الدجاج روستو بالبرتقال


         وصفة : منى                 2013/04/19                 8 تعليقات
الدجاج روستو بالبرتقال




دجاج المشوي على الاغلب حبيب الكل , و اذا كان محضر على اصوله ما في اطيب منه ..


شفت من زماان زمان كتير , أكتر من سنتين , وصفة لسوسن محضرة فيها الدجاج المشوي بطريقة مختلفة , و كانت كاتبة انو كبي كل وصفات الدجاج المشوي الي عندك و جربي هل الوصفة قمت انا ما كذبت خبر , بس من دون ما كب كل الوصفات الي عندي :D . جربتها و بعدها اعتمدتها من ضمن الوصفات الي بتتحضر دوما على سفرتي . و صرت حضرها كل مرة بشي مختلف , مرة حط هل العشبة مرة غير عشبة , مرة أعشاب فريش و مرة أعشاب مجففة , حسب المتوفر عندك و حسب زوءك .. و بعرف في ناس ما بيحبوا البرتقال , ممكن يحضروا نفس الوصفة بس بالليمون .. المهم هو نكهة الانتعاش و الفرفشة الي رح تضيفها الحمضيات


الوصفة كتير سهلة و ما بتاخد وقت بالتحضير , تبلي الكل و بلمسة صغيرة بتصير وصفة انيقة و مرتبة . الوصفة فرنسية بالاصل و بتطبق كتير على زوئنا العربي , و لان قطاطي بيحبوا البطاطا فانا بضيفها دوما , انت حسب زوءك و حسب عيلتك , ضيفيها مع بطاطا متبلة بنفس تتبيلة الدجاج , او مع بطاطا مقلية او بطاطا بيوريه , حسب زوءك و رغبتك


في كتير اسرار لحتى يطلع الدجاج المشوي طيب كتير , طري و لونه حلو . أهما شي انو تجففيه كتير منيح من المي و الخل قبل التتبيل , و هي خطوة بسيطة بس بتفرق كتير . الشي التاني المهم انو تكون درجة حرارة الفرن قوية نوعاً ما لحتى يقرمش الدجاج من برة , بس مو قوية كتير لدرجة انو يقرمش من دون ما يستوي قلبه , انا بشويه على 210 تقريباً , انت حسب فرنك . سر كمان أنك تستخدمي صينية الشوي , و الي هي عبارة عن صينية عادية و فوقها شبك لحتى ينزل زوم الدجاج و ما يبقى فيه سوائل تنزع الشغل كله , اذا مو متوفرة عندك الصينية ممكن تحطي طبقة بطاطا و هل البطاطا منها بتشرب الطعم الطيب و بتصير طعمتها يممم , و منها بتعمل طبقة عازلة بتمتص هي المرق . سر كمان انك تبدأي الشوي بحيث يكون الصدر لتحت , بهل الطريقة عصارة الدجاج كلها رح تتجمع بالصدر و لما بتقلبي الدجاج بنص عملية الشوي رح يرجع يتوزع العصارة بقلب الدجاج بس منكون ضمنا انو الصدر طري و مستوي و يمممي , اخر الشي مهم انو ما نزيد وقت الشوي لحتى يبقى الدجاج طري …




أخر الشي حابة أشكر كل الاصدقاء الي بيقيوا معنا , هون أو على الفيس بوك مع انو ما في جديد من زمان , و حابة اشكر كل شخص عم ينضم للعيلة الفيسبوكية الي قربت تصير 6000 من الي حابينا على الفيس بوك , و لهلا كل ما بشوف لايك جديد بفرح و بينط قلبي متل اول تعليق وصلني على الموقع , شكرا كتير و ان شاء الله الجاي اطيب من الي رايح




بالصحة و الهنا


شو لازمنا ؟

دجاجة كاملة منظفة و مجهزة بوزن 1.5 – 2 كيلو

مزيج الزبدة و الأعشاب :

3 ملعقة كبيرة زبدة طرية
نصف ملعقة صغيرة أوريغانو مجفف
ملعقة صغيرة زعتر أخضر مجفف
نصف ملعقة صغيرة مردقوش أو اكليل الجبل مجفف أو ميرمية مجففة , اختاري النكهة التي تفضليها
بشرة حبة او حبتي برتقال

المطيبات :

2 ورق غار
بضع حبات فلفل أسود
حبة بصل , مقطعة أرباع
3 فص ثوم صحيح
بضعة أعواد من أعشاب طازجة , ميرمية , اكليل الجبل , زعتر أخضر , اختياري
1حبة كبيرة برتقال , تقطع اربع ارباع
طريقة التحضير

ツ يغسل الدجاج و يفرك بفنجان صغير من الخل من الداخل و الخارج جيداً , يترك لمدة ساعة ثم يجفف من الخل جيداً .

ツ تخلط الأعشاب مع بشرة البرتقالة و الزبدة الطرية بالشوكة حتى تتجانس المقادير .

ツ تدهن اليدان بالقليل من الزيت ثم تمرر بلطف ما بين جلد الدجاجة و لحمها مع الانتباه كي لا يمزق الجلد , يجب الوصول لأقصى ما نستطيع الوصول اليه كي تصل التتبيلة لكل الدجاجة .

ツ يؤخذ من مزيج الزبدة و يمد ما بين الجلد و لحم الدجاج بحيث يغطى لحم الصدر بشكل كامل و يدهن التجويف الداخلي للدجاجة بالباقي من زبدة الأعشاب .

ツ توضع المطيبات من ورق الغار و حبات الفلفل الأسود الثوم و البصل و الأعشاب و حبة البرتقال في تجويف الدجاجة . تربط رجلا الدجاجة مع بعضهما باستخدام خيط قطني سميك كي تتماسك جيداً أثناء الشوي و تشكل قطعة واحدة فتنضج جميع أجزائها بوقت واحد و كي يكون منظرها جميلاً بعد النضج .

ツ تدهن الدجاجة بزيت الزيتون و ترش بالملح و الفلفل الأسود ثم توضع الدجاجة في صينية خاصة بالشوي بحيث يكون صدر الدجاج موضوعاً الى الاسفل , تشوى في الفرن المحمى على درجة 200 – 220 لمدة ساعة إلى ساعة و ربع أو حتى تنضج و تقلب على الطرف الاخر في منتصف المدة . يسقى الدجاج من وقت لاخر بعصارته .

ツ تخرج الصينية من الفرن , يترك الدجاج حتى يرتاح لمدة 15 دقيقة ثم يقدم مع البطاطا المقلية أو البطاطا البيوريه أو الأرز أو الدجاج , حسب ذوقك الشخصي .


فكرة :

يمكن استبدال البرتقال بالليمون لتحضير وصفة أخرى لذيذة و مميزة .

التعليقات

  1. Ruwshan 22 June 2013

    سلام عليكم
    عاشت الايادي والف شكر لكي عزيزتي بصراحه اني مو شاطره بلطبخ !
    وكلما اريد اطبخ اروح ادور غلا النت اشوفلي طبخه واعملها !
    وعن طريق الصدفه لقيت هاذا الموقع ………
    بدون مجامله ويصراحه هاذا المو قع وهاذي الوصفات ااااااكثررررررر شي عجبوني
    واريد اشكرك بنيابه عن زوجي …..كل يوم يقول لي شوفيلنا ست منئ شنو عندها من وصفه
    واطبخيها ….ولا تنسين تشكريها ….
    الف الف شكر للكي اختنا العزيزه ويخليكي ربنا

    • منى 22 June 2013

      و عليكم السلام روشان
      منورة و الله الموقع و مبسوطة كتير انو عجبك و الوصفات كانو على زوءك و زوء ابو الشباب , ان شاء الله عوافي و صحة و هنا على قلوبكم
      مية هلا فيك حبيبتي

  2. na3oom 1 February 2014

    اليوم عملتها شي ناهي كتير وبدوب بالتم دوبان … ماكان عندي بطاطا كفاية فحطيت بطاطا حلوة و جزر وطلعو طيبين كمان … كان نفسي يكون عندي أعشاب فربش لحتى تدعم الطعمة … المهم كانت فروجة طيبة وفرحت الولاد أنها فروجة كاملة متل اللي بيطلعو بأفلام الكرتون

    على فكرة منى عملتها نشر على pinterest بملف خاص لوصفاتك

    • منى 1 February 2014

      اهلين نعوم , يا سلااام شو انبسطت انها عجبتك و طلعت يممي و ع زوئك .. الف هنا

      ممكن تبعتيلي الرابط , انا من كم يوم بس انضميت ل pinterest و لسى ما كتير بعرف فيه

  3. Farah 26 May 2014

    تسلم ايديك الشكل اكتر من مشهي عندي استفسار بقدر اعملها ب نصف دجاجة فقط و لا ممكن مااحصل عنفس النتيجة؟؟ عبالي شوربة دجاج بما اني مكربة
    فقلت بقسم الدجاجة اللي عندي نصفين نص بشويه و،نص شوربة شو بتنصحيني
    شكر كبير الك عالوصفات

    • منى 26 June 2014

      اكيد فيكي تحضريها بنفس التتبيلة على ايا مقدار بتحبي , عليك الف عافية فروحة , ما عقلبك شر ..

      منورة ي قمر

  4. Farah 27 May 2014

    مرحبا حبيت قلك يسلم ايديك عملت الدجاجة و حطيت بالصينية اللي تحتها بروكلي و بطاطا انشووا مع التتبيلة اللي عم تنقط مع الزبدة والزيت و الشكل و الطعم اكتر من رائع شكرااا لك و ل سوسن

    • منى 29 June 2014

      ممممممم روووعة , تعيش ايديكي يا رب , و الف الف صحة و عافية :)

تقييم الوصفة
عاديةقد أحضرهاجيدةممتازةأكثر من رائعة (4 votes, average: 4.00 out of 5)