كاتو النسكافيه و الجوز


         وصفة : منى                 2014/05/13                 42 تعليقات

آخر تصويت


آخر تعليق

كاتو النسكافيه و الجوز

صار الي كتير زمان ما حضرت كيك ع مزاجي , و زمان ما دخلت ع المطبخ و قلت يلا ع شي حلو و جديد . ع جية الكهربا رجعت اتشجعت . و فتت ع المطبخ و قلت يلا علييهن :) حضرت هل الوصفة , كاتو النسكافيه و الجوز , و هي الوصفة رح تعجب كتير الصبايا الي بيدورا على وصفة فيها مكسرات لحتى تتوزع المكسرات في كل القالب , مو تغوص لتحت و تحترق , وصفة الكيك نفسها أنا معتمدتها من زمان بس بغير فيها شي كل مرة , و الكيك رح يطلع غني و بيدوب بالتم دوبان و ما في ثقوب , و هادا أكتر شي بحبه بالكيك . ما بحب أبدا الكيك النفاش الي بيشبه الكاتويات القديمة الهوائية , هو بيجوز يكون طيب , بس أنا ما كتير بحبه .
أما الكريما فكنت حابة حضر شي كمان فيه نسكافيه , بس شي ع السريع , خطرلي البيشاميل فطبقت شي قريب عليه , حطيت المقادير كلها على بعضها , و خفقة صغيرة على النار , رشة فانيليا , و قطعة زبدة و بس , أطيب و أشهى و أسهل كريما , و مو بس طيبة , كمان بتعطيكي شكل حلو ع الكيك , هيك بيصير كأنو متعوب عليه و أخد شغل خيرات الله منك , و انت بتكوني يا دوب كتيتي الكريما كت ع الكاتو , و أهما شي انك تستني الكريما شوي لتبرد قبل ما تصبيها , بس كمان مو تستنيها كتير بتعود بتصير قاسية و ما بتلبس القلب لبس , يعني وقت تحسي أنو الكريما بديت تسمك منصبها على مهلنا فوق الكاتو و هيك رح تغلفه كله بنعومة و تنزل على الأطراف بشكل مغري . و هل الكريما صار جربتها بالكراميل و كمان بالشوكولا و مرة تركتها سادة , كتير سهلة و طيبة
لهل القالب بحب أختار قالب كبير لحتى ما يكون الكيك سميك , لان ما رح أحشيه , بس كريما الوج . و كمان إذا بدك فيك تحضريه باللوز , أو بالجوز أو بالبندق , أيا نوع مكسرات بتحبيه , فيك تستعمليه حسب زوءك .
بتمنى تجربيه و بالصحة و الهنا

-المقادير:

باكيت و ربع زبدة طرية ( 250 غ )
كوب و نصف سكر ( إذا توفر السكر البني يفضل استعماله )
4 بيضات
فانيليا
نصف كوب لبن بقر
كوب ماء أو حليب
2 ملعقة كبيرة نسكافييه
3 كوب طحين
1 ملعقة كبيرة بيكنغ بودر
نصف ملعقة صغيرة ملح
نصف كوب جوز , مفروم

الكريما السحرية :

2 كوب حليب
2 ملعقة صغيرة نسكافيه
3 ملعقة كبيرة كورن فلور , نشا
نصف كوب سكر
نصف باكيت زبدة
فانيليا
للترطيب :
نصف كوب ماء ربع كوب سكر

للتزيين :
جوز مفروم حسب الرغبة
- طريقة التحضير :

1 - يدهن قالب كيك دائري كبير بالزبدة , ينخل الطحين و الملح و البيكنغ بودر و يترك جانباً , تذوب النسكافيه بالماء أو الحليب . يحمى الفرن على درجة حرارة 170 . يقلب مزيج الترطيب و يوضع جانباً حتى يذوب السكر .
2 - تخفق الزبدة الطرية لبضع دقائق حتى تبيض مع كشط الجوانب , يضاف السكر و الفانيليا و يخفق الكل حتى ينتفخ المزيج و يبيض , مع كشط الجوانب كل بضع دقائق , يضاف البيض بيضة بيضة , بالتدريج مع الخفق بعد كل اضافة حتى يستوعب المزيج البيضة الجديدة . يخفق حتى يصبح مزيج كثيف و لونه باهت .
3 - يضاف اللبن و الماء و يقلب حتى يصبح لدينا مزيج واحد , يضاف الطحين المنخول مع البيكنغ بودر و الملح . يقلب بلطف حتى يصبح المزيج متجانساً . يضاف الجوز و يقلب حتى يتوزع في كل المزيج .
4 - يصب المزيج في القالب المدهون , يخبز في الفرن على الرف المتوسط لمدة 45 دقيقة أو حتى ينضج . يترك حتى يبرد . يقلب على طبق التقديم . يسقى بمزيج الترطيب .
5 - تحضر الكريما : يوضع الحليب و النشا و السكر في وعاء و يقلب حتى يذوب النشا , تضاف النسكافيه و توضع الكريما على نار متوسطة , تقلب باستمرار بمضرب سلك حتى تسمك و تترك لتغلي لمدة دقيقة واحدة . يمكن اضافة المزيد من السكر حسب الرغبة , تبعد عن النار و تضاف الفانيليا و الزبدة و تقلب حتى تذوب الزبدة . تقلب لبضع دقائق حتى تخف درجة حرارتها و تسمك قليلاً . تصب على القالب على المنتصف بشكل بطيء حتى تغلفه .
6 - يزين الوجه بالجوز و يوضع الكاتو في البراد حتى وقت التقديم .

