تبولة منال


         وصفة : منى                 2014/01/12                 8 تعليقات
تبولة منال

هيك بكون قاعدة في البيت ما عبفكر لا بطبخة و لا بنفخة بتدقلي واحدة من رفقاتي و نحنا عمنشمي من حديث لحديث بتقلي ييي نسيت أحكيلك عن هل الطبخة , و بتخبرني عن أخر طبخاتها , و أديه طلعت طيبة و أديه حبوها عيلتها , بقوم أنا بسكر التلفون و متل الحلويين بركض على المطبخ لأعمل متلها .

هل الوصفة وصفة رفيقتي منال , كنا عبنحكي و قالتلي , يييي و لا مرة ما دوقتك تبولتي , ما ؟ . قلتلها اي ما !
المهم حكتلي طريقتها و وصفتلي طعمتها , و أديه كل مين داقها عندها حبها و طلب الطريقة , و أنا انسانة ادام السلطات قلبي ضعيييف , لهيك سكرت التلفون و يلا ع المطبخ , حضرتها و طلعت يم يم يم

منال بتحضر تبولتها ببرغل المندار تبع الكبة النية , انا اتكاسلت وسخ ماكينة الكبة و استعملت عواضها محضرة الطعام , قلبت البرغل مع البقدونس و البندورة , و حمضت السلطة بشوية دبس رمان , و ليمون حامض طلعت اكلة غيرررر شكل .

بالصحة و الهنا

شو لازمنا ؟
كوب برغل ناعم
1 - 2 ملعقة كبيرة دبس فليفلة 1 حبة بصل صغيرة جداً الحجم
نصف كوب زيت زيتون
نصف ملعقة صغيرة كمون
نصف ملعقة صغيرة فليفلة حمراء ناعمة
ربع ملعقة قرفة
رشة بهار
ملح
1 - 2 ملعقة كبيرة دبس رمان
عصير ليمون حسب الرغبة
3 باقة بقدونس
نصف باقة نعناع
3 حبة بندورة
شرحات ليمون و قلب خسة للتزيين
طريقة التحضير

1- يفسل البرغل مرتان أو ثلاثة ثم يوضع في وعاء صغير , يضاف زيت الزيتون و دبس الفليفلة و البصلة و الملح و الكمون و القرفة و القليل من الماء و يترك البرغل لينقع لمدة ساعة تقريباً .

2 - يوضع البرغل في محضرة الطعام و يضرب حتى ينعم , يدعك قليلاً باليد و يضاف دبس الرمان و عصير الليمون .

3 - يفرم البقدونس و النعناع و البندورة فرماً ناعماً جداً , تقلب الخضار مع البرغل المجهز و يضاف المزيد من الليمون حسب الرغبة , تسكب التبولة في طبق التقديم و تزيين حسب الذوق و تقدم .

التعليقات

  1. ريحانة التميمي 17 January 2014

    ياسلام تسلمي ست منى ايش هي برغل المندار وايش الفرق بين البرغل الاسمر والابيض هل تختلف النتيجة انا توقعت منال هي منال العالم هههه اليوم جربت مرة ثانية لحم بالعجين روعة ويجنن طعمة اللحمة بالعجينة وحعطيك سر في العجن راح يكون العجين معك قطن او خدود بنات ماشاءالله استعملي اللبن في العجن او زبادي +كاس ماء في الخلاط وصبي الكمية المناسبة على العجينة وسلامتك

    • منى 24 January 2014

      الله يسلمك يا حلوة :)
      البرغل المندار هو البرغل المطحون على ماكينة الكبة مرتان او تلات مرات مع دبس الفليفلة و البندورة و البصل , و كاننا عمنحضر الكبة النية

      بتفرق النتيجة بالطعم , نحنا بحلب متععوديين على استخدام البرغل الغامق , اله طعمة مميزة و انا بشوفه اطيب من البرغل الابيض بكتير

      الف هنا و صحة و عوافي على اللحم بعجين و شكرا كتير على النصيحة , بدي جربه بااقرب وقت ان شا الله

  2. نسرينa 25 January 2014

    يسلموووو ياست الستات شي بشهي والله والطريقة سهلة كتير بدي اسألك إذا حبيت شارك بوصفة شو الطريقة وشكرآ كتير ألك

    • منى 25 January 2014

      اهلين نسرين بعد زمااان :)
      الله يسلمك يا حق ان شا الله تجربيها و تكون على زوءك يا قمر

      ممكن تبعتي الوصفة كرد هون او عن طريق اتصل بنا , الي بيريحك

  3. Jojo30 12 February 2014

    هه هي تأمن عشا اليوم يسلمو منى ومنال (:

    • منى 13 February 2014

      صحتييييين يا حلوة :)

  4. ياسمين 12 March 2014

    روعة مدام منى يعيشك

    • منى 12 March 2014

      منورة ياسمين , ان شا الله تجربيه و تحبيه

تقييم الوصفة
عاديةقد أحضرهاجيدةممتازةأكثر من رائعة (2 votes, average: 5.00 out of 5)