فطيرة الشاورما


         وصفة : منى                 2009/09/26                 71 تعليقات
فطيرة الشاورما

·         تقطع صدور الدجاج إلى شرائح رقيقة  باستخدام سكين حادة . ثم توضع شرحات الدجاج في وعاء غميق و تتبل ببهارات الشاورما و  الكاري و الزنجبيل و الخل و الليمون و بشر الليمون و الثوم و الزيت و تقلب ثم  يغطى الوعاء و يترك منقوعاً لمدة 24 ساعة في البراد .

·         تخرج عجينة الباف باستري من الفريزر قبل بيوم و تترك في البراد طول الليل ثم تخرج من البراد قبل الاستعمال بساعتين . يقطع البصل و الفليلفة الحمراء و الخضراء لشرائح رقيقة .

·         يقلب البصل بالسمنة في قدر كبير غير لاصق على نار متوسطة حتى يطرى , تضاف نصف شرائح الدجاج و تقوى النار و تقلب بلطف حتى تشقر من الطرفيين . ترفع ثم يضاف باقي الدجاج و يقلى حتى يشقر و ينضج .

·         يوضع كل الدجاج المقلى في القدر ثم تضاف الفليلفة الحمرا و الخضراء و تقلب بلطف لبضع دقائق , يجب ان تبقى الفليلفة مقرمشة . بعد أن تفتر الحشوة تضاف علبة القشطة و يقلب الكل .

·         يفرد أول قسم من العجينة في طبق بايركس مدهون اكبر قياس ثم تفرد عليه الحشوة و يوضع القسم الثاني من العجينة , و يمكن ان يقص القسم الثاني لشرائط و يرتب فوق الحشوة بالشكل الظاهر بالصورة .

·         يدهن الوجه بمزيج صفار البيض و النسكافييه ثم تخبز على فرن محمى مسبقا على 180 درجة حتى تشقر من فوق و تحت و تقدم فوراً .


تلات ارباع كيلو صدور دجاج
حبة كبيرة بصل
حبة كبيرة فليلفة حمراء
حبة كبيرة فليلفة خضراء
علبة قشطة
ملعقة كبيرة سمنة بلدية او زبدة
عبوة من عجينة الباف باستري أو مقدار من العجينة الموجودة على هذا الرابط

نقعة الدجاج :

ملعقة كبيرة مسطحة بهارات الشاورما
نصف ملعقة صغيرة كاري
نصف ملعقة صغيرة زنجبيل
ربع كوب زيت زيتون
بشر و عصير حبة ليمون كاملة
3 ملعقة كبيرة خل
2 فص ثوم مهروس

للوجه :

صفار بيضة
ربع ملعقة صغيرة نسكافييه





• تقطع صدور الدجاج إلى شرائح رقيقة باستخدام سكين حادة . ثم توضع شرحات الدجاج في وعاء غميق و تتبل ببهارات الشاورما و الكاري و الزنجبيل و الخل و الليمون و بشر الليمون و الثوم و الزيت و تقلب ثم يغطى الوعاء و يترك منقوعاً لمدة 24 ساعة في البراد .

• تخرج عجينة الباف باستري من الفريزر قبل بيوم و تترك في البراد طول الليل ثم تخرج من البراد قبل الاستعمال بساعتين . يقطع البصل و الفليلفة الحمراء و الخضراء لشرائح رقيقة .

• يقلب البصل بالسمنة في قدر كبير غير لاصق على نار متوسطة حتى يطرى , تضاف نصف شرائح الدجاج و تقوى النار و تقلب بلطف حتى تشقر من الطرفيين . ترفع ثم يضاف باقي الدجاج و يقلى حتى يشقر و ينضج .

• يوضع كل الدجاج المقلى في القدر ثم تضاف الفليلفة الحمرا و الخضراء و تقلب بلطف لبضع دقائق , يجب ان تبقى الفليلفة مقرمشة . بعد أن تفتر الحشوة تضاف علبة القشطة و يقلب الكل .

• يفرد أول قسم من العجينة في طبق بايركس مدهون اكبر قياس ثم تفرد عليه الحشوة و يوضع القسم الثاني من العجينة , و يمكن ان يقص القسم الثاني لشرائط و يرتب فوق الحشوة بالشكل الظاهر بالصورة .

