كيكة الموز بالمايكروويف


         وصفة : منى                 2010/01/01                 53 تعليقات
كيكة الموز بالمايكروويف





كوب ونصف طحين
كوب الاربع سكر
ربع كوب زيت مازولا او اي زيت نباتي خفيف
بيضتين
نصف ملعقة صغيرة بكن باودر

نصف ملعقة صغيرة كربونة( بيكربونات الصوديوم)
نصف ملعقة صغيرة زنجبيل بودرة
ملعقة صغيرة قرفة ناعمة
موزتين صغار
ملعقة كبيرة نسكافيه مذوبة بربع كوب ماء
فانيليا





• يخفق البيض والسكر والفانيليا جيداً حتى يبيض الخليط قليلاً

• ينخل الطحين ويهرس الموز بالشوكة

• تضاف كل المقادير السابقة وتخلط طبعا بخلاط الكاتو معاً

• يصب الخليط بوعاء بيركس او اي وعاء زجاجي مرتفع الحافة

• يدخل المايكروويف مدة 8 دقائق ويخرج بعدها يقطع بالسكين معينات ويصب فوقه الصوص المفضل وألف صحة وهنا.

• مقادير صوص الكراميل: نحرق كوب من السكر حتى يكرمل نضيف ملعقة صغيرة زبدة ثم نضيف نصف كوب حليب مركز محلى واذا لم يوجد حليب عادي بيمشي الحال بس بيطلع اخف شوي ((هالصوص بعمله بال8 دقائق خلال نضوج الكيك))

• تخفف الكثافة حسب الرغبة بالحليب

• مقادير صوص الشوكولا: ملعقة صغيرة زبدة كوب الا ربع كاكاو ((نوعية جيدة ليعطي طعم شوكولا رائع))كوب ونصف سكر كوب ماء ملعقة صغيرة نسكافيه نصف ملعقة صغيرة قرفة رشة ملح

• يخلط الكاكاو مع السكر ويضاف له الماء ويرفع على النار مع التحريك المستمر بخفاقة السلك اليدوية تضاف باقي المقادير وعندما يغلى ويتجانس الجميع يبعد عن النار ((ممكن استعمال انواع الصوص مع البوظة بتطلع تحفة))
  • وصفات تانية ممكن تعجبك


التعليقات

  1. منى 1 January 2010

    سلم ايدك فرح , كتير فكرة جديدة للكيك و مع هل الصوص طلعت لسا مميزة اكتر و اكتر

    هلا انا مو كتير من انصار الميكروويف , بس صار سمعت اكتر من واحدة عم تحكي قصص و حكايا عن كيك الميكروويف , لهيك رح جربه ان شاء الله باقرب وقت

    الف شكر الك للوصفة الطيبة و الفكرة المميزة :zzz

  2. ليان 2009 2 January 2010

    يسلموا ايديكي يا فرح حابة اجرب الكيكة خاصة انو 8 دقايق وبتكون جاهزة

    مشكووووورة

  3. Iman 2 January 2010

    اهلين فرح. يسلموا ايديكي عالوصفه. مبين طيبه. و عجبوني وصفات الصوص كمان. راح اجربا قريب. لانو دايما بيضل عندي شي موزتين او تلاته ما حدا بياكلون. :)

  4. سمسمة 2 January 2010

    يسلموا هالأيدين فروحة نفس طريقتي بس بدون قرفة وزنجبيل
    وطريقة صوص الشوكولا روعة يسلموا مرة تانية
    بالنسبة للميكرويف مابعرف ليش مابحبه مع أنو صار كتير منتشر
    يمكن بخاف من الاