القشطة المطبوخة


         وصفة : منى                 2007/09/11                 22 تعليقات
القشطة المطبوخة

من دون القيمق ما منعرف نعمل نص حلوياتنا العربية , بس الغزالة بتغزل على عود , لهيك هي الوصفة هي وصفة بديلة في حال ما كان ممكن نأمن قيمق أو لبة الي منستخدمهن في حلوياتنا العربية . ممكن نستخدمهن لحشي الكنافة أو القطايف او الكرابيج , انت و خيالك , و طبعا الطعمة مو متل القيمق أو اللبة , بس بيطلع طيب كتير و بديل ممتاز للحشوات الاصلية .

بالصحة و الهنا

شو لازمنا ؟
4 كوب حليب
1 علبة قشطة , يفضل القيمر في حال توافره
كوب سميد ناعم
ملعقة كبيرة ماء الزهر
ملعقة صغيرة ماء الورد ( اختياري )
طريقة التحضير

• يقلب السميد مع الحليب البارد حتى يتجانسا .

• يوضع المزيج على النار و يحرك باستمرار و بسرعة بمضرب سلك حتى يغلي و يسمك المزيج .



• تبعد القشطة المطبوخة عن النار و تضاف علبة القشطة و ماء الزهر و ماء الورد و تحرك ثم تترك حتى تبرد .

• أصبحت القشطة جاهزة تستخدم لحشي القطايف و الكنافة أو حسب الرغبة .



التعليقات

  1. Iman 18 May 2008

    هلا عزيزتي منى

    اخيرا ظبت التسجيل عزيزتي راح اطلب منك طلب غزيب لاانو سبق و ذكرتي انه والدك له خبره بالحلويات الله يخليلك اياه المهم اريد منك ان تنزلي وصفه طريقه عمل الكلاج اللي بيحشوه قشطه انا اريد وصفه عجينه الكلاج هههه شايفه شو كتيره غلبه انا
    انا بعرف انهم بيشتروها جاهزه و لكن انا لا اعيش في بلد عربي و المحلات العربيه ما بيجيبوها فحبيت اتعلم كيف اعملها بليز ما تفوليلي صعبه لانو اذا في واحد بالهادنيا عملا معناتو انا راح اقدر و اخيرا شكرا على هالموقع الذيذ و ياريت من فكره الكلاج تنزليلنا وصفات الناس ما بتعملها بالبيت لانو تعودا يشتروها فكتير حلو انو نعرف نعملا بالبيت مثل البسمه المحشيه بالقشطه او الملبن بالفستق او المن و السلوى او طريقه تسكير افواكه الصغيره المشهوره سوريه بها يعني بدي منك انو تعطينا الوصفات التئيله هههه يعني اذا بدك تفكري بشو تبلشي انزلي علاسوق و تخيلي حالك عايشه بالغربه و جايه زياره لاهلك و اسالي حالك شو راح اشتري قبل ما ارجع علء بيتي من حلويات و بهارات و ضيافه و مونه يللا يامنى ورجينا شطارتك لك كل الحب

  2. منى 18 May 2008

    هلا ايمان :)

    بالاول كتير انبسطت ان مشي الحال , و اسفة لكل المشاكل الي صارت معك لحتى قدرت تفوتي للموقع , كان من عيوني ايمان , بس انت فهمت غلط , مو أنا الي والدي اله خبرة بالحلويات , هي الاخت أم نور الله يخليلها اياه 8)

    شوفي ايمان في اشياء ممكن نزل وصفاتها متل الفواكهة المجففة و اشيا بسيطة , بس المن و السلوى صعبة , ما بعرف اعملها :roll

    وعد مني ايمان اذا قدرت حصل طرق لهل الوصفات الي طلبتيها رح جرب و نزلهم , و هلا بعتت رسالة للاخت ام نور , ان شاء الله تقراها و يكون عندها الوقت لافادتك و افادتي كمان

    و بانتظار وصفاتك الي خبرتيني عنها أمولة

  3. Iman 18 May 2008

    عزيزتي منى سوري على الخطاء لكان هدا ابو ام انور ها الله يسلمها اياه بس انا مش عارفه كيل وصلت لام انو بدو يكون قريتلها وصفات اما عنك او في سايت لكي الجميل و على بال ما ترد علينا الاخت العزيزه ام انو الله يخليها انا يا ستي راح اعطيكي وصفه المن و السلوى عندي اياها من كتاب طبخ قديم لسيده معدله ارمننيه اشتريته من اميركا راح ابعتلك اياها بها الكام يوم بس لما طلبت و تدللت عليكي يا منى من هالوصفات العتيقه بدي اسميها لانو انتي و الحمدلله محظوظه انك عيشه في سوريا بلد المعدلين و حواليكي كل هالمحلات اسمالله محلات البهارات و الحلويات و البزورات يعني ما في احلا من هيك و شجعني كمان قصتك مع البهارات الحلبيه و كيف صاحب المحل طلعلك الدفتر العتيق و الله حسستيني انو عم تفتحي شباك بطل على تاريخ بلادنا العتيق المشبع بروائح البهارات و العطورات و الزهورات من هيك قلت لحالي اذا صاحب المحل اقتنع فيها لمنى و اعطاها سر المهنه ليش ما بتدجيب وصفات اعتق من البهارات وصفات انحفرت في تاريخنا و تحطها علء النت خلي كل الاخوات يستفيدوا منها بالاضافه الى انه في كتير حواليكي اما من قرايب او معارف من سيدات كبار بالسن اللي كل اسرار الضبخ موجوده عندهم لا تنسي هذا الشيء كمان و خلينا نحط كل هالتجارب على الموقع و خليه يتميز عن غيره بالوصفات التئيله المعتقه اللي بتعبي الراس والا شو رائيك يا ست الحلوين
    مع خالص التقدير

  4. منى 19 May 2008

    و لا يهمك ايمان , انت قرأت هل الشي على الموقع هون لان الاخت ام نور ذكرت ان والدها معلم حلويات بشي وصفة من الوصفات الي علمتني اياها

    بتعرفي ايمان اول ما اتجوزت لما اجي لاطبخ طبخة أسال امي و بعدها حماتي و بعدها عمتي و بعدها جارتي الي نفسها طيب وبعدها جرب الطريقة الي احسها اطيب الشي, انا روح قلبي اتعلم و مين ما بعرف ان عندي وصفة بساله من دون تردد أو خجل بس المشكلة ان قليل الي بيعطيكي و منهم اذا عطوا بيعطوا غلط , و حتى هل القصة منتشرة بين ستات البيوت , بتلاقي واحدة عندها وصفات لذيذة بس ما بتقول طريقتها لحتى تبقى مميزة بطبخاتها :roll

    و حتى من أصحاب محلات البهارات الاول عطاني وصفته من دون سؤال و عن طيب خاطر و التاني إلي عطاني وصفة الزعتر لو ما يعرف ان عندي موقع نت و خبره اني رح أحط اسمه ما كان عطاني الوصفة , يعني دعاية و مصلحة بالأخير ..

    و غيرهم عطوني وصفات كتيرة , بس لما جربتها كانت مو تمام , متل وصفة السحلب أو بهارات الكاري ..

    انا روح قلبي الوصفات التقليلة , مرة جربت الراحة , طلعت طيبة بس مو راحة , طلعت شي بيشبه المارشميلو :grin

    عم استنى المن و السلوى على نار , و اذا عندك وصفات تانية انت كريمة و نحنا منستاهل

  5. ام نور 20 May 2008

    السلام عليكم يا اخواتي العزيزات,انا دائما معكون ولا استطيع الاستغناء عن هذا الموقع المفيد ابدا.
    انا جاهزة يا اخت ايمان لاي سؤال او اكلة حلويات بتحبي جيب طريقتامن والدي خصوصي له 35 سنة بمجال الحلويات العربية والافرنجية وعنده باتيسري في لبنان ولا يبخل علي بأي سؤال وانشالله بس انزل علبنان ناوية اعمل دورة مكثفة بالمعمل واتعلم تطبيق كتير حلويات مع الاسف كنت شوفو عم يعملون قدامي بس ما كنت اهتم قبل الزواج وما عرفت قيمة لا سافرت وانحرمت من كل الانواع متل الفطائر بجوز وبقشطة وشعيبيات وفي اكلة اسما الملوكية وهي عبارة عن عجينة المعمول ومحشية بالقشطة المطبوخة والمكسرات بداخلا :p سدقوني اكلة اما المفروكة ما بعرف اذا الاسماء متشابهة بين لبنان وسوريا .ومتل ما تفضلتي وقلتي المسافر كتير بيستحلي شغلات وبيصير يحاول يتعلم ويجرب ايا شي من بلدو ,بالنسبة لا الكلاج عزيزتي من شوي اتصلت وفهمت شو قصتا والبابا اتفاجىء وقلي بنتي لا هون وصلت مواصيلك لا عجينة الكلاج فطلعت العجينة كتير صعبة ومكلفة لان تصنع من زلال البيض ومتوفرة بشكل كبير في لبنان وحتى الدول العربية وهو بيجيبا من المعمل واقترح علي انو ممكن ابقى لما انزل علبنان اخود العجينة خصوصي انها مغلفة جيدا واضعهافي الفريزر ووقت الاستعمال اخرجها قبل ربع ساعة واغطسها بالحليب لانها تكون يابسة واحشيها بسرعة بالقشطة المطبوخة واقليها وفي لبنان بيحشوها بالقشطة البقرية وبيزينوها بالفستق وبياكلوها نية يعني حسب الرغبة انشالله كون قدرت جاوبتك واي سؤال انا بالخدمة

  6. ام نور 20 May 2008

    ماشالله عنك يا منى حتى الراحة جربتيا مع انها صعبة كتير عمي اخو والدي عندو معمل خصوصي لا صنع الراحة والملبن والنوجا وهالشغلات والها مكنة خاصة كنت شوفا بتعمل كل الشغل هو بس بيدخل المقادير ولكن انشالله رح اسال وجيب فكرة عن المقادير زيادة معلومات :)

  7. منى 20 May 2008

    انا ام نور بحب جرب مزاج , يعني الراحة نفسها ما كتير بحبها بس لما شفت وصفة قلها ما قدرت قاوم الاغراااء :grin

    الله يعطيكي العافية ام نور , يا ريت تسجليني مع بالدورة عند البابا , و الله شو حابة اععمل هيك دورة , الله كريم ان شاء الله ;)

    شكرا ليك على الرد و الاهتمام

  8. Iman 21 May 2008

    اهلين بام نور شكرا يا عيني على اتصالك بالبابا الله يطول بعمره قوليلو انو في كنير متلي كتار غلبه بيعبوا يتعملو كل شيء المهم لما قريت انو قال لك لهون وصلت مواصيلك فرحت و قلت اجت الوصفه اخيرا و لكن للاسف لسه ما في وصفه بس خلاص صار الموضوع حامي و لازم افوت عالمطبخ و ابلش تجارب ما بقا بدها ههههه

    بوعدكم انو اذ جبتولي وصفه الكلاح انزل وصفه الملبن عندي اياها و عندي كمان وصفه عجينه المعمول المحشيه بالقشطه ووصفات غريبه كمان ووصفه الحلقوم و السنيوره و الغريبه المحشيه بالتمر بس طولوا بالكم علي لاني مشغوله كتير هاليومين

  9. منى 21 May 2008

    :eek المن و السلوى فرد مرة , ممم شكلي متلك امولة صار لازم ادخل على المطبخ , الله يعطيكي العافية يا رب و ان اء الله بس ما تفضلي شوي بتنزلي باقي الوصفات

  10. dado 24 November 2008

    مرحبا منى..
    عنجد ما بعرف شو بدي قلك.. هي الوصفة كانت حفر وتنزيل بالنسبة إلي … لأنو أنا كتير بحب الحلويات العربية متل القطايف والكنافة وخلافة وهون مستحيل تلاقي قشطة عربية … يعني حتى محل الحلويات العربي اليتيم هون مرة عرضوه على التلفزيون طلعوا بيستعملوا قشطة مطبوخة.
    صرت عاملتها 3 مرات وكل مرة أطيب من يلي قبلها… آخر مرة استخدمتها بوصفة ليالي لبنان ,,, يممميي .. كتير كتير لذيذة.
    يسلموا إيديكي يلي بيضلوا يتحفونا بكل شي طيب وبيشهي ونرتب وبيبيض الوجه

  11. منى 25 November 2008

    الف هنا دالو , كتير منيح ان الوصفة زبطت معك و سدت حاجة .
    ضحكتيني على محل الحلويات اليتيم :grin عوضك على الله .
    كمان مرة هنا على كل مرة جربتي فيها القشطة و الف شكر ليك على الكلام الزووء

  12. summer 16 December 2008

    مرحبا عزيزتي :
    دايما نتشكرك على الأكلات الطيبة. بس بدنا منك تزيديلنا الحلويات العربية وحابة أعرف منك طريقة حلاوة الجبن. شكرا الك كتير

  13. منى 17 December 2008

    هادا بس من زوءك أختي :)
    تكرمي هلا في طريقة لحلاوة الجبن للأخت هيا رح نزل الوصفة اليوم اذا الله راد ;)

  14. Mays 4 February 2010

    أنا سمعت سيرة الملوكية من الإخت إم نور و كتير حابة أعرف طريقتها ، بس بصراحة أنا كنت مفكرتها بتنعمل من فرك الكنافة ، طلعت القصة غير و بدها عجينة المعمول.
    يا ريت إم نور من بعد إذنك إذا عندك الطريقة المظبوطة تنزليها لأني كتير حابة جربها قريبا.

  15. رهف مهتدي 9 September 2010

    السلام عليكم ورحمة الله وبركاته:

    الله يعطيكي العافية اليوم جربتها مع الكنافة وطلعت تمام التمام يعني كتير طيبة

  16. منى 16 September 2010

    هلا رهف :)
    الف صحة و هنا و عافية يا رب على البك و الب كل مين داقها ;)

  17. حمودي 19 January 2011

    سلام مدام منوش
    بدي اسئلك كم سؤال :
    اقدر احفظ القشطه في الثلاجه ؟ كيف ؟
    وكمان اقدر استخدمها لاي طبخه فيها قشطه مثل التيرمسو وغيره وغيره ؟
    ………….
    مع خااالص تحياتي
    AHMED

  18. منى 19 January 2011

    لا احمد هي بس للطبخات العربية متل الكنافة و المفروكة و هل القصص
    فيك تحفظها بالبراد لمدة 5 ايام بالشتوية و ااقل بالصيفية حسب الجو

  19. نور من قبرص 14 January 2014

    فينا نحتفظ بالقشطة بالفريزر لوقت اللزوم

    • منى 17 January 2014

      لا نور ما بتزبط

  20. منال 9 July 2014

    ياست منى بدي اتغزل فيكي والا بالقشطة شي ناهي الله يعطيكي العافية

    • منى 9 July 2014

      هههههههههه بالقشطة اطيب , كلك زووء با عسل :)

تقييم الوصفة
عاديةقد أحضرهاجيدةممتازةأكثر من رائعة (1 votes, average: 5.00 out of 5)