• يدهن الوجه بمزيج صفار البيض و النسكافييه ثم تخبز على فرن محمى مسبقا على 180 درجة حتى تشقر من فوق و تحت و تقدم فوراً .
  • وصفات تانية ممكن تعجبك


التعليقات

  1. ميسونو 26 September 2009

    سلامات للعزيزة منى
    وسلامات أيضاً لجميع الأخوات المتابعات
    وانشالله كل عام وانتو بخير وينعاد ع الجميع يا رب

    بالحقيقة عم أستنى أول وصفة تنزليها يا منى بعد العبد منشان تكون كلماتي للمعايدة أولاً
    .. وأيضاً منشان أتشكرك يا منى وأتشكر كل الأخوات العظيمات اللواتي تكرمن بالمشاركة بمسابقة وصفات رمضان.
    بالحقيقة كانت النتائج مذهلة وأكثر من رائعة
    والأخوات ما شالله عليهن .. يا هيك ستات البيوت يا بلا.
    بس طبعاً يبقى الشكر والتقدير الأساسي لكِ أنتِ يا منى يللي جمعت هالناس الطيبة وخلقت بين الجميع جواً عائليا أخوياً راقيا.

    أكرر الشكر والتقدير
    وإلى المزيد من المسابقات والمشاركات وتبادل الخبرات.
    ميسون

  2. منى 26 September 2009

    هلا ميسون :)
    ان شاء الله ينعاد عليك و على كل الغوالي عليك بالخير و البركة و الطاعة .
    كتير انبسطت ان المنيو عجبك و عن جد الوصفات كانت مميزة و انا ما فيني الا اشكرهم واحدة واحدة على كرمهم و جودهم

    ممم , معناها جربتي منهم شي , الف هنا و صحة على كل شي جربتيه و ان شاء الله تجربي الباقي و يكونوا على زووءك

    الشكر الك ميسون على ردك الطيب و مرة تانية كل سنة و انت بالف خير :)

  3. سارونات 26 September 2009

    السلام عليكم و رحمة الله و بركاته

    شو هاد شكلها هالقشطة ورايي ورايي كأنه في ثأر بيناتنا :sigh

    فرحت كتير لان فينا نستبدل عجينة الباف بايستري بعجينتك بقى هل فينا كمان نساوي بالهجينة فطيرة سيما و فطيرة الدجاج

    و اكيد سؤالي المشهور اللي لازم يكون متواجد و سيحدد مصير هذه الوصفة و اذا ما كنت ساجربها او لا و هو هل فينا نستغني عن القشطة و اذا فينا بشو منعوضها او بس منستغني عنها

    بالتوفيق

    سلام

  4. بشرى 26 September 2009

    منوشة الحلوة ,, كل سنة وإنتي وعيلتك وكل حبابك بألف خير يارب وغن شاء الله ينعاد عليكي وتكوني بألف صحةوخير يارب ..

    متلي متل ميسون كل شوي عم افتح الموقع وشوف إذا نزلتي شي وصفة ولا لاء :grin , قول لحالي لسى منى ملتهية بالعيد وعجقتو ..

    المقدمة قبل الوصفة , أكتر من رائعة .. بتخليكي فعلاً تحسي بإنو لازم تغيري شي .. وغن شاء الله نويت إني غير كتير اشياء بحياتي ومتل ما قلتي لوجه الله ..

    أما وصفتك اللذيذة ,, فالطريقة أسهل مما توقعت بكتير , عنجد لذيذة وسهلة وما بتاخد وقت ولا تعب إطلاقاً ..

    عالتجربة بعد يومين إن شاء الله لانو عندي كل المكونات ..

    بس هالمرة بدل ساورنات أنا , بصير بلا القشطة ؟ :grin

    يسلم إيديكي منوشة حبيبتي .. فعلاً مينو العزيمة الخيرة متميز جداً .. 8) متل كل مينو بتعمليه ;)

  5. بشرى 26 September 2009

    صحي منونة تذكرت سؤال بيصير بهارات الشاورما الجاهزة , لانو عندي من سوريا بهارات جاهزة من سوق العطارين ؟؟

  6. نور الأسلام 26 September 2009

    :) السلام عليكم كيف حالك منى كل عام وانتي بخير انت وكل عيلتك واحبابك وجميع الاخوات بالموقع ينعاد عليكم جميعا بالصحه والعافيه والهنا يسلمو اديك والله يعطيك الف عافيه :)

  7. dentamaniac 26 September 2009

    منى انا كنت بانتظار هذه الوصفه بشوق..
    بس بصراحه الكلام اللي كاتبتيه بالاول احلى و اعمق و بيدخل على القلب على طول

  8. منى 26 September 2009

    هلا سارونات :)
    لا ثار و لا شي بس انتي اخدة منها موقف , حاولوا تتفاهموا بركي بتوصلوا لشي :grin

    هل العجينة ممكن تستعمليها للفطيرتين الي ذكرتيهم و كمان فيكي تحشيها بشو ما بدك او بيخطر ببالك .

    القشطة اساسية للوصفة , اذا حابة تستبدليها ممكن بالمايونيز و الجبنة الكريم :zzz

  9. منى 26 September 2009

    هلا بشورة :)
    يا رب يا رب يكون التغير للاحسن و يكون التغير دائم .

    متل ما قلتي كنت مشغولة كتير بهل العيد و عزمت كل العيلة يوم الاربعاء على الفطور , بقى كنت بيومها اخر روقان :roll

    سارونات ما قصرت , و الجواب نفسه , بس يا ريت لو تجربيها بالقشطة لحتى تدوقيها متل ما ما داقوها ضيوفي و عيلتي ;)

    اكيد فيك تستعملي بهارات الشاورما الجاهزة , اذا متوفرة احسن و احسن , هنا و الف صحة مقدما و انا رح استنى رايك بعد التجربة و ياا رب تعجبك ;)

  10. haya 26 September 2009

    السلام عليكم يا منى تسلم هالايادي يارب وكل عام وانت بألف خير يارب وعقبال ما ينعاد رمضان علينا وعليكم باخير يارب
    شكل الاكل يا منى كثير مشهي :p وشجعتيني اني اعملها ان شاءالله نهاية هالاسبوع بعملها واكيد راح تطلع لذيذة :)

  11. سمسمة 26 September 2009

    كل سنةوأنتو بألف خير
    آه يامنى ذكرتيني بكتير شغلات عيد زمان يلي مافي أحلى منه وأيام زمان بتمنا ترجع ويرجع معها كل شي حلو وبسيط
    جدي الله يرحمه كان مايخلينا ناكل الزيتونة بلقمة واحدة كان يقول هي نعمة لازم تحافظوا عليها
    وستي كانت تقول على كل رزة مكتوب قل هوالله أحد ديروا بالكن لاتكبوها :? تجي ستي وتشوف الرز يلي عم ينكب الله يعفوا عنا :cry
    بالنسبة للطبق كل شي من تحت دياتك غير شكل جربت برمضان آكلات لذيذة كتير وان شاء الله رح اكتبهن بالأطباق المجربة

  12. soma 27 September 2009

    السلام عليكم و كل عام و كل الصبايا بخير و انشالله ينعاد عليكم رمضان و العيد بالخير و المحبة
    الله يسلم اديكي عنجد متل ما بيقولوا العين بتاكل قبل التم و انت مطبقة هالمثل بحذافيره هدا عداك عن الطعمة اللي أكيد بتجنن
    أنا بتوقع بالنسبة للقشطة فيكي تحطي معلقتين طحين و نص كاسة حليب بدل القشطة بتطلع متل البشاميل التقيل (الطحين مشان يمتص كل شي سوائل بالحشوة و ما تعجن العجينة) أنا وقت اعمل فطيرة الجاج و الفطر هيك بعمل و انشلله صحتين و هنا على قلبكم

  13. شيرين 27 September 2009

    السلام عليكم.أولاًًٌُْْ بحب أعايد عالجميع و انشاء الله تبقوا دائما بخير. من وقت ما لاقيت الموقع و أنا طاير عقلي فيه وكل يوم بجرب شي جديد و بيطلع بيجنن.تسلم ايديك عن جد يامنى و الله يجزيكي ألف خير.انبسطت أكتر لأنك من حلب
    و الأكلات كلها بنحبها و قريبة ع قلبنا.لازم اتعرف عليك و أشكرك شخصي.شكرا للجميع

  14. منى 27 September 2009

    هلا نور :)
    و انت بخير و سلام و صحة و تكوني انت و كل عيلتك باحسن حال

    ان شاء الله تجربي الوصفة و تعجبك و تخبريني رايك

  15. منى 27 September 2009

    هلا دكتورتنا الحلوة سوسن :)
    هادا بس من زووءك و الكلام الي بيطلع من القلب بيوصل للقلب , بس القلب الطيب بيفهمه اكتر الشي ;)

    يا رب تجربي الوصفة و تطلع طيبة و متل ما بتحبي

  16. منى 27 September 2009

    هلا هيا :)
    ان شاء الله ينعاد عليك و على كل عيلتك بالخير و الطاعات و البركات

    يلا ان شاء الله تجربيها و تكون يممي و انا رح استنى رايك ;)

  17. منى 27 September 2009

    هلا سمسومة :)
    كمان هي اول مرة اسمع بقصة الزيتون و الرز , يعني من زمان كان عندهم كتير معتقدات فيها خرافة اكتر ما يكون الها صحة , ممكن اول واحد قالها كان قصده لحتى الاولاد يحترموا النعمة و الرز , او لحتى ما يخلص كل الزيتون :grin بس بعدها صارت تنحكى و الكل يعتقد بصحتها

    متل الي بياكل جبنة بينقرع , اي هي اكيد شي اب عايف حاله عندي شي عشرتناعش ولد اخترعها لحتى تكفيهم مونة الجبنة لتاني سنة :grin

    رح استنى ردك بالوصفات المجربة و ريتو الف الف صحة و هنا و عافية يا رب يا لذيذ يا رايق انتا

  18. سارونات 27 September 2009

    السلام عليكم و رحمة الله و بركاته

    يخليلي ياكي منوووش ان شاء الله بلكي بالعشر سنوات القادمة نساوي قمة ثنائية انا و القشطة و نتوصل لحل يرضي الطرفين :grin

    فكرة الجبن مناسبة طيب قديش بدي حط :?

    بالتوفيق

    سلام

  19. منى 27 September 2009

    ايه سارونات , بس انا ما الك مصلحة كون مشاركة بهذا المؤتمر لان انا من انصار القشطة :grin

    يعني حوالي معلقتين او تلاتة و لو تعملي كمان متل ما قالت سوما فكرة حلوة كتير ;)

  20. رنا 28 September 2009

    شو قصتك مع الذكريات عزيزتي …بتعرفي يمكن مو بس انتي كلنا احيانا منعيش لحظات ونحنا سجناء للماضي باي تفاصيل عشناها واثرت فينا ومتل ماقلتي يمكن تكون خرافة بسيطة بس نحنا منفكر فيها لانها انغرست فينا بالصغر ..زمن اول بكل خرافاته احسن من هالدنيا الي عم نعيشها عالاقل كان في بركة …كانوا يحترموا نعمة رب العالمين ومايصير مصيرها سلة المهملات مع جميع القاذورات …يمكن كانوا يخترعوا هالخرافات لحتى يقنعوا تفكير الاولاد البسيط بالشي الي لازم يعملوه وطبعا قصة المحافظة عالنعمة شغلة كتير ايجابية ..انا وحدة من الصغار الي صدقت انه كل رزة عليها قل هو الله احد ومابتذكر يوم خليت بصحة رزة وحدة او اني رميت بقايا صحني بالزبالة لاني كنت كتييير مقتنعة فيها ..بس طبعا مع الكبر عرفت شو القصد منها ..
    انا كأم حاليا عم حاول اني ربي بنتي مو عالخرافات …مابحب قلها شي مو حقيقي ابدا حتى اذا بقصة حكيتلها ياها وبالمستقبل القريب يمكن رح فهمها هالشغلات بطريقة منطقية اكتر من دون لاقرعة شعر لا غيره :grin

    منجي للوصفة العزيزة ..الشاورما لحالها بتطير العقل بقا كيف اذا باطيب عجينة بالعالم ..خلص لازم جربها بس انا مشكلتي عجينتي مربعات صغيرة …ماعم لاقي باف باستري تكون كبيرة :roll يعني بده يشتغل القص واللصق :grin

  21. سارونات 28 September 2009

    السلام عليكم و رحمة الله و بركاته

    جازاك الله خيرا على المساعدة منوووش و كمان فكرة سوما حلوة

    منوووش انا اول مرة بتعامل مع الفطائر لهيك بدي اسألك كيف بتتقدم يعني مع شو او بس لحالها

    بالتوفيق
    سلام

  22. سارونات 28 September 2009

    السلام عليكم و رحمة الله و بركاته

    منوووش راح عذبك معي بدي اذا ممكن طول و عرض الصينية مشان قم بعمليات حسابية 8) لان راح ساوي كمية صغيرة

    بالتوفيق

    سلام

  23. منى 28 September 2009

    هلا سوما :)
    هادا بس من زووءك حبيبتي و ان شاء الله كمان تجربيه و يطلع طعمها احلى من منظرها

    الف شكر الك للاضافة , فكرة حلوة كتير و المهم الواحدة فينا تعرف تعدل بالوصفة لحتى تناسبها و تكون المقادير متوفر عندها

