بطاطا يونانية


         وصفة : منى                 2011/07/17                 21 تعليقات
بطاطا يونانية

بطاطا و ليمون و زعتر أخضر , كل كنوز المطبخ اليوناني بهل الطبخ الرائع , و الوصفة سهلة و طيبة و بهل الشوبات نازلة حفر و تنزيل . عم حضرها كل كم يوم و عم تطلع ممممم .


أخر مرة حضرتها ضفت فيتا للبطاطا و رجعت فوتها للفرن , طلعت شغلة معتبرة , بس على اعتبار انو كاميرتي معطلة و ما عم تتصلح ما قدرت صور الطبق مع الفيتا , بكل الاحوال مع فيتا شي فخم و من دونها خفيفة و منعشة , بقى انت شوفي الي بيناسبك



بالصحة و الهنا





4 - 5 حبة كبيرة بطاطا
ربع كوب عصير ليمون طازج
معلقة صغيرة بشر ليمون
3 فص ثوم
معلقة صغيرة ملح
5 – 6 معلقة كبيرة زيت زيتون
2 معلقة كبيرة زعتر أخضر مفروم , أو ملعقة صغيرة زعتر مجفف
ملعقة صغيرة زبدة
نصف كوب فيتا , مفتتة ( اختياري )




• تغسل البطاطا بشكل جيد , تفرك القشرة جيداً , تقطع مكعبات .

• تقلب مكعبات البطاطا مع عصير الليمون و بشر الليمون و الثوم و الملح و زيت الزيتون و الاوريغانو و كوب من الماء المغلي في صينية فرن غير لاصقة .

• تخبز البطاطا في الفرن المحمى على درجة حرارة 200 لمدة 45 دقيقة , تقلب مرتان او ثلاثة حتى تنضج و تحمر .

• تضاف الزبدة و ترش الفيتا في حال استعمالها و ترجع للفرن لمدة 5 دقائق , تقدم فوراً .


فكرة :

يمكن استعمال الاوريغانو أو أي مزيج من الاعشاب العطرية المفضلة لديك .

التعليقات

  1. laraye 17 July 2011

    ايه والله يا منى حطيتي ايدك عالجرح.
    فعلا نحنا شعب ما منقرا شوفي مكتباتنا واهتمام الشعب فيا و اديش بيحطوا الولوية ليدفعوا ع كتاب و يقراوه ويهتموا فيه. وفعلا مع الاسف صرنا شعب منتغنا باللي عملوا اجدادنا … بذكر مرة كنت مع خبير ايطالي بقلعة سمعان فقال انو هالبلد لازم الواحد يحط مراية ليتفرج عليه .. واكيد بتفهمي انو قصدو الحضارة وما بقدر اقلك انو فرحت ولا زعلت..
    ع سيرة اللبس ومو بس اللبس والتقليد والحكي والمنطق والخ المشكلة فينا لانو وللاسف عنا عقدة الغرب لك حتى لاحظي صفاتنا العربية الحلوة اللي بترفع الراس بلشت تروح … الشهامة المروة الكرم …لك افشاء السلام لك ولو عالجار.. هون بامريكا بيسلموا عليكي بالشارع ولو مانن جيرانك ولو كنتي مسلمة ومحجبة بالله مو شي بيحرقو القلب انو ببلدك بس بيتفرجوا ع لبسك؟
    كلمة اخيرة .. انشالله ما بيصيبك اي ضرر وربي يحميكي من كل شر بس انا بحبك هيك بيحكيك لانو بتعطي نكهة غير شكل للموقع والطبخ :)
    ياستي انا بعمل شي قريب لهل بطاطا بس بدون توم وحمض وبستعمل فيانوع بطاطا صغيرة وحمرا.
    وبقدما مع الشرحات بالعادة بدل البطاطا المقلية. المرة الجاية رح جربا هيك.
    اسفة طولت بس كتير مشتاقة ومفدرة ظروفك وخوفك عالبلد وصدقيني كلياتنا هيك الله بس يهون علينا ويحمي بلدنا واهلنا من الفتن.
    اخر كلمة من شوي طالعت كيك الشوكولا بثلاث خطوات من الفرن وشكلو زبط بس عم استناه يبرد تحط الكريما.

  2. أم نوران 17 July 2011

    بتعرفي يا منى كتيييير انبسطت على رجعتك على الموقع و على الفيس بوك,اول ما دخلت الموقع قلتلو لجوزي يي هي منى رجعت ههه :p قم قاللي مبرووك عليكي بالمغربي *هنيا عليك* صحيح انو جوزي حلبي بس اوقات بيدللني بلهجتي :zzz
    لما قريت مقدمتك حسيت انك عم تفكري متلي , قربت منك اكتر و فهمت عليكي اكتر .. بالنسبة للي قال انو مو ضروري تكتبي على حالك فقوليلو انو مالو علاقة و نحن هيك عاجبنا ايواااااا لكاااااان :grin
    اساسا اللي بيميز الموقع بعد التصوري و الوصفات و الطرق المفصلة ..الخ هو المقدمة اللي بتفتح النفس و بتخلي الواحد يسرح بخيالاتو و يتوقع شلون ديكون شكل الصحن على سفرتو وشلون ديكون شكلو و هو بارك تحت شجرة عتيقة من اشجار ريف سوريا و طبيعة حلب ..انتي بتخلينا نحس انو نحن منعرفك من زماااااان , و انا شخصيا بعتبرك اختي الكبيرة اللي بتعلم منا و رفيقتي اللي بتنصحني و بسألا :roll وبصراحة انا قبل ما اعرف الموقع كنت كتييير احتار بالطبخ السوري العتيد :? وهلأ صرت اعلم بنات احماي يطبخو و كل ما عزمت حدا بيسألوني يا ترى شو بدك طعمينا اليوم؟؟وكلو من فضل الله اولا ثم فضلك علينا ست منى وما ننسى ذكائي في فهم الوصفات ههههههه ;) كأنو الشغلة بدها ذكاء!
    انا طولت عليكي و بعرف انو عندك ظروفك الخاصة و هيك و الله بيحاسب اللي بيلومك..و عنجد عحند الله يبارك فيكي و يعطيكي كل ما بتتمني و ينعم عليكي و على حبايبك و كتاكيتك بالصحة و الهنا والامن و الطمأنينة و كل سوريا يا رب :) نحبك في الله ..سكينة :zzz

  3. غيث 18 July 2011

    اهلا بعودتك سالمة النا والله اشتقنا لك واشتقنا لهالمقدمة الحلوة لكل طبخة واللي عتب عليك على عدم طلتك علينا بالفترة الماضية معلش سامحيه بس لانو من اشواقهم الك والله انا كل يوم بفوت عالموقع وبقول وينك يا ميمو الله يجعل غيبتك على خير يعني ببقى بالي عليك مو اكتر اي ها هلق انبسطت انك بخير والحمد لله والله يريح بالك وبالنا ويحمي بلدنا من كل شر نجي بقى على الوصفة باين عليها من مكوناتها انها لذيذة وانا بحب هيك اكلات خفيفة يمكن بدون الفيتا اخف الله يسلم هالديات ويخليك النا ولهالموقع الحلوومعلش طولت عليك بس كلمة اخيرة انك ولو غبت انت بقلوبنا ومالك مقصرة بالموقع ما شاء الله صار موسوعة كاملة لكل ما نشتهيه من الطعام واي اضافة يكتر خيرك لانك كفيت ووفيت واغنيت الموقع بس نحن بنحب نسمع ردودك ونطمن عليك ونقرا كلماتك اللي بتبل القلب لما تردي علينا بكل اخلاص وضمير وبدون بخل علينا باي معلومة شكرا منى من القلب لعودتك لنا ولسماع اخبارك

