كيف أحضر الكيكة الاسفنجية


         وصفة : منى                 2007/10/25                 72 تعليقات
كيف أحضر الكيكة الاسفنجية

الكيكة الاسفنجية كيكة بسيطة و خفيفة و هي أساس الكاتويات الكلاسكية ,الفوريه نوار و الكاتو بالشوكولا و الكاتو على ليمون أو على برتقال أو البوش كاتو الكراميل , شو بيخطر ببالك , الكاتو واحد باختلاف النكهات الي ممكن تضيفيها أو طريقة التزيين .


هو مو صعب , بس تحضيره بده شوية انتباه و في ملاحظات لازم تاخديها بعين الاعتبار لحتى يزبط معك من اول مرة , أول الشي كل المقادير المستعملة من بيض و طحين و غيره لازم تكون بدرجة حرارة الغرفة ., الملاحظة التانية لازم نخفق مزيج صفارالبيض حتى يتضاعف حجمه لثلاث مرات تقريباً و هدا هو السر الي رح يعطينا كاتو خفيف كتير . , الملاحظة التالتة ان الطحين رح نضيفه بالتدريج و منقلب المزيج بكل هدوء و لطف و باتجاه واحد حتى ما يطلع الهواء الي دخل لمزيج الصفار , و أخر ملاحظة ان الفرن ما بينفتح نهائياً قبل مرور 40 دقيقة ,


أنا بفضل ما ضيف زيت أو زبدة للوصفة , بحب يبقى الكيك متل لوحة بيضا حيادية , لحتى تظهر كل النكهات الي رح نضيفها عليه , بس بكل الاحوال اضافة ربع كوب زبدة مدوبة مع الطحين رح يخلي الوصفة مضمونة النجاح , يعني اذا كانت هي اول مرة بتحضري الكيك الاسفنجي و خايفة منه , ربع كاسة زبدة مدوبة مع الطحين .


بالصحة و الهنا

-المقادير:

5 بيض
كوب و ربع طحين
ربع كوب كورن فلاور
ملعقة صغيرة و نصف بيكنغ بودر
كوب أو كوب و نصف سكر ناعم
نصف كوب ماء
فانيليا
- طريقة التحضير :

• قبل البدء بتحضير الكاتو ينخل الطحين و الكورن فلاور و البيكنغ باودر مرتان .

• تدهن صينية دائرية بقطر 26 بالزبدة ثم تغلف بورق البارشمان أو ورق الزبدة أو ترش بالطحين , يحمى الفرن على درجة حرارة 180 درجة مئوية .

• يفصل الصفار عن البياض , يخفق الصفار مع السكر الناعم و الفانيليا و الماء باستخدام خفاقة كهربائية حتى ينتفخ و يبهت لونه و يتضاعف حجمه 3 مرات تقريباً .

• باستعمال ملعقة خشبية كبيرة يضاف مزيج الطحين المنخول بالتدريج ملعقة ملعقة لمزيج البيض و يقلب المزيج بلطف و باتجاه واحد كي لا يخرج الهواء من المزيج .

• يخفق البياض مع رشة ملح خفيفة حتى يشكل قمم طرية , لا يخفق زيادة و الا تفتت أثناء تقليبه مع مزيج الكيك .

• يضاف البياض لمزيج الكيك و يقلب بلطف و باتجاه واحد . بعد انتهاء المزج يجب أن يكون مستوى مزيج الصفار و الطحين أقل بقليل من المزيج الجديد و هذا دلالة على نجاح الوصفة .


• يصب المزيج في الصينية المدهونة و يخبز الكاتو في الفرن لمدة 50 دقيقة أو حتى ينضج الكاتو .





تنويعات و إضافات :

• للحصول على كاتو بالكاكاو يستبدل ربع أو ثلث كوب من الطحين بالكاكاو البودرة .

• يمكن إضافة العديد من النكهات للكاتو باضافة برش الليمون الناعم أو برش البرتقال مع السكر , و يمكن إضافة ملعقة كبيرة من روح الفراولة أو الأناناس بعد إضافة الطحين .

• تحضر الكيكة قبل بيوم من وقت التقديم كي تنشف قليلاً و يسهل تقطيعها لطبقات .