التعليقات

  1. منال 13 May 2014

    يمي يمي شكلو كتير طيب اكيد رح جربه قريبا تسلم ايدك والكريما كتير سهله واحلى شي انو المواد تبعه متوفرة بس عادة بلعب بعيارالزبدة فقط بحط نص زبدة ونص زيت مازولا بالكاتو

    • منى 13 May 2014

      ان شا الله بتجربيه و ما بتندمي :)
      يا ريت تخبريني رايك بعد التجربة و كيف طلع مع دمج الزيت و الزبدة

  2. suha.hindi 13 May 2014

    يسلمو ابدبكي منى بجد فنانة

    • منى 13 May 2014

      الله يسلمك يا قمر , شكراً :)

  3. ديما 14 May 2014

    اي شو هاد يا منى غرام وانتقام :) لازم جربو ضروري :) يسلم دياتك

    • منى 14 May 2014

      اي غراااام , لازم تجربيه و يارب يكون ع زوءك , شكرا كتير

  4. Nosheen Zaza 14 May 2014

    ولي على هذا الكيك شو رائع شكله. و بالجوز كمان لااااا كتير هيك. لازم أخترع شي مناسبة عن قريب مشان أعمله. يسلموا ايديك على الوصفة. أكيد لازم جربه.

    • منى 14 May 2014

      و كمان طعمته نوشين , اخترعي اخترعي , إذا بدك عزميني عليه :)

  5. رنيم 14 May 2014

    يسلم هالايدين مدام منى بتشهي بس لوسمحتي حابة اسألك حضرتك ذكرتي انو ممكن نستخدم نفس وصفة الكيك بوصفات تانية ياريت تعطيني افكار تانية لانو زوجي مابيحب نكهة النسكافيه انا كتير حبيت فكرة الكريمة وشكلا خطيير بس مثلا لو حبيت اعملا بالشوكولا او التوفي مثلا شو لازم اعمل او شو يلي لازم غيرو سواء بوصفة الكيك او الكريمة خاصة انو مذكور من ضمن مكونات الكيك النسكافيه
    طولت عليكي ( بس ماكتير عندي خبرة بالكيك او الكريمة بصراحة من كتر ماجربت كيكات وماظبط معي صرت بخاف ^_^ بتشكرك كتيييير

    • منى 14 May 2014

      اهلا و سهلا رنيم :)
      هلا ممكن تعملي الكيك نفسه بس سادة ,بنكهة الفانيليا و بس , و الكريما بتستغني عن السكر و بتحليها بصلصة الكراميل , أو ممكن تستخدمي معلقتين كورن فلور , معلقتين كاكاو ..
      ممكن كمان عواض تحطي مع الجوز شوي تمر مفروم , جوزك ايا نكهة بيحب ؟

  6. اية وهبة 14 May 2014

    يسلم دياااتك حبيتوو كتيييير لانو مكوناتو بسيطة والاحلى شرحك الرائع :)

    • منى 14 May 2014

      شكرا اية , ما بتتخيلي اديه مبسوطة لردك هون , رح استنى تجربتك و ان شا الله بيكون ع زوئك :)

  7. omomara 14 May 2014

    يسلموا دياتك يارب

    • منى 14 May 2014

      الله يسلمك حبيبتي :)

      • Asma 16 May 2014

        يسلمو دياتك ست منى. شي بيشهي وبإذن الله رح جربو

        • منى 17 May 2014

          اهلين اسما :)
          ان شا الله تجربيه و يكون متل ما بتحبي و اكتر

  8. رنيم 15 May 2014

    شكرا كتير مدام منى لزوئك وسعة صدرك وهالوصفات الرائعة

    حبيت فكرة اضافة التمر كتيير ,,زوجي كتيير عجبتو صورة الكيكة يلي عاملتيها وشكل الكريمة بس فكرها شوكولا وبدو ياها نفسها بس بصوص الشوكولا بدي اعملها نفسها بالشوكولا في اي نصائح لحتى اقدر اعمل الكريمة بنفس الطريقة وانا شفت بموقع لقمة طريقة صوص الشوكولا فيني استخدمها وتطلع هيك متل الكريمة يلي لهي الكيكة

