باذنجان بالدجاج على الطريقة التركية


         وصفة : منى                 2011/09/24                 22 تعليقات

آخر تصويت


آخر تعليق

باذنجان بالدجاج على الطريقة التركية

بتقابل بحياتك اشخاص بيكون غلافهم لامع و مثير , بس بمجرد تحكي معهن كلمتين بتحس اديه هنن فاضيين من جوى و ما عندهم شي الا الالوان و البهرجة ليخبوا الخواء الداخلي . و احيانا بتقبل اشخاص ما بيلفتوا الانتباه و لولا انو الصدفة حطتهم بجنبك ما كان ممكن تتخيل انو تحكي معهن , بس بمجرد ما تفتحوا حديث بتشوف اديه عندهم اشيا حلوة , اشيا انت عم تدور عليها من زمان …

ما بعرف اذا التشبيه بمحله , بس وصفتي اليوم بتشبه القسم التاني , وصفة متواضعة بمكوناتها و مقاديرها و شكلها النهائي , ما فيها شي ” وااو ” , بس رح يحبها الكبير و الصغير و الي زووءه صعب و الي ما بيحب البانجان و النقاق و السقاق , كلهن رح يحبوا هل الوصفة . و هي يمكن من الوصفات القليلة الي عليها اتفاق جماهيري كبير عندي بالبيت ..

بنتي الكبيرة ما بتطيق البانجان , قالتلي ماما هون البانجان طعمته متغيرة . و هي لان ما بدها تجيبها واطية على حالها و تقلي انو طعته طيبة ..

بالصحة و الهنا




كوب حمص جاف , منقوع 24 ساعة و مسلوق و مصفى
ملعقة كبيرة زبدة
ملعقة كبيرة زيت زيتون
حبة كبيرة بصل , مفروم ناعماً
2 صدر دجاج مشفى , مقطع مكعبات
ملح و فلفل أبيض
4 حبة بندورة , مقشرة و مفرومة
كوب ماء او مرق
2 – 3 حبة متوسطة باذنجان , 500 غ , مقطع مكعبات
3 - 4 ملعقة كبيرة عصير ليمون , او عصير حصرم
1 ملعقة صغيرة فليفلة حمراء ناعمة
2 فص ثوم , مهروس
ملعقة صغيرة نعناع مجفف

للتقديم :

ربع باقة بقدونس , مفروم




• يحمى الزيت و الزبدة على نار متوسطة , يضاف البصل و يقلب حتى يصفر .

• يضاف الدجاج و يتبل بالملح و الفلفل الابيض و يقلب على نار متوسطة حتى ينضج و تشقر بعض أطرافه .

• يغمر بالمرق و البندورة المفرومة و بعد أن يغلي تهدى النار و يترك لمدة ربع ساعة .

• يضاف الباذنجان و الحمص و الليمون و الفليفلة الحمراء الناعمة و الثوم و المزيد من الماء اذا دعت الحاجة , يغطى القدر و يترك لمدة 30 دقيقة او حتى ينضج الباذنجان و تتسبك المرقة .

• يضاف النعناع بأخر 5 دقائق , يعدل الملح و ينثر البقدونس على الوجه و تقدم فوراً مع الأرز المفلفل بالشعيرية .

التعليقات

  1. dentamaniac 25 September 2011

    تسلم دياتك غلى الوصفه يا منى
    الجمعه كنا بمطعم و شفت باذنجان بالدجاج على المنيو و كنت بدي جربها بس ما تشجعت… هلا صار لازم جربها

  2. غيث 25 September 2011

    يعطيك الف عافية منى هيئتها لذيذة والله رح جربها كمان انا اولادي اعداء مع الباذنجان عكس زوجي تعالي بقى وخلي الكل يرضى يا ستي طالما اولادك حبوها يمكن اللي عندي كمان ياكلوها يعطيك الف عافية

  3. منى 26 September 2011

    هلا سوسن :)
    ان شاء الله تجربيها و تحبيها , الاتراك عندهم كتير وصفات غريبة بالدجاج و تقريبا كل الوصفات الي منحضرها باللحمة بشوفها بتركيا محضرة بالدجاج و اللحمة

    رح استنى رايك ;)

  4. منى 26 September 2011

    هلا غيوثة :)
    متل حكايتي , اولادي مو كتير صحبة و ابو الشباب بيحبوه كتير , بس هل الوصفة حبوها الكل :zzz