التعليقات

  1. linda 25 October 2007

    قصتي قصة مع هل الكيكة

    جربت طرق خير الله و كلو معقد وبالاخر تفشل معي
    بعدين عرق الذكاء يلي كان منقطع براسي مدري كيف انوصل واتزكرت طريقة امي و ساويت كيكة يا منى والله العظيم بتجنن نفخت و طلع لونها بيجنن وقتها عملت قعدة انا وجيراني اللبنانيات بالسويد لانو وحدة منهون قررت تلبس حجاب و حشيت الكيكة فواكي وزينتها بالكريمة وكتير حبوها

    يتبع في الحلقة القادمة باينتك نعستي هلء من كتر الحكي تبعي

    بدي ارجع اسألك الكوب يلي بتستعمليه هو الكوب العيارات يلي منشتريه ممن السوق واحد بيكون للسوائل و واحد للمواد الناشفة

  2. بدور 26 October 2007

    مممممممممممم رح جرب هالكاتو شكلو خفيف نضيف بس يا ترى انتي شو داهنة على وشو؟ ولا من الخبز بالفرن هيك لونو :roll لإني شتهيت عليه 8)

    الله يخليلنا ياكي والله مافي اشطر منك ;)

  3. منى 27 October 2007

    هلا ليندا :)
    و انا متلك , ما كان ينجح معي هل النوع من الكاتو و دايما ما بينفش لحتى جربت هل الوصفة
    و بعدها صارت معتمدة عندي و السر كان اني ما عم اخفق البيض منيح و لما بحط الطحين بحطه كله مع بعضه :roll

    بالعكس ليندا , انا من حكياتك بعمري ما بنعس :grin , و الي يتبع هو وصفة ماماتك ..
    لازم تعطيني طريقتها و جربها و بخبرك شو بيصير معي..

    الكوب الي استعملته لهل الوصفة هو كوب الشرب العادي و وزن كل كوب طحين هو 150 غرام ..
    ما بستعمل الكوب المعياري , مع انه عندي واحد , لحتى تكون المقادير متوفرة لكل الاخوات :)

  4. منى 27 October 2007

    هلا بدور :)
    انا مو داهنة وشه شي , لحاله رح يصير هيك لون

    بدور هل الكاتو مو كتير طيب لحاله , بدك تحضريه و تشربيه بش عصير و تحشيه بالكريما و الفواكة و هيك فصص لحتى يصير طيب
    فيك تعتبريه أساس , بس ما بينفع لحاله ;)

  5. منى 29 October 2007

    تسلم هل الديات ليندا :)

    وصفتك وصلت و نزلتها و شكلها بيجنن , فيك تشوفيها [URL=http://www.l2ma.com/content/view/268/1/]على هل الرابط[/URL]

    رح جربها قريب اذا الله راد

  6. ام نور 29 October 2007

    اختي ممكن ينجح هالكاتو لا السويت رول ولا مش مجربتي حابي جرب السويت رول وعم دور هالطريقة الف شكر :)
    وبدي اعرف ليش احيانا بعد ما اكتب التعليق ودخل الرقم ما بيروح وبيقلي في غلط شو بنزعج وما بعود الي جلادة ارجع اكتب :cry

  7. منى 29 October 2007

    هلا فيك اخت ام نور :)

    ليكون قصدك السويس رول ؟

    و أنا مجربته بدل المرة مية و بيطلع كتير رائع للسويس رول أو الكاتويات المحشية :)

    معك حق , نفس المشكلة بتصير معي :sigh
    بعد ما بكون كتبت رد طويل و عريض بيقول لي غلط لهيك صرت اعمل نسخ للرد قبل ما ابتعته ;)

  8. ام نور 31 October 2007

    صح قصدي السويس رول الكاتو المبروم المحشي ؟وفكرو كمان لما نكتب التعليق ننسخو في حال ما راح ما بيصير شي :)

  9. منى 31 October 2007

    من عيوني التنتين ام نور :)

    رح حط لم وصفة السويس رول إذا الله راد , بس لا تزعلي مني اذا اتأخرت شوي ;)

  10. سارونات 29 March 2009

    السلام عليكم و رحمة الله و بركاته

    بس خمس بيضات يا فرحتي كتير حلو هالشي انا كنت مترددة ساويه لان كمية البيض كانت كبيرة اناكنت كاتبة الوصفة من الموقع من قبل و كان فيها 8 بيضات مو هيك :?

