سلطة البطاطا المقلية


         وصفة : منى                 2009/06/27                 23 تعليقات
سلطة البطاطا المقلية

·         تقشر البطاطا و تقطع لمكعبات ثم تفلى بالزيت حتى تشقر , ترفع على ورق ماص للتخلص من الزيت الاضافي . و يمكن اتباع طريقة نور لقلي البطاطا بطريقة خفيفة و صحية .

·         تمزج مقادير الصلصة في طبق صغير , يفرم البصل الأخضر ناعماً و يوضع في الصلصة حتى اعداد بقية المقادير .

·         تفرم البندورة لمكعبات بنفس حجم البطاطا و يفرم البقدونس ناعماً .

·         تقلب البطاطا و البندورة و البقدونس مع الصلصة ثم تقدم مع المشاوي أو كطبق مقبلات . 




2 حبة بطاطا كبيرة
حبة بندورة كبيرة
1 حبة بصل أخضر أو بصلة حمراء صغيرة مفرومة ناعماً
3 ملعقة كبيرة بقدونس مفروم ناعماً

الصلصة :

3 – 4 ملعقة كبيرة عصير ليمون أو خل أو مزيج منهما
2 ملعقة كبيرة زيت زيتون
نصف ملعقة صغيرة فليلفة حمراء ناعمة ( حرّة أو حلوة حسب الرغبة )
فص ثوم مهروس
ملح





• تقشر البطاطا و تقطع لمكعبات ثم تفلى بالزيت حتى تشقر , ترفع على ورق ماص للتخلص من الزيت الاضافي . و يمكن اتباع طريقة نور لقلي البطاطا بطريقة خفيفة و صحية .

• تمزج مقادير الصلصة في طبق صغير , يفرم البصل الأخضر ناعماً و يوضع في الصلصة حتى اعداد بقية المقادير .

• تفرم البندورة لمكعبات بنفس حجم البطاطا و يفرم البقدونس ناعماً .

• تقلب البطاطا و البندورة و البقدونس مع الصلصة ثم تقدم مع المشاوي أو كطبق مقبلات .
  • وصفات تانية ممكن تعجبك


التعليقات

  1. omtasneem 27 June 2009

    السلام عليكم ورحمة الله وبركاته. ياستي جوزي اطيب ماعندو بطاطا في السلطة انا بعملها بالبطاطا المسلوقة تسلم ايديك وعندي سؤال ولوفيا غلاظة اديش عمر ولادك الله يخليلك ياهم :?

  2. kuwaiti_girl 27 June 2009

    يا منمن شو طلعت هالسلطه طيبه

    من اول ما شفتها ورحت طبقتها على طول ويم يم لذيذه

    تسلم ايدج يا غاليه على هالطبق اللذيذ وتسلم ايد ديمه

    سامحيني لاني مقله بالتعلقيات بس دائما اتردد على هالموقع واسعد جدا بالوصفات والكلمات والذكريات اللي تنبع من القلب

    بالنسبه للوصفات لازم بيجينا يوم نخبص شوي بس لا تخافي لان منى الغاليه لازم ترجع تتفنن وتهندس بالاطباق الجميله والرائعه دايما ودوما

    دمت بخير ومحبه :*

  3. رنا 27 June 2009

    كل شي ممكن يصير الا انه تفقدي مهارتك بالطبخ هي شغلة مستحيلة لانه بحس حب الطبخ والمطبخ بيمشي بدمك وهادا شي صعب يروح بسهولة ومستحيل كمان ..بس بزمانه امي كانت تقول انه السنة 365 يوم وكل يوم طبخة معقولة كلن يزبطوا ؟؟بقا الي صاير معك عاااادي كتير وبتحصل مع الكل بقا دخيلك لايروح نشاطك وعزيمتك وخليكي متل ماانتي ;)
    بالنسبة للسلطة طيبة ومغذية وبتشبع وبتنفع للعشا او الفطور يسلم ايديكي …بس ماشاء الله كيف اطفالك بيحضروا الفطور وشو بيصير بالمطبخ بعدين :grin

  4. نور الأسلام 27 June 2009

    :) السلام عليكم كيفك منى يسلموا اديك وادين ديمه تسلملي الاموره فرح ضحكت على كلمتها اتغديت مبارحه الله يحفظهم ويحميهم انااخي لما نكون عالفطور لسا عم نفطر بقول ماما شو بدنا نتغدا اليوم :grin الله يخليلك عيلتك ويخليك الهم :)

  5. منى 27 June 2009

    هلا ام تسنيم :)
    ان شاء الله لكن تجربيها للحجي و تعجبه و اكيد بتقوليلي .

