يبرق


         وصفة : منى                 2007/10/08                 38 تعليقات

آخر تصويت


آخر تعليق

يبرق

أطيب و ألذ و أفخم وصفات المطبخ السوري , اليبرق الي بيعشقه الكبار و الصغار و الي لازم يكون مزين كل سفرة عزيمة سورية فخمة , و بيقول المثل : اليبرق يا ما أسهل رمه و يا ما أصعب لفه , لأن تحضيره بده كثير من وقت و صبر , لهيك لازم تحضريه قبل بيوم من موعد التقديم
هلأ حجم حبة اليبرق مو متل اليالنجي , لأن اليالنجياية لازم تكون سمينة شوي , أما اليبرقاية فلازم تكون رفيعة و طويلة و من وصايا الأمهات أن نقول مع كل حبة و وقت عم نلفها سبحان الله و الحمد لله لا اله الا الله و الله أكبر , يا رزاق يا موسع , لطرح البركة في اليبرق ..
اليبرق بده لكثير من الوقت على النار و ممكن يقل الوقت أو يكثر حسب نعومة الورق بس بصورة عامة بده أربع ساعات فأكثر على النار , و أمي الله يخليها تترك اليبرق على نار هادئة كتير لمدة عشر ساعات , يعني متل ضو الشمعة , و بيطلع طري و من ألذ ما يكون .. يم يمممي كتابة هذه الوصفة و أنا صائمة تعذيب الصرااحة …. الحمد لله رح أفطر منه ان شاء الله اليوم

و انا عم اتمشى بالنت , شفت اه خيو هل القصيدة عن اليبرق و حبيت تقروها معي , لحتى يفرط ريقكم شوي .. يقول الشاعر بكري أبو حلب في وصف يبرق أمه المتختخ بالدهن و الحمض و التوم , في قصيدة تعتبر من أجمل ما كتبه و سماها قصيدة اليبرق :grin

يبرق مع العصاعيص
يا حبي
تحتك دهن شرحــــات
متخبي


والتوم نيفا
انسـاب واتسوسح
والريحة آاخ , ولي على قلبي


والمرقة عم
تنضح بحامضهــا
وعم ينقف
الهبّال على
عصبي


وكم يبرقاية
اتفزرّت واتسقسقت
وانبحتت الرزات على
دربــــي

يا يبرق
الأحرار كرمــــالـك أنا
بفخر بكوني مواطنٌ
عربــــــي


جاية عبالي
قول: أنـــــا بحبك
بكل اللغات الشرقي
والغربي


يلله استوي
وحققلي أحلامي
قد ساف قلبي في لظى
اللهبِ


لقد استوى يا
فرحتي وسـعدي
ياعمري يا أنسي وَ يـا
طربي


هاتـــوا
الخبز والطنـجرة كلهــــا
وبعدولي مــــــــا بدي حدا
جنبي


لا أخي ،، لا
أختي لا جدي لا ســـــتي
لا عمي لا عمتي لك لا أمي لا
أبي

عم أمضغ
العصعوص واليبرق سوا
شو هالنعيم هــــادا
يــــاربـــي


اذا رحـــت
فيهــــا بـــــعـــد هالأكلة
ذنبك يـَأمي هادا ……… موذنبي

-المقادير:
الحشوة :

3 كوب رز مصري
نصف كيلو لحمة غنم مفرومة
100 غ لية غنم مفرومة ناعم
نصف أو ملعقة صغيرة بهار
ملح

للمرق :

عصعوص أو عظام خاروف
3 – 4 راس ثوم
عصير الحصرم ( مية حصرم )
حبة ليمون كاملة مقطعة شرحات ( اختياري )
شرحات لحمة أو صدور دجاح
- طريقة التحضير :


تحضير الورق :

• إذا كان الورق معلب , يغسل و يصفى ثم يستعمل مباشرة .

• أما إذا كان طازج أو محفوظ فيغسل جيداً و تكدس كل بضعة أوراق فوق بعضها البعض , تملئ طنجرة بالماء حتى منتصفها و توضع على نار متوسطة و بعد أن تغلي يضاف ورق العنب و يترك لبضع دقائق حتى يطرى و يسهل لفه ثم يرفع و يوضع على مصفاة و يترك حتى يبرد .

