سلطة الجرجير بالفطر


         وصفة : منى                 2009/05/24                 43 تعليقات
سلطة الجرجير بالفطر

اكتشفت ان نحنا شعب ما يقدر السلطات و لا يحترمها , و انا اسفة لهيك بداية بس هيك الحقيقة .

يعني بالوقت الي بكون انا مجربة فيه سلطة جديدة و بكون حاببتها كتير و يمكن عم افطر و اتغدى و اتعشى منها , لما بنزلها على الموقع بيكون التفاعل عليها قليل , و انا ما عم احكي عن الردود , عم احكي عن عدد المشاهدات و عن الناس الي جربتها , بقى هادا مؤشر عن شو منحب و شو ما منحب .

شغلة تانية , كلنا نسمع عن فوائد الرياضة , بس يا ترى كم واحدة فينا بتعمل رياضة . كلنا نعرف عن فوائد السلطة و الخضرة النية , بس يا ترى كم واحدة فينا بيكون على مائدة غداها طبق سلطة كبير لحتى تطعمي عيلتها الي هي مسؤولة عنهم و عن اكلهن و عن العادات الي رح يتعلموها و تسحب معهن طول عمرهن .

كمان مرة أسفة لأن حاسة في حدة بكلامي , بس عن جد شي بيلفت النظر , بتلاقي الشباب بأول طلعتهم بالشارع وقت الغدا , كل واحد ماسك بايده همبرغر أو تنتين , مع علبة كولا و للأمانة الغذائية بتكون دايت للتخفيف من الحريرات !! و في أحسن الحالات ما بيكون في سيكارة في ايدهم .

وجبات الفطور و الغداء و العشاء مو بس تعبية بطن و شبع , الطعام محبة و الفة و عيلة حلوة بتلتم مع بعض , على حديث حلو و على خبريات بعضهم . و لازم نعلم الأولاد احترام اللمة و احترام النعمة و بنفس الوقت نعلمهم كيف ياكلوا , لان التذوق فن و الطعام فن .

أسفة إذا زعجت حدا , و رح اسكت هلأ و ارجع لوصفة اليوم المحترمة , سلطة الجرجير بالفطر . بموت عليها هل السلطة , من كتر مو بسيطة و من كتر مو طيبة , بخمس دقايق بتكون جاهزة و حامضة و يا سلام ! و لازم حدى يجربها لحتى غير رايي :)

بالصحة و الهنا

-المقادير:

باقة جرجير
كوب فطر معلب ( يمكن استعمال فطر طازج أو كمأة و طريقة التحضير في المقدمة )
تلت كوب ذرة( اختياري )

الصلصة :

عصير ليمونة و بشرها
فص ثوم مهروس ( اختياري )
3 – 4 ملعقة كبيرة زيت زيتون
ملح
نصف ملعقة صغيرة كمون
نصف ملعقة صغيرة فليلفة حمراء ناعمة
- طريقة التحضير :


• تبشر الليمون و تعصر ثم تقلب مع الزيت و الملح و الكمون و الفليلفة الحمراء الناعمة و الثوم في حال استخدامه , تترك حتى اعداد بقية السلطة .

• يقطع الجرجير باليد لقطع كبيرة و يرتب في طبق التقديم .

• ينثر الفطر و الذرة فوق السلطة و أخيرا توزع الصلصة و تقدم فوراً .

التعليقات

  1. semo 25 May 2009

    والله انا معك نحنا شعب مابيهتم بالسلطة اهم شي النشويات واللحوم وهدا اللي مسمنا وفارط حيلنا

    انا كنت بالاول ما بدوق السطة ابدا لان الماما الله يخليلي ياها كانت تعمل سلطة عادية وماكانت مشجعة لبعد ماتزوجت

    وتعرفت على اغلى واحلى صديقة بالعالم هي عشقها الخضار ايمتى مارحت لعندا بلاقي بايدا جزرة اوخس او خيار وحتى الفليفلة الخضرا والكوسا