    راح ارجع اكتب الوصفة الجديدة و قريبا ان شاء الله راح جربها

    بالتوفيق

    سلام

  11. منى 29 March 2009

    صح بس هلا عملت عليها تعديل لتصير مناسبة لقالبي ;) ان شاء الله تجربيها و تظبط معك

  12. رنا 2 April 2009

    الكورن فلاور انخله مع الطحين ؟؟

  13. منى 2 April 2009

    اي رنونة ننخلهم مع بعض

  14. رنا 12 April 2009

    هلأ باخر خطوة مكتوب
    بعد انتهاء المزج يجب أن يكون مستوى مزيج الصفار و الطحين أقل بقليل من المزيج الجديد و هذا دلالة على نجاح الوصفة .

    قصدك انه المزيج اللي رح يصير عندي وقت بحط البياض اكتر من مزيج الطحين والصفار ؟؟يعني تقديريا :zzz
    عم فصفص هالوصفة لشوف هالمرة رح تنجح ولا شلووون

  15. منى 12 April 2009

    صح رنونة , لازم تكون بالتقدير اكتر شوي من قبل اضافة البيض و هادا معناه انك ما خفقتي البياض زيادة و خليتيه يروح منه الهوا 8)

  16. سارونات 12 May 2009

    السلام عليكم و رحمة الله و بركاته

    الكيكة الاسفنجية بالفرن الله يستر و تضبط
    انا دقتها قبل ما دخلها الفرن و شو طيبة طعمتها و بتشبه كتير طعمة كيك البرتقال بكريما البرتقال لان ضفت بشر برتقال للبيض عن جد بشر البرتقال غير شي و لازم تبشرو و تحطوه بالفريزر لوقت الحاجة انا هيك ساويت عادة بس منحط بشر ليمون بالفريزر بس هالمرة حطيت بشر برتقال لان عن جد بيعطي فرق كبير بالطعم و الريحة

    بالتوفيق
    سلام

  17. منى 12 May 2009

    بالتوفيق الك سارونات , برافو عليك شجاعة و هيك بحبك دوما , يااااا رب يظبط معك و انا قاعدة ادامك جنبك الفرن عيني على الكيك :roll

  18. سارونات 12 May 2009

    السلام عليكم و رحمة الله و بركاته

    الحمد لله اختي منى دعوتك استجيبت و الكيكة طلعت جيدة نسبيا و ممتازة كأول مرة لسه بدها شي واحد او واحدو نصف سنتيمتر ارتفاع
    الحمد لله فيها ثغرات يعني هوائية بكرا ان شاء الله راح اقسمها بالنص و احشيها بالكريما و الفواكه تنشوف كيف بتطلع

    بالتوفيق اختي منى

    الى اللقاء مع موجر اخر للاخبار من مطبخ سارونات

    سلام

  19. أم الهدى 23 May 2009

    عزيزتي منوش ساويتو بس الصراحة ما كتير ظبط معي ما نفش كتير وطلع شوي معجن أكيد الغلط مني بس حابة أعرف شو هو بالتحديد لحتى أعيدو مرة تانية ويظبط
    أول شي الصفار خفقتو في خلاط العصير لانو ما عندي خفاقة كهربائية الصراحة حجمو تضاعف مرتين مو أكتر
    والبياض ما فهمت شو قصدك يتشكل قمم طرية فخفقتو شوي لحتى عطى رغوة بتشبه رغوة الكابتشينو وشوية فقاعات
    بقى كان لازم أخفقو أكتر ولا شو
    ومشكورة كتير كتير على قد مالك متحملة سقلتي وأسلتي

  20. reem220 24 May 2009

    جربتو لهالكاتو بس ما زيط معي وما نفخ واحترق من تحت هههههه مع انو ما كمل تلتين الساعة بالفرن بظن الفرن كان سخن كتير بس سؤال كيف بتعرف الوحدة انو حرارة الفرن كويسة أو لأ يعني هون الأخوات بيقولو منحطا بالفرن بدرجة حرارة 180 مثلا أنا ما عندي مقياس حراة بالفرن كيف بعرف إذا مناسبة ولا لأ؟الله يجزيكن الخير

  21. منى 25 May 2009

    هلا ام هدى :)
    أختي المشكلة الي صارت معك سببها انك استعملتي الخلاط و ما استعملتي المضرب الكهربائي
    البياض و الصفار لازم يوصلوا بالخفق لنفس الدرجة الظاهر بالصور على هل [URL=http://www.l2ma.com/content/view/233/2/]الرابط[/URL]