• تؤخذ كل كدسة من أوراق العنب و تزال أعناقها بالسكين أو بمقص المطبخ , أصبح الورق جاهزاً .


تحضير الحشوة :

• يخلط الرز المصري و اللحمة و الدهنة و الملح و البهار مع القليل من الماء حتى تتشكل لدينا حشوة قابلة للمد , أصبحت الحشوة جاهزة .

• في الشام تضيف بعض ستات البيوت القليل من العصفر للحشوة لإضفاء اللون .


تطبيق الوصفة :

• يغطى قاع طنجرة كبيرة بعظام الخاروف أو العصعوص , و يقشر الثوم و يحتفظ بالحبات كاملة .

• تفرد ورقة عنب على طاولة العمل بحيث يكون الطرف الأملس ملاصق للطاولة و الوجه الخشن مقابلك .

• يوضع القليل من الحشوة على اول الورقة من الطرف العريض بشكل قلم صغير ثم تلف الأطراف على الحشوة بحيث تغطيها ثم ترتب في الطنجرة المجهزة .

• تكرر العملية حتى ينتهي لدينا كل كمية الحشوة و توزع شرحات الليمون و فصوص الثوم بين الطبقات و يمكن وضع شرحات لحمة أو صدور دجاج بين كل طبقة و أخرى .

• تغطى أخر طبقة بصحن كبير مسطح و توضع فوقه تقلة خاصة بالمحاشي و إذا لم تتوفر توضع رخامة أو حجر نظيف و ثقيل .

• في طنجرة أخرى يمزج ماء مع عصير حصرم و يذاق للتأكد من حموضته و كمية الحمض حسب الرغبة , ثم يضاف الماء و الحمض على اليبرق بحيث يغمره تماماً .

• توضع الطنجرة على النار و تترك حتى تغلي ثم تخفف النار على الأخر و يترك اليبرق لينضج , مع الانتباه و اضافة المزيد من الماء المغلي كلما نقصت كمية الماء .

• بعد التأكد من نضج اليبرق تطفى من تحته النار و يترك لمدة ربع ساعة تقريباًِ ليتهدى و يمتص المرق ثم يصفى و يقلب بحذر و يقدم مع فصوص الثوم المرق الحامض اللذيذ و الفليلفة و الفجل و اللبن لمن يرغب .


تنويعات و إضافات :


• عند اعداد اليبرق , تزاد كمية الحشوة و تحشى بها حبات قرع ميبس ( مجفف بالشمس ) و تكون إضافة لذيذة جداً , ترتب حبات محشي القرع فوق اليبرق و يتابع اعداد الوصفة كالسابق .

• و يمكن اضافة بضع حبات أرضي شوكي فتأخذ كل نكهة اليبرق و الثوم و الحمض و تكون من ألذ ما يكون .

التعليقات

  1. linda 8 October 2007

    ان شالله صحة ومية هنا
    و انا عم قول لحالي ليش ما بيستوي معي اليبرق
    انا بخليه ساعة ونص
    اخر شي فقدت الامل وما عاد عملتو

    بس هلق مدام صرنا نعرف اسرار الطبخ منك رح ارجع وجرب

  2. منى 8 October 2007

    على قلبك يا رب ليندا :)

    اتفضلي ;)

    ان شاء الله تجربيه مرة تانية و يضبط معاك
    حرام هيك أكلة ملوكية ما تاااكليها ;)

  3. Rino 9 October 2007

    الله أكبر
    منى و الله فرط ريقي شو هاد شي بيدوخ مع أني كنت ناوية ما أدخل الا بعد الافطار بس ما قاومت ريحنو بتاخد العقل و لا طعمتو يا لطيف حامض و بيدوب دوبان بالتم بتحطي اليبرقة و بتبلعي ما بتحتاجي تمضغي
    ( حماتي بتقول لمعارفها كنتي أشطر وحدة بمغازلة الأكلة لما بتاكلها و اللي ما لو مشتهي ياكل بيشتهي من كتر ما بتتنغم)
    تسلم ايديكي يا منى
    بس للمعلومة الشوام ما بيحطو توم مع اليبرق و بيستخدمو عصير الليمون للتحميض بس الفرق كبير اليبرق الحلبي أطيب معلش سامحوني يا أهل بلدي بس كلمة الحق لازم تنقال و التجربة أكبر برهان

