تبولة الملفوف


         وصفة : منى                 2011/03/10                 19 تعليقات
تبولة الملفوف

فكرة هل السلطة اجتني من سلطة دقتها بتركيا بمطعم صغير بيحضر وصفات بيتية , دايما الاتراك بيحضروا التبولة بخضار اضافية للبقدونس , يعني شي ملفوف شي جزر شي حمص و عن جد كتير كتير طيبات و تغير شكل .


اولادي ما بيحبوا الملفوف للاسف , لو شو ما عملت فيه بيكون الطبق بالاخير من نصيبي و نصيب ابو الشباب و انا بحب عودهم ان ياكلوا كل شي , قلت رح جرب هل السلطة على اعتبار ان صار الي 20 يوم فاقس كيفي على التبولة و كل يوم عم حضر جاط كبير على الغدا , المهم حضرتها و يا سلام يا سلام شو طيبة , القرمشة الي بحبها بالسلطة زادت و حتى ابو الشباب الي مو كتير صحبة مع التبولة قالي هي اطيب مرة بتطلع معك :)


الاولاد حبوها كتير , ما عدا جودي خانم ست الصبايا , على اعتبارها مغرمة بالتبولة , قالتلي هيك غيرتي طعمتها , قلتلها يا ستي كل يوم رح حضرها هيك حتى تبوسي التبولة و تاكلي ملفوف لحالك متل الحلويين .


كمية البرغل كتيرة شوي و انا هيك بحب تبولتي , انتي فيك تتحكمي بالكمية على زووءك .



بالصحة و الهنا





كوب برغل ناعم
عصير و بشر ليمونتان أو ثلاثة حبات ليمون
ثلث إلى نصف كوب زيت زيتون
1 حبة بصل صغيرة , أو 2 عود بصل أخضر , مفروم ناعماً
نصف باقة صغيرة نعناع مفروم , أو ملعقة كبيرة نعناع ناشف
ربع ملعقة صغيرة قرفة
ربع ملعقة صغيرة بهار مشكل , و انا دوما استعمل خلطة بهارات حلب
ملعقة صغيرة مسطحة ملح
2 باقة كبيرة بقدونس , مفرومة ناعماً
ربع حبة صغيرة ملفوف , مفرومة ناعماً
1 – 2 حبة بندورة , مفرومة ناعماً جداً ( اختياري )
نصف حبة صغيرة خس , مفرومة ناعماً




• يغسل البرغل جيداً , يقلب مع البصل ثم ينقع الكل بعصير الليمون و الزيت و القرفة و البهار و الملح , في حال استعمال النعناع الناشف يضاف في هذه المرحلة أيضاً . يترك البرغل حتى يطرى و يمكن أن يحضر قبل عدة ساعات من وقت التقديم .

• يقلب البقدونس و الملفوف و الخس و البندورة في حال استعمالها و النعناع مع البرغل و يعدل الحمض و الزيت حسب الرغبة و تقدم .

التعليقات

  1. om nabeel 10 March 2011

    تسلم الايادي منونة
    ان شاء الله بكرة رح جربهاواقولك النتايج
    شكلها بشهي كتير بالاضافةلفوائدها الرائعة
    منون بدي اغلظ عليكي واسالك عن شغلة
    اهلي جايين لعندي عالسعودية بعد اسبوع
    وكنت حابة فاجئن بشغلات كتير ومنن كعك العيد
    انا عملتو اكتر من مرة بس دائما يار الزيت بغلبني اما قليل او كتير انتي حاطة بالمقادير
    ا كوب زيت صغير شو هو الكوب الصغير بالزبط او اذا بتقدري تعطيني بالغرامات احسن مشكورة طولت عليكي

  2. بشرى 11 March 2011

    منظرها بيشهي .. رح جربها قريباً .. كتير عم حب السلطة هالفترة وعم حس حالي محتاجتا .. :zzz

  3. Noora 11 March 2011

    تسلم هل أيدين اخت منى هي التبولة بتشبه يلي بعملها بس أنا بطبخها على النار ورح نزل طريقتها بالموقع عن قريب إن شاء الله.ملاحظة:أنا عم أستنى وصفة خل التفاح بفارغ الصبر

  4. semo 11 March 2011

    ممممممممممممممم منوش والله فرط ريقي اول شي اسفة عالغياب المتكرر بس الحمل متعبني شوي بس فدا البيبي كلو بيهون
    انا قصتي بهالحمل اني مشتهية الحامض والمالح والتبولة بشكل خاص فاقس وحامي عليها والمشكلة اني مرتاحة ومابقدر ساويها وانا بالغربة ومافي جنبي حدا الحمد لله احيانا بجيبها من برة بتعرفي بدها شغلة وغسل ووقفة كتير بس شغل البيت غير
    :p
    يسلم دياتك على هالوصفة وصحتين للي اكلوها

