الدقة الغزاوية


         وصفة : منى                 2014/07/26                 10 تعليقات
الدقة الغزاوية

من حوالي العشر ايام في واحد من جروبات التصوير الأجنبية إلي فيه ناس من مختلف أنحاء العالم , صار نقاش بين أصدقائي الفلسطينية من طرف و بين واحدة صهيونية من طرف تاني محضرة الدقة الغزاوية و كاتبة عليها سلطة اسرائيلية … هل الشي مو جديد علينا ، اكتب في الجوجل كلمات بحث عن المفتول الفلسطيني بيطلعلك نتائج فيها الكسكس الاسرائيلي , اكتب بحث عن الحمص بتلاقي بيطلعلك نتائج من كلاسيكيات المطبخ الاسرائيلي , و كأن المطبخ الإسرائيلي لحق يصير اله كلاسيكيات مثلاً ..

هل الحكي ممكن نشوفه شي بسيط و عادي ، بيقلك سرقوا الأرض وقت ع الطبخ .. و الجواب أنه لا مو عادي أبداً .. هي خطة ممنهجة بدهم يسحبوا مننا هويتنا و تراثنا و ما نستغرب بعد 50 سنة من هلأ مع كل هل الجهل بابسط أمورنا التاريخية يطلعلك جيل يقلك و الله يا زلمة الحمص الإسرائيلي طيب !!!

الي صار بعدها أن قسم من أصدقائي الفلسطينية تمت حذفهم من الجروب و قسم تاني انسحبوا ,و كلنا تم اتهامنا بمعاداة السامية :D
و متل ما بيقولوا مجنون يحكي و عاقل يسمع .. بس من كل هل الشي الي صار , ولدت فكرة نادي يجمعنا كلنا .. نحن المدونون العرب المهتمون بتدوين الوصفات , قررنا نعمل شي مشترك لتوثيق طبخاتنا و هيك انولدت مجموعة جديدة سميناها ” نكهة عربية ” … هي المجموعة فيها أهم المدونون العرب , و كل يوم عبتكبر أكتر و أكتر .. رح نختار كل شهر وصفة تراثية من بلد عربي , نحضره كلنا مع بعض و ننشرها على كل صفحاتنا و مدوناتنا .. و طبعا كان لازم تكون الدقة الغزاوية أول طبخة نحضرها مع بعض ..

الوصفة قدمتها نسرين الشوا , مبدعة الوصفات و التصوير الفني الي بيمتعك بمجرد رؤيته .. الوصفة رااائعة حرة و ريحتها منعشة جداً و كان أول مرة بستخدم بذور الشبت في مطبخي مع نوع سلطة و حبيته كتيررر , بس هي السلطة مو لأصحاب القلوب الضعيفة ، لازم يكون قلبك غزاوي لحتى تاكل منها و تتهنى .. اكتشفت ان دقتي كان بدها دق اكتر لأن القوام كان المفروض يكون انعم من هيك و شي متل المعجون .. المرة التانية رح انتبه لهي النقطة ان شا الله .

بالصحة و الهنا

-المقادير:

6 قرون فلفل أخضر حر، منزوع البذور ومفروم ناعم
1 حبة بصل متوسطة الحجم، مفرومة ناعم
1 - 2 ملعقة صغيرة بذور الشبت ( عين جرادة )
رشة ملح
2 حبة بندورة متوسطة الحجم، مفرومة ناعم
عصير ليمونة
3 - 4 ملعقة كبيرة زيت زيتون

- طريقة التحضير :

1 - تدق بذور الشبت جيداً مع الملح , يضاف الفلفل الأخضر و البصل و يدق الكل جيداً حتى الحصول على مزيج ناعم كالمعجون .

2 - تقشر البندورة و تضاف , تهرس بلطف حتى تنعم .

3 - تتبل بعصير الليمون و يعدل الملح و تقلب , يوزع زيت الزيتون على الوجه و تقدم عادة بوعاء المدقة .

4 - تقدم مع شرائح خبز محمص أو مع المقالي أو حسب الرغبة .

التعليقات

  1. حصة 27 July 2014

    تسلم ايديك شيف منى
    اكتشفت المدونة من ثلاث اسابيع تقريبا وماتتصورين سعادتي
    اعجبتني فكرة نكهة عربية :) لازم نحتفظ بتراثنا
    متحمسة للوصفات القادمة
    الله ينصركم وينصر فلسطين ونحتفل بالنصر سوا :)

    ووكل عام وانت ومن تحبين بخير وسعادة عيد سعيد على الجميع باذن الله

    • منى 28 July 2014

      صباح الخير حصة كل سنة و انت بالف خير :)

      نورت المدونة و انا و اسعد و الله ، الحمد لله الفكرة هلا لسا باولها و يوم عن يوم عبتكبر ، كل 25 بالشهر رح تنزل الوصفات اذا رب العالمين يسر

      اللهم اميين

  2. أم أحمد 2 August 2014

    لفتة ذكية.. أنا زوجي غزاوي وأنا من عكا.. وفعلا عندما سافرنا ذات مرة لبريطانيا صدمنا من الفلافل والخمص الإسرائيلي وفطاير السبانخ الإسرائيلية ومناقيش الزعتر الإسرائيلية والتبولة كذلك.. جد شيء “بيسطح”!!!!!

    • منى 7 August 2014

      و شي بيزعج كتير كمان ، بيفكروا بتفاصيل التفاصيل ، و نحا منتصرف ع العواطف و هي النتيجة

  3. ام محمد 16 August 2014

    تسلم ايدك على الموضوع وللأسف احنا انتبهنا متاخرين شوي بس ياتي الخير متاخرا خيرا من ان لا ياتي وان شاءالله كل شي بيرجع لنا ارضنا وما يتبعها

    • منى 27 October 2014

      ان شا الله ، هو كله بيتبع بعضه

      اللهم امين

  4. ام محمود 4 September 2014

    يسلم دياتك… من فترة كنت عم ادور ع وصفات عالنت لفتني صفحة بتحكي ع وصفات حلبية على انها من المطبخ اليهودي “الحلبي” وكتييير استغربت ، طبعا ما في شي بالصدفة خصوصا مع هدوﻻ البشر
    كان بدي احط رابط الصفحة بس ما في خيار لصق

    • منى 27 October 2014

      اهلا و سهلا ام محمود
      انا كمان مرة شفت طتاب كاتبه واحد يهودي من اصول حلبية ناسب اغلب وصفاتنا الهم .. شي عجيب فعلا

      يا ريت لو تحطي الرابط و فيك تلصقيه عن طريق ctrl+v

      منورة

  5. ضحى النضامي 4 November 2014

    تسلم هالايادي أنا من معجبينك شيف منى وبتابع وصفات ومهتمه جدا بالطبخ ولكن بدون مجامله التميز الي وجدته هنا لم اجد مثله وفقك الله اما بالنسبه للموضوع المهم بما يخص سرقة الاسرائيليين للوصفات العربيه والفلسطينيه تحديدا فانت محقه انا اعيش في اليونان منذ 8 سنوات وكل مرة ندعو اصدقاء غير عرب اطبخ ملوخيه ويسالوني عنها فاجيب هي molookyah وما اسمها باللغة الانجليزيه jews mellow ومعنى الاسم خبيزة اليهودي واشرح لهم انها اكله شعبيه مصريه وفلسطينيه يحاول الاسرائيليين محو ثقافتنا وهويتنا في كل شئ حتى الطبخ ولكن بئست هاذه المحاولات العقيمه فالمطبخ العربي معروف بكل العالم وليس وليد ايام والحمدلله

    • منى 5 November 2014

      شكرا يا ضحى على هل الكلام و تواجدك اسعدني جدااا
      فعلا و حتى الكسكس و المغربية ، لو يصحلهم يسرقوا الكحل من العين ما بيقصروا

      ع كل هي معركة مفتوحة و ما في مكان للضعيف و ما في حل غير انو نقوي حالنا ، كل واحد بمكانه :)

تقييم الوصفة
عاديةقد أحضرهاجيدةممتازةأكثر من رائعة (12 votes, average: 4.25 out of 5)