كعك العيد على الطريقة اللبنانية


         وصفة : منى                 2009/10/15                 54 تعليقات
كعك العيد على الطريقة اللبنانية

كعك العيد على الطريقة اللبنانية

كيلو طحين
نصف كيلو سميد ناعم
كوب حليب بودرة
ظرفان باكينغ باودر
ظرفان خميرة خبز
كوب زيت
نصف كيلو سكر
100 غرام زبدة
3 ملعقة صغيرة سمسم
ملعقة صغيرة يانسون ناعم
حبة السودا نصف ملعقة صغيرة
3 بيضات
كبايتان حليب سائل او ممكن نستبدلهم بالماء
ملعقة صغيرة قرفة ناعمة
نصف ملعقة صغيرة جوزة الطيب
نصف ملعقة صغيرة قرنفل ناعم





• نضع كيلو طحين ونصف كيلو سميد في قدر غميق مع بعض ونحركهم بملعقة خشبية .




• نضيف كوب الحليب البودرة ونحرك ثم نضيف الباكينغ باودر وخميرة الخبز والبهارات والسمسم والحبة السودا ونحرك جيدا .







• نخفق البيض في الخلاط نضيف الزيت ونخفق ثم نضيف الحليب السائل او الماء ونخفق واخيرا نضيف السكر ونخفق حتى يذوب بعدها نصب المزيج فوق قدر الطحين ونعجن جيدا بيدنا حتى يتشرب الطحين كل السائل .




• نذوب الزبدة ونعجن مرة اخرى حتى نحصل على عجينة متماسكة كما في الصورة نتركها ترتاح حوالي 6 ساعات او ممكن نحضرها في الليل وهكذا ترتاح بشكل كافي .




• بعدها نشكل كريات صغيرة وندهن المطبع بالحليب حتى نعطي لمعة ونرش عليه قليلا من السمسم لاعطاء شكل جميل للكعكة ونضفهم بصينية وندخلها الفرن حوالي 15 دقيقة على درجة 200 المهم نراقب الكعك وكل فرن مختلف عن الاخر , انشالله تجربوها وتدعولي .







  • وصفات تانية ممكن تعجبك


التعليقات

  1. منى 15 October 2009

    ياااا سلام , شي بياخد العقل و شغل بيشهي , الله يعطيكي الف الف عافية ام نور , انت و البابا و الله يخليه و يديمه بصحته و عافيته ..

    القالب هادا عندي منو , ان شاء الله يصحلي جربها قريب

    الف شكر الك للصور الواضحة و الوصفة المرتبة :zzz

  2. ام محمد 15 October 2009

    الله يسلم دياتك ياام نور مبين هاالكعك شي بشهي ان شاء الله بدي جربه انا عملت من وصفاتك الصفوف والبتيفوروكانوا طيبين وكل ماحدا اكلهم عندي بياخد المقاديرالله يعطيكي العافية مرة تانية ويخلينا منى الله عرفتنا على هاالناس الطيبة :)

  3. لارا مينا 15 October 2009

    يسلم إيديكي أم نور مجهود وتعب كبير
    وياليت أي وصفات مميزة مثلها ماتنسينا منها
    لأن كثير أحب الوصفات القديمة وكثير تستهويني مثل الأجانب إلي يدوروا على كل شيء قديم ومابيلفت نظرهم الجديد يمكن لأن القديم بدأ ينقرض ويندثر من دون مايكون موثق وأصحابه الحقيقين راحو وراحت معهم كل الأسرار.
    والله يخليلك الوالد يااااااااااارب على طول ..
    بس لو تقوليلي إذا ممكن : الكيلو كم كوب يساوي تقريبا.
    والخميرة كمان كم ملعقة صغيرة بيطلع في الظرف الواحد لأن بنشتريها في علب مش ظروف.
    وأتوقع أخت منى إن عدد البيض سقط سهوا ياليت تتأكدي.
    تحياتي للجميع.

  4. نادين 15 October 2009

    يسلم هالايدين والله معذبه حالك … مممممممم وشي طيب كمان والله هي الوصفه كان بدها تنزل عالعيد
    يعطيكي الف عافيه

  5. منال 15 October 2009

    :zzالسلام عليكم كيفكم يا كل اخواتي بالموقع الوصفه كتير ظريفه وقريبه جدا من اقراصنا بس عنا بس بنحط محلب ويانسون بتطلع الطعمه كتير طيبه على كل حال نحن ولبنان سوا ربينا مشان هيك اكلاتنا كتير متشابهه الله يديم المحبه

  6. Amar 15 October 2009

    أنا أبحث دائما عن وصفات الجدات حتى بالنسبة للوصفات الأجنبية لأن كل المقادير من مواد طبيعية وغير مصنعة، وأنا أكره المواد المصنعة والمعلبة لأن لدي حساسية منها.
    هذه الوصفة رائعة لكن هل بالإمكان تفادي إضافة الحليب البودرة لأنني كما سبق وقلت أحاول تفادي استخدام مثل هذه المواد، وشكراً للجهود الرائعة في هذا الموقع.

  7. ام عمر 15 October 2009

    لك الله يسلم هالايدين يا رب :)
    متل ما قالوالك الصبايا لا تنسنا من كل وصفة تراثية حلوة عندك :eek
    هيك منى بدنا منك الوصفات بالخطوات المصورة الله يجبرك

  8. ام نور 15 October 2009

    كلك زوء يا منى شو ما عملت ما بيجي شي اد وصفات بتمنى تجربيا وتعطيني رايك وفي ملاحظة يا ريت فيكي تكتبي 3 بيضات

  9. ام نور 15 October 2009

    بالنسبة لا القالب متوفر بالعديد من الموديلات شي خشب شي بلاستيك او حجم صغير او كبير بس كلون مناح وبالنسبة لا البهارات ممكن نزيد الكمية حسب الرغبة او اذا نوع ما منحبوا فينا نلغي ونزيد من نوع من منحبوه وكمان ممكن نعمل كمية ونجلدا ووقت الي بدنا او منطلعون قبل بوقت او مندوبون بالميكرويف انا دايما عندي 20 وحدة احتياط ومع فنجان حليب الصبح او شاي غير شكل وفي ناس بدل الزيت بيستعملوا الزبدة او السمنة بس انا لقيت الزيت مع شوية زبدة اخف وبالنهاية الاكل زوء كل ست بيت بتشوف شو بيناسب عيلتها وبتعملوا

  10. ام نور 15 October 2009

    والله ما بعرف شو بدي الك يا ام محمد خجلتيني :roll :roll الله يبارك فيكي بتمنى انشالله تجربي كمان هالكعكات وينجحوا متل الصفوف وتدعيلي :)

  11. ام نور 15 October 2009

    ودياتك يا اخت لارامينيا ولو لا تعب ولا شي ما في اعز منكون المهم تجربيا وتعجبك انا متلك سبحان الله كتير بحب كل شي قديم وبيعز علي وخصوصي الاكلات القديمة الي متل ما قلت بلشوا بالانقراض وبالنسبة لا الكيلو كم كوب والله ما بعرف لان انا بزين عالميزان بالغرام والوصفة اخدتا معيرة بالكيلو بركي منى عندها فكرة لان الله اعلم 5 كوب ماني متاكدة وحسب كمان حجم الكوب والخميرة الظرف في 15 غرام بيطلع ملعقة كبيرة واي سؤال انا جاهزة ;)

  12. ام نور 15 October 2009

    الله يبارك فيكي اخت نادين شو هالعذاب يا ريت العذاب هيك عشر دقايق عجن العجينة وساعة مدون بالصينية وشوي ولا اسهل بس اكيد تركتون يختمروا انشالله تجربيون ويعجبوك :)

  13. ام نور 16 October 2009

    وعليكم السلام اخت منال الله يبارك فيكي يا رب ذكرتيني بالمحلب انا حاطة محلب بالوصفة بس سقط سهوا كتابته يا ريت الاخوات الي حابين يجربوا الوصفة لا ينسوا يحطوا نصف ملعقة محلب صفيرة

  14. ام نور 16 October 2009

    شكرا على مرورك اخت قمر على الوصفة معك حق تبتعدي عن المواد المصنعة وفيكي تستغني عن الحليب البودرة ما في مشكلة انا احيانا اذا مانو متوفر عندي ما بحطه بس حبيت نزل الوصفة على اصولا وبعدان كل وحدة بتعدل حسب ما بتحب :)

  15. ام نور 16 October 2009

    ودياتك يا رب يا اخت ام عمر انشالله تجربي هالوصفة وتعجبك على فكرة هالكعك بيعملوا بفلسطين مرة اكلتوا عندي صديقتي فلسطينية بس هني بيحشوا بتمر وكتير طيب ومميز سبحان الله كل مرة بقول بدي جرب احشي بس قلة مروة انشالله شي مرة بجربوه وبخركون

  16. ام عمر 16 October 2009

    نسيت اسالك ,,,, بتتركيهن يتخمروا !!!!!!!
    بادهني الصينية او لاء الصينية يلي بتخبزبهن فيها؟؟؟؟؟؟؟؟
    مشكورة :zzz :zzz :zzz

  17. DOUHA 17 October 2009

    ام نور جد وصفة بتجننن رح جربا بس مارح خبرك شو رح يطاع معي لاني عارفة النتيجة سلفاً
    :p

    شكراً

  18. ام نور 17 October 2009

    اكيد ام عمر بتركون يختمروا اقل شي 6 ساعات او الليل باكمله حتى النكهات تتمازح وترتاح العجيتة واذا صينية تيقال ما في داعي تدهنيا بس اذا صينية عادية ادهنيا احسن ما تلزء ولا يهمك انشالله بيزيطوا معك

  19. ام نور 17 October 2009

    تسلملي عينك يا دودو شو مهضومة وينك وين هالغيبة لا حس ولا خبر عاكل حال سالي نداء عن هالكعكات اكلتون عندي من زمان وكتير حبتون :)

  20. nidaa84 17 October 2009

    لك يسلمهم ياام نور ياجماعة انا بشهد انه بعد ام نور ماحدا يعمل اكلات حلوة الله يرحم ايام العزايم والبسط شلونك ياام نور ابعتيلى ايميل بالتفصيل سلام ياحلوة ويسلم ايديك بقيتى شطورة مثل عوايدك :cry :cry :cry

  21. ام نور 18 October 2009

    ولك ابوس قلبك يا ندوش تسلميلي على هالحكيات الحلوين والله خجلتيني كلو من زوءك والايميل وصل انت بتئمري امر :)

  22. منى 18 October 2009

    لك ندوشة و الله بعد زمان , اشتقتلك كومات , ان شاء الله كله تمام :zzz

  23. DOUHA 18 October 2009

    منى ونداء وام نور وانا بموضوع واحد ياعيني
    الرابعي المرح

    كيفك ام نور والله انا ما عم فوت على الماسنجر لاني جهازي معطل والجهز هيدا ما فيو نسخة
    المهم كيف وضعك؟ تمام؟ يلا رح ابعتلك ايميل

    نداء شو رياك تنزلي الوضفة يلي بتطير العقل يلي اكلتا عندك يميميميمييم

    باسمي وباسم الشعب اطالب نداء بالمشاركة

    الوصفة يلي بالي بالك :grin

    سلام صبايا :zzz :zzz :zzz

  24. وسيلة 18 October 2009

    الله يسلمك على هاد الوصفة الرائعة ,اختكم وسيلة .

  25. ام نور 18 October 2009

    وانا عم قول هالبنت وين غاطة انشالله تصلحي الجهاز بسرعة يالله ناطرطك دودو وانا بخير الحمدالله الاولاد متعبيني شوي مرض وغلاظة ودلع يالله ما بيكبر جسم حتى يفنى جسم هيك بيقولوا الحمدلله يا رب

  26. لارا مينا 18 October 2009

    هذا أخت منى الحديث بعد ماتأكدت منه:
    قال رسول الله صلى الله عليه وسلم -(عليكم بالفواكه في إقبالها فإنها مصحة للأ بدان مطردة للأ حزان وألقوها في إدبارها فإنها داء
    للأ بدان).

  27. منى 18 October 2009

    صار لي زمان ما طالعة مسيرة شعبية , هياته هلا وقتها .
    و انا كمن اضم صوتي لصوت الشعب :grin

  28. nidaa84 19 October 2009

    لك تسلموه يارب والله خجلتونى وكرمال عيونك ياست ضحى احلى وصفة والوصفة هى السلطة الفرنسية وانشالله تعجبكم

  29. DOUHA 19 October 2009

    نداء مع الصورة ها مابرضى بس وصفة

    ياجماعة سلطة بتجننننننننن

    ليكي نداء رح نعمل اعتصام بالموقع كرمال وصفتك انتي حرة :grin

  30. منى 19 October 2009

    انا معك :roll

    :grin

    دقيقة لجيب قهوة و كيك , لزم الاعتصام المتحضر يعني :zzz

  31. ام نور 20 October 2009

    منى ندوش عم تقول انها ارسلت الوصفة وبدها تعرف اذا وصلت ولا لاء

  32. DOUHA 20 October 2009

    اكيد وصلت مو ;)

  33. رفيف محمد 7 January 2010

    :) الله من أحلى الوصفات إنشاء الله أجربها

  34. رامو 14 February 2010

    اللللللللللللللللللللله يامجودة على هالوصفة مبارح ساويتها وطلعو الكعكات بيجننو ومابتتخيلي اديش طلعو طيبين وحتى ولادي من وقت اللي عجنتهن صارو يدوقو العجين ويقولولي كتير طيبة لحتى خبيتهن لبين ماترتاح العجين وبعدها شكلتهن وخبزتهن وصارو ياكلو منهن وهن سخنات وبنصح كل اللي بيحب انواع البهارات اللي فيها يجربهن وماراح يندم :)

  35. رامو 14 February 2010

    عنجد تسلم ايديكي ويعطيكي الف عافية يامجودة

  36. ام نور 19 February 2010

    صحة وهنا على قلبك وقلب عيلتك رامو كتير انبسطت انك جربتيون وعجبوك الله يبارك فيكي خجلتيني على هالكلام الحلو :)

  37. 7ayah 25 October 2010

    السلام عليكم
    ممكن بدي اسألك سؤال ام نور
    بدي أعرف كيف بينعمل معمول مد بالقشطة
    اختي داقتو بلبنان
    و كتير حابة جربو
    و شكراً مقدماً

    7ayah Dayyen

  38. 7ayah 10 November 2010

    :cry :cry :cry :cry :cry :cry
    ما حدا رد عليي
    بدي أعرف طريقة معمول مدّ بالقشطة بليـــــــز :zzz
    كتير حكتلي عنو اختي و شهـّتني عليه
    و خايفة يطلع بعين البيبي :grin مع إني ما بعرف كيف شكلو :zzz
    على كلّ أنا عم استنى :)

    7ayah Dayyen

  39. منى 11 November 2010

    ييي حياة مشان الله قرصي بطنك

    هو انا كنت ساعدتك , بس ما بعرف الوصفة :roll

    شو الحل

  40. 7ayah 11 November 2010

    و الله ما بعرف
    شكلا ام نور ما عبتدخل عالموقع لحتى تشوف السؤال
    شو نساوي :? :x

    7ayah Dayyen

  41. منى 11 November 2010

    هلا ببعتلها رسالة ان شاء الله :) و ان شاء الله تشارك بالوصفة :zzz

  42. 7ayah 11 November 2010

    ان شاء الله يااااا رب :)

  43. ام نور 11 November 2010

    السلام عليكم لا تواخذوني بالصدفة كنت عم ابعت رابط وصفة الكعك لا صديقة فانتبهت على تعليق الاخت 7ayah انا اسفة على عدم الرد السريع بس كنت باجازة بلبنان والي كم يوم راجعة وبالنسبة لا وصفة المعمول مد بالقشطة فاسم الوصفة ملوكية وفعلا كتير كتير طيبة يمممممم واكلت منها كتير بنزلتي واد ما طيبة جبت طريقتها وكنت ناوية جربها بس يصرلي وقت بس بتحبي جربها ونزل الطريقة ولا بنزل الطريقة وانتي جربيا

  44. ام نور 11 November 2010

    خلص رح اكتبها ميشان ما تطلع بعين الصبي :grin حرام الملوكية سهلة كتير وهي عبارة عن وصفة المعمول فيكي اتطبقي هيدي الوصفة تاعة منى
    http://www.l2ma.com/content/view/311/2/
    بتمدي بصينية فرن طبقة معمول بعدان القشطة وهي عبارة عن قشطة مطبوخة كمان هيدا الرابط تاع منى
    http://www.l2ma.com/content/view/218/2/
    بتجهزي القشطة ولما تخلص بتحطي معها كمشة فستق حلبي اختياري فيكي ما تحطي بس اطيب وبتتركيا تبرد وبتمديا فوق الطبقة الاولى من المعمول وبعدان بتمدي طبقة معمول على كيس وبتقلبيها على الوجه بشكل تغطي كل الوجه وبتدخليها الفرن واهم شي ما تكون طبقة المعمول سميكة ولما تطلع من الفرن تقطع مكعبات وفي ناس بيضيفولا قطر حسب الرغبة وصحة وهنا انشالله تكون وضحة الفكرة رح اعملا عن قريب وابعتها لا منى

  45. منى 12 November 2010

    مممم و الله مو صعبة ابدا و فكرة لتسهيل شغل المعمول

    رح استنى الوصفة الاصلية منك و على ااقل من مهلك , ايمتى ما صحلك ابعتيها :)

  46. 7ayah 12 November 2010

    ياااااااااااااااااي :zzz
    يا سلام عليكي
    شكراً كتير إلك
    و اليوم ان شاء الله أو بكرة بالكتير بجربا 8)
    و شكراً مرة تانية لإلك و لـــمنى
    سلااااامي :)

    7ayah Dayyen

  47. منى 12 November 2010

    :)

  48. ليان 2009 9 December 2010

    يسلموا ايديكي على الوصفة الكعكات شكلهن كتير طيب وحابة اجرب الوصفة بس حابة اسئلك ازا بنقدر نحشيهن تمر معجون ويلا ما بيزبط وشكرا كتيييير الك ولمنى ولكل وحدة بهالموقع اللي كتييير حلو وعنجد عم نستفيد منكن

  49. منى 12 December 2010

    الله يسلمك ليان , منورة حبيبتي :)

    ما عندي فكرة , ان شاء الله بتجاوبك ام نور لان هي ادرى ;)

  50. Amar 12 December 2010

    عملت نصف المقادير ولكن أثناء العجن عانيت كثيرا لأن العجينه كانت تلتصق بالوعاء واضطريت لإضافة كثير من الطحين والزيت حتى استطعت أن أجعلها تنفصل قليلا عن الوعاء ومع أنني خمرتها طوال الليل إلا أنها لم ترتفع إلا بضعة ميليمترات، أثناء الخبز كان علي أن أضع الزيت على يدي مع كل قطعه، النتيجه كانت جيده وخاصة أنني ضاعفت البهارات وأثناء الخبز ارتفع الكعك قليلا وكان طري والسامولينا ساعدت على ذلك.
    المشكله أنني أريد تكرار الكعك لكن خائفه من مرحلة العجن فهل لديك نصيحه؟ وهل يحسن الوضع إذا تخليت عن البيض وخاصة أن الوصفات التقليديه للكعك لا تحوي بيض؟
    أرجو النصيحه أو تعديل المقادير.

  51. boudour 15 December 2014

    سلام اكل كتير طيب

  52. boudour 15 December 2014

    سلام
    انا جربت هيدي الوصفة بس عند التشكيل تلتصق عاليد لماذا ؟

    • منى 19 January 2015

      هلا بدور
      كمية الحليب معناها كانت كتيرة ، يا ريت لو كنتي مو ضايفتيها كلها

تقييم الوصفة
عاديةقد أحضرهاجيدةممتازةأكثر من رائعة (4 votes, average: 3.25 out of 5)