معمول مد


         وصفة : منى                 2013/08/10                 25 تعليقات
معمول مد

كل سنة و انتوا بالف خير , لكل زوار الموقع , و لكل عيلة لقمة طيبة القديمة , الي ما عادوا يطلوا هون و كلهن ع الفيس بوك شغاليين و تاركين البيت فاضي و بارد . إن شا الله بينعاد عليكن بصحة و عافية , و تلاقوا رمضان و نلاقيه و نحنا كاملين و سليميين باجسامنا و اولادنا و عيلاتنا و بيوتنا و املاكنا و ان شا الله سوريا تصير بخير و كل هل الغربتلية يرجعوا و ينوروا


انا مو كتير صحبة مع الحلو , و ممكن كتير يعدي علي اشهر ما كون دقت فيهن شي حلو غير التمر و الشوكولا , بس هل النوع بالذات من الحلو ما بقدر قاومه , مو معقول شو طيب , القشرة عم تقرش , و التمر عم يدوب , و نكهة القرفة و المحلب مع بعض و مع التمر بيعطوا طعمة بتاخد العقل , كلو على بعضو حلو و طيب و قطعة واحدة منه ما بتكفي .


و مو بس طيب , المعمول المد صفة سهلة مقارنة ببقية انواع الحلو العربي الي معوديين عليه , شغلتها بسيطة , و ممكن تنحشي بكتير حشوات , اليوم رح احشيها بالتمر , بس كمان في حشوة فستق و كاجو و جوز و قشطة , و فيها حتى حشوة شوكولا , و هل الانواع الطيبة كلها مستاهلة الواحد يجربها , لان كل واحدة منهم طعمة شكل .


أنا بحضره بالطحين , بس ممكن كمان يتحضر بالسميد , بنفس الطريقة و المقادير تمام , بس الفرق انو عجينة السميد لازم تتريح طول الليل قبل ما نشتغل فيها , بقى كل واحد هو و زوقه .


مرة تانية كل سنة و لكل بالف الف خير و بالصحة و الهنا



صورة تانية


شو لازمنا ؟
العجينة :

3 كوب طحين
1 كوب سمنة
رشة ملح
2 ملعقة صغيرة بيكنغ بودر
نصف كوب حليب أو ماء دافئ

الحشوة :

700 غ تمر مطحون
1 كوب ماء
1 ملعقة كبيرة زبدة ( اختياري )
ملعقة صغيرة قرفة
¼ ملعقة صغيرة محلب

للوجه :

سمسم حسب الحاجة
طريقة التحضير

1 – يوضع الطحين و البيكنغ بودر و الملح في وعاء و يقلب الكل سوياً .
الطحين و البيكنغ بودر و الملح , عم يستنوا فرج ربهن
2 - تسخن السمنة حتى تصبح ساخنة جداً , تسكب بحذر على الطحين .
السمنة سخنة كتير , عم اسكبها شوي شوي ع الطحين
3 – تقلب بملعقة حتى يمتص الطحين كل السمنة و يتشربه بالكامل . تترك جانباً حتى تفتر العجينة .
بالمعلقة منحرك الطحين و السمنة لحتى يشرب الطحين كل السمنة , هل الخطوة سر القرمشة , خش خش
4 – يضاف الحليب الساخن و تعجن بلطف حتى الحصول على عجينة متجانسة .
هلأ دور الحليب الدافي على الطحين المبثوث
5 – تغطى العجينة بشكل محكم و تترك لترتاح مدة ساعة .
بعدها منعجنها ع مهل , برقة و حنية حتى تصير عنا عجينة متجانسة , منغطيها كتير منيح و منخليها ترتاح
6 – في هذه الأثناء تحضر الحشوة , يوضع الماء و معجون التمر في وعاء صغير .
هلأ رح نبدى تحضير الحشوة , رح نحط معجون التمر مع شوية مي ع نار لطيفة و هادية
7 - توضع الحشوة على نار هادئة و تقلب بلطف حتى يذوب التمر في الماء , ترفع عن النار و تضاف القرفة و المحلب و الزبدة في حال استخدامها و تترك جانباً حتى تبرد .
منحركهن حتى يدوب التمر و يصير متجانس , اخر الشي منحط القرفة و المحلب و الزبدة
8 – تدهن صينية بايركس مستطيلة ( المقاس الكبير ) بالزبدة أو بالسمنة .

9 – تقسم العجينة إلى قسمين متساويين, يمد القسم الأول في الصينية و ترق العجينة بلطف كي تصبح متساوية السماكة من جميع الأطراف .
قسمنا العجينة نصين , مدينا اول نص في الصينية المدهونة
10 – باستخدام ملعقة توزع حشوة التمر على العجينة الممدودة .
هلا مدينا الحشوة المعطرة بالقرفة و المحلب بلطف ع كل العجينة
11 – يسوى السطح حتى تتوزع بالتساوي على كل العجينة .
هلا الحشوة اتوزعت بشكل متساوي ع العجينة
12 – يقطع القسم الثاني من العجينة إلى كرات , ترق كل كرة بين راحتي اليد و توضع على الحشوة . و تكرر العملية حتى تنتهي العجينة .
13 – يرش السمسم الأبيض على الوجه , توضع الصينية في الفريزر لمدة ساعة حتى يسهل تقطيعها , ثم تقطع باستخدام سكينة حادة إلى مستطيلات أو مربعات و الحجم حسب الرغبة .
هلا رشينا السمسم و حطينا العجينة في الفريزر شي نص ساعة , بعدها قطعناها و ع الخبز
14 – يحمى الفرن على درجة حرارة 180 مئوية لمدة 5 دقائق , يثبت المشك على الرف المتوسط . يخبز المعمول لمدة 10 – 20 دقيقة حتى يشقر القاع , يحمى الفرن من الأعلى و يترك لبضع دقائق حتى يشقر الوجه .

15 – ترفع الصينية من الفرن , تترك الصينية حتى تبرد تماماً و يفضل وضع المعمول في الثلاجة لتسهيل التقطيع و كي تحافظ الحبات على شكلها الجميل , يعاد التقطيع و تمرير السكينة الحادة بين القطع للتاكد من فصلها بعضها عن بعض , ترفع القطع بلطف و ترتب في طبق التقديم حسب الرغبة .

16 – تحفظ بقية الكمية في وعاء محكم الإغلاق , و يحافظ المعمول على نكهته و قوامه و قرشته لمدة تتجاوز 10 أيام .

التعليقات

  1. Lara Fansa 10 August 2013

    منى الغالية كل سنة وانت و عائلتك و اهلك و أحبابك سالمين … الله يحميكم و يصبركم و يرفع عنكم كل بلا
    انا من الناس اللي ما بهجر هال بيت لان الحمدلله ما عندي فيس بوك
    حبيت الوصفة شكلها سهلة كتير كتير الله يجزيكي كل خير يا رب

    • منى 11 August 2013

      أهلا و سهلا لارا حبيبة قلبي , ان شا الله تبقي بخير انت و كل عيلتك ..
      يخليلي ياك لاروش انت من اغلى الغوالي ع قلبي و من الناس البقيان منورة هون
      ان شا الله تجربي الوصفة و تكون ع زوءك

  2. Ammoon 10 August 2013

    الحبيبه مني. يسلموا ايديكي. صدقيني انو الزوار القدم ما حدا فيهم بيقدر يهجر هالبيت الحلو. انا شخصيا انقطعت فتره لانشغالي ولكن برد بطل كل فتره. ولكن الموقع تغير كتير علي عم بضيع شوي فيه. كانو القديم كان اسهل. عالاقل بالنسبه لي. دايما عالبال يا مني. الله يهدي الاحوال و ترجع سوريا الحبيبه احسن من الاول و يكونو كل السوريين متحدين و بخير. الوصفه رائعه مني. و الحلو فيها انا سهله و ما بتاخد وقت. يسلمو ايديكي. و كل عام و انتي و حبايبك الف خير

    • منى 11 August 2013

      اهليييين امونة و الله بعد زمان القمر الحلو ما بان ..
      ان شا الله يكون انشغالك باشيا حلوة و المهم ترجعي تطلطلي
      معك حق هو الموقع القديم كان ابسط , بس كمان هادا منيح , بس بدك فترة تتعودي عليه

      الله يسلمك يا روح قلبي و يا ريت تجربي الوصفة لحتى شوفها من تحت دياتك

  3. Mouzhira Antakli 10 August 2013

    تحياتي لكم وكل عام وانتم بالف خير وامن وامان

    يسلموا هالانامل كل الوصفات رائعه . لكن متل ماقالوا الاخوات المقادير مو موجوده .

    • منى 11 August 2013

      و انت بالف خير مزهرة , انت و كل عيلتك
      فعلا انا عدلت الوصفة اكتر من 10 مرات , الصور فيها كتيرة لهيك طارت المقادير بالغلط , هلا نزلت ..

      يا ريت تجربي الوصفة و تكون ع زوقك

  4. لارا مينا 19 August 2013

    سلام من الله عليكم
    كيف الغالين ؟؟
    , تعجز الكلمات إنها تعبر واليد تكتب
    , وكل عام والكل بخير ,
    والله للموقع وحشة مايعلم قدرها إلا رب العالمين ,
    ومن فترة كنت حابة أدخل بس كل شوي يطلع الرقم خطأ و اضطريت أغيره والحمد لله الحين زبط , كيف الغالية منى وكيف عيلتك وأهلك الله يحفظكم جميعا ,
    بعثت إيميل من فترة , والظروف هي اللي غيبتنا قسرا عن الموقع وشكل فيه أحداث كثيرة صارت مريت عالفيس بوك ع السريع وشفتها وإن شاء الله رح أزبط الفيس بوك هاليومين وأشاركم…..
    ع العموم ألف ألف ألف مبروك على ظهورك بالمجلات ووصفاتك الحلوة ,
    وقدرك أكبر من مجلة بكثييييييييير ,
    وأنا أكثر وحدة متشوقة لنزول كتابك الشخصي
    مع إني عادة مش من هواة شراء كتب الطبخ بس إنتي أكيد غيييييييير ,
    وكمان فكرت فكرة أي وحدة بالنسبة لي رح إهديها هدية بيكون كتابك سواء زواج نجاح وظيفة ولادة سفر و غيره
    ع الأقل برتاح من التفكير في هدايا لصديقاتي و إ يش أجيب و إيش أختار ؟؟

