كب كيك الموز و الزبادي


         وصفة : منى                 2008/11/06                 42 تعليقات
كب كيك الموز و الزبادي

·          يحمى الفرن على حرارة 180 درجة مئوية , تدهن صينية المافن بالزبدة أو تغطى بأوراق البليسيه , يجب أن يكون الموز و اللبن و الحليب و البيض و بقية المواد المستخدمة بحرارة الغرفة .

·          يخفق البيض و الفانيليا و السكر و الزيت و اللبن  و الحليب في خفاقة العصير حتى الحصول على مزيج متجانس .

·          ينخل الطحين و البيكنغ بودر على زبدية متوسطة , يضاف مزيج البيض و الموز المهروس و يقلب الكل بمضرب سلك حتى يتجانس المزيج .

·          يوزع المزيج على القوالب ثم تخبز الصينية في الفرن المحمى حتى تنضج  لمدة 30 – 35 دقيقة ثم ترفع و تترك حتى تبرد و يمكن أن تقدم دافئة أو باردة .

أفكار و تنويعات :

·          مكن استعمال لبن المنكهة بالفواكة المختلفة أو إضافة القليل من العسل لإضفاء نكهة مختلفة .

·          يمكن إضافة القليل من رقائق الشوكولا أو الزبيب للوصفة .
 




كوب و ثلاث أرباع طحين حلويات
ملعقة صغيرة و نصف بيكنغ بودر
ثلاث أرباع أو كوب سكر
نصف كوب زيت
نصف كوب حليب
نصف كوب لبن زبادي
كوب موز مهروس ( تقريباً 2 حبة موز كبيرة ناضجة جداً )
بيضة
فانيليا





• يحمى الفرن على حرارة 180 درجة مئوية , تدهن صينية المافن بالزبدة أو تغطى بأوراق البليسيه , يجب أن يكون الموز و اللبن و الحليب و البيض و بقية المواد المستخدمة بحرارة الغرفة .

• يخفق البيض و الفانيليا و السكر و الزيت و اللبن و الحليب في خفاقة العصير حتى الحصول على مزيج متجانس .

• ينخل الطحين و البيكنغ بودر على زبدية متوسطة , يضاف مزيج البيض و الموز المهروس و يقلب الكل بمضرب سلك حتى يتجانس المزيج .

• يوزع المزيج على القوالب ثم تخبز الصينية في الفرن المحمى حتى تنضج لمدة 30 – 35 دقيقة ثم ترفع و تترك حتى تبرد و يمكن أن تقدم دافئة أو باردة .

أفكار و تنويعات :

• مكن استعمال لبن المنكهة بالفواكة المختلفة أو إضافة القليل من العسل لإضفاء نكهة مختلفة .

• يمكن إضافة القليل من رقائق الشوكولا أو الزبيب للوصفة .
  • وصفات تانية ممكن تعجبك


التعليقات

  1. سلاف 6 November 2008

    بشكرك كتير أختي منى على هالموقع الأكثر من رائع ماشاء الله عليكي أنا كنت عطول بتابع طبخاتك بمنتدى لك ولما عرفت عندك موقع حبيت ضم حالي الكن 00 كان عندي سؤال بالنسبه للموقع هاي تاني مره بينهكر شلون وضع الحمايه عندك الموقع مو محمي منيح؟انا صرلي اكتر من 15 يوم قبل ماينهكر سجلت وحاول ضيف رد مايمشي الحال بس بركي اليوم بيمشي الحال ،،، جربت اكتر من 5 وصفات الك وكلهن رائعين الله يسلم ايديكي يارب

  2. سمسمة 6 November 2008

    ان شاء بيعيشوا ايديكي منى وألف مبروك لأخوكي والله الأيام الماضية كنت حاسة فيكي وعارفة أديش مشغول بالك عالموقع وموطالع بأيدنا نساوي شي رح أسألك اذا بنقدر نحط نظام حماية من الهكر

  3. نهى 6 November 2008

    ألف مبروك عودة الموقع..
    كتير قلقت عليكم المرة دى لان الغيبة طولت كتير..
    ربنا يعينكم وكل فريق العمل.. والله يجازى اللى كان السبب