    هلا سوما مرة تانية و يا ريت تجربيها و تخبريني رايك ;)

  24. ام محمد 28 September 2009

    الله يسلم هاالديات يامنمون والله كل شئ من ايدك طيب
    انا ماكتير صحبةمع الدجاج بس الشاورما وقت عملتها على طريقتك كانت غيرشكل وان شاء الله ناوية اجرب هاالطبق واخبرك :zzz
    منمون بدي اتشكرك على فتة المقالي كتيرطيبةالله يعطيكي العافية :)

  25. منى 29 September 2009

    هلا شيرين :)
    شرفتي الموقع و نورتيه , مية اهلا و سهلا فيكي اختي , كتير انبسطت لان اكتشفتي الموقع و ان شاء الله تبقي دوما معنا و ربي يديم المحبة و المعروف على طول

    الي الشرف بهل المعرفة الحلوة و الف صحة و هنا على كل شي جربتيه و كان على زووءك

    نورتينا 8)

  26. منى 29 September 2009

    هلا رنونة :)
    لا قصة و لا شي , هي اشيا دايما بكتبها بدفتري الزهري , هلا صرت عم اكتبها على موقعي الاخضر , هادا الفرق بس ;)
    و انا كمان معك , الجيل هلا مختلف عن الجيل الي قبله و صار صعبة تضحكي عليه بشي اذا ما عندك اثباتات و دلائل , اصلا انا اذا شي مرة جربت تش على اولادي اخت هل التشة بيكشفوني فوراً , برمضان كانت كل ما فرح تصوم حطلها تحت صحنها شوية مصاري و قلها هي من عمو رمضان , الله وكيلك مشيت عليها بس اول يوم , باليوم التاني طلعت عليها و استنيتها لوقت ما طلعت من المطبخ لحتى حطلها المعلوم و الا ما لحقت رجع الصحن و بشوفها صارت تصرخ من وراي , و الله عرفت انك انتي يا ماما الي عم تحطي المصاري مو عمو رمضان , شفت جيب بنطلونك منفوخ :x

    ان شاء الله تجربيها و تكون ممي و مستاهلة التعب الي رح تتعبيه بالتلزيق :grin

  27. رنا 30 September 2009

    ههههههههه والله هالجيل مابقى ينضحك عليه بالمرة ..بدن يعرفوا البيضة مين باضها والجاجة مين جابها :grin

  28. semo 30 September 2009

    مقدمة رائعة والي تعليق طويل بعدين ان شاء الله عالمقدمة

    بس بكرة او بعد بكرة رح اعملها بس بدي اسألك سؤال ببهارات الشاورما في 4 حبة بهارحلو شوقصدك بالبهار الحلو هو نفسو الفلفل الابيض؟؟

    لان كل المكونات عندي الا هالبهار ماعرفتو

  29. منى 5 October 2009

    اي و الله رنونة , ما بينضحك عليه ابدا , الله يكون بعونا و نعرف نتعامل معهم منيح :zzz

  30. منى 5 October 2009

    هلا سمسومة :)
    هو غيرها , و فيكي تشوفي صورة اله على [URL=http://www.l2ma.com/content/view/281]الرابط[/URL]

    ايا سؤال تاني من عيوني و اسفة كتير للتاخير :roll

  31. ام سيمى 8 October 2009

    السلام عليكم ورحمة الله
    الف شكر لك على هذه الوصفة اللذيذة جدا جدا
    لقد جربتها بالامس وكانت النتيجة اكثر من مرضية
    ولكن هل يمكن ان تفيديني بفكرة عن تشكيلة بهارات الشاورما لانني لست في حلب ولا احصل عليها هنا في فرنسا بسهولة
    ولك جزيل الشكر

  32. منى 8 October 2009

    هنا و الف عافية ام سيمى يا حق على كل لقمة , كتير انبسطت انك جربتيها و انها عجبتك :zzz

    ممكن تبلي الدجاج بايا شي بتحبيه , المهم الهال و المستكة و بشر الليمونة و عصيرها و كمان الخل و الزيت . ايا بهارات تانية ممكن تتحكمي فيها على حسب المتوفر عندك ;)

  33. نهى 10 October 2009

    والله يامنى انتى بتدخلى القلب بسهولة..
    انا بحب تعليقاتك وكلامك كتير ودايما باحس انى كان نفسي اتعرف عليكي من قريب او اكون ساكنة جنبك.. يعنى اتعامل معاكى عن قرب ;)
    باحس انك فعلا شخصية متميزة
    ربنا يبارك لك في حبايبك كلهم ويبارك لهم فيكي :)

