معروك الدبس و السمسم


         وصفة : منى                 2013/07/25                 18 تعليقات

آخر تصويت


آخر تعليق

معروك الدبس و السمسم

لما كنا صغار , كانت ماما تحب تشوف حارة بيت جدها ببنقوسا بعجقة الافطار , لهيك كان بابا الله يرحمه ياخدنا كم مرة بايامات رمضان قبل الافطار و يدورنا بحارات حلب العتيقة , تكون الدني زحمة كتير و الناس عم تشتري معروك و تمر هندي و سوس و لقم و مشبك , كنت مد راسي من شباك السيارة و اتفرج , مرات لما نعلق بالزحمة و نتاخر ع الفطور كنت قول لحالي انو شو هل الذكريات المهمة الي اخرنا مشانها الفطور , هلا لما كبرت , عرفت اديه الذكريات مهمة للي شايلها براسه و ما بطيب منها , هي متل سلاح سري منستخدمه كل ما نكون مخنوقيين من هل الدني لحتى نعيد ماضي صار بعيد كتير و حباب كانوا فيه منوريين حياتنا , و كنا بوقتها مفكريين انو هنن متل الشمس و القمر , اشيا بتطلع كل يوم و وجودهن في حياتنا مفروغ منه , بهل الدقيقة عندي حنين لبابا الله يرحمه و لحارات حلب العتيقة تكون مليانة حياة و للبنت الصغيرة الي كنتها …



هل المعروكة منسميها عنا في البيت معروكة بنقوسا , كنا دوما نجيبها من هونيك . انا بيني و بين حالي كنت سميها معروكة الختايرة , و كمان ما كنت دوقها , كان يخطرلي انو دبس و سمسم و اشيا عم تشر , ما بدي منها .. بس من كم سنة لما دقتها اول مرة عرفت اديه كنت غلطانة , و هل المعروكة صح بسيطة بس فخاامة ع الاخر , و هلا كل ما كون محضرتها و يقولولي الاولاد انو ماما بدنا معروك شوكولا أطيب , بطلع فيهن و بقلهن اااايه يا قطاطي , الدرج الي انتو هلا عم تطلعوا عليه انا هلا عم انزل منه .


كتير طريقتها سهلة , كل المقادير مع بعض لحتى تصير العجينة ناعمة و دبقة شوي , و هل العجينة لازم تكون عم تلزق شي بسيط بالايد , لحتى تطلع طرية و غير شكل بعد الخبز . و كمان هي شكلها و طعمتها غير المعروك العادي , لان هي رقيقة نوعاً ما و مغرقة بالدبس و السمسم ع الوج … لازم تجربيها


بالصحة و الهنا

شو لازمنا ؟
3 كوب طحين
نصف كوب سكر عادي
ملعقة صغيرة خميرة حبيبات
ربع ملعقة صغيرة محلب مطحون
رشة ملح
2 ملعقة كبيرة زبدة بحرارة الغرفة
ربع كوب زيت
1 كوب و ربع حليب دافئ

للوجه :

دبس عنب سائل
سمسم أبيض
طريقة التحضير

1 - يوضع الطحين و السكر و الخميرة و المحلب و الملح في وعاء كبير .
2 - يضاف الزيت و الزبدة و كوب من الحليب السائل الدافئ و تعجن المقادير سوياً لمدة 10 دقائق حتى تتشكل عجينة طرية و دبقة نوعاً . يضاف المزيد من الحليب حتى تصبح العجينة طرية جداً .

3 - توضع العجينة في وعاء كبير , تغطى بشكل محكم بورق نايلون لاصق .

4 - تترك العجينة في مكان دافئ حتى يتضاعف حجمها .

5 – تغطى صينيتا فرن بورق الزبدة . يحمى الفرن على درجة حرارة 180 درجة مئوية . يثبت شبك الفرن على الرف المتوسط .
6 ـ تقطع العجينة المتخمرة الي قسمين . ترش منضدة العمل بالقليل من الطحين و يبسط أول قسم من العجين باليد قليلاً للحصول على شكل بيضاوي .

7 - يرق بالشوبك حتى يصبح لدينا قرص بيضاوي متطاول و رقيق .

8 - ينقل القرص إلى الصينية المجهزة و يعدل الشكل مر أخرى , تكرر العملية مع القسم الأخر .

9 – يدهن وجه المعروك بالدبس . إذا كانت نوعية الدبس المتوفرة لديك كثيفة نوعاً ما يمكن تذويبه بالقليل من الماء الساخن حتى يصبح مزيج قابل للمد .