  4. Eman 9 October 2007

    Thank you very much for this effort .
    By the way , I am Emans husband . Yabrak is my favorite dish ever,however she has not make it yet for me .

    thanks again and please carry on.
    Best regards,
    Ahmad

  5. منى 9 October 2007

    و الله فرطييلي ريقي رينو
    عن جد صدقت حماتك , و الحمد لله لسا عندي يبرق و إلا كنت فتت بالحيط من كتر ما اشتهيت عليه

    هلا بعرف ان في ناس بتحمضه بعصير الليمون , بس من دون ثوم ..
    ايه هو طعمته بالثوم :roll

    ممممم

    رينو ردودك و تعليقاتك عم تعطي طعمة جديدة للوصفة , كتير مبسوطة فيك :)

  6. منى 9 October 2007

    Hi Ahmad
    thanks a lot for your nice comment

    Enshallaa she will try it and it will be amazing

    welcome again

  7. بدور 11 October 2007

    ايه والله مافي أطيب من اليبرق :p

    نحنا منعملو مع فروج و مع أضلاع الخروف كل واحد بالبيت بحب شي.
    لسا الثوم بيطلع كتييييييير طيب بيشرب الحمض و بدوب دوبان والله فرط ريئي :upset

    ماما بتتركو عالنار 12 ساعة و أحيانا أكتر شوي. بتحطو من الليل لتاني يوم وئت الغدا.

    الله يسامحك يا ميمو على هالأكلات و نحنا صايمين 8)

  8. انو 11 October 2007

    تسلم ايدك كثير بس عاوزه اعرف شو هوه الحصرم.مشكوره اختي

  9. منى 11 October 2007

    هلا بدور :)

    ممممم
    باين على ماماتك ان نفسها طيب
    الله يخليلكم ياها

    و نحنا كمان احيانا هيك منعمل , بس على فكرة هي الشغلة بس عنا
    اللبنانية بيطبخوه من دون حمض لهيك بياخد معهم ساعة أو ساعتين بالكتير:)

  10. منى 11 October 2007

    هلا فيك اختي انو :)
    الحصرم هو العنب الأبيض لما بيكون لسا ما استوى , بيكون حامض
    نحنا منعصره و نحتفظ بالعصير و نستخدمه لكل أنواع المحاشي تقريباً
    بيعطي طعم مميز كتير
    و إذا مو متوفر استعملي عصير الليمون
    و اي سؤال تاني انا بالخدمة

  11. تورتاية بالكريز 12 October 2007

    موضوع الحصرم جديد عليه تسلمي يارب على الوصفة الروعة جعلها الله بميزان حسناتك ياقمروكل عام وانت بالف خير وهلىل الوصفة يمكن يضاف لها دبس الرمان ولا دا شي تاني كمان نفسي تضاف التعليقات عادي من غير كتابة البريد كل مرة

  12. منى 12 October 2007

    هلا اختي الغالية تورتاية بالكريز :)

    اختي هي الوصفة بس نستخدم ليها الحصرم أو الدبس رمان منحطه لليالنجي:) يعني ورق العنب الي من دون لحمة ;)

    اختي ما في داعي تكتبي ايميلك كل مرة بيكفي انك تسجلي دخول و بس و بعدها فيك تضيفي كل التعليقات الي عندك
    الموقع مصصم بهذه الطريقة لمنع التعليقات الغير مناسبة , و انت ادرى بالنت و عالمه أختي :)

    كتير مبسوطة بتواجدك , مية اهلا و سهلا فيك مرة تانية

  13. Eman 24 November 2007

    يا جماعة باركولي،

    وأخيراااااااااا عملت اليبرق :zzz ، والحمد لله نجح نجاح رائع ،لولا أنو المرقة نشفت بالأخير لأنو طلعا من البيت وماوطينا النار ،بس طلع مضبوط عالأصول،حتى زوجي قال لي ما توقعت ينجح معك من أول مرة.

    وعقبال هالفرحةالجميع .
    والسلام عليكم

  14. منى 24 November 2007

    مبروك ايمان :)

    ان شاء الله عوافي و هنا و صحة على طول يا رب ..

