غريبة اللوز الاستنبولية


         وصفة : منى                 2011/03/26                 23 تعليقات
غريبة اللوز الاستنبولية

لو في مدينة بحبها بعد حلب و بتمنى عيش فيها فهي استنبول . سحرها ما بيشبهلوا ايا سحر تاني و الأصالة فيها بتمشي مع الحداثة بشكل متناغم و اله طابعه الخاص . ناسها بيشبهونا كتير و عاداتهن عاداتنا و تاريخنا نفسه , نحنا بحلب اخديين كتير من الاتراك سواء من الحكي أو الاكل او حتى الشبه بالشكل , لهيك يمكن بيقولوا بنات حلب احلى بنات العرب , الله حيو و نيال الي بيبوس ايد حاله


و انا عم اتمشى في استنبول شفت هل الشوفة





غريبة استبولية و بقلب استبول , قلت بدي منهاااا , لازم دوقها , الغريبة الاستبولية بالعادة هو النوع الوحيد الي باكله من الضيافة , بس بشرط انو يكون محشي شوكولا و مو ايا شوكولا , لازم تكون شوكولا مرة لحتى تخفف حلاوة الغريبة و لو كان من عند أزرق بيكون أطيب و أطيب , . المهم الغريبة الي دقتها ما كانت بتشبه غريبة حلب كتير , طيبة بس غريبتنا أطيب , فيكن تقولوا هي بنت عمها اللزم للغريبتنا الاستبولية .


هل الوصفة اتعلمتها من هنا Hena Balık Yörükoğlu, شو سهلة و طيبة , يمكن هي اسهل وصفة بحضرها بحياتي , و البسكويتات طلعوا يممممي و خلصوا بلمح البصر . يسلم ايديكي هنا و أنا استخدمت خلاصة اللوز عواض عن اللوز المر او زيت اللوز , و هي متوفرة عنا يشكل عادي و كمان فيكي تستعمليها لكتير انواع حلو , بتعطي نكهة فخامة و غنى للوصفة . أخر شي مرة حمصت اللوزات قبل استخدامهن لهل الوصفة , انو عم اتفنن يعني , طلعت مو طيبة ابداً .


يلا بنتي انتي و اياها , دقت ساعة التغيير , دقت ساعة الحقيقة , بسكويت بسكويت , من كل بيت , يلا خيت خيت , الى الامام و المطبخ سر


بالصحة و الهنا




300 غ لوز مطحون
300 غ سكر بودرة
بياض 3 بيضات
5 حبة لوز مر مطحون , يمكن استبداله بقطرة من زيت اللوز المر





• يحمى الفرن على درجة 150 مئوية , تجهز صينيتا فرن متوسطات و تغطى بورق الزبدة .

• تعجن المكونات مع بعضها ثم توضع في كيس الكريما و تصب على الصينية المجهزة بشكل اقراص بالحجم المرغوب مع ترك فراغات بين القرص و الاخر .

• تترك الاقراص لترتاح لمدة ربع ساعة ثم تخبز في الفرن على الرف المتوسط حتى يحمر السطح حوالي 10 – 20 دقيقة .

• تخرج الصينية من الفرن و تترك لتبرد , ترفع الاقراص بلطف من الصواني .

• يمكن لصق كل قرصيين سويا باي نوع حشوة حسب الذوق . و انا افضل الشوكولا المرة .



التعليقات

  1. dentamaniac 27 March 2011

    بسكويت بسكويت ..الى الامام ههههههه
    ضحكتيني على الصبح بس الوصفه روووعه وبلكي اليوم بجيب زيت لوز و بجربها
    انا اسطنبول زرتها و انا صغيره و كتير حابه زورها مرة تانيه
    تسلم دياتك يا منى على الوصفه و الصور
    و ان شاء الله الي رجعه بوصفه بسكوت
    بينفع بيسكوتي biscotti?

  2. ssweetangela 27 March 2011

    دخيل عينك يا ست منى ضحكتيني من قلبي وكنت ناوية قوم اسمع الكلمةو جرب الوصفة عالسريع بس لما شفتها كانت الساعة 11 ونص قمت اتكسلنت ,انشالله بدي جربها وخبرك .وبخصوص القذافي مالي عرفانة على مين بدنا نضحك بس ينقلع :grin الله يسلم ايديكي بس عندي كم وصفة بدي ابعتهن بس ما بعرف كيف يا ريت تردي عليي وتقوليلي وعندي كمان صور حلوين ,ناطرة ردك يا مزوقة

  3. لارا مينا 27 March 2011

    أنا عندي كم وصفة للبسكويت رح أعمل وحدة منهم بشكل مستعجل وبرسلها أكيد…….