    كنت كتير استغرب بس لما شفتا كتف عم تاكل بشغف صرت اتشجع ودور على وصفات لسلطات والحمد لله بديت اكل كل انواع الخضرة وصرت حبها كتير

    عنجد يسلمو ايديكي بكرة ان شا الله رح اعملا

  2. منى 25 May 2009

    هلا سيمو :)
    كلام مظبوط , و كمان الحلويات لا ننساهم بالسمنة البلدي
    انا متل رفيقتك , بحب أكل كتير الخضرة نية , احم و حتى البيتنجان , لما بقشر البانجانة بأكل أولها , بيكون فيه حلاوة خفيفة و حتى اولادي طالعين متلي , بيتناتفوا على الخضرة النية مناتفة :grin

    ان شاء الله تجربيها و تكون طيبة و على زووءك

  3. semo 25 May 2009

    الله يخليلك ولادك والله شهيتيني اتعرف عليكي وعلى قطاطك

    بس قصة البيتنجان جديدة والله برافو عليكي ومنيح انو ولادك بيشبهوكي

    وانا لفت نظري بسلطة ورد الشتا انكن بتاكلو الزهرة نية والله انا ما بقدر دوقا او شم ريحتامطبوخة
    بقى كيف نية
    بصراحة برافو عليكن :zzz

  4. نوارة 25 May 2009

    والله حكيك صح يا ميمو انا بحب السلطات بس بحس انو ماعندي وقت اشتغل شغلة زيادة ايام بتحمس وبرجع ببرد بس صراحة هلق شجعتيني
    بس صراحة بعد ماتزوجت صرت غير صارت عندي الخضار شي اساسي بحياتي يعني بعمل الصندويش للشغل كتير ايام محمد بقول ماعرفت حالي عم باكل صندويشة مرتديلا دجاج 0000 ولا صندويشة خضار
    كانت عندي الفليفلة ما بتتاكل غير بالمناسبات 00000
    ومشان السلطة شكلها كتير طيبة وانا مرة بسوريا دقت سلطة فيها فطر وحبيتها بس هداك الوقت ما كان عندي حس طبخ :) ابدا
    رح اجربها ان شاء الله بتكون نفسها

  5. منى 26 May 2009

    هلا سيمو :)
    و الله طيبة الزهرة , يمكن بالول تكون غريبة بس بعد التجربة ممكن تتقبليها , و حتى البيتنجان كمان نفس الشي , بس أوله و بس يعني من كل حبة بيطلع الك لقمة واحدة طيبة ;)

  6. منى 26 May 2009

    هلا نوراة :)
    برافو عليك , قصدي على سندويشات محمد , و انا متلك , اما اعمل المرتديلا أو الهمبرغر بحط شي ورقتين تلاتة خس و اذا ما في خس بحط ملفوف , لازم تكون السندويشة كريسبي :zzz

    ان شاء الله تجربي هل السلطة و تطلع متل الي دقتيها او اطيب ,ديري بالك على حالك my lovely best friend 8)

  7. ام محمد 26 May 2009

    والله مظبوط كلامك يا منى انا كتير بفرم سلطة مع الاكل بس دائمابرجع الصحن مثل ماهويادوب اكلو منه معلقة او تنتين اولادي ابدا مو صحبة مع السلطةفبحاول دائمااحط الخضار بالسندويش :zzz
    منرجع لوصفتك الشهيةيسلمو دياتك وان شاءالله اليوم سوف اجربها 8)

  8. haya 26 May 2009

    مرحبا يا منى تسلم ايدك على السلطةانا كثير بعملها وهي كثير طيبة وانا بعمل السلطات كثير عندي بس مش يوميا وبشكل لهم كثير بالسطات وخاصة هي سلطة الجرجير لأنه الكل بيحبها بس انا بضيف لها بصل اخضر او حتى بصل ناشف يا الله شو بيعطيها طعم كثير لذيذ وخاصة اذا كان بصل اخضر

  9. منى 26 May 2009

    هلا ام محمد :)
    و الله مشكلة , بس منيح انك بتعوضيلهم الخضرة بغير شي .

    انا الحمد لله بالعكس , السلطة دايما حاضرة و بالاصل ما منخليهم ياكلوا سلطة الا للأخر لأن اذا رح اسمحلهم ما بيعودوا ياكلوا غير سلطة :)

    ان شاء الله تجربي الوصفة و تكون على زووءك و متل ما بتحبي

  10. منى 26 May 2009

    هلا هيا :)
    مم اكيد يمي مع البصل الاخضر , ان شاء الله رح جربها على طريقتك شكلها بيشهي :zzz
    الف شكر الك للوصفة شكلها كتير طيبة

  11. لين 26 May 2009

    يسلم اديكي لا عمري شفت ولا رح شوف ست بهل التفاني والاخلاص والاجتهاد يخزي العين عنك هون الانكليز بيعمرو اكتر منا لانو life style مختلف تماماواولها الاكل والاهم السلطات شكرا لالك ولحماسك والله يخليكي للكل يلي بيحبوكيو بتدخلي القلب بسرعة شكرا

  12. freesoul 26 May 2009

    المقدمة كتير حلوة
    نحنا فعلا منحب الاكل الدسم والسلطة دايما بتكون ثانوية باكلنا وحتى بعزايمنا .في ناس كتير ما بتحط سلطة بعزايمها منشان ما يعيبوا عليهم تخيلي.لازم العزيمة تكون محاشي ويبارق وكبة.
    سلطتك كتير طيبة انا بعملها بنفس الطريقة بس بدون ذرة
    راح جربها بذرة ان شاء الله .يسلمو يا ست الكل

  13. آرام 26 May 2009

    أخت منى يمكن كلامك مظبوط وبينطبق على كتير ناس، وخصوصاً الجيل القديم .. بس في نقطة مهمة .. عدم التفاعل مع وصفات السلطات مانو مقياس دقيق لمدى الاهتمام بها .. يمكن لأنو وصفات السلطة عموماً سهلة وواضحة وما بتستدعي أسئلة واستفسارات مثل وصفات الطبخ أو الحلويات مثلاً!
    كتير ناس بيستفيدوا من وصفات السلطة وبيطبقوها بدون تعليق، وأنا أولهم! جربت العديد من السلطات الموجودة في الموقع، وفرحت بها جداً، بس ما كان عندي تعليق غير أنها لذيذة جداً .. فما كتبت شي!

  14. منى 26 May 2009

    هلا لين :)
    كلك زووء اختي و الله خجلتيني بهل الرد و الكلام الحلو .

    كمان في شعوب متل اليابان عمرها مديد و صحتها عال من طبيعة طعامهم , و الواحد لازم يغير مو لطولة العمر و بس , لا للصحة و العافية ;)

  15. منى 26 May 2009

    هلا ام جود :)
    اول مرة بعرف ان السلطة في ناس بتعتبرها عيب في العزومات :eek شو هل الناس الي ما عندهم زوء و لا بيعرفوا ياكلوا , ايه و الله في أكل ما بينبلع اذا مو معه طبق سلطة

    الذرة في الوصفة لاضافة لون أكتر الشي و انا كتير احيان بعملها من دونها , يعني كيف ما بتحبي :zzz

  16. منى 26 May 2009

    هلا اخ أرام
    اخي مو قصة ردود و بس , ممكن تتصفح قسم السلطات و تشوف عدد القراء , و بعدها مباشرة روح لقسم الحلويات أو المعجنات و شوف عدد القراء و انت تشوف الفرق ! اكيد مو مقياس دقيق , بس فيه شي من الصحة
    على كل الاحوال الف صحة و هنا على كل الوصفات الي جربتها و طلعت طيبة و متل ما بتحب , عوافي ان شاء الله

  17. نور الأسلام 26 May 2009

    السلام عليكم كيفك منى تحياتي الك الظاهر السلطه رافعه قضيه :grin والله كلامك مزبوط قبل ماتعرف على الموقع ماكنت اعرف انواع من السلطات ونحنا عنا كانت السلطه فقط برمضان متواجده كل يوم علسفره وبغير رمضان فقط مع بعض الاطباق يسلمو اديك وتحياتي الك :zzz

  18. ميساء 26 May 2009

    عزيزتي منى كلامك صحيح تماما لأن أغلب الناس لا تهتم بالسلطات والخضروات وأنا بعرف عديد كبير جدا من الناس اللي صحن السلطة ما بينحط على سفرتهن بالشهر مرة بس أنا الحمد لله أولادي بيحبوا السلطات كتير و أنا بطبيعتي ميالة للأكل النباتي أكثر وصدقيني لولا زوجي ما بفكر أطبخ بلحمة غير وجبة واحدة بالأسبوع وعندي بنتي مايا ما بتحب ابدا قصص الfast food ولا يمكن تحط بتمها الا الوجبات المحضرة بالبيت متل البرغر والبيتزا والاسكالوب وغيرهم وبتقلي ماما أنا ما بحب أكل بره واذا اضطرت شي مرة كنا بمطعم ما بتاكل غير بطاطا مقلية وبتكون :( طولت عليكي بس بدي اتشكرك على هالملاحظة لأنها طالعة من قلب محب وما بتصور حدا من الأخوات بالموقع يكون انزعج من نصيحتك الغالية :zzz ولو يا ميمو بتموني

  19. بشرى 26 May 2009

    يميييييي ما أطيبا .. جربتا اليوم وكتير طيبة ..

    والله اليوم انتي طول الوقت عبالي يا منوشة .. شفت كتب طبخ بمكتبة جرير كتير حلوين وفي كتاب خصوصي عن السلطات اشتهيت اشتريه ووقت قررت سكر الكاشيير بلكي غير مرة ان شاء الله 8)

    يسلم إيدكي حبيبتي

  20. Iman 26 May 2009

    والله معك حق يا منى بكل كلمه. هلاء قمنا عن الغدا و صحن الصلطه يلي عملتو ضل زي ما هوه و ما حدا مسكو. بنتي بتقلي ماما كبه قمت حسيت بالذنب وقلتلا لا ماما يمكن انا راح اكله بعدين. بس وين بعدين انا عارفه حالي مش رح امسكه. مش عارف ليش لما يكون في اكل تاني مع السلطه ما امنمسكا بس لو كان الغدا عباره عن صحن سلطه و فوقه شي مشوي هذه الطريقه الوحيده لحتى ناكله. يعني لازم نغير طريقتنا و نحاول انو نجبر حالنا ناكل الشء المفيد مو بس الطيب. على العموم هذه السلطه اللي عاملتيها شكلا بيشهي و كتير مفيد انا بعمله بس مع السبانخ نفس الطريقه و الحلو فيها انو المشروم مدبل مع الزيت بيعطي طعمه لذيذه. تسلم ايديكي على كل شي عم بتقدميه يا منى. :)

  21. آرام 27 May 2009

    ما انتبهت لموضوع عدد القراء! كلامك صح للأسف الشديد .. عملت إحصائية .. متوسط عدد قراء صفحة السلطة 837 .. متوسط عدد قراء صفحة الحلويات 1414 .. النتيجة فاجأتني الصراحة!
    بتعرفي أختي .. أنا تلات أرباع أكلي سلطات ومقبلات ووجبات خفيفة .. مو لأنها صحية .. بس لأني بحبها .. ولأنها سهلة وسريعة التحضير .. سلطة الجرجير الملونة عملتها يومين متتاليين .. أول مرة على طريقتك حرفياً مع صحن متبل، والبارحة فرمت معها حبتين مخلل ثوم وأكلتها مع مرتديلا عجل مدخن .. ولا ألذ. على كل حال الي ما بياكلوا سلطة هنن الخسرانين!!
    الموضوع شجعني أجرب السلطات الي لسه ما جربتها!