    و لو ما انت شطورة و نفسك طيب ما طلع معك مظبوط من أول مرة :)

    هلا أجا دور الكبة و نيالك يا أحمد على هل العروس ;)

  15. semo 29 June 2009

    بتجنن القصيدة
    ضحكت من قلبي

  16. منى 29 June 2009

    شايفة سيمو , و انا ما بقى التم من كتر ما ضحكت و فرك ريقي على اليبرق , منيح متغديته اليوم و عندي شوي في البراد و الا وين كنت بدي اروح بحالي :grin

  17. سارونات 30 June 2009

    السلام عليكم و رحمة الله و بركاته

    يسلم ايد اللي كتب هالقصيدة كتير حلوة

    و كتير فرحت انك شاركتينا فيها

    بالتوفيق
    سلام

  18. منى 30 June 2009

    هلا سارونات :)
    بدنا شي محرز , عقبال ما اكتب قصيدة عن الكبة او لاقيلي واحدة :zzz

  19. لميا 11 July 2009

    الله يسلم هالديات وياريت تضبط معي ويحبه خطيبي احمد وما بقى يقلي طبخ امي اطيب
    اي لانو هوه من حلب وانا لبنانيه وشو ما عملتلو بيقلي الحلبي اطيب :cry

  20. منى 11 July 2009

    هلا لميا :)
    لا حبيبتي ما تخليه يحكي هيك معك , بيكفي انك عم تطبخيله بايام الخطبة و هي لازم يشوفها اد الدنيا لان هي هيك فعلاً ..

    على كل ايا طبخة جاية على بالك او سؤال انا تحت امرك لحتى يصير طبخك بياخد العقل و نمبر ون عن الباشا :)

  21. ام احمد الغالي 11 August 2009

    السلام عليكم
    منى يا اطيب واحلى منى بلعالم عندي سؤال
    زوجي من عشاق اليبرق بشكل لدرجه اني كتير بطبخو والحمدلله من اول مرة نجح معي بس سؤالي
    انو هون بالامارات ما في عنا حصرم شو ممكن يعطي حمض متل الحصرم
    لانو الليمون ما كتير بيعطي حموضه انا بحط معو ملح ليمون في عندك فكرة :roll

  22. بشرى 29 August 2009

    يا سلام .. شي بيشهي .. البارح تذكرتك كتير والله عملتو مع قرع لرفقات زوجي على عزيمة وطلع يمم يمممم .. ياكلو وياكلو أصابعن وراه ..

    بالمناسبة أنا بستعمل دبس الحصرم بيطلع طيب كتير كمان .. ماما الله يخليلي ياها بتنشف الحصرم العصير متل البندورة بمكان مشمس وبتتركه لحتى يتعقد ويصير مطربان صغير .. كتير نكهتو طيبة وحموضته قوية .. بس حبيت قلك هالفكرة لانو طيبة وما بتفرق عن الحصرم العادي ..

    ولي جعت لسى في ساعتين للمغرب :grin

  23. منى 29 August 2009

    مممم , و الله يا بشورة هي فكرة حلوة كتير كتير , دقيقة نسيت الك الف صحة و هنا و عوافي على اليبرقات , بس دبس الحصرم نساني :zzz

    الف هنا يا رب و كتير انبسطت انه عجبت ضيوفك , ان شاء الله ما تكوني تنقريهم القصيدة :grin

    تنشيف الحصرم جديدة , بعرف واحدة كانت تغليه على النار ليصير مركز و طعمته بتجنن و بيصير لونه على احمر بس طعمته حسها اطيب , هلا هي كمان فكرة تانية , فرط ريقي و الله على شي حامض , قايمة كتر حمض لسلطة الفطور :zzz

  24. om nabeel 29 November 2010

    الله يوفقك يامنى قوليلي
    ليش عم يفرط معي
    والله عم اتعذب فيه كتير بس بيالاخير عم يفرط
    ياترى هل للورق اله علاقة
    انا جايبته من سورية ماما عم تعملوا مفرزن بعد ما تحطوا 3 او 4 ايام بملح واظن مي
    تعبت وانا سوي ويفرط بحبه كتير :cry :cry :cry

