جمعية رفقاتي : أب 2009


         وصفة : منى                 2009/08/11                 57 تعليقات
جمعية رفقاتي : أب 2009

يوم الأحد الماضي , من يوميين كان عندي جمعة لرفقاتي , او متل ما منسميها هون , حمعية بنات , و كنت عازمة عليها احلى رفقة , رفقة المدرسة القديمة , و حضرت هل السفرة الخفيفة النضيفة و حبيت شارككن فيها ..

متل عادتي وقت العزايم بنعبط و بلوص الدني اخر كم دقيقة , و ع كتر ما كنت مو مروقة , طلعوا كل الصور راجة و هي الصورة الوحيدة الي ظبطت , منيح طلع في صورة :)

الوصفات من تحت و اليمين و نحنا ماشيين



الجاط المربع فيه :
محمرة
متبل
حمص

سلطة مشويات

جنبه فخذات الدجاج

فوقه لقمة تشكن


على يسارها صينية بيتزا بعجينة العشر دقايق و حضرت التبلة الايطالية واستعملتها للتغطية , يمممم


فوق لقمة تشكن في السلطة المقلمة , بتتبيلة جديدة


على يسارها سمبوسك بالجبنة البيضا و القشقوان


و على يمينها يلنجي بورق العنب و يالنجي البصل


فوق السلطة المقلمة كبة بس نوع جديد و حشوة جديدة اتعلمتها من حماتي الله يديمها بصحتها و عافيتها


على يمين الكبة سندويش بطاطا


و فوق الكبة في صينية جديدة اختراع , لسا ما طلعت باسم يلبقلها


و بجنبها فيه بطاطا بحشوة اللحمة و الجبنة



الحلويات نسيت أصورهم بس لتجي ضحى بتحكيلكم عنهم


كاتو الايس كريم بس بشكل جديد


كاتو الكراميل كمان بلمسات جديدة




تعليقي على الوصفات :

لقمة تشكن و الصينية التانية المجهولة الهوية لحد هلأ كانوا بياخدوا العقل

السلطة شغلة و قالتلي أية هي اطيب سلطة بتدوقها بحياتها

يالنجي البصل عمل ضجة و الكل حبوه و يمكن كتير منهم بيدوقوه لأول مرة

سندويش البطاطا كمان روعة بس من العبطة التدع معي شوي

البطاطا كوينز هل المرة ما كتير نجحت معي لأن قشرت البطاطا و بعدها سلقتها فشربت مي كتير , عدت أنا كترت كورن فلور و هادا أثر على الطعمة و ما طلعت معي متل كل مرة

الحلويات كانت شي ناهي و قطايف و غير شكل و شو زعلت لان نسيت صورهم , لان شكلهم كااان بياخد العقل , بس معلش الجايات اكتر من الرايحات ان شاء الله .

مع أن الوصفات خفيفة كلها ما عدا الكبة بس أخدوا معي شغل و تحضير اكتر من يومين , بديت يوم الجمعة بس على خفيف و يوم السبت و الأحد كان الركض على أعلى عيار . أما من ناحية الفصولة الناقصة فهل المرة نفدت بريشي و ما صار معي أفلام كرتون متل أخر عزيمة من فضل الله علي , بتتذكروا شو صاار معي , ايييييه . هلا انا عملت خبصتين , الاولى أن حضرت كبة نية بزيت الزيتون , بس ما استعملت جوز شامي فاتح . طلعت طيبة كتير بس لونها ما عجبني و لذلك احتفظت فيها في البراد حفاظاً على سمعة المحل و الغلطة التانية أن تركت خبز الصواني لأخر شي و هيك اتاخرت شوي بالتقديم و من العبطة ما طلع خبز سندويش البطاطا متل ما بدي

هادا كل شي لليوم و موعدنا في عزيمة جديدة و سفرة تانية ممدودة بنعم الله و بركة من عنده و ربي يديم نعمة علينا و يعرفنا ياها بدوامها لا بزوالها و كمان ربي يديم الصحة و العافية و الله يرزقه لأبو الشباب رزق حلال طيب مبارك و تبقى دياره عامرة .