  22. رنا 27 May 2009

    ولي ولي منى عصبت علينا :eek
    طولي بالك علينا منونة والله نحنا حبابين وحياة الله انا كل يوم باكل سلطة :grin بس مو متل سلطاتك المرتبة ياستي صحن السلطة الي بيعملوه بيت حماي موحد يوميا بس لازم الكل ياكل طبعا الاولاد مابيقربوا عليه …السلطة الي بيعملوها انا بسميها سلطة عربية لانه فيها كل الخضرة خس خيار جزر ملفوف احمر وابيض بصل اخضر اذا في خس بقدونس نعناع بقلة والحمض اما خل او ليمون ورشة كمون وفليفلة يعني بيطلع صحن هالقد قده بس والله مامنقدر بلاه …وماشاء الله عمي ابو زوجي عمرها تقريبا 80 سنة ومابيعاني من ولا مرض …الله يديمه بصحته وعافيته وطبعا السبب هو عادة غذائية ذهبية ويلي هي صحن السلطة كل يوم ..اما بالنسبة لبيت اهلي يوم ايه يوم لاء صن تبولة كل العيلة عندها غرام فيها :grin هلأ هيك انا طلعت براءة ياسيادة القاضي
    بس والله معك حق شعبنا ماكتير صحبة مع السلطة خصوصي الاولاد :roll

  23. رنا 27 May 2009

    التعليق لازم كان يكون عالوصفة …ياستي الجرجير كتير طيب وانا بحب الفطر لذلك اكيد السلطة طيبة وتغييير شكل بس المشكلة انه في ناس بتتلبك معدتها من اكل الفطر النئ وحتى لو من العلب مابعرف ليش
    بس انشالله رح جربها اول مابيجي جرير تازة :zzz

  24. أم الهدى 27 May 2009

    وحياة قلبك منوش لا تزعلي وتنحمقي ان شاء الله الناس شوي شوي وبتصير بتعرف أهمية الخضار والسلطة وبدخلها على وجباتها الأساسية
    ويا ستي أنا أول ما اتعرفت ع الموقع كنت عم دور في النت على أنواع سلطة جديدة غير يل بساويها وحصلت الصدفة الرائعة وتعرفت ع الموقع وكانت أول وصفة السلطة اليونانية اللذيذة جدا وبعدها سحبت معي ولزقت في الموقع
    الله يخليلنا أياه هو وصاحبتو
    وأنا كتيييييييييير بحب الخضار وخاصة الحشائش (نعناع بقدونس جرجير رشاد …….ز)
    في صندويشة دايما بحب آكلها ولما ولدت بنتي بعد الولادة كنت كل ما جوع في الليل أو بكير كتير أعمل وحدة لأنها مشبعة ومفيدة ومنيحة للحليب وهي عبارة عن خبز عربي بحط فيه كل شي خضار عندي بقدونس مع نعناع أخضر فليفلة خضرا وحمرة بندورة بصلة خضرا وشوية زيت زيتون وملح وكمون وكلي امممممممممم شو طيبة
    ع كل حال تسلم دياتك على كل وصفات السلطة خاصة وباقي الطبخات عامة وان شاء الله بوكرا رح جربها

  25. منى 30 May 2009

    هلا نور :)
    هلا يصير عندك تشكيلة اكبر و اوسع لتختاري منها , ان شاء الله تجربي و تصير طبق اساسي على السفرة :)

  26. منى 30 May 2009

    هلا ميوسة :)
    انا كمان بميل على الوصفات النباتية و بحب كتير تكون غداي و هلا جاينا الصيف و فيه كتير وصفات الواحد بيحضرها و ما بيشبع منها
    أبوسها بنوتك شو بتغرف القلب , ان شاء الله ربي يفرحك فيها و في كل حبابك :zzz