  34. منى 11 October 2009

    هلا نهولة :)
    هادا بس من زووءك أختي , الي الشرف بهل المعرفة الحلوة من اخت مزوءة متلك

    ربي يبارك في صحتك و عافيتك و بدنك كله و يبارك باهل بيتك واحد واحد :zzz

  35. haya 14 October 2009

    مرحبا عزيزتي منى معلش انا بسأل كثير ويمكن عم ضايقك بس بدي اتأكد من علبة القشطة اللي هي وزنها 170 جم لأنه انا عندي علبة القشطة الكرتون وهي تعادل 125 مل يعني بحط 2 مش هيك انا حبيت بس اتأكد منك لأنو بكرة بدي اعملها
    وفي سؤال ثاني عندي انو اول كنت الوصفة اللي بتزبط معي وبيحبوها عيلتي على طول بعمل لها copy وبعدين Paste وبخزنها على الكمبيوتر عندي بس هلأ ما عم تزبط معي ما بعرف ليش ،،،،، وشكرا الك مرة ثانية على سعة صدرك وانك عم تتحمليني من كثر اسئلتي

  36. منى 14 October 2009

    هلا هيا :)
    القشطة 170 غ بقى ممكن تقدري انت الكمية و ان شاء الله تكون على زووقك .
    هيا هل الخاصية تم منعها في الموقع بسبب السرقات الكتيرة الي صارت , بقى هي لحتى نحفظ الحقوق للموقع ;)

  37. haya 15 October 2009

    هلا منى اليوم جربتها لهالوصفة وطلعت كثير لذيذة تسلم دياتك يارب ويلا عم نستنى منك المزيد ان شاءالله ويارب موقعك من اعلى لأعلى

  38. منى 16 October 2009

    الله يخليك هيا و الف صحة و عافية و هناااا يا قمر ;)

  39. اسماء 2 November 2009

    يعطيك العافية على هالوصفة بس اش هالعجينة لانو انا بكندا ماعنا متلها اش بتنصحيني بدالها اذا مافيها سئلة عليكي وشكرا كتير وانا دائما بستنى جديدك اخت منى :) :) :)

  40. منى 3 November 2009

    هلا اسما :)
    لا حبيبتي اكيد عندكم منها , ممكن تتواجد باسم عجينة الميل في , المهم انها عجينة مورقة ;)

    و ممكن كمان تحضريها بنفس عجينة فطيرة السلق و الطحينة

    انا بانتظار رايك بعد التجربة ان شاء الله

  41. صمت أنثى 19 December 2009

    يسلمووو

  42. منى 21 December 2009

    الله يسلمك يا رب :)

  43. سارونات 24 December 2009

    السلام عليكم و رحمة الله و بركاته

    منوووش يا الله شو مشتاقتلك و مشتاقة للموقع بتعرفي شو بيحس الشخص لما ما يشوف حدا من افراد العيلة لفترة طويلة هيك انا حاسة

    ما جاوبتيني على سؤالي اللي هو اني مو معودة ساوي فطائر فما بعرف هل تعتبر لحالها غذاء او عشاء او بتتقدم مع شي تاني

    على فكرة جربت شاورما الدجاج و الحمد لله ضبطت جازاك الله خيرا منوووش
    بالتوفيق

    سلام

  44. ليان 2009 2 January 2010

    يا سلام يا منى على هالوصفات احتار الواحد شو بدو يعمل عنجد الله يعطيكي العافية وتضلي تحفينا بهلاطباق الرائعة

  45. منى 2 January 2010

    هلا سارونات :)
    الحمد لله على السلامة و تشتاق الك العافية اختي

    هل الفطيرة ممكن تقدميها على الغدا او العشا متل ما بتحبوا , و بتتقدم لحالها او مع سلطة . انا بحسها اكتر الشي مناسبة للبوفيهات ;)

    صحتين و الف هنا على الشاورما , اكيد اكلتي عني

  46. منى 2 January 2010

    هلا ليان :)
    مية السلامة بهل القامة , نورتي الموقع اختي
    ان شاء الله تنقي وصفات و تكون على زووءك و تطلع طيبة و من اول مرة ;)

