كوسا شيخ المحشي


         وصفة : منى                 2008/07/06                 17 تعليقات
كوسا شيخ المحشي


2 كيلو كوسا من الحجم الصغير
2 ملعقة كبيرة سمنة لقلي الكوسا

الحشوة :

ملعقة كبيرة زيت أو سمنة
3 – 4 ملعقة كبيرة صنوبر
نصف كيلو لحمة مفرومة
باقة صغيرة بقدونس مفروم
نصف ملعقة صغيرة بهار
رشة صغيرة قرفة


صلصة اللبن :

ماء أو مرق يكفي لغمر الكوسا
2 فص كبير ثوم مهرووس
2 ملعقة كبيرة كورن فلاور
بيضة
كيلو لبن
رشة ملح و بهار





تحضير الحشوة :

• يحمر الصنوبر بالزيت ثم يرفع قبل الوصول للون المطلوب لأنه سيغمق قليلاً بعد رفعه عن النار .

• تقلى اللحمة بنفس الزيت و تفكك بملعقة خشبية و تقلب حتى يجف المرق و تنضج اللحمة ثم تتبل بالملح و البهار .

• يضاف الصنوبر و البقدونس المفروم للحمة , أصبحت الحشوة جاهزة .


تحضير الكوسا :

• تغسل حبات الكوسا ثم تقطع رؤوسها و تغمس بالقليل من الملح و تترك لمدة عشر دقائق , هذه المرحلة هدفها تطرية رؤوس الكوسا كي لا تتشقق أثناء الحفر .

• تحفر حبات الكوسا بانتباه و يحتفظ باللب لتحضير المثومة ( الكوسا بزيت الزيتون ) .

• تحشى حبات الكوسا بالحشوة المحضرة ثم تقلى بالسمنة حتى تشقر من جميع أطرافها .

• ترتب حبات الكوسا في طنجرة ثم تغمر بالمرق و تتبل بالملح و البهار و تترك حتى تغلي ثم تهدى النار و تترك حتى تنضج لمدة نصف ساعة تقريباً ثم تقدم ساخنة مع الأرز المفلفل و اللبن المثوم و النعناع الطازج و الفليلفة الحرّة.

• إذا أردت طبخ الكوسا بصلصة اللبن , يترك الكوسا بعد أن تهدى النار لمدة ربع أو ثلث ساعة .

• في هذه الأثناء يحضر اللبن , يذوب الكورن فلاور بالقليل من الماء ثم يخفق مع البيضة و اللبن حتى يصبح المزيج ناعماً .

• بعد مضي الثلث ساعة يضاف اللبن للمحشي كوسا مع الثوم و يترك لمدة ربع ساعة أخرى أو حتى يكمل نضج المحشي و تتكثف الصلصة قليلاً .

• يقدم شيخ المحشي ساخناً مع صلصة اللبن و الأرز المفلفل و النعناع الطازج و الفليلفة الحرّة .
  • وصفات تانية ممكن تعجبك


التعليقات

  1. هيلين 6 July 2008

    يا عينى هالاكلة انا بسميها اكلة الملوك جوزى كتير بيحبها يسلموا دياتك
    حبيبتى عندى سؤال لو انه مو بمكانه انا من شوى جربت يلى قلتلى عليه منشان عجينة البيتزا وطلبت من الخباز يلى تحت بيتى عجيبنة خبز مبينة ظريفة بس المشكلة انو باعتلى ياها مرقوقة يعنى اكثر من قطعة فكانت كتير رقيقة واجيت لارجع اعجنها ما عادت فردت معى كبتلت ببعض يعنى ما عاد سهل فردها شو الحل بليز جاوبينى هلق

  2. غيث 6 July 2008

    دخيل عينك على هالاكلة شو بنحبها كلنا وبعملها بنفس طريقتك وبتنجح معي بس حبيت اشكرك على نصيحة نقع الكوسا بالملح كي لا يتشقق لاني انا مستحيل ما تطير نصف كمية الكوسا اللي شارينها بالشقوق ووو كمان انا كنت اقلي الكوسا فبيصير حشوه صعب اما على طريقتك فالامر اسهل شايفة اشقد كنت احسب حالي بعرف بطبخ بس معلومات وفن منى غير شكل بيظل ناقصنا كتير اشياء لنعرفها منك جد شكرا لنصائحك وملاحظاتك القيمةبيجوز بقلب الوصفة تذكري كلمة صغيرة بس كتير الها قيمة بنجاح الطبحة شكرا لعدم اهمالك لاي ملاحظة تتعلق باي طبخة مهما كانت بسيطة لانها بالفعل بتكون مهمة

  3. منى 7 July 2008

    هلا هيلين :)
    الله يسلمك حبيبتي , عجينة البيتزا لما بتصير بتمط و كل ما مديتيها بترجع الحل انك تعجنيها مرة تانية و تغطيها و تخليها ترتاح شي ربع ساعة و بعدها بيصير الشغل عليها سهل مرة تانية ان شاء الله , ان شاء الله ما كون اتاخرت عليك :roll

  4. منى 7 July 2008

    هلا غيوثة :)
    بتعرفي غيوثة هل الاشيا الصغيرة متعلمتها من الستات الكبارية , لان بس ما سمعت واحدة شاطرة بشي وصفة لازم اسالها و هنن البركة و الله و بيعلموا بضمير و خصوصا هل الاشيا الفتفوتة الي ممكن ماما مثلا ما تخطر ببالها ;)

    الف شكر ليك على الردود الي بتنعنش القلب بهل الصيفية الحراقة , و لازم تعرفي ان اخوات متلك هنن الي بيشجعوني جرب اشيا جديدة و نزلها ;)

  5. تورتاية بالكريز 13 July 2008

    يسلموا ايدكي ياسكرررررررة بصراحة روعة وصفات الكوسة اللي منزلتيها فيه مهرجان للكوسا بالموقع وكل وصفة احلى من التانية
    الوصفة دي دي رائعة وبعملهاباللبن تعلمتها من جارتنا السورية الله يعطيها العافية يارب بس حقيقة ماجربتها من قبل بالصنوبر وكمان بضيف رز قليل جدا مش بيبان كتير بالطعم وان شاء الله بجربها مرة بطريقتك الحلوة هنا بمصر انبهروا فيها لانها طيبة وحلوة وخفيفة على المعدة وغير معروفة غير بالمطاعم اللي بتقدم الاكل الشامي الف شكر ياعسل

  6. منى 24 July 2008

    هلا احلى ام ياسمين:)
    كلك زووء حبيبتي , و ان شاء الله تجربي شي وصفة و تكون على زووءك ;)
    الصنوبر بيعطيها طعم جميل و أكيد إذا مو متوفر فيك ما تستعمله

    هلا صار فيك تعملي اشيا من الموقع و تصير سفرتك أطيب من أحسن مطعم :zzz نورتي ام ياسمين حبيبتي يا أطيب قلب

  7. بدور 28 August 2008

    يا سلاااااام على هالأفكار و هالأكلة اللذيذة كتير كتير
    و فعلا هي سيدة المحاشي بنظري..

    منيح ما كان الواحد بيسمن بس من شوفة الأكلة لإنو أنا عندي العصارات الهاضمة بتبدا شغلا بس من الصورة :grin

  8. منى 29 August 2008

    هلا بدورة :) حبيبتي ريتو عوافي على قلوبك , و اكيدة هي ست كل المحاشي , انا بموت عليها ;)

  9. نور الأسلام 11 April 2009

    السلام عليكم كيف حالك اختي منى ;) ناويه ان شاء الله سوي هاالاكله بكرا انا ساويتا اكتر من مره بدي اسالك انا بعد مااقليها واحشيها بطبخها بالبن يعني ما بسلقها بالمرق وكمان بقليها قبل الحشي بعتقد انو اذا نقلت بعد الحشي بتتشرب زيت اكتر شو رايك :?

  10. منى 11 April 2009

    هلا نور :)
    هادا عايد الك , انا بحس اذا انقلت بعد الحشي بتنحشى اسهل و بتاكل حشوة اكتر لهيك بتطلع اطيب بعد الطبخ , و القلي ما رح يكون قلي غميق , يعني الزيت او السمنة رح يكون اخد حوالي سم في الطواية ;)

  11. نور الأسلام 11 April 2009

    شكرا الك منى شو بالنسبه لسلقها بالمرق قبل ما تنطبخ بالبن واسفه اذا ثقلت عليك بالسؤال
    ويسلم دياتك يارب :)

  12. منى 11 April 2009

    انا بطبخها بالمرق لحتى ما يتغير لون اللبن أو يفرط الله لا يقدر لان شفتي اللبن طبخه بده انتباه , بس كمان ممكن تطبخيه اذا متاكدة ان اللبن عندك منيح ;)
    لا تقلتي و لا شي انا هون تحت امرك يا عسل

  13. laraye 9 February 2010

    مرحبا منى
    ممكن ما اقلي الكوسا او اشويه بالفرن؟
    بدي يكون طبق خفيف الا رح ينتزع؟
    حابة اجربا هاليومين
    يسلموا ايديك

  14. منى 10 February 2010

    ممم , مو مجربة انا حضره من دون قلي , بقى ما بعرف كيف رح يطلع .
    هلا هو اكيد بيطلع طيب , لان نفس المحشي بس محشي باللحمة عوض عن الرز ;) بس يمكن تطلع طعمته مو متل الشيخ محشي الي معوديين عليه

  15. سلطـــانه 25 December 2010

    تسلمين ياقلبي على هالوصفه

    انا من السعوديه وابي اعرف نوع اللبن اللي تستخدميه يعني مثل لبن المراعي
    ولا لبن غنم

  16. منى 25 December 2010

    مية هلا فيك اختي , نورتي و شرفتي الموقع :)

    انا استعمل لبن غنم لانه متوفر بشكل عادي و نكهته كتير طيبة و بتناسب هل الوصفة
    اما بالنسبة ليك على اعتبارك من السعودية فافضل لبن هو الصافي او ميلكو او نادك
    و لحتى يطلع اللبن شوي حامض فممكن تخليه كم يوم في البراد قبل استعماله ;)

    ايا سؤال تاني من عيوني

  17. لينا 9 October 2013

    مرحبا اليوم اول مره بعمل شيخ المحشي طلع كتير طيب وع اصولو ومو كأني هي المره الاولى اللي بعملو كأني عملتو من قبل شي مية مره ع اد ماطلع طيب وع اصلو

تقييم الوصفة
عاديةقد أحضرهاجيدةممتازةأكثر من رائعة (No Ratings Yet)