مرحبا


         وصفة : منى                 2017/09/19                 57 تعليقات

آخر تصويت


آخر تعليق

مرحبا

مرحبا

يومكم جميل أصدقاء اللقمة الغاليين ..

اليوم مافي وصفة .. اليوم حديث صغير بس من القلب ، عبكتب فورا من دون مسودة .. وهي مو عادتي

المتابع للموقع من أول بداياته بيعرف أن النشاط واقف فيه من زمان ، في كتير أسباب ، بس واحدة من أهم الاسباب أن صرت أشعر أن الشغل كله من دون نتيجة حقيقة، ..

وصفاتي لاقيها هون وهون من دون ذكر للمصدر( هاد طبيعي في النت العربي)
كتير من الزوار يجربوا الوصفات من دون ما يتركوا أثر أو ملاحظة أو تعليق على الوصفة.
إضافة للظروف المستحيلة للنت عنا بحلب .
كل هاد خلاني أضيع الحماس
بس لسه شغفي وحبي للطبخ موجود (وباقي ويتمدد )

هلق رح أطلب طلب ..اعتبروها كرت تعريف بحضرتكم.
يا ريت إذا كنت متابع الموقع وبيهمك استمراره تحط تعليق هون لحتى أعرف وين أنا على الظبط.

ممنونة وقتكم وبانتظاركم
  • وصفات تانية ممكن تعجبك


التعليقات

  1. عبداللطيف بازرباشي 19 September 2017

    حقك بكل كلمة قلتيها. وحقك علينا ان نعتذر منك وقد ما اتشكرناكي ما بنوفيكي. انا بعرف الموقع تقريبا من العام 2010 . ومن هداك الوقت وانا متابع لئله وبستفيد منه.
    يمكن بعمري ما كتبتلك تعليق مباشر ، بس الله بيعلم شوفي بالقلب وطول الوقت بتذكرك وبدعيلك بالخير :)
    بتمنالك كل النوفيق مدام منى.
    وماتزعلي كتير عالوصفات اللي بتنسرق من عندك لانو صدقيني لو سرقو منك حرف بحرف ما بعمرن رح يصيرو انتي ولا بعمرا الناس رح تلخبط بينكم . بتضلي انتي فوق وبيضلوا هنن تحت .
    وشكرا

    • منى 20 September 2017

      أهليين يا عبد اللطيف
      أول الشي ممنونة كل كلمة كتبتها، والي الشرف انك من متابعين الموقع من 2011.

      تاني شي الف هنا على كل وصفة جربتها ، وبصراحة لما شب بيطبخ بحب ، كتير بيكبر بعيوني

      أخر شي شكرا لاستجابتك لطلبي و شكرا لردك

  2. رولا الشيخ 19 September 2017

    بدي قلك كلمتين من زمان واجت الفرصة هلأ : اول مرة عرفتك من رفيقتي كانت عاملة شير لبوست عم تحكي لما سالني استاذ الفرنسي عن احلامي ؟! اكتر انسانة لمست قلبي بكلامها اكتر انسانة فتحت عيوني بعد ماكنت مغمية وضايعة بعجلة هالحياة
    لما قراءته كنت بالمشفى عم صارع الموت ومستنيني علاج طويل صدقيني كنتي بصيص الامل من بين كتير اشعة امل وقتهة اخدت بايدي ظع اني مابعرفك . فتت عموقعك مع اني مو من هواة الطبخ كتير جربت معروكك وسلطة الخس بالدجاج والكاري اللي عاملتيها لعزيمة خالك تقي اللي ببجي من فرنسا
    هالعزيمة يمكن قريتها لحفظتها نغنشتي قلبي بحكيك الي سنين انا مغتربة من قبل هالاوضاع
    ربي يحميكي انتي وعيلتك واستمري بعطاءك حبيتك في الله ودعيتلك من قلبي

    • منى 20 September 2017

      تقريبا أكتر رد أثر فيني هو ردك.
      هاد فضل رب العالمين وحسن حظي الي وصل كلامي الك وكان اله هل الاثر.
      ما على قلبك شر ابدا ، وان شالله أخر مرة بتدخلي فيها مستشفى .

      هنا و الف صحة على كل شي جربتيه .. وبحب قلك انك عطيتيني دفعة كتير قوية لادام.
      ممننونة ردك شكرا

  3. راما 19 September 2017

    أنااا متابعتك من حلب وبشدة وما في وصفة حلبية الا برجع فيها لهالموقع
    بتمنى استمراره وبانتظار وصفات جديدة

    • منى 20 September 2017

      أهلا وسهلا راما ، منورة حلب فيك
      ان شالله الجاي حلو ، ووجودك بركة الموقع وحياته