  4. مسك الايمان1 18 July 2011

    بصراحة انا اتثرت بالحكي اكثر من الاكلة على كل حال هاي المرة سلم تمك وبعدين ايديكي

  5. مسك الايمان1 18 July 2011

    يا الله يا منى كم من مرة قرات كلامك على فكرة كلامك مش الوصفة كثير مزبوك بس والله يا منى انت هلاء عم تعملي اشي انا من زمان كان نفسي اعملو بس ما عندي القدرة عليه القدرة الخارقة مثلك ما شاء الله عليك
    وعلى فكرة صاحبتك شريره :( :( عارفه ليش لانها عم تكتم علم بصراحه انا هون مش بصدد درس تربوي ديني وما بدي طول عليك وعلى الجميع بس انشاء الله يكون في ميزان حسناتك ويجعله صدقه جارية على فكرة انا كل ما اعمل شي ويطلع معي زاكي من غير ما حدى يسألني بقولو اني اتعلمت طبق وطلع طيب وبعلموا اياه في نيتي من الداخل الله يأجرني ويحققلي دعاء انا دايماً بدعي ( عيني هي طلب من رب العالمين) انشاء الله الله يحقق الي والك وللجميع دعوه بطلبها من رب العالمين دايماً وصدق القائل ما بعرف شو اسمه قلتك اسألي بابا جوجل ” لا تسأل الناس حاجة فالناس ان سألتهم يغضبوا والله ان تركت سؤاله يغضبوا” يا رب انا نسألك من فضلك والله يا رب يجمعنا الاصدقاء الصالحين الصدوقين وابعد عنا الاصدقاء كشافين الحال ان شاهدوا منا خير كتموه وان شاهدوا شر اذاعوه اسفة لاني طولت على الجميع

  6. jojo30 19 July 2011

    مرحباااا ست منى
    هي مشاركتي الاولى معكم بس طبعا مو اول وصفة بجربا
    بالبداية
    واو شو بحب الثرثرلوجيا كل الافكار الي ذكرتيا فعلا منشوفا بحياتنا لكن اكثر ما مس جرحي هو جملتك التاليه: شعب جاهل في الازمات هو الكارثة بعينها.

    وانتقل من الثرثرلوجيا الى الطبخولوجيا
    مو معقول من اللحظة الي قرات فيها الوصفة البطاطا اليونانية عرفت انها تمااام المطلوبة للعشا وفعلا بدوره بسيطة بذاكرتي كل المكوناتها البسيطة عندي
    وما كذبت خبر بوشي ع المطبخ وخلال ربع ساعة كانت بالفرن هلا النهفة هو زوجي الي قلي شو عم تعملي قلتلو تجربة رح تعجبك طبعا هو ما كتير انسر لانو بدهاشي ساعة بالفرن والنتيجة بالنسبة الو مو محسومة وقلي افتحيلي علبة تونة للاحتياط وما بخبرك بعد ساعة وخمس ددقايق كانت الصينية شبه فاضية وانا وهو عم نتسابق على اخر كم قطعة
    ونهاية تسلم ايدك على هالموقع التحفة
    [B]null[/B]