    أنا بحب وصفات البسكويت لسببين أولهم ممكن تعملي كمية كبيرة وتظل شهر وأكثر , ومناسبة لضيوف الفجأة يلي بدون مواعيد والثاني ممكن تتفني بطريقة التزيين وبيفكروك عاملة أكثر من نوع وهو نوع واحد :eek

    وعندي سؤالين اللوز المطحون ممكن أقشر لوز من عندي وأطحنه بدون تحميص طبعاولا أخليه بقشره وأطحنه , لأن مش متأكدة إذا بلاقيه بسهولة أو لأ؟

    السؤال الثاني : ضروري لوز مر لأني بصراحة ماأعرف إلا اللوز العادي بس , وشو الفرق بينهم؟

    وبالنسبة لتركيا أنا بتمنى زورها قريبا لأن كثير من زميلاتي زاروها مرة ومن بعد هالمرة صارت مرات ومرات :zzz تسلم إيديك

  4. منى 27 March 2011

    هلا دكتورة سوسن :)
    ان شاء الله مبسوطة و مروءة على طول حبيبتي
    ان شاء الله تجربيها و اكيد اكيد وصفات البسكوتي مرحب فيها ;)

    ان شاء الله ربنا يسر و تزوري اسطنبول لانها تستحق الزيارة المطولة

  5. غيث 27 March 2011

    شكرا منى انا بحب هالضيافة وللاسف مش بلاقيها هنا بالرياض ولكن اسئلتي نفس اسئلة لارا الرجاء التكرم بالاجابة متل ما عودتينا سابقا مع الشكروبالنسبةلنا نحن الحلبية كتير بنشبه الاتراك سبحان الله بكل شي حتى انني مرة باحد المسلسلات التركية صدفة كنت عند ناس وانا ما كنت متابعة هالمسلسل اصلا من كتره المسلسلات مل المشاهد المهم شفت عندها مقطع من مسلسل قلتلها هدول ممثلا ت سوريات جدد وخاصة انو مدبلج بالشامي قالتلي يي هذا مسلسل تركي فعلا كتير بيشبهوننا وخاصة الحلبية سبحان الخالق اسفة طولت عليك شكرا لك

  6. gsm 28 March 2011

    يمييييييييي وبعد طول إنتظار نزلت الوصفة انا كتيير بحب الغريبة الإستنبولية وإن شاء الل هرح اجربها بلكي اليوم بس ما اجيب زيت اللوز بس سؤال منى هلق انا هون عندي متل أصانصات يعني بنكهة اللوز او الفراولة او البرتقال بينفع استملها ولا لازم اجيب زيت لوز ؟

  7. اياد 29 March 2011

    واخيرا وصلت الوصفة وجربناها وكثير طيبة يسلمو ايديك، بس لوسمحت ليش اللوز المر؟؟

  8. منى 29 March 2011

    هلا انجيلا :)
    مبسوطة على طول ان شاء الله و الضحكة ما تفارق وجهك ;)

    الوصفة فيكي تبعتيها بالطريقة الي بتريحك , هون برد او على الفيس بوك او عن طريق اتصل بنا :zzz

  9. منى 29 March 2011

    هلا لاروشة :)
    اسباب مقنعة , زادت اعجابي بالبسكويت , انا ما كتير صحبة معه لان بالاساس مو صحبة مع الحلو , بس هلا عم تزيد المودة بيناتنا .

    فيكي اكيد تقشريه و تطحنيه , بس لو تجيبيه جاهز بيكون اسهل عليك و بنتيجة افضل لان طحن البيت الا ما يبقى فيه شوية خشونة ;)

    زيت اللوز المر و الحلو متوفر بكل محلات العطارة اكيد , يمكن انت ما جربتي تسالي , بس لو سالتي رح تلاقي و رح يسالك البياع فورا ايا نوع بدك , هلا انا ما جربت دوقهن بس كنت استعمل واحد للبشرة و التاني للشعر من دون ما يخطر ببالي ان ممكن استعملهم كمان في الوصفات :roll

  10. منى 29 March 2011

    هلا غيوثة :)
    ان شاء الله تجربيها و تحبيها و تكون تعويض بسيط عن غريبتنا الي منحبها

    بالعكس غيوثة انا بحب الردود الطويلة و استمتع بقرائتها و خصوصالما بتكون من اخت غالية على البي متلك ;)

    بالفعل يا ستي الاتراك كتير قريبين منا بالشكل , لما بمشي بيناتهن بحس حالي بين سوريين , بس بلسان مختلف , ما نحنا كنا عشرة 400 سنة :roll

  11. منى 29 March 2011

    هلا غفران :)
    هلا انا كان خالص من عندي زيت اللوز و جربتها بالاصانص و كانت طيبة , بس اكيد غير مرة حابة جربها بالزيت لاحكم بالفرق بنفسي ;)

  12. منى 29 March 2011

    هلا اخي اياد , صحتين و هنا يا رب .

