغل , بتزبط بس مو تمام متل كبتنا ;)

    شكرا حبيبة قلبي , انا حلبية احية

  92. ghad 17 April 2012

    السلام عليكم ان شاء الله اليوم رح جرب هالوصفة والبيتزا بالتتبيلة الخاصة وفطر وموزاريلا :)

  93. ام بودى 8 May 2012

    :) :) :) انا لسه جديدة واول مرة بحياتى اشارك في موقع اكتب فيه لانى ماكنت بقتنع باى موقع لعدم المصدقيه في الوصفات بس موقع لقمه طيبه واكلاتك الجميله مينفعش معلقش عليها واقولك تسلم ايدكوانشاء الله هعمل السمبوسه ونبقى على تواصل حبتك وانا معرفكيش انا اسماء من مصر :) :) :) :) :) :) :) :) :)

  94. منولة 11 May 2012

    من أول ما تزوجت لهلأ كلما بعمل السمبوسك المفروض تطن إدنك اليمين ع أد ما بذكرك بالخير وبقول لحالي والله هالطريقة خيييييييييلة..
    لأنو استعمال الحليب بدل الماء بيعطي قرمشة رهيبة ..
    يسلمو منمن :)
    طبعاً حشوة الدجاج المنقوع بعصير ليمون كمان بتعطي نكهة رائعة وبتدوب بالتم دوبان

  95. لولو 2011 22 July 2012

    ألف شكر يا ست منى على كل شيء أولا على هالموقع الرائع يللي فبه شرح وافي وكافي وممكن المشاركة والاستفسار وكأنه الواحدة عم تحكي مع أختها وانشالله انت اخت عزيزة وغالية دائماً وثانياً على الوصفات الرائعة بارك الله بك وأزاح الكرب عنكم وعنا جميعاً بعرف أننا نمر الآن جميعاً بوقت عصيب وما بعرف متى لح يصحللك تجاوبيني بس أنا مقدرة الظروف بس حبيت احكي كلمتين حلوين الك والله يكون معك :) :) :) :) :) :grin

  96. sabreen 22 October 2012

    وصفه سهله وان شاء الله اجربها
    عاشت الايادي :)

  97. زهرة البيلسان 27 February 2013

    اخت منى انا ما اعرفت كيف استعمل موقعك الجديد و اوصل للوصفات انا مشتركة معكم ,,,بدي طريقة الكبة مقلية اللي بتضيفي عليها سميد للعجينة

    • Mona 27 February 2013

      الموقع لسى مو خالص لهيك لسى مو مرتب

      هادا رابط الوصفة http://l2ma.com/?p=1619

      عوافي مقدما يا زهرة

  98. ياسمين الشام 19 July 2013

    كل عام وانت بخير اخت منى الحقيقة اكلاتك كلها بتشهي انا جربت السمبوسك وطلع بجنن اولادي جبو كتير الله يسلم ايديك

    • منى 21 July 2013

      و انت بالف الف خير ياسمين , ان شا الله عافية ع قلبك و قلب هل الحلويين الصغيريين

  99. سدرة 5 August 2013

    الاخت منى الموقع الرسمي وليس موقعكم عالفيس بوك

    • منى 5 August 2013

      أختي موقع لقمة طيبة هو موقع الرسمي .
      ما بعرف اذا بتقصدي غير شي

  100. نبيلة 19 February 2014

    يعطيكي العافية ست منى بيشهي.بس العجينة شقد بدها رياحة يعني كم ساعة وكمان كيف شكلتي السمبوسك هيك اذا بدي سكرو هيك بيطلعلوا حرف.وشكرا

  101. ORUBA 11 March 2014

    جربتها و النتيجة رااااااااائعة

    • منى 11 March 2014

      صحتين و الف عافية عروبة بكل لقمة , ريتو مطرح ما سرى مرى :)

  102. آية 19 June 2014

    يعطيكي العافيه مدام منى
    ان شا الله رح جربا بهاليومين و بوافيكي بالنتيجة

    • منى 20 June 2014

      ان شا الله تجربيها و تكون ع زوقك :)

  103. منى شبار 22 June 2014

    ست منى يعنيموقعك من المواقع اللي باخد فيو الوصفه و انا واثقه انو رح تنجح ما بعرف ليش عندي كل هالثقه بكلامك و وصفاتك بمكن لانو بتعطي بالتفصيل الممل ادق التفاصيلو هي شغله انا كتيررر بحبها و بتريحني بس هلق انا عندي مشكله بالسمبوسك الجبنه كلما بعمله و بقليه بتطلع الجبنه لبرا مع انو بستعمل يا اما القشقوان او الجبنه البيضا او الموزريلا الناشفه (بس ملاحظه انا عجينتي كاستين طحين عادي و كاسه فرخه و نص كاسه مازولا و كاسه مي مغليه و رشه ملح) عندك حل لقصه الجبنه اللي بتطلع لبرا وقت القلي ر بتخليني اكب زيت كتيرر لانو بيكون تبهدل من الجبنه))) :

