سلطة الدجاج بالكاري


         وصفة : منى                 2009/05/21                 23 تعليقات
سلطة الدجاج بالكاري

سلطة اليوم سلطة كتير طيبة و كتير سهلة و بنفس الوقت مميزة و تغير شكل .


السلطة دقتها مرة في الغراند أول ما فتح و عجبتني فكرتها لهيك صرت حضرها دايما و خصوصا في العزايم , الا ما تكون الواحد فينا محضرة وصفة بدها دجاج مسلوق , من هل الدجاج فيكي تحضري هل السلطة من دون مجهود اضافي او مقادير زيادة .


الوصفة بسيطة و ما الها غير سريين , الأول انك تمزجي مزيج الدجاج المايونيز مع الخس قبل التقديم مباشرة لحتى يبقى الخس فريش و مقرمش . و التاني انك تقطعي صدر الدجاج لمكعبات و بعدها تسلقيه و بهيك بيكون شكل الدجاج حلو كتير و ما رح يتفتت , اما اذا سلقتيه و بعدها قطعتيه رح يصير شكل السلطة مو كتير حلو


بالصحة و الهنا

شو لازمنا ؟

2 صدر دجاج مسلوق
5 - 6 ملعقة كبيرة مايونيز
ملعقة صغيرة مسطحة من بودرة الكاري
ورق خس
طريقة التحضير

• يقطع صدر الدجاج الى مكعبات ثم يسلق مع الباقة العطرية حتى ينضج .

• يقلب المايونيز و الكاري حتى الحصول على مزيج متجانس .

• يرفع الدجاج من مرق السلق و يترك حتى يبرد ثم يضاف لمايونيز المنكهة بطعم الكاري و يوضع في البراد حتى يبرد الكل .

• يغسل ورق الخس و يترك حتى يجف ثم يقطع باليد لقطع كبيرة و يصف في طبق التقديم .

• يسكب مزيج الدجاج و المايونيز فوق الخس و تقدم و قبل أن توزع السلطة في الأطباق يقلب الدجاج و المايونيز و الخس .

التعليقات

  1. لين 21 May 2009

    تسلمي والله يحميكي من كل عين شو مشتهية تعملي كتاب طبخ كنت اول وحدة بشتريه لاني عجزت ولا كتاب اشتريته عجبني انا بنبسط لما بقرا هكيك شكلك لطيفة لو بدي اتساءل عليكي واطلب طريقة البروستد زوجي بيتوحم وانا بجيب لولاد لا تاخزيني بحكي كتير لاني لحالي :sigh وبحكم زوجي طبيب ما بشوفو متل البشر :cry لهيك ناقصنني لت اسفة كتيروthanks i love curry

  2. نور الأسلام 21 May 2009

    مساء الخير يا وجه الخير ;) كل يوم وصفه احلى من التانيه ماشاء الله تبارك الله عندي سؤال اديه ممكن نحفظ مرقة الدجاج بالبراد

  3. منى 21 May 2009

    هلا لين :)
    الكتاب عم ينطبخ على نار هادية , ان شاء الله بيجهز خلال سنة و بيكون فيه كل وصفات الموقع و أكتر ;)
    تكرم عيونك رح نزل وصفة البروستد , بس لا تزعلي مني اذا اتأخرت ;)

    و لا يهمك , شو طولت و ما طولتي ؟ نحنا هون متل الخوات و أعز ان شاء الله

  4. منى 21 May 2009

    هلا نور :)
    هادا بس من زووءك اختي , ان شاء الله تجربي السلطة و تعجبك

    المرقة ممكن تنحفظ ليوميين او تلاتة حسب الفصل أما في الفريز فممكن تحفظيها لحتى شهر ;)

  5. lolia 24 May 2009

    تسلم ايديكي على هالوصفات يا احلى منونة

  6. منى 24 May 2009

    هلا لوليا :)
    الف شكر الك للرد و التواجد الطيب و نور الموقع بهل الطلة الحلوة اختي ;)

