كبة سماقية


         وصفة : منى                 2009/01/19                 19 تعليقات
كبة سماقية

في موسوعة خير الدين الأسدي بيقول أنو في أكتر من 58 نوع كبة بحلب , و الحقيقة أنو في اكتر من هيك بكتير , في انواع كتير مشهورة , في أنواع خاصة بحلب , و في أنواع ما بيحضروها الا اخوتنا المسيحية و خصوصي بايام صيامهن , المهم هلأ أنو كبة سماقية هي واحدة من أطيب و ألذ الأنواع و إلي ما بتتحضر الا بحلب .
.

بينادي البياع في الشارع : أطيب من الكماية يا بانجان و ما بتلاقي الا الستات رفعوا كمامهن و بلشوا تحضير المحاشي و المخلل و كمان الكبة السماقية , يممي

تحضر السماقية من السماق الي يطبخ مع الباذنجان و ممكن تتحضر سماقية الأرضي شوكي بنفس الطريقة تماماً و ممكن المزج بين الباذنجان و الشوكي و كله مع العافية ما في أطيب منه . و كمان في وصفة في حلب اسمها كبة جلغم و هي مو كتير معروفة و الاسم مأخوذ من العراق لان في العراق بيسموا اللفت شلغم و لوقت ما وصلت لعندنا صارت جلغم , هي الكبة تنعمل بنفس طريقة سماقية الباذنجان مع استبدال الباذنجان باللفت . و أكيد كبة حامض شلغم العراقية كتير مختلفة عن كبة جلغم الحلبية . و أخر الشي في غزة الحبيبة وصفة الها نفس الاسم : سماقية و هي تختلف تماماً عن السماقية السورية و إذا الله راد ببقى بنزل وصفة سماقية غزة و وصفة حامض شلغم قريب إذا ربنا عطاني عمر .

مرق السماقية بيتحضر و بيتقدم مع الكبة و ممكن تحضيرها و تقديمها مع المغربية عوض عن الكفتة بالصلصة . و أكيد الحمض في الوصفة ممكن يتعدل حسب الرغبة و الزوء .

بألف صحة و هنا

-المقادير: مقادير السماقية :

كيلو لحم بعظمه
كيلو باذنجان أسود
3 فنجان صغير سماق حب
4 – 5 ملعقة كبيرة دبس بندورة
4 فص كبير توم
نصف ملعقة كبيرة نعناع يابس
ملح حسب الرغبة
8 كوب ماء أو حسب الحاجة

مقادير الكبة :

ربع كيلو برغل أسمر الخاص بالكبة ( من النوع الناعم )
ربع كيلو لحمة هبرة
بصلة صغيرة مقشرة و مقطعة أرباع
ملح , بهار

مقادير حشوة الكبة :

نصف كيلو لحمة مفرومة
جوز مقطع ناعماً
نصف ملعقة صغيرة بهار
رشة قرفة و ملح
سمنة أو زيت
- طريقة التحضير :


تحضير الكبة :

• يطلب من اللحام أن يدق اللحمة حتى تصبح ناعمة مثل المرهم و يجب تكون اللحمة خالية من الدهن تماماً .

• ينقع البرغل بالماء البارد مع الملح مدة 10 إلى 15 دقيقة ثم يصفى جيداً و يطحن على ماكينة فرم اللحمة مع البصلة ثلاث مرات .

• تبلل اليد بالماء البارد ثم يدعك البرغل باليد أو على العجانة الكهربائية قليلاً , تضاف اللحمة الهبرة و تدعك الكبة حتى الحصول على عجينة متماسكة و طرية و دبقة قليلاً .

• تقلى اللحمة في مقلاة تيفال بالقليل من السمنة أو الزيت , تتبل بالملح والبهارات و تقلب حتى يجف مرقها تماماً و تنضج اللحمة ثم ترفع الحشوة عن النار و يضاف الجوز , أصبحت الحشوة جاهزة .

• تبلل اليدان بالماء البارد , تقسم عجينة الكبة إلى كرات أصغر بقليل من حجم حبة الجوز , ثم تعمل حفرة في الكرة و ترق بين أصابع اليد .


• تحشى بالحشوة المجهزة و يسد طرفها ثم تمسح الكبة باليد المبللة بالماء البارد ، تبلل اليدان بالقليل من الماء كل فترة و أخرى أثناء تحضير الكبة للمساعدة على سرعة العمل .


• تصف القطع على صينية مغطاة بكيس نايلون كي لا تلتصق القطع بالصينية و يسهل رفعها .

• يوضع لتران أو ثلاثة من الماء على نار متوسطة و يملح و بعد إن يغلي يوضع فيه بضعة أقراص من الكبة المجهزة و تترك لتسلق مدة 5 دقائق تقريباً , لا تسلق أقراص الكبة لمدة أطول و لا توضع كمية كبيرة من أقراص الكبة في كل مرة كي لا تتفتت الكبة , ترفع الأقراص على مصفاة .


تحضير السماقية :

• ينقع السماق في الماء قليلاً ثم يغلى و بعد أن يبرد يصفى على مصفاة ناعمة , و أنا أكرر مرحلة النقع و الغلي حتى أخذ كل حموضة السماق و هذا هو السماق الذي استعمله عادة لتحضير السماقية , ألذ و أفضل من السماق المطحون .




• يغمر اللحم بعظمه بالماء و بعد أن يغلي ترفع الزفرة , يضف ماء حمض السماق و دبس البندورة و بعد أن يغلي مجدداً تغطى الطنجرة و تهدى النار و تترك حتى ينضج اللحم .

• في هذه الأثناء يغسل الباذنجان و لا يقشر , يقطع لمكعبات كبيرة نوعاً ما .

• بعد أن يقارب اللحم على النضج يضاف الثوم و النعناع و الملح و الباذنجان و تترك على نار متوسطة حتى يكمل الباذنجان نضجه و لا يحتاج لأكثر من عشر دقائق كي يبقى محافظاً على شكله , تضاف أقراص الكبة في أخر بضعة دقائق لتأخذ من نكهة الحمض , يممي .

• تقدم الكبة السماقية فوراً مع الفجل المقطع و الرشاد .

التعليقات

  1. ام كريم 19 January 2009

    مرحبا شو شكلو مافي تعليقات لسا بس شكلا بشهي وبسمع فيا بس ولا مرة اكلتا عكل حال بتتجرب لان جوزي من انصار البيتنجان بس اكيد بعد ماخلص رجيم مشان اقدر دوق :grinلك اي في بعد الاكل الحلبي ياجماعة عنجد شي بشهي :zzz

  2. أم علي 19 January 2009

    ماشاء الله عليك ست منى :) بالفعل انت شيف على اصولو :zzz ماشاء الله بكل الاكلات شاطرة نيال عيلتك فيك :grin شهيتيني على الكبة باشكالا لاني انا من محبي الكبب كلهم بتعرفي اهل حلب اهل المحاشي والكبب :roll وتسلم ايدك ايا اشطر شيف 8)

  3. منى 20 January 2009

    هلا ام كريم :)
    صح لان الوصفة لسا سخنة كتيرما حدا قرب بعد :grin
    خلصي ريجيم و جربيها و إذا كنت انت من أنصار الحمض رح تحبيها كتير ;)

  4. منى 20 January 2009

    هلا ام علي :)
    الله يخليلي ياكي على الكلام الحلو و الزووء
    اتفضلي أختي و كل الطبق لحسابك , الله يسلمك و يحفظك و يخليك ;)

  5. سلاف 20 January 2009

    هدا الطبق اله فضل كبير علي000
    بزماناته عملت بحث بجوجل بدي دور على كبه سماقيه00 فتحلي خيارات وكان اولها موقع لك
    فتحت الصفحه ولا الشيف منى محضرتها وشفت تحت الموضوع رابط موقع لقمه طيبه :)
    ومن يومها وانا مداومه هون انتظر كل جديد وقديم من حبيبة قلبي منى
    يسلم ايديكي منى حكيت قصة حياتي بس انا جربتها عطريقتك من موقع لك والله طلعت شيئ بجنن00 اكيد عم تقولي لحالك هي وين مارحت بلاقيها بكل صفحاتي
    :roll
    فاضيه ماعندي شيئ
    شكرا مره تانيه 8)

  6. ام رغد 20 January 2009

    يسلم هالايدين يا رب

    ويعطيكي الف الف عافية

    بصراحة من زمان عم بستنى طريقتك للسماقية

    وهيا نزلت ومتل الطريقة اللي عطتني اياها صاحبنتي الحلبية يسلم ايديكي وايديها

    وبحب اشكرك على الابداع وانا دايما بنتظر جديدك

    :x :grin

  7. غيث 20 January 2009

    واخيرا شفت وصفت السماقية من تحت دياتك يا فنانة طريقتك متل طريقة ماماتي الله يعطيك الف عافية ويالله ما اطيبها هالاكلة لك والله حمض فمي من شوفة الصورة بس بقى كيف الطعمة الله يسلم هالايدين يا حق

  8. muna.g.7 20 January 2009

    اختي منى حرام عليكي كبه وباذنجان في وقت واحد لا وكمان سماق كل واحد فيهم قصه لحالهاطيب واحده كسلانه مثلي ايش تعمل اتفرج ويسيل ريقي واروح اعمل شوربة عدس على طريقتك اسهل

  9. منى 21 January 2009

    هلا سلاف :)
    هلا صرت حب السماقية اكتر :grin , بالعكس سلاف انا كتير بحب اعرف من وين كل واحدة من الاخوات اتعرفت على الموقع و انت عطيتيني الاجابة بالتفصيل ;)

    يا ستي مية السلامة بكل صفحة و بكل وصفة , نورتي

  10. منى 21 January 2009

    هلا ام رغد :)
    الله يسلم ايديك و يعافي قلبك و بدنك أختي
    الشكر الك أختي لردك و تشجيعك ;)

  11. ام نور 25 January 2009

    غير شكل هالاكلة ولا اطيب الصراحة اكلتا مرة عند اخت حلبية وكتير حبيتا وهلىء صار فيني جربا بعد ما نزلتي الطريقة سلم دياتك يا عسل بس عندي سؤال فيني استبدل السماق الحب بالسماق المطحون :?

  12. منى 26 January 2009

    هلا ام نور :)
    فيك بس الصراحة هيك أطيب بتطلع , بس اذا مو متوفر عندك ممكن تحضري السمائية فيه :)

    ان شاء الله تجربيها و تعجبك و لا تنسي تخبريني يا قمر

  13. ام نور 26 January 2009

    كتير منيح انشالله رح جربا لا اهلي بلبنان وفرجيون شطارة بنتون سجلت كتير وصفات وانشالله رح تعجبون و يدعولك اكيد المهم اسمحيلي منى ودعك وودع الاخوات وانشالله الى اللقاء بعد شهر وبتنمنى للجميع الاستمتاع بالمينو التركي ودوام الصحة والعافية :) والسلام عليكم

  14. منى 27 January 2009

    و عليك افضل السلام و اتم التسليم :)
    ان شاء الله تكون روحتك للبنان ميسرة و موفقة , و بوسيلي ماماتك ..

    رح اشتقلك ام نور , ان شاء الله بتنبسطي بشوفة حبابك كلهم :zzz

  15. أم ساطور 1 February 2009

    يمممممممممممممممممممممممممممممممممممممممم كبة بسماقية شط رويلي :p من زمان وانا حابة اعملها شوهاد يام الذوق والفن تسلم ايدك :zzz

  16. منى 1 February 2009

    هلا ام ساطور :)
    هي الصحن كله ادامك , كلي و الاكل على أد المحبة ;)
    الله يسلمك و ان شاء الله تجربيها و تكون على زووءك

  17. ام عدنان 2 February 2009

    الله يمسيك بالخير
    واخيرا قدرت اشترك بالموقع :)
    يسلمو دياتك عالاكلات كتير طيبين
    وانامن سنة متابعة وجربت كتيييييييير اكلات 8)
    انا ممنوعة من اللحم الاحمر نهائيا
    فيني سويها بالدجاج :?

  18. ام عدنان 2 February 2009

    الله يمسيك بالخير
    انا من سنة متابعة وعمبحاول اشترك والحمد لله اخيرا اشتركت وراح اقدر اتواصل معك وعلى فكرة جربت كتييييييير اكلات طيبة يم يمي
    بس هلا عندي سؤال هلأ انا ممنوعة من اكل اللحم الاحمر نهائيا فيني اعملها بالدجاج
    والله يجزيك كل خير

  19. منى 2 February 2009

    هلا ام عدنان :)
    نور الموقع بطلتك أختي و مية اهلا و سهلا فيك أخت جديدة كريمة و غالية :)

    هل الوصفة الصراحة ما اتخيل طعمتها بالدجاج :roll ما أظن أن ممكن تتحضر بالدجاج عوض اللحمة

تقييم الوصفة
عاديةقد أحضرهاجيدةممتازةأكثر من رائعة (4 votes, average: 5.00 out of 5)