كرات البطاطا بحشوة اللحمة و الجبنة


         وصفة : منى                 2008/03/24                 84 تعليقات
كرات البطاطا بحشوة اللحمة و الجبنة



نصف كيلو بطاطا مسلوقة و مهروسة بالشوكة
3 ملعقة صغيرة نشاء
ملح
نصف كوب ماء أو حليب حسب الموجود

الحشوة :

200 غرام لحمة مفرومة ناعم
نصف بصلة
بصل اخضر (حوالي عرقين مفروم ناعم )
2 معلقة كبيرة كزبرة خضراء
4 ملاعق زيت زيتون
بهارات مشكلة
خمس حبات جبن كيري مقطعة أرباع

للقلي :

زيت قلي غزير بيضة مخفوقة بقسماط bread crump





• تهرس البطاطا مع النشاء و الملح و الحليب .

• تحمس اللحمة بالزيت و البصل و تتبل بالملح و الفلفل و البهارات .

• بعد أن تستوي اللحمة تضاف الكزبرة الخضراء و تطفى النار .

• تشكل البطاطا على شكل كرة صغيرة و تعمل حفرة بالوسط و تحشى بحشوة اللحمة و يوضع فوقها ربع قطعة جبنة كيري ثم يغلق قرص البطاطا .

• تكرر العملية حتى تنتهي الحشوة و البطاطا ثم تغمس الأقراص بالبيض ثم البقسماط ثم تقلى و تقدم ساخنة و صحتين .


  • وصفات تانية ممكن تعجبك


التعليقات

  1. منى 24 March 2008

    ليندا شو هل الوصفة , كتير كتير بتشهي و انا هل الترتيبة كتير بحبها , لو عندي كزبرة خضراء كنت جربتها فوراً ..

    تسلم دياتك يا رب و رح جرب الوصفة هل اليوميين إن شاء الله و ببقى بقلك ..

    يا ترى النشاء بقدر استبدله بالكورن فلاور ؟ و الا ما بيمشي الحال ؟

  2. نورا 24 March 2008

    يسلموا إيديكي يا رب .. شكلها سهلة وطيبة بس سؤالي: قبل حوالي سنة مرة جوزي بالغلط جاب لي كزبرة بدل البقدونس وما نتبهت وجربتها بالغلط بشي اكلة وطلعت الطعمة مأساوية كأنه عباكل صابون ومن وقتها ما رجعت جربت الكزبرة الخضراء ولا بطيق سيرتها فسؤالي: شو طعمتها فعلاً؟؟؟ لانه بشوف منى بتحطيها في كتير اماكن وكتير وصفات كمان بدها كزبرة خضراء بلغيها مشان طعمتها؟؟؟ وإذا طعمتها مو زيادة بقدر استبدلها بالبقدونس مثلاً؟؟؟

  3. أم عباده 24 March 2008

    تسلم دياتك ليندا كتير بحب هالاكله وبجيبا جاهزه احيانابس ما بتكون محشيه لحمه جبنه موزاريلا بس وبعدماشفت طريقتك خلص بدي اجربها شكلها رائع وشهي يعطيك الف عافيه :)

  4. منى 25 March 2008

    هلا نورا :) بعد زمان القمر ما بان

    الكزبرة الخضراء كتير طيبة , بس الي صار معك طبيعي , أهل حلب على الأغلب ما بيطيقوها , لان مو متعوديين عليها ..
    بس هي طيبة , أول مرة بتاكليها بتقرفي عمرك و المرة التانية بتقرفي حياتك , بس المرة التالتة رح تتعودي على هل الطعمة و يمكن المرة الرابعة تحبيها ;)

    أنا أول مرة جربتها , كانت شوربة البندورة و فيها كزبرة , أكلت من الشوربة أنا لقمة و جوزي لقمة و بعد ما اتطلعا ببعض قمت و كبيت الشوربة , و جربتها مرة تانية و نفس النتيجة فما بقى عدت دخلتها لبيتي ..
    بس مرة كنا بالغراند و طلبنا الاكييف و كانت الكزبرة في الحشوة بس بصورة خفيفة و كتير حبيناها , لهيك عدت و رجعت استعملتها ..
    نصيحة ممكن تجربيها بالاول بكمية صغيرة كتير لحتى تتعودا عليها و رح تحبيها أكيد ..

    هلا في بعض الوصفات ممكن تستبدلي الكزبرة بالبقدونس , و في منهم لأ , أظن هل الوصفة فيك تستبدليها 8) و كمان نستنى راي ليندا

  5. omtasneem 25 March 2008

    السلام عليكم ورحمة الله وبركاته. صحيح متل ماقالوا اخواتي منى ام عبادة نورا شكلامنفنف وكتير سهلة رح جربها وخبرك يعطيك الف عافيةlinda

  6. linda 25 March 2008

    السلام عليكم ورحمة الله وبركاته
    منى حبيبتي جربيها و انشالله تعجبكن انا كتير بحبا

    بالنسبة للنشا هو مشان يمسك عجينة البطاطا لما نشكلها اقراص
    و بيمشي حال الكورن فلاور ان شاء الله

    [img]null[/img][URL=null]null[/URL]

  7. Rino 25 March 2008

    تسلم إيديكي أختي ليندا على وصفتك بتشهي أنا بعملها كمان بس بشوية إختلاف و دايما بحشيها جبنة بحب أخلط الجبنة القشقوان مع جبنة مغلية (مسنرة ) و بحشيها كمان بتطلع بتعقد مزج أكتر من نوع من الجبن بيعطي نتايج رائعة
    بانتظار المزيد منك حبيبتي

  8. linda 25 March 2008

    اختي نورا نحنا الكزبرة الخضرا بالشام منستعملها عادة و ببيت اهلي و بيت جدي
    كنا ناكلها خضرا مع الزيتون الاسود

    هلاء متل ما قالت منى ممكن تجربي بالبداية بكم ورقة يعني شي معلقة وحدة و فرميها ناعم كتير او دقيها مع التوم كتير طيبة بالاكل انا بضيفها لكل شي تقريبا

    و ازا كان لابد و خايفة استبدليها بالبقدونس :grin
    و الف صحة سلف

  9. linda 25 March 2008

    هلا أخت ام عبادة
    انا حسيتا باللحمة اطيب
    شكرا الك على الرد و الكلام الطيب
    ان شالله تجربيها و تحبيها

  10. rose reem 25 March 2008

    سلامي للكل :) انا صايمة ورح اعملها عالفطار واخبركن :zzz بس في شغلة منى الغاليةالموقع ما عم ينتسخ منه على الword,ولا عم ينحط على المفضلةمتل قبل :sigh يا ترى شو السبب :?

  11. منى 25 March 2008

    هلا ريم :) الله يتقبل صيامك يا رب و يزيد و يعلي مراتبك

    حبيبتي النسخ حالياً ممنوع في الموقع بسبب السرقات الهائلة من الموقع لمواقع أخرى بدون ذكر المصدر :sigh أما هي قصة المفضلة فرح أسأل عليها المهندس المختص ..

    نورتي يا قمر , من كم يوم مريت بدير عطية و اتذكرتك ;)

  12. نورا 25 March 2008

    بتعرفي يا منى ويا ليندا رح تشجعوني انه أرجع اجرب الكزبرة وخصوصاً انه في اغلب برامج الطبخ الغربية كمان بشوفهم كتير بيستعملوها وبعرف انها مفضلة عند اهل الشام فخطرلي لما جربتها انه انا غاسلتها زيادة أو هيك شي :grin على كل رح جرب نصيحتكم وأستعمل كمية قليلة لانه عن جد شكل الاكلة بيشهي ويسلموا إيديكي يا ليندا…

  13. rose reem 25 March 2008

    مسا الورد…عملت الوصفة وطلعت طيبة كتير :p يسلمو دياتك ليندا بس تلبكت بتشكيلها لانوالمزيج صار دبئ شوي واضطريت ازيدها طحين واحطها بالفريزر شوي :) منى الحبيبة.. يا ريت عندي خبر لما مريتي كنت كسبتك، دير عطية حلوة وهواها نضيف (فيها اكتر من مليونين شجرة) :) على فكرة مبارح تاني مرة بعمل مربى البرتقال وطلع كتير كتير طيب لك مودتي وامتناني .

  14. linda 26 March 2008

    يا جماعة مشان الله لا تواخزوني اتاخرت بالرد عليكون

    الاخت ام تسنيم
    مرحبا فيكي والله يعافي قلبك يا رب

    هلا رينو
    رح جرب طريقتك ان شاء الله باين عليها طيبة وهو بيصير نوع من التغيير
    شكرا الك عل التشجيع والمرور الطيب

    ريم
    صياما مقبولا ان شالله
    حبيبتي ازا طلعت دبقة شوي زيدي النشا و غطي ايدك بالمي بين الفترة والفترة
    انا كمان بتلزق شوي بايدي بس بضل اقدر اتحكم بتشكيلها
    الف صحة وهنا و الحمدلله انو حبيتيها

    نورا
    اي جربي الكزبرة و لا تغسليها بالصابون
    الانسان بس يجرب اكلة جديدة او حتى بهار جديد ممكن ما يحبها او يحس انو غريبة
    بس حلو التغيير بالاكل و حلو انو نجرب شغلات جديدة

    والسلام عليكم

  15. منى 26 March 2008

    هلا نورا :) أكيد لو بس تتعودي على الطعمة رح تحبيها كتير , ابقي خبريني شو بيصير معك ;)

  16. منى 26 March 2008

    هلا رمرومة :) ان شاء الله المرة التانية بمرء لعندك و بشم هل الهوايات الحلوة مع فنجان قهوة سادة , غير شكل ;)
    ريتو هنا و عوافي على المربى , لو تعرفي قديه بنبسط لما بعرف ان واحدة من الاخوات جربت وصفة و عجبتها 8)

  17. rose reem 26 March 2008

    على فكرة انا بعمل هالاكلة بنفس المكونات بس بطريقة الكبة بصينية والجبنة قشقوان مبشورة عالوش وبتحط بالفرن بدون البيض والكعك :zzz المرة التانية رح اعمل بنصيحتك بس رح احشيها على طريقة رينو :grin

  18. منى 19 April 2008

    جربتها ليندا و كانت تحفة و الله:)

    تسلم هل الديات يا رب ;)

    ملاحظة صغيرة , لم أظف الحليب للبطاطا و استعملت الكورن فلاور 8)

  19. نوارة 10 June 2008

    هلا ليندا الله يسلم دياتك على ههي الوصفة من وقت ما نزلتيها وانا بدي اجربها بس جربتها ببقدونس بدال الكزبرة لأنو ما كان عندي كزبرة كتير طلعت طيبة مع العلم انو ان عادة مابحب حشوة اللحمة والبصل مع ذلك حبيتهامممممم

  20. roroo51 22 April 2010

    عفوا بس شو هو البقسماط
    يعني متل السميد ؟
    و هل من الممكن عوضا عن غمس الكرات بالبيض غمسهم بالحليب
    شكرا

  21. محبةالمصطفى ملك 13 August 2010

    منوش وينك ما عبتردي علي ولا بشي صفحة؟؟؟؟

    بدي أسأل شو معنى كوينز و هي بالكسرة ولا ياء قصدي باللفظ لأني نويت أعملها هالأسبوع

  22. منى 14 August 2010

    و الله مشغولة كتير و ما عم ااقدر فوت للنت بالايام :roll

    معناها ليرات , و الاسم مو ضروري سميها الي بيناسبك , بس جربيها لان يممم , انتبهي لكمية الحليب مع البطاطا ممكن ما يلزمك ابدا ;)

  23. محبةالمصطفى ملك 14 August 2010

    :zzz
    يسلمو يا أحلى ست بيت
    طيب بدي أسألك كمان كم سؤال لأن في كتير أسئلة متبعثرة في الموقع و هي تبكي بدون أجوبة لها :cry
    أولا كرات الدجاج المقرمشة بدي أعملها هاليومين و آخدها معي لبيت خالتي عالافطار و بدي يبيض وجهي بقى في كم سؤال….المايونيز أساسي في الوصفة ؟؟ و ما بنقدر نحضره بالبيت؟؟؟ و آخر سؤال اذا في اي ملاحظات تقوليلي ياهن مشان ما تفرط و تطلع متل صورتك الحلوة اللي بتشهي :)

  24. منى 15 August 2010

    المايونيز بيعطيها طعمة طيبة كتير , بس اذا مو جاي على بالك ضيفيها بيمشي الحال و لهل الوصفة ما بينفع المايونيز المحضر في البيت لان رح تنقلى و وصفة الماينيز موجودة بقسم اساسيات ;)

    ما في نصائح غير انك ما تحضريها قبل بيوم و تحطيها بالفريزر لان رح يتشتش قلبها و تصير طعمتها مو طيبة ابدا :zzz

  25. محبةالمصطفى ملك 15 August 2010

    شكرا أختي
    طيب و بدي أسألك على البقسماط أو الكعك المطحون هلأ اذا حضرنا نحن متل مالك كاتبة بتكون النتيجة متل الجاهز؟؟
    يعني بقدر استعمله بالمرتديلا؟؟؟؟؟؟
    و بدي أسألك أنا جربت عجينة العشر دقائق و فعلا رائعة بس شو الفرق بينها و بين العجينة اللي استعملتيها للصمن طبق للشوربة؟؟؟
    و آخر سؤال أنا مشتهية أعمل معروك الرقيق و المعروك التاني اللي حاطتي بالموقع بس نجاحه أكيد؟؟؟
    و ما لاقيت طريقة للمعروك الرقيق :cry :cry
    و آسفة كتير عالتطويل بس ما بقدر أمنع نفسي من سؤالك عن كل شاردة و واردة :zzz

  26. محبةالمصطفى ملك 15 August 2010

    منمونة بدي أسألك عن بطاطا كوينز ..انت جربتيها؟؟
    و شو رأيك فيها لأني كمان رح آخد منها لعند بيت خالتي و ما بدي أصير هيك :sigh

  27. منى 16 August 2010

    ايه متل الجاهز و فيك تستعمليه للمرتديلا اكيد

    ما الي حفظانة شو الفروقات , بس في فروق 8)

    المعروك الرقيق ما عندي وصفته و البريوش الي في الموقع بتطلع وصفته قريبة للمعروك , مو هو نفسه

    اناجربت هل الوصفة و طلعت شغلى , بتجنن ;)

  28. محبةالمصطفى ملك 16 August 2010

    ما أحلاك يا منوشة :)
    أنا فرحانة كتير بردودك من فترة كنت أحس باكتئاب وقت أدخل عالموقع لأن ما كنتي عبتردي….
    طيب هلأ عن العجينة قصدي بدي يطلع الصمن هيك لذيذ كتير ..أما عجينة العشر دقائق فرائعة للفطاير أمس عملت صينية فطاير سواريه و طلعت بتشهي

    هلأ الأسئلة هي:
    المايونيز من وين بتشتريه و أديه كميته و سعره :p

    و بدي سؤال تاني عن شراب التمرهندي أنا بحبه كتير و بعمله برمضان بس بدي أعرف اذا بتعملي الطريقة :roll

  29. محبةالمصطفى ملك 16 August 2010

    منوشة أنات آسفة لأني شفت طريقة التمر هندي في قسم المشروبات مع أني عملت بحث أمس عن شراب التمر هندي و ما عطاني نتيجة
    المهم هلأأنا بجيب نصف كيلو ما بعير بالكاسة و بحط لكل ربع كيلو لترين ونصف ماء و كوب و نصف سكر..
    بس المشكلة في تصفيته صعبة كتير ما عندك طريقة جديدة لتصفيته :x

  30. محبةالمصطفى ملك 18 August 2010

    منى وين الردود أنا ملكوعة جبت الفروج و عبستنى :roll
    و سؤال تالت أو رابع يضاف للي قبله كمان..الكورن الفلاور شأد حطيتي؟؟
    و هو نفس النشا؟ يعني بقدر أستعمله بجميع الوصفات بدل النشا؟؟؟ و شو اللي بتشتريه؟؟؟
    و آسفة كتير لأني هلكتك بالأشئلة :p

  31. محبةالمصطفى ملك 18 August 2010

    آه يا ملم هلكتيني بالأشئلة حلي عني!!!!
    أكيد هيك عبتقولي يا منوشة بقلبك بس شو بدي أعمل أنا بحب استفسر عن كل صغيرة و كبيرة :roll
    منوش بدي أسألك اذا ما حطيت كورن فلكس بالكعك المطحون اللي رح أعمله بالبيت مو كمان بتطلع وصفة كرات الدجاج مقرمشة و لا الكورن فلكس ضروري؟

  32. محبةالمصطفى ملك 18 August 2010

    والله من فرحتي فيك عبكتبلك هلأ قبل ما أقرأ الرد
    رح أقرأو و أشوف اذا في أي سؤال تاني 8)

  33. محبةالمصطفى ملك 18 August 2010

    يسلمووووووووووووووووووووووووووووووووووو
    على أحلى رد من أحلى منى…
    هلأ بدي أسئلك بهالوصفة نشا كاتبة ليندا مو كورن فلاول ما؟؟ طيب و بصير أحط النشا بهالوصفة بدون ما أدوبه بسائل..هلأ مو النشا قصدك اللي صلاحيته بتكون شهر بس؟؟؟؟؟؟؟؟؟؟؟؟؟
    رح أجرب بكرا كرات الدجاج ادعيلي :upset

  34. منى 19 August 2010

    لاا ملك , النشا المقصود مو النشا الاخضر , النشا المطلوب يمكن معروف باسم عرعروط , هادا بيجي بالكيلو و بيقغد كتير بشرط ما يجيه رطوبة
    الشاء رح نضيفه من دون تدويب , قوي قلبك و على مسؤوليتي :grin

    رح استنى رايك بعد التجربة و ميسرة ان شاء الله ;)

  35. منى 19 August 2010

    هلا فيك و اااااسفة للتاخر :)

    نجي للاسئلة

    ما بتفرق من وين بشتري المايونيز , احيانا اشتريه من عند البنان بس مو دوما , النوعية الي احبها هي مازولا او النورس حسب ما يكون متوفر , و ما عندي فكرة عن السعر . في تلات احجام و انا دوما اخد اكبر حجم لان استعمله كتير و بيقعد في البراد اكتر من شهر من دون ما ينتزع

    التمر هندي بصفيه بمصفاية او بشاشة , هي هي الطريقة و ما عندي غيرها :roll

    حطيت من الكورن فلور متل ما مذكور بالوصفة , بس انا ما ضفت الحليب و لا حسيت ان العجينة بدها ايا سائل لحتى ما تفرط .و الصراحة انا كنت دوما استعمل الكورن فلور عوض النشا في كل الوصفات , بس هلا صرت عم استعمل النشا الحقيقي و شفت ان نتيجته احسن.:)

    استخدم كورن فلور من ماركة رويال , يلي علبته صفرا . و النشا بشتريه فرط من عند الجبضون بالكيلو , ممتاز و سعره ارخص و اوفر بكتير من الكورن فلاور

    اخر سؤال بتطلع الكرات مقرمشة , بس اذا صحلك شي مرة جربيهم بالكورن فليكس و ادعيلي .:)

    انتبهي وقت رح تقليهم , خلي يكون الزيت حامي و حطي كم قطعة كل مرة و لا تنسي الساعة استراحة بالفريزر للفخدات لافضل نتيجة

    ملك حبيبتي خدي راحتك و اسالي على كيفك و ان شاء الله كون جاوبت على كل الي ببالك و ايا شي تاني من عيوني :)

  36. محبةالمصطفى ملك 19 August 2010

    أنا اليوم رح أجرب كرات الدجاج(الله يستر)هههههههههههه
    بس بدي أعرف وقت بتسلقي الدجاج شو بتحطي مع المي (نحنا بنحط بصلة).

    و بعدها بيجي دور البطاطا كوينز..
    بس كمان بدي أعرف كوينز بالانكليزي؟؟ لأني دورت عليها و ما شفتها بالقاموس :?
    و بدي أستفسر عن النشا هلأ نحن منعرف جبضون شو يقلو جوزي و قت ليشتري ….نشا وبس؟؟
    و هلأأ النشا هاد بيصير بدل الكورن فلور و بدل النشا الأخضر بكل الوصفات و لا حسب الوصفة يعني مثلا رز بحليب و الحلويات اللي بدها كورن فلور بصير بداله؟؟؟؟؟؟؟؟؟؟؟؟؟؟؟؟؟؟؟؟؟
    الله يعينك يا منوش :p
    ادعيلي تنجح أكلتي اليوم :zzz

  37. منى 20 August 2010

    طريقتي بسلق الدجاج و اللحمة موجودة بقسم اساسيات ;)

    الكوينز = coins = مصرات :grin

    بتقوليلو لابو الشباب نشا و بس , لانه عم يسالك هل السؤال لحتى يميزه عن النشا الاخضر
    و هل النشا ما بتستعمليه في حلويات الحليب , لان المهلبية بالنشا الاخضر اطيب بكتير و بهل النشا رح تطلع متل اكل الاولاد الصغار :roll

    لك شو بك , و الله اكلت همك على اد مو اكلة هم , الله بيسر و رح تنبسطي ان شاء الله

  38. محبةالمصطفى ملك 20 August 2010

    هههههههههههههههههههههههههههههههههههههههههههههه :grin

  39. محبةالمصطفى ملك 20 August 2010

    هلأ عبستنى يبرد الخليط و بعدها رح أشكله بس أنا ما رح أحط مايونيز لأن أبو الشباب ما بحبه بس بدي أعرف عجب ما بأثر على تماسك الكرات….
    واااااااااء يمكن راحت علي

  40. محبةالمصطفى ملك 20 August 2010

    أنا هوووووووووووووووووووون
    بعد طول أسئلة و استفسارات و أخيرا جربت كرات الدجاج …
    أولا ما فرطوا الحمد لله و طلع منظرهن بيشهي بس الصورة لونهن أشقر أكتر ليش برأيك 8)
    و أكلوهن كلهن ما ضل غير كم واحدة بس حسيت انو وقت القلي طلعوا مقرمشين كتير بس بعد ساعة بس خفت القرمشة0…شو برأيك أعمل غير مرة حتى يضلوا مقرمشين؟؟؟؟
    و آخر شغلة يا منووووووووووشة بس بدون ما تضربنيني :grin أنا ما حبيتهن كتير :cry برأيك لأن ما فيهن مايونيز فطلعت طعمتهم ما كتير طيبة بالنسبة لإلي؟؟؟؟؟؟؟؟؟؟؟؟؟؟؟ و أنا حطيت حبة كاملة بطاطا لأن خفت يفرطوا لأنو ما في مايونيز :p

    بتعرفي مشتهية آخد حبة من الصورة و أدوقها امممممممممممممممم رح تطلع بعين الولدهههههههههههههههههههههههههه
    و أخيرا و ليس آخرا يسلمووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووو كتير

    صحيح نسيت أسئلك في عندي بالفريزر صدر فروج و بدي أقليه بروستد عندك الطريقة؟؟؟؟؟؟؟؟؟؟؟؟؟؟؟؟؟

  41. محبةالمصطفى ملك 2 September 2010

    وينك منى؟؟
    و ليش ما كان الموقع عبيشتغل؟؟
    والله انشغل بالي

  42. منى 5 September 2010

    هلا ملك :)
    ممم , لونهم اشقر يمكن قليتهم ااقل منك .
    ما دامهم راحت القرشة منهم معناها ما نشفتي الدجاج منيح , او انك سالقة البطاطا مو بقشرها , شو ؟

    يمكن لان غيرتي بالوصفة كذا شغلة فما طلعوا تمام , على كل هنن حتى من دون المايونيز بيطلعوا شغلة طيبة , بقى اتوقع انه اختلاف الاذواق ;)

    ما عندي وصفة ممتازة للبروستد , خيرها بغيرها

  43. محبةالمصطفى ملك 5 September 2010

    و أخيرا يا منووش..وجهك ولا القمر؟
    والله يا منوشة سلقت البطاطا بقشرتها..و كمان نشفت الدجاج منيح بس ما بعرف..يمكن لأني وقت أخدتهم عند بيت خالة حطيت السفط بكيس مع أني حاولت انو ما يتغطوا 8)
    بس أنا حطيت بقسماط منزلي اله علاقة شي؟؟
    و هلأ صح كل شخص اله ذوقه بس بعتقد انو نقص المايونيز هو سبب طعمتها اللي ما حبيتها…

    على كل رح أعيدها مرة تانية بس مو هلأ..
    منى رح أقلبلك راسك :zzz
    النشا بوصفة النشا أنا سألتك عليه من قبل بس فهمت منك انو النشا الأخضر
    بس بعد ما أمس اكتشفت انو في نشا غعير الأخضر بعتقد انو التاني هو ما؟؟؟

  44. منى 5 September 2010

    ايه هل , لان اتغطوا بقى البخار روح القرشة :roll البقسماط ما اله علاقة , شو انا بحطه شغل القمر , انا كمان منزلي :grin

    ايه التاني مو الاخضر , الاخضر بس للمهلبية و النشاء العادي , العرعروط , هادا نستعمله لباقي القصص ;)

  45. محبةالمصطفى ملك 5 September 2010

    اممممممم يسلمو يا قمر..
    بتعرفي أنا حطيتهم بالكيس بعد القلي بفترة بس الظاهر انو كانو دافيين شوي وااااااااااء
    يلا خيرها بغيرها..
    حباااااابة يا منووش مع أن رمضان قرب يخلص(الله يعيده علينا و عليكم) بس بدي منك امت ما صار عندك طريقة للمعروك الرقيق انك تقوليلي عليها..لأني كتير مشتهية أتعلم طريقته..بتعرفي عمنجيبه من عند فطاير هاواي عبيجي كتيييييييييييير طيب بس بتعرفي بعد رمضان ما بعودو بيعملوه…..
    و الشغلة التانية أمس عملت فطاير سوارييه و طلعوا كتير لذيذين بعجينة العشر دقايق بس اذا عملت العجينة بالحليب بدل المي مو بتطلع بعد الخبز أطيب و أطرى؟؟
    و ما بأثر على التخميرة الأولية؟؟

  46. منى 6 September 2010

    تكرمي , اتمنى لاقي طريقة منيحة للمعروك و الله كنت ا قصرت :roll

    عجينة العشر دقايق بتصير بالحليب و انا مجربتها , ما حسيت ان في فرق لهيك صرت دوما حضرها بالمي ;)

  47. محبةالمصطفى ملك 6 September 2010

    يسلمو يا منوشة
    معناها رح أعمل العجينة بالمي
    بس أنا كان بدي ما تبس بسرعة عرفتي علي بدي بعد الخبز تبقى طرية…
    يعني اذا ما غطيتها بالبراد بعد شوي بتبس..
    امممم اشتهيت على كم فطيرة سواريه يلا يومين و بعملهن تفضلي كلي معنا :)
    هلأ منوشة بدي أسألك ما عندك ايميل؟؟؟

  48. منى 7 September 2010

    مستحيل ايا عجينة تبقى طرية ن دون غطى :eek

    اكيد عندي فيك تبعتيلي عن طريق اتصل بنا , الف صحة و عافية على البك كاني اكلت :zzz

  49. محبةالمصطفى ملك 7 September 2010

    لا ما هالايميل قصدي
    قصدي بدي ندردش عالمسنجر :zzz

  50. منى 16 September 2010

    لا ما عندي مسنجر من شي سنة :roll و يمكن اكتر

  51. محبةالمصطفى ملك 25 September 2010

    منووووشة
    أنا ناوية اذا الله يسرلي ان و أعمل حلو عربي..
    و أنا عندي طريقة و بتنجح دائما بس بدي أعرف شو الفرق بين طريقة الكرابيج الموجودة في الموقع و طريقة الأقراص بعجوة…قصدي المفروض يكونوا نفس الطريقة ما؟؟
    و أي طريقة من بينهم برأيك أفضل؟

  52. منى 28 September 2010

    ما في فرق غير الحليب البودرة و التنتين نفس النكهة بس الحليب بالاقراص بعجوة رح يعطيها لون حلو :)

  53. محبةالمصطفى ملك 30 September 2010

    يسلمو منوووشة…
    طيب منوشة ليش ما بتعملي ايميل عالياهو و بتنزلي الماسنجر عندك
    و الله مشتهية أحكي معك شوي….

  54. منى 30 September 2010

    بتعرفي ملك مع كل هل المشاغل الي عندي ما في وقت ابدا لحتى ااقدر ااقعد على المسنجر :roll

    عماستنى رايك بعد التجربة ;)

  55. محبةالمصطفى ملك 4 October 2010

    منى هلأ بدي أسألك على موقع الفيس بوك انت عاملة جروب عليه بس ما عبيشتغل معي ليش؟؟

    سمعت من فترة انو محظور بسوريا…صحيح هالحكي؟ :?

  56. منى 5 October 2010

    ايه صحيح , بس في الف طريقة و طريقة لحتى نفوت عليه :grin

  57. محبةالمصطفى ملك 13 October 2010

    طيب متل شو ممكن تساعديني..
    لأني أنا في كتييير شغلات بعرف أعملها بالكمبيوتر و بالنت :zzz
    بس كمان في شغلات أكتر و أكتر ما بعرفها :grin
    يعني بدنا برنامج لمنع الحجب؟؟؟

  58. منى 14 October 2010

    في برامج , في بروكسيات بتحطيها , بس اسهل طريقة هيا s
    الي بتضيفيها بعد حرف p في العنوان الي ظاهر عندك فوق , يعني هون
    https://www.facebook.com

  59. محبةالمصطفى ملك 17 October 2010

    شكرا كتييير منووووش
    ما في أسهل من هالطريقة :grin
    بس بدي أسألك هي لكل المواقع المحجوبة؟؟؟؟؟

  60. محبةالمصطفى ملك 17 October 2010

    منوووشة في سؤال تاني بس في مجال تخصصك :zzz
    بدي أعمل مكدوس الفاصوليا بس بدل الفليفة بدي أحط محمرة بصير ما؟

    لأني ماما عملتها من شي 8 سنين بس ما عبتذكرها بس حطيت محمرة يعني متل مكدوس البانجان

  61. منى 18 October 2010

    شو محمرة :roll

    قصدك دبس فليفلة خيت , لان المحمرة رح تدخل المكدوس بسبعميت حيط :grin

    اذا قصدك دبس فليلفة فاكيد بيصير ;)

  62. محبةالمصطفى ملك 23 October 2010

    منى
    هلأ أنا بعرف ان المحرة نفسها الدبس فليفلة..
    شو الفرق بينهم؟؟
    و أنا قصدي اللي بنحطها بقلب مكدوس البانجان و بتطلع يمي يمي..

  63. منى 24 October 2010

    ايه هي بتصير
    المحمرة هي الي مناكلها مع الكبة و هي عبارة عن كعك و دبس فليفلة و دبس رمان :)

  64. محبةالمصطفى ملك 2 November 2010

    منووووووشة أنا جربت المكدوس و طلع كتييييييييير طيب يسلمو ايديك…
    و رح هلأ أدور على أكلة تانية بموقعك مشان أجربها 8)

  65. محبةالمصطفى ملك 2 November 2010

    نسيت أسأك منووووووشة
    بصير نحفظ المكدوس بالبراد؟؟؟؟

  66. منى 9 November 2010

    صحتين و هنا على البك :zzz

    انا بحفظه بالفريزر

  67. محبةالمصطفى ملك 10 December 2010

    منووووشة بدي أسألك عن موقع تويتر عندك فكرة عنه؟؟؟
    رح أطالعك شوي من جو الطبخ لجو المواقع :grin

  68. منى 12 December 2010

    لا و الله ملك ما عندي فكرة عنه و لا حتى فايتة عليه قبل هلا ;)

  69. محبةالمصطفى ملك 18 December 2010

    منوووشة أنا بدي أسألك عن مربى الجزر لأني رح أعمله هاليومين…
    بتعرفي انا كتبتلك السؤال بس ما عبتذكر بأي صفحة و يمكن السؤال طااااااااااار عالطريق ههه :grin
    المهم أنا بحب المربيات(القرعة و البانجان و الكباد)
    هلأ سؤالي هالمرة مختلف
    فالسؤال مو عن الطريقة لان طريقته سهلة كتير
    بس السؤال عن الطعم :eek
    طولي بالك علي شوي :p
    قصدي بيشبه المربيات هدول و لا من غير كوكب 8)
    بانتظار رد أحلى منى :zzz

  70. منى 19 December 2010

    مممم لا كل شي طعمة , حتى الكباد و البانجان و القرعة كل واحد طعمة , ممكن تجربي كمية صغيرة لحتى تحكمي بنفسك , بس بصورة عامة هل المربى عجب أغلب الناس ;)

  71. محبةالمصطفى ملك 20 December 2010

    ;)

  72. محبةالمصطفى ملك 30 December 2010

    منووووووووووووشة أنا جربت مربى الجزر..
    هو الحقيقة طيب وتغيير شكل
    بس صار معي مشكلة
    نشف القطر قبل ما يخلص الوقت اللي مكتوب بالطريقة و كمان بعد ما برد المربى صار قاسي..
    ممكن أعرف هو هيك و لا لازم يبقى طري؟؟؟؟
    لأني بدي أجربه مرة تانيييييييييية :zzz

  73. محبةالمصطفى ملك 30 December 2010

    منوشة نسيت أسألك عن نشا الذرة :roll
    أنا خجلانة منك قد ما سألتك بس شي بدوخ :upset
    نشا ذرة كورن فلور نشا أخضر و كل شي لحال

    هلأ المهم شو هو نشا الذرة؟؟
    هو اللي بيجي بعلبة ؟

  74. منى 31 December 2010

    صحة على المربى :)

    ما بقى اذكر تفاصيل الوصفة بس بذكر انها زبطت معي تمام متل مو مكتوبة :roll

    نشاء الذرة هو الي بيجي بعلبة صفراء ;)

  75. محبةالمصطفى ملك 7 January 2011

    منى و هو نفسه اللي بيجي فرط و بيقولوله عرعروط؟؟؟
    لأن السوبر ماركت قال هاد نفسه

  76. منى 8 January 2011

    هو نفسه :)

  77. محبةالمصطفى ملك 9 January 2011

    شكرا

  78. محبةالمصطفى ملك 21 February 2011

    و أخيرا. :)
    لك دخت السبع دوخات و فتلت الموقع كله طبخة طبخة و أنا عبدور على الصفحة اللي كانت المرسال بيني و بينك يا منى :grin
    بس ما تقولي لحالك هلأ وقتها ليش رجعت؟؟؟ :(
    أنا من فترة ما دخلت الموقع لأني كنت مشغولة و لما فكرت أرجع أدخل و أدور على طبخات جدد نسيت بأي صفحة كنت أحطلك الأسئلة بس و أخيرا لاقتها..
    على كل حال أنا رح أسألك بنفس صفحة الطبخة اللي بدي ياها بس هالصفحة احتياط :roll
    بعرف اني طولت عليك…
    يلا اجا دورك احكي و طمنيني عنك…

  79. منى 22 February 2011

    ما في شي انا على حطة ايدك :grin و الي بيضيعني بيلاقيني هون

    صحي انت ليش ما بتحطي الاسئلة الا هون , مين قال انه بدي مرسال بيني و بيك , انا كنت استغرب ليش تحطي كل اسئلتك هون :roll

  80. محبةالمصطفى ملك 22 February 2011

    :x
    يعني محسبتيني مجنونة مثلا؟؟ :upset
    ههههههه
    والله يمكن أنا بحط أسئلتي هون لأن لما سألتك مرة عن البطاطا كوينز جاوبتييني..فلما إجا على بالي غير أسئلة و بغير صفحة خفت تطولي علي بالرد لوقت ما تشوفي ..فصرت أكتب هوون :grin
    و بعدين شفتي كيف رديتي بسرعة علي لاني كتبت بهالصفحة ههههه
    هي صفحة حبنا…

  81. منى 22 February 2011

    هههههههههههههههه

    لا خلص الله يديم الصغحة علينا

  82. محبةالمصطفى ملك 5 March 2011

    هههههه.

    شكرا على ردك مشان الكاسترد

  83. منى 6 March 2011

    هلا

  84. محبةالمصطفى ملك 8 March 2011

    منى اليوم أول مرة بدخل على صفحتكم عالفيس بوك و شفت صورة كب كيك الخمس دقايق بس ما شفت الطريقة؟

تقييم الوصفة
عاديةقد أحضرهاجيدةممتازةأكثر من رائعة (No Ratings Yet)