    • منى 17 May 2014

      اهليين رنيم :)
      اي فيكي طبعا ، هلا الكريما بدها ٣ معالق كورن فلور ، انت استعملي تنتين و ضيفي معلقتين كاكاو و حركيهن ع البارد كتير منيح لحتى يدوبوا تمام ، و بعدها حضريها و استخدميها متل الوصفة تمام
      صوص الشكوكولا هداك غير استعمالات ، اكتر شي ع البوظة و الكريب :)

      ايا سؤال تاني من عيوني ا

  9. omomara 15 May 2014

    الله يمسيك بالخير منى
    بتعرفي صار لي زمان عم فوت عالموقع وأخذت منه كتيييير وصفات كلها نجحت معي ماشاء الله حولك
    وبكل مرة بدي أترك تعليق أو شكر لكن ما بعرف ليش ما عم يزبط تسجيلي بالموقع
    كنت ظانة انو لازم يجيني ايميل لحتى أقدر أشارك
    وامبارح كتبت جوابي السابق بس من باب التجربة
    وما بتتخيلي شأد فرحت وقت شفت جوابي وندمت على كل الأكلات اللي فاتت بدون تعليق مني خاصة اللحم بعجين
    بيومها دعيت لك من الصميم خاصة إني بالغربة وكنت عم أتوحم
    بس هلأ خلص من اليوم ورايح رح تشوفيني ناطة بكل طبخة بجربها

    • منى 17 May 2014

      يا ميت اهلا و سهلا و الله ، شرفتي و نورتي الموقع ، ريتو الف صحة و عافية ع اللحم بعجين ، وصفة بدها شطارة ، برافو عليك
      ، ممنونة ثقتك في كتير و رح استنى ردود ع كل الوصفات الي رح تجربيها يا عسل :)

  10. لينا 16 May 2014

    مرحبا منى كيفك
    شكل الكيك كتيير حلو وبشهي وانشالله رح جربو وقلك شو بصير معي
    بس انا بعتلك سؤال بوصفة مربى بشر البرتقال مابعرف اذا الكومنت ماوصل او ماقريتيه بس ياريت تكتبيلي رد لأنو كلشي جاهز عندي بس عم استنا ردك
    شكرا

    • منى 17 May 2014

      اسفة لينا ع التاخير ، كتبت الرد و يااا ريت يطلع المربى يميي و ع زؤءك
      و كمان يا ريت تجربي هل الوصفة :)

  11. شذا 17 May 2014

    يعطيكي ألف عافية مدام منى!
    الكعكة شكلها كثير حلو بس عندي سؤالين صغار:
    1. “كوب” يعني أي حجم؟ فيكي تقوليلي بالغرامات من بعد اذنك.
    2. ذكرتي بالكريما انه رح نحتاج نص باكيت زبدة، النص باكيت بيطلعو كم غرام؟

    شكرًا كثير الك

    • منى 17 May 2014

      اهلا شذا:)
      الكوب هو الكوب المعياري الي عياره ٢٥٠ للسوائل ، و فيكي تستعملي ماغ نسكافيه الأحمر اذا مو متوفر الكوب المعياري عندك
      الباكيت الي استعملته هو ٢٠٠ غ و نصه ١٠٠

      ايا سؤال تاني من عيوني

  12. رانو 20 May 2014

    السلام عليكم …كيفك منى …يسلم ايديكي على هالكيك …عملته مبارح وطار نصه من كتر مو طبب …بس ماطلع متل كيكتك ..الكريما مانجحت تمام..طلعت لونها افتح شوي …وقواما امرق شوي ..ومالا لمعة :( مابعرف ليش ..يمكن ما غليتا منيح …بس اللمعة وين راحت مابعرف..وعملتا بصينية مربعة مسان قطعا مربعات قام عذبتني بالتوزيع شوي …بس المهم الكيكة :) …يسلمو ايديكي ..عكل حال رح نزل الصورة بالكروب اذا الله راد

    • منى 20 May 2014

      و عليكم السلام رانو :)
      الحمد لله بخير و انت ان شا الله تمام ؟
      ممممم معناها معالق النشا كانت ممسوحة , هي بدها تغلي غلوة غلوتيين مو اكتر و بعدها منرفعها و منضيف الزبدة , معلش حاولي مرة تانية لان بس ما زبطت رح تعتمديها دوما ان شا الله , و مشان اللون , جربي زيدي الكمية لحتى يطلع متل ما بتحبي
      رح استنى الصورة :)