  27. منى 30 May 2009

    هلا بشورة :)
    الف صحة و هنا حبيبتي , بس ان شاء الله ما تكوني نسيتي تاكلي عني كم لقمة :roll
    يلا مو مشكلة على الكتاب , ان شاء الله بتشتريه مرة تانية و اذا جربتي منه شي سلطة لازم تعلمينا ياها :grin

  28. منى 30 May 2009

    هلا امونة :)
    كمان فكرة الي قلتيها , بس الواحد لازم يتعود على السلطة حتى لو ما بيحبها و لو بصحن صغير
    الله يسلم هل الديات على الفكرة الي ذكرتيها امونة و الشكر الك يا ست المعدلات :)

  29. منى 31 May 2009

    هلا رنونة :)
    لا عصبت و لا شي شو انا بقدر طالع شقاري عليكم , بعدها بتتركوني لحالي :grin
    ما شاء الله عمك الله يخليه بصحته و عافيته , فرحت على حالي لان انا عندي نفس العادة الذهبية
    براءة من زمان رنونة و لو , انا قاضي حباب و بس دمعتين بطالع الكل براءة :grin
    ان شاء الله تجربيها و تكون علتى زووءك و متل ما بتحبي

  30. منى 31 May 2009

    هلا ام هدى :)
    الف صحة و هنا على السلطة اليونانية , هي واحدة من الوصفات المميزة بالموقع بالصوص السري تبعها :zzz

    مممم , انا السندويشة الي قلتي عليها عندي اختها , بس باضافة جبنة , بتعرفي نحنا حلب من دون الجبنة ما بيسوى , ريتو الف صحة و هنا على قلبك و قلب البرنسيسة الصغنونة
    ان شاء الله تجربيها و تطلع متل ما بتحبي و اطيب ;)

  31. dado 1 June 2009

    مرحبا منوش
    يمكن ألذ بهدلة وتوبيخة بسمعها “بالأحرى بقراها” بحياتي..
    إي هيك ها.. فشي خلقك فنا شوي 8)
    والله معك حق.. نحنا شعب بيعتبر السلطة شي تكميلي.. وبالعزايم شي تحصيل حاصل.. بينما بالغرب بتلاقي السلطة أهم شي.. وغالبا بيحاولو يغنوا السلطة باللحم أو السمك لحتى هي تكون الوجبة الأساسية.. وهون في كتير مطاعم بتحط سلطات ضمن قائمة الوجبات الرئسية.
    بس مو الكل ما بيهتموا.. هلأ أنا جربت معظم السلطات والشوربات يلي عندك بالموقع.. لأني بحب هدول الصنفين من الأكل كتير.. وحتى لو ما كان في غيرن عالطاولة ما بزعل.. وبحاول يكونوا على سفرتي كل يوم. بس بصراحة.. ما بعرف ليش ما برد على وصفات السلطة .. يمكن نحنا بيهمنا كتير عنصر الإبهار.. ولهيك منفكر إنو يالله.. لك هو صحن سلطة مو محرزة الواحد يوقف عندها.
    بس إنتي انتبهتي قديش إجاكي ردود عالموضوع هون بعد ما بهدلتينا بالأول :grin
    هادا أكبر دليل إنو نحنا شعب ما بيجي إلا بالرص :p
    آسفة كتير منى إذا طولت عليكي..
    * بس ملاحظة بكرة عندي عزيمة وناوية جرب هالسلطة :)

  32. منى 1 June 2009

    هلا أخ أرام
    عن جد ما خطر ببالي و لا مرة ان أعمل احصائية , الأرقان الي قلتها أكدت ملاحظة انا كانت عندي بس من دون أرقام ..