    اللوز المر او زيته ليعطي طعم للوصفة و يزيد نكهة اللوز فيها , بكل الاحوال انا حضرتها باصنص اللوز

  13. Pro rawan 30 March 2011

    مرحبا مدام منى
    يعطيك العافية ع الوصفات الحلوة وان شاء الله حجربها دا الأسبوع واخبرك :)
    عندي استفسار كيف نبعتلك الوصفات؟ لان بعت قبل هيك وصفة علا ايميل الموقع وماادري اذا وصلك ولا لأ ؟

  14. Rino 31 March 2011

    ست منى يسعدأوقاتك
    الوصفة اليوم بتستاهلي عليها الأوسكار
    يعني عدا عن كونها بسيطة و سريعة كمان بتفش ألب هالمغتربين اللي عايشين بعيد عن حلب
    الله يجعل الدعوات الحلوة اللي عم يندعالك فيها كلها من نصيبك
    بدي أسألك منى من وين عم تجيبي اللوز المطحون
    و كمان سؤال ( رح نبدا ننجلق عليكي ) صارلي مدة حايصة على طريقة المشبك الحلبي لأنو غييير عن أي مشبك تاني حاولت أسأل البياع اللي عم يعمل مشبك بأول طلعة الخالدية ما كان يعطيني أي معلومة تبل الألب الله يسامحو يا ترى عندك أي معلومة مفيدة؟
    الله يسعدك دنيا آخرة يا رب

  15. منى 31 March 2011

    هلا روان :)
    ان شاء الله تجربيها و تحبيها و تكون على زووءك ;)

    حبيبتي الوصفة وصلت بس بجزء واحد , بس المقادير و انا بانتظار البقية ;)

  16. gsm 1 April 2011

    السلام عليكم منونة وأخيرا جربت الوصفة عن جد طيبة كتيير وخفيفة بس انا بصراحة كتيير شبهتها ل كرات جوز الهند حتى زوجي لما داقها قلي كانو جوز هند بس طبعا الطعمة غير انا عم احكي على الشكل وطبيعة البسكويت على كل صارت هل الوصفة من الوصفات المعتمدة عندي انا بصراحة بحل اعمل بسكويت خصوصي من شان الشاي يعني الواحد بحب يآكل قطعة بسكوتة جنب فنجان الشاي يا خيتو صرنا إنجليز مو بتعرفي وقت ال tea time
    بس المشكلة كل وصفات البسكويت فيها كميات رهيبة من الزبدة وحتى الجاهز منها لهيك عم الغي فكرة إنو عمله بالبيت بقى إذا في حدامن الأاخوات عنده طريقة بسكوت طيبة وخفيفة فياريت
    ويسلموا مرة تانية يا منونة :zzz

  17. souha 4 April 2011

    مرحبا منونة كيفك يسلم دياتك على الوصفة باينتها ظريفةكتير بس بدي أسألك من وين عم تشتري نكهة اللوز أنا مرة اشتريت من المول قنينة صغيرة فوستر كلارك بس ما عم شوف منهن يا ترى بسوق العطارين بلاقي

  18. سوسن محمد 19 April 2011

    السلام عليكم جميعآ حبيت أنضم لمجموعتكم الظريفة لأني حبيت أكلاتك يا ست منى وحبيت تعليقات الظريفة كلها يا ريت تقبلوني صديقة الكم
    على فكرة أنا حلبية بأبو ظبي الامارات

  19. منى 21 April 2011

    اهلا و سهلا سوسن :) منورة و مشرفة
    ان شاء الله تجربي شي و يكون على زووءك و ان شاء الله تبقي معنا على طول ;)

  20. Raz 5 July 2014

    هلأ حبات اللوز المر هية نفسا اللي منطالعا من بذرة المشمش؟؟؟

    • منى 8 July 2014

      لا هو نوع متوفر عند البياعيين , بس رزان هل الغريبة نوع تركي مو الغريبة المعروفة عنا بحلب :)

  21. Raz 6 July 2014

    شلون ممكن نعمل حشوة الشوكولا لو سمحتي؟!

    • منى 8 July 2014

      اهلا حبيبتي :)
      حشوة الشوكولا عادية ، بس شوكولا مرة مدوبة

تقييم الوصفة
عاديةقد أحضرهاجيدةممتازةأكثر من رائعة (1 votes, average: 5.00 out of 5)