    يا ستي عندي قسمين الكبار 11 و 10 و الصغنونين 7 و 3 , تشكيلة الله يحفظهم شو حبابين و ظراف و امامير و اصواتهم ما بتطلع ابدا :roll

  6. Dimah 27 June 2009

    مرحبا منى
    لما شفتك حطيتي السلطة، اشتهيتها قمت فوراً رحت عملتها، كيف الواحد بتهف نفسه على الأكلات فجأة :grin
    طالعة معك بتشهي !
    صحة وهنا!

    Dimah
    مدونة ماء زهر البرتقال – Orange Blossom Water

  7. ام نور 27 June 2009

    سلم دياتك يا منى على هالوصفة والله يبارك بالاخت ديما على فكرتا انا بعملا متل الاخت ام تسنيم ببطاطا مسلوقة هيك تعلمتا من الوالدة بس اكيد اذا البطاطا مقلية بتكون اطيب انشالله رح جربا :) اليوم فتت على عنوان الاخت ديما بما انك يا منى ذاكرة العنوان ما شالله كتير عجبني وبشجعا وانا عم فتش ونبش لقيتا منزلة العجينة المورقة بالخطوات سبحان الله شغل معلمين نفس الطريقة التي اخذتا من والدي وهي العجينة رهيبة بتنعمل لا الاوزي لا عش البلبل وكمان لا الفطاير بجوز وبقشطة وكنت رح ابعتلك الطريقة يا منى تنزليا بس بما انو الاخت ديما منزلتا صار فيون الاخوات يشوفوها عندها  

  8. منى 28 June 2009

    هلا كوكو :)
    يمو ريتو هنا و عافية و الف صحة على قلبك و قلب العيلة كلها , و انا فتت للبلوج تبعك و شفت الصورة , بس للأسف ما فيني علق عندك , مع اني اتمنى و الله , طيب كان بدي قلك ان النيو لوك للبلوج بيجنن و كمان الله يباركلكم بالقطة الجديدة و هلأ صرتي خالة و عقبال ما تصير ماما :)

    كوكو انا ما بزعل منك ابدا و أخبارك الطيبة دايما بتوصلني , هنا كمان على العصير :zzz
    بتنوري دايما أختي

  9. منى 28 June 2009

    هلا رنون :)
    هو الظاهر صاير معي فقر دم هل اليومين , بس عم اخد فيتامين لشد :grin و انتو و كلامكم و تشجيعكم أحسن فيتامين .
    بيحضروه لكن شو ؟ اتركهم طول اليوم عطالين بطالين , لازم يتحملوا مسؤولية , هو صحيح انا بعزل بعد ما يخلصوا , بس معهن معهن بيتحسنوا ان شاء الله ;)

  10. منى 28 June 2009

    هلا نور :)
    ربي يحفظلك حبابك و الغاليين عليك , و الله هي فروحة معزبتني كتير بالاكل و ايمتى ما شفتيني بتلاقيني راكضة وراها باللقمة أو بكاسة الحليب , شو نعمل بيعين الله

    ان شاء الله تجربي هل السلطة قريب لان طيبة و يمي

  11. منى 28 June 2009

    هلا دمدومة :)
    الف صحة و هنا و كتير منيح انها عجبتك , ما انا متعلمتها من واحدة مزوءة كتير و طبخاتها و نفسها بيعجبني و هي متعلمتها عن امها الي متل حكايتها :zzz
    هلا عم دور و انكش لشوف الدور على مين هل المرة

  12. منى 28 June 2009

    هلا ام نور :)
    ان شاء الله تجربيها و اكيدة رح تعجبك لان تغير شكل .
    يا ستي انا صار فيني هيك , لما دخلت للبلوج تبع ديما اول مرة تصفحته وصفة وصفة و و هي من اول الوصفات الي لفتت نظري و كنت ناوية ابعت الك اللينك لشوف اذا متل طريقة باباتك الله يحفظه و يخليه , تاريك سبقتيني .
    ان شاء الله ناوية جربها , بس ما بعرف ايمتى

  13. ام نور 28 June 2009

    سبحان الله القلوب عند بعضا بنصحك تجربيا باسرع وقت اول مرة جربي نص كيلو طحين وسدقيني مجرد ما اخدت ايدك عليا ما بتعودي تستغني عنها وبتستعمليا لا كتير شغلات وخصوصي اذا مستعملة زبدة منيحة بتطلع طعمة غير شكل بس الفرق عنها انو والدي بيستعمل الزبدة السمن ابدا ما بيستعملا بهل عجينة وبالنسبة لا الصور ما فتحوا معك يمكن ما عندك برنامج ادوب عا كل حال رح ارجع ابعتون

  14. منى 28 June 2009

    ممم , رح جربها ان شاء الله , حمستيني و رح جربها بالزبدة .