    الف صحة و هنا على السلطة الي جربتها و كمان بالطريقة التانية فكرة حلوة كتير , و الله معك حق , انا كمان بالاساس ما باكلها بس لانها صحية , لان لان طيبة وفريش و بحس حالي بعد أكلها خفيفة و مو متدايقة

    ان شاء الله تجرب كمان سلطات و تكون على زووءك

  33. بشرى 2 June 2009

    يسلم إيديكي يارب شو عجبتن لأهلي .. وطلعت أطيب بكتير من المرة الماضية .. بتعرفي خضار بلدنا غير .. أنا بسوريا هلأ 8)

  34. منى 4 June 2009

    هلا دالو :)
    يعني بتعرفي حالك سكر و عسل و الا نو , لان حكياتك بيجننوا , ردك بقراه و برجع بقراه و كمان مرة و مرة و كل مرة بضحك من جوة قلبي كأن عم اقراه لاول مرة , دقيقة ااقراة مرة عاشرة :grin

    و الله مو بهدلة و لا شي و انا ما عم ااقصد على الردود , اقصد على عدد القراءات اولا ,على كل الاحوال انا ما بيطلعلي بهدل حدا , لان انا قطة و انوسة و مو صاحبة صوات :grin , بس الصراحة قلتي الحق , نحنا شعب ما بيجي الا بالرص

    شو صار بعزومتك :zzz

  35. منى 4 June 2009

    هلا بشورة :)
    يا ستي نورت سوريا كلها باحلى صبية ,الحمد لله على السلامة و كتير انبسطت انها عجبت العيلة :)

  36. dado 17 June 2009

    مرحبا
    أنا آسفة عالتأخير..
    بس التهيت بالوصفات الجديدة 8)
    عزيمتي كانت تمام والسلطة كانت أتمم.. عجبت ضيوفي والأهم من ذلك إنها عجبتني :p
    تسلمي يا منوش.. إنتي يلي حكياتك بياخدوا العقل.. وبتلاقيني بقرأ مقدمة الوصفة كذا مرة.. وأحيانا بكون عم بحبش بالموقع ولما بفتح شي وصفة قديمة محطوطة هيك بدون مقدمة بنفقس .. ولما بيكون في شي صفحة عم تفشي خلقك فيها ما بحب اقراها عالسريع.. لازم كون رايقة مشان استمتع فيها.
    وإنتي بتعرفي إنو كلامك هو من أهم الأسباب يلي بتعلق الواحد بموقعك. أكيد بالإضافة للوصفات الممتازة والثقة يلي بتتكون عند الشخص أول ما يقرا كلامك وشرحك :)

  37. منى 17 June 2009

    بتعرفي دالو اول ما بديت الموقع كنت دوما اكتب مقدمات , بس على اعتبار كان عدد الزوار لسا قليل فما كان حدا يرد علي , و صرت حس حالي متل الي عم يحكي مع حالو :grin و لهيك صرت نزل الوصفة من تم ساكت

    كتير انبسطت ان عزيمتك كانت ميسرة و صحة و هنا على قلب الجميع فردا فردا :zzz

  38. بتول الحلبية 12 July 2010

    ياستي بديان شعبنا يعرف شو هي السلطة وشو أهميتها
    يسلم ايديك مبينة رائعة وعندي وصفة سلطة فيها جرجير كمان بقى ان شاء الله ببعتلك ياها….ادعولي يا جماعة بقيان مادة للتخرج
    ;)

  39. lalosh 21 October 2011

    يا ماما شو لزيزة هالسلطة عنجد بتجنن .. انت كتير مبدعة مدام منى

  40. منى 22 October 2011

    صحتين و الف عافية حبيبتي ;)

  41. منى 22 October 2011

    هلا بتول :)
    ان شاء الله تجربيها و تحبيها

    طمنينا عنك , شو الاخبار , ان شاء الله بتنجي و منفرح فيك :zzz

  42. عبير الشام 15 July 2015

    يعطيكي العافية اخت منى ويسلم ايديكي
    حابة اسالك ازابدنا نستخدم الفطر الفريش لازم نطبخو ولا موضروري راريت تجاوبيني وشكرا الك

    • منى 18 July 2015

      انا بحبه فريش من دون طبخ ودوما بحضرها هيك :)

تقييم الوصفة
عاديةقد أحضرهاجيدةممتازةأكثر من رائعة (1 votes, average: 3.00 out of 5)