  7. semo 25 May 2009

    يممممي شكلها بيشهي

    كلك ذوء يسلمن الهي هالايدين

  8. منى 25 May 2009

    هلا سيمو :)
    ان شاء الله تجربيها و تشوفي شو طيبة و لذيذة ;)

  9. DOUHA 28 May 2009

    انا جربتا وطلعت بتجننننننن وسهلة اكتر من اللزوم :p
    مرسي منى

  10. آرام 18 June 2009

    مرحبا أخت منى .. الوصفة فيها شوية التباس:
    أولاً بالنسبة للخس .. بالمقدمة مكتوب لازم نمزج الخس والمايونيز قبل التقديم مباشرة .. بينما بطريقة التحضير مو مذكور مزج الخس بالمايونيز وإنما يصف الخس في الطبق وترتب فوقه قطع الدجاج!
    ثانياً بالنسبة لمزج الدجاج بالمايونيز .. بالفقرة الثالثة مذكور إضافة المايونيز المنكهة بالكاري إلى الدجاج ووضعه في البراد .. بينما بالفقرة الأخيرة مذكور خلط الدجاج بالمايونيز قبل السكب مباشرة!!

  11. منى 18 June 2009

    هلا اخ ارام :)
    ما في التباس و لا اي شي , طريقة التقديم متل ما واضحة بالصورة و قبل ما تبدوا بالاكل تحرك السلطة و بعدها بتاكلوها , يعني قصدي التحريك باخر دقيقة لحتى يبقى الخس مقرمش , هلا اذا حركتهم قبل بخمس دقايق مثلا معلش , بس انا كتبت الوصفة بهل الطريقة لحتى تبقى هل الشغلة علاقانة بذهن الي حابب يجربها , مو يجهزها و يحركها و بعد شي ساعة ساعتين يضيفه
    اخر كلمة خطا مطبعي , عوض ما اكتب خلط الدجاج و الخس , كتبت مايونيز , هلا بيتم التعديل باذن الله

  12. Jassy 7 October 2010

    السلام عليكم ورحمة الله

    إمممممممممممم إمممممممممممممممم لك إمممممممممم
    شو طييييييييييييييبة

    من زمااااان بدي اعملها بس عطول في شي ناقص ، امبارح قلت خلص لازم اعملها لو عقطع الرقاب هههه
    طلعت بتجنننننننن .. مع أن خلطة الكاري يلي شاريتها ما كتير عجبتني .. فحلب بيبيعوها أطيب بكتير.
    وكمان حسيت الطعمة ناقصها حمض :grin هي من وحي الحمل … أمت عصرت نص ليمونة. وما قدرت قاوم أكلتون كلون :p

    يسلم دياتك يا رب الله يخليلنا ياكي إلهي يا ست منى.

    والسلام عليكم ;)

  13. منى 25 October 2010

    هلا jassy :)
    ممممم , فكرة كتير لذيذة الحمض , ناوية جربها ان شاء الله المرة التانية على طريقتك :zzz

    شو اخبار الحمل , تمام و الا لسا ظارب الوحام براسك ؟ الله يقومك بالسلامة انت و البي بي

    يا ستي هل السلطة بالذات دايما بحضرها بالعزايم و كتير الها معجبين ;) صحتين و الف عافية مرة تانية, ممنوتك لردودك الحلوة الي دوما فيها شي مميز

