كرات الدجاج المقرمشة


         وصفة : منى                 2009/09/29                 63 تعليقات
كرات الدجاج المقرمشة


نصف كيلو صدر دجاج مسلوق
ملعقة كبيرة زبدة أو سمنة بلدية
حبة متوسطة بصل مفروم ناعم
2 فص ثوم
حبة كبيرة بطاطا
1 – 2 ملعقة كبيرة مايونيز
ملح و بهار مشكل و رشة زنجبيل و فلفل أبيض و كركم
مكعبات جبنة حلومي

للتغطية :

بيض
بضع نقاط من زيت الزيتون
كعك مطحون
ملح و رشة بهار مشكل





• تغسل البطاطا بشكل جيد ثم تسلق حتى تنضج , تقشر و تهرس بالشوكة حتى تصبح ناعمة .

• يقلى البصل بالزبدة حتى يشقر , يضاف الثوم و الدجاج المسلوق و يقلب الكل لبضع دقائق .

• يضاف مقدار فنجان من مرق سلق الدجاج و البهارات و مكعب المرق و تترك على نار متوسطة حتى يمتص الدجاج كل المرق و البهارات .

• يمزج الدجاج و البطاطا حتى الحصول على مزيج متجانس , يترك حتى يبرد .

• يضاف المايونيز لمزيج الدجاج ثم يشكل بهئة كرات و تحشى كل كرة بمكعب من الجبنة الحلوم .

• يخفق البيض مع الزيت و الملح و البهار , يمزج البقسماط مع القليل من البهارات ثم تغمس الكرات بالبيض اولا ثم بالكعك .

• توضع الكرات في الفريزر لمدة ساعة ثم تقلى بالزيت الغميق و تقدم فوراً .

  • وصفات تانية ممكن تعجبك


التعليقات

  1. غيث 29 September 2009

    الله الله يا منى حديثك اديش معناه كبير وايمانك اديش قوي ما شاء الله عليك الله يزيدك ويحميك يا ستي بالاول بدي اعيد عليك وعلى الموقع بيجوز متاخرة بس هيه بقلبي ولازم اديهاوتاني شي الله يجيب العواقب سليمة مع الجميع ويقدر بالخير للكل وتالت شي اش هالاكلة اللي بتفتح النفس الله يسلم ايديك يا رب واخيرا الله يوفقك وييسر امرك ومنيح منشان اذا جيت على حلب ابعث اولادي لعندك لتقويهم بالفرنسي لاني لغتي انكليزي وما بعرف الطيخ من البطيخ بالفرنسي ولا مجال لي هنا بالغربة لتعلمه الا اذا نزلت عحلب قريبا ان شاء الله بيكون لي مشاريع تانية اذا الله يسربتعلم عندك هههههه اسهل من الدورات وووستي الله ييسر عالكل

  2. soma 29 September 2009

    كلام بيجنن ما شاء الله,الله يتلطف فينا و فيكم و و يرحملك الوالد و يخليلك الوالدة وولادك و زوجك و كل حبايبك فوق راسك
    وبالنسبة للوصفة شكلها يمي يمي متل ما بتقولي انشالله رح جربها و خبرك الله يعطيكي ألف عافية

  3. شفاء 29 September 2009

    ماشاء الله يامنى كلامك جواهر

    بتعرفي انا عندي قناعة كبيرة بهالكلام وعمبحاول اعلمه لبناتي يعني لما وحدةمنن تزعل على قطعة شوكلاتة مثلا راحت منها او شي عزيز عليها ضاع بقلها حتى اللقمة لو ماكانت الك مارح تاكليها

    واكيد كلشي رب العالمين اختاره النا هو الخير مع انه يمكن ما نشعر بالخير  ونقول وين الخير بالموضوع

    مشان هيك الانسان ماعليه الا انه ياخد بالاسباب ويجتهد ويعمل اللي عليه ويتوكل عرب العالمين ويرضى بكلشي كتبه رب العالمين عليه