  7. بنت دير عطية 20 July 2011

    السلام عليكم:كيفكم شو اخباركم ان شاء الله يكون الجميع بخير وسلامة وينعاد علينا وعليكم رمضان بصحة وعافية وايمان يارب والله يعتق رقابنا جميعاُ من النار قولو آمين,اما يا ست الكل فرحتينا برجعتك ونورتي اساساً انت منورة ع طول والله يجعلنا من اللي وجوهون منورة يوم القيامة واكيد معذورة ع الغيبة والحق معك والله.ما بتعرفي شو كان شعوري وقت كنت عم اقرأ كتابتك بس وقت بتقرأي ما بين السطور يلي مكتوبة قلبه بيبكي مو بس عيونو وتذكرت مقولة سيدنا عمر رضي الله عنه: “”نحن قوم أعزنا الله بالإسلام فإن ابتغينا العزة بغيره أذلنا الله..”"فيا ريت قلبنا يلي يقرأ هالجملة وتطبق كان حالنا غير بكتير و……..
    ع كل حال ان شاء الله بجرب هالوصفة اللذيذة والله لا يحرمنا من هالحكيات الحلوين والموزونين انا بانبسط كتير بحكيك ومشاركت الاخوة وفعلاً بحس بجو العائلة ومو بس موقع طبخ نقول الوصفة وامشي .والله يعطيكي ليرضيكي ويوفقك دنيا وآخرة يا رب. سامحينا ع الإطالة.

  8. karamela 20 July 2011

    منوش ممكن اسئلة عن الطبخة
    شو الماركة اللي بتستخدميها بجبنة الفيتا او انت بتجيبيها على الوزن
    فينا نستبدل الفيتا بشي تاني بهالطبخة
    انا ماني مستخدمة الفيتا بحياتي بتنصحيني جربها
    والله يجزيك الخير

  9. منى 21 July 2011

    هلا لارا :)
    و الله يا لارا , نحنا هون بحلقة مفرغة , بين الدخل و الوارد و الوقت الرايح ورا اللقمة من طرف , و بين الكتب و قلتها و النوعية المتوافرة و الي بتحترم راي المتلقي و الي نفدت من المقص من جهة تانية .
    هلا الحل الي بيحل كم مشكلة هو الكتب الالكترونية :roll

    كلامك مزبوط , لحتى صار الواحد يفكر انو نحنا مسلمين بالهوية , و هنن ” خلينا نقول جزء كبير منهم ” مسلم بالأخلاق , بيكفي انو الساعة 6 بيكون كلو بشغله بينما نحنا الساعة 12 بتكون اغلب المحلات مو فاتحة , لا تنكشيني كرمال الله , كو انا واقفة على نتفة لانفجر :cry

    ان شاء الله تجربي البطاطا و تحبيها , و رح استنى رايك بكاتو الشوكولا , بوسات كتيرة الك , و ان شاء الله لما بترجعي حابة ارجع نقعد مع بعض ;)

  10. DOUHA 23 July 2011

    بتجننننن سهلة وخرج صيف تسلم ايديك :p

  11. Jassy 26 July 2011

    السلام عليكم ورحمة الله وبركاته

    كيفك منوش؟ ان شاء الله بخير؟
    أول الشي كتر خيرك يلي حاتطيلنا هالوصفات اصلا، وهيك لله وعاملتيلنا موقع وهدفك هو الإفادة أصلا بدون استفادة “مادية” قصدي طبعا. شكرا
    وإيمتى عاد ما رديتي علينا مو مشكلة :)
    والموقع كمان حلو انه صاير موقع على مدونة. لكن أنا بشوف أن انتي خرج تعملي موقع كبير كامل وتديريه “كمديرة بس” وتحطي مين يشتغلك فيه :) وتبئى تحطي فيه دعايات لمنتجات وتاخدي عليهون مصاري :p وبعدين تطلقي كتاب وبعدين الجزء التاني منو، بعدين توقعي عقد مع شي قناة ليعملولك برنامج طبخ، بعدين بس تجمعي مصاري كمان تفتحيلك قناة :grin شو رأيك بهالمشروع؟

    المهم بخصوص أول قسم من كتابتك … مممممممم .. في ظل الظروف الراهنة التي تمر فيها البلاد .. ما بعرف شو بدي علق. عن جد ما بعرف ..

    أما بخصوص الطبخة.. فشكلها طيبة يامي يامي :) .. بس أنا كلللللللللللل ما بعمل بطاطا بالفرن بتطلع ما جاهزة حتى لو ضلت ساعة ونص :( في سبب ولا بس هيك؟
    مرة جربت وصفة كتير بتشبه هي :) بس كانت إضافتها التوم ….. طيبة
    وماما عطول بتعملها، بس بدال المي بتحط كريما، هي بعدين ما حتبين بس بتعطي طراوة ونكهة طيبة للبطاطا.