      شكرا لردك

  4. Siba al ahdab 19 September 2017

    لا تضيعي الحماس…وصفاتك محل ثقة

    • منى 20 September 2017

      من زوقك يا صبا ، شكرا لردك

  5. Manar Faour 19 September 2017

    اتمنى لك كل التوفيق

    • منى 20 September 2017

      شكرا يا منار
      وانت كمان بالتوفيق بكل خطوة

  6. Hala mouslli 19 September 2017

    مرحبتين ست منى
    أنا من معجبينك من زمان بالطبخ والحلويات
    ويتمنى ترجعي تشغلي موقع لقمة طيبة لأنه موقع رائع
    وخاصة انه منحس مطبخك مننا وفينا يعني بجرب وصفتك من
    دون تردد ابدا لانه بعرف انه رح تكون ناجحا من نفسك الطيب وسهولة التنسيق والطرح..
    بتمنى تكوني متذكرتيني

    • منى 20 September 2017

      أهليين يا هلا
      اي طبعا اتذكرتك بس ما كنت بعرف انك بتعرفي لقمة طيبة :D
      شكرا جزيلا لردك ، وممنونة ثقتك ، ومية هنا وصحة على قلبك بكل شي جربتيه

  7. mais 19 September 2017

    مرحبا منى
    هاد الموقع هو مرجعي لما بيجي عبالي اطبخ اكلة ما بعرف اعملا بفتح هلجوجل و بكتب لقمة بدون تفكير لأن عندي ثقة فيكي إنو اي وصفة حطتيا بتكون على أصولا . بتمنى تستمري و ما تفقدي هلحماس لأن في ناس كتير متلي بتحب تستفيد من هيك ابداعات

    • منى 20 September 2017

      أهليين يا ميس
      الحمد لله رب العالمين على هي الثقة

      ان شالله مستمرة ووجودكم هة اساس الحياة في الموقع.

      شكرا جزيلا لردك

  8. massa 19 September 2017

    الله يعطيكي العافية وانا من المتابعين من زمان وياريت يضل الموقع ويرجع بريقه من اول وجديد
    الله يجزيكي الخير

    • منى 20 September 2017

      اهليين يا ماسة
      الله يعافيك يااارب، ان شالله بيرجع بوجودكم وحسكم الي بيخلي الموقع فيه حياة

  9. ناهد ملقي 20 September 2017

    متابعة وبشدة

    • منى 20 September 2017

      يا أهلا وسهلا ناهد

  10. ريم ام ساره 20 September 2017

    متابع بمحبة

    • منى 20 September 2017

      شكرا من القلب

  11. شيرين 20 September 2017

    حرام توقفي… انا في كاير وصفات من عندك وموقعك كسب الثقة يعني صرت جرب الوصفة من دون ماخاف

    • منى 20 September 2017

      طول ما انتو معي أنا رح اتشجع على طول باذن الله
      صحتين والف هنا على كل شي جربيته، وممنونة ثقتك وكمان ممنونة ردك

  12. Safa 4 October 2017

    تعلمت التفنن بالطبخ وعشق المطبخ من لقمة طيبة

    • منى 29 October 2017

      الله يجبر بحاطرك ويكرمك ..من حظي

  13. Safa 4 October 2017

    انا متابعاك من ايام منتدى لك

  14. sarahh 7 October 2017

    هيدا الموقع مرجع لإلي و بعتقد لكتير متلي كمان… يا ريت تضلك محافظة عهالموقع

    • منى 19 October 2018

      باذن الله رح ابقى محافظة عليه :)

  15. سوسن ابوفرحة 10 October 2017

    تحية صغيره مني لالك يا منى لانك انسانه نادرة في هاد الزمن
    https://chefindisguise.com/2017/10/10/chicken-a-la-king/
    بس تشوفي الرابط فيكي تحذفي التعليق.. :)

    • منى 19 October 2018

      غمرتيني بلطفك وكلماتك وكل هل الثقة ..الله يكرمك متل مااكرمتيني ..شكراااا

  16. Joud.R 18 October 2017

    ارجوك استمري لأن موقعك لايمكن الاستغناء عنه في كتير طبخات بعملها عطريقتك وماممكن ابدلها بغير طريقة ابداً الله يوفقك ويقويك يارب

    • منى 29 October 2017

      شكرا يا جود الله يكرمك ويخليك ويارب الك متل هل الدعوات واكتر :)

  17. perla katja 21 November 2017

    Many many thanks for taking the time to share your good recipes. I wish you a luck in your life!!!

    • منى 19 October 2018

      thanks petra :) you are so kink to leave such a comment

  18. yara 3 December 2017

    هالموقع بعتبره كنز مافيني استغني عنه …مرجعي الاول من وقت ماتغربت
    بارك الله فيك …اني احبك في الله …

    • منى 19 October 2018

      شكرا يارا .. الله يبل قلبك :)

  19. رشا 11 December 2017

    انا بتابعك من حلب و موقعك كتير حلو حتى كل ما بدي اطبخ طبخة جديدة او بيلزمني اي شغلة فورا بدور عليه بهالموقع ما بحتاج اني دور بغير موقع لانه بلاقي طلبي هون ….الله يعطيك العافية . بتمنالك التوفيق و النجاح

  20. ميسونو 14 December 2017

    متابعة ويستمر .. من أيام خالو تقي 2008 وخالو تقي 2009 :-)

    • منى 6 January 2018

      الله يرحم هديك الايام :)

