كب كيك ايطالي


         وصفة : منى                 2014/07/04                 30 تعليقات
كب كيك ايطالي

امبارح كان يوم مرهق بالنسبة الي ، عملت شي ألف شغلة و بالأخير وصلت ع التصوير ، كنت تعباانة و ما الي نفس ابداً ، بس لازم صور هل الكب كيكات الحلوات قبل ما يطيروا بعد الافطار ..

كانوا الصور بايخيين ، عبرتب و ظبط و صور و يطلعوا الصور بعدها كالحين مالحين ، قربت الشمس تروح ، و انا صوري ما بيطلعوا حلويين الا ع الشمس ، قلت رح ضبضب و حاج تصوير لليوم ، ملييت .. باخر دقيقة خطرت ببالي فكرة لترتيب الكيكات ، جبت ماغي المفضل و جربت الفكرة و طقة طقتيين ، طلعت معي هل الصورة الحلوة ..

في مشروع اسمه مية يوم من السعادة ، فكرته انو نحاول نكون سعيديين لمدة مية يوم , كل يوم ندور على شي بيعمل سعادتنا ، ما لازم ندور ع السعادة بمنجزات عملاقة ، التفاصيل الصغيرة هي السعادة .. ضحكة ابنك ، شوفة الشمس و هي عبتشرق ، جملة حلوة قريتها بكتاب ، صوت المطر ، ريحة الياسمين ، رسالة حلوة من صديق ، حتى قطعة شوكولا صغيرة مفهوم السعادة الي غير مفهوم السعاة الك ، بس لكلياتنا السعادة هي التفاصيل الصغيرة الي بتعدي و ع كتر مو متعوديين عليها منخليها تمر من دون ما نفكر فيها ، بس بعد ما تمر و نرجع بالذاكرة لورا ، منكتشف انها كانت سعادتنا

هي الصورة عملت يومي حلو ، كل ما شوفها عببتسم ، برج الشوكولا العملاق ، برج ميمو المائل

خلونا نفكر بتفاصيل ، مو باشيا ضخمة .. شو التفاصيل الي بتخليكم حاسيين بالسعادة ؟

منرجع لوصفة الكب كيك , كب كيك الشوكولا الرائع بالمكون السري الي ما بيخطر ع البال , القريشة أو الريكوتا أو حتى الحليب بعد ما بفرط و نصفيه ، كب كيك ايطالي وصفة من اروع الوصفات الي ممكن تحضريها في البيت ، رح تطلع الطعمة متل المحلات المشهورة الي بتبيع الب كيك , و الوصفة سهلللة ، و طعمتها رائعة غنية متل غيمة من الشوكولا ، و فوق هاد كتير الزبدة فيها قليلة ، لكل هل الكمية مستعملة بس ربع كوب ، مممم غراام . و كمان فوق هل الشي , الكب كيك بيطلع منفوخ و شكله بيجنن , باختصار هي الوصفة حاليا من وصفاتي المفضلة الي ما عبشبع منها

بتمنى تجربيها و بتمنى تعجبك و بالصحة و الهنا

-المقادير:

1 كوب قريشة , أو ريكوتا , أو كوب من فرط الحليب المصفى
2 بيض
فانيليا بودرة أو ملعقة صغيرة فانيليا سائلة
كوب و ثلث حليب
ربع كوب زبدة طرية جداً بدرجة حرارة الغرفة

-المقادير الجافة :

2 كوب طحين كاتو
نصف ملعفة صغيرة ملح
2 ملعقة صغيرة بيكنغ بودر
ثلثي كوب كاكاو
كوب و ربع سكر
- طريقة التحضير :

1 - يقاس كوب من القريشة الغير مملحة , يمكن تحضير القريشة في البيت و يمكن استعمال فرط الحليب , توضع في وعاء مع البيض و الفانيليا .

2 - تقلب لبضع دقائق حتى تمتزج المقادير .

3 - تضاف الزبدة الطرية جدا و الحليب ، يقلب الكل مرة أخرى .

4 - في وعاء أخر ينخل الطحين مع البيكنغ بودر و الملح ، يقلب مع الكاكاو و السكر .

5 - تضاف المواد الجافة دفعة واحدة على مزيج البيض و القريشة .

6 - تقلب المقادير بلطف حتى تتجانس .

7 - لا يخفق المزيج بشكل زائد كي لا يقسى بعد الخبز .

8- باستخدام ملعقة البوظة ، يوزع مزيج الكيك في القوالب الصغيرة

9 - الكمية تعطينا 24 قالب من الحجم الظاهر بالصورة .

10 - لافضل نتيجة يملئ ثلثي القالب .

11- يخبز الكب كيك في الفرن المحمى على درجة حرارة 180 درجة مئوية لمدة 20 دقيقة أو حتى ينتفخ ، يترك حتى يبرد و يقدم مع كوب حليب أو حسب الرغبة .


الوصفة مستوحاة من كتاب Mollie Katzen's Sunlight Cafe

تفاصيل أكتر عن مشروع مئة يوم من السعادة

التعليقات

  1. Hadeel 4 July 2014

    يعطيكي العافية منى شي روعة
    هلأ في بالسوق ريكوتا جاهزة فينا نستخدمها ؟؟ ولا قصدك شي تاني

    • منى 4 July 2014

      مسا الخير هديل :)
      طبعا فيك تستخدميها , اما ريكوتا او قريشة او حليب تفرطيه , الي متوفر عندك استعمليه

  2. Raz 5 July 2014

    شكلا يمييييي بدي جربها بهالكم يوم

    • منى 8 July 2014

      ان شا الله تجربيها و تكون ع زووءك :)

  3. om nabeel 6 July 2014

    تسلم ايديك أحلى منی واحلى شيف بالعالم
    كل يوم عم اقرأ معك ايام السعادة تبعك
    وعم حس انو لحظات سعادتي عم تصير اكتر لما اقرأ
    لحظات سعادة الآخرين
    الله يحميك منی ويجعلك من السعداء في الدارين يارب

    • منى 9 July 2014

      ان شا الله مبسوطة ع طول ، أغلى دعوات ع قلبي يا رب انت كمان ، الله يجمعنا ع خيرررر دوما :
      شكرا كتير

  4. لارا مينا 6 July 2014

    السلام عليكم أختي وصديقتي منى ، كيف الحال والأحوال ؟
    ورمضان كريم وكل عام وأنتوا بألف خير ، ويارب تزول الأيام الصعبة عنا وعنكم وعن كل إنسان في هاالدنيا …..
    الله الشاهد كيف مشتااااااااااااااااااقة لكم ،
    ويارب أهلك وأولادك بألف خير ، ويارب تكونوا جميعاً من سعادة في سعادة …
    المقدمة كثيييييييير حلوه، والصورة احترافية ،
    أحياناً الصحة هي أكبر سعادة ، والمفروض اليوم اللي بيمر علينا وإحنا بصحة هو أسعد يوم ، ومثل ماتفضلتي أحياناً التفاصيل الصغيرة الروتينية والمتكررة هي سر السعادة اللي مابنحس فيها مثل الأمان شوفة الأهل والأحباب والفراغ والنوم والراحة والوظيفة وووو …….. ،
    ومجرد ما تروح ، فجأة نلفت نظر لها ونتمنى لو ترجع ، الوصفة بتجن ن وع التجريب خصوصاً أنا من محبي الكيك السادة من دون كريمة أو خلطة أو حشوة .
    سلام من الله عليكم .

    • منى 7 July 2014

      و عليكم السلام و الاكرام لارا حبيبة قلبي , و الله بعد زمان

      اللهم امين , أحلى و أغلى دعوات و الله ..
      التفاصيل التفاصيل دوما هي السر ورا سعادتنا و كمان تعاستنا , لهيك مرات بتلاقي ناس عندها كل شي و مو سعيدة و ناس عايشة ببساطة و مالكة الدنيا

      هل الكيك أكيد بيعجبك و بيكون ع زوءك , وصفة من اروع ما يكون ، يا ريت لو شوف شي صورة الها منك

      منوررة حبيبتي

  5. نسرين 9 July 2014

    خيييييييييله
    الصورة خيله فعلا حلوة و الكب كيك مبين بيجنن انا بحب الكب كيك وبحب الشوكولا كتييييير
    بالنسبه للقريشه او الريكوتا مافي اي تفضيل بيناتهن في حال تواجد عندي الاتنين؟؟؟

    • منى 9 July 2014

      أهلييين نسرين :)
      و الله خيلة و الطعم رائع رح تحبيها ان شا الله كتيررر
      ما ي فرق , المتوفر استعمليها و كلو بيطلع طيب

  6. نسرين 9 July 2014

    سؤال تاني معلش اتحمليني شوي
    ماعندي صينيه الكب كيك فيني ساويها بجاط بايركس مثلا؟؟؟

    • منى 9 July 2014

      اي طبعا فيكي تحضريه بقالب كيك او بايركس او الي بيريحك :)

  7. لموس 20 July 2014

    يعطيك الف عافيه مني ياليت تخبريني اذا عندك صغحه بالانستقرام واذا مافي ياليت تعملي انت شيف شطوره الله يسعدك

    • منى 21 July 2014

      صباح الخير لموس :)
      الله يافيك نورتي يا جميل
      اي عندي بس ما الي متبعتها كتير , رح حاول زبطها اكتر

      هي الرابط
      http://instagram.com/monasaboni

      شكرا ع الاهتمام

  8. Nour Al Jabri 26 July 2014

    الله يعطيكي العافية وصفاتك كلا بتجنن ما شالله عليكي كتير مذوقة بكل شي بحكيك و بتصويرك ما شاالله ..
    بدي اسألك بس كوب القريشة .. كم ليتر حليب لازم اعمل حتى تطلع كوب قريشة ؟
    و يسلمو كتير

    • منى 26 July 2014

      شكرا نور من زووءك يا قمر :) كل كيلو حليب بيعطيكي كوب او ااقل شوي بيختلف مرة عن مرة حسب الحليب اذا كان مزبوط او مغشوش

      منورة

  9. Raz 5 August 2014

    كيف فيني افرط الحليب؟؟؟؟؟؟؟ لأن ما عندي لا قريشة و لا ريكوتا و لا حليب فارط :(

  10. Nosheen Zaza 9 August 2014

    هلا في الفرن و لنشوف النتيجة. ريحة الخليط كتير لذيذة. ألف شكر على الوصفة :)

    • منى 27 October 2014

      يم يمممم يا رب يعجبك يا جميلة

  11. ام محمد معتز 26 December 2014

    يعطيك العافية اخت منى ….. ♡♡♡كتير مشتهية جرب هالوصفة بس ماكان عندي غير الاكواب الورقية وماعندي الصينية فقلت اكيد مارح يزبطوا بس اليوم اشتريت متل الاكواب الي عندك سيلكون فممكن استخدمهم من دون الصينية ولا مابيصيرررر:’(

    • منى 26 December 2014

      اهلا ام محمد معتز :)
      ممممم ما جربتهن من دون صينية ، ما بعرف اذا بيتحملوا او بيميلوا ع الخبز

  12. ام محمد معتز 26 December 2014

    شكرا عالرد السريع اخت منى …بجرب وبشوف شوبصيرر ان شاء الله بيمشي الحال من دون الصينية .♧

    • منى 27 December 2014

      ان شا الله
      يا ريت تخبريني النتيجة لحتى استفاد من خبرتك

  13. ام محمد معتز 1 January 2015

    السلام عليكم اخت منى …الله يعطيك العافية على الوصفات الرائعة جربت وصفتين للكب كيك ( كب كيك الخمس دقايق والايطالي) وكانوا ناجحين وطيبين …جربتهم بقوالب السيلكون وحطيتهم بصينية عادية مشي الحال من دون مشاكل .♡♥

    • منى 1 January 2015

      صحتييين و مليون عافية يا قمر ، و شكرا جزيلا لمشاركتك تجربتك ، شجعتيني جرب انا كمان
      صفيتيهم ع صينية المنيوم و الا كيف ؟

  14. لارا مينا 26 February 2015

    عملت الكب كيك طيب مع الشاي والحليب ، وقت الصبح والعصر ..
    وسكره قليل ومناسب ،
    لأَنِّي ما أحب أي حلو أو شراب ، سكره زايد …
    والصورة صارت بالفايس بوك

    • منى 26 February 2015

      يمممممم تعيش دياتك لارا وانا ممنونة ثقتك في والصورة اليمي الي نزلتيها
      وبعد زمان يا غالية

  15. لارا مينا 19 July 2014

    من عيوني حبيبة قلبي منى ، وصيت على الري كوتا ، وأول ماتوصل إن شاء الله بعملها ، وبنزل صورتها في صفحتك عالفايس بوك .

  16. منى 19 July 2014

    بالاتظار لاروش :)

تقييم الوصفة
عاديةقد أحضرهاجيدةممتازةأكثر من رائعة (5 votes, average: 4.00 out of 5)