سلطة الزعتر على طريقة نورا


         وصفة : منى                 2011/03/20                 11 تعليقات
سلطة الزعتر على طريقة نورا

خلصنا زيارة و كنا راجعين انا و سمسمة على البيت , بالطريق عدينا من جنب سوق صغير للخضرة اول مرة بشوفه , قلتلها خلينا نوقف شوي بدي اشتري بقدونس , لان صار الي فترة عم افرم تلات باقات بقدونس على الغدا لحضر فيهن تبولة و اذا زاد منهم شوي بتعشاهم .
كاني كنت نسيانة انو الربيع زهر و مع تفتيح ورده نزلت كل خضرته الطيبة الي استيناها من زمان , نعناع اخضر زعتر اخضر جرجير بصل اخضر خس و بقدونس و حتى حميضة و خبيزة . بما انو هي اول مرة اتعامل فيها مع الحميضة , سالت البياع شوفيني اعمل فيها , قالي للسلطة و الروجيم ما في منها :) . حطيت كيس هيك اده من هل الخضرة و ما نسيت اخد كم باقة سبانخ وداعية و عدت للمنزل الجميل و انا محتارة بايا سلطة بدي ابدى . فتحت الموقع و كان في رد لنورا على سلطة الزعتر الاخضر شاركت فيها بطريقتها , قلت خلص اجت على اجريها مقاديرها كلها عندي و حبيت انو الزعتر ما بده نتف , فرم ,,, ييييي شو اسهل و بنفس الطعم . المهم هي السلطة نفس وصفة نورا بس انا زدت عليها نعناع اخضر , بما انو متوفر عندي و هو و الجبنة بيلبقو على بعض كتير . و السلطة طلعت بتعقد , ما بحب استعمل كلمة بتعقد , بس عن جد هل السلطة بتعقد , ما بتعرفي كيف بديتي فيها و ما بتعرفي كيف خلصتيها و كمان حبيت فكرة انو ممكن نعمل فيها سندويش .


كان هادا بث حي و مباشر من مطبخي , و الطبق انتهى بثواني , يسلم ايديكي نورا و بانتظار وصفات تانية منك


بالصحة و الهنا





2 عود بصل أخضر , مفروم
عصير نصف ليمون
1 باقة زعتر أخضر , مفروم
2 حبة صغيرة بندورة , مفروم
4 مكعب جبنة بيضاء , مفرومة مكعبات
ربع باقة نعناع , مفروم
3 – 4 ملعقة كبيرة زيت زيتون
ملح
فليفلة حمراء ناعمة




• يوضع البصل و عصير الليمون سويا حتى اعداد بقية المقادير .

• تقلب المقادير مع بعضها البعض و يعدل الحمض حسب الرغبة و تقدم .

• يمكن حشي السلطة بالخبز العربي و تحميصها في شواية السندويش .

التعليقات

  1. آرام 20 March 2011

    طالما فيها زعتر أخضر يعني أنها من وصفاتي المفضلة على العمياني 8)
    الزعتر الأخضر بالنسبة إلي هو سيد النكهات بدون منازع، نكهة فريدة تدغدغ براعم التذوق وتلهب الأحاسيس والمشاعر.
    ألف شكر إلك أخت منى وللأخت نورا صاحبة الوصفة.

  2. لارا مينا 20 March 2011

    أنا أحس إن السلطات هي الي بتخلي الأكل له طعم ..وسبحان الله بتخلي السفرة غير لما تكون موجودة وأنا عني أفرح بوصفات السلطات كثير :)

    الفترة الماضيةجربت أكثر من وصفة وحسيت إنه صار صعب أعلق لأن باختصار كل شيء بيزبط ولله الحمد

    مقادير السلطة كلها متوفرة ماعدا الزعتر الأخضر
    , بينوجد عندنا بشكل اوراق كاملة مجففة ,, قولك أخت منى أو أيا وحدة من الأخوات كيف بنستخدمها؟؟؟ :?

    يسلمووو يااااارب :zzz

  3. منى 20 March 2011

    هلا ارام ,
    أنا اكيدة اكييدة رح تحبها , حبيت كتير طريقة وصفك لنكهة الزعتر الاخضر , صح مية مية
    بانتظار رايك

  4. منى 20 March 2011

    هلا لاروشة :)
    لو تعرفي شو عندي وصفات للسلطة , بس شو بقول لحالي معقول نزل وصفات كلها سلطة لهيك بحط وصفة سلطة وصفة غير وصفة سلطة وصفة غير :grin

    انا بنبسط لما تخبريني شو جربتي , شو بك تعليق صغير بنتي لحتى يتشجع غيرك و يجرب ;)

    هلا ممكن تستعملي الزعتر المجفف , بتطلع طيبة اكيد , فيكي تفركي شوي منه على السلطة , بس مو بنفس نتيجة الفريش اكيد :roll

  5. hajar 20 March 2011

    يممم يمييي شكلا بيجنن وانا مع الي قالتو لارامينا انو السلطات هي الي بتخلي للاكل طعم انا من عشاق السلطة وبحب اتفنن فيهن وسلطتي المفضلة هي السلطة المقلمة بحب تناغم الالوان فيها كأنو لوحة عم تزين السفرة :)

  6. Noora 20 March 2011

    شكرآ منى أنا كتير مبسوطة أنها عجبتك بس بدي نبه على شغلة مهمة أنه إذا بدك تحشيها بخبز لازم ما تحطيلها ليمون وبندورة مع الأحتفاظ ببقية المقادير كما هي وتأكل على العشاء مع كاسة شاي وألف صحة وهنا

  7. هادينة 21 March 2011

    الله يسلم دياتك منى انا بعمل هالسلطة بنفس الطريقة بس بضيف عليها زيتون كتير طيبة يم يمييييييييي :)

  8. farah 21 March 2011

    عن جد أطيب سلطة ألف شكر للوصفة

  9. هنادي 22 March 2011

    أنا بعملا نفس الشي و فعلاً طيبة، يسلمن

    لكن حا قلك منى عا سلطة عجيبة غريبة و اذا كنتي من محبين السلطات الغير شكل و نكهات الحامض حلو حتحبيا كتير و هي من سلطاتي المفضلة انا و زوجي:
    تونة
    ذرة
    زبيب
    زيتون أسود شرائح
    فليفة خضراء مقطعة مكعبات صغيرة
    تفاح أخضر مقطع
    معكرونة مسلوقة
    مايونيز ( و بحط معلقتين لبن عشان يطلع خفيف شوي)
    خل
    رشة ملح و رشة سكر

    حتى مبارح بالليل فقست عا راس جوزي و عملتلو ياها :roll صحتين عا قلبو 8)

    جربيا و خبريني رأيك

  10. آرام 22 March 2011

    عن جد رهيبة .. هلأ تعشيت منها وكانت ولا أروع .. متل ما توقعت وأطيب :zzz
    ألف شكر للأخت منى والأخت نورا.

  11. رانيا 2 23 March 2011

    ماهي الاوراق الكبيرة في الصورة أنا بعرف إنه الزعتر thyme اعواد قاسية نوعا ما وفيه اوراق صغيرة جدا :? شكرا

تقييم الوصفة
عاديةقد أحضرهاجيدةممتازةأكثر من رائعة (No Ratings Yet)