دجاج ملوكي


         وصفة : منى                 2014/12/03                 10 تعليقات
دجاج ملوكي

اذا بتحبوا تجربوا وصفة تعجب الكل فانا بنصحك تجربوا هي الوصفة ، مو معقول شو هل الطعمة الي بتطلع معك بمكونات كتير بسيطة و متوفرة ع الاغلب تحت الايد .
طعمة الصوص مميزة بيستاهل يكون دجاج ملوكي و النكهة جاية من اكتر من شغلة ، اول الشي تقلاية البصل رح نقلي البصل حتى يشقر شوي من دون ما بغمق لونه ، هل التقلاية رح تلون بعدها الصوص و تعطيه طعم و لا أطيب ، و إذا عيلتكن ما بتحب البصل يكون ظاهر فيكن تقطعوه ناعم . السر التاني بالتوم البودرة ، رح يعطي طعمة بتجنننننن و ما بتشبه ابدا التوم العادي ، أخر شي هو استعمال الكورن فلور ، هل الاضافة الصغيرة رح تخلي الصوص ناعم و سلس و اطيب من الطحين .
هي الوصفة بحضرها صيف شتي ، من كم يوم خضرتها و استعمل جزر و بطاطا ، بايام الصيفية بستعمل فليفلة حمرا و خضرا ، إذا في فططر بستعمل بس فطر و هيك .. انتي اتحكمي بالمقادير حسب المتوفر عندك .
بالصحة و الهنا

-المقادير:

1 كيلو صدر دجاج ، مشفى من العظم و الجلد
ملعقة صغيرة زعتر أخضر
ملعقة صغيرة فليفلة حمراء ناعمة
نصف ملعقة صغيرة بهار مشكل
1 ملعقة كبيرة زبدة
2 - 3 ملعقة كبيرة زيت
2 حبة كبيرة بصل ن مقطع جوانح
4 كوب ماء
ملعقة صغيرة ثوم بودرة
2 كوب حليب
2 - 3 (ملعقة كبيرة نشا الذرة ( كورن فلور
للخضار يمكنك استخدام الخضار المتوفرة ( بطاطا مقشرة و مقطعة عيدان ، حبات جزر مقطع عيدان ، فليفلة حمراء أو خضراء مقطعة عيدان ، فطر مقطع شرائح )
- طريقة التحضير :

1 - تنقع صدور الدجاج بالملح البهار و الزعتر الأخضر و الفيفلة الحمراء الناعمة لمدة ساعتين .

2 -تذوب الزبدة مع الزيت على نار متوسطة , يضاف البصل و يقلب حتى يشقر ، تقوى النار و يضاف الدجاج المقطع و يقلب الكل حتى ينضج الدجاج و يجف مرقه و يكتسب بعض اللون .

3 - تضاف الخضار و تقلب لمدة دقيقتان إضافيتان . يغمر الكل بالماء و بترك حتى يغلي ،يضاف الثوم البودرة و يغطى القدر و يترك على نار هادئة لمدة 20 دقيقة أو حتى تنضج الخضار و الدجاج .

4 - يذوب النشاء بالحليب البارد و يضاف على القدر ، يقلب بلطف و يترك حتى يغلي مرة ثانية و يسمك لمدة 5 دقائق ، يقدم فوراً مع الأرز المفلفل .

التعليقات

  1. الاء 3 December 2014

    يسلم دياتك انا بثق بكللللل شي بتعمليه وبعمله وانا مغمضة….. شي مرة جربي حطي لهاد الصوص معلقة جبنة كاسات بتطلع خطيرة وقوامها بجننن وادعيلي

    • منى 3 December 2014

      ممممممم يا سلام الاء كتير حبيت هي الاضافة ، رح جربها اكيد ان شا الله
      الله يجبر بحاطرك ، منورة دايما

  2. Nosheen Zaza 4 December 2014

    شكرا على الوصفة الجديدة الي أكيد طيبة و سهلة. سؤال صغير هو انه شو الفرق بين استخدام حليب و نشاء أو استخدام كريم الطبخ بهيك وصفة؟ أنا بعمل هيك شي بس بكريم الطبخ.

    • منى 4 December 2014

      مسا الخيرات نوشين :)
      هلا في فرق بالطعم اكيد ، نحنا ما عادت الكريما متوفرة متل دايما لهيك عبستعملها .. جربيها و شوفي الفرق بنفسك

  3. helen 8 December 2014

    يسلموا ايديكي منى وأخيرا وصلت للموقع كان ضايع الباسورد هلأ فتت باسم جديد ومشي الحال
    كنت شوف هالآكلات الحلوة وماأقدر علق عليها من هلأ ورايح خدي اعجابات وتعليقات مني

    • منى 8 December 2014

      نورتي ياااا عسل و بعد زمان :)
      يا رب تجربي الوصفة و تحبيها و انا مبسوطة كتير فيك

  4. zena 22 December 2014

    مرحبا مدام منى وتسلم إيديكي على هالأكلة, شكلا رائع, بدي اسألك إذا بدي أعملا بمقادير أقل يعني نصف كيلو دجاج, بحط كمان نصف باقي المقادير: حليب,ماء,نشا ولا لأ ؟ ولو سمحتي إذا طلعت الصوص كتير مريق وكمية كبيرة كيف بسمكو ؟ وهو لازم يكون كتييير ولا لأ ؟

    • منى 26 December 2014

      اهلا و سهلا زينة نورتي الموقع
      اي طبعا بتقدري تعملي نص المقدار و كل شي بتقسميه للنص
      الصوص كميته مو كتيرة ، مناسبة لبقية المقادير و إذا حطيتي النشا المطلوب رح يكون سمكه ع الأصول ان شا الله

  5. سحر 10 January 2015

    مرحبة ست منى

    أنا مابعرف اطبخ أبدا أبدا ولا حتى بصراحة بعرف أسماء الأشياء بالمطبخ لذلك أعذريني لجهلي بس لازم أسأل شو الفرق بين الثوم البودرة والثوم العادي

    شكرا كثير على وصفاتك الحلوة

    • منى 19 January 2015

      اهلا و سهلا سحر و لا يهمك يا جميل :)
      التوم العادي هو التوم المعروف الفصوص ، اما التوم البودرة فهو متوفر في محلات العطارة و نكهته مختلفة عن التوم العادي و طعمته بتعطي نكهة مميزةللوصفات الأجنبية

تقييم الوصفة
عاديةقد أحضرهاجيدةممتازةأكثر من رائعة (4 votes, average: 4.00 out of 5)