حلى وردات الجوري


         وصفة : منى                 2007/07/26                 54 تعليقات
حلى وردات الجوري

·          يحضر الشراب : يوضع السكر و الماء و القرفة و القرنفل في قدر صغير على نار هادئة و يحرك حتى يذوب السكر تماماً .

·          ترفع النار و يترك الشراب حتى يغلي ثم تهدى النار و يترك الشراب على نار هادئة لمدة خمس دقائق ثم يبعد القدر عن النار و يضاف عصير الليمون ثم يترك حتى يبرد تماماً .

·          يوضع الزيت و اللبن و البيضة و الزبدة و الخل و الملح في خلاط العصير ثم يمزج الكل , يضاف السميد و البيكنغ بودر و يخلط حتى يصبح المزيج ثقيل .

·          يقلب مزيج السميد على صينية ثم يضاف الطحين بالتدريج و يعجن بعد كل إضافة حتى الحصول على عجينة قابلة للمد و لا تلتصق باليد .

·          يحمى الفرن على درجة حرارة 175 , تغطى صينية فرن بورق الزبدة .

·          تفرد العجينة بشكل رقيق ثم تقطع دوائر بالقطاعة او بفنجان القهوة , تصف 5 أو 6 دوائر فوق بعضها البعض بشكل حبات الدوميو .

 ·          تلف الدوائر على بعضها البعض مثل السويس رول .

 ·          باستخدام سكينة حادة تقطع إلى قطعتين .

 ·          ترفع القطع بلطف و تحشى في قلبها بالمكسرات أو بالكيري ثم توضع على الصينية .

 ·          تخبز الورود الجميلة في الفرن الحار لمدة 20 – 25 دقيقة أو حتى تشقر و تنضج .

·          تخرج القطع من الفرن و تسقى الورود الحارة بالشراب البارد فوراً و تترك حتى تتشرب القطر و تبرد .

·          توضع ورود الجوري في ورق بليسة وتقدم مع الليمونادة أو الشاي و القهوة .




العجينة :

نصف كوب زيت ذرة أو دوار الشمس
ربع كوب لبن
نصف كوب سميد
بيضة صغيرة
ربع كوب زبدة ( 60 غ )
فانيليا
ثلاث أرباع ملعقة صغيرة بيكنغ بودر
ملعقة صغيرة خل
رشة ملح
من كوب إلى كوبان طحين

الشراب :

ثلاث أرباع كوب ماء
ثلثي كوب سكر
ملعقة صغيرة عصير ليمون
بضعة أعواد قرفة و حبات قرنفل ( اختياري )

الحشوة :

فستق أو جوز أو كيري





• يحضر الشراب : يوضع السكر و الماء و القرفة و القرنفل في قدر صغير على نار هادئة و يحرك حتى يذوب السكر تماماً .

• ترفع النار و يترك الشراب حتى يغلي ثم تهدى النار و يترك الشراب على نار هادئة لمدة خمس دقائق ثم يبعد القدر عن النار و يضاف عصير الليمون ثم يترك حتى يبرد تماماً .

• يوضع الزيت و اللبن و البيضة و الزبدة و الخل و الملح في خلاط العصير ثم يمزج الكل , يضاف السميد و البيكنغ بودر و يخلط حتى يصبح المزيج ثقيل .

• يقلب مزيج السميد على صينية ثم يضاف الطحين بالتدريج و يعجن بعد كل إضافة حتى الحصول على عجينة قابلة للمد و لا تلتصق باليد .

• يحمى الفرن على درجة حرارة 175 , تغطى صينية فرن بورق الزبدة .

• تفرد العجينة بشكل رقيق ثم تقطع دوائر بالقطاعة او بفنجان القهوة , تصف 5 أو 6 دوائر فوق بعضها البعض بشكل حبات الدوميو .

• تلف الدوائر على بعضها البعض مثل السويس رول .

• باستخدام سكينة حادة تقطع إلى قطعتين .

• ترفع القطع بلطف و تحشى في قلبها بالمكسرات أو بالكيري ثم توضع على الصينية .

• تخبز الورود الجميلة في الفرن الحار لمدة 20 – 25 دقيقة أو حتى تشقر و تنضج .

• تخرج القطع من الفرن و تسقى الورود الحارة بالشراب البارد فوراً و تترك حتى تتشرب القطر و تبرد .

• توضع ورود الجوري في ورق بليسة وتقدم مع الليمونادة أو الشاي و القهوة .
  • وصفات تانية ممكن تعجبك


التعليقات

  1. Rino 1 October 2007

    الله يعطيكي ألف عافية يا منى صار لي مدة مشتهية جرب هالحلا بس بما أنك مجربتيه بدي أسألك يا ترى ممكن تحضيره مسبقا و تفريزه و يا ترى الأفضل تفريزه قبل الشوي و لا بعدو

  2. منى 1 October 2007

    هلا رينو :)

    حبيبتي انا ما جربت فرزه , بس على الاكيد إذا ناوية تفرزيه لازم تفرزيه و هو ني و بعدها بتخبزيه , قياساً على الكرابيج و المعمول ..
    لان أنا بعملهم و بفرزهم قبل رمضان و برمضان بخبز على قدي تازة بتازة ;)

    إذا جربتيه خبريني يا عسل :)

  3. Rino 1 October 2007

    رح جربو ان شاء الله و خبرك بس الله يعين هالفريزر شو بدو يتحمل ليتحمل

  4. منى 1 October 2007

    و الله الله يعينه , بشبهوا قبل رمضان للحامل بشهرها التاسع :grin

    عم استنى رايك

  5. نهال صبري 21 February 2008

    شكله جمييييل جداً أخت منى ، أنا بدور على حلويات يكون شكلها حلو و توضع في ورق بليسيه لأصنعها في مناقشة زوجي للدكتوراة إن شاء الله ( بعد شهر و نصف لكن بحضر الوصفات من دلوقتي :roll )و ده إن شاء الله أعمله .

  6. نهال صبري 26 February 2008

    سؤال :
    المقصود باللبن هو الزبادي ؟؟
    سؤال آخر :
    هذا المقدار بيعمل كم قطعة بالتقريب ؟؟
    و جزاكِ الله خيراً .

  7. منى 26 February 2008

    هلا نهولة , ان شاء الله تجربي الوصفة و تبيض وجهك يا رب , اللبن المقصود هو اللبن الزبادي و وصفته بتشوفيها [URL=http://www.l2ma.com/content/view/350/2/]على هل الرابط[/URL]

    أما هل المقدار قديه بيعمل فوالله مو متزكرة بالضبط , أظن ما بين 20- 25 قطعة , بس مو متأكدة :roll

  8. نهال صبري 27 February 2008

    جزاك الله خيراً منى ، أنا بالفعل جربتها أمس باستخدام الزبادي ( ماقدرتش أنتظر الرد 8) ).. و عملت معي 18 قطعة ، و الطعم :roll :roll :roll راااائع .

  9. منى 27 February 2008

    صحةةة يا نهولة , كتير انبسطت انها عجبتك , مطري ما يسري يمري و ربنا يقومك بالسلامة انت و البي بي ;)

  10. نهال صبري 7 March 2008

    الله يسلمك يا حبيبة ألبي ..
    عملت الوردات مرة تانية و عجبت صاحباتي جداً ( ما صدقوش إني عاملاها بنفسي !) ،،، حبيت أكرر شكري :) .

  11. منى 8 March 2008

    هلا نهولة :)
    صحة و مية هنا على قلبك و قلب النون الصغير و قلب كل صاحباتك:)

    الشكر ليك انت حبيبتي و على زوقك :zzz

  12. dentamaniac 16 April 2008

    تسلم دياتك عالوصفه الرووووووووعه..كل شي من تحت دياتك حلو يا قمر

  13. منى 25 April 2008

    الله يسلمك يا قمر يا سوسنة :)

    تسلمي على الرد و الزووء كله

  14. الدمشقية 6 November 2008

    تسلم ايدك حبيبت قلبي
    لما ساويتها بالبيت طلعوا كلهم على المطبخ ليشوفوا شو السر بالشكل تبعها
    واخواتي ورفقاتي يلي شافوا صورتها على الموبايل طار عقلهم فيها
    [url=http://www.0zz0.com/realpic.php?s=10&pic=2008/10/28/08/286606598.jpg][img]http://www10.0zz0.com/thumbs/2008/10/28/08/286606598.jpg[/img][/url]

  15. منى 6 November 2008

    هنا و عوافي على قلبك و قلب كل العيلة , كتير انبسطت انها عجبتك ;)

  16. نوارة 7 January 2009

    وأخيرا جربتها
    ياي شو طلعت طيبة وشكلها بجنن
    المرة الجاي وقت بدون يجو رفقاتي اكيد بدي اعملها

  17. منى 7 January 2009

    الف هنا على قلبك و قلب محمد و رفقاته كمان :)
    كتير انبسطت انها ظبطت معك نوارة و لا تنسي تاكلي عني كم قطعة :zzz

  18. رنا 25 March 2009

    عندي سؤالين على هالورود الرائعة
    اول شي
    السميد ناعم ولا خشن؟
    وتاني شي شو نوع الخل يلي رح استعمله خل ابيض ولا خل التفاح؟وشو اهمية الخل بهيك وصفة حلو :zzz

  19. منى 26 March 2009

    جربتها بالسميد الناعم و الخشن و التنين ظبطوا ;)

    الخل الي استعملته خل التفاح و هو رح يعطي طعمة حموضة خفيفة و طيبة ;)

  20. رنا 31 March 2009

    مازبطت معي بالمرررررررررة
    يالله شو غلبتني وبالاخير كبيتها نصها لانه مابقا تصير بالمرة
    اول شي تفتفتت معي والعجينة ماكانت تمد مع اني حطيت كل المقادير مزبوطة وبالاول حطيت كاسة طحين بعدين صرت ضيف بالتدريج ومع كل اضافة تقسى العجينة ولما مدها تتفتت وماتطلع :upset اكيد غلطت شي غلطة بس ياترى وين ؟؟لانه عجنتها زيادة ؟؟؟ :x احترت بامري

  21. رنا 31 March 2009

    ياستي طلعوا من الفرن وبالنسبة للطعمة طيبة والله بس لانه العجينة ماقدرت افردها منيح ماارتقت رقيقة لذلك في منهن عجنو لو اعرف شو الغلط برجع بجربها ؟؟؟ياترى لانه السميد خشن ولا كان بده خلط اكتر ؟؟انا خلطته بس شوي

  22. منى 31 March 2009

    :roll ما عرفت وين الغلط , اصلا بالصور انا محضرتها بالسميد الخشن .

    يمكن لو كنتي تركتيها بالبراد كان مشي الحال , يلا ازرعيها بدقني و خيرها بغيرها :)

  23. حنان 26 April 2009

    يا منى حلوه الامورة اناسويتها وزبطت معي وطلعت حلوة والكل بيسالني عنها كيف عملته مين قالك عنها الكل اعجب فيها بس انا اعطيطهم اسم الموقع لقمة طيبه وكمان بدي اعذبك معاي افستق الحلبي مطحون ولا بيكون حب كامل وكيري هل ندهنهاعلى الدوائروشكرا :( :grin :grin :grin :grin :grin :grin :grin :grin :grin

  24. منى 17 May 2009

    هلا حنونة :)
    الف الف عافية و صحة و هنا و ريتو مطرح ما مشى مرى :)
    الف شكر الك للكلام الطيب و الموزء , و لمن حابة تستعملي المكسرات ممكن تختاري اي نوع و بالشكل الي يعجبك ة, ممكن تحطي حبة كاملة او شوي مفروم خشن أو مطحون ناعم بالنصف ;) و الكيري كمان بتبعدي ورق الجوري الداخلي بطرف اصبعتك و بتحطي فيه مكعب صغير ;)

  25. عبورة 29 August 2009

    واخيرااااااااا
    السلام عليكم عزيزتي منى…صارلي ساعة عم احاول الاقي طريقة ابعت فيها موضوع جديد؟؟؟وما عرفت كيف
    اولا انا بدي اتشكرك على هالموقع الرائع……انا بالصدفة دخلت عالموقع ..كنت عم اعمل بحث عن طريق الدبس رمان ..لانو انا عايشة برا سوريا… ;) ..
    انا عندي وصفات كتير فيني اضيفهم بس يا ريت تقوليلي كيف خيتو
    ومرة تانية ميرسي على هالموقع المدهش :) :)

  26. عبورة 29 August 2009

    امبارح ما بقى يجيني نوم لجربت هالوصفة( وردات الجوري)
    طلعت بتجنن :grin :grin

  27. منى 30 August 2009

    هلا عبورة :)
    ايه ها , هيك الشطارة و الشغل من اولها , نورتي اختي و مية اهلا و سهلا فيكي و الف صحة و هنا و عافية على الوردات :zzz

    اختي فيكي تظيفي ايا وصفة كرد عادي و انا برجع و بضيفها باسمك

    نورتي و شرفتي و مية اهلا و سهلا فيكي

  28. نوارة 8 September 2009

    جربتن مرة تانية ماظبطو العجينة ما مدت صارت تتقطع يعني اول مرة طلعوا بجننو دائما بتصير معي المشاكل تاني مرة
    عندك فكرة عن السبب :? :? :?

  29. نوارة 8 September 2009

    بتعرفي حطيتها بالبراد لانو عصبت منا بعدين كم ساعة طالعتها وحطيتها بالمكرويف شوي وعجنتا فصارت تمام التمام الحمد لله

  30. منى 9 September 2009

    هلا نوارة :)
    منيح الي خطر ببالك تحطيها بالبراد لان هيك رح تساعدك العجينة اكتر , يلا المهم ان مشي الحال بالاخير :zzz

  31. منال 30 October 2009

    سلام عليكم والله اليوم اخير جربتها وطلعت بتجنن وعجبت كل الفاميلي وهي الصوره بس لبكتني شوي العجينه طلعت فارطه انا وعم مدها بس طولت بالي
    ماعرفت كيف ابعت الصوره حاولت كتير بس ماظبطت ياريت تخبريني كيف

  32. منى 30 October 2009

    هنا و عافية منال :)
    يمكن كان لازم تزيدي شوية سميد , المهم انها طلعت بالاخير منيحة

    الصورة لازم بالاول تحليها على شي موقع تحميل و بعدها بتحطي الرابط هون ;)

  33. سارونات 10 November 2009

    السلام عليكم و رحمة الله و بركاته

    ساويت الوصفة مرتين و طلعت طيبة و شكلها بيجننللاسف ما صورت النتيجة بس ان شاءالله بالمرة الثالثة اذا درت راح صورها

    بالتوفيق

    سلام

  34. شفاء 18 March 2010

    انا من وقعت ماسجلت بالموقع وانا عمبدخل هون وبقول لحالي الى ما اعملها

    بس امبارح قررت قرار وجاهي غير قابض للنقض
    اني لازم اعملها لضيوفي تغير عن الكاتو
    وبعد ما عملت اول مقدار وقبل ما اخبزه
    لقيته قليل فعملت مقدار تاني(لانه الشكل كتير عجبني)
    وطلع كتيييييييييير طيب ولذيذ وشكله كتيييير رائع
    بس وين النهفة انه لما اجا ابو الشباب من كتر ماعجبوه شكلاً وطعماً

    خلاني اعمل كمان مقدارين مشان اصحابه بالمكتب

    يعني عملت 4 مقادير في يوم واحد
    وما ضل حدا ما سأل عن الطريقة والمقادير
    وطبعا انا مشان اريح حالي بعطيهم اسم الموقع
    :grin :grin
    بصراحة حابة اشكرك بالفعل مو بالكلام
    بس مو عرفانة كيف :?
    بس عكل حال انا قايمة قاعدة بدعيلك
    ان شاء الله الله بباركلك بصحتك وعافيتك
    وبيتك واولادك ويكتبلك حسنة بكل حرف بهالموقع الحلو
    مع خالص محبتي 

  35. منى 23 March 2010

    صباح الخيرات شفا :)
    بتعرفي اديه انبسطت بردك و بكل الكلام الحلو الي فيه , لثقتك في و لدعواتك الي اغلى من الدهب عندي

    انا ما بدي شكر , دعواتك الي كفت و وفت و زيادة و الله , ان شاء الله الك متلهن انت و كل اهل بيتك .

    مممم , صحتين و الف عافية على البك , اهم الشي انها عجبت الباشا و كمان شي تاني مهم ان ما تكوني نسيتي تاكلي عني كم قطعة قبل ما يطيروا :grin

  36. 7ayah 15 June 2010

    مرحبا منى :)
    كيفك ؟
    حبيت قلـّك إني جربت ساوي هالحلو الطيب
    طالعت أكبر صينية عندي   :grin .. عجنت العجينة و استخدمت سميد ناعم و عملت أول كم حبة و كانت روعة و ما غلبتني :zzz
    بس فجأة خطرت على بالي فـَكـّورة (تصغير فكرة) :eek
    قسمت العجينة نصين .. تركت الاولى متل ما هيي .. و لونت التانية بلون الشوكولا .. بالكاكاو يعني و كملت شغل
    دائرة بيضة و دائرة سودة و لـفـّن
    طلعو كتـــيـــــر حلوين :zzz
    بس يا دوب عبـّولي نص الصينية :p
    تاني مرة رح أعمل عيارين ان شاء الله
    و هاي الصورة قبل ما اخبزن
    [img]http://www3.0zz0.com/2010/06/15/11/663509566.jpg[/img]

    و بعدين فوّتـّن الفرن .. و لاحظت عليهن بعد فترة إنن فـَرَشوا .. يعني القاعدة و الوردات كبروا :roll
    هالشي عادي يا ترى :?
    ما صورتن بعد ما طلعوا من الفرن لأنن راحوا أوام .. أنا أصلاً بلشت آكل منن و هنن بالفرن لسة :grin
    كتير كتير طيبات يسلموا إيديكي عالفكرة الحلوة الجديدة…..
    7ayah

  37. 7ayah 16 June 2010

    كتير انبسطت بس شفت صورة ورداتي نازلة هون
    بس ليش الصورة طلعت كتير كبيرة ياترى :?
    و نصها طالع برى كمان :upset
    يا ترى شو كان لازم ساوي قبل ما نزلا هون :?

  38. منى 16 June 2010

    وووووواااو , شو هل الصورة الي بتاخد العقل و الفكرة الحلووووة , و الله طالعين معك بيجننوا , يعني عيوني طلعوا من محلهم :zzz

    ما شاء الله عليك

    هنن رح يكبروا شوي بعد الخبز , بس مو كتير , يمكن لو بردتيهم شوي قبل الخبز رح يتماسكوا اكتر :)

    مشان الصورة يا ريت لو تصغري حجمها ل500 بالعرض , بتطلع كتير مناسبة للموقع

    سلم ايدك على هل التطبيق و شكرا لثقتك في

  39. 7ayah 16 June 2010

    سلام منى
    هي الصورة بالابعاد الصغيرة
    [EMAIL]http://www6.0zz0.com/2010/06/16/19/860582836.jpg[/EMAIL]
    ان شاء الله يمشي الحال هالمرة 8)
    و سوووري لأني عجأتلك الصفحة بالصورة :sigh
    7ayah

  40. فرفوشة 20 August 2010

    مرحبا منى
    ويعطيك ألف عافية ع كل وصفة بهالموقع
    صار جربت هالوصفة 3 مرات والحمد لله كل مرة بتطلع أطيب من اللي قبلها :zzz
    بس عندي سؤال
    هلأ أنامن لما بعجن العجينة لحتى أخلص بتعذب كتير وإيدي بيوجعوني لأنه لحتى تزبط العجينة وتنفرد وتتشكل مظبوط وما تسيح بقلب الصينية بتصير قاسية وبتحتاج مني عجن وتليين كتير بس اللي بصبرني إنها بتطلع طيبة
    فهل اللي ع بيصير معي طبيعي؟ والا أنا ع برتكب خطأ من شان هيك ع بتعاقب؟ :cry

  41. شفاء 6 September 2010

    كيفك منى
    كل عام وانتي بخير يارب
    طولتي علينا الغيبة
    بصراحة ما عبلاقي طريقة اشكرك فيها غير اني اخبرك بالنتائج دائما
    انا نزلت اليوم صورة عالفيس بوك
    للوردات بس بالالوان
    طلع شكلهن كتييييييييير حلو
    وبشهي
    بقى شوفيهن وقوليلي رأيك
    وتأكدي انه ماضل حدا من رفقاتي
    ما أخد الطريقة
    بقى اذا شفتي عدد المشاهدات للصفحة زاد كتير
    لاتاكلي هم هدول رفقاتي*_^

  42. hajar 26 November 2010

    فعلا هالحلى شكلو بيجننننن انا لما جربتو اول مرة ما صدقت انو طلع معي هيك وردات شكلن حلو كتير جربتهم 4 مرات بحشوات مختلفة كيري وجوزمفروم ونارينج جربيهم بالنارينج كتير طيبين وهادا كان تطبيقي للوصفة [img]http://arb-up.com/foap3ruww6lw/IMG_4067.JPG.html[/img]

  43. hajar 26 November 2010

    فعلا هالحلى شكلو بيجننننن انا لما جربتو اول مرة ما صدقت انو طلع معي هيك وردات شكلن حلو كتير جربتهم 4 مرات بحشوات مختلفة كيري وجوزمفروم ونارينج جربيهم بالنارينج كتير طيبين وهادا كان تطبيقي للوصفة [img]http://arb-up.com/foap3ruww6lw/IMG_4067.JPG.html[/img]

  44. رغد غسان علاء الدين 31 January 2011

    خيتو في أصناف بحسها عبتصرخلي..إي إي..لا تستغربي بحسها هيك عبتصرخلي نظاااامي..رغوووود حبابة جربينا بلييييز..وهي منهن..صرختلي بصوت وقالتلي لازم تعمليني اليوم..وحاليا..بعتت الجندي المجهول لكل طبخاتي..ابني احمد..ليجيب المواد :)

  45. رغد غسان علاء الدين 31 January 2011

    يمــــــــــــي عالنتيجة يا ميمو..شو بدي أحكيلك..طلعو غير شكل..بس غنو شو..أحط طحين واحط طحين واحط طحين لوقت ما زبطت..الله وكيلك لزمني تلات كاسات طحين لحتى صارت العجينة معقولة..الشكل طلع حلو والنكهة يمي يمي غير شكل..وانبعتت عينات لخواتي وأخوي وأهلي..ونزلت الصورة عالفيس بوك..الله يجزيك ِ الخير..ويعطيك ِ ليرضيك ِ..

  46. ream 15 February 2011

    تسلم ايديكي شو هل فن والذوق
    تجربتي مع العجين دائما فاشلة وبتعذب فيه كتير :cry
    بس شكلا مغري وجربتا -النيجة بتجنن بالشكل والطعمة وأكيد رح أرجع اعملها-بس العجينة ماطلع فارطة وعم تتشقشق وكتير تعذبت بلفن-حطيت كاستين ونص طحين-ياترى السبب الطحين كتير ولا شو؟بالصورة عجينتك رائعة ناعمة وسلسة-انا مو هيك طلعت معي :? :? :?

  47. منى 15 February 2011

    هلا ريم :)
    يمكن كان لازم ترجعي العجينة للبراد لحتى تصير ايسر بالشغل معك ;)

    بكل الاحوال صحة و الف هنا و ان شاء الله المرة التانية بيكونوا اسهل

  48. ream 16 February 2011

    أكيد رح جربها مرة تانية
    شكرا عالنصيحة

  49. إسراء 21 February 2011

    مرحبا ست منى
    هلأ صورتن بعد خبزن بالفرن مو طالعة عندي وللا انتي مو مصورتيهن بعد الخبز ؟
    لانو حابة جرب الوصفة بس بصراحة بعد ما قريت ردود اللي مجربين ومو نجحانة معن خفتتتت
    معناها احتمال النجاح شي 50% وماعندي جاجات ع الاسطوح ضيفن ياها هههههههههه اذا فشلت
    على كلن رح اقراها اكتر من مرة وطبقها بحذافيرها لانو كتير منظر الوردات عجبني بقا ان شا الله بخبرك شو بصير معي لما بجربها
    بس بحبشيلي بلكي بتورجينا الصورة بعد الخبز ؟؟؟

    سلام

  50. Lost spoon 15 April 2011

    منى،

    كمان وصفه غير شكل….الله يسلم ايديكي يا رب. بس أنا كترت غلبه، أول مرة عملتا متل وصفتك تمام بس بدون مكسرات وما هدت بالصحن . تاني مرة، حطيت مع العجين رشة يانسون مطحون وكم حبيت مستكة، واستعملت القطر العادي مع مية الزهر، وحبة فستق حلبي….النتيجه؟؟؟ ما صدقو صاحباتي إن عملتا بدون قالب . وصار لزم أعمل عيارين م واحد. عندي صورة بس ما عرفت كيف بدي نزلا وشو قصدك لم بتقولي موقع تحميل صور؟ المهم، الله يقويك على عدد هل وردة يلي عملون الصبايا وديماً أيامك ورد جوري.

  51. لمورة الامورة 4 July 2011

    منى تسلمي الاكلة جربتها امبارح بس المشكلة انو العجينة صارت تتفرفط كتيير شو السبب بكون ؟؟ كتير احترت وكنت بدي كبها واعمل وحدة تانية كنا خسرنا عجينة ههههههه
    لحد الان كتير جربت اكلاات لالك وكتير طلعو طيبين شكرا كتييييييير منى
    تحياتي
    لولو

  52. violet 14 July 2011

    باين عليها روعة وان شالله رح أعملها على عيد ميلاد بنتي
    بس هلأ كيف بقدر أعمل منها الوان وشو هو ورق البليسة؟؟؟؟؟؟؟؟؟

  53. Jassy 19 July 2011

    السلام عليكم ورحمة الله

    كيفكن ؟
    هي من الوصفات اللي حبيتها من أول نظرة، امبارح لشفتها (كيف هيك ما بعرف)، وقررت فورا ان اول ما بفضى بعملها .. وبرغم ان اليوم ما كتير كنت فاضية بس عملتها وجرجور (بالجيم المصرية) عإيدي :grin يعني فيكون تتخيلوني عم حط المقادير بإيد وماسكة بهزهز بكركوري بالإيد التانية.
    والحمد لله خلصت عخير :grin لو أن الشغل ما كان بقعدة وحدة.

    واو واو وااااااااااااو .. شو سهلة وبسيطة واهم الشي طييييييبة … بصراحة لما قريت الردود قلت اكيد حتطلع عندي العجينة متل الصبايا وما تزبط، بس الحمد لله كتير شهلة بالشغل وحلوة، انا قبل ما أشوبكها (يعني استخدم عليها الشوبك :grin ) كنت امسحها بالطحين ، يمكن مشان هيك تشوبك منيح.
    طبعا هالمرة وبما انها كانت تجربة أولى عملتون أشكال وألوان وأحجام :zzz المرة الجاية إن شاء الله بزبطون حلوين اكتر.
    وهي تطبيقي :
    [img]http://img215.imageshack.us/img215/8923/img5247s.jpg[/img]
    اللي فوق هي رشة قرفة .. لأن القطر عندي من مربى القرع من حماتي كانوا قطرميزين، بئى بستخدمو لهيك وصفات، فما قدرت نكهو بالقرفة قبل. أمت رشيت القرفة رش :) يا عيني كمان شو طيبة. بس المرة الجاية متل ما قلتل بعملها مزبوطة بالشكل 8) .

    يسلمو دياتك منى خانم … وثابري وإلى الأمام

    والسلام عليكم ورحمة الله

  54. Jassy 19 July 2011

    طلع الرد الطويل السابق ولا لاء؟
    ليه هيك :( لما منكتب ردود بتختفي ؟؟

    عكل حال كان لعي طالع نازل عن الوصفة .. وبالي ما عاد طويل كرر الكتابة خصوصي بعد يوم عصيب مع الجرجور (بالجيم المصرية) ما بيضل في بال طاول :grin

    المهم هي تطبيقي :
    [img]http://img215.imageshack.us/img215/8923/img5247s.jpg[/img]

    وشكرا

    والسلام عليكم

تقييم الوصفة
عاديةقد أحضرهاجيدةممتازةأكثر من رائعة (No Ratings Yet)