    بس كان عندي سؤال، هلئ أنا بعرف أن البطاطا بقشرها بتنعمل بس إذا كانت تازة .. ولا انتي شو رأيك ؟
    طيب كيف منعرف إذا تازة ؟ :roll

    رح اعملها عأول يوم رمضان :) إن شاء الله
    عفكرة إذا ما نشرتي ع ردي … قصدي ردّي بسرعة وما جاوبتيني عالأسئلة بسرعة رح إيطعيك * وبطل العب معك :grin …….. لا حبيبتي امزح معك :) ما فيني عيش بدون هاللقمة الطيبة .. خدي راحتك

    ويسلمو ومنشوفك بخير وإن شاء الله ربي ييسر الامور قريباً.

    * بتتذكروا بالطفولة كنا نئول: إيطعتك … إيطعي ……. صيلحتك … صيلحي ….. إش معيك ؟ ….. تفاحة …………… :grin ;)

    والسلام عليكم ورحمة الله

  12. منى 1 August 2011

    هلا حبيبة قلبي ام نوران :)
    خليلي عيونك و قلبك , انيسطت اننا عم نفكر بطريقة متقاربة و عم نفهم على بعض ;)
    بالعكس ما طولتي , شو فرحت انو المطبخ السوري صار اسهل بالنسبة الك و انك عم تعلمي بنات احماكي , يا ستي لو ما نفسك طيب و شطورة ماكانوا زبطوا معك .

    شكرا كثيرا و كبيرا على الدعوات الغالية و الكريمة و الله يباركلك بنوران و ببقية عيلتك الصغيرة و يحفظهم من كل شر و كل سنة و انت بالف الف خير :zzz

  13. منى 1 August 2011

    هلا غيوثة :)
    تشتاقلك العافية , و تبقي بخير و فضل من رب العالمين , امين امين الله يحمي بلادنا و لا يضر انسان في بقلبه خير لبلده :roll

    حبيبتي غيوثة , الله يديم الود و المحبة على عيلتنا الانترنتية , ممنوتك و ممنونة محبتك و قلبك الطيب :)

    غيوث حتى بالفيتا رح تبقى خفيفة و بتطلع تغير شكل , رح استنى رايك بعد التجربة ان شاء الله

  14. منى 1 August 2011

    و عليكم السلام و رحمة الله وبركاته :)

    الحمد لله ياسمين , من فضل رب العالمين انا بالف الف خير و نعمة ,

    انو حلوة الفكرة كتير بس لهلا ما لقيت انسان بيفهم و عنده بعد نظر و بده يتبناني :grin
    بجد و بعيد عن المزح انا هلا و حاليا ما بقى عندي رفاهية الاحلام و لا حتى ابسط حلم !

    حبيت كتير فكرة البطاطا و الكريم و التوم , بزمناتي محضرة هيك شي و كان بياخد العقل

    شو قصة بطاطتك ؟ لازم تستوي شو ما كان نوعا , عم فكر انو شو درجة حرارة فرنك و على ايا رف بتحطيها ؟

    اكيد هل الوصفة , و غيرها من الي بده بطاطا بقشرها , بدها بطاطا تازة . و البطاطا بيكون لونها فاتح و قشرتها ناعمة و لما بتقدم بيصير لونها غامق و القشرة كانها سميكة و ممكن يطلع عليها براعم , اكيد ما برميها في الها شي ترليون وصفة

    لا ياسمين , مشان الله انت بالذات ما بقدر على زعلك بقى هي رديت متل الحلويين قبل ما تقاطعيني :grin

  15. منى 1 August 2011

    هلا ضحى :)
    ان شاء الله تجربيها , رح استنى رايك ;)