    ان شاء الله تعجبكم

  5. آرام 1 October 2011

    معك حق أخت منى باللي قلتيه في المقدمة، وبضيف عليه أنه كل ما زادت خبرة الإنسان في الحياة بتزيد قدرته وسرعته في اكتشاف الجوهر وتمييز الغث من السمين.
    وبالقياس على ما سبق، ومن خلال خبرتي الطويلة … احم … بالباذنجان، عرفت من النظرة الأولى أنو هالوصفة لذيذة ومستاهلة، وأن تواضعها الظاهر هو تواضع الواثق من نفسه، متل السماقية مثلاً، من ألذ وأفخم أكلات المطبخ الحلبي، بس اللي ما بيعرفها يمكن يشوفها عادية وما تلفت انتباهه إذا قرأ وصفتها هون أو هون … لحمة وباذنجان وحمض سماق وأحيانا شوكي. وفي كتير أشياء على هالمنوال.
    بالنسبة للوصفة طبقتها بحذافيرها بس أضفت بالنهاية شوية دبس بندورة لأن المرقة طلعت سايطة شوي. وعلى فكرة نكهة النعناع فيها كتير طيبة وبدونها ما رح تكمل الطعمة.
    صورت الطبق على أساس أبعت الصورة على فيسبوك بس غيرت رأيي، صوري متواضعة كتير، وما فيها شي جذاب لا بالمظهر ولا بالجوهر :)

    عندي سؤال يمكن غبي شوي، اكتشفت من كام يوم أنو في صفحتين للقمة طيبة على الفيسبوك، وما فهمت شو الغاية منهم وليش ما يكونوا صفحة وحدة بس :roll

  6. منى 1 October 2011

    صحتين و الف عافية ارام , الحمد لله انها عجبتك و كانت على زووءك و منيح انك ضفت الدبس , يمكن بندوراتي كانوا كبار شوي

    بالنسبة للصورة اتمنى انك تضيفها لان ممكن حدا يتشجع و يجربها لما يشوفك جربتها , مو المهم انو تكون حلوة المهم التطبيق ..

    الفيس بوك وصلني ايميل من ادارة الفيس بوك انهم رح ينسقوا الجروبات القديمة , فعملت صفحة جديدة النا , بس بعدها طلعت فهمانة غلط , انو رح يصير تحديث و في ردود رح تنحزف بس الجروب رح يبقى على حاله , و هلا صار في غرفة استقبال للقمة طيبة و الي هو الصفحة و هون بنزل صور الوصفات و ممكن الاستفسارات , و في غرفة قعدة الي هي الجروب القديم و هون الكل بيحط تطبيقاته و بينزل وصفاته و هيك قصص :)

  7. أم نوران 1 October 2011

    ما بتعرفي شقد اشتهيت على هالوصفة أول ما شفتا..أنا كل شي فيه صدر جاج بحبو لأنو هو المنطقة الوحيدة اللي بحبا بكل الجاج هههه ,,يسلمو ايديكي على الوصفة الطيبة أنا جربت السلطة بالعدس و الكاري كتييييير طيبييييين و ان شاء الله الاسبوع الجاي بجرب هالاكلة الطيبة و بردلك خبر :zzz شكرا كتييييييييير الك

  8. farah 1 October 2011

    انا وبن كنت رايح عليي اكلات كتير وكله بالباتنجاان يا سلاام ولهلأ ما كنت اعرف جيبه بس اكيد لما جيبه رح يصير عندي شهر الباذنجان وصفات كلها بتشهي ومعظمها جديدة تماما ومتشوقة كتير جربها الله يسهل :zzz

  9. منى 2 October 2011

    هلا ام نوران :)
    انا متلك ما باكل الا صدر الدجاج , بحسه خفيف و طيب :zzz

    شكرا الك لثقتك في و تجربتك الوصفات و ان شاء الله تعجبك

  10. منى 2 October 2011

    يلا فروحة ما صار شي , لحقي حالك ما صار شي ;)

    رح استنى رايك و يا رب تعجبك

  11. lalosh 11 October 2011

    أنا الاء من الأردن اندليت على موقعكم جديد .. حبيت اشكرك مدام منى اليوم جربناها لهالأكلة طلعت بتجننننننن .. ميرسي كتير

  12. منى 12 October 2011

    صحتين و الف هنا الاء :) على قلبك و قلب كل العيلة
    منورة الموقع مية هلا فيك

  13. nosheenzaza 15 November 2011

    يم يم لذيذة و سهلة، خاصة لما تطبخيها متل الطلبة التنابل الجوعانين، بصدر مسلوق مقطع جاهز، و بندورة معلبة، و حمص مسلوق من قبل. بس فيها مشكلة وحدة انو طيبة زيادة عن اللزوم، خايفة ما أخلي منها لبكرامتل ما عم خطط و أنجبر أعمل طبخة تانية.

    هلا ببعتلك الصورة على الجروب. شكرا على الوصفة الظريفة.

  14. منى 16 November 2011

    صحتين و الف الف عافية نوشين :) كتير انبسطت انك حبيتيها و جربتيها , عوافي يا قمر

    ما عم يفتح معي الجروب , بقى ما رح ااقدر شوفها لوقت ما يحنوا علينا و يفتحولنا الفيس بوك متل العادة :(

    يلا لا تنسي تاكلي عني لقيمة واحدة :zzz

  15. karamela 27 December 2011

    السلام عليكم ورحمة الله
    اشتقتلكم كتير بس انا دايما موجودة بس ما عم اكتب تعليقات
    يعني هالاكلة والله كتير صحية ومفيدة بس زوجي كان وضل ماياكل الخضرة
    جربتها واكلناها انا واطفالي بس الباشا فتح الطنجرة شاف المكونات مارضي حتى يدوق لقمة سكر الطنجرة واتجه الى المعلبات والمقصود لا تعيديها مرة تانية
    هاد مو اهانة موجهة للاكلة هاد المقصود فيه انو زوجي صعب كتير يتغير
    بكل الاحوال تسلم ايديكي يا ست الكل لان اذا هالاكلة ماحبها ففي اكلات كتير تعلمتها منك وبحبها كتير متل الدجاج بالكريم اللي هلق عاملته

  16. منى 28 December 2011

    و لا يهمك كرميلا , خيرها بغيرها و ان شاء الله الاكلة التانية بتعجبه و بتكون على زوه و زوئكم ان شاء الله :roll

    ابو الشباب عندك متل ابو شبابي , لهيك دوما بجرب الاكلات الجديدة بكمية صغيرة لحتى ما غامر ;)

    عوافي على الدجاج و ابقي دوما طلي كراميلا لحتى اعرف اخبارك

  17. لبنى الشامية 1 March 2012

    السلام عليكم ست منى وكل الأعضاء الكرام
    هي أول مشاركة الي هيك عالسريع وان شاء الله بتكون فاتحة المشاركات :)
    بحب أولا أشكرك عالموقع المميز ، انا جربت كذا وصفة منه، واليوم جربت هالاكلة، هي بتشبه كتير الطباخ روحو بس منستبدل الدجاج باللحمة

  18. منى 1 March 2012

    هلا لبنى :)
    منورة الموقع و مشرفتيه , اهلا و مية سهلا فيك ..

    اي صح كتيربتشبهلها , ما هو اصلا المطبخ التركي و السوري بينفدوا على بعض ;)

    بانتظار مشاركات كتير منك

  19. علا 7 March 2013

    مرحبا ست منى ..
    انا من متابعيك من زمان .. بس عندي مشكلة
    وهي انو الوصفات احيانا يكون الوصف للمقادير
    او حتى الطريقة بالشامي البحت وكوني سعودية
    بوقف واحاول افهم المقصود فأحيانا تزبط واحيانا
    اغلق الصفحة .. ارجو اخذ هذا في الحسبان
    .. مع تهانيّ لتطوير الموقع وامنياتي لك بالمزيد
    ودعواتي لسوريا واهلها،،

    • Mona 8 March 2013

      منورة علا :)
      انا مفكرة حالي ان عم اشرح بطريقة الكل يفهم علي فيها , شكرا للتنبيه و ان شاء الله رح انتبه اكتر لهل النقطة
      شكرا لدعواتك , الله يفرجها عاجلا غير اجل يا رب

  20. علا 7 March 2013

    عفوا .. صدر الدجاج المشفي في الوصفة
    المقصود به: فيليه؟؟

    • Mona 8 March 2013

      هو الدجاج المخلى من العظم و الجلد , مو بالضرورة فيليه المهم انو لحم بس

تقييم الوصفة
عاديةقد أحضرهاجيدةممتازةأكثر من رائعة (1 votes, average: 2.00 out of 5)