  5. مريومة 11 March 2011

    كيفك مدام منى وصلوكي وصفاتي وانشالله يكونو عجبوكي عم استنا ردك :sigh

  6. haya 11 March 2011

    مرحبا منى انا قرأت الوصفة شكلها كثير لذيذ وان شاءالله اليوم بدي جربها لأن كل مكوناتها عندي بس بدي أسألك البهار الحلبي عبارة عن شو انا اسفة انا مو سورية ولهيك ما بعرف شو البهار الحلبي ياريت تفيديني وشكرا الك

  7. منى 12 March 2011

    هلا ام نبيل :)
    ان شاء الله تكون الجية ميسرة و تنبسطوا مع بعض

    يا ستي الكمية هي نصف كوب او ما يعادل 125 مل من الزيت , و تكرم عيونك ايا سؤال تاني انا بالخدمة ان شاء الله

  8. منى 12 March 2011

    هلا بشرى :)
    ان شاء الله عوافي , هلا لازمتك كتير و خصوصي البرغل الي فيها رح يفيدك ان شاء الله
    ديري بالك على حالك

  9. om nabeel 12 March 2011

    تسلم عيونك يامنون شو ذوق
    عفكرة انا بالموقع هو ام نبيل
    وبالفيس بوك (dura nahass)
    درة شكرا عالمقادير غلبتك
    عندي طريقة للسنبوسك رائعة حابة اقلك عليها
    بس وين بدي نزلها ما بعرف ياريت تقليلي وانا باقرب فرصة بنزلهاو بقولك عليها ان شاء الله

  10. آرام 23 March 2011

    حدا بيفطر تبولة ؟!!!
    إي أنا 8)
    نادراً ما كنت أعمل تبولة مع أني بحبها كتير، كنت آكل هم شغلها، بس فاقس كيفي هالأيام على الخضروات والحشائش .. حاسس حالي صاير خروف :roll
    بس عن جد لذيذة هالتبولة .. خصوصاً رشة القرفة، جديدة علي :)
    والشكر موصول لك دائماً أخت منى.

  11. بنت دير عطية 24 March 2011

    السلام عليكم
    شكراً كتير ع هالموقع الحلو وع الطبخات اللذيذة ويلي بتشهي كتير وبتخليكي تجوعي

  12. بنت دير عطية 24 March 2011

    ع فكرة ايام انا بحط مع التبولة ملفوف الاحمر كمان بيطلع كتير طيب ومنظرو ولونو مع التبولة لا يقاوم

  13. منى 24 March 2011

    هلا ام نبيل :)
    يا ستي اتشرفنا و نور الموقع فيك و كمان نور الفيس بوك
    فيكي تبعتيها هون عن طريق اتصل بنا او عن طريق رسالة في الفيس بوك الي بيريحك ;)

  14. منى 24 March 2011

    هلا نورا :)
    وصفتك جديدة , رح استناها و يا ريت لو قبل ما يخلص موسم الملفوف ;)
    ما بتاخر عليك الاسبوع الجاي اذا رب العالمين يسر

  15. منى 24 March 2011

    هلا سمسمة :)
    كيفك انت و كيف البي بي , ان شاء الله تكونوا تمام .
    هلا ديري بالك على حالك و تبقى بس تشدي تعملي كل الي مشتهية عليه

    طمنيني عنك دوما ;)

  16. منى 24 March 2011

    هلا مريومة :)
    وصلي و عجبوني كتير , تسلم ايديكي ;)

  17. منى 24 March 2011

    هلا هيا :)
    فيكي تشوفي وصفة البهار الحلبي بالضغط على الكلمة , و اذا مو متوفر عندك استعملي رشة صغيرة فلفل اسود مطحون تازة ;)

  18. منى 24 March 2011

    هلا اختي بنت دير عطية :)
    نورتي الموقع مية هلا فيك , بتمنى تبقى معنا دوما و تجربي شي و تحبيه ;)

    فكرة حلوة , اكيد بتطلع طيبة , شكرا لاغناء الوصفة :zzz

  19. منى 24 March 2011

    و الله و انا كمان صار الي فترة ما عم اتغدى الا حشيش بس عم اكل صحن صغير من الطبخة مشان عيون الاولاد
    بحب رشة القرفة , بحب طعمتها الغامضة و اللذيذة
    صحتين و هنا يا رب

تقييم الوصفة
عاديةقد أحضرهاجيدةممتازةأكثر من رائعة (2 votes, average: 2.50 out of 5)