كتشاب بدقيقة واحدة


         وصفة : منى                 2013/12/26                 15 تعليقات
كتشاب بدقيقة واحدة

واحد من أصدقائي الي ما الهن علاقة بالمطبخ لا من قريب و لا من بعيد , طلب مني وصفة الكتشاب , و لان انا بعرف شو عندي عطيتوا هل الوصفة , سهلة و سريعة و شغلتها كتير سهلة و بتشجع الي مو صحاب مع الطبخ انو يرجعوا و يفوتوا على المطبخ مرة تانية .

تقريباً الوصفة اسهل من السهولة نفسها , منخلط كل المقادير بالليل , منخلي النكهات تتتمازج طول الليل , اي و بس . في اليوم التاني منستعمل الكتشاب متل مو حابين , كتشاب طعمته طيبة , مو حلوة كتير , مو مليان مواد حافظة و اشيا ما منعرف نقراها , و كمان متوفر دوما و بسعر رخيص .

مرات معجون الطماطم بيجي مالح زيادة , لهيك الملح بالوصفة ما منضيفوا الا اذا دعت الحاجة و بعد ما ندوق , و إذا شفتي انو قوام الكتشاب سميك , فيك تزيدي نتفة مي .

أنا بحب الفلفل الأسود كتير , و مرة رحت على مطعم كان مقدم الكتشاب مع الفلفل , صرت دوما بحضره هيك , بحط طبق للعيلة , و طبق بخاط معه شوية زيت زيتون و بطحن على الوج فلفل اسود فريش , للي بيحبوا الفلفل الأسود , رح يصير هل الصوص مفضل عندهن

بالصحة و الهنا

شو لازمنا ؟
170 غ معجون طماطم
ثلث كوب سكر
ثلث كوب ماء
2 ملعقة كبيرة خل
ملعقة صغيرة دبس سائل , دبس تمر أو دبس عنب
نصف ملعقة صغيرة فليفلة حمراء ناعمة
رشة ملعقة صغيرة قرفة
رشة قرنفل مطحون
رشة فلفل أسود
نقطة أو نقطتان خردل
ربع ملعقة صغيرة ملح ( حسب الحاجة )
طريقة التحضير

تخلط كل المقادير في وعاء حتى تصبح كصوص سميك , تغطى و تترك كل الليل حتى تتمازج النكهات , يستخدم الكتشاب حسب الرغبة .

التعليقات

  1. أم نوران 26 December 2013

    يا سلااااااام و الله ابدااع و غرااام للاخير :)
    كتيير حبيت الوصفة ,سهلة و سريعة,بس سؤال و كالعادة هل الدبس ضروري ؟ و هل فينا نستبدلو بشي تانني؟ لانو هون للأسف ما في دبس ابدا وولا نوع !

    • منى 29 December 2013

      هلا يا عسل ام العسلات
      الدبس ضروري , و اذا مو متوفر استخدمي ثلث كوب سكر بني , و اذا مو متوفر حضري الكتشاب من دونه و بيطلع كمان طيب

    • Raya 20 February 2014

      الاخت الكريمه ام نوران من بعد أذن الست منى عندي ملاحظه بسيطه انا اعيش في اوربا والدبس غير متوفر دائما لذلك أستعمل بدلا منه سيرب البان الكيك الذي يكون كالعسل الاسود شكلا ومذاقا او سيرب التفاح المشابه له ولكن مع قليل من الحموضه في الطعم والنتيجه مطابقه تماما لاستعمال الدبس العادي

      • منى 21 February 2014

        شكراً كتير للاضافة

  2. لينا 26 December 2013

    مرحبا منى كان بدي اسئلك شو قصدك دبس التمر او دبس العنب ماكتير فهمت وكمان فينا نستغني عن الخردل ولا اساسي بالوصفه

    • منى 29 December 2013

      هلا لينا , الدبس هو دبس سائل متوفر بكل السوبر ماركات , و انا الي عندي من ماركة الدرة , يعني بضاعة وطنية مية بالمية

      فيكي تستغني عن الخردل , بس اذا متوفر أفضل للطعمة

      ايا سؤال من عيوني

  3. ريحانة التميمي 26 December 2013

    السﻻم عليكم شكريات مدام منى وأخيرا باض الديك .كثير فرحانه ﻻني دخلت الموقع المعتمد عندي وخصوصا الاكل السوري اللذيذ الي كله طعمه وتصدقي اني سجدت شكر لله من الفرحه .ولله الفضل ثم أم صلوحه الي عرفتنا عليه .بقى عندي أعرف معجون الطماطم هو الجاهز أو اهرس طماطم ويمكن الشي الوحيد الي مالقيته بالموقع هو خل التفاح وهل الشتاء مناسب للتخليل وجزاك الله خير

    • منى 29 December 2013

      و عليكم السلام و رحمة الله و بركاته , نورتي و اخيراً ريحانة
      مية هلا فيك و بأختك أم صلوخة :)

      معجون الطماطم هو الجاهز , اختاري نوعية قليلة الملح او ما فيها ملح ابدا بيكون أحسن , و الشتا مناسب للتخليل , بس لانواع معينة , متل مخلل اللفت و القرنبيط و الجزر و الملفوف

      تكرم عينك , ان شا الله تزبط معي وصفة خل التفاح و اشاركم فيها

      مية هلا

  4. لينا 1 January 2014

    شكرا كتير منى لردك مع العلم انو انتي بسوريا وبعرف وضع النت والكهربا بحلب بس بدي اعذبك بسؤال تاني انا عندي دبس رمان بيمشي حالو ولا مالو علاقه بالوصفه وفي عندي مكعبات التمر اللي بيصير فيهن التمر هندي مابعرف اذا بلشت اعفس بس كتير حابه اجرب الوصفه تحمليني شوي وشكرا كتير لذوقك

    • منى 2 January 2014

      لا ما بيمشي حالو و لا مكعبات التمر هندي , غير شي

      خاص اذا ما عندك دبس لا تستخدميه :)

      مية هلا فيك ايا سؤال من عيوني التنين

  5. لينا 2 January 2014

    شكرا كتيييير رح جربو وئلك شو صار معي

    • منى 2 January 2014

      بانتظارك

  6. أم نوران 3 January 2014

    شكرا كتيييير منى خلاص معناتا راح استبدلو بالسكر البني .. للأسف ما عنا دبس مع انو بتظكر بالمانيا مرة اكلت دبس تمر و مرة دبس قصب السكر يا لطيييف شو كانو طيبين .. يالله كلو بيتعوض :)
    شكرا لتجاوبك مع زوارك منوشتنا
    كأنو في وصفة لخل التفاح بالموقع لأ ؟؟ للأخت ريحانة التميمي .

  7. Candle hope 16 January 2014

    يمي يمي تسلم ايدك

    • منى 24 January 2014

      الله يسلمك يا رب

تقييم الوصفة
عاديةقد أحضرهاجيدةممتازةأكثر من رائعة (7 votes, average: 4.29 out of 5)