سلام

التعليقات

  1. dado 11 August 2009

    كيفك منوش..
    منيح يلي نفدتي بريشك هالمرة.. 8)
    سبحان الله بتقولي بكل عزيمة لازم يكون في فصل ناقص… أو لأنو وحدتنا بتكون معجوقة لراسها بمليون شغلة وكل الأكل لازم يكون جاهز بنفس الوقت فـ بتفوت شوي بالحيط :grin
    السفرة كتير شكلها مشهي.. والغطا الزهري ناعم وشفاف وفيه حب كتير.. كأنو بيشبه شي وحدة أنا بعرفها ;)
    عجبتني فكرة سندويش البطاطا.. ولا مرة خطر على بالي تقديمها.. بس ظريفة للبوفيهات.. انشالله بأقرب عزيمة رح جربها.

  2. لارا مينا 11 August 2009

    الله يعطيكي العافية والصحة وتسلم الإيد إلي طبخت وضيفت سفرة واضح عليها ومن لونها إنها أنثوية بحته وعلى فكرة نبغى الصينية المجهوله تصير معلومه وتسجل رسميا في الأحوال المدنية ويكون لها اسم وتاريخ ميلاد موثق و كمان التتبيلة الجديدة للسلطة :grin
    وعندي اقتراح بسيط ياليت مستقبلا أي وحدة فينا تعمل عزيمة تصورها وترسلها حتى البقية يستفيدون من تنوع الأفكار خصوصا رمضان على الأبواب وألف شكر للجميع .

  3. semo 11 August 2009

    بسم الله ماشاء الله

    ياهيك السفر يابلا

    الله يعطيكي العافية ويقويكي وتعملي هالسفر لعيلتك ورفقاتك واللي بتحبيهن

    وكل عام وانت بالف خير

  4. semo 11 August 2009

    صحيح منى نسيت اسألك عن عجينة السمبوسك

    في بالوقع عجينة فيها زيت وحليب

    وقريت باحد المواقع عجينة مكوناتا قشطة وطحين وذرة ملح

    جربتي هي الطريقة ولا لأ؟؟

    والعجينة اللي مصورتيها لونها دهبي على احمر شوي هادا اللون من التصوير ولا هي هيك بتطلع؟؟

    لان مرة اكلت عند حدا عجينة سمبوسك بتجنن منفوخة ومقرمشة بس لونها مايل للابيض أكتر

    بعرف تقلت عليكي بالاسئلة

    بس عندي عزيمة اول يوم رمضان وحابة تعطيني رأيك

  5. منال 11 August 2009

    :zzzشي كتير ظريف ماشاء الله شطت ريالتي

  6. ام احمد الغالي 11 August 2009

    امين يارب يا منى الله يسمع منك يارب
    عزيمه حلوة ومفتخرة
    وتعيشي وتعملي عزايم يارب حمودة جنبي وعم يقول ساسووو يعني اكلات طيبه (هو كل ما شاف حلو بيقول ساسو ) هو كمان بيقلك يسلم دياتك يارب
    :zzz

  7. Iman 11 August 2009

    اهلين منى. بسم الله ما شاء الله. يعني العزيمه شكلا من اولا لاخرها بناتيه . ابتداءا بالالوان و انتهائا بالاصناف. ما شاء الله كل شي احلا من التاني. تسلم الايدين اللي طبخت و اللي ساعدت. و الله يخليلك ابو الاولاد على راسكم و يرزقكم الرزق الحلال و يديم النعمه يا رب. اسمالله كل شي في منتهى الذوق كالعاده يا منى.
    كل الحب :)

  8. أم جودي 11 August 2009

    روعه ماشاء الله لا قوة الا بالله تسلم ايدك وبالنسبة للفصول الغريبة اللي صارت معك رح احكيلك نهفة صارة مع مرت اخوي كنت نازلة انا على سوريا زيارة وعزمتني على العشى وعملت بطاطا مع دجاج وششبرك وكبب وملوخية وهي بتعرفني بموت بشي اسمو ملوخية وبيوما من العبطة طلعت محمصة نعناع بدل ملوخية لانو بستعملها ناعمة وكان عندا انفلونزاوما ميزت بين ريحة النعناع وريحة الملوخية وشو كانت أكلة غير شكل :grin

  9. DOUHA 11 August 2009

    انا جيت

    رح احكي على بساط احمدي هلئ
    يوم الاحد كان موعد زيارة عند منى والله انا كنت حابة روح بس كان عندي ظرف المهم ماما اصرت اني روح
    اول ما فتت على بيت منى استقبلتني منى باالوجه البشوش وكانت الجمعة بتجنن لاول مرة بصراحة بكون مع صبايا ومنحكي حديث مفيد انا ما بعرف اغلب الصبايا يلي كانت بس جد كان في مواضيع مختلفة عن ( الطفولة – الشباب – المعاقين – شوية تجارب طيبة )
    يعني طلعنا بالاخير بشي مفيد لاسف اغلب المشاوير يلي عم كون فيا (تصنع – مبالغة بالمكياج وكاننا بعرس هههههه وحديث تافه ,,,,,,,,,الخ)
    المهم صار موعد لقمة طيبة ولاقيت بنت منى جودي عم تحط المفرش الوردي على الطاولة وبلمسات زوءءء

    ومحضرة حالا للتصوير
    جهزت الطاولة كانت اصناف خفيفة وطيبة كتير
    رح خبركون عن سر
    نحنا بحلب اذا كنا بمكان فيو اكل مهمة صاحبة البيت انها تحلف على الضيوف انون ياكوا كتير

    :zzz

    بس انا والصبايا ريحنا منى من هل المهمة ابدا ما كنا خجلانات

    :grin
    كانت الاكلات طيبة كتير انا اكلت لقمة تشكن وسلطة وافخاد دجاج  بطاطا كوننز مممممممم وسمبوسك بس كان فيو اضافة بس مافيني خبركون عنا سررررررررر :sigh

    شندويش بطاطا ييميمييممي
    يلنجي البصل هائل

    ما اكلت الكبة والاكلة يلي مالا اسم لاني شبعت
    المهم وقت الاكل الكل اجتموا على كلمة وحدة اممممممممممممممممممممممممم طيبة يسلموا يامنى
    ومنى عم تعطيي شوية مقادير على الطاير

    بعد ما خلصنا الاكل اجانا الحلوو

    ويلي انا من كاتو الكراميل شكلوو كان مختلف شوية عن يلي بالموقع الكورن فلكيس كان على الداير بس الكراميل شوي بطريقة تانية وكمان فيو اضافات
    كاتو جلاس على شكل وردة كان مغري كتير
    بصراحة كانت سفرة حلوة وطيبة ودما خفيف
    رح خبر عن شي انو بنت منى جود رح تطلع ست بيت ممتازة هية عم تساعد منى باغلب الاشياء وعم تساعد بغسل الصحون
    كتير البنت مرتبة

    الله يخليلا يارب

    طبعا فرح وكريم هي حكاية بذاتا
    كتير البنت حنونة
    قبل ما انهي التعليق بحب ضيف اني طقوس رمضان بدي موسمو عند منى كانت البيت فيو فوانيس رمضان
    مبروك للجميع برمضان الكريم
    ومبروك لقمة طيبة …….

    شكرا منى

  10. غيث 11 August 2009

    الله يسلم هالايدين
    يارب
    تعيشي وتعملي عزايم
    والله نورتيني في عندي مشروع عزيمة قادم ورح اعمل من هالسفرة شي بيشهي وبيبيض الوجه ويمكن ميمو رح تساليني وين كنت غاطة انا معكم وعم طل عالموقع بس اقل من السابق لاني مشغولة جدا عذرا منك منى بديي اسالك انا اذا حبيت ابعت وصفة منشان طبق رمضان بيصير اكون عاملة اكلة معروفة بس بطريقة محرفة وغير عن الطريقة التقليدية بشكل ابسط بتناسب الكسل الللي بيصيبنا برمضان عدا عن ضيق الوقت بهالشهر الفضيل وكمان الحر الشديد بيعطي وهن عام ولا حصرا لازم تكون اكلة جديدة بكل محتوياتها واخيراا شكرا لك وكل عام وانت واسرة الموقع بالف خير ورمضان كريم :)

  11. غيث 11 August 2009

    منى رابط البطاطا كوينز عم يفتح على اكلة سندويش البطاطافي لخبطة والله اعلم من عجقة الشغل ارجو الاطلاع وشكرا

  12. soma 12 August 2009

    تعيشي و تعملي عزايم عنجد الله يعطيكي العافية على هالصفرة الأنيقة

  13. سمسمة 12 August 2009

    ان شاء الله بيعيشوا هالأيدين منى كل عزيمة أحلى من التانية
    أنا حابة أسألك عن موعد العزيمة التانية مشان جهز حالي من هلأ

  14. قهوه مُره 12 August 2009

    السلام عليكم….كيف حالكم أخواتي..أرجو أن تكونوا بصحه وعافيه…منى كيف حالك. يسلموا إيديكي على كل شي بتأدميلنا ياه..ودايما بالأفراح..وكل عام وأنتم بخير

  15. منى 12 August 2009

    هلا دالو :)
    ايه و الله لازم يكون في شي مو تمام و مو على كيف صاحبة البيت , بس المهم الصورة العامة تكون منيحة :) هلا انا ما فتت بالحيط فتت بالفرن و انا عم اقرا و انفخ عليه لحتى يشد همته شوي و يبيض وجهي :grin

    خليلي عينك دالو , كاني عرفتها لهل الحلوة الي عم تحكي عنها :grin

    اذا جربتي سندويش البطاطا رح يعجبك كتير , كاني متاكدة , و اذا بتحبي ضيفي مع المايونيز شوية توم , نمم نمممم

  16. منى 12 August 2009

    هلا منال :)
    اتفضلي اختي و الاكل على اد المحبة
    ان شاء الله تجربي شي وصفة و تكون على زووءك :zzz

  17. منى 12 August 2009

    هلا ام احمد :)
    الله يخليليك ياه و تعيشي و تعمليله ساسويات على زووءك و يباركلك فيه و تشوفيه متل ما بدك و احسن يكتيرر بكتير ;)

  18. منى 12 August 2009

    هلا سيمو :)
    الله يسلمك أختي و الف شكر الك للدعوات الغالية و الكريمة

    انا كمان مرة قرات عن عجينة فيها قشطة , عجبتني فكرتها بس و لا مرة جربتها , بس هي ببالي و الا ما شي يوم جربها ان شاء الله .

    يمكن اللون من التصوير , على كل جربي عجينتي تبعة السمبوسك و ما بتكوني الا رضيانة و على مسؤوليتي ان شاء الله , ما بتعرفي هل الوصفة انا مشهورة فيها بين اهلي و قرايبني و طريقتي صارت معتمدة عند امي و خواتي و حتى ام زوجي و مين ما داقها بيقلي هل السمبوسك شفلة ;)

    لا تقلتي و لا شي , اسا سؤال او خدمة انا تحت امرك

  19. منى 12 August 2009

    هلا امونة ام الكنافة :)
    ايه و الله امونة , بناتية و لطيفةو كربوجة هل العزيمة , اشتهيت الحبايب معي ;)

    الله يسلمك يا امون و ربي الك متل هل الدعوات و اكتر و اغلى و تنولي كل الي في بالك , شرفتي حبيبتي

  20. منى 12 August 2009

    هلا لارا:)
    اي مو تكرم عيونك , هلا عم دور على اسم مناسب و بس ما لقيته ببقى بسجلها رسميا أما صوص السلطة فهو ليمون و بشرته و خل و خردل و ملح و رشة زعتر اخضر و بصل جوانح مفروم و نقعته بالصوص شي ساعة قبل التقديم :)

    و الله اقتراح ممتاز , ان شاء الله تشركنا كل الاخوات بعزايمهم و نلطش افكار و نغني سفرتنا

  21. منى 12 August 2009

    هلا ام جودي :)
    و الله نفس الفصل صار مع مرة خالي السنة الماضية برمضان , بس وين تمرق علينا , بقينا لاخر رمضان و نحنا عم نسمعها ان فطرتنا نعناعية :grin

  22. رنا 12 August 2009

    ياعيني والله شي طيييييييب
    بس انا الي عليكي عتب …ليش بقا بس بتعزمي ضحى …طيب ونحنا شو بس هي من الاعضاوات يعني :grin

    اما الاكل عن جد كله انوثة لانه مافي رز ومحاشي تقيلة بتحسي اكل البنوتات غير شكل كله نعومة ويمكن مابعمري شفت بنت الا بتموت عاليالنجي والسلطات ;) اما الرجال كبب وماشابه من السماقيات والزفر :grin هادا الاكل بيعتبروه على قولة بابا تسكيتة جوعة
    الاكل كله مرتب ولذيذ وبانتظار الوصفة الجديدة على نار بدنا شي جديد لرمضان والله يعطيطكي الصحة والقوة ويديمك على اهلك وعيلتك

    بس من وين جايبة غطا الطاولة الزهري رجعتيني سنين لورا وقت كنا نلعب بالباربي ونجيب كل شي زهري :grin

  23. souha 12 August 2009

    السلام عليكم
    كيفك منى شو هالأكلات الحلوة صرلي زمان غاطس راسي بالشغل و ما عم أحضر هيك مناسبات شهيتيني و خاصة دولما البصل كتييير طيبة هي أكلة عراقية مرة عملتها ماما بس مو لحالها مع أنواع دولما تانية سلم دياتك
    بس بدي أسألك يالنجي ورق العنب كأنو لمحت في حبات بطاطا إذا موغلطانة ولا هادا ليمون لأنو نحنا منحط تحتو بطاطا , و المفرش كتير ظريف حبيب قلبي اللون الزهري
    كمان تذكرت سؤال السلطة المشوية هي سلطة فليفلة أكلة تركية على ما أعتقد
    أكلات ظريفة الله يعطيك العافية

  24. ام حسين 12 August 2009

    ماشاء الله سفرة دايمة يارب بتشهي
    بتعرفي انا لما بيكون عندي عزيمة بنط فورا على مواضيعك تبعت العزومات
    مشان اخد منها افكار الاطباق

    وذكرتيني بسندويشات البطاطا بالماما على طول اذا بدها تاكل لازم يكونوا مقرمشين والا ما بتاكل وفكرتهم حلوة ولا مرة خطر على بالي اعملها بس ان شاء الله ضميتها لقائمة العزايم

    ويسلموا يا ست منى واخيرا مشي حال التسجيل :roll

  25. وسيلة 12 August 2009

    محلاها هاذ السفرة بالصحة والهناء لك ولرفقاتك.

  26. امونه 12 August 2009

    يا عمي شي اكابر كتير و الله

    دايما يا ست منى شغلك بعبي العين و القلب يسلموا هالديات ان شاء الله و انا بستنى وصفة الكبه الجديده الي عرفتيها من حماتك الله يعطيها العمر و الصحه و لا تنسي الطبق الجديد الي طلعتي فيه كمان هاتي لنشوف شو أبدعتي…

    بس بجد كالعاده سفره بتفتح النفس … يعطيكي الصحه و العافيه و يسلم ايديكي يارب…
    و عفكره انا متل الاخت ام حسن لما تيجينا شي عزومه بركض على القسم تبع البوفيهات عندك و بصير الطش وصفات ;)

    يا رب تضلي بهالإبداع ع طول يارب …

    و تسلم دياتك مره تانيه …

  27. ام دانية 12 August 2009

    يسلم هل الديات يارب تعيشي وتعملي عزايم والله يديم الفرحة والمحبة بديارك :zzz بصراحة من حكي الاخت ضحى تمنيت كون معكن :cry بس العز للرز والبرغل شنق حالووووووووو :cry :cry :cry

  28. laraye 12 August 2009

    فعلا ما شاء الله و كان
    السفرة بتاخد العقل :)
    انا اليوم عملت اكلة كتبر بحبا وطبعا الوصفة من عندك ;) و هي الرز بالدجاج وطلعت بتاخد العقل كتير كتير طيبة
    الله يجزيكي كل خير يا منى
    :)

  29. منى 13 August 2009

    هلا ضحى :)
    بالأول هنا و الف الف صحة و عافية على كل شي قتيه و الي ما دقتيه عتبان عليك , بس خيرها بغيرها , المرة التانية رح حط بطاقات و قطع لحتى ما في الواحدة تقوم من على السفرة الا و داقت من كل شي :grin

    ردك كله زووء متلك , خليلبي عينك و انا ممنونتك و لو كنت ما جيتي كنت رح ازعل :roll

    على فكرة مدري جوديتي مدرية فروحتي قالتلي , ماما رفيقتك الي لابسة.. ( انت يعني ) لطيفة كتير , قلتلها و الله صح :zzz

  30. منى 13 August 2009

    هلا سوما :)
    الله يسلمك أختي , هادا بس من زووءك

  31. منى 13 August 2009

    هلا غيوثة :)
    ان شاء الله تكوني مشغولة بالخير حبيبتي , و الله يكون بالعون على العزيمة الجاية ;)

    الوصفة شو ما بدك , جديد قديم , من السندويش للحلويات , ايا طبق بيكون على مزاجك و اذا كان سهل فأحسن و أحسن ;)

    ان شاء الله تعيشي و تعيدي علي و على كل حبابك أختي و الله يديم الصحة و العافية ..

    شكرا للتنبيه , تم تصليح الروابط الي داخلة ببعضها :zzz

  32. منى 13 August 2009

    هلا أختي قهوة :)
    الله يسلمك أختي و ان شاء الله بيوت المسلمين كلها عامرة بالخير و المحبة و التقوى :)

  33. منى 13 August 2009

    هلا سمسومة :)

    معناها حضريلي حالك بأول عشر ايام من رمضان اذا ربنا يسر و عطانا عمر و كمان حضريلي طلباتك , شو حابة اطبخلك

    الله يخليلي ياكي يا زووء و ربي يديم المحبة حبيبتي

  34. منى 13 August 2009

    هلا رنونة :)

    انت ارجعي على سوريا و خبريني لحتى تكوني اول واحدة من المعازيم يا قمر ..

    الغطا جايبته من سوق القماش , بس كنت ناوية جيب واحد تركواز ليطبق مع ديكور البيت , بعدها غيرت رااي و جبته زهري لحتى رجع الصبايا كم سنة لورا و زكرهم بالطفولة , و تركت التركواز لسفرة رمضان اذا ربنا رتد و يسر :zzz

  35. منى 13 August 2009

    هلا ام السوس :)

    الله يعطيكي العافية و ييسر الشغل عليك و الله يسلمك و يحفظك ..

    البصل عملته مع اليالنجي , بنفي حشوته و بنفس الطنجرة و هو الي ظاهر على اليالنجي , لا ليمون و لا بطاطا , و اتمنى تجربيه لان عن جد مممم

    المفرش كان القصد منه ان الجمعة بناتية و كلها أنوثة و بالفعل حسيته لفت نظر , يعني فكرة الواحد ممكن يغير فيها شكل .

    السلطة اللمشوية هي عبارة عن بندورة و فليلفة حمراء و خضراء و بصلة و كم فص ثوم كله مشوي في الفرن و بعدها قشرته و فرمته ناعم ناعم و ت لته بالملح و بس و بعدها على الوج حطيت زيت زيتون , سهلة كتير و طيبة كتير و ممكن تحضريها لما بيكون عندك شي طبخة بالفرن , تحطي معها هل الخضرة ليعطيكي طبق جديد من دون مجهود زيادة .

  36. منى 13 August 2009

    هلا ام حسين :)
    يا ستي نورتي و شرفتي و اسفة للمشاكل الي صارت .

    ان شاء الله دايما تستفيدي و يكون في شي جديد يبيض وجهك ادام الضيوف و سندويشات البطاطا شي ناهي و بتعجب الكل من الكبير للصغير , اليوم كمان كان عندي جمعة و عملتها و عن جد الكل قال يمممم حتى ستي الله يخليها و هيا ست مقدرة و ما بيعجبها الا الشي الاصولي و التمام

    هلا فيك مرة تانية اختي و مية اهلا و سهلا فيكي

  37. امونه 13 August 2009

    ست منى لو بدي ابعت وصفات جديده أبعتهم على ايميلك؟؟ :?

  38. سما الشرقية 13 August 2009

    اهليا منى كيفش شنو اخبارش ….
    مبدعة كالعادة عزيزتي……
    سفرة بتطير العقل ماشاء الله يعطيك العافية …
    هذا اول رد لي كنت اتابع الوصفات بصمت لكن قرات مقالش في وصفة الكيكة للسنتين عن سرقة الوصفات ..
    واحببت ان اذكر لك كيفية تعرفي على الموقع وهو اني شفت احدى الوصفات في منتدى من المننتديات بدون ذكر الكاتبة للمصدر الا أن الصورة مكتوب عليها لقمة طيبة وابهرنا التصوير صراحة وكان التصوير اعلاني او من هالقبيل لكتاب مثلا أوغيره صراحة تصويرك رووووووووووووووعه بجد ماشاء الله وش رايك أنك تتنزلي كتاب باسمك فيه الصور والوصفات ؟؟؟ودمت بود عزيزتي واتمنى ان تقبليني صديقة لك..

  39. منى 14 August 2009

    هلا أختي وسيلة :)

    نورتي و شرفتي و مية اهلا و سهلا فيك .

    مشكورة للتواجد الطيب و اتمنى ان تجربي شي وصفة و تكون على زووءك

  40. منى 14 August 2009

    هلا أمونة :)

    الله يسلمك يا مزوءة و يا رب مون بيضت وجهك اذا جربتي شي و يكون يممي

    تكرم عيونك على الكبة و الوصفة التانية ان شاء الله

    الف شكر الك لردك و لكل الكلام الحلو الي فيه , نورتي يا عسل

    هلا اذا حابة تبعتي وصفة تانية ابعتيها وين ما بتحبي , على ايميلي او كرد على ايا موضوع , وين مو حابة

  41. منى 14 August 2009

    هلا أم دانية :)

    الله يسلمك و يحفظك و يخليكي و يباركلك بدانية و اخوتها يا رب
    ليش , ما في حدا شنق حاله .. ان شاء الله العزيمة التانية بتكوني بحلب و بتشرفي أختي

  42. منى 14 August 2009

    هلا أختي laraye :)

    الله يخليلي ياكي على هل الدعوة الحلوة و الكريمة كتير , امين اختي و انت كمان .

    ريتو عافية و الف صحة و هنا يا رب على الرز و الدجاج و على كل شي جربتيه او ناوية تجربيه من لقمة طيبة ;)

  43. منى 14 August 2009

    هلا فيك أختي سما :)

    شرفتي الموقع و نورتيه و صحيح و عسى أن تكرهوا شيئا و هو خير لكم , انا كتير مبسوطة انك تعرفتي على الموقع و لو كان عن طريق واحدة لاطشة وصفة منه .
    الف شكر الك للكلام الي في ردك و اتمنى ان تعجبك الوصفات كمان و تجربي شي و يكون على زووءك

    الله كريم أختي , ان شاء الله ربنا بيسر و بعمل كتاب فيه كل وصفات الموقع .

    مية اهلا و سهلا فيك اختي مرة تانية و ان شاء الله تبقي منورة على طول

  44. gsm 14 August 2009

    يا سلام ما شاء الله لا قوة إلا بالله شو ها منوشة شو هل السفرة والله لما شفتها قلت لحالي آخ بس لو كنت رفيقتك كنت اكلت من هل الأكلات الطيبة بس ما شاء الله مو بس أكل طيب لأ وزوق وشي مرتب واكابري ما شاء الله عليك والله لما اشوف سفرك بقول لحالي يا ترى خرج يطلع معي هيك شي :roll بس عن جد صار عندي فضول اعرف شو هل الأكلة العجيبة والسرية :)
    اكيد طيبة ومنفنفة متل باقي كل اكلاتك الطيبين على فكرة أنا غمبارح عملت شيخ المحشي كوسا وعلى طريقتك وعن جد طلع كتيير طيب زوجي كيف عليه مع إنو هي اول مرة بعمل هل الأكلة بس لو تشوفيني كيف انا وعم احفر المحشيات عم اقرأ على كل وحدة المعوذات بس شي ما تتشقشق وتنثقب لأنو هي اول مرة بحفر هيك حجم من المحشيات
    ما تواخذيني طولت عليك كتييير

  45. منى 14 August 2009

    هلا فيك gsm :)
    الله يسلمك و يخليك يا قمر و اكيد بيطلع معك و حلى , لان الواحدة فينا مرة عن مرة بتتعلم و بتزيد خبرتها ;)

    اتذكرت حالي اول مرة حفرت فيها كوسا , بعد 4 5 كوسايات اتصلت بابو الشباب و قلتله اليوم بطل غدانا شيخ المحشي , صار غدانا متومة .. الله وكيلك ما طلع معي شي صاغ , كله مصافي :grin

    الف هنا و صحة على شيخ المحشي بكل لقمة و كل فرفوطة , و تكرم عيونك و عيون بقية الخوات على الوصفة السرية :zzz

  46. eman000 19 August 2009

    انا مشتركة جديدة وكتير مبسوطة من الموقع وبصراحة كل يوم عم تابع اي شي جديد وعم بستنى طبخات للرمضان وبالنسبة لهاي السفرة شكلها ملوكية وكتير طيبة يا ريت نوصل لهادا الفن بالطبخ اسفة طولت عليكم بس انا جديدة وبطلعلي :p

