سلطة الجرجير و الفريز


         وصفة : منى                 2007/09/11                 24 تعليقات
سلطة الجرجير و الفريز

اليوم السلطة غريبة و جديدة و بتعجب الي بيدور على شي ملفت للنظر يزين سفرته بالشكل و بالطعم بتعجب الي بيكون ذهنه مفتح و ما بيخاف من تجربة شي ما بيعرفه . لما حضرت الطبق و حطيته على الطاولة الكل طلع علي نظرة كونان , أقنعتهم يجربوا بأن يا شباب انتو مو بتاكلوا رمان مع السلطة , لو سمحتوا افتحوا مخكم و تمكم معه و جربوها و اعتبروه بمثابة الرمان و لما داقوها حبوها كتير .

هل الوصفة من المطبخ الغربي و معروفة كتير برة , بتتبل بحمض البلسميك و هل الخل انا بحبه كتير و بحس بنكهته فيها دفا و قوة بنفس الوقت و هي نكهة بتعجبني و بتخلي ايا سلطة عادية سلطة مميزة .

هل السلطة و مكوناتها بيلبقله كتير نوع من المكسرات متل الجوز أو اللوز لحتى تضيفي قرمشة عليها , و ممكن حتى تستعملي السمسم اذا مو متوفر عندك مكسرات و انا عني شفتها بكل نوع طيبة و مميزة . ممكن تستعملي جبنة ركفور الفرنسية , أنا ما كانت متوفرة عندي لهيك استعملت البارمزان العادي , و على فكرة الجبنة و كمان الجوز مو بالصورة لان لما حضرت السلطة كنت معبوطة كتير و نسيت رشها على الوج وقت التصوير و لما خلصت شفت الجبنة و الجوز عم يعملولي باي باي من على المرمرة , سماح اعملي حالك كانك شفتيهم على الوج , مبينين ما !

بالصحة و الهنا




باقة جرجير
كوب شرائح فريز
ربع كوب جوز أو لوز
ربع كوب جبنة بارمزان
بصلة خضراء مقطعة شرائح رقيقة ( اختياري )


الصلصة :

2 ملعقة كبيرة خل بلسميك
2 ملعقة كبيرة زيت زيتون
رشة ملح
رشة فلفل أسود)





• يحمص اللوز أو الجوز في الفرن أو على الميكرويف ثم يترك جانباً .

• تخلط مقادير الصلصة ثم توضع فيها شرائح البصل في حال استعماله حتى اعداد بقية المقادير او لمدة 5 دقائق .

• يقطع الجرجير لقطع كبيرة باليد و يرتب في طبق التقديم , تنثر شرائح الفريز و الجوز و الجبنة على الوجه .

• يوزع الصوص على السلطة ثم تقدم فوراً .



  • وصفات تانية ممكن تعجبك


التعليقات

  1. أم نوران 7 June 2010

    يا الله صقدا طيبة يسلمو هالايدين عنجد مميزة اول ما اجتني الدعوة من الفيس بوك دخلت فورا.. شي مبينتو كتيييير طيب ان شاؤ الله بس ما توفرت عندي المكونات ببقى بجربا..الله يعطيكي كل عافيو و يباركلك بولادك و جوزك .جزاك الله خيرا

  2. semo 7 June 2010

    شو هاد يامنوشة شي بياخد العقل الألوان كأنها سلة ورد
    وشو هالجوز والجبنة اللي عالوش جايبين شكل الطبق :grin
    والسعرات الحرارية بالرد الجاي أنا حسبت أنوهالصحن بيكفي 4 أشخاص

  3. DOUHA 7 June 2010

    سلطة شسيك بصراحة مارح جربا بس رح اعتمداااا
    ممنونة

  4. Mays 8 June 2010

    يسلموا ، شكلها كتير طيب
    المشكلة الفريز اللي بيوصلنا هون مو كتير طيب ،بس لا جود إلا بالموجود. :)

  5. ream 8 June 2010

    شو هاد يا منى والله شي بشهي والوان بتفتح النفس_بس عندي سؤال مهم وبتمنى تجاوبيني عليه لما رحت لأشتري الخل البلسمي شفت بمكوناته wine vingar خفت أشتريه وقلت بسألك بالأول انتي شو عم تستعملي؟وشو رأيك؟ وشكرا كتير عوصفاتك الي بتجنن وتعبك

  6. منى 8 June 2010

    هلا ام نوران :)
    ان شاء الله تجربيها و تحبيها و انا رح استنى رايك
    الله يخليلي ياكي على هل الدعوة الحلوة , و ربي يبارك فيك و بعيلتك كلها :zzz

  7. منى 8 June 2010

    هلا سمسوم :)
    شا يفة شايفة :grin , بس كاني مكترة شوي جوز , مو

    سلم هل الديات على السعرات الحرارية الف شكر , و متل ما قلتي الوصفة بتكفي حوالي 4 اشخاص , سلمن

  8. منى 8 June 2010

    هلا ضحى :)
    ان شاء الله تجربيها و تعتمديها و تكون يممي ;)

  9. منى 8 June 2010

    هلا ميوس :)
    مممم , ما بعرف اذا بتطلع طيبة اذا الفريز مش و لا بد , انتي بتعرفي اكتر :roll

    اذا جربتيها يا ريت تخبريني ;)

  10. منى 8 June 2010

    هلا ريومة :)
    بتعرفي من وقت ما قرات ردك و انا عم اغلي غلي و الله , لان طلع الي حكيتيه مزبوط , و سالت اخت أثق في رايها و طلع ظنك في محله , كل انواع الخل الاجنبي محضرة من الخمر , حسبي الله و نعم الوكيل , الف الف شكر الك للتنبيه و انا رح خبر كل مين بقدر خبره و انتي كمان :cry

  11. ream 8 June 2010

    شكرا كتير الك_والحمد لله انه انتبهنا

  12. منى 8 June 2010

    ايه و الله الحمد لله , و انا للتاكد رح اسال اكتر عن هل الموضوع

  13. sana 8 June 2010

    هل السلطة شكلها طيب ولازم اجربها .انا مرة اكلت سلطة عادية بس كان فيها تفاح كمان كتير طيبة .وهون بالبيتزا هوت ببحطوا اناناس فريش مقطع بالسلاد بار .هالشغلة جديدة وطيبة يسلوا ايديكي منوشة.
    عندي سؤال :
    حكيتي بعيد ميلاد لقمة طيبة انو في مفاجأة لاهالي حلب.
    بس ما قلتي لهلق شو هيي .بلكي اذا نزلت على حلب احضر هل المفاجأة :zzz

  14. dado 9 June 2010

    إي شو هالسلطة يا منوش؟ كتير الجبنة والجوز عاطينها رونق 8)
    انشالله رح جربها، انا بتعجبني هيك قصص.
    بس حبيت إحكي شي منوش إلك ولريم وكل الإخوات، بخصوص الخل يلي اسمه wine vinegar هو حلال، وكل أنواع الخل الأخرى يلي بتجي من برة، لأنو ما بيدخل فيه النبيذ ولكن هو المادة يلي بتنضاف لعصير العنب حتى يتحول لخمر.. أو حتى لو كانت فيه نسبة نبيذ فهو بيتعرض بعدين لمراحل بتلغي خاصية التخمير من السائل، انشالله تكون الصورة وضحت.
    هي نص السؤال والجواب:

    Question: Are all kinds of vinegar Halal, and which kind is Haram?

    Answer: Vinegar is halal and there is nothing wrong with it. As for vinegar that it is not hundred percent pure and there is wine mixed with it, it is also considered halal because even if it is made from wine it has undergone fundamental process of transformation through certain chemical changes that is called “Istihalah” in Islamic law. So, the ruling of wine does not apply to it anymore and we are still allowed to use it.

    وهي رابط الموقع يلي فيه: [URL=null]null[/URL][URL=http://www.islamawareness.net/Alcohol/fatwa_vinegar001.html]الفتوى[/URL]

    ان شاء الله كون أفدت.

  15. farah 9 June 2010

    تسلميلي يا منوشة على هالوصفة انا كل شي جديد وغريب ومعقول بحب جربه واول ما اجتمع بفريزات ظراف بدي جربها
    وشو قصة هالخل البلسميك بتعرفي اني من شي سنة وانا ناوية اشتريه ولهلأ ما اعتمدت لأن وجدت بالسوبر ماركات انواع كتير فاحترت وكنت ناوية اسأل عن افضل نوع وسبحان الله اجا حديثكم عنه صاعقة :eek
    الله يجزيكم الخير انكم نبهتونا لهالقصة وبدي اهتم انا كمان وشوف مكونات كل الانواع

  16. نور الأسلام 12 June 2010

    السلام عليكم لك شو هالسلطه اول مره يشوفها بس ياينتها غير شكل رح جربها انشاء الله مع اني مو صحاب انا والجرجير بعدين شو هالجوزات مبينين كيف مو مبينين طالعات غير شكل ;)

  17. نور 24 June 2010

    السلام عليكم يا حلوين
    اكلة كتيرة بتشهي ماشاء الله
    حبيت احكي شغلة على سيرة الخل :)
    كل أنواع الخل حتى على عهد الرسول صلى الله عليه وسلم كان يخمر العنب حتى يصبح خمر ثم يترك مدة اطول حتى يصبح خل :)
    مافي خل بنتج هيك مباشرة من الفاكهة.. لازم فاكهة بعدين خمر بعدين خل .. ثلاث مراحل اساسية
    طيب شو الفرق بين اللي بيعمل الخمر واللي بيصنع الخل ؟
    الفرق الاساسي هو كالتالي : عند تخمير أي فاكهة تترك مغلقة ولا تفتح أبدا والناتج هيك راح يكون خمر . إما إذا بدنا نحضر خل من هالفاكهة نفتح علبة التخمير كل فترة وفترة ونعرضها للهواء الجوي .. عملية اختلاطه بالهواء الجوي راح يحول المادة الى خل
    ..ساعة يحكوا (واين فنقر) يعني خمر من نوع الواين تم تحويله الى خل بالطريقة اللي ذكرتها
    في لغز او حزورة ظريفة ذكرها الامام الشافعي : حكى وقال ؟ ما هو الشي الذي يكون حلال ثم يصبح حرام ثم يعود حلال مرة اخرى ؟
    الاجابة هي العنب يخمر يصبح خمرا ويخمر مرة اخرى مع التعريض للهواء فيصبح خلا :)
    اختم حديثي بقول الرسول صلى الله عليه وسلم ( نعم الإدم الخل )
    اعذروني على التطويل بس حبيت أوضح مفهوم الخل وصناعة الخل

  18. منى 8 July 2010

    هلا سنا :)
    ان شاء الله تجربيها و تعجبك و تكون يمييي , و انا كمان مرة شفت اناناس بالبيتزا , بس لهلا مو متخيلة طعمتها , بس بجربها ليش لا :zzz

    المفاجاة عم تتاجل و ما بعرف اذا رح تتيسر , ربي يسر الامور و يختار الخير يا رب

  19. mwesal88 26 July 2010

    جربت سلطة الجرجير بصراحة رهييييييييييييييييبة انا وجوزي منحبها كتير بس لسه ما جربتها بالفراولة :zzz :zzz

  20. منى 29 July 2010

    صحتين و عافية يا رب , انا بموت كمان على سلطات الجرجير و اتمنى تجربي هل الوصفة و تعجبك ;)

    يا هلا فيك

  21. منى 3 October 2010

    هلا فرح :)
    ان شاء الله تجربيها و تكون يممي , لا خلص البلسميك طلع براءة , الحمد لله الي ما خلانا نغلط حتى لو من دون ما نحس :roll

    يلا رح استنى رايك يا حلو

  22. منى 3 October 2010

    هلا دلوش :)
    شايفة شايفة :grin

    دلوش ردك ريحني كتير , الحمد لله رب العالمين ان طلع شغلنا في السليم

    ان شاء الله تجربيها و تحبيها يا قمر , رح استنى رايك

  23. منى 4 October 2010

    هلا نور الاسلام :)
    ايه و انا كمان عم قول مبينات و طالعات غير شكل :grin
    ييييي انا عكسك , كتير بحب الجرجير و نكهته فيها شي حامض و شي من الارض , يمممممم

  24. منى 4 October 2010

    هلا نور :)
    لا بالعكس الف شكر الك للتطويل لان نقطة كان فيها لبس و اتوضحت بشكل كامل الف شكر الك للتوضيح ;)

    الحمد لله رب اعالمين طلع الشغل في النظامي , و هلا عاد فين ;) ا نستمتع مرة تانية بالبلسميك

تقييم الوصفة
عاديةقد أحضرهاجيدةممتازةأكثر من رائعة (No Ratings Yet)