سلطة المتوسط


         وصفة : منى                 2007/03/15                 15 تعليقات
سلطة المتوسط

هي أول وصفة سلطة في الموقع و من السلطات الي بحبها كتير , و من أكتر الوصفات الي بحضرها بمطبخي , سلطة الميديترينيان , سلطة المتوسط , مقاديرها من كنوز منطقتنا , خيار و بندورة تشكيلة خضرة ما في اطيب منها وقت يكون وقتها , و منضيف عليها فيتا و خل بلسميك.
إلي بيميز هل السلطة انو تبلتها خفيفة , زيت البندورة المجففة و رشة خل بلسميك مع عصرة ليمون و ملح , و بس , طيبتها ببساطتها و باستعمال الخضرة الفريش .
بالعادة بحط زيتون أو عطون , هل المرة نسيت حطهن , بس طلعت طيبة كمان , و كتير مستاهلة .
بالصحة و الهنا

- المقادير:
3 حبة خيار
جبنة فيتا , حوالي 100 غ
كوب من الزيتون الأسود أو الأخضر , منزوع النوى و مفروم لشرحات
2 حبة متوسطة بندورة , مفرومة
4 - 5 شرحة بندورة مجففة , مفرومة
2 ملعقة كبيرة من زيت البندورة المحفوظة
بصلة حمراء صغيرة مقطعة شرائح رقيقة
عصير ليمون
ملعقة صغيرة خل البلسميك
رشة ملح حسب الحاجة


للتزيين : أوراق نعناع أو زعتر أخضر
- طريقة التحضير:
• يقطع الخيار طولياً باستخدام قشارة البطاطا و تبعد البذر إن وجدت .

• تمزج الخضار مع الزيت و عصير الليمون و خل البلسميك في طبق كبير ثم ترتب في طبق التقديم و تقدم .

التعليقات

  1. رغود 6 December 2007

    تسلم ايديك يا منى انا بعمل هالأكلة و فعلا طيبة و من ايدك أطيب**

  2. منى 6 December 2007

    الله يسلمك رغودة :)

    كلك زووء يا عسل , و ما انحرم من هل الطلة الحلوة ;)

  3. نورا 5 January 2008

    سلامات يا منى… أنا ديماً في المطاعم بطلب سلطة وحيدة ومميزة جداً بالنسبة إلي بس المشكلة انه ما بقدر اعملها بالبيت لأنه ما بعرف صلصتها …السلطة تسمى بمسميات عديدة تبعاً لكل مطعم احياناً سلطة كومبوزييه وأحياناً سلطة الشيف ووووو…
    المهم مكوناتها بالميتو واسبيرج وبندورة وذرة وهليون وخس وحمض والباقي لا اعرفه.. إذا عندك فكرة عن طريقة تحضيرها ممكن تحطيها؟؟
    ومشكورة سلفاً…

  4. منى 14 January 2008

    هلا نورا :)

    رح حط لك طريقتي و ان شاء الله تكون متل ما بتحبيها أو قريبة عليها ;)

  5. نورا 23 February 2008

    منى عبستنى طريقة صوص السلطة اللي سالتك عنها…
    بالاحرى جوزي كل يومين تلاتة بيسألني وانا بقول له: عبستنى منى ;) فالله يخليكي إذا بتعرفيها او عندك فكرة عنها ممكن تنزليها؟؟ولك جزيل الشكر سلفاً

  6. منى 24 February 2008

    هلا نورا يا أمورة , هلا نزلت لك السلطة و أسفة للتأخير .. بتلاقيها [URL=http://www.l2ma.com/content/view/349/2/]على هل الرابط[/URL] ;)

  7. سارونات 19 November 2008

    السلام عليكم و رحمة الله و بركاته
    عجبتني كتير مكونات السلطة و خصوصا فكرة تقطيع الخيار شرائح رقيقة
    سؤالي هو هل يمكن استبدال جبنة الفيتا بالجبنة مثلثات مقطعة مكعبات او لا و ما مدى ضرورة البندورة المجففة بعرفها طيبة بس مو متوفرة عندي و راح الوقت للتجفيف هلأ و يعني الوصفة طارت بلا بندورة مجففة و زيتها او فيني ساويها بزيت زيتون
    بالتوفيق
    سلام
    بالتوفيق
    سلام

  8. سارونات 12 December 2008

    السلام عليكم و رحمة الله و بركاته
    شو قلتي اختي منى فيما يتعلق بالطماطم المجففة و الجبنة و كمان جربت قطع الخيار شرائح متل اللي بالصورة بس ما ضبطت معي :cry اما تطلع سميكة او كتير رفيعةجربت قشارة البطاطا و جربت السكين بس ما نفعو
    يا ترى في شي طريقة سهلة لتقطيعها شرائح او بس لازملها الكثير من المحاولات تحتى تنجح
    بالتوفيق
    سلام

  9. منى 13 December 2008

    هلا سارونات :)
    و لا مرة جربت الجبنة المثلثات في السلطة ما اتوقها لذيذة :roll
    الوصفة طيبة بالبندورة و زيتها لو سويتيها ببندورة عادية وزيت عادي بتطلع طيبة بس مو هل الوصفة
    الخيار لحتى يطلع هيك اما بتقسميه بالقشارة أو بالماندولين , هي الالة الي بتقطع الخضار رقيق كتير ما بعرف اذا عرفتيها

  10. سارونات 31 December 2008

    السلام عليكم و رحمة الله و بركاته
    نعم عرفتها للالة شفت مارثا ستيورت عم تستعملها للحصول على رقائق بطاطا بس ما كنت بعرف اسمها شكرا على المعلومة ان شاء الله ببقى دور على الماندولين
    وا ن شاء الله راح جربها ببندورة و زيت عاديين لاني متمسكة بالفكرة و عبالي جربها
    جازاك الله خيرا اختي منى
    بالتوفيق
    سلام

  11. منى 31 December 2008

    ان شاء الله تجربيها و تحبيها ;)

  12. منال 4 February 2009

    سلام عليكم اختي منى كتير سمعت عن جبنة فيتا ما هي وهل تختلف عن الجبنه البيضاءومن اين نحصل عليها وشكرا :grin

  13. منى 4 February 2009

    هلا أختي :)
    هي نوع من انواع الجبنة البيضاء بس بتممز ان طعمتها في شي بيشبه الكريم مع ملوحة عالية و بتفتت بسرعة و هي نوع من انواع الجبنة اليونانية ;)

    ممكن تحصلي عليها من المولات الكبيرة بقسم الأجبان , اذا انت بحلب فهي متوفر دايما عند نيو تاون :zzz

  14. سارونات 4 June 2009

    السلام عليكم و رحمة الله و بركاته

    ساويتها للسلطة و طلعت طيبة كتير و متل ما بتعرفي انا كتير بحب الجبنه المثلثات لهيك حطيتها بدل الفيتا و طلعت طيبة كتير

    جازاك الله خيرا اختي منى

    سلام

  15. منى 4 June 2009

    هنا و عافية سارونات :) و لو المرة التانية تعمليها بالفيتا لسا رح تطلع اطيب و اطيب ;)

تقييم الوصفة
عاديةقد أحضرهاجيدةممتازةأكثر من رائعة (No Ratings Yet)