  16. منى 1 August 2011

    هلا كرميلا :)
    يا ستي انا بستعمل الدريعي , في بالكيلو و في مغلفة , بحب طعمتها كتير , بس ممكن احيانا تجي مالحة شوي لهيك بدوقها قبل الاستعمال ;)

    فيكي تستغني عن الفيتا هون او تستبدليها بايا جبنة صفرا تانية و اكيد بنصحك كتير انو تجربيها , حتى مع صمن و خيار ما في اطيب منها

  17. منى 1 August 2011

    هلا جوجو :)
    مية هلا فيك في الموقع , منورة و مشرفة , كل سنة و انت بالف خير 8)

    الف الف صحة و هنا و عافية على البك و الب ابو الشباب , الحمد لله انها عجبتكم و ما اتعشيتو تونة :grin

    ممنونة تواجدك الطيب و ان شاء الله تجربي غير وصفة و تكون نممي

  18. منى 1 August 2011

    هلا اختي مسك الايمان :)
    خليلي عينك على الدعوة الكريمة الحلوة الغالية , الله يتقبل و اهم الشي تكون النية صافية ;)

    يا ستي في كتير ستات بيوت بتخبي وصفاتها , بقى انتي برافو عليك , و الله يعطيكي على اد نيتك
    رفيقتي ما قصدها على الوصفات , كانت عم تحكي عن الحكي الي قبل الوصفات , انو ما كتير الو داعي :roll

    امين امين , الله يجمعنا بالصالحين في الدنيا و الاخرة , تحياتي و محبتي ;)

  19. laraye 1 August 2011

    اهلين يا منى .. بقى انتي متلي انا كمان عايشة عالكتب الالكترونية … هدا انسب شي بالغربة
    كاتو الشوكولا طلع رائع بس رح حط التعليق هونيك… انشالله السنة اللي جاي منجتمع من جديد وانشالله رح يكون معي بيبي صغير اذا ربي تمم ع خير

  20. Jassy 2 August 2011

    السلام عليكم :)

    الله يجزيك الخير يا رب :) … معناها البطاطا هون تازة :D .. لسه ما عملتها ، لأن عملت فاصوليا بالزيت ولهلئ في. بس تخلص ان شاء الله بعمل هالبطاطا.

    أنا فرني ممزوج بالمايكرويف وماكسيموم فيه 200 درجة … ومن قد ما حاولت اعمل بطاطا فيه ، اخر مرة تركتها ساعة ونص عالـ180 .. بس مافي خواص ما عم تجهز. يمكن رح صير اعمللها سلقة أو قلية قبل وضعها هونيك.
    طبعاً هالفرن بيشتغل عالهواء الساخن (مو الغاز متل العاديات).
    يعني كل شي بيطلع رائع رائع فيع كللللللل شي إلا البطاطا :upset

    على خير :) … والله لا يزعلك مع غواليك يا رب ويجمعك فيهم دايماً دين ودنيا واخرة يا رب .. وإفطار شهي وصيام وقيام مقبول

    والسلام عليكم ورحمة الله

  21. karamela 5 August 2011

    مبارح كنت بالمول واشتريت جبنة فيتا مخصوص لهالوصفة وقلت سبحان الله على التقدم التكنولوجي اللي جمعني بمنى اللي مابعرفها ومابتعرفني وعلمتني كتير اكلات طيبة وهي انا عم اسمع نصيحتها وعم اشتري جبنة الفيتا وهون دعيتلك من قلبي يامنى :)
    منى عندي سؤال الفيتا اللي جبتها طيبة بس متل ماقلتي حسيها مالحة شوي ياترى فيني شوي انقعها بالمي لتروح ملوحتها او رايك حطها متل ماهية على صينية البطاطا بتطلع طيبة
    وشكرا اليك

تقييم الوصفة
عاديةقد أحضرهاجيدةممتازةأكثر من رائعة (No Ratings Yet)