    ان شاء الله اذا عدتي التجربة بطريقة خفق مزبوطة رح يصير الكيك تمام التمام ;) و اي سؤال تاني انا بالخدمة

  22. منى 25 May 2009

    هلا ريم :)
    شو ازعلت على الي صار معك و السبب على ما أظن ان حرارة الفرن عالية كتير , هادا السبب الواضح من الي صار معك
    درجة الحرارة على فرنك لازم تكون ما بين 3 و 4 و مايلة على 3 أكتر شوي :roll و الا يا ترى فرنك ما اله معاير بالمرة ؟

  23. reem220 15 June 2009

    ما تزعلي ولا يهمك يا احلى منى بدي ضل جرب ليزبط معي لأنو شكل الكاتو من إيدك بيشهي
    منى الفرن عندي بلا عيارات خالص مالو إلا راسين للتشعيلمن فوق وتحت شو اعمل كيف بعير حرارتو؟؟
    يسلمو ايديكي يا منى والله يجزيكي الخير بصراحة ماتوقعتك تردي عمشكلتي :) :?

  24. منى 16 June 2009

    هلا ريومة :)
    كيف يعني ما رد :roll انت من اهل البيت و ان شاء الله ببقى معك لحتى تزبط , يعني يا انا يا فرنك :grin

    ممكن تحاولي تحطي العيار على النص , لان هادا هو العيار تقريباً ;) و يا رب يزبط معك

  25. نوارة 1 July 2009

    الله يسلم دياتك ميمو بس عندي سؤال ليش مننخل الطحين
    وضروري نخل الطحين لكل الكاتويات والمعجنات (البيتزا والفطاير) ولا بس لهل الوصفة

  26. منى 8 July 2009

    هلا نوارة حبيبتي :)
    مننخل الطحين لحتى يدخل الهوا بين ذراته و يبنفخ اكتر .

    هو لازم تنخلي الطحين لكل وصفات الحلويات اما المعجنات حسب الوصفة ;)

  27. أم الهدى 23 July 2009

    تسلم دياتك يارب اليوم رجعت جربتو واستعملت الخفاقة الكهربائية وظبط الحمد لله وياي شو نفش
    بس بدي أسألك سؤالين الأول أديش ارتفاع القالب عندك لانو حسيت كأنو القالب عندي شوي ارتفاعه قصير
    والتاني ليش لما منضيف الطحين للبيض منحرك بالملعقة
    هلق أكيد لحتى ما نخسر الهوا تبع خفق البيض بس سؤالي لو ضفنا الطحين ونحن عم نخفق بالخلاط بالتدريج رح يفرق لانو بالخفاقة رح يبقى الهوا موجود
    وألف ألف شكر إلك

  28. منى 23 July 2009

    كتير كتير انبسطت انك رجعتي و جربتيه و ان طلع معك متل ما بدك ..

    القالب الي عندي اترتفاعه ااقل من الشبر بشوي و الطحيين نضيفه بالتدريج متل ما قلتي لحتى يبقى الهوا في المزيج و اذا قلبنا المزيج بالخفاقة الكهربائية بعد ما رح نضيف البياض رح تفرق كتير و فيك تقراي الفاتحة مبدئيا على نفشة القالب :grin

  29. DOUHA 24 October 2009

    جد مو معقول شو سهل شكرا منى

    يلا لاقيني بكاتو الكراميل :p

  30. منى 25 October 2009

    هنا و صحة و برافو عليك ضحى :)

    لاحقتك

  31. الحنونة 10 November 2009

    قبل شوي طلعتو من الفرن والنتيجة رهيبة
    من زمان بحلم انو اعمل كاتو اسفنجي وينجح معي متل اليوم
    كنت فكر انو في سر بس لمحلات للحلويات
    بس هلا تأكدت انو كلا شي طيب منلاقيه بلقمة طيبة

    تحياتي ,,,,, سوسن

  32. نهى 14 November 2009

    ماشاء الله يامنى طلعت حلوة اوى رغم انى كنت مستغربة فكرة الكورن فلاور في الكيك بس طلعت حلوة وعملتها وانتهى نصفها حتى الآن.. طبعا بعد اضافات الكريما والفواكه اللذيذة..
    بس مش عارفة ليه عندى لون الكيك اغمق من عندك ياتري ده يرجع لصفار البيض ولا لايه بالظبط؟؟