  13. fadia 3 June 2014

    الله يعطيكي العافية مدام منى

    • منى 3 June 2014

      الله يعافيكي فادية :) منورة

  14. Raz 17 June 2014

    مدام منى عندي سؤال فني و يمكن غليظ بس معلش لا تواخزيني…. هلأ فينا نستخدم شي بدال الزبدة او منقدر نخففها؟؟؟ انا ما بحب طعمة الزبدة و بخاف اعمل كانو بالزبدة فهال فينا نحط زيت كانولا بدال الزبدة و شقد الكمية او اذا فينا نخفف الزبدة؟!

    معلش تحمليني الله يخليكي

    • منى 26 June 2014

      اهلين حبيبتي :)
      هلا هل الوصفة طيابتها بالزبدة الي فيها , بس اذا ما بتحبي طعمتها خلص استبدليها بزيت و المقدار لهي اوصفة كاسة

      بسحضري الكاتو بطريقة عادية , عني خفق البيض و بعدها السكر و بعدها السوائل بالتناوب مع الطحين

      ايا سؤال تاني من عيوني

  15. منى شبار 22 June 2014

    ست منى يسلموا ايديكي بس عندي سوال عن خليط الترطيب بتقصدي فيه القطر اللي منعمله مع الكنافه مثلا ????يعني نحط المي والسكر و نغليه و بعدين نبرده و نضيفه عالكيك ؟؟وشو الخل لحتى الجوز ما ينزل لقع القالب و يحترق لانو انا بلوته شويه طحين و مع هيك بينزل لقعر القالب كل مره))) : و شكرا الك مسبقا

    • منى 23 June 2014

      اهليين منى :)
      خليط الترطيب هو المي و السكر الي قلبناهم مع بعض و موجويين بالمقادير , من دون غلي , بس تحريكة صغيرة ليدوب السكر

      بهي الوصفة ما رح ينزل الجوز لتحت , لان المزيج سميك , جربيه و رح يعجبك ان شا الله

  16. الدمشقية 5 August 2014

    انا اليوم جربت هالكيك اليوم بس بلا جوز وفعلا طلع روعة طعم ومنظر تسلم ايدك

    وكل يلي داقوه عجبهم فعلا

    بس سؤال للمرات القامة اذا ما سقيته بالماء والسكر باثر شي وشو فائدتها بعد اذنك

    • منى 15 February 2016

      ان شا الله بيكون ع زوقك بانتظار النتيجة

  17. جودي 10 August 2014

    ست منى شكرا كتير عالوصفة ويسلمو ايديكي شكل الكيك بشهي ومن اول ماشفتو قلت بدي اعمل متلو.. بس صار معي مشكلة غريبة مو صايرة مع حدا من الصبايا اللي جربو الوصفة، بعد ما خفقت الزبدة مع السكر والبيض والفانيليا تماما متل مو مكتوب بالوصفة حطيت نص كوب اللبن المذكور وبعدها كاسة الحليب اللي مدوب فيها النسكافيه، قام المزيج كلو فرط معي وعزل وصار شكلو متل المامونية

    • منى 15 February 2016

      اي معلش ، حتى لو هيك صار بيزبط اذا استمريتي بالوصفة

  18. لمى 26 June 2015

    مرحبا مدام منى
    رمضان كريم و ينعاد عليكي بالخير ان شاء
    كان عندي استفسار بالنسبة للبن البقر ما عرفت عنا بالمغرب شو هو و بشو ممكن اغيره اذا ممكن
    و كل سنة و انتي و لقمتنا بالف خير :) :*

    • منى 15 February 2016

      اللبن الي هو اليوغورت ، فيك تستبدليه بحليب مع شوية عصير ليمون اذا ما اتوفر

      منورة :)

  19. رنا 8 February 2016

    شكرا بس حابه اسال لازم تكون الزبده مذوبه ولا لا باكيت زبده عادي واخفقوا وشو يعني كشط الجوانب وشكرا

    • منى 15 February 2016

      لا الزبدة طرية بحرارة الغرفة ، وكل ما بيروح المزيج الكخفوق ع الاطراف ، بتقشطيهم و بترجعيهم لحتى تضربهم الخفاقة . هيك

  20. Yoshi 10 April 2016

    والله الكيك هاد شكله بشهييييي داااب قلبي معه

تقييم الوصفة
عاديةقد أحضرهاجيدةممتازةأكثر من رائعة (11 votes, average: 4.91 out of 5)