بازركان


         وصفة : منى                 2014/04/21                 10 تعليقات
بازركان

بازركان واحدة من السلطات الخفيفة الطيبة الي ما بينشبع منها , وقت يكونوا الشنكليشات طيبات , بس ما بديتي فيها ما بتشيلي ايدك ليخلص الصحن ع الأخير , هو و مرقته كمان , مع كاسة شاي و خبز تازة , اللهم أدم النعم و لا تجعلها إلى زوال .
هي السلطة بتذكرني بالسفر , نحنا بحلب ما منعرفها و لا منعملها , بس كنا دوما ناكل منها بصلنفة و باللادقية و بحمص و بجبلة , أيام ما كنا نقدر نسافر و الطرقات كانت مفتوحة , هلأ مناكل البازركان بالبيت و منتخيل البحر أو الجبل ادامنا , لوقت ما رب العالمين يفرجها على عباده .
كنت كل مرة دوقها بطريقة شكل , مرة مع بقدونس , مرة مع نعناع فريش , مرة مع زيتون أخضر , و مرة كانوا حاطيين معها شوي دبس رمان . رح اكتب الوصفة البسيطة الي بحضرها دوما و انت فيك تضيفي اشيا ع زوءك .

بالصحة و الهنا

-المقادير:

2 حبة كبيرة بندورة
1 حبة كبيرة خيار
ربع كوب زيتون , مخلى من البذر ( اختياري )
ربع حبة صغيرة بصل
1 – 2 حبة شنكليش
6 – 8 ملعقة كبيرة زيت زيتون
ملح
رشة نعناع
- طريقة التحضير :

1 - تفرم الخضار ناعماً جداً , تقلب مع الزيت و الملح و النعناع و توضع في طبق التقديم .
2 – يفرم الشنكليش و يوضع في منتصف الطبق , يقدم فوراً .

التعليقات

  1. farah 21 April 2014

    ممممم من وجبات الفطور المفضلة عنا ايام ما كانت متوفرة وقت كنت بالشام ضيفي حبيبتي رشة حبة البركة و رشة سمسم بقشره محمص على خلطتك بتعزز النكهة بتناغم مع باقي المكونات
    على فكرة صورتك روووعة ….

    • منى 21 April 2014

      من زوءك فرح , و الله و انا كمان غرامي , ممم حبيت الفكرة كتير , بكرة ع الفطور ان شا الله رح جربها
      تعيش دياتك و شكرا ع الاضافة كتير :)

  2. Farah 21 April 2014

    تسلم ايديك بس عملت الشنكليشات هي اول شغلة رح اعملا ان شا الله

    • منى 21 April 2014

      ان شا الله تجربيها و تكون طيبة و ع زوءك , و رح استنى رايك :)

  3. ديما 22 April 2014

    يسلمو دياتك يا منى عالوصفات الحلوة عملتا بس بدون خيار وزيتون مرقيلنا اياها :) وحطيت ورق نعنع أخضر وزعتر اخضر انا حبيت طعمة ورق الزعتر الأخضر معا جربيا راح ارفع صورة الصحن عالجروب :)

    • منى 22 April 2014

      ههههههه اي بمرق ليش لا , يلا عبستنى الصورة

  4. ياسمين 22 April 2014

    تسلم ايديكي موني

    • منى 22 April 2014

      الله يسلمك مية صحة :)

  5. هدولة 29 June 2014

    يسلم ايدك ست منى بس كيف ممكن اعمل الشنكلش بل فيتا؟

    • منى 30 June 2014

      اهليين هدولة :)
      بتبلي الفيتا من دون تنشيف بالتوابل ، و بتنتبهي ع الملح لان الفيتا مالحة , بتكوريهن و بتابعي الوصفة متل العادة ..

      هلا هي طيبة كتيرررر , بس مو شنكليش شنكليش

تقييم الوصفة
عاديةقد أحضرهاجيدةممتازةأكثر من رائعة (3 votes, average: 5.00 out of 5)