  47. بتول الحلبية 14 March 2010

    السلام عليكم منى وكل الصبايا كنت عم أحاول أضيف تعليقات من سنة يمكن، وكان في مشكلة.. الله يجبر خاطرك ويعطيك ليرضيك ، شوي حلب كلها إن شاء الله رح تعرف عن منى المبدعةوالفضل لله بإبداعاتك ونفسك الرائع والراديوهات المتنقلة أمثالي اللي بتحكي عنك بكل فرصة ، أكرمك الله وبارك فيك وفي أهلك وأحبابك…

  48. منى 14 March 2010

    هلا بتول :)
    معناها رح اسلمك قسم الدعاية و الاعلان في الموقع ;)

    الله يخليلي ياكي على هل الدعوة الحلوة , بالنسبة الي اغلى دعوة :zzz

  49. هادينة 18 March 2010

    السلام عليكم منى بعد نجاح كل الوصفات اللي جربتها من عندك قررت جرب المعجنات جربت هالوصفة بعجينة فطيرة السلق الحشوة كتير طيبة بس العجينة:cry طلعت معي كتير معجنة وطعمتها خميرة وما نفشت ابدا السبب برايك دايما هيك عبتطلع العجينة ياترى شو السبب برايك :?
    شكرا

  50. منى 18 March 2010

    هلا فيك اختي :)
    مممم , ممكن تكوني ما خمرتي العجينة منيح او الخميرة مو منيحة ؟

    يا ترى هل المشكلة عم تصير دوما معك و الا بس بهل العجينة :roll

  51. هادينة 18 March 2010

    اي دايما عابتطلع المعجنات بالفرن هيك
    الفرن عندي عالكهربا ومروحة بتوزع هوا سخن
    العجائن الجاهزة عم تنجح بس حابة كتير انو تنجح العجينة معي بالبيت لانو بالغربة ما منشوف كل انواع العجينة
    يعطيك الف عافية

  52. منى 18 March 2010

    ممممم طيب اديه عم تكون درجة الحرارة ؟

  53. هادينة 18 March 2010

    بهالوصفة حطيت الفرن عال (180) متل مو مكتوب بالوصفة وصار جربت اكتر من نوع خميرة
    ياترى ممكن لانو الجو بارد التخمير ماعم بينجح :? :? شكرا للسرعة بالرد

  54. منى 18 March 2010

    كتير ممكن , هلا ما دام الجو عندك بارد معناها لازم نريح العجينة على الاخر , بعد ما تعجني العجينة حطيها بوعاء و غطيها بشكل محكم بورق نايلون لاصق و حطيها بقلب شي خزانة او بقلب الفرن و هو مطفي و اتركيها لوقت ما يتضاعف حجمها , انا دوما بحضر العجينة قبل بيوم بالليل و بتركها تتخمر لتاني يوم , شفتي شتانا بارد ;)

    ان شاء الله هل المرة بتزبط معك :)

  55. هادينة 1 April 2010

    السلام عليكم ورحمة الله وبركاته حبيت اتشكرك كتير
    امبارحة جربت الفطيرة ونجحت معي العجينة وطلعت كتير طيبة10/10 ابو الشباب لما شافها قلي ان شاء يكون الطعم متل الشكل بس كان الطعم احلى واحلى
    الله يحفظك ويحميكي يارب :)

  56. منى 1 April 2010

    الف الف صحة و هنا يا رب و الحمد لله انها زبطت معك و عجبت الباشا :) عوافي

  57. um muneer 2 April 2010

    والله لو اشوفك اعطيكي بوسه من عيونك
    عنجد يسلموا ايديكي ونفسي اصر مثلك فنانه بالطبخ :grin

  58. منى 2 April 2010

    هلا ام منير :) , على فكرة اختي اسمها ام منير , نورتينا و شرفتينا و ان شاء الله بتصيري احسن بكتيررر :zzz

  59. karamela 8 June 2010

    السلام عليكم اختي منى
    حابة كتير جرب هالوصفة بس عندي سؤالين
    اول شي انا جبت لهالوصفة عجينة البف باستري ابو اللبن اللي على شكل رولين طوال فهي بيمشي حالها
    وتانيا انا عندي دجاج مقطع قطع اصغر من قطع الشيش فيني استتخدموا ياترى
    وشكرا لاهتمامك باسألتنا

  60. منى 8 June 2010

    هلا كرميلا :)
    هي هي الرقائق الي استعملها, و الدجاج اذا هيك متوفر عندك بيمشي حاله .

