يوفيتسي / صينية اللحمة و راس العصفور على الطريقة اليونانية


         وصفة : منى                 2014/03/23                 18 تعليقات
يوفيتسي / صينية اللحمة و راس العصفور على الطريقة اليونانية

في وصفات لما تحضريهن و تدوقيهن بتزعلي ع حالك لأن ما الك مكتشفتيهن من قبل , هي واحدة من هل الوصفات . صينية راس العصفور باللحمة على الطريقة اليونانية أو متل ما بيسموها اليونانيين ” يو في تسي Yiouvetsi ” وصفة تقليدية مشهورة كتير, سهلة كتير , طيبة كتير , تقريباً ما بدها تحضير , بس بتاخد وقت طويل في الطبخ , يعني كل الشغل رح يكون على الفرن , انت بس قلبي المقادير مع بعض و خلي الباقي على النار , و كمان بتنطبخ و بتتقدم بنفس الصينية , يا سلااام
بهي الوصفة رح نطبخ لحمة الغنم مع القرفة و الزعتر الأخضر على مهل لحتى تستوي اللحمة و تصير طريييية , رح نضيف بعدها معكرونة راس العصفور , لما تدوقيها رح تحسي انو هل الوصفة بتشبه شي نغمة حلوة سمعانتيها من زمان , بتعرفيها بس ما بتعرفي كيف أو ايمتى , بس الأكيد انو بتحبيها .
معكرونة راس العصفور أول مرة استعملتها في حياتي كانت بهي الوصفة , شكلها متل حبات الرز بس على أكبر شوي , رح اطبخها فوراً بالمرق من دون نقع او سلق , رح تشرب كل النكهات و رح تكون طعمتها مممم .
سر الطبخة هو طبخ اللحمة ع نار هادية وقت منيح لحتى تستوي ع مهلها , و البهارات القليلة , زعتر أخضر و قرفة و بس , كل فلسفة المطبخ اليوناني رح تشوفيه هون . بتمنى تجربيها و بتمنى تعجبك
بالصحة و الهنا

-المقادير:
نصف كوب زيت زيتون
1 كيلو لحمة غنم مقطعة مكعبات متوسطة , يفضل لحم الكتف
2 حبة متوسطة بصل , مقطعة جوانح
ملعقة كبيرة أوريغانو مفروم , أو ملعقة صغيرة أوريغانو مجفف
نصف ملعقة صغيرة قرفة
عود قرفة
2 حبة كبيرة بندورة , مقشرة و مفرومة
6 كوب ماء
2 كوب معكرونة راس عصفور

جبنة بارمجان مبشورة للتقديم
- طريقة التحضير :

1 - توضع اللحمة و البصل و الزعتر الأخضر و القرفة العيدان و زيت الزيتون في صينية ذات حرف مرتفع نوعاً ما , يقلب الكل حتى يغلف الزيت كل المكونات .
2 - توضع الصينية في الفرن و تخبز من دون غطاء على درجة حرارة 160 درجة مئوية على الرف السفلي لمدة 45 - 60 دقيقة .
3 - يضاف الماء و البندورة و القرفة الناعمة و يغطى الوعاء بشكل محكم و يخبز لمدة ساعة و نصف أو حتى ينضج اللحم .
4 - تضاف معكرونة راس العصفور و تقلب , يغطى الوعاء مرة ثانية و يترك لمدة 15 - 20 دقيقة أو حتى تنضج المعكرونة و تتشرب المرق .
5 - ينثر البارمجان على الوجه و تقدم الصينية فوراً .

التعليقات

  1. ديما 23 March 2014

    مبين عليها طيبة يسلمو دياتك بس انا بعرف انو هي المعكرونة اسما لسان العصفور في عالم بتحطا بالشوربة طيبة :)

    • منى 23 March 2014

      اي ديما انا سمعانة كنت فيها سمع , و لا مرة ما جربتها , و لما صدفت و جربتها كانت هون , بس شو طلعت , شغلللة :)

  2. ديما 23 March 2014

    منى انتي اذا بتطبخي حجار بيطلعو من تحت اديكي شغللللللللة :)

    • منى 23 March 2014

      ههههههههههههههه بدي جرب ها

  3. foza 23 March 2014

    هون بليبيا بيستخدموها بالشوربة..الشوربة الليبية و في كمان شوربة لسان العصفور ، و انا بستخدمها مع الرز بدل الشعيرية

    موني…اكيد راح اجربها هاليومين ان شاء الله…يسلم ايديكي كل وصفة الذ من التانية

    • منى 23 March 2014

      مممم , حلويين كتير هل الافكار فوزة , شكرا كتير للاضافة روح قلبي

      كيف بتعملي الشوربة الليبية ؟

      يا ريت تجربيها و تكون نم نم و ع زوءك :)

  4. ديما 23 March 2014

    هههههههههه :)

  5. الساجدة لله وحده 23 April 2014

    يسلمو ايديكي منى
    حبيت اعرف شو بيتقدم جنيها

    • منى 24 April 2014

      الله يسلمك يا رب :)
      بيتقدم معها سلطة حامضة , يا ريت تجربيها و اعرف رايك

  6. ريم 4 May 2014

    مرحبا منى
    بس سؤال فني
    المعكرونة اسلقا قبل ما حطا او حطا باخر مرحلة و بتتشرب مرئة و بتستوي
    هي النقطة ما عرفت شو اعمل فيا
    هلأ انا بمرحلة سوي اللحمة ان شالله توصلك وتلحقي تردي عليي :)

    • منى 4 May 2014

      ان شا الله كون لحقتك
      لا بستخدميها من دون سلق , بتخليها تستوي بمرقة اللحمة

      ان شا الله تعجبك :)

  7. ريم 5 May 2014

    رجعت قريت التفاصيل كنتي كاتبة انو بلا سلق ولحقت حالي
    طيبة كتيييير يسلمن منى

    • منى 5 May 2014

      عوافي و الف هنا و صحة :)

  8. نعوم 27 May 2014

    منمون كالعادة بكون واثقة من الأكلة من قبل ما دوقها … طلعت الأكلة عم تدوب دوبان … واحلى شي انو صبخها كتير اكابر يعني بتحطيها بالفرن وبتعملي ألف شغلة تانية وبعدين تشييكة بسيطة وبترجعي لشغلك … يعني الواحد طبخ بس ما ضل بالمطبخ … وبعدين مابتوسخ المطبخ كمان … مو معقول شو ظريفة… على فكرة انا ضفتلها ملعقة صغيرة صلصة بندورة لأن بندورتنا كتير شقرا هون…

    • منى 28 May 2014

      تمااام نعوم , هادا هو التعبير الي عبدور عليه و ما لاقيه , طبختي بخة بس من دون ما تطبخي :D

      الف هنا و صحة و شكرا ع الاضافة

  9. Farah 3 November 2014

    يسلم ايديك كتيررررر طيبة عندي سؤال اذا ممكن بيصير استعمل باستا ريزوني بدال الاورزو لان الكمية اللي عندي مابتكفي او بيصير اذا خلطت اورزو و ريزوني مع بعض؟؟

    • منى 5 November 2014

      و الله فرح ما الي مجربة الباستا الي قلتي عليها بقى ما بقدر فيدك :(

تقييم الوصفة
عاديةقد أحضرهاجيدةممتازةأكثر من رائعة (2 votes, average: 5.00 out of 5)