  33. sandybil 17 November 2009

    انا مشتركة جديدة
    وتقريبا تابعت كل وصفات بجد هى بتشهى
    بس فى أشياء ما بعملها لأنه ما عندى أدواتها

  34. منى 20 November 2009

    اهلا و مية سهلا اختي الحنونة :)
    لو تعرفي شة انبسطت لان جربتي الوصفة و طلعت تمام , ن شاء الله ربي الف صحة بكل لقمة اختي :zzz
    ربي يديم المعروف دوما و نورتي عن جديد

  35. منى 20 November 2009

    هلا نهى :)
    هنا و صحة يا رب على كل لقمة و ممكن الكيك يكون اغمق نتيجة التصوير او هيك :zzz

    الحمد لله ان الوصفة عجبتك و شرفتي يا قمر

  36. منى 20 November 2009

    اهلا و سهلا فيك سندي بل , شرفتي الموقع و نورتي بيتك .

    ممكن نشوف الاشياء الي ما عندك منها , مرات كتيرة في الها بديل ;)

  37. شفاء 11 March 2010

    ماشاالله هالكاتو شو طيب
    صرت عاملته شي 3 مرات
    والحمدلله بينجح

  38. منى 11 March 2010

    الحمد لله :) الف صحة و هنا و عااافية 8)

  39. لولية 28 March 2010

    :cry :sigh

  40. منى 28 March 2010

    ????

  41. بشرى 4 April 2010

    كيفك منوشة ؟ هالصورة قالبين فوق بعض ولا قالب واحد ,, كيف بالنص صاير في طبقة بني متل اللي عالوش :roll

    جربتو اليوم وطلع كتير منيح وناطرة للمسا لحتى اعملو الكريما بس قالبي كان كبير قام طلع رقيق الكاتو :grin

  42. منى 8 May 2010

    هدولة اكتر من قاب و مقطعين مربعات و مرتبين فوق بعض ;)

    الف هنا و صحة و مقدما و ان شاء الله يكون طلع يممي

  43. farah 9 May 2010

    :)

  44. farah 9 May 2010

    ليه الصورة ما عم تظهر يا ترى المشكلة من عندي؟؟

  45. منى 10 May 2010

    لا من عندي , حذفت الصورة لاحمل الصورة الجديدة و ما عم ااقدر فوت على الفيس بوك لحتى ااقدر حملها , بقى الصورة حتى يتصلح النت عنا :roll

  46. منالو 19 August 2010

    السلام عليكم كل سنة وأنتم سالمين أجمعين ………..
    أنا مسجلة جديد بتمنى أنكم تقبلوني بهذا الموقع اللطيف وإن شاء الله بدي نزل وصفات اكتير بدها تعجبكم :roll

  47. منى 20 August 2010

    هلا فيك منال , نورتينا و شرفتينا و ربي ينعاد عليك بالخير و الصحة

    رح استنى وصفاتك فيك تبعتيهم برد هون و انا رح انشرهم باسمك ان شاء الله

    نورتي اختي

  48. Noora 20 December 2010

    يعطيكي العافية على هل كيك الرائع بس سؤال:شو يعني كورن فلاور مو سمعانة فيه

  49. حمودي 12 January 2011

    امممممممممممم
    في الحقيقه انا ماشفت الصور عشان اقول اني طبقته صح
    بس هوا طلع طيب وكمان لين وحشيته بالكريما وطلع جنااااااااااااااااااااااااااان
    بس بدي اسئلك مدام منوش ع السمك تقريباً صار 3-4 سم وعملته في قالب 26 سم شو رأيك هيك بيطلع معك سمكه ؟
    ………….. ؟
    مع خاااااااااااااااالص تحياتي
    Ahmed :)

  50. حمودي 28 January 2011

    يعني بدي اجرب واجرب واجرب ولا حدا بفيدني بينصحني الله يسامحكم
    ………….
    انا اليوم عملت الكاتو للمره الثانيه بس صارت معي شو شغلات غريبه :
    1- صفار البيض ما تضاعف كثير
    2- وكمان صار من تحت الصفار متل المي يعني من فوق رغوه بس من تحت مي
    3- البياض ما نفش كثيرولا طلعت فيه قمم طريه خالص اه يمكن لانه :eek سقط عليه شوي صفار
    4- وفي الاخيربعد الجهد الجهيد والتوتر صارت بسمك 2 سم ويمكن اقل :cry :x
    ………….
    طلب ورجاء خاص :
    مدام منى ياريت تسامحيني ع كتر الكلام بس لازم ترفعي صور لطريقه عمل ها الكاتو بالتفصيل الممل
    :sigh
    عشان نقدر نطبقه بشكل صحيح
    (ياريت تاخذي كلامي بعين الاعتبار )
    ……………
    مع خالص حبي واحتراااااااااامي
    Ahmed

