براونيز بكريما الخمس دقايق السرية


         وصفة : منى                 2019/01/04                 10 تعليقات
براونيز بكريما الخمس دقايق السرية

براونيز بكريما الخمس دقايق السرية
هل البراونيز واحد من اطيب واسهل الوصفات الي ممكن نعملها بهل الشتوية .. الطعمة غنية كتيرررر وكانك عبتدوبي في بحر شوكولا بكل لقمة ، ومع انو فيها بيكنغ بودر بس القوام تبع البراونيز رح يكون شوي كتيم متل كل وصفات البراونيز ، من لما تبدي تحضريها وتصير ريحة الكاكاو والزبدة بكل مكان بالمطبخ رح تكوني متشوقة اتك تدوقيها ، بوعدك ما رح تندمي .
كتتير احيان ما بلحق اعمل كريما التغطية لان بتكون خلصت الصينية وهي طالعة من الفرن .


ليش الكريما سرية ؟


اول الشي لان مكوناتها بسيطة ومتوفرة على الاغلب دايما في البيت , تاني شي كتير كتير سهلة ومن اول ما تبدي فيها حتى تصبيها على البراونيز ما بتاخد معك اكتر من 5 دقايق وممكن تستخدميها لاي وصفة كيك شوكولا ، تالت شي لما تستخدمي زبدة طيبة وشوكولا نوعية منيحة رح تشوفي ان الطعم مابقى في اطيب من هيك شي بيشبه الفادج على ترافل على حليب مكثف بنكهة الشوكولا ، يم يم يمممم . وانا بستخدم شوكولا شقراء وسوداء حتى تكون الطعمة متوازنة بين نكهة الشوكولا والحلاوة والمرار .
بتمنى تجربيها وبتمنى تعجبك وبتمنى اسمع رايك


بالف صحة وهنا

المقادير:
البراونيز:
2 كوب طحين حلويات
ثلاث أباع كوب كاكاو
نصف ملعقة صغيرة ملح
1 ملعقة صغيرة بيكنغ بودر
باكيت ونصف زبدة ( 150 غ )
2 كوب سكر
2 بيض حبة كبيرة
فانيليا
كاسة حليب

الكريما:
فنجان ونصف حليب سائل
فنجان ونصف زبدة
كوب ونصف سكر
نصف كوب شوكولا شقراء مبشورة
نصف كوب شوكولا سوداء مبشورة

. طريقة التحضير:

1- تغلف صينية فرن مستطيلة بورق زبدة ( قياس 22*32) ، يجمى الفرن على درجة حرارة 180 ، يثبت رف الفرن على المنتصف ، يقلب الطحين والكاكاو والملح والبيكنغ بودر في وعاء جانباً .
2- تخفق الزبدة والسكر مع بعض حتى يبيض المزيج ويصبج خفيفاً مع كشط الاطراف بين الحين والاخر ، يضاف البيض الواجدة تلو الاخرى مع الفانيليا ويخفق حتى يتجانس المزيج .
3- يضاف مزيج الطحين بالتناوب مع الحليب على ثلاث دفعات ، ويقلب الكل على سرعة متوسطة حتى يمتزج الكل.
4- يصب المزيج في الصينية المحضرة ويمسد السطح ، يخبز البراونيز في الفرن لمدة 30-40 دقيقة او حتى ينضج ، لا يخبز لفترة اضافية كي لا ينشف.
5- يحرج البراونيز من الفرن ويترك حتى يبرد قليلاً ، في تلك الاثناء تحضر الكريما ، لا يترك البراونيز كي يبرد تماما قبل اضافة الكريما كي تلتصق به ويتشربها قليلاً .
6 -يوضع الحليب والسكر والزبدة على نار متوسطة، بعد أن يغلي يترك لمدة دقيقتان على نار خفيفة . يبعد عن النار وتضاف الشوكولا بنوعيها مع رشة ملح ويقلب الكل بلطف حتى تذوب الشوكولا تماما . يصب المزيج فورا على البراونيز الدافئ ويمسد السطح . يترك جانبا حتى يبرد لمدة ساعة
7- يقطع البراونيز الى مكعبات ويقدم .
  • وصفات تانية ممكن تعجبك


التعليقات

  1. Rim grewati 4 January 2019

    هالوصفة راية رح تبعتلك حمل بوسات منشانا

    • منى 4 January 2019

      حليلي راية وام راية ..بوسات للحلوين :)

  2. Haifa alwan 4 January 2019

    بشهيييي وكتير بحبو .. اكيد رح جربو وعندي سؤال شو الفرق بين الكوب والفنجان.. بتقصدي فنجان القهوة؟؟
    شكراً على طريقة الكريما لما قلتي سرية وقع قلبي بالاول

    • منى 5 January 2019

      تسلميلي ياهيفا يا عسل
      لا تخافي مدام في اللقمة فمافي اسرار :)
      الفنجان هو فنجان قهوة والكمية لكل فنجان 60 غ

  3. ريم 4 January 2019

    الله يعطيك العافية… باين شي لذيذ بدي جربها إن شاء الله ،، بس ماعرفت كمية الفنجان؟!
    فنجان قهوة او شاي

    • منى 5 January 2019

      اهليين ياريم
      ان شالله تجربيها وتكوةن على ذوقك
      الفنجان فنجان قهوة والكمية كلها بحدود 90 غ

  4. نسرين 4 January 2019

    يسلم ايديكي …بس الزبدة بالفنجان والسكر بالكوب

    • منى 5 January 2019

      اهليين يانسرين :)
      السكر بالكوب ، والزبدة والحليب بالفنجان والمطلوب فنجان ونص يعني حوالي 90 غ

  5. توتة 4 January 2019

    يسلمو هالايدين صرلي يومين بفكر بالبراونيز بس اديش هو الفنجان

    • منى 5 January 2019

      مرحبا :)
      معناها الوصفة اجت بوقتها .
      الفنجان هو فنجان القهوة الصغيرة وهو بالوزن حوالي 60 غ

تقييم الوصفة
عاديةقد أحضرهاجيدةممتازةأكثر من رائعة (4 votes, average: 4.25 out of 5)