10 – يرش السمسم على الوجه بكمية وفيرة , يخبز المعروك لمدة 10 – 15 دقيقة أو حتى يشقر أسفل المعروك .

11- تخرج الصواني من الفرن و ترفع المعروكات من الصواني , يدهن وجه المعروك بالدبس مرة ثانية , يقدم المعروك مع كوب من الشاي و مكعبات الجبنة أو يقدم لوحده للاستمتاع بطعم الدبس و السمسم .

التعليقات

  1. لينا 27 July 2013

    يسلمو إيديك عالوصفه
    عم دور عليها من زمان، بس عندي سؤال: شو درجة حرارة الفرن؟ وإذا فيني أعمل نصف المقادير المكتوبه؟

    • منى 28 July 2013

      ان شا الله تعمليها و تطلع نفسها الي ببالك
      حرارة الفرن 180 درجة , و اكيد فيك تعملي نص المقادير بيعطوك كمية قرص متل الي طالع بالصورة

  2. رنا 30 July 2013

    تسلم هالإيدين يا ست منى، هالوصفة ضربت على الوتر الحساس
    من يومين كنت عم قول لرفيقتي شو مشتهيتها وما عم لاقي وصفتها وخصوصي انه ما عندنا هالأكلات بالغربة، بس مع وصفاتك ما عدنا نشتهي شي وما نلاقيه.. الله يجزيكي الخير يارب

    • منى 31 July 2013

      اهلين رنا :)
      ان شا الله تكون هي الوصفة الي عم تدوري عليها , نورتينا رنون , و رح استنى رايك بعد التجربة

  3. لينا 30 July 2013

    مرحبا…..كتير مبين عليه شهي وسهل يسلمو ايديكي اكييييد اكييييد رح جربو وانشالله يطلع طيب وينجح معي

    • منى 30 July 2013

      ان شا الله بتجربيه و بيكون ع زوءك , نورتي و شرفتي الموقع لينا :)

  4. لينا لي لي 30 July 2013

    طالما في بالموقع اسم لينا رح سمي حالي لينا لي لي وانشالله تقبلوني بيناتكن

    • منى 30 July 2013

      اهلا و سهلا يا جميل , نورتينا لينا و شرفتينا :)

  5. نور 30 July 2013

    الله‏ ‏يعطيك‏ ‏العافية‏ ‏بس‏ ‏دبس‏ ‏العنب‏ ‏كيف‏ ‏بحصل‏ ‏عليك‏ ‏وكيف‏ ‏طريقة‏ ‏صنعه؟

    • منى 31 July 2013

      اهلا و سهلا نور , بعد زمان :)
      و الله ما بعرف كيف منحضره , انا بالعادة بشتريه جاهز و هو متوفر كتير , وطني و كمان في نوع تركي

  6. نور 31 July 2013

    يسلمو مدام منى على الرد السريع أنا من اللادقيةوالدبس مو متوفرعنا

    • منى 31 July 2013

      نور لازم يكون متوفر , انا الي عندي كان معلبات شغل الادقية :)

  7. Malak Bash 4 August 2013

    منووشة
    من زمان عم أستنى هالوصفة
    للمعروك اللي بالدبس
    اللي ما بتحلى سفرة السحور إلا معه
    بس قوليلي كيف طلع معك ؟
    و سلّم إيديك إن شاء الله ^_^

    • منى 4 August 2013

      اهلييييين ملك , نورتي و بعد زمان يا قمر :)
      الله يسلمك يا رب , ان شا الله تكون الوصفة ع زوءك , اما بالنسبة لسؤالك فيااا باتل , معقول نزل وصفة هون بالموقع و ما تكون مية بالمية يممي !

      • Malak Bash 4 August 2013

        نورك يا منوشة … شايفة الله يرحم أيام زمان
        ممم تيب ^_^ أنا أصلاً واثقة بكل وصفاتك بس بحب أسأل :P
        يسلّم إيديكِ يا منى

        • منى 4 August 2013

          و انا بحب اسئلتك :)
          منرجعهن و ع احلى ان شا الله , تسلملي عيونك

  8. Ayah Sofyan 4 July 2014

    ماشاء الله شكلو طيب بإذن الله راح جربو يعني هاد المعروك بيختلف عن الطريقه التانية للمعروك؟؟

    • منى 4 July 2014

      اهليين ايوش , نورتي :)

      اي بيختلف بالمكونات و طريقة التحضير ، و التنين طيبييين

تقييم الوصفة
عاديةقد أحضرهاجيدةممتازةأكثر من رائعة (9 votes, average: 4.44 out of 5)