مخلل القرنبيط و الملفوف و الجزر


         وصفة : منى                 2007/03/22                 14 تعليقات
مخلل القرنبيط و الملفوف و الجزر

مرات بتكون الوصفة هي زينة السفرة , و هل المخلل هيك , لوحده بس ما كان ع السفرة رح تشتهي تمدي ايديك و تاكلي منه , و كل لقمة طعمة و كلو ما في اطيب منه
مخلل خضرة مشكلة , مخلل القرنبيط و الملفوف و الجزر , و لهل المخلل فيكي تضيفي ايا نوع بتحبيه , ممكن تضيفي فليفلة أو فاصوليا أو بندورة خضرا حسب زوءك , و ممكن كمان تقطعي الخضار لقطع صغيرة شوي و تحشيها بحبات فليفلة حمراء كبيرة و ترتبيهن بمرطبان , شكلهن تحفة
إذا طول المخلل عندك فالمفروض اما تحفظيه في البراد أو تضيفي شوي روح الخل للمرطبان حتى يضاين أكتر
بالصحة و الهنا

-المقادير:
حبة ملفوف متوسطة الحجم
كيلو جزر
كيلو فاصولياء خضراء
10 فص ثوم

مزيج التخليل :

3 كوب خل التفاح
كوب ملح و نصف ملح خشن ( صخري )
4ليتر ماء و نصف
ملعقة كبيرة فليفلة حمراء ناعمة
نصف ملعقة صغيرة كزبرة مطحونة
- طريقة التحضير :

• تجهز الخضار أولا , يقطع القرنبيط إلى زهرات صغيرة . تمشط حبات الفاصولياء ثم تقطع إلى قطع بطول 2 سم تقريباً .

• يقشر الجزر ثم يقطع إلى شرائح , و يمكن استخدام قطاعة خاصة لإعطائه الشكل الجميل الظاهر بالصورة .

• يقطع رأس الملفوف إلى أربع أرباع ثم يقطع كل ربع إلى قطع متوسطة و يتم التخلص من العض الداخلي .

• تغسل الخضار جيداً ثم تخلط و تعبأ في مرطبانات بلورية .

• يحرك مزيج التخليل حتى يذوب الملح ثم يصب فوق الخضار بحيث يغمرها .

• يترك المخلل لمدة اسبوع في مكان دافئ حتى ينضج ثم يحفظ في البراد .

التعليقات

  1. لارا مينا 4 July 2008

    مساء الورد والمسرات يامنى ..هل يمكن إستبدال خل التفاح بعصير الليمون في التخليل ؟
    -وماهو رأيك في خل التفاح المصنع والذي يعرض بالأسواق هل يعتبر طبيعي …ألف تحية لكي .

  2. منى 5 July 2008

    هلا لارا :) بعد زمان عنك , اشتقت الك كتير

    هلا الليمون ما بينفع ابدا عوض الخل , لازم خل و ممكن استعمال خل التفاح أو خل العنب , و في ناس بتستعمل روح الخل :roll بس هو كتير مؤذي

    انا باستعمل الخل الي في السوق و في خل الجويد بيعجبني , بس ناوية هل السنة حضر خل العنب و ان شاء الله اذا زبط ببقى بنزل الوصفة ..
    و الخل الي في السوق مو كله بيسوا , لازم الواحد يقرا شو مكتوب على العلبة و بعدها يشتري ;)

  3. لارا مينا 15 January 2009

    مساء الخير أخت منى …كيف الحال؟ إن شاء الله تكونين إنتي وعيلتك بألف خير..وأخيرا عملت مخلل الخضرة المشكلة وبصراحة إلي متعود على المخلل الصناعي مايعرف كيف يكون طعم المخلل الطبيعي فالنسبة لي كنت أشوف المصنع كويس وبعد ماجربت البيتي اكتشفت إنه في غاية البشاعة وألغيته من قائمة مشترياتي نهائيا لأن هنا كل المخللات والمربيات والصلصات نأخذها جاهزة لأنها ليست من ضمن عاداتنا الغذائية ولا نعرف أساسا طريقة عملها….وأنا عملت نوعين مخلل نوع بدون فلفل والثاني ضفت عليه فلفل أحمر حار جدا وكلهم كانوا في غاية الروعة وفعلا أعجز عن شكرك وربنا يجزيكي عنا كل خير … بس عندي شوية أسئلة :
    1)أبغى أضيف المره هاذي للمخلل بندورة هل بتنفع الحمراء القاسية أو لازم الخضراء بس؟

    2)وأيضا أبغى أضيف الفاصولياء الخضرا هل نسلقها قبل بماء مملح مثل مكدوس الفاصولياء أو على طول وهي نيئة ؟

    3)هل أقدر أعمل مخلل بالليمون الأخضر الصغير؟وياليت تعطيني الطريقةالسورية؟غير طريقة حامض مرقد لأني عملته قبل وكان تمام التمام .

    4)آخر سؤال بس أبغى أزيد من معلوماتي لأني دايما أفكر فيه.. لاحظت إنك قلتي المخلل بعد مايجهز مباشرة ينحط بالبراد عشان مايتغير.. طيب أهل سوريا قديما بعد مايجهزون المخللات كيف يحفظونها للمونة التي تكون لأشهر طويلة من دون أن يفسد؟

    في الختام عذرا عذرا عذرا للإطالة
    وتسلمين يارب وتصبحين على ألف خير .

  4. منى 17 January 2009

    الف هنا و الف عافية لارا على المخلالات ريتو صحة بكل لقمة انت و كل عيلتك حبيبتي و بالفعل فرق كبير بين المخلالات الجاهزة و المخلل البيتي .

    خلينا على الاسئلة ;)
    البندورة لازم خضراء, ما سمعت ابدا ان ممكن نستعمل بندورة حمرا للمخلل و انا مو مجربة استعملها, الفاصوليا تضيفيها من دون سلق و رح تستوي بالخل و الملح و تطلع كريسبي و اخر حلاوة

    مخلل الليمون ما كتير نعمله لحاله بسوريا , ممكن نفرم الليمون و نخلله مع الزيتون و الجزر المفروم و نكبسه بمي و ملح بس , أما لحاله فما نعمله 8)

    من زمان كنا نعمل المخلل و بعدها نحفظه بغرفة المونة و هي قبو تحت البيت العربي بيكونوا حيطانه سميكة كتير و لهيك بيكون بااارد كتير , يمكن أبرد من اليراد و بيحفظوا فيه كل المونات و الزيتون و الجبنة المكبوسة و الخضرة المجففة و غيره و غيراته ;)

    الله يخليلي ياكي لارا و لا تعتذري و لا شي انت واسئلتك على العين و الراس :)

  5. آرام 19 October 2009

    مرحبا أخت منى
    لاحظتي قديش صاير نشيط هاليومين .. دقي عالخشب :)
    المخللات من الأكلات اللذيذة اللي كنت محروم منها .. مع أنها سهلة كتير بس ما حدا من كل الناس اللي بعرفهم أعطاني مقادير .. كلهم بيعملوا مخلل بالاعتماد على التذوق وبدون أي مقادير .. وناس بتستخدم خل وناس روح الخل وناس بتستخدم مي وملح بس .. ولذلك بعمري ما جربتها.
    المهم أني البارحة عملت أول مخلل .. عملت مخلل فليفلة .. استخدمت نفس العيار المذكور بالوصفة بس بدون الفليفلة الناعمة لأن الفليفلة أصلاً نار.
    ناوي أعمل باقي أنواع المخلل قريباً جداً .. خيار وقتة وخضار مشكلة .. المشكلة ما عندي مطرح كافي بالبراد ومضطر أحفظهم برا ولذلك رح أستخدم آسفاً روح الخل .. سؤالي أخت منى هل بيتغير شي من العيار ولا نفس العيار أضيف عليه روح الخل :?
    نقطة ثانية .. أهلي كانوا يعملوا مخلل باذنجان .. كتير طيب وبتعرفي أنا بعشق الباذنجان كيف ما كان (ولا زلت ناطر مربى الباذنجان :) ) .. سألت عن طريقته فقالوا لازم ينسلق شوي (متل المكدوس) وبعدين نحشيه توم ودبس فليفلة ونغمره بماء وملح فقط .. عندك فكرة إذا هالطريقة صحيحة ويا ترى ما بتحتاج خل :?

  6. منى 20 October 2009

    هلا ارام :)
    ايه ما شا الله , ان شاء الله على طول هيك .

    أي روج الخل فيك تستعمله عوض عن الخل , بس بصراحة ما عندي مقدار ثابت اله , بس المهم انك رح تستخدم ملح و مي و روح الخل , و روح الخل بيستعمل بكمية قليلة

    سبحان الله أخي انا محضرة طريقة مخلل الباذنجان , و الطريقة الي ذكرتها صح و فيك تشوف تفاصيل طريقتي على الصفحة الرئيسية

  7. 7ayah 22 December 2010

    سلام منى
    هالصورة زكرتني بالمخلل التركي إلي بشتريه دائماً
    و الفرق انو المخلل التركي فيه لوز أخضر
    كتير كتير طيب
    لازم تجربيه مع المخلل
    المهم
    أنا قررت ان شاء الله جرب هالمخلل
    بس عندي سؤال
    أنا ما عندي مطربان بلور كبير
    بصير أعملو بنفس المطربان البلاستيك يللي اشتريت فيه المخلل التركي :?
    سلامي و شكري مقدماً

    7ayah Dayyen

  8. منى 23 December 2010

    جربته من سنتين , بس ما بعرف كيف نسيت حطه :roll

    ايه بيصير تحطيه بمرطبان بلاستيك , مع انه حمض و بلاستيك بس ما بياثر على الطعمة , تاثيره بس على الصحة :grin

  9. 7ayah 24 December 2010

    له له
    خلص لكان راح استنى لحتى دبـّر مطربان بلور كبير ان شاء الله
    مو ناقصنا شي يأثر على صحتنا إلي على أدها :grin

    جمعة مباركة

    7ayah Dayyen

  10. منى 25 December 2010

    عليك ة على كل اهلك حياة :)

    رح استنى رايك ;)

  11. 7ayah 29 December 2010

    الحمد لله دبـّرت مطربان بلور كبير [img]http://www14.0zz0.com/2010/12/29/22/528212756.gif[/img]
    بس ضل في شغلة ما كنت منتبهتلا و خايفة تخربلي كل المخللات :x
    انتي كاتبة انو لازم نستخدم ملح صخري
    أنا ما شفت عنا هون ملح صخري
    أو يمكن فيه و أنا ما بعرف وين و شو اسمو هون
    بس شفت عنا ملح بحري خشن
    فيا ترى بيزبط الملح البحري :?
    و ما فيني استخدم الملح العادي علماً بإنو فيه نسبة يود :?
    ولا ما بأثر شو الاضافات عالملح المهم بس انو يكون خشن :?
    يا رب ما كون تألت عليكي بعلامات استفهامي الكتيرة :sigh

    7ayah Dayyen

  12. 7ayah 10 January 2011

    سلام منى
    أنا لقيت الملح الصخري الحمد لله
    و عملت المخللات من اسبوع بالضبط
    و بعد العدّ التنازلي كل يوم ليجهز المخلل :grin
    أكلت منو أنا و زوجي من شي عشر دقايق
    طلع كتير كتير كتيــــر طيب :zzz
    بس كان الجرز مثلاً لسة حلو شوي
    و الخضرة مو كتير كتير حامضة متل ما بكون المخلل بالعادة
    معقول الملح أو الخل كان فيه نقص مثلاً :?
    أو بدو وقت زيادة ليتخلل أكتر :?
    شو السبب برأيك :?

    7ayah Dayyen

    • منى 6 April 2014

      اهليين حياة :)
      بده وقت كمان معناها , اذا الجو عندك بارد بيطول ليحمض , خليه كمان شوي و شوفي شو بيصير معك

  13. منى 6 April 2014

    اهليين حياة :)
    ما بتفرق ملح صخري او بحري المهم يكون طبيعي و ما فيه مواد اضافية متل اليوم

تقييم الوصفة
عاديةقد أحضرهاجيدةممتازةأكثر من رائعة (3 votes, average: 5.00 out of 5)