  47. بدور 19 August 2009

    يا سلام ما شاء الله على هالسفرة والأكلات ما أطيبون راحت على اللي ما أجوا بس شافوا :cry

    نشالله بالهنا الهي لكل مين كان حضران والله يسلم دياتك الحلوين ميمو الغالية والله بعدك ما حدا يعمل عزايم ;)

    والله يخليلك جودي و الاولاد كلون ويحميون ويبارك فيون على هالتوجيهات والتربية
    كتير عجبتني لمسات الطاولة و الأرتي الزهري :zzz
    الله يباركلك بكل خطوة يارب و كل سنة وانت سالمة والله يتقبل طاعتنا برمضان و يباركلنا يارب بما انو اجواء رمضان صارت حاضرة ببيتك :)

  48. منى 2 September 2009

    هلا امونة الحلوة :)
    ان شاء الله بتصير و بتعملي شي احلى و اطيب لان من شغل دياتك , شرفتي الموقع و نورتيه و مية السلامة بهل القامة يا حلو ;)

  49. eman000 3 September 2009

    انا كتير مبسوطة انك رديت على يا ست منى والله انك عسل وكللك زوء ونفسي اكون زيك مع اني الي متزوجة من 5 سنوات بس جديد صرت اطبخ واعمل اشياءاات زاكية ;)

  50. منى 3 September 2009

    المهم انك حابة تعملي شي طيب و هيك رح يطلع معك ان شاء الله و على ايا وصفة بيكون عندك ايا استفسار انا تحت امرك و بالخدمة دوما :zzz

  51. منى 3 September 2009

    هلا بدورة :)
    هيك هيك زعلتيني منك , بس يلا ان شاء الله الجايات اكتر من الرايحات ;)

    الله يخليلي ياكي على هل الدعوات كلها , ان شاء الله انت و كل عيلتك و احبابك و الغوالي على قلبك يا عسل :zzz

  52. رضاب 5 September 2009

    ما شالله يا منى ما شالله انا جديدة هون واللهي انبهرت وحكيت لرفقاتي عنك وقلتلهم يدخلو الموقع شكرا كثيير وربي يجزيكي كل خير وانشالله منتعلم اكثر واكثر ونصير شطورين مثل بدون مجاملة والله بالتوفيق

  53. منى 6 September 2009

    هلا فيك رضاب :)
    هادا بس من زووءك و لطفك حبيبتي , ان شاء الله بتصيري احسن بمليون مرة و هيا بس بدها شوية صبر و طولة بال
    :roll

  54. مانو 11 October 2009

    صباح الخير ..
    كيفك مدام منى اول شي بكشرك كتيييييييييييير على هالموقع اللي بيجنن وأنا برأي افضل موقع طبخ في العالم كله.
    وتاني شي أنا الشهر اللي الجاي عيد ميلادي ومحتارة شو بدي اعمل ، بس بدي نصيحتكم شو اعمل اكل بحفلة عيد الميلاد والسؤال التاني انو احط كلشي على الطاولة بنفس الوقت يعني الكاتو والاكل والوفواكه والحلو .
    وشكرا للنصية سلفاً.
    مانو

  55. منى 11 October 2009

    هلا مانو :)
    الله يخليلي ياكي يا زووء , ان شاء الله تجربي كم وصفة من عندنا و يكونوا تمام .

    اكلات عيد الميلاد الاحلى انها تكون خفيفية ممكن تلطشي من هون كم فكرة و كمان من عزيمة السحور الي موجودة على الصفحة الرئيسية ;)

    السؤال التاني انك تحطي كل شي على الطاولة او لا , ما دامه عيد ميلام معناها لازم تحطي كل شي على الطاولة , ممكن تكون الحلويات بقسم و الاكل العادي بقسم تاني بس كله مع بعضه احسن و اسهل الك كتير و على طرف الطاولة او على طاولة صغيرة بتحطي صحون كبيرة مسطحة للاكل و صحون صغيرة للحلويات و كاسات للعصير او الكولا مع محارم ;)

    ايا سؤال انا تحت امرك اختي , شرفتي و نورتي و مية هلا فيكي

  56. jemana 31 July 2013

    مشكورين عالكلات اللذيذة

    • منى 31 July 2013

      مية هلا فيك

تقييم الوصفة
عاديةقد أحضرهاجيدةممتازةأكثر من رائعة (1 votes, average: 5.00 out of 5)