      منورة

    • منى 19 October 2018

      وصرنا 2018 وسبحان الدايم :)

  21. رحاب 30 March 2018

    متى موقعك هاد رااائع و مميز جدا جدااا بالرغم من كل شي طلع بعده ..أنا فاشلة بالمدح جدا ..بس بحب قللك ..انا و من زمااان و من لما عثرت على موقعك من قبل انتشار الفيس و الوتس..ع زمان المنتديات الجميلة
    و لحتى الآن لما بدي اعمل اكلة ما بعرفها اول شغلة بعمل فنجان قهوة و بفتح ع موقعك هاد و بقرا الوصفة و بكتبا ع ورقة و بقرا كللل التعليقات تحتا و الأسئلة و ردودك عليها و بتنقلني هل التعليقات و بالأخص القديم منها لعالم ساحر مليء بالشجن و الحنين و الحياة و الحماس ..عالم دافئ مترع بالسلام .. رائحته رائحة حلب العريقة و شجونها بكل معانيها

    • منى 19 October 2018

      ياسلاام يارحاب هاد نفس احساسي لما اتصفح القديم ، كانو لقطة منسية من عالم جميل ..

      شكرا من قلبي

  22. سمسمة 28 May 2018

    مرحبا ست منى
    أنا متابعتك من بدايات الموقع وعندي دفتر خاص بأسمك لكل أطباقك ودائماً بحاول أعرف أخبارك وأطمن عليك وفرحت كتير بعودتك مالنا غنى عنك أرجو منك الاستمرار بالموقع ونحنا معك

    • منى 25 October 2018

      هاد بيعنيلي يا سمسمة كتيرررر ….ان شالله رجعت وبانتظار ردود منك على طول ..
      شكرا

  23. وصال احمد 29 July 2018

    الله يجزاكي الخير ع هالموقع الرائع

    انا بتابعك من 2009 ولحد هلق وبحاول في كل مرة اشترك مابيمشي الحال

    • منى 25 October 2018

      الله يكرمك وصال :)
      الحمد لله هلق مسشي الحال ، ان شالله بتبقي منورة بردودك على طول
      شكرا

  24. وصال احمد 29 July 2018

    وكل طبخة بعملها بفتح صفحة لقمة طيبة لأتاكد من الطريقة اكتر موقع طبخ بحبه وبثق بوصفاته
    شكرآ الك حبيبتي منى
    وربي يجعله إن شاء الله في ميزان حسناتك

    • منى 25 October 2018

      اللهم اامين ياارب ..هي الثقة هو عطاء من رب العالمين ..ممنونتك:)

  25. لبنى 4 October 2018

    متابعتك من ال 2013 تقريبا ومازلت
    وصفاتك المميزة ونفسك وروحك الحلوة بتشدنا لموقعك

    ظننت انقطاعك بسبب ظروف البلد

    كل التوفيق منى.. حتى لو ماحطيتي وصفات جديدة بيضل الوصفات اللي بالموقع مرجع إلنا

    شكرا الك

    • منى 19 October 2018

      الله يكرمك يالبنى انا ممنونة كل كلمة كنبتيها ..شكرا

  26. ميسونو 24 October 2018

    100 السلامة .. بالتوفيق

    • منى 26 October 2018

      الله يسلمك يااارب:)

  27. هيام 2 November 2018

    متابعتك من اوووووووول المشوار
    بثقة كبيرة بكلشي بتكتبيه
    بحب للتفاصيل الصغيرة
    بشوق كبييييييير كنت استناكي فيه لما بعدتي عن الموقع
    وبفرحة كبيرة انو شفت هلا انك رجعتي
    لو سمحتي لاتوقفي

    • منى 2 November 2018

      اهلييين ياهيام :)
      وهي الثقة هي دافعي الاول والاخير للمتابعة ..ممنونة كلماتك الي طلعوا من القلب ووصلوا على القلب فورا ..شكرا

  28. nour 19 November 2018

    وعليكم السلام ورحمة الله مدام منى
    الله يمدك بالعافية انا بتمنى تستمري كتير لانو وصفاتك ناجحة ومميزة كنت من قبل جرب وصفة كل فترة كبيرة اما هلق بعد ماتزوجت كل يومين ببحث عندك عالوصفة الي بدي ياها حتى لو تعلمتها من غير حدا او بعرفها بس عندك بطمن اكتر
    شكرا كتير لجهودك
    وبالنسبة للسرقة هاد الكل بيتعرض اله حسبنا الله ونعم الوكيل
    الله يقويك على كل حال.. ماشاء الله عنك .
    بالتوفيق ..دمتم بخير.

    • منى 19 November 2018

      اهليين يا نور وعليكم افضل السلام واتم التسليم:)
      اللهم امين وانت كمان الله يقويك ويبارك بوقتك
      انا الي بشكرك على هي الثقة لانو هي اهم واحلى شي بهل الموقع
      ممنونة ردك وتواجدك
      ياريت اذا في شي جربتيه تخبريني :)
      نورتي

تقييم الوصفة
عاديةقد أحضرهاجيدةممتازةأكثر من رائعة (13 votes, average: 3.38 out of 5)