  51. Jassy 1 February 2011

    السلام عليكم ورحمة الله

    منى خانم ! معلمتنا !!
    قبل ما خبص وجرب فيه بدي اتأكد بس :
    1. إذا مو طحين حلويات .. بصير طحين عادي؟ لازم نضفلو شي ؟
    2. القالب عندي صغيييير وواطي شوي، واحترت كتييير كيف قسم الكمية .. يعني المشكلة ان ما فينا نقسمها بالنص هههه وإلا بيضتين ونص كيف بينحسبوا !
    فقررت اعمل خمس الكمية هههه .. يعني 1 بيض – ربع كوب طحين – ملعقة صغيرة نشا ذرة – نص ملعقة بيكنج بودرا – تلت ارباع كوب سكر- ملعقتين كبار مي – رشة فانيليا . شو رأيك ؟؟ :?
    وكمان بظن الخبز لازم يكون نص ساعة ما اكتر بما ان أرق.
    ويبئى بعملها على تلت أربع مراحل مشان الحشو.
    ولا ….. فكرة تانية بس حاسستها فائسة شوي :upset :zzz أن اوكي اخلط الخلطة .. بس إخبزها على ماحل … يا ترى بتفئس بوقت النطرة ؟؟ ولا شو اعمل فيها ؟

    منوشة الله يخليكي حتى لو مانك مجربة هالأفكار الجهنمية .. بس من خبرتك بالحياة انصحيني يا إما اختاري وحدة من الطريقتين لجربها بالاول :grin .

    انا بأحر الانتظاااااااااار لأن ضروري جدا جدا جرب هاليومين .. بعد أسبوع عيد ميلاد جوزي وبدي اعتمد الوصفة. الله يخليك ويجزيك الخير.

    والسلام عليكم ورحمة الله

  52. حمودي 2 February 2011

    ههههههههههه
    انتي بدك تقسمي الوصفه اذا كانت ما نجحت ع المقادير المضبوطه اشلون رح تنجح بعد التقسيم

    يالله جريبي واحنا منتظرين النتيجه
    هههههههههههههههههه
    لاتزعلي :cry
    …………
    جااااااري انتظار مدام منى . . .

  53. منى 2 February 2011

    هلا Jassy :)
    شو بيضة الله يسامحك اي بيلزق بعقب القالب و اصلا ما رح تقدري تخفقيهم منيح , شو رايك اعطيكي المقادير بالوزن و انتي تستخدمي 3 على 5 من الوصفة
    يعني 3 بيضات
    190 غ طحين
    15 غ نشاء
    75 غ ماء
    السكر هلا ما عندي سكر ناعم و الا كنت وزنته بس مو مشكلة لان انتي فيي تقللي او تكتري على كيفك و ممكن تستعملي تلات ارباع كاسة تقريباً ;)

    انتبهي على الملاحظات لان كتير مهمة , و اهم الشي ان كل المواد تكون بدرجة حرارة الغرفة و تخفقيها و تضربيهالحتى تتشاهد و تبوس التوبة :grin

    شوفي هي الوصفة حساسة و اذا بدك تجربيها اول مرة انصحك لن ما تحضريها الا بطحين كاتو ;)

    اكيد الخبز كمان رح يقل و اذا طلع سماكته بالقالب حوالي 2 سم فممكن تلت ساعة تكفي , بكل الاحوال عينك بدلك

    لا لازم تخبزيها فورا بعد ما تجهز و بعدها خليها تبرد وغلفيهاكتير منيح و خليها بالبراد تلات ايام بهل البرد ما بيصرلها شي

    شوفي انا شو بعمل وقت الزنقات , يجهز الحشوة و الكيك قبل بيوم و حتى ممكن تحشيه الكيك , بس بترك الكريما الشانتيه ليوم التقديم