  14. Jassy 5 November 2010

    السلام عليكم ورحمة الله

    منوش كيفك ؟ .. لا طريقتي ولا شي ههههه انتي أم الطرق وست الستات هي بس إضافة حتمية لطبق حامل !!!
    يا جماعة يا حلوات هي السلطة بتجننننن صارت طبق أساسي عندي !
    صايرة ما عم فوق عالموقع كتير لأن عم بتدرب عالأكلات يلي تعلمتها هههههههه يعني صايرة بطبقها بدون ما إرجع لهون مشان إحفظ الطريقة بس أحيانا المقادير بتنتسى. وبما أن ما عندي فرن فللأسف يمكن نص الأكلات لسه ما بمقدوري اتدرب عليها… قريبا قريبا هانت هههههه. الله يعطيكي العافية.
    البيبي بيبوس راسك .. والوحام صار عادي بس الحمض بعدو لازم بكل أرنة.
    نازلة إجازة عسوريا بعد كم يوم وآكلة هم السفر، وبما أن صرلي 4 سنين ما كنت بحلب سمعت أن كل شي متغير، آل صاير عندكون باصات (هي لحالها بدها أسبوع ليتعرف الواحد على خطوطها – إذا كانت بعدها زحمة التكاسي متل من 5 سنين الواحد بيوقف بالجميلية ساعة وما يجيه تكسي فاضي !!!!!!). وآل صار عندكون مولات وقصص :) ….. مين قدكون !
    صحي كيف بيتك الجديد ؟ وين آخدينو ؟؟ :zzz ان شاء الله (ما) تهروه بالهنا .. والله يجعلها سكنة الأفراح.

    والسلام عليكم ;)

  15. منى 8 November 2010

    الله يقويك على الحمل و على التجارب و ان شاء الله كل مرة تطلع معك اطيب من الي قبلها ;)

    يا ستي اكيد حلب اتغيرت كتير , مولات و باصات و طرق جديدة و توسيعات , بس الزحمة هي الزحمة و الناس كترانة , ان شاء الله ربي يبارك فيهم بالكيف مو بالكم بس

    بيتي مو جديد , صارلي عشخمسطاعش سنة فيه :roll

    كل سنة و انت بالف خير و ينعاد عليك بالبر و الرحمة و الخير

    :)

  16. zena al afandi 16 March 2011

    واااااااو تسلم إيدكي على هالتتبيلة الرائعة!!عملتها وإنبسط جوزي كتيير عليها…هلأ أنا غيرت شوي وبدال ما إسلق الدجاج قليته وطلع يميميييييي وطري متل الزبدة وحطيت تحته جرجير وبشرت شوية جزر وكام قطعة فطر فريش….شكراً على هالأفكار الرائعة 

  17. lalosh 23 November 2011

    مممم عنجد بتشهي اليوم عملناها وكتير كانت طيبة :) شكرا الك مدام منى

  18. منى 23 November 2011

    هنا و الف صحة و هنا و عافية :)
    شكرا الك علا لثقتك في و تجربتك وصفاتي

  19. منى 23 November 2011

    الف صحة و هنا زينة , كتير حبيت فكرة انو نقلي الدجاج لان دوما الدجاج لما بيتقلى بيطلع اطيب , شكرا كتير للاضافة و الف صحة و هنا يا عسل ;)

  20. lalosh 24 November 2011

    حبيبة ألبي منوووشة مو معقول شو بتحبي تناديني علا :) خلص يا ستي بتموووني وناديني الإسم اللي بتحبيه
    ;)
    أما بخصوص ثقتي فيك والله يا مدام بجرب الوصفة وأنا متأكدة انها رح تكون طييبة

  21. منى 24 November 2011

    :roll

    خلص وجي اسود

    رايحة اكتبه عشرين مرة جزى لحتى ما ارجع اغلط

    خليلي عينك لا تزعلي مني الاء و حقك علي احلى لولو ;)

  22. lalosh 25 November 2011

    حبيبة قلبي والله :* قلتلك بتمووووني :) ناديني الإسم اللي بتحبيه .. يا الله شو حبيتك يا منووووشة ياريت اقدر أزورك بسوريا .. الله يهدي بالكم يارب

  23. منى 25 November 2011

    و الله يا ريت لولو :)

    امين يا رب عاجلا غير اجل :roll

تقييم الوصفة
عاديةقد أحضرهاجيدةممتازةأكثر من رائعة (No Ratings Yet)