    الصور ما فتحوا معي , يا ريت لو تبعتيهم بشكل مرفقات عادية اذا ما فيها ازعاج :zzz

  15. haya 29 June 2009

    هلا اخت منى شكل الاكلة كثير طيب وان شاءالله راح جربها بدي اسألك اذا بدي ابعث لك صور لبعض الوصفات او اذا بدي ابعث لك جدول بمعايير حرارة الفرن كيف بدي ابعثهم ياريت تفيديني وشكرا الك

  16. semo 29 June 2009

    شو تفقدي مهاراتك بس احيانا الوحدة بتمر عليها اوقات حتى البطاطا المقلية ما بتزبط معها
    ومتل ما بيقول جوزي انت كل شهر في ايام محددة منها بتصيري بتخبصي
    طبعا فهمتي شو قصدي بهالايام
    حتى كانت الي جارة كانت اذا جابت خيار او لفت للمخلل وكانت بهالايام بتقلي لخلص بعملها لان اذا عملتها هلا بيخرب
    كنت قول هي خرافة لحتى صرت لاحظ عحالي كل شهر بهالايام ما بيطلع متل باقي الايام
    بيقولوا هرمونات بالجسم كنت حسو خرافة هالحكي
    بس بعدين تأكدت بنفسي
    يمكن انت صاير معك هيك
    بس اللي متاكدة منو انك اكيد مافقدتي ولا رح تفقدي مهاراتك بالطبخ باذن الله
    الله يقويكي يارب
    وبالنسبة للسلطة عالتجربة فورا
    اسفة حكيت كتير :eek

  17. منى 1 July 2009

    هلا هيا :)
    الله يعطيكي الف عهافية انا بانتظار الصور, ممكن تبعتيهم على الايميل أو برد على كيفك ;)

  18. semo 1 July 2009

    اليوم جربت السلطة طلعت بتاخد العقل
    الله يسلم ايديكي وايدين دمدومة
    بتشهي وجربت فيها طريقة نور بالبطاطا المقلية
    طلعت بتجنن متل البطاطا المقلية بالزيت بالضبط
    وشغلت الفرن عليها من فوق وطلعت كتير بتقرمش

  19. منى 1 July 2009

    هلا سمسومة :)
    كان بعدتي , ما في شي من هاد هلا :roll

    بس كلامك في كتير ناس بتعقتقد نفسه و انا مرة قرات ان اخواتنا المغاربة ما بيعملوا السمن البلدي و لا الحامظ المرقد الا و هنن متطهرات لحتى تزبط معهم ..

    على كل الاحوال الف الف صحة و هنا يا رب على السلطة , كتيررر انبسطت انها عجبتك و كانت على زووءك سمسوم و هنا

  20. لميا 11 July 2009

    حبيبتي منى انا لبنانيه بس خطيبي حلبي وسمعت انو اكلكن شي فوق الوصف وبعرف لو شو ما عملتلو مارح تضبط معي وانو معود عا هالاكل الطيب شو اعمل دخلك ؟؟ لقيت موقعك وما صدقت :) رح حاول اتعلم كل الاكل الحلبي ويعطيكي الف عافيه

  21. منى 11 July 2009

    هلا لميا :)
    بالأول نورتي و شرفتي الموقع ..

    الاكل حلبي طيب , بس مو لو شو ما عملتي ما رح يزبط , ايه رح يزبط ونص و تلات ارباع . انت بس اتبعي الخطوات و رح تطلع معك الوصفة بتجنن ..

    انا كتير مبسوطة فيك و اي سؤل انا تحت امرك :)

  22. dado 21 March 2010

    كيفك منوش؟
    ميارح جربت السلطة… ما كان الي خلق اطبخ شي.. عملتها هي وصينية كرات اللحمة مع بطاطا.. بتعرفي انا مالي باللحمة بنوب. المهم كانت السلطة كتير كتير طيبة وبتشبع وبتغني عن اي طبخة تانية. بس انا ما قدرت ما حط كمون وفلفل أسود بالوصفة .. بس بتخيل من دونن كمان بتبقى لذيذة.
    لو تعرفي قديش مشلوشة وقديشك ببالي :)

  23. منى 24 March 2010

    دلوش الحمد انا منيحة كتير و مشتاقة الك اكتر .

    ممم , هنا و الف صحة على البك و على الب الي لدع صينية البطاطا باللحمة :zzz

    و انت كمان دوما و بعدك على بالي , يا قمر الحلويين ;)

تقييم الوصفة
عاديةقد أحضرهاجيدةممتازةأكثر من رائعة (No Ratings Yet)