    ايا سؤال تاني من عيوني

  54. منى 2 February 2011

    هلا فيك احمد
    شوف اخي هل القالب بده مزاج و رواق لما بتحضره اول مرة لحتى ينجح معك , بعدها بيصير كتير سهل ان شاء الله
    من كلامك اتوقعت انك اما خفقت الصفار على ايدك او على خلاط الكوكتيل لان اذا خفقته بالمضرب الكهربائي لمدة كافيه رح ينفش و يصر بيجنن , بتعرف انا احيانا ممكنغير الوعا الي بديت فيه على اد ما بيتغير الحجم
    تاني شي , او تاني غلطة هو هل الكم نقطة صفار الي وقعوا بالبياض , بعمره ما بيعود البياض ينفخ و يصير متل الكريما لو نزلت فيه ضرب نص ساعة
    اكيد بعد هل التعب , الي اتخلله كم غلطة , رح يبقى حجم القالب متل ما هو

    تكرم عينك اخي كلامك على عيني و راسي و رح نزل صور تفصيليه مملة لهل الوصفة ان شاء الله

  55. Jassy 3 February 2011

    السلام عليكم ورحمة الله :)

    يا سلاااام .. بس قولتك منوش عندي ميزان لاستفيد تماماً من الـhint يلي عطيتيني ياها؟ بس لا والله استفدت تمام لأن عندي قمع مقياس للمواد الصلبة :) يسلمو كتير.
    بصراحة هو طبعا لا يخلو الأمر، شوي خبصت بالطريقة ونسيت حط المي من البداية مع الصفار وخفقت البياض كتير (إيه بس مو باسوا التوبة !!! يعليكي شو حكياتك ظراف :grin . وخفت لأن الخلطة طلعت اكتر من تلتين القالب، تقريبا للأخير إلا شوي.
    بس النتيجة كانت رهيييييييييييييييييبة :) النجاح العظيم :) يا عينيييييي الله يجزيك الخير يا منى شأد عم نعذبك وتساعدينا. الله يعوضك ويجزيك دين ودنيا واخرة :) .
    حطيتو نص ساعة فارتفع كتير، وشوي بس أتورة طلعت الطبقة الفوقانية قاسية أتوووورة بس ما مشكلة المرة الجاية بس اعمل البلاك فورست بشيلها. أكلناها هيك متل ما هية :grin مع أن ايه عالقالب ما بيتاكل هيك بس هلئ كانت تجربة.
    الأسبوع الجاي يبئى بعمل قالبين.

    يسلموووووو كتيييييييييييير :) بتجنن

    والسلام عليكم

  56. حمودي 4 February 2011

    هههههههه :grin
    بدي اسئلك نستخدم دقيق عادي ولا لازم دقيق الكاتو ؟ :eek
    وكمان شوقصدك بان
    يكون مستوى مزيج الصفار اقل بقليل من زيج الكيك الجديديعني يكون الصفارمع الدقيق منفوش ولمانضيف البياض يزيد شوي ؟
    انا الصفار بعد مابضيف له الطحين يصير بسمك 3سم
    :? ؟
    مع خالص تحياتي
    وراااااااااااااااااكي ياالكيكه الاسفنجيه والزمن طويل
    …………..
    بتشكرك كثير وسامحيني ع كثير الاسئلك والنكد 8) ;)

  57. زينه عبدالرحمن 13 July 2011

    ما شاء الله شكله كثير حلو بس لسى ما عملته إن شاء الله بس اعمله يطلع حلو مشكووووووووووووووووووورة على الأطباق الحلوة و المميزة ………………

  58. منى 17 July 2011

    ابوس روحك ياسمين :) صحتين و الف هنا ما بتعرفي اديه انبسطتت ان هل الوصفة نجحت معك , هيك انو مو صعبة بس ما بعرف ليش كتير بيخافوا منها :roll

    الطبقة الفوقانية ما بدو تشيليها , بالتسقاية بترجع بتصير طرية ان شاء الله :)

    صحتين و الف الف هنا , و ان شاء الله تنجح التجارب التانية

  59. منى 17 July 2011

    هلا اخي احمد
    الدقيق دقيق الكيك اكيد , و انا ااقصد انو الخفق يكون بلطف و هدوء لحت ما يهبط البياض وقت الخفق