  25. خط الديواني 11 January 2011

    :)

  26. منى 12 January 2011

    :)

  27. roroo51 17 March 2011

    السلام عليكم حبيبتي

    إشتقتلكم كتير و لطبخاتكم

    حبيت أسألك عن طريقة عمل اليبرق مع محشي بانجان ؟؟؟ و بنقدر أعمله مع محششي كوسا ؟؟ :x يعني بيصير .. و اذا إي بيصير .. يا ريت الطريقة .. :zzz عذبتك معي :roll

  28. محبوبة 13 July 2012

    مراحب منى

    بدي اسألك حبيبتي عن طريقة حفظ مية الحصرم للطبخ بقناني بالتفصيل
    كمية الملح اللازمة ؟ بدها غلي ولالأ؟ بتنحفظ بالبراد؟
    لأننا بالعادة بنشفه بالشمس بس حابة جرب طريقتك

    بليز جاوبيني بسرعة لاني فرطت الحصرم وبدي

    أعصره اليوم

    وشكرا الك على تعبك معنا

  29. Mona 22 July 2012

    هلا محبوبة :)
    انا بملح مية الحصرم بملح نفس ملح الطبخة و بحفظه بطريقتين , الي للسلطة بخليه بالفريزر و بطالع على ايد البراد كل علبة بعلبتها , و الي لتحميض المحسي بخليه برة بس بغطي وحه بالزيت ;)

    ماما من زمان كانت تعمل دبس الحصرم تغليه على النار حتى يصير اونه احمر غاامق و يسمك و بعدها في البراد , هادا بيصير للسلطة و للمحشي بس مو لليبرق , طعمته روووعة

  30. محبوبة 22 July 2012

    شكرا منى عمعذبك معي هلأ الحصرم عملته شراب حلو لرمضان وحطيته بالفريزر وجبت وجبة تانية حصرم بعملها للطبخ متل ما علمتيني أنا ما بدي اعمل للسلطات بس للمحشي واليبرق وراح حط عالوجه زيت بس ما بتخرب بدون براد ؟

  31. amani.dd 11 August 2012

    مدام منى بس بد ياسالك عم يطلع معي اليبرق ناشف وغامق ليش ما بعرف مع انو ما عم ينقصو ومي وبطلع طري ومستوي بس ناشف اذا فيكي تفيديني

  32. لينا 19 August 2013

    مرحبا منى بدي قلك شي وبدي قلك كمان انو اد ماشكرتك وقلتلك يعطيكي العافيه والله يعطيكي يارب على اد نيتك مابخلص حكي من هون لبكرا انا من حلب ومتزوجه جديد وماكنت بعرف ولا شي عن اليبرق ولا كيف بينطبخ ولا حتى ألفو جربت كم اكله من الموقع اللي بيجنن ومافي اطيب من اكلاتك كلهن نجحو وكانو لذيذات وبيجننو وهلا فتحت على طريقة طبخ اليبرق وطبقتها بحزافيرا وطلع يبرق ماكنت متوقعتو بحياتي انو يطلع معي هيك يبرق كتير تفاجأت والفضل كلو بيعود لألك بيضتي وشي الله يبيض وشك واسفه كتييييير عالاطاله

  33. نسرينa 8 December 2013

    بدي اسألك أخت منى على مربى الباذنجان والكباد ياريت تجاوبيني لأن هلق وقته

    • منى 22 December 2013

      هلا فيك نسرين
      البتنجان راح وقته , بس رح نزل الكباد اذا الله راد

      مية هلا فيك

  34. لارا 15 April 2014

    الله يعطيكي العافيه أختي منى،،
    عندي مشكلة في اسم المستخدم بدي غيرا ممكن تساعديني الله يسترها عليكي .

    • منى 16 April 2014

      اهلا لارا :)
      طبعاً حبيبتي , شو المطلوب خبريني و انا بزبطه ان شا الله

  35. ريم 5 April 2016

    عنجد يسسسسلم هالإيدين

    • منى 13 April 2016

      الله يسلمك يااا رب

تقييم الوصفة
عاديةقد أحضرهاجيدةممتازةأكثر من رائعة (5 votes, average: 4.00 out of 5)