    • منى 26 June 2014

      اهلين منى :)
      هي ثقة غالية عندي اكتر من ما بتتخيلي , ممنوتك كتير , الله يديم المودة يا حق

      مشان الجبنة معناها الحبة عبتفتح وقت القلي , اما ما الك مسكرتيها مزبوط , أو الجبنة مي مصفاية منيح و نزلت مي خلت الحبات تفتح , أو عجينتك نفسها رح تفتح ع القلي

  104. رانو 24 June 2014

    السلام عليكم منى ..الله يسلم ايديكي ..صار عملت هاعجينة اكتر من مرة والنتيجة رائعة ..وبتتميز انو السمبوسك بضل بيقرش حتى لتاني يوم ..بس في مشكلة اتكررت معي مرتين ..انو العجينة بعد شوي بتبدا بتشقشق ومابقا بتساعدي عالمد ..واذا مديتا السمبوسكات بيطلعلن ثقوب من النص …ماعبعرف ليش ..عجب ﻷنو عبحط الحليب الزيت سخنين كتير ..يعني لازم يبردوا شوي ولا مالاعلاقة ؟؟؟؟

    • منى 25 June 2014

      صحتين و الف هنا رانو ع السمبوسكات :)

      التشقق معناها كان في حرارة زيادة ع الطحين , اما انك حطيتي الطحين ع طنجرة الحليب بيقوم الطحين كانو بينطبخ , أو انك بعد ما ضفتي الحليب و الزيت و هنن مغليين على الطحين و حركتي شوي , عجنتيها و هي سخنة زيادة , و الاحتمال التالت انو ما عطيتيها وقت لترتاح

  105. رانو 26 June 2014

    هاااا..هو الاحتمال التاني ..ﻷنو ما استنيتا لتبرد عجنتا فورا ﻷنو عجنتا بالعجانة ..فكرت انو الانتظار بس مشان الإيد …يسلمو كتير يامنى على ردك

    • منى 26 June 2014

      ممتاز , وقت واحد يعرف السبب :)

  106. منى شبار 29 June 2014

    ست منى وصفه السمبوسك رهيبه و مبارح جربتها و طلعت رائعه الله يجزيكي الخير يارب و جربت المعروك كتير طلع كويس و بدي جرب كل وصفاتك ان شالله لانو شكلهكل وصفاتك ائعه متلك شكرااااا كتيرررر

    • منى 29 June 2014

      منورة يا منى , ان شا الله الف الف عافية و صحة يا قمر ع ل لقمة , ممنونة ثقتك في :)

  107. غدير 3 July 2014

    يسلم دياتك والله يجعله بميزان حسناتك هالموقع .. جربتها وطيبة كتيييييير

    • منى 3 July 2014

      صحتين و الف الف هنا يا رب ، ااامين :)

      منورة غدير مية هلا فيك

  108. الدمشقية 17 July 2014

    السلام عليكم ورحمة الله وبركاته
    مدام منى تسلم أيدك والله وصفة بتجنن جربتها وإن شاء الله بدي عيدها والكل لما داقوها قالولي كأنها رقايق من السوق
    بس سؤالي بعد إذنك كأني حسيت الزيت تبعها كتير فيني قلل مقدار الزيت
    والله يجزيك الخير

    • منى 19 July 2014

      اهلا و سهلا حبيبتي :)
      الف عافية و صحة ع قلبك و قلب كل الي داقها يا حق

      مممم , جربي قللي معلقتين او تلاتة و شوفي شو بيصير معك , انا بالحقيقة ما جربت الا هيك , بس ممكن يطلع افضل

  109. انتصار 5 September 2014

    الله يعطيكي العافية ست منى أنا جربتها وكتير عجبتني سهلة وطيبة
    واعطيت الوصفة لمعارفي

    • منى 7 September 2014

      يا مية الف صحة و هنا و عافية يا قمر ، ع قلبك و قلب معارفك

      ممنونة هل الثقة :)

تقييم الوصفة
عاديةقد أحضرهاجيدةممتازةأكثر من رائعة (11 votes, average: 4.27 out of 5)