مسقعة الملفوف


         وصفة : منى                 2009/01/06                 16 تعليقات
مسقعة الملفوف


ملعقة كبيرة سمنة
2 ملعقة كبيرة زيت زيتون
حبة كبيرة بصل مفروم ناعماً
ربع كيلو لحمة ناعمة
نصف حبة كبيرة ملفوف , مفروم شرائح رقيقة
نصف ملعقة صغيرة بهار مشكل
2 كوب حمص مسلوق
حبة كبيرة فليفلة حمراء , مفرومة ناعماً
3 – 4 ملعقة كبيرة معجون بندورة
ملعقة صغيرة دبس فليلفة
ملح




• تذوب السمنة و زيت الزيتون على نار متوسطة , يضاف البصل و يقلب حتى يصبح شفافاً . تضاف اللحمة المفرومة و تقلب حتى يتغير لونها و يجف مرقها .

• تضاف الفليلفة الحمراء و تقلب لبضع دقائق أخرى . يضاف معجون البندورة و يقلب لمدة دقيقتان .

• تضاف الفليلفة الحمراء الناعمة و دبس الفليلفة و الملح و البهار و ما يقارب كوب و نصف من المرق و يترك حتى يغلي الصوص لمدة خمس دقائق .

• يضاف الملفوف و الحمص المسلوق لصوص البندورة و يترك ليغلي لمدة 15 – 25 دقيقة أو حتى يطرى و ينضج و يضاف القليل من الماء المغلي إذا دعت الحاجة .

• تقدم المسقعة مع الرز أو مع الخبز العربي حسب الرغبة , و انا أفضلها مع الرز .


فكرة :


يمكن استخدام الملفوف الزائد من محشي الملفوف المسلوق لتحضير الوصفة .
  • وصفات تانية ممكن تعجبك


التعليقات

  1. semo 1 August 2010

    ياعيني ياعيني عالملفوف المطبوخ أطيب شي بالعالم بس أنا محرومتو مشان جوزي ما بيحي الملفوف ولا بأي شي سواء كان محشي أو سلطة أو مكمور أو أي شي
    مالي غير اجي اكلو عندك خصوصا أنو مبينتا هالاكلة غير شكل وطعما مميز
    شفت الجروب عالفيس بس بصراحة مهما لفيت ومهما درت ما بلاقي متل لقمة طيبة بكل النت ومن كتر ما بحب الموقع بخاف شي يوم فيق الصبح ومالاقيه خصوصا انو موكتير عم تتواجدي بهالكم يوم ان شا الله يكون خير
    هاد مو رد هاد رسالة خخخخخخخخخخخخخ سامحيني عالطولة

  2. ميساء 1 August 2010

    مرحبا منى :) الحمدلله عالسلامة وين هالغيبة انشاالله خير اشتقنالك كتير ولوصفاتك الطيبة يا قمر الشيفات ;)
    والله هالأكلة باينتا طيبة كتير وخصوصي أنو فيها ملفوف أفندي اللي بعزو كتير بس في شغلة أنا بالشام بعرف أنو الشلباطوهو عبارة عن كرنب مقطع ومطبوخ مع الرز بنفس طريقة الرز بفول والرز ببازيلا مع سمنة ولحمة شقف أو مفرومة وهي أكلة كتير كتير لذيذة بس طلع الشلباطو الحلبي غير واحد لكن باين عليه التاني كمان طيب وطبعا أختي الكرنب هو شي تاني غير الملفوف وما بعرف اذا موجود عندكم بحلب أو لا لأن في بعض الناس بتقول للملفوف كرنب وشكرا مرة تانية على الوصفة الرائعة :)

  3. رنا 1 August 2010

    ياعيني عليكي يامنى على هالاكلة …يسلمو ايديكي وايدين صاحبة الوصفة ..
    هلأ بالنسبة للملفوف بحسه اكلة شتوية مابعرف بحب اكله بالشتا اكتر وهالمسقعة بيعملوها بيت حماي على طوووووووووووول مع محشي الملفوف لانه وقت نقطع الزوايد من الطرفين بنستفيد من البقايا باكلة لذيذة وبتخلص قبل مانسمي بالله ونبدأ بالمحشي ..من كتر مو طيبة
    هلأ الطريقة نفسها باختلاف واحد هو انه مامنحط معها دبس بندورة يعني نفس الشي بس بلا بندورة وبالاخير رشة فليفلة حمرا ومعها عصرة ليموووونة ولي شو بتجنن :p :p :grin

  4. رنا 1 August 2010

    بس تذكرت منوشة …نحنا مامنحط حمص :p

  5. AYAH 2 August 2010

    والله حلوة فكرة هالوصفة عالقليلة بنستفيد من هالملفوف عنا والله شي بحير
    ملفوفنا صغير كتير ومكبس يا لطيف متل الحجرة يعني بطالع العيون ليصير محشي وكل مرة بقول بدي أطبخومع حشوة المحشي فرط وخلصنا
    بتعرفي منى في هون نوع خضرة ما عرفت شو هو حتى هنين هون بقولولو خضرة الربيع يعني مالو اسم
    مرة جبتو فرمتو وسميت عليه وطبختو متل طريقتك تقريبا طلع بجنن صرت أعملو دائما
    بدنا ندبر حالنا

  6. 7ayah 4 August 2010

    يـــمــــــي
    أنا و زوجي من عشاق الملفوف :zzz
    و كل رفقاتي هون صارو يعرفو إنو كل أسبوع أو أكتر شوي إلي طبخة ملفوف :grin
    رح جرب هالأكلة أكيد
    و بدي قول لآية انو الملفوف المدور (وايت كابيج) ما بيلتف أبداً-مع إني لفيتو مرة بس غلبني- و فيكي تستخدميه لهيك أكلات أو المكمور مثلاً…
    بس للف جيبي الــ بوينتد كابيج
    pointed cabbage
    هاد شكلو شبه الخس العربي و بيلتف معك بسهووووووولة
    جربيه و شوفي

    7ayah Dayyen

  7. AYAH 7 August 2010

    يسلمو حياة على النصيحة بتعرفي اني كنت ألف الوايت كابج كتير
    بشتغل فيه يومين وعيوني بتطلع وبنحرق مية حرق لحتى أفكون عن بعضون
    بس هلأ من وقت ما بلشت دراسة ما عملتو مع انو جوزي بسمعني فيه
    بالنسبة للبوينتد كابج ما بعرف بحس انو مالو طعمة أبدا وبيشبه السلق والخس
    رفيقتي بتعملو بس جوزي رافض الفكرة قال هاد اسمو استسهال
    تخيلي

  8. 7ayah 7 August 2010

    و الله إنك شطورة يا آية
    أنا لفيتو مرة و ما عدت عدتا :upset
    كنت لسة عروس جديدة و كل شوي أدقلا لإمي لإللا إنو الملفوف ما عم ينسلق معي و أخد وقت كتير…شو اساوي؟؟؟؟بعدا التف معي بس بشق الأنفس و مع الاستعانة بزوجي كمان   :grin
    بعد بيوم حكيت لرفقاتي قالولي هو الملفوف المدور ما بيلتف نهائي و لازم جيب البوينتد
    بس مو عدل يحكي زوجك هيك :x
    طعمو ما إشبو شي…طيب
    خلص إعملي اعتصام و أنا معك :grin

    7ayah Dayyen

  9. gsm 10 August 2010

    والله هل الأكلة كتيير ظريفة وطيبة بس للأسف زوجي ما بحب الملفوف إطلاقا :sigh على كل انا رح أعمل الطبخة لإلي يعني ضروري أطبخ بس الأكلات يللي بحبها :p 8) بس بدي أسألك سؤال منى انا عندي ملفوف أحمر وأبيض بيمشي الحال لو خلطتن وعملتن مع بعضن قلت لحالي بتطلع ألوان الطبخة ظريفة شو رايك
    إيه وكمان سؤال حبابة كنت سائلتك كذا مرة عن خبز ال عشرين ساعة وعم أستنى ردك حبابة لو تقرأي السؤال وتجاوبيني عليه لأنو عم أنتظر ان بعرف إنك مشغولة وهلق كمان رمضان على الأبواب بس حبابة حاولي تجاوبيني بأسرع وقت
    وويسلموا كتيير عم أعذبك معك
    صحيح
    كل عام وإنت وكل عيلة لقمة طيبة بخير وينعاد عليكم الشهر الكريم بالصحة والسعادة والخير وإن شاء الهل نكون من عتقاء هل الشهر الفضيل

  10. منى 3 October 2010

    هلا سمسومة :)
    و انا بحب الملفوف كتير , بقى المرة الجاية معزومة عندي ;)

    كل الناس خير و بركة , بالعكس , انا الجروب عاجبني كتير لان اد ما الواحد بيعرف بيقي في ناس بتعرف اكتر منه و هيك الكل بيستفيد :zzz

    معك حق سمسوم , بس ان شاء الله دوما موجود لقمة طيبة و ربي يديم المعمة و هل اللمة الحلوة علينا

  11. منى 3 October 2010

    هلا ميوسة :)
    تشتاف الك العافية حبيبتي و تسال عليك دوما .

    يا ستي انا شفت الكرنب باخر زيارة للشام و هادا مو موجود عنا لهيك الظاهر ان الشلباطو الحلبي غير الشامي , و انا كتير اشتهيت جيب منه لجربه , بس كان شوب كتير كتير و الدني عم تغلي فخفت ان ينتزع على الطريق :roll

    ان شاء الله يصحلي جيبه مرة تانية و انا ممنونة ردك و اضافاتك ميوس :)

  12. منى 4 October 2010

    هلا رنونة :)
    مممم , هلا انا اتعلمت هل الاكلة بالصدفة و اهلي ما بيعملوها , بس عجبتني كتير و كمان نحنا ما منحط معها حمص , بس معه صارت اطيب

    رح جربها على طريقة بيت احماكي ن شاء الله اسمه الشتي قرب و الملفوف عم يشمر عن اكمامه لينزل على الساحة :zzz

  13. منى 4 October 2010

    هلا ايوش :)
    يييي صعبة هيك , نو الملفوف الي متعوديين عليه بده شغل كتير فما بالك بهادا الي عم تقولي عنه صعب :roll

    الله يعطيكي الف عافية و لا يضيعلك تعب .

    عن جد الحاجة ام الاختراع :zzz

  14. نادين 21 December 2010

    منونه الطريقه ظريفه بس انا حبيت الكابوسا مميزة اكتر و اخف من الملفوف و الحمص مع بعض

  15. هديل85 9 February 2012

    ما شاء الله .. موقع غني بالطبخات والصداقات .. رح جربها اليوم والله يستر زوجي ما بيحب الملفوف نهاااااائيا ولا بأي شكل ولا سلطة ولا محشي بس شهيتيني اعملها باعتبار أ,ل وصفة تعلمتها من هالموقع صار معنا آلام معدية طول الليل من قد ما أكلنا ..فيفضل تنعمل بيوم متل اليوم يوم خميس تاني يوم عطلة ههههههه .. طبعا الوصفة كانت دجاج بالكريم .. ممممممممممم يسلم دياتك منى

  16. رهف 7 March 2012

    السلام عليكم: غريبة كتير يامنى جربت الوصفة من زمان وما كتبت كلمة شكرا كتير طيبة وسهلة تسلم ايديكي

تقييم الوصفة
عاديةقد أحضرهاجيدةممتازةأكثر من رائعة (No Ratings Yet)