    ان شاء الله بتنجح معاك و ايا سؤال من عيوني

  60. منى 17 July 2011

    هلا زينة :)
    منورة الموقع , مية هلا فيك , شكرا لردك و تواجدك يا قمر و ان شاء الله تجربي شي من الوصفات و يعجبك ;)

  61. رهف 18 October 2011

    تسلم ايديك يامنى جربته وطلع ممتاز

    بصراحة كتير عملت أتواع كاتو والكل يقول رائع بس أنا ماكنت أكون مقتنعة لأني بدي كان هالنوع الخفيف والطري والمتماسك شكرا كتير

    • منى 26 May 2013

      هنا و الف الف صحة رهف , و هادا هو المطلوب لكل انواع الكاتويات , عوافي يا قمر

  62. larooo 28 November 2012

    مساء الخير جميعا
    بس كان عندي سؤال انو شو مقصود بالسكر الناعم ؟ السكر البودرة يعني ؟
    شكرا جزيلا سلفا

    • منى 26 May 2013

      السكر الناعم هو الي بين البودرة و بين الخشن , اذا مو متوفر استعملي السكر البودرة

  63. rima 21 June 2013

    مرحبا انا كتير بحب اعمل الكاتويات واحشيهن بس كتير بيغلبني الكاتو الاسفنجي لاني ما بيكون فيو سوائل
    بس طريقتك فيهه مي ويمكن زبدة
    ممكن اعرف ايمت بنحط المي والزبدة

    • منى 22 June 2013

      ان شاء الله بتجربي هل الطريقة و بتزبط معك
      المي مع صفار البيض , و الزبدة اذا بدك تضيفيها مع اخر دفعة طحين

      ايا سؤال تاني من عيوني

  64. لينا 30 July 2013

    مرحبا منى انا فتحت عالموقع بالصدفه لحتى شوف كيف بتصير الملوخيه وجربتا وطلعت رووووووعه وشفت اكتر من اكله رح جربن وشفت هاد الكاتو شكلو بيفتح النفس لانو انا بعملو بغير طريقه مابيظبط معي رح جربو بطريقتك وانشالله يظبط معي الله يعطيكي الف عافية وشكرا لزوئك وانشالله تقبلوني مشتركه جديده بيناتكن

    • منى 30 July 2013

      هلا لينا نورتينا و شرفتينا و ع راسي الملوخية الي وصلتك لعنا :)

      ان شا الله بتجربيه و بيعجبك , كتير الطريقة مزبوطة و ناجحة ان شا الله , رح استنى رايك

  65. أليسار 27 October 2014

    مرحبا
    انا مشكلتي مع الكاتو غير شكل … من بين 10 فوريه نوار عملتون ولا واحد ظبط 100% .
    اذا ما بيطلعوا الجوانب محروقين بيطلعوا قاسيين متل البونبون او بيطلع مش ناضج من جوا او محترق من تحت (اكتر شي بتصير معي). او بيفرفت بسرعة او ناشف بيختنق الواحد بقطعة :/
    ما خليت شي ما طبقتو من الانترنت حتى اولادي صاروا يقولوا: “لنشوف شو بدا تخترع ماما اليوم” :)
    بتمنى تظبط هيدي الوصفة معي

    • منى 27 October 2014

      ان شا الله بتزبط اليسار ، هي وصفة اتعلمتها من شيف ..

      بس كان حسيت من كلامك و وصفك ان في مشكلة عندك بالفرن ؟ في غير انواع كيك بتنجح معك ، هي الووصفة بدها دقة و بنصحك تبدي بالاسهل نوعا ما

  66. Hadia ajam 27 October 2014

    تسلم ايديكي
    الحقيقة جربت وصفتين قبل وما نفشت متل ما لازم
    بدي اسألك أنا فيني بشكل عام جرب نصف كمية المقادير لاعمل نصف قياس الكيك .. ولا هالشي بيأثر عالكيكة نفسها
    وبالنسبة للفرن بشعل تحت وبعدين من فوق ولا كلو من البداية ؟؟
    شكرآ

    • منى 27 October 2014

      اهلا و سهلا هادية ، نورتي :)
      طبعا فيك تقسمي المقدار دوما ع تنين بس وقت الحبز بيصير ااقل شوي
      الفرن بس من تحت و باخر كم دقيقة منشعل فوق

      ايا سؤال تاني من عيوني

تقييم الوصفة
عاديةقد أحضرهاجيدةممتازةأكثر من رائعة (9 votes, average: 4.11 out of 5)