    ايا سؤال تاني من عيوني اختي

  61. ام عسل 30 June 2010

    الله يعطيج العافية على هلافكار والنفس الحلوه بالاكل والله جربتها من يومين وكانت روعه

  62. منى 30 June 2010

    هلا فيك ام عسل :)

    صحتين و الف عافية على قلبك على الفطيرة , الحمد لله انها زبطت معك و عجبتك , شرفتينا اختي

    اسمك بيجنن ;)

  63. Baty 1 July 2010

    صراحة ..جربتها مرة وماندمت
    وبجد مو مبالغة كلمة روعة قليلة عليها
    لذيذة جدا جدا والكل حبها
    يعني كنا عاملين سفرة .. بس كانت هي الستار والإقبال عليها كبير
    تسلم ايديكِ يا منى اللي مابتعمل غير اللذائذ ما شاء الله

    .
    .

  64. منى 2 July 2010

    هلا فيك اختي :)
    الف الف صحة و هنا و مية عافية على البك و الب الضيوف و لو تعرفي كلامك شو فرحني :) و كمان انبسطت انها عجبتك و عجبتهم

    منورة اختي 8)

  65. ريم ز 12 November 2010

    الله يعطيك العافية ست منى
    الحقيقة انا اليوم شفت الموقع وكتير فرحت فيه
    دائما الوحدة منا بالغربة بتحن لكل شي بيذكرها ببلدها واهلها
    لا ومو بس من سورية من حلب كمان!!!!!!!!!!
    بدي اسألك مشان القشطة انا عايشة بألمانيا ومكا عم اعرف لاقيها
    بيصير كريم فريش او اي شي تاني او اذا بتعرفي الاسم الاجنبي
    والف شكرا

  66. منى 12 November 2010

    مية هلا فيك ريم نورتي اختي و شرفتي

    القشطة هون فيك تستبدليها بحوالي النص كوب من الكريم فريش , بيعطيها طعم رااائع

    هل الوصفة بتجنن , اختيار موفق لتبدي تجربي من مطبخنا ;)

  67. nourm 27 July 2011

    السلام عليكم ست منى و الله يعطيكي الف عافية عهالوصفات الطيبة
    ياترى فيني حضر هالوصفة قبل بيوم ؟
    جزاكي الله كل خير

  68. منى 28 July 2011

    فيكي , بس الاحسن انك تحضري الحشوة قبل بيوم و تمديها على العجينة بيوم التقديم لحتى ما تشتش العجينة ;)

  69. joudh 19 February 2012

    السلام عليكم ست منى الرائعة .. هي اول مشاركة لي في الموقع بس بصراحة الموقع اكثر من راااائع وصار جربت اكثر من وصفة وللامانة كتيييير طيبين و نالوا الاعجاب الحمدلله… :)
    عندي سؤال من بعد امرك القشطة اللي عم تستعمليها باكثر من وصفة هي نفسها قشطة النستلة اللي منستعملها بالحلويات ؟؟؟؟ :? ومشكورة وانشاءالله بالنجاح الدائم لك و للموقع الغني عن التعريف ..

  70. منى 20 February 2012

    و عليكم السلام و رحمة الله و بركاته , و مية هلا :) نورتي الموقع و مبسوطة كتير باول رد و ان شاء الله تبقي معنا دوما

    انا كنت استعمل القشطة العادية الي هي قشطة نستلة , بس لما اتوفرت الكريما الفريش ما عدت استعملت غيرها , هي اطيب و كميتها حوالي ثلاث ارباع كوب مقابل علبة قشطة .
    بقى انت استعملي المتوفر عندك , اما قشطة عادية او كريم سائل ;)

    كل وصفة الها شي , يا ريت تحدديلي الوصفات لان احيانا ما فيكي تبدلي الكريم فريش بالقشطة

  71. شكلس 3 March 2012

    كمان هالفطيرة كانت الملكة بعزيمتي اليوم و جوزي وانا عم اعملها قلي ياريت لو بيضل شي قطعة لانو شكلا كتير طيب وزاد بس قطعتين من الصحن البايركس الكبير كلو , ممتاااازة الاكلة يسلم ايديكي يارب والله اليوم كان وجهي ابيض من ورا اكلاتك يا منى وكمان عملت سلطة المعكرونة زعتر رول وحبات الفراولة بالشوكولا وكلو نال الاعجاب ولفت الانظار وكلون كانو مفكرين انو شطارة مني بس ما بيعرفو شو مرجعي …. انا كتير مبسوطة اني عرفت هالموقع وعرفتك منى بس من غير لقاء مع هيك الي الشرف :

تقييم الوصفة
عاديةقد أحضرهاجيدةممتازةأكثر من رائعة (No Ratings Yet)