    الله يخليلك اولادك ويحميهن من كل سوء ويباركلك فيهم

    ويجعل بيتك عامر دايما يالايمان والرضا

    ويكتبلك بكل حرف حسنة

  4. سمسمة 29 September 2009

    كلام درر الله يجزيكن الخير وان شاء الله في ميزان حسناتكن

  5. ام محمد 29 September 2009

    الله بسلم هل التم كلامك جواهر يامنى والله يعطيكي ليرضيكي بعد ماقرات هاالكلام الحلو بكيت لانو في شغلات صارت معي بتشبه كتير القصص يلي حكيتهاياالله
    دائما المؤمن مصاب الله يلطف فيناويبعد عناوعن جميع امة محمدكل اذى وشر

  6. منى 29 September 2009

    هلا غيوثة :)
    كل سنة و انت و كل الي بيعزوك بالف خير و صحة و انت اولهم يا رب , دايما بالقلب و البال و اذا مشغولة بالخير فان شاء الله دوما اوقاتك كلها خير و هنا

    ان شاء الله تجربي هل الوصفة و تعجبك , اما للفرنسي اي غالي و الطلب رخيص , انا كنت متلك ما بعرف شي بس مع هل الدورات و الله استفدت كتير , بس لسا الحكي مو كل هل الاد , بقى بدهن يتحملوني ولادك شوي :grin

  7. رنا 29 September 2009

    شو يامنى …طلعت مارة بامتحانات صعبة كتير كتير ..يعني اكبر مصيبة صارت معي مابتطلع شي قدام هالقصص الصعبة الي مريتي فيها …بس الحمد لله على كل حال ومتل ماقالوا الاخوات انه المؤمن مصاب …وانا فرحانة بشغلة انه كل مالنا عم نقرب لبعض اكتر ونفضفض لبعض والقصة ماعادت موقع طبخ …صار شي اقرب بكتير ;)
    الله يوفقك وييسر امورك بالفرنسي وتصيري بلبل بالفرنسي بركي بتجيبيلنا كم وصفة حلو فرنساوية …لانه بحس هالجماعة مذوقين بكل شي
    وبالنسبة للوصفة ..كتير لذيذة وبتشبه الفخذات بس بدي اسألك ليش ماعم تطلع معي مقرمشة ؟؟

  8. بشرى 29 September 2009

    منونة , بتعرفي إني عم إقرأ كلامك وابكي ..

    الايمان شغلة عظيمة كتير وكتير كبيرة وصعبة الواحد يوصلها بسرعة ,,

    أنا من الناس اللي حظها قليل فوق ما تتخيلي , والحمد لله على كل حال .

    كل شي بدي احصل عليه لازم ابذل مجهود مضاعف ولازم لاقي عراقيل وقصص ومصاعب لحتى احصل عليه , بس الحمد لله , ربنا بيكون معي دايما وأنا رضيانة بقسمتو شو ما كتبلي , إن كتبلي انجح أو ارسب إن كتبلي أطفال أولاء أو أي شي بالدنيه أنا رضيانة بقسمتو ومتل ما قلتي الله بيمتحن اللي بيحبو ..

    فتحتلا بالحكي أنا بس فتقتيلي جروحاتي ..

    نجي بقى لوصفتك اليمييييي والله كنتب دي اطلبها منك بس خفت تقولي هي نقاقة , بس عنجد مينو السفرة الأخيرة بيجنن وكل أكلة فيه أطيب من التانية , اليوم إن شاء الله بدي جربها عالعشا , يسلم إيديكي يا أحلى منون بالعالم ..ً :)

  9. نادين 29 September 2009

    يالله والله عم احتار كل يوم شو بدس اطبخ وعالحمل بشتهي الاكله بعملها بعدين بقول ياريت كنت عامله غير شي لانو مو مشتهيه عليها بس وقت بشوف الصور عالموقع او حدا بيقلي شو طابخ بشتهي
    ومشكلتي التانيه لوقت جيب المواد الا ما ينقص شي :x :upset
    ع كل يسلم ايديكي وجد حابه جربها لانو شكلها ظريف كتير وشهيه

  10. نور الأسلام 29 September 2009

    السلام عليكم يسلم هالتم والله كلامك دررالله يخليلك عيلتك واحبابك ويحفظك ويحفظلك اياهم من كم يوم اجا شخص وخطب اختي هوشب مو من بلدنا لكن من نفس العيله سالوا عنو اهلي وتم كتب الكتاب اختي ملتزمه بحجابها وهو بعرف وراضي ومبسوط وتم الاتفاق انو الربيع يتم الزواج ويسافرو عالخليج بعد كم يوم تتصل والدتو وتقول انو مابناسبنا تضل البسه الحجاب لازم تكشف قدام العيله كلها وهدا الشي رفضتو اختي وتم فك الخطوبه الحمد لله انو الله كشف هالشي قبل مايصيرالزواج وتسافر ويجبروها على اشياء ما يرضاها رب العالمين وهي بلد غريب وما تعرف حدا فيه ما تاخذيني طولت عليكي والله انا صارلي مهمومه فترة من هالموضوع لكن الحمدلله

  11. ام نور 29 September 2009

    السلام عليكم ورحمة الله اول شي اسمحيلي اعايدك منى واعايد الاخوات بالموقع واتمنى للجميع الخير والصحة الجيدة :) اليوم مشي الانترنت بعد ما نقلنا فما سدقت افتح النت لا شوف شو في جديد بالموقع واطمن عن اخباركون وسبحان الله كتير اتاثرت بهل مقدمة الحلوة واستمتعت ماشالله كلامك جواهر بدو بس الواحد يكون قنوع ويقول الحمدالله على كل شي بس الانسان ضعيف وقت الشدة بينسى الحكمة ميشان هيك لازم نقوي ايمانا ميشان ما نضعف   :) بالنسبة لا الوصفة ناوية جربا كتير شكلا بيشهي بس بدي اسالك ممكن نعمل كمية ونجلدها ولما نعوزها بس منشيلها ومنقليها ولا لاء

  12. منى 30 September 2009

    هلا سوما :)
    اتمنى تجربي الوصفة و تكون طيبة و على زووءك و ان شاء الله مستاهلة

    الف شكر الك لكل هل الدعوات الحلوة , ان شاء الله الك متلها

  13. منى 30 September 2009

    هلا شفا :)
    ما شاء الله عنك , اله يخليك لبنوتاتك الحلويين يا رب و تعيشي و تعلميهم حسن الخلق و يكونوا متل ما بتحبي و احسن

    ابوسك , ان شاء الله الك متل هل الدعوات الغالية و اكتر و الله يحفظك انت و كل عيلتك من كل مكروه

  14. منى 30 September 2009

    هلا سمسومة :)
    اامين امين يا رب , نورتي حبيبتي و ان شاء الله تجربي الوصفة و تكون على زووءك

  15. منى 30 September 2009

    هلا ام محمد :)
    ربي لا يجيب زعل و لا دموع , و ان شاء الله ربنا يفتح بصيرتنا لحتى نصير نفهم احسن و نعرف المقصود و حتى لو ما عرفنا ربنا يلهمنا الصبر :)

  16. شيرين 30 September 2009

    عن جد ماشاء الله عليك يامنى؟؟مو عارفين نسميه موقع طبخ و لا أخلاق ولا حكم و أحاديث شريفة.ماشاء الله جامعة الكل.بدي بس أقولكم شغلة صارت معي.مرة شفت الكعبة عالتلفزيون بأيام عادية لا رمضان و لا عيد.و الله من شوقي إلها بكيت و غصيت و دعيت أنو أزورهاو الله يكتبلي فيها مقر.و الله بعد سنة تزوجت عالسعودية بسبب شغل زوجي و اعتمرت أكتر من 30 مرة و حجيت مرتين و الحمد لله.طولت عليكم بس حبيت أقلكم من صدق الله صدقه.بس كانت النية خالصة لوجه الله,ربنا بيهيألنا أسباب النجاح.شكرا

  17. eman000 1 October 2009

    ما شاءالله عليك ياست منى مو بس بنتعلم منك طبخ كمان بنتعلم امور دينيا الاسلامي
    الحمدالله رب العالمين على كل شي وانشاالله الله يبعد عنا وعنكم كل شر ويبارلك لكل واحدة في عيلتها وزوجها يارب
    اخر كل عام وانتم بالف خير وانشاالله ينعاد عليكم يارب
    بالنسبة للوصفة بتمنى تزبط معي لانه بنتي الصغير حلا بتحب هيك اكلات :zzz

  18. منى 1 October 2009

    هلا رنونة :)
    اكيد كل واحدة فينا مارة بشي بحياتها , بس انا ما بتعتبر حالي ان صار معي كتير قصص مو منيحة و خصوصا لما بسمع بالي صار مع فلان و علان , لك يا ستي بيكفيني اني بحط راسي على المخدة اخر اليوم و انا و كل عيلتي بامان :roll

    انا بعرف اقرا و افهم فرنسي منيح و كتير وصفات هون بالحلويات هي وصفات فرنسية باساسها , لقمة انترناشيونال نحنا و منعجبك :grin

    الفخدات ما عم تطلع مقرمشة معناها القلي فيو شي مو مزبوط , لازم الحرارة تكون عالية و الزيت امي و ما تكتري الوجبة , يعني على حسب طنجرة القلي الي عندك , بس ما تخليها زحمة و الا رح يغبوا زيت و يبطلوا مقرمشين ;)

  19. جنى 1 October 2009

    يسلم هالتم يا ست منى وانشاء الله كله بميزان حسناتك. مو بس بالطبخ بتفيدينا كمان بكلامك اللي كله حكم..
    انا كنت بنتظر هالوصفة لان اولادي كتير بحبوها انا بجيبها جاهزة وبقليها بالبيت بس بصراحة ماانا ما باكل منها بس لما شفتها فرحت كتير واشاء الله قريبا رح اعملها تسلم ايديك منى والله يوفقك بالفرنسي حتى اعمل لاولادي عندك دورات طبخ وفرنسي :p

  20. رنا 2 October 2009

    مممممممم
    هلا الحرارة عالية …بس بدي اسالك هلأ انا عم بقليهن بالقلاية الكهربا بيأثر ؟؟؟ ;)
    ةانتي عاجبتيني بالحلبي وبالانكليزي وبالفرنسي كمان والله يقويكي ..وحيالللله يا عكيدة حارة لقمة طيبة ;)

  21. منى 4 October 2009

    هلا بشورة “)
    مان الله لا تبكي و لا تزعلي , كل شي من رب العالمين منيح و الف الف الحمد لله بالرضى الي عندك , ان شاء الله ربييتعوض كله خير قريب بكل شي , من الدراسة للبيت و العيلة للرزق لكل كل شي
    مسحي دمعاتك و حطي بلسم الصبر على جروحاتك و ان شاء الله رح اسمع منك اخبار حللوة قريب

    لو تعرفي كم مرة كتبت الرد و اختفى بعدها :( ان شاء الله هل المرة تزبط لان النت عندي جانن رسمي

  22. منى 4 October 2009

    هلا ندوش :)
    ييي الحمل و الوحام شو صعبين و قصتهم قصة و مشكلتهم ما بتلخص الا لما بيشرف البي بي الصغنون , فارض شخصيته من اول ثانية

    هل الاكلة مقاديرها متوفرة دوما , يا ريت تجربيها و ان شاء الله رح تعجبك كتير و تعجب البيبي كمان و يصير يطلب منها دوما ;)

  23. منى 4 October 2009

    هلا نور “)
    و الله نور حاسة من فترة بتغير في ردودك , مسحة حزن و انا كنت مفكرة انه يمكن الصيام صاير صعب عليك , تاري غير شي بالمرة :sigh

    الحمد لله على كل شي , سلام خاص لاختك و قوليلها يهنيك لان كشفتي انه مو مناسب الك بالخطبة , تلات الارباع البنات بتكتشف هل الشي بس بعدين و بيكون التراجع وقتها اصعب :roll , بقى الف الف الحمد لله انكم عرفتوه هلا قبل ما يوقع الفاس بالراس

    ان شاء الله اخر هموم , و بدي ياكي متل قبل كلك حيوية و تكبي الحزن و تتركيه لوقته ;)

  24. منى 4 October 2009

    هلا ام نور حبيبتي , بعد زمان هل القمر الحلو ما بان , ان شاء الله منزل مبارك و منه لاحسن باذن الله :)
    كل سنة و انتي و قططك بالف خير يا رب :zzz و ينعاد عليكم و انتوا احسن حال

    هلا ام نور فيك , بس طعمة الفريش تازة لان انا جربت هيك المجلد بينزل مي و طعمته بتتغير شوي :roll

  25. بشرى 4 October 2009

    منونة تسلميلي يارب عهالدعوات وإلك أكتر منن إن شاء الله ,, بس حبيت قلك إنو خليتي بالي صرلك 4 تيام مو باينة ,, والله ضل بالي عليكي :)

  26. semo 4 October 2009

    هاا انت هون منمونة وانا عم انتظرك الي 4 ايام بوصفة الشاورما الظاهر ما عم تزوريها

    شو كأنك زعلانة منها مع انو ما معك حق ابدا :grin

    لاني جربتا وطلعت بتجنن وما في عليها حكي بنوب

    رح قلك التفاصيل لتجربة هالوصفة بس تزوريها

    شو رأيك فيني ؟؟ عم اصلح بيناتكن :grin

    اما بالنسبة للمقدمة اه يامنمون شو في شغلات بتصير بهالدنيا والواحد بيزعل وبيفكرها شر بس بالاخير بتطلع كل الخير فيها

    وكل شي مقدر ومكتوب فعلا لو اطلعتم على الغيب لاخترتم الواقع

    الحمد لله رب العالمين على كل حال والله يرحم ابوكي وابي اللي فقدتو من فترة مو كتير طويلة ومتل والدك الله يرحمه هو ماكان في شي دخل لياخد قيلولة برمضان وفجأة ارتفع ضغط الدم وانفجر شريان بالداغ

    وبقي 10 ايام بغيبوبة وبعدها توفى يعني اللي بيشوفو قبل بساعة مستحيل يقول انو هاد فيه شي

    بس الحمدلله كلو نصيب

    المهم بنجي لهالطابات اللي اكيد مروان طار عقلو فيهن وحبهن كتير لانن طابات كتار

    عم اتخيل كيف الجبنة بدا تطلع منو مممممممممممممممممم اكيد شي كتييير طيب ان شاء الله رح جربها عن قريب

    ومشان فطيرة الشاورماطلعت بتجنن واطيب من الشاورما الجاهزة وجوزي قلي بكرة بس تجي اختي من السفر عملي هالاكلة ودوقيها ياها من كتر ما عجبتو

    بس بدي اسأل عدة اسئلة على عدة وصفات

    اول شي شو هو البهار الحلوببهارات الشاورما هو نفسو الفلفل الابيض؟؟ انا حطيت الفلفل الابيض لاني مالقيت جواب منك

    مشان المخلل انت حاطة كوب خل وبوصفات تانية كاتبة خل تفاح او عنب

    بقدر استخدم اي نوع خل يعني متل الخل الابيض ولا لازم خل التفاح؟؟

    انا خايفة تظهر طعمتو قوية بالمخلل لان انا ما بحب طعمتو ابدا ولا ماإلو طعمة بالمخللات؟؟

    انا عندي فليفلة خرج المخلل وبدي اعملها مخلل

  27. منى 5 October 2009

    بشورة سلامة بالك ,و هل اليومييين مشغولة اوي و جدا :grin

    بس خير ;)

  28. منى 5 October 2009

    هلا شيرين :)
    ما شاء الله لا قوة الا بالله , معناها كانت نيتك بلحظتها صافية كتير , اللهم صلي على النبي الله يهنيك و يقويك على الطاعة.
    و رح اطلب منك طلب , اذا صح الك عمرة مرة تانية تدعيلي ادام الكعبة ان ربنا يسر الي حج , قلبي ناطف و مستنية عزيمة :cry

    نورتي شيرين و الشكر الك لتواجدك الطيب اختي

  29. منى 5 October 2009

    هلا سمسمة :)
    مشان الله لا تزعلي مني , مشغولة كتير هل اليوميين , و يا دوب عم طل على الموقع , انا ما بزعل مع حبايب قلبي ابدا :grin هلا رايحة وراكي لهونيك , بس قبلها خليني اشرب فنجان قهوة و رد على اسئلتك بطريقي ..

    قهوتي سادة :zzz

    مروان طار عقله فيهم و كرة ورا كرة نفضوا الطبق , صحة و هنا يا رب على الب الكل , جربيها و ان شاء الله ما بتندمي , و حتى اذا مو جاي على بالك تحشيها بيصير , كله يممم

    الف الف هنا على الشاورما , كتير انبسطت انها عجبت الباشا و انها رح تكون ضمن وصفات العزيمة الجاية , معناها طلعت معك شي قطايف

    البهارالحلو اله صورة على هل [URL=http://www.l2ma.com/content/view/281]الرابط[/URL]

    المخلل اطيب الشي تعمليه بخل التفاح او العنب بس بيصير كمان خل ابيض و المخلل طعمته بالخل , لا تنقصي الكمية و الا ما رح يحمض متل مو لازم ;) و نفس العيار بينفع لكل المخللات , بالهنا يا قمر مقدما

    الله يرحم باباتك و يرحم امواتنا و كل اموات المسلين , هي حال الدنيا سمسومة , الله يصبركم , مصيبة صعبة ان شاء الله ربنا يعوضكم خير يا رب

  30. منى 5 October 2009

    هلا ايمان :)
    ان شاء الله بتعجبها كتير للاميرة الصغنونة و رح تعجب الكل كمان ان شاء الله

    هل الرد الحلو بس من زووءك و لطفك اختي , شرفتي و مية هلا فيكي ;)

  31. منى 5 October 2009

    هلا جنى :)
    ان شاء اله تجربيها و تكون على زوءك و متل الي بتجيبيها و اطيب كمان , اهم الشي انك عارفة شة فيها :zzz

    انا رح استنى رايك بعد التجربة , لا تتاخري علي :)

  32. شيرين 12 October 2009

    مرحبا منى كيفك؟ انشاء الله رح أدعيلك من كل قلبي و عسى ربنا يكتبلك حج و عمرة باذنه تعالى بس للأسف أنا ب حلب و تركنا السعودية وصار بده مين يدعيلنا سوا :cry

  33. منى 16 October 2009

    الحمد لله انك رجعتي لبلدك , كمان هي نعمة مو قليلة ,
    ان شاء الله ربنا يكتب الي و الك عمرة و حج قريب عاجلا غير اجل يا رب :)

  34. haya 17 October 2009

    مرحبا عزيزتي منى انا عم بقرأ تعليقات الاخوات كلها بس مش فاهمة اي شئ وقرأت المقدمة اللي انت كاتبتيها لقيت انك عم تحكي عن الوصفة فاستغربت عم شو بيحكوا لأنو بصراحة انا الي فترة ما عم افتح النت الا لأخذ منه وصفة وبسكر على طول
    المهم يا ستي ما بدي اطول عليك كنت بدي اسألك عن الوصفة انت كتبت بطريقة التحضير انو نحط فنجان من ماء سلق الدجاج طيب لو سمحت هالفنجان هذا فنجان قهوة ولا فنجان شاي يعني كم حجمه معلش انا قلت لك كثير بسأل بس بجب اني اتأكد من كل شي لأني بدي اجرب الوصفة شكلها كثير لذيذ …. وشكرا الك

  35. منى 18 October 2009

    هلا هيا :)
    كانت المقدمة غير هيك , بس بعدها عدلتها :roll

    الفنجان المقصود هو فنجان قهوة و مو مشكلة اذا استعملتي فنجان اكبر المهم انك تنشفي الخلطة كتير منيح لحتى تتشكل معك بسهولة ;)

  36. منال 21 October 2009

    سلام عليكم كيفك منى يعطيك العافيه شكلها كتير ظريف هل الاكله ساويتها اليوم ومنظرها طلع بيجنن بس بدي اسئلك دخيل عينك حطيتهافي البراد في مشكله وحابه خليها لبكره على جيت ابني من دمشق يعني دلله شوي عم يدرس وبعمل الاكلات الطيبه على اخر الاسبوع وشكرا

  37. منال 22 October 2009

    سلام عليكم بما انك ما رديت علي الله يسامحك اليوم قليتهم على جيت ابني وكتير طلعت طيبه بس يمكن ضروري الفريزرلانه شوي صغيره فرطت بس الطعمه يمي يمي على قولتك منى حابه اسئلك فصصت الموقع وما لقيتك كاتبه شي عن مونه الزيتون الاخضر والاسود مع انه هلق وقتهم شو القصه

  38. منى 23 October 2009

    لا تاخديني منال مشان الله , ما صحلي رد عليك فورا :roll
    الله يخليلك ابنك و تفرحي فيه و باولاده , اكيد فيكي تحطيها بالبراد و ما دامها فرطت شوي معناها ما نشفتي الدجاج منيح وقت قلبتيه مع البصل , او كانت البطاطا بقيان فيها شي من مية السلق :roll

    هنا و الف صحة على البك و الب كل مين داق و ان شاء الله المرة التانية بتزبط اكتر

    تكرم عيونك رح نزل كيف نحفظ الزيتون و كمان العطون اذا ربي عطاني عمر هل الاسبوع ;)

  39. TENDERNESS 15 February 2010

    انا عملت كل الخطوات بالضبط وكل شي تمام وفرحانه على اشكالهم كيف طلعو بجننو :) لكن بعد ما طالعتهم من الفريزر وحميت الزيت وجيت لانشلهم من الزيت ما في كرات :cry كلهم دابو في الزيت :eek والحمدلله اني ما خاطرت وقليتهم كلهم راحو خمس كرات بس :sigh الظاهر كان لازم ضيف طحين لحتى يتماسكو اكتر
    المهم اني حليت المشكلة لحتى ما اخسرهم كلهم، حميت مقلايه تانيه بزيت قليل وعلى نار هادية وقلبتهم من جميع الاطراف ، والنتيجة كانت رائعه ومقرمشين وطيبين كتير والدهن خفيف :zzz

  40. منى 15 February 2010

    لا المشكلة مش من الطحين , المشكلة هي بالسلق , لازم تنشفيهم كتير منيح من مرق السلق و كمان لما تجي تقليهم مع البصل و تضيفي المكعبات لازم تخليهم ينشفوا منيح كتير ;)

    يمكن كمان تكوني طولتي عليهم بالفريز ؟

  41. TENDERNESS 15 February 2010

    بالفريزر قعدو حوالي 3 ساعات ، بس انا نشفتهم كتير منيح ما كان في مي بالحشوة يلا بنتعلم للمرات الجايه :zzz

  42. منى 16 February 2010

    ممم , طيب شو رايك المرة التانية تجربي تشوي البطاطا على الميكرويف , هي طريقة جديدة و عاجبتني كتير 8)

  43. اماني 8 March 2010

    ممممممممم كتير طيبة هل الوصفة وبسيطة ويسلمو ايديكي بدي قلك يا ست منى انه انا عندي نفس مشكلتك مع الفرنسي عندي مشكلة الحكي مع انه خريجة ادب فرنسي بس ما تضحكي علي :? :cry

  44. sweet 14 March 2010

    خيت..
    الدخلة ع موقعك بتجوّع :x ارأفي بهالعباد الفقراء الى الله ..

    رح أجرب هالوصفة بكرا ان شا الله
    بلشت أتعلم الطبخ ، دوبي من هلأ للعرس أكون ختمت المهنة.. مشان ما أتعلم بالزلمة :zzz

  45. منى 14 March 2010

    هلا اماني :)
    الله يسلمك يا قمر
    ليش اضحك , انا خريجة ادب انكليزي و اللهم صلي على النبي لما اتخرجت شو كان حكي تحفة :grin

  46. منى 14 March 2010

    خيت و الله و الله و الله العظيم عرفتك من اول كلمة بردك , بعدها ركضت لاتاكد من ايميلك , قلت مو حلوة انبحتلي على شي واحدة جديدة :grin
    لك يا اهلين و يا سهلين بست العرايس الحلوات , ولكم تو وومن ورلد :grin

  47. بشرى 16 March 2010

    منون بينفع جمد جزء منهن للاستخدام بعدين ولا هئ ؟ :x

  48. منى 16 March 2010

    لا ما بيطلعوا طيبين ابدا بعد التجميد , بيتشتش قلبهن و بتصير حالتهن حالة :roll

  49. لمياء 8 May 2010

    ما شاء الله عليكى يا منى كل وصفاتك روووووعه
    تسلم ايديكى

  50. منى 8 May 2010

    الله يسلمك لميا :) نور الموقع فيك اختي
    ان شاء الله تجربي هل الوصفة او غيرها و تحبيها :zzz

  51. violet 10 August 2010

    ان شالله رح جربها برمضان
    بس ياريت لو كل وصفة تكتبو لكم شخص بتكفي
    ويسلمو كتير

  52. محبةالمصطفى ملك 13 August 2010

    منى ما بيصير المايونيز بالبيت؟ :?

  53. violet 17 August 2010

    ضروري الكركم
    وشلون بدنا ندخل الجبنة بقلب الطابة بدون ماينتزع شكلا
    ياريت ألاقي رد سريع

  54. violet 17 August 2010

    ضروري الكركم
    وكيف بدنا نحط الجبنة بقلب الطابة بدون مايتخرب شكلا
    ياريت ألاقي رد بسرعة بلييييييز

  55. سارونات 20 August 2010

    السلام عليكم و رحمة الله و بركاته
    جربت الوصفة اليوم و طلعت ما شاء الله بتجنن. انا حطيت جبن مثلثات بدل المايونيز لان انا ما بستعمله و كمان في اللي حشيتهم بقطع جبن غريويير و في اللي بقطع لافاش كيري.
    اختي فيوليت ان شاء الله تجاوبك منووش قريبا انا عملت كرة و بعدين مسكتها و دخلت اصبعي جواتها مشان اعمل حفرة صغيرة و بهالحفرة حطيت قطعة الجبن و بعدين سكرت الكرة و رجعت كورتها

    سلام

  56. إسراء 18 October 2010

    السلام عليكم …..
    سؤال ممكن تجاوبوني هلأ صدر الجاج بعد ما اسلقه نتفه مشان يصير قطع صغيرة لانو شكل الكرات اللي عاملتن ست منى كتير حلوين ومافيهن جعلكة شو السبب؟ :roll

  57. منى 25 October 2010

    هلا ملك :)
    بيصير بس الجاهز افضل هون ;)

    هلا violet :)
    بيصر بلا الكركم اكيد , اصلا هو رشة صغيرة , و ان شاء الله رح اكتب بالمرات الجاية كل وصفة بتكفي لكم شخص ;)
    هلا بعد ما جيب قطعة من العجبن بحط الجبنة بقلبها و برجع بكورها و هيك بتصير حلوة من دون جعابير :grin

    هلا سارونات :)
    الف الف صحة و هنا على البك حبيبتي , و التشدر جربتها مرة بقلبها و طلعت يممممم
    شكرا كتيبر لردك و معلوماتك و الف صحة مرة تانية

    هلا اسراء :)
    انا بقطعه بالشوكة و هو مع الابطاطا رح يصير متل العجينة و سطحه ملس
    جربيها و ان شاء الله بتكوني رضيانة ;)

  58. lalosh 21 October 2011

    يمممممي يممممممي شو طيبة كتير . بس لما عملناها صارت معنا مشكلة وهي انو تاني دفعة من القطع ياللي قليناهم تفتفتوا ما بعرف ليه ؟؟ معقول لأنه ما استنينا عليهم ساعة لحتى يجمدوا او يمكن كمية القطع كانت كبيرة؟؟ بس بشكل عام بتعقد وغلبتها كتيييرة ^_^

  59. منى 22 October 2011

    هلا اختي :)
    ليكون كترتي الكمية المرة التانية او كان الزيت مو حامي :roll

    ما اله علاقة الحجم لان انا احيانا بكبر الكرات كتير , بس اذا كانوا مجمديين المفروض انو تقللي الكمية لحتى ما تنزل حرارة الزيت و يتفتتوا ;)

  60. ام شهلا 3 April 2012

    انا بموت بكل انواع الفروج سواء مطبوخ او مشوي او مسلوق او مقلي (ههه صارت عالقافية)
    وكتير بحب الفروج المقلي المقرمش متل البروستد والناغيت وهي الاكلة انا حاليا عم عاني من نفس مشكلتك تبع الفرنسي
    وحاطة دورة وعم حاول اتاقلم يحرق حريشن ببلجيكا مافي واحد بيحكي كلمة انكليزي الله بعين
    يسلمو دياتك منامينو

  61. sabreen 22 October 2012

    وصفه كثير رووووعه عاشت ايدك
    جربت الوصفه البارحه وطلعت رهيبه وطعمها يجنن :)

  62. rudy 2 September 2014

    مرحبا ست منى انا جديدة هون بالموقع وحبيتكن كتير .. والله يعطيكن العافية بس سؤال لو سمحتى كيف شرحات الدجاج بدي كورها اذا ماكانت مطحونة
    وشكرا كتير لجهودك

    • منى 7 September 2014

      اهلا و سهلا رودي ، نورتي :)
      هي حتكون صارت ناعمة كتير ، و البطاطا ختمسكها
      جربيها و ما بتندمي ان شا الله

تقييم الوصفة
عاديةقد أحضرهاجيدةممتازةأكثر من رائعة (No Ratings Yet)