مافن الجزر و البرتقال


         وصفة : منى                 2007/08/13                 24 تعليقات
مافن الجزر و البرتقال

·          ينخل الطحين مع البيكنغ بودر و الملح و القرفة  , يبشر الجزر و البرتقالة ثم تعصر , يحمى الفرن على درجة حرارة 180 درجة مئوية  .

·          يخفق البيض حتى يصبح هشاً ثم يضاف السكر و بشر البرتقالة و الفانيليا و يخفق الكل حتى يشتد المزيج و يسمك .

·          يضاف عصير البرتقال و الزيت بالتناوب مع الطحين المنخول و يقلب المزيج بلطف و باتجاه واحد حتى يتجانس المزيج و أخيراً يضاف  الجوز و الجزر المبشور و يقلب الكل بلطف حتى تمتزج كل المواد .

·          يصب مزيج الكاتو في قوالب المافن و يخبز في الفرن المحمى لمدة 20 دقيقة أو ينضج المافن .

·          تجهز الكريما : تخفق الجبنة مع السكر البودرة و بشر البرتقالة و مقدار من العصير يكفي للحصول على كريما خفيفة و قابلة للمد .

·          بعد أن يبرد الكاتو يزين بالكريما و أنصاف الجوز و يقدم مع الشاي أو القهوة  .

 

 


2 بيض بدرجة حرارة الغرفة
رشة فانيليا
كوب سكر ناعم
كوب طحين
ملعقة صغيرة قرفة
ملعقة صغيرة بيكنغ بودر
رشة ملح
ربع كوب زيت دوار الشمس
بشر و عصير برتقالة صغيرة ( ما يعادل ثلث كوب )
نصف كوب جزر مبشور ناعماً
ثلث كوب جوز محمص و مفروم خشناً ( اختياري )

للتزيين :

5 مكعبات جبنة طرية ( كيري ) أو 100 غ من أي نوع أخر مثل فيلادلفيا
ثلثي كوب سكر بودرة منخول
بشر و عصير برتقالة صغيرة

أنصاف جوز ( اختياري )





• ينخل الطحين مع البيكنغ بودر و الملح و القرفة , يبشر الجزر و البرتقالة ثم تعصر , يحمى الفرن على درجة حرارة 180 درجة مئوية .

• يخفق البيض حتى يصبح هشاً ثم يضاف السكر و بشر البرتقالة و الفانيليا و يخفق الكل حتى يشتد المزيج و يسمك .

• يضاف عصير البرتقال و الزيت بالتناوب مع الطحين المنخول و يقلب المزيج بلطف و باتجاه واحد حتى يتجانس المزيج و أخيراً يضاف الجوز و الجزر المبشور و يقلب الكل بلطف حتى تمتزج كل المواد .

• يصب مزيج الكاتو في قوالب المافن و يخبز في الفرن المحمى لمدة 20 دقيقة أو ينضج المافن .

• تجهز الكريما : تخفق الجبنة مع السكر البودرة و بشر البرتقالة و مقدار من العصير يكفي للحصول على كريما خفيفة و قابلة للمد .

• بعد أن يبرد الكاتو يزين بالكريما و أنصاف الجوز و يقدم مع الشاي أو القهوة .



  • وصفات تانية ممكن تعجبك


التعليقات

  1. linda 15 August 2007

    :cry والله من جيت على هل البلد مشتهية اعمل اي اكلة حلو بالفرن
    فرني غريب عجيب بيشتغل من جنب واحد من داخل الفرن بالصدر و بتشوفي النار طالعة فيه :(
    مرة جربت ساوي كيك قام نفخ من جنب و ما استوى من الجنب التاني و ما عاد عدتها

    بس اكيد يعطيكي العافية

  2. منى 15 August 2007

    مشكلة الفرن هي صعبة :sigh

    بتخلي الواحد يبطل يعمل أشياء جديدة :roll

    ممكن تجربي انك تدير الكاتو بنص مرحلة الخبز للطرف التاني لحتى تتوزع الحرارة بشكل متساوي على كل أطراف الكاتو ;)

  3. بدور 16 August 2007

    يم يم شي كتير طيب :zzz
    شكلا هي الأكلة التانية يلي رح جربا :grin
    يسلمو إيديكي عنجد شي بشهي نيال أهلك عليكي ;)

  4. منى 17 August 2007

    ممممممممم

    معنى الكلام ان في اول أكلة :roll

    يا ترى شو هي ؟؟
    سلطة الجرجير و الا كاتو الموز ;)

    الله يخليك بدور و لا يحرمني هل الطلة الحلوة و الكلام المزووء 8)

  5. بدور 19 August 2007

    اول اكلة كاتو الموز و طلع طيب كتير على رأي أهلي بي أكيد مو متل شطارتك و بطيبة اكلاتك بس نشالله شوي شوي بتعلم اصير متلك ;)

  6. منى 19 August 2007

    ما شاء الله بدور :)

    هي الوصفة مش سهلة و بدها شغل كتير و ما دامها نجحت معك فان شاء الله رح تسبقيني و صير انا اتعلم منك ;)

    صحتين و هنا يا رب

  7. نوارة 21 June 2008

    هلا ميمو الحلوة
    عملتو بس بقالب كاتوبس ما نفش معي بدي أسألك اناغلطت وحطيت طحين self raise عجب مشان هيك ما نفش ولا شو؟

  8. منى 21 June 2008

    لا ما أظن هاد السبب نوارة :roll , ممكن تكون المواد الي استعملتيها باردة ؟ متل البيض و الطحين و عصير البرتقال , أو ممكن يكون الفرن انفتح أو أكل شي ضربة باول نص ساعة , في هيك شي و الا لأ ؟

  9. نوارة 22 June 2008

    يمكن عصير البرتقال كان بارد وباقي الشغلات كلها تمام
    بس طعمتو كتير طيبة يممممم
    جد ياميمو ابوسك على هالموقع

  10. منى 22 June 2008

    يلا منيح طعمتو طيبة , ان شاء الله المرة التانية بيظبط معك ;)

    انت الي ابوسك نوارة , يلا هانت كم يوم و بعزمك على الهمبرغر الشهيرة :grin

  11. سارونات 25 August 2008

    السلام عليكم و رحمة الله و بركاته
    بتجنن هالوصفة اكيد البرتقال بالكيك في الو طعم خاص و كمان الجزر مع اني ماجربت كيك بجزر بس سمعت عن كيكة الجزر يا ريت ازا بتقدري اختي منى تحطيلنا ياها بشي يوم اكيد مو هلأ بس بعدين انا ناطرة موسم البرتقال تحتى ساوي كيك البرتقال بكريما البرتقال و كمان هالوصفة و يا ريت لو عندك كمان وصفات بالبرتقال تحطيهم شي يوم شكلي هالسنة راح ساوي هجوم على البرتقال :grin
    عندي سؤال مكونات الكريما تخفق بالخفاقة الكهربائية او بملعقة و هل يمكن الاحتفاظ بها في البراد لتاني يوم
    و كمان يا ريت تقليلي كم حبة عملتلك تأعمل حسابي و كمان قوالب المافن مليتيهم للنص او ثلاثة ارباع
    جازاك الله خيرا على كل الوصفات و على مساعدتك النا و جعله في ميزان حسناتك
    بالتوفيق
    سلام

  12. منى 26 August 2008

    أكيدة ان شاء الله بس يجي موسمه رح نزل اله وصفات جديدة , عندي كتير وصفات زعلانيين مني بدهم اني اجربهم و انا بقلهم طولوا بالكم ليجي وقتكم :grin

    الكريما بتخفقيهم بمضرب السلك أو بالخفاقة الكهربائية بس اهم الشي ان السكر يكون بوووودرة ناعمة تمام و فيك تحتفظي فيها بالبراد لتاني يوم شرط تغطيها منيح لحتى ما تنشف, هلا ما بذكر كم حبة عملت لي بس لما بحضر الوصفة بقالب كيك بتعطيني قالب من الحجم الوسط ;) و القوالب لنصفهم بمليهم ;)

    من عيوني اختي أي سؤال انا حاضرة

  13. نهى 19 October 2008

    يعنى ما ينفع اعملها بالخلاط مثل الكيك العادى ولا لازم مضرب البيض؟؟ :?

  14. منى 19 October 2008

    اختي انا قليل ما اعمل كيك بالخلاط , كله بمضرب البيض . بس في كتير من الستات بتحضر كل الكيك بالخلاط و بينجح معاها , ممكن تجربي و تخبريني اذا ظبطت او لا ;)

  15. نهى 19 October 2008

    انا كنت باعمل كله بمضرب البيض بس في مصر..
    ولما جيت هنا ماعنديش مضرب بيض للأسف بس كل الكيك اللى باعمله بالخلاط بيطلع حلو
    ح اجرب وربنا يستر :roll

  16. منى 21 October 2008

    و انا بانتظار النتيجة و انشاء الله بيطلع لذيذ و بيظبط معك ;)

  17. سارونات 30 March 2009

    السلام عليكم و رحمة الله و بركاته

    ساويتهم اليوم و كنت حاطة ايدي على قلبي لان خفت يبين ان فيه جزر بس طلعو كتير طيبين و هالمقادير عملتلي 11- 12 قطعة من الحجم المتوسط بس طلعو شوي حلوين بالمرة الجاية راح حط اقل من كاسة سكر
    و ما كان عندي جبن فخلطت متل منال العالم شوية سكر بودرة مع شويييييييييية حليب لحتى وصل للقوام المطلوب و زينتهم فيهم

    جازاك الله خيرا اختي منى على الوصفة عنجد كتير طيبة و راح ارجع ساويها بالمستقبل و لا تنسي تلحقيني على وصفة كيكة الفواكه

    بالتوفيق
    سلام

  18. منى 31 March 2009

    هنا و الف الف عافية و صحة وكمان فكرة لذيذة الي عملتيها

    لاحقتك :grin

  19. سارونات 3 April 2009

    السلام عليكم و رحمة الله و بركاته

    اختي منى بعد النجاح الساحق لهالوصفة و انه الجزر ما بين فيها اتشجعت ساوي كيكة الجزر خصوصا انو متوفر عندي هاليومين بتمنى اذا في عندك وصفة لكيكة الجزر تحطيها بس تقدري

    بالتوفيق
    سلام

  20. DOUHA 4 April 2009

    هلئ هو طيب بس ما نفش معي بس انا عملتوا بقالب عادي هلئ بجوز ايكون القالب كبير شوي ههههههههه لهيك مابعرف استنى وكمان
    عملت بزيت ذرة مو عباد الشمس ههههههههه ياتا هيدا السبب :upset

  21. منى 5 April 2009

    هلا ضحى حبيبتي :)
    يمكن قالبك كان كبير لان هل المقدار بالقالب رح يطلع قليل ;) ما اله علاقة نوع الزيت الي استعملتيه
    على فكرة لمن اجت عمتك لعندي من شي سنتين , كنت محضرتلها هل الكيك بس بقالب و كتيررر حبته ;)

  22. DOUHA 5 April 2009

    وانا عجبني وحبيتوا (خدوا البنات من صدور العمات)
    :p
    مرسي

  23. منى 6 April 2009

    :zzz

  24. إسراء 12 January 2011

    مرحبا رح خبركن المعركة الطاحنة اللي صارت بيني وبين هالكاتو انا غالبا لما بعمل كب كيك بمللي ورق الزبدة تلت رباعن حطيتن بالفرن وعينكن تشوف شو صار بعد ربع ساعة كللن فاروا وتعبت الدنة…….والفرن اللي عم بعمل عليه بيعمل من جوا قبل من برا قمت فتحت الفرن لحتى دير الصينية قاموا خفسوا ههههههههه وطولوا بالفرن اكتر من نص ساعة ومنظرن بنوووووووب ماحلو بس طعمتن طيبة الله ستر ههههههه ونكهة القرفة فيهن كتير طيبة مع الجوز يالله خيرا بغيرا بس هي الوصفة رح خليها تختمر عندي بالدفتر شهر زمان وبعدين برجع بحاول بعملا ….. سلام……

تقييم الوصفة
عاديةقد أحضرهاجيدةممتازةأكثر من رائعة (No Ratings Yet)