    وكلام الأخوات لارا وأمونة الجميل , اللي كتبوه فوق كان على طرف لساني ونفس اللي كنت رح أكتبه , أما الوصفة أعطيتها 5 نجوم سهلة مثل ماقالت الأخت ولذيذة جدا, والحلو في وصفاتك
    الميزة الرئيسية اللي ذكرتيها في المجلة إنها ماتعقد في مكوناتها أو طريقة تحضيرها خصوصا مع كثرة الأشغال ,

    سلمي على نفسك وعلى كل عيلتك وأهلك وبإذن الله مارح ننقطع عن بعض

    …… باي

  5. bent el deera 28 August 2013

    حبيبتي وغاليتي منى
    كل عام وانتي بخبر واسرتج الكريمه
    موقعج ووصفاتج ما استغنى عنها ولا استغنى عنج
    ربي يحفظج حبيبتي وتسلم ايدج على هالحلو الفاخر

    • منى 15 February 2014

      و انت بصحة و خير و الف الف عافية كويتية :)
      منتورة الموقع و الله و بعد زمان يا قمر , الله يديم النعم و الخير ع الكل

  6. سلمى 3 January 2014

    ست منى الله يبارك بعمرك ويسلم ايديكي جربت الوصفة وما كنت اشبع منها من طيابتها وقوامها يذوب بالتم بجنن
    دائماً بانتظار المزيد من ابداعك

  7. أم زمرده 22 January 2014

    ست منى حبيت أقول لك الله يحفظك من كل شر،، وأحب كل وصفاتك الرائعة

    • منى 23 January 2014

      شكرا يا روح قلبي , الله يخليك و يحفظلك حبابك و الله منورة :)

  8. rahafalhayek 21 June 2014

    يمممممي

  9. Mais Abu Ghuda 10 July 2014

    تسلم ايديك عالوصفة الروعة ..
    جربتها بالبيت و شكلتها متل المعمول العادي بعد ما درتها ع ماكينة الكبة 3 مرات
    العجينة متماسكة وسهلة .. وطلعوا قراص بعجوة غير شكل
    رشيت شوي سمسم بالقالب و اكبسها تطلع روووعة
    عم فكر اعتمد المقادير لحلو العيد :)

    • منى 10 July 2014

      يااا عيني شكرا كتير ع المعلومة , كتير عبيسألوني اذا ممكن نشكلها بالقالب و انا قلهن مو مجربتها

      اتشجعت ، شكرا جزيلا :)

  10. Mais Abu Ghuda 24 July 2014

    السميد اللي استخدمته هو الخشن نسيت اكتب ..

  11. Mais Abu Ghuda 24 July 2014

    انا استخدمت السميد الخشن مع نفس الطريقة .. وتركته ينبث 24 ساعة تقريبا

    • منى 24 July 2014

      شكرا كتيرررر ميس تعيش ايديكي ع الملاحظات :)

  12. ربا 29 August 2014

    شكرا ً على هذه الوصفة الشهية . . .

  13. Bb 19 January 2015

    هل تحتاج العجينة الي إضافة سكر ام يكتفى فقط بالتمر؟؟
    وبالنسبة لإضافة الحليب او الماء هل هناك افضليه ام كلها تعطي نفس النتيجة؟
    وآخر سؤال واعذريني ع كثرتها السمنة هل يمكن استبدالها بالزبدة لانها حاليا لاتتوفر لدي

    أشكرك ع الوصفة وجاري تجربتها بإذن الله بعد الحصول ع الاجوبة ::)

    • منى 19 January 2015

      هلا :)
      لا ما في داعي للسكر لان حلاوة التمر بتكفي و بتزيد
      الحليب طبعا اطيب ، في حال عدم توفره نستخدم الماء
      فيك تستبدلي الزبدة بالسمنة ، بس لو تدوبيها ع الميكرويف بيكون أفضل كطعم في حال استخدامها

      مية هلا

  14. هنادة 17 April 2015

    السلام عليكم ،

    شكراً كتير اختي منى ع الوصفة و ع كل الوصفات اللي بتقدميها بس ممكن سؤال ، منقدر نستبدل التمر بالمربى ( الفراولة ، المشمش…..)

    الله يبارك فيكي منى و بانتظار المزيد

    شكراً

    • منى 23 May 2015

      هلا هنادة شرفتي حبيبتي
      ممممم ، مالي مجربته بالمربى والله ، ما بقدر فيدك :(

تقييم الوصفة
عاديةقد أحضرهاجيدةممتازةأكثر من رائعة (17 votes, average: 4.12 out of 5)