  4. نهى 6 November 2008

    نسيت ابارك لك الوصفة ال500 ويارب دايما فى زيادة :)
    وكمان مبروك لاخوكى كتير

  5. منى 6 November 2008

    مية هلا سلاف :) نور الموقع باخت غالية و كريمة والف شكر ليك على الرد , اسفة للمشاكل بالرد و كتير منيح انها انحلت , كان ممكن تراسليني او تراسلي المهندس المختص لنساعدك لحل المشكلة ;)
    ان شاء الله الموقع هلا اتحصن منيح :roll

    هنا و عوافي على الوصفات الي جربتيهن يا ترى شو جربتي ؟ :zzz

  6. fofo2 6 November 2008

    يسلموا ايديكي على هالوصفات أنا كتير بحب وصفاتك وجربت كتير منهاوكلها زبطت بالذات الشاورما طلعت بتجنن وبدي جرب الكب كيك ان شاء الله لأن أولاد اختي كتير بحبوه(و أنا كمان)

  7. ام دانية 6 November 2008

    :zzz الحمدلله على رجوع الموقع لانو تعودنا عليه وتسلم ايدك على الاكلة بتمنى من الله تكون اخبارك كلا تمام والله لا يوفق الي عم يخرب الموقع :( صحيح كيف الخطبة كانت ان شاء الله كلو تمام وانبسطتو؟

  8. سمسمة 6 November 2008

    من فرحتي برجوع الموقع نسيت أسألك حبيبة ألبي منى بالنسبة للكب كيك بعد مايطلع من الفرن بحاول طلعه من قالب الورق مابيطلع معي وبيتفتت ياترى شوالسبب
    وفي سؤال تاني شو رأيك بقناة فتافيت واذا جربت منهاشي وطلع ظريف ياريت تنزلي بالموقع تحت أسم آكلات غربية

  9. Iman 6 November 2008

    مبروك يا منى الرجعه و مبروك على الوصفه رقم 500 و مبروك لاخوكي الله يتمم على خير. كتير قلقت عليكون كل ما ادخل للموقع و تطلعلي المسج. على العموم الحمدلله على السلامه و فعلا الكون وحشه. يعني كتير مهم وجودكم لكل المحبين لهالموقع. :)

  10. تورتاية بالكريز 6 November 2008

    يامرحبا بغالية الغاليات والحبيببة لقلبي
    الف مليون حمد لله على السلامة ياملكة الكب كيك وكل انواع الكيك والاطايب الحلوة
    بجد وحشتيني كتير كتير وانا لم انس الموقع تقريبا كل يوم كنت بدخل اشوفه
    والف مليون مبروك تمام الخطبة وعقبال الزفاف الله يهنيهم ويسعدهم ويجمعهم على طاعة الله يارب العالمين
    طبعا بعد الغيبة كان نفسي ادخل الموقع ومعاي وصفة مصورة هدية وترحيب بعودة موقعنا الغالي بس للاسف ماعندي صور جديدة ان شاء الله رب العالمين للموقع عندي وصفة متواضعة ترحيبا بعودة الغالية منى الله يتملك مشروع الكتاب على خير يارب ويحقق النجاح والفائدة واناطبعا بحجز نسختي من الان
    حياك الله اختي الغالية واعطاك الصحة والعافية ورزقك الخير كله والمسلمين جميعا انه سميع مجيب الدعاء
    ويسلموا ايدكي على وصفة الكب كيك بالموز المشهية واللذيذة

  11. سلاف 7 November 2008

    صباح الورد للجميع 00 أنا جربت الكبه المبرومه وطلعت معي بتجنن وجربت السفرجليه باللحمه الكباب لاني عادة بطبخها بتوم ونعناع كمان طلعت بتجنن وكمان الموساكا ،، شوربة العدس بحامض اللبنانيه ،، بنبون الزنجبيل وكلهم طلعو طيبين يسلمو ايديكي يامنى وطبعا رح جرب باقي الاكلات على طريقتك ،، هلأ أنا جربت الأكلات اللي ولا مره ساويتها وبما انه زوجي من نص حلب وحماتي حلبيه أغلب الاكلات بعملها بطريقه مشابهه أو نفسهاتقريباطريقتك بس انتي والله نفسك ماشاء الله نفسك غير

    بعرف حالي حكيت كتير بس انا كان عندي اقتراح من بعد اذنك يعني اللي بده يسألك سؤال أو مثلا عنده طبخه من اختراعه أو كلمة بده يقولها ليش مابكون فيه منتدى واحد بس بالموقع اسمه رابطة صديقات لقمه طيبه :? ؟؟ مو منشان شيئ بس منشان مانخرب جمالية موضوعك بأسئلتنا وكلامنا الخارج عن موضوع الوصفه :)
    وبالنسبه للكب كيك رح جربه ان شاء الله بكره وقلك النتيجه مع اني متاكده مسبقا انه رح يكون طيب كتير

    لا تواخذيني منى لعييت كتير :zzz

  12. منى 7 November 2008

    هلا سمسمة :)
    الله يسلمك و يخليك اختي , كلك زووء يا عسل , ان شاء الله هلا في نظام حماية ..

    الكب كيك ما لازم يطلع من الورق و اكيد رح يتفتت و ينخرب منظره اذا حاولتي طالعيه , اذا بتحبي ممكن ما تستخدمي الورق , ادهني القوالب المعدن منيح بالزبدة و بس;)

    انا بحب قناة فتافيت كتير بس ما دايما بقدر تابعها لان ماالي هوية بالتلفزيون , بحب اكتر الشي ناجيلا و ريك ستاين و من الشيفات العرب بحب حورية , بس مومتابعة دايما و لا جربت اي وصفة , بس باخد منها افكار ;) و اذا جربت منها اي شي ببقى بخبركن بالوصفة

  13. منى 7 November 2008

    هلا نهى :)
    الله يبارك بعمرك و ببدنك و صحتك يا حق , الله يجز الي كان السبب الجزاء الي بيستحقه و يشوفه من بين عيونه :(

  14. samar2005 7 November 2008

    مرحبا منى
    الف مبروك على الرقم 500 وعقبال الالاف
    والف مبروك خطبة اخوكي ويا رب يتهنوا
    الوصفة حلوة كثير وخصوصي للاولاد يسلموا ايديكي

  15. منى 7 November 2008

    مية هلا فوفو :)
    هنا على قلبك على كل شي جربتيه و كتير انبسطت ان الشاورما عجبتك , بركي يقية الاخوات بيتشجعوا لان هي من الوصفات المميزة كتير عندي ;)
    هنا على قلبك و قلب اولاد اختك مقدما يلا خبريني شو بيصير معك و لا تنسي تحسبي حسابي :zzz

  16. منى 7 November 2008

    مية هلا ام دانية :)
    الحمد لله الخطبة منيحة , بس صار معنا فصل هندي بحجز الصالة , بس بعدها الحمد لله مشي الحال و تمت على خير و ان شاء الله عقبال تمام الفرحة و عقبال احبابك و كل الغاليين ;)

  17. منى 7 November 2008

    مية هلا أمونة :)
    الله يسلمك و يبارك بعمرك و باولادك الحلويين , الحمد لله ان الي طلعلك بس المسج لان الي خربوا الموقع الله لا يوفقهم حطوا فيه شغلات ما بتنحكي و لا بتنشاف , حسبي الله و نعم الوكيل :(

  18. منى 7 November 2008

    حبية ألبي ام ياسمين عسل مصر كلها نورتي يا احلى قمر :)
    الله يبارك فيك و بقلبك و بعمرك ,دعواتك غالية كتير كتير , ما بقى اعرف كيف ممكن رد على تعليقك , ان شاء الله الك متل هل الدعوات و أحلى و اكتر يا رب الك و لكل الغاليين على قلبك
    شوفتك و ردك الحلو عندي احلى هدية , بس اكميد ببقى طمعانة بوصفاتك المصرية الغيررر شكل
    ان شاء الله تجربي هل الكب كيك و يعجبك
    مية هلا ام ياسمين

  19. رنا 8 November 2008

    اول شي الحمد لله على سلامة الموقع والله يجازيهن يلي عملوا هالعملة …لا وشو هالقرف يلي حطوه بداله شي بيشيب شعر الراس …قال دخلت ششوف اذا مشي حال الموقع ومالاقي غير فتحتلي هديك الصفحة قلت ياربي شو هاد والله انا بعمري مادخلت على هيك شي وطلع بالاخير اولاد ….شو الواحد بده يحكي هنن يلي حاطينها ليسيؤا لسمعة صاحبته بس على كل حال انتي لاتزعلي وهنن عملوا بأصلهن لانه الاناء بمافيه ينضح
    المهم بالنسبة للكب كيك طلع كتيررر طيب ولذيذ وطار بدقيقة وصورته بس ياستي الصور علقو بالموبايل لانه الوصلة منزوعة …رح نزلهن باقرب وقت بس عندي كم سؤال
    انا الخليط يلي عملته طلع كتير بالنسبة للقالب اللي عندي لانه كتير صغير القالب
    قام اضطريت اني استنى كل صينية لتطلع من الفرن واستوو معي تقريبا بربع ساعة ياترى يلي عملته بيأثر ؟؟انا شفت انه اول وجبة كتيييير نفشت بس الباقي نفشوا عادي بس قلت يمكن لانه عبيتهن بالورق بعدين بالقالب يعني نقصت الكمية عن اول مرة ..
    وتاني شي ممكن استغني عن الموز ؟؟وكمان بدي اسأل الشوكولا يلي احطها دايبة ولا قطع ؟؟
    طووولت عليكي بس سامحيني ناوية ارجع اعمله بكرا بس بالشوكولا

  20. منى 9 November 2008

    هلا سلاف :) صباح الورد و الف و الياسمين
    هنا على قلبك و قلب كل العيلة على كل وصفة جربتيها , كتير انبست ان الوصفات عجبتك ;)

    كان في فكرة ان نعمل منتدى بالموقع , ان شاء الله بيصير خير . الله يسامحك شو واخذك و ما واخذك , الرد الطويل دليل على الاهتمام :zzz
    ان شاء الله تجربي هل الكب كيك و يعجبك و لا تنسي تخبريني

  21. منى 9 November 2008

    هلا رنونة :)
    الله يجازيهن بالدنيا و الاخرة , حسبي الله و نعم الوكيل , احسن الشي :roll

    يلا عم استنى الصور و الي عملتيه ممكن يأثر شوي بس مو لدرجة ان ما ينتفخوا , و بياخدوا معك بالفرن حسب فرنك
    كل واحدة فينا بتفهم على فرنها ,
    الموز اساسي في الوصفة , في غير وصفات في الموقع من دون موز و الشوكولا قطع صغيرة ..

    لبا طولت و لا شي على عيني و راسي رنونة ;)

  22. muna.g.7 9 November 2008

    ولا يهمك اختي منى القافلةتسير واحنا كلنا قلوبنا معاكي وندعيلك والف الف مبروك على كل الماسبات الحلوة وانشاء الله ابارك لك قريب جدا على الطبخة الالف انا اموت في كل انواع الكيك واكيد لما يجتمع الموز بالزبادي قصة ثانية

  23. منى 9 November 2008

    هلا منونة :)
    و الله اشتقت لحيكاتك كتير كتير , الله يبارك بعمرك و بقلبك و ببدنك
    اكيد اذا جربتيها عم استنى رايك ;)

  24. بدور 9 November 2008

    الله لا يحرمنا من موقعك الحلو والمميز كتير كتير منى الحلوة..
    ألف مبروك رجوع الموقع بالسلامة والله يجازي يلي كان السبب يا رب!
    و ألف مبروك الوصفة ال 500 بالموقع و عقبال ما اتعلمهم كلون و يصيروا 1000 و 2000 كمان :)
    و ألف مبروك خطبة اخوكي والله يتمملون بالخير يا رب ويحميهون و تشوفوا على قدوما كل الخير ;)

    والله يسلملنا ايديكي الحلوين يلي بيلتفوا بالحرير والله..

    هالأكلة من زمان مشتهية اتعلمها ونشالله رح تكون على دياتك متل كتير اكلات غيرها.

    الله يخليلنا ياكي و يباركلك يا رب

  25. سلاف 10 November 2008

    امبارح جربت الكب كيك وشو بدي قلك يامنى ما بعرف ؟؟ :zzz
    عنجد صدقو اللي سموكي ملكة الكب كيك والله انتي ملكة الشيفات يسلمو هالايدين يارب طلع بجنن متل اللي بالصوره والطعم ولا اروع من هيك المهم امبارح كانت عندي رفيقتي وراحو 12 قطعه واليوم ولادي الاتنين من لما فاقو قالولي ماما بدنا كيك 00 فقررت اعمله مره تانيه

    الله يجزيكي كل الخير منى 000 :)

  26. منى 10 November 2008

    هلا سلاف :)
    هنا و ريتو الف عافية و صحة على قلبك و قلب القطط الحلوة و على قلب ضيوفك ;) خجلتيني يا قمر بهل الكلام الحلو
    متل حكايتي انا هلأ متعطلة عندي محضرة الطعام لهيك عم دور على وصفات ما بدها خفق و هل الكب كيك ما عم لحق منه , هنا و عوافي :zzz

  27. منى 10 November 2008

    هلا بدورة :)
    الله يجازيه الجزاء الي بيستحقه..
    الله يخليك على الدعوات الغالية , ربي يباركلهن و يبارك فيهن هل العرسان الحلويين ;)
    جربيها و شوفي شو سهلة و لا تنسي تخبيلي قطعة

  28. رنا 11 November 2008

    [img]http://file11.9q9q.net/local/thumbnail/46752472/600×600.jpg[/img]

    هي الصورة متل ماوعدتك

  29. منى 11 November 2008

    مممم بتشهي كتير :)
    الف صحة و هنا و عافية رنونة و الف شكر ليك على الصورة ;)

  30. الدمشقية 19 November 2008

    حبيبتي منى إن شاء الله ألف مبروك بخطبة أخوكي وربي يتمم فرحتكم على خير يارب :grin
    وألف مبروك على عدد الوصفات وإن شاء الله من تقدم لتقدم أكتر يا رب ;)
    حبيبتي إن شاء الله بدي جرب الكب كيك بكره (طبعاً لأنه أخواتي وولادهن بيكونو عنا بالبيت) :zzz
    وتصوري يعني من كتر الأكلات يلي عم طبقها من هالموقع (ربي يسلم ايديكي عليها :zzz ) اشتريت من يومين بتيفور من السوق (يعني شهوة :x ) والله طعمهن مو زيادة فقالتلي ماما والله يلي عم تعمليه بايدك اطيب بكتير طبعاً والفضل الك حبيبتي :)
    وطبعاً أنا بقلك مين عم يخرب هالموقع وهو واحد من اثنين إما واحد عم يجرب بهالأكل الطيب فعم يزيد وزنه ولهيك خربه :cry أو واحد مرته ما عم تعرف تعمله أكل طيب من هالأكلات :(
    حبيبة قلبي ولا يهمك وربك أكبر من الجميع ومنقول ربي يهدي هالشباب ويبعدهن عن الحرام يا رب 8)

  31. سارونات 24 November 2008

    السلام عليكم و رحمة الله و بركاته
    يا اختي الدمشقية دمك خفيف و عسل :grinضحكتيني
    و انا زعلانة شوي لان ساويت الوصفة اليوم و ما ضبطت معي
    اختي منى انا معودة ساوي كاب كيك من قبل و عندي الهن 3 وصفات الحمد لله ضبطو من اول تجربة اثنين بالفانيلا و واحد شوكولا ان شاء الله ببقى ابعث الوصفات بالمستقبل و ان شاء الله تجربوهم و يضبطو معكم
    هلأ بدي قلك اللي صار معي تحتى نعرف شو المشكلة انا اتبعت الخطوات بالضبط و المقادير كمان و الفرن و كل شي و الكاب كيك نفش و شكله حلو و ريحته بتجنن لكان شو المشكلة يا ترى :? ) عم استظرف دمي :grin )) المشكلة هيانو ظل ابيض يعني ما نضج و خليتو ل 35 دقيقة و لانو ما احمر قمت شغلتو شوي من فوق تحتى يحمر فاخد وقت بس احمر شوي اما لما طالعتو لقيتو عجين من جوا يعني ما نضج ما عرفت شو السبب
    يا ترى شو السبب :? :cry :cry لان عبالي عيد جربو مرة تانية
    بالتوفيق
    سلام

  32. منى 25 November 2008

    هلا دمشقية :)
    الله يبارك بعمرك و ببدنك و دينك يا حق .
    شو ضحكت على هل الابن الحلال الي عم يخرب الموقع :grin , الله يهديهم و يلهيهم بشي يفيدوا منه و يستفيدوا

    هنا و عافية على كل وصفة جربتيها من الموقع و عجبتك , و بوسات كتيرة لاولاد اختك و تبقى لا تنسي تخبريني شو صار باختك , بالي عندها :roll

  33. منى 25 November 2008

    هلا سارونات :)
    ما عرفت تمام سبب المشكلة الي صارت معك , كيف اتحمروا من برة و قلبهم لسا سائل , ممكن تكون درجة الفرن عالية , او انك خبزتي الكب كيك على الرف السفلي في الفرن ؟ اذا لا هيك و لا هيك خليه المرة التانية اكتر لان الوقت بيختلف من فرن لفرن , و كتير احيان بيكونوا زاكرين ان الوصفة بتاخد 20 دقيقة انا بتاخد معي 40 , اكيد بتفهمي على فرنك ما دام زبطت الكب كيك معك من قبل

  34. سارونات 25 November 2008

    السلام عليكم و رحمة الله و بركاته
    جازاك الله خيرا اختي منى
    انا خبزتهم في الرف الاوسط و درجة الحرارة 180
    وبالتالي بيظل احتمال واحد هو انه يمكن كان بدهن وقت اطول بالفرن
    ان شاء الله بالمرة الجاية بخليهم تحتى يحمرو
    اختي منى سمعت عن شي اسمه صوص التمر بيمحط على الكاتو بتعرفيه شي لان دورت عليه و ما لقيت اي معلومة عنه و عبالي ساوي كاتو التفاح و بتعرفي لهلأ ما ضبطت معي التوفي فهل في شي صوص بديل بعرف يمكن بتصير بلا صوص بس اشتهيت ساويها بصوص لان بيطلع شكلها و طعمتها مختلفين بالمختصر الصوص بيعطيه برستيج للكاتو :grin
    بالتوفيق
    سلام

  35. الدمشقية 27 November 2008

    ياستي جربته وطلع شي بياخد العقل :zzz جربته يوم الجمعة الماضي واليوم إن شاء الله بدي ارجع وساويه مرة تانية :grin واكلت منه خالتي (ورغم إنها ما بتحب الكاتوهات يلي بتنعمل بالبيت يعني بالعادة بتساويه بايدها بس ما بتاكل منه) طار عقلها فيه وقالتي طيب كتير وابنها قالي الله يخليكي عازم رفقاتي ساويلي يوم يلي بيجو منه لأنه طعمه كتير طيب :grin بس بدي اعرف غير الموز شو ممكن حط لأنه في منهن ما بيحبو الموز :upset

  36. منى 2 December 2008

    هلا دمشقية :)
    ألف ألف هنا و عافية على قلبك و قلب كل ضيوفك حبيبتي و خصوصا خالتك ;)
    هلا انا مرة كان عندي بس موزة واحدة لهيك كملت باقي الكوب بتقاح مبشور و طلع طيب :zzz

  37. فله 9 January 2009

    السلام عليكم ورحمةالله وبركاته تسلم ايديكي حبيبتي على الكب كيك الروووووووعه الله يعطيك العافيه ويبارك في عمرك بدي من بعد اذنك تعملي كيكة الزبيب او ( الانجلش كيك ) ومشكورة حبيبتي

  38. منى 10 January 2009

    هلا فلة :)

    مية اهلا و سهلا فيك بالموقع , نورتي اختي و تكرم عيونك على الوصفة الي طلبتيها ;)

  39. marmour 6 November 2011

    مرحبا يامنى انا جربت كل انواع الكيك حتى الاسفنجي وكلها تقريبا نجحت بس الكب كيك مابعرف شو قصتو جربت مثلا هادا تلات مرات طعمتو طيبة بس معجن شوي مع اني ملتزمة بكل شي :cry

  40. منى 6 November 2011

    لازملو وت اكتر بالفرن لان بصورة عامة كيكات الفواكهة بتاخد وقت اطول ;)

  41. marmour 7 November 2011

    بس هو عم يبلش يحترق عم طفي عليه وبيطلع لسه معجن شوي والحرارة عندي 180 شو رايك

  42. أم عمارة 20 January 2016

    يسلموا ايديك ببداية الكلام ونهايته
    بس بالنص في عندي كم سؤال
    أول شي بينفع خلطة الكب كيك أحطها بقالب الكاتو أو بصينية بايركس وبعدين أنا أقطعه ؟
    والسؤال التاني أنا اليوم جربته بس كمان طلع معجن
    زودت الوقت عشر دقائق وكمان ما زبط ؛ بقي معجن

تقييم الوصفة
عاديةقد أحضرهاجيدةممتازةأكثر من رائعة (No Ratings Yet)