باذنجان بصوص الكريم و البيستو


         وصفة : منى                 2011/10/03                 10 تعليقات
باذنجان بصوص الكريم و البيستو

لو حابة تجربي وصفة واحدة و واحدة بس من كل وصفات البتنجان الي نزلتها , فلازم تكون هي ..

ليه ؟

طعمتها متل مطاعم 5 نجوم, شغلتها سهلة بربع ساعة بتكون جاهزة , مقاديرها قليلة , التوليفة كلها على بعضها جديدة , كمان حتى اولادي الي ما بيحبوا البتنجان حبوها كتير و انا ما اعترفت من شو مكونة , لهيك منهم ما عرفوا شو المقدار و منهم فكروه معكرونة و منهم فكروه دجاج , و انا بكل شر ما قلتلهن انو بانجان الا لوقت ما خلصوا صحونهم و امنت عليهم .. و كنت بتمنى انو قول عنها خفيفة لحتى اعطيها 5 نجوم , بس ما دام فيها كريم بقى ضميري الحي ما كان كتير مرتاح و انا عم اكل منها

طيب اذا ما عندك بيستو شو الحل ؟
الحل انك تقومي متل الحلويين تحضريه و تحطيه بمرطبان و رح يبقى بالبراد فترة طويلة , اكتر من 10 ايام و بالفريزر بيبقى لشهور و لما بيكون عندك بيستو رح يصير عندك فرصة تحضري وصفات اكتر و مجال للابتكار و الابداع .

طيب فيكي تستخدمي ريحان مفروم و شوية زيت و صنوبر مفروم و توم عواض عن البيستو ؟

لا , لان البيستو لما عم يتحضر و ينترك شوي بالبراد عم نتتغير طعمته و تتشبك النكهات ببعضها و تصير طعمته روووعة . و الفرق انا جربته بنفسي و الفرق انك بالبيستو المجهز رح تقولي يمم يممممم , اما اذا فرمتيلك شوي ريحان و صنوبر مفروم و و رح تقولي… مم

و سر الوصفة هو تقطيه البتنجان لاصابع رقيقة شوي , رح تشرب من نكهة الصوص الطيبة و رح تدوب بتمك دوبان , و البتنجان من انواع الخضار الي فيه حيادية نوعا ما لهيك بيخلي الصوص يظهر و يبان على حقيقته …

بالصحة و الهنا




4 - 5 ملعقة كبيرة زيت زيتون
500 غ باذنجان , حوالي حبتين متوسطتان
2 - 3 فص ثوم , مهروس
نصف ملعقة صغيرة فليفلة حمراء ناعمة
حبة كبيرة بندورة , مقشرة و منزوعة البذر و مفرومة
فلفل ابيض
نصف كوب كريم فريش
ملعقة كبيرة بيستو
نصف كوب جبنة بارمزان , مبشورة




• يقشر الباذنجان و يفرم لاصابع رقيقة نوعاً ما .

• يحمى الزيت على النار في وعاء غير لاصق , يضاف الباذنجان و الثوم و الفليفلة الحمراء الناعمة و يقلب الكل لبضع دقائق .

• تضاف البندورة المفرومة و يغطى القدر و تترك لمدة 5 دقائق .

• يضاف الكريم و الفلفل الابيض و تهدى النار و يغطى القدر و يترك حتى ينضج الباذنجان و يسمك الصوص .

• يضاف البيستو و يترك لمدة دقيقتين ثم تضاف الجبنة المبشورة و تقدم فوراً مع خبز الباغيت .

التعليقات

  1. nosheenzaza 3 October 2011

    لا هي لاااااازم أعملها، و لو سعر الباذنجان وصلان للسما، بس مو مشكلة مستاهلة.

    أنا بشتري البيستو جاهز. البيستو الي عندي حاليا أحمر، فيه بندورة كمان. أولتك بيمشي الحال؟

    موتيني بمهرجان الباذنجان :grin يا ريت كنت بلشتيه بأول الصيف لما الباذنجان كان رخيص و منيح.

  2. منى 4 October 2011

    اي و الله حقك علي , كان وقتها اول الصيف , يلا ما صار شي الجايات اكتر من الرايحات و الوصفات هون ما رح يطيروا , بس ما صج الك جربيهم ;)

    لا بيستو البندورة المجففة ما بيزبط هون , او انا مو مجربته , بقى ما فيني فيدك :roll

    اذا جربتيها رح استنى رايك

  3. nosheenzaza 5 October 2011

    على سيرة الطيران، بتعرفي من كم سنة لما الموقع كان عم يخترق كل فترة و التانية، كل كم شهر كنت نزل نسخة كاملة من الموقع، و لهلا هنن عندي

    اشتريت الباذنجان و الكريم و عالتجربة للأسبوع الجاي. هالأسبوع لسا عندي طبخات. بسبب وضعي الحالي كطالبة بطبخ بالعطلة لباقي أيام الأسبوع.

    من هلا شكرا جزيلا عالوصفة الي أكيد طيبة، و من هلا 5 نجوم، لأنو هون لقيت نوع كريم بس 15% دسم، فالضمير الصحي ما رح يتألم كتير. مجربتو من قبل و كمان طيب. :roll

  4. آرام 8 October 2011

    يسلموا إيديكي أخت منى .. جربتها اليوم وطلعت أكتر من رائعة :)
    وجهزت كمية منيحة من البيستو بانتظار أي وصفات جديدة فيها هالصلصة اللذيذة.

  5. منى 9 October 2011

    هلا نوشين :)

    بتتذكري :( حسبي الله و نعم الوكيل عليهن كم مرة عملوها , كرهت بوقتها النت على ايديهن
    يا ترى شايفة ان الموقع اتغير و الا نو
    كتير منيح انك لقيتي هل النوعية , ما دورت عليها عنا , بس ما اتوقع انو موجودة :zzz

    رح استنى رايك بعد التجربة و مع انك قديمة بصحبتنا بس جديدة بالردود حبيت خبرك اني كتير مبسوطة فيك و منور الموقع فيك

  6. منى 9 October 2011

    هلا اخي ارام :)
    صحتين و الف هنا و عافية , بكل لقمة , مبسوطة انها عجبتك و ممنونة تجربتك للوصفات
    انا كمان حضرت بيستو كمية كبيرة و حفظته بالفريزر و في كتير اكلات عم استعملها البيستو , ان شاء الله بتكون على زوءك

  7. nosheenzaza 21 October 2011

    يا سلام جربتها الأسبوع الماضي و طلعت كتير لذيذة و ظريفة. تسلمي.

  8. منى 22 October 2011

    صحتين و الف هنا يا رب :)

  9. na3oom 23 October 2011

    دخت لما شفت الوصفة المشكلة ماعندي ولا شي من مكوانتها قريبا جدا التجريب بس أعمل البيستو

  10. منى 23 October 2011

    سلامتك نعومة :zzz
    ان شاء الله تحضري البيستو و تكون على زووءك

تقييم الوصفة
عاديةقد أحضرهاجيدةممتازةأكثر من رائعة (1 votes, average: 4.00 out of 5)