الشيشبرك


         وصفة : منى                 2008/03/11                 39 تعليقات
الشيشبرك

العجينة :

3 كوب طحين
كوب و ربع ماء أو حليب دافئ
ملح حسب الرغبة
المزيد من الطحين للمساعدة برق العجينة

الحشوة :

ملعقة كبيرة سمنة
نصف كيلو لحم غنم قليل الدهن مفروم ناعم
2 حبة كبيرة بصل مفروم ناعماً
صنوبر
ملح
ملعقة صغيرة بهار مشكل
رشة قرفة

اللبن المطبوخ:

2 كيلو لبن غنم ( 8 كوب )
2 كوب مرق لحمة أو ماء
2 - 3 ملعقة كبيرة نشاء

تقلاية الثوم و الكزبرة :

2 ملعقة كبيرة سمنة
ملعقة صغيرة كزبرة ناشفة
ملعقة صغيرة فليلفة حمراء ناعمة
6 فص ثوم مهرووس





تحضر الحشوة :

• تذوب السمنة على نار هادئة ثم يحمص فيها الصنوبر و يرفع على ورق ماص .

• يقلب البصل بنفس الزيت حتى يصفر و يطرى ثم تضاف اللحمة المفرومة و البهار و تقلب على نار قوية حتى تنضج اللحمة و تجف كل مرقتها ثم تترك اللحمة حتى تبرد .


تحضير العجينة :

• تعجن مكونات العجينة مع بعضها و تدعك جيدا حتى تتماسك و تتجانس ثم تترك جانباَ لترتاح مدة نصف ساعة .

• يرش الطحين على طاولة العمل ثم تقسم العجينة لقسمين و يغطى أول قسم و يفرد القسم الثاني بالشوبك حتى تصبح العجينة متوسطة السماكة , لا رقيقة جداً فتتمزق عند الطبخ و لا سميكة أكثر من اللازم .

• تقطع العجينة لمربعات صغيرة ثم توزع عليها نصف الحشوة بمعدل نصف ملعقة صغيرة و يوزع الصنوبر صنوبرة صنوبرة على كل قطعة .


• يطبق طرفا العجينة للحصول على مثلث صغير بالشكل التالي و يمكن تطبيق طرفا العجينة للحصول على مستطيل .


• تطوى طرفا قطعة الشيشبرك للحصول على قبعة صغيرة و جميلة ثم تصف القطع الجاهزة على صينية واسعة مرشوشة بالطحين .

• تكرر العملية بالقسم الثاني من العجينة و باقي الحشوة .

تحضير اللبن :

• يفضل استعمال طنجرة كبيرة من النوع ذات القاع السميكة كي لا يحترق اللبن أو يعلق أثناء طبخه .

• يخلط اللبن مع النشاء و المرق أو الماء جيداً بمضرب الشبك حتى يتجانس ثم يوضع على نار متوسطة و يحرك باستمرار و بجهة واحدة من دون التوقف أبداً عن التحريك حتى يغلي و هذه هي أفضل طريقة لطبخ اللبن أثناء تحضير الشيشبرك أو الشاكرية أو الكبة اللبنية .

تطبيق الوصفة :

• يضاف الشيشبرك على اللبن قطعة قطعة و بعد أن يغلي اللبن مجدداً تهدى النار و يحرك مرة واحدة و بلطف حتى لا تنتزع قطع الشيشبرك و يترك لمدة 20 – 30 دقيقة أو حتى تنضج القطع , ستلاحظين أن القطع قد ازداد حجمها لذا يجب أن تكون القطع صغيرة بالأساس كي يبقى شكلها جميلاً .

• تذوب السمنة في مقلاة صغيرة على نار هادئة ثم يضاف الثوم و يقلب لمدة دقيقة أو دقيقتان من دون أن يتغير لونه ثم تضاف الكزبرة و الفليلفة و تقلب التقلية لمدة دقيقة أخرى .

• يسكب الشيشبرك في طبق التقديم ثم يزيين بالتقلية و يقدم فوراً لوحده أو مع أرز مفلفل و بجانبه طبق من الفجل و البصل الأخضر .


تنويعات و إضافات :

• في الطريقة التي تعلمتها من أمي و حماتي تقطع العجينة لدوائر صغيرة ثم تطوى لنصف هلال و تطوى الأطراف كالسابق و هي طريقة جميلة , و لكن بطريقتي ستكون العجينة الزائدة أقل و سيكون العمل أسهل .

• لتحضير الشيشبرك على الطريقة الفلسطينة يضاف نصف كوب من الكزبرة الخضراء أو البقدونس المفروم للحشوة , و يمكن تحضير التقلية أيضا بالكزبرة الخضراء حيث يقلى الثوم و باقة من الكزبرة الخضراء المفرومة ناعماً لبضع دقائق ثم تصب فوق اللبن.

• إذا كانت اللحمة مدهنة فيجب أن تصفى من الدهن قبل استخدامها في الحشوة و إلا فلن يلتصق طرفا العجينة مع بعضهما البعض .

• أفضل نوع لبن يمكن استخدامه للأخوات في السعودية و الخليج هو لبن الصافي أو ناداك أو ميلكو .

• بعد تجهيز الشيشبركات الصغيرة , يمكن تجميد العجينة بحيث توضع في الفريزر لمدة ساعتين أو أكثر حتى تجمد تماماً ثم تقسم حسب الرغبة و توضع في الفريزر حتى وقت الاستخدام .







  • وصفات تانية ممكن تعجبك


التعليقات

  1. أم عباده 16 March 2008

    الله الله شو هادا يامنى شي بيشهي
    عن جد هالموقع عم يشهر الاكلات الحلبيه بشكل رائع مجموعه من صديقاتي المصريات والمغربيات هون خبرتن بالموقع ولما شافوا قالولي شو هالموقع اللي بيفتح النفس تسلم دياتك على هالاكلات
    أنا الشيش برك بعملوا بنفس الطريقه بس قطع العجين قبل ما حطن باللبن بنشفن شوي بالفرن من غير ما يتغير لونه بس مشان ما يبقى ني فلما بينطبخ باللبن بيبقى محافظ على شكله
    ;) :grin

  2. Rino 17 March 2008

    تسلم الأيادي منى هاي من أغلى الأكلات على قلبي و قلب ولادي بس للأسف بدها شوية شغل و هاد صعب علي بالوقت الحاضر هالديسك هالكني من كام يوم عملت شيش برك كذابي يعني حطيت معكرونة قواقع بدل العجينة بس أين الثرى من الثريا بس حرام الولاد اشتهوا عليها و قلت لحالي بلكي بيمشي الحال آلولي ماما المعكرونة طيبة بس هاي مو شيش برك
    يعطيكي ألف عافية منى و بارك الله فيكي و بجهودك

  3. منى 18 March 2008

    هلا و الله باحلى ام عبادة :) خليلي عينك حبيبتي و ما انحرم لا من طلتك الحلوة و لا من لة صاحباتك
    في ناس بتعمل متل ما قلتي , بس انا و الله ما جربتها هل الطريقة الي عم تقولي عليها , ان شاء الله ببقى بجربها المرة التانية ;)

    نورتي يا قمر

  4. منى 18 March 2008

    هلا رينو :) اية شو شوية شغل , و الله بدها كتير بس مستاهلة متل ما قلتي , سبحان الله و الله يا رينو مجهزة وصفة للمعكرونة بطريقة الشيشبرك و كمان مسميتها الشيشبرك الكذاب :grin ..

    المرة الجاية ببقى ببعت لك صحن على الايميل الك و لاولادك ;)

  5. linda 19 March 2008

    السلام عليكم ورحمة الله وبركاته
    من اطيب الاكلات عندي كتير بحبا و خاصة اللبن بحب اشربو لحالو

    انا جربت مرة طريقة الاخت اني حطون بالفرن شوي قبل ما نزلون عل اللبن
    بس كلهون تفتحو معي و لانو نشفو ما عاد تسكروا مشان هيك ما عاد جربت هديك الطريقة

    منى نحنا ببيت اهلي منحط مردكوش ازا بتعرفيه و ما منحط كزبرة و توم
    تقريبا على كل اكلات اللبن بس منحط مردكوش متل الابلما و المنسف و الشاكريية

  6. منى 19 March 2008

    و الله ما في أطيب من الشيشبرك , بس لو انعزم عليه بيكون أحسن :grin

    ايه بعرف المردكوش أكيد , بس استغربت ان ما بتحطوله توم و كزبرة و لا كزبرة خضراء :roll عن جد هل التقلاية ما في اطيب منها , يا ريت تجربيها , و انا رح جرب حط المردكوش ان شاء الله المرة التانية لان كتير كتير بحب طعمته ;)

  7. أم مــــالــــك 20 March 2008

    يا عيني عليكي :grin ششبرك على اصوله نفس طريقتي بالزبط بس انا مابحب اضيف البيضه :? نشا وبس والتقلايه بس بتوم لانه الباشا جوزي مابحب الكزبره :upset تسلم ايدك يارب

  8. منى 21 March 2008

    الله يخلي الباشا سيد الكل ويعيش و يؤمر يا قمر ;)
    الله يسلمك أم مالك و مية أهلا و سهلا فيك بالموقع و هي شهادة من واحدة نفسها على الطبخ زي العسل

  9. رندوش 23 March 2008

    تسلم الايادي عزيزتي منى
    دائما فنانه وما في منافس لك
    تتحرمي من النار يا رب
    انا متل ام عباده بنشفها شوي
    بالفرن حتى ما تعجن وبحتفظ بالفريز بكميه لوقت زنقه تسلمي
    يا عسل

  10. منى 24 March 2008

    الله يسلمك رندوشة :) هادا بس من زووءك و ان شاء الله الك متل هل الدعوة الحلوة , و الله خاطرلي جرب هل الطريقة , رح جربها لمابعمل الشيشبرك المرة التانية إذا الله راد ;)

  11. kuwaiti_girl 20 August 2008

    كيييفك منى والله مشتاقتلك وايد وايد

    كنت بالفتره الماضيه ماخش على النت كثير
    وكان ناطف قلبي على الموقع
    وعلى السوالف معاكم
    بحس انكم مثل صديقاتي وخواتي

    جربت هالشيشبرك وتسلم ايدك.. عمله متعب شوي بس لذيييييييييييييييييييييييييذ
    استخدمت معه لبن نادك عاد صاحبتي السوريه من الشام قالت لي ان الصافي بيطلع احلى
    المره الجايه ان الله راد بس بكون نسيت تعب اللف شوي هههههه

    نسيت ابعث لك صورة التبوله ويالله على التبوله ما احلالها ما قمت اكلها بولا مطرح حتى صديقتي السورية رحاب قامت تقول لي ان تبولتك احلى من تبولة امها .. عطيتها الموقع عشان تشترك فيه وتشارك معنا
    وكمان اذا الله راد ببعثلك صورة الكبه المقليه اللي عملتها على طريقتك… بس ما تزعلي مني صحيح انها مقرمشة كثير بس ما حسيت طعم اللحمه فيها.. عندي نص على نص اضبط وياريت ما تزعلي مني
    وكيك التفاح بالتوفي يالله شو لذييييذ بس اخر مره نسيت الفرن وتحمرت من فوق وكنت مزينتها باللوز المبشور وراحت الزينه هههههه

    وعيني على كم وصفه بزاجي اطبقها للويكند وبقولك بعدين شو صار فيهم معي
    بعتذر كتييير على التطويل بس جد مشتاقتلكم والحكي طلع معاي من غير ما اوقفه

  12. منى 20 August 2008

    يا كوكو يا كوكو و الله على البال دايما و بقول وينها هل القطة ما بقى نشوفها و لا نشوف تطبيقاتها الحلوة , اشتقت ليك و لحكياتك العسل ياااا عسل

    القلب على القلب , ما انت من الاخوات العزيزات و الغاليات كتير على قلبي ;)

    معك حق , الشيشبرك هادا شغلته شغلة , بس مستاهل , ما هو الطيب بده تعب :upset , هنا و عوافي على التبولة و الكيك , ان شاء الله مطرح ما يسري يمري , و حبيبتي ليش ازعل على الكبة , شوووو !! احنا هنا ديمقراطية و كل واحد بيعبر عن راييه بحرية , بالعكس حبيبتي , ممكن اغير شوية بطريقتي و تطلع أطيب ;) لما اسمع من نصيحتك أو نصائح باقي الاخوات

    خليلي قلبك يا حق و ريتو ما اعدم هل الطلة الحلوة كوكو :) ما انت من الاعضاء المؤسسين هون معنا في الموقع .. لاااا تطولي الغيبة , و الا بزعل منك و ما بتلاقيني الا صرت عندك بالكويت :zzz

  13. kuwaiti_girl 11 November 2008

    عزيييييزتي الغاليه مشكوووره جدا على الحكي الذوق وانتي اهل الذوق والله.. توني كتبت رد طويل عريض بموضوع الدبس .. بحب الكلام والحكي ههههه

    تسلمين يالغلا… وان شاء الله تجين على الكويت واحطك بعيوني والله

    من اليوم ورايح ما بغيب ان شاء الله عن هالموقع
    وتسلميلي يا احلى منمن بالدنيا

  14. منى 17 November 2008

    الله يسلمك يا احلى كوكو في العالم :)
    منورة دايما بقلبي و في الموقع أختي و مبارك عليك البلوك الجديد تحفة :)

  15. بشرى 6 May 2009

    منوشة قلبي ..
    فارط قلبي على شيشبرك وانتي حاطة هالصورة وهلأ الساعة 3 بالليل ما خرج قوم ساويه
    بس بكرا إن شاء الله رح ساويه وخبرك بالنتيجة
    بس سؤالي هوه اللبن رايب ولا زبادي ؟
    ولما بدي حط النشا معلش حط كورن فلور لانو هون مافي :cry وإذا معلش كم ملعقة بدي حط وبيضة وحدة ولا أكتر ؟ لكيلو لبن لانو زوجي ما بحبو بقى ما خرج كتر :x
    طولت عليكي بس كتير حابة اعملو الله يخليكي يارب وتسلمي على زووءك الحلو يا أم الفن والزوء .. :zzz

  16. منى 7 May 2009

    هلا بشرى :)
    ان شاء الله تساوييه و يعجبك و يكون على زووءك .

    اللبن زبادي و اكيد فيك تستعملي الكورن فلور عوض النشاء , للكيلو فيك تحطي بيضة مو مشكلة مع نص ملعقة نشاء و اذا اللبن الي عندك مو كتير منيح حطي معلقة كاملة

    بشرى الله يخليك لا تحكي هيك , انا هون تحت الامر و بالخدمة و اي سؤال تاني من عيوني ;)

  17. بشرى 10 May 2009

    يسلم إيديكي يارب .. هلأ عم دوق أول لقمة .. فرحانة كتير إنو زبط معي .. متل ما قلتي تمام نفذت وطلع بيجنننننننننننننننن ..

    تسلمي يارب الله يجعلو في ميزان حسناتك ويخليلك الصغار ويفرحك ربي بكل شي حلو .. :)

  18. لميا 11 July 2009

    رح قوم هلا اعمله :grin

  19. منى 11 July 2009

    يلا جربيه و انا هون لاي استفسار ;)

  20. لميا 16 July 2009

    شو بدي خبرك يا منوش والله طلعت بتجنن المهم انو حموده طار عقلاتو فيه وما عم يصدق انو انا الي عملته
    لان كل يوم بيجي عنا بيتغدى واهلو بحلب وهو بيشتغل ببيروت
    يعطيكي الف عافيه

  21. منى 16 July 2009

    هنا و الف الف عافية لميا , على قلبك و قلب حمودة و عقبال ما تحتلي لقلبه و لا تطلعي منه ;)

    الله يعافي البك و بدنك و اي سؤال انا تحت امرك :)

  22. gsm 3 September 2009

    سلموا ايدك منوشة والله انك اشطر ست بيت بالكرة الارضية اليوم عملت هل الششبرك وهي من اكلات زوجي المفضلة كتييير طلعت طيبة وعجبته وانا كتييير انبسطت هو صحيح انا ما قدرت اكل منها بتعرفي وحام وحالة بس كتيير فرحت انو عملتها وطلعت طيبة وما راح تعبي على الارض يسلموا ايديك يا احلى منوونة بالدنيا كلها :grin

  23. منى 4 September 2009

    ابوس عينك , ان شاء الله الف صحة و هنا و عافية يا رب بكل لقمة اكلتوها , و ان شاء الله انتي فترة بسيطة و تعدي عليكي بالسهل يا رب :roll

    قلبي معك , ربي يقومك بالسلامة انت و البي بي , ديري بالك على حالك و يا ريت لو تحضري وصفات بسيطة هلا لحتى ما تتعبي ;)

  24. DOUHA 27 October 2009

    منى حبيتي ايمتى منحط مرق اللحمة او المي؟؟

    لاني ناوية جربا يوم الجمعة كتير مشتهية عليها

    واي اطيب المي ولا مرق اللحم وشكرا :p

  25. DOUHA 31 October 2009

    اليوم عملت العجيبة بس والله تعبت بس اكيد شغل بستاهل

    هلئ عندي قطاعة للشيشبرك بس انا بحب تكون القطع مو كبار
    انا جربت طريقتك وسهلة ومقاسا حلو شكرا

  26. منامينو 9 October 2010

    وين ششبركتي ؟؟ :cry
    بتطوّل المشاركات لتنزل منى :sigh

  27. منى 9 October 2010

    لا ما بتطول , بس امبارحة جمعة و اليوم شفتها ;)

    بعد زماااااااااااان منامينو , اشتقتلك خيرا الله

  28. منامينو 11 October 2010

    تشتاقلك العافية يا عسل.. وأنا أكتر.. ما منستغني.. ;)

    طمنيني إذا عجبتك وصفة الششبرك البورصـلي.. أوكي؟؟ على فكرة مش راح تلاقيها على أي موقع.. حصريا للقمة طيبة وبس :zzz

  29. منى 25 October 2010

    بتجنن الوصفة منوش , الف شكر الك عليها

    الظاهر لسا ما شفتيها معشبقة على الصفحة الرئيسية :roll

  30. roroo51 16 November 2010

    السلام عليكم و رحمة الله و بركاته
    انت قلتي بالمكونات انه موجود ماء
    بس بطريقة التحضير ما قلتي وين وضعه :sigh
    ممكن أعرف شو دور الماء بالطبخة :zzz
    و بكون كتير ممنونة و شكرا على الطبخ اللذيذ ;)

  31. aboura.n 12 July 2011

    اليوم عملت الشيشبرك…وهي اول مرة حتى ماما ما بتعملو..وطلع طيب وجنبو عملت السمبوسك كمان الوصفة من الموقع وطلع طيب وبيبيض الوش… :zzz يسلمو منوش

  32. sheren 11 May 2013

    كتير بحب أسلوبك بالطبخ وهي أول وصفة رح أجربها وادعيلي تنجح

    • منى 12 May 2013

      يا هلا فيك
      ان شاء الله تعجبك , رح استنى رايك

  33. ام الحسن 23 May 2013

    مرحبا مدام يسلم ايدك شو ما طلع من تحت دياتك اكيد طيب و يسلمو ع الوصفة مكتوبة بالتفصيل بس بتعرفي انا بعد ما بقطع الشيش بركات بخبزهن بالفرن شي نص خبزة حسيت هيك احسن اولا ما بيتكسرو لما بينحطو باللين بعدين ما كتير بيفنشوو فيكي تجهزيهن من قبل بيومو تحطيهن بالبراد و تاني يوم تطبيهن باللبن و بيطلعو كتير طيبية

    • منى 24 May 2013

      هلا ام الحسن :)
      انا جربتها مرة بالفرن و طلعت طيبة , بس بالبيت متعودين على هل الطعمة , قصدي من دون خبز , لهيك بحضرها بهل الطريقة
      شكرا كتير للاضافة , نورتينا

  34. اماني 30 July 2013

    يسلمو ايديكي على هالوصفات بس بدي اسالك من فترة عملت الشيشبرك وولزق ببعضو القطع وما طلعت كل حبة بحبتها ممكن اعرف شو السبب وهلا ع وقت رمضان فرزت شوية شيشبرك بس خايفة من وقت طبخو بلبن

    • منى 30 July 2013

      الله يسلمك اماني :)
      يا ترى انت سلقتيه باللبن و الا بالمي ؟
      المفروض يكون السائل عم يغلي و تضيفي الحبات واحدة واحدة لحتى ما تلزق ببعضها و تحركيهن بلطف و تكون طنجرتك كبيرة لحتى تسبح الحبات براحتها

  35. اماني 30 July 2013

    من شيشبرك لي فرزتو كان رقيق شوي ما في اي طريقة اتفادى فيها انو يفتح وقت الطبخ او يعجن ما بعرف اذا رح تساعديني صعبتها شوي :)

    • منى 30 July 2013

      ممممم , ما عندي فكرة و الله , بس ممكن تجربي تشويهن بالفرن قبل ما تضيفيهن ع اللبن , و ان شا الله بيزبطوا

      ايا سؤال تاني من عيوني :)

تقييم الوصفة
عاديةقد أحضرهاجيدةممتازةأكثر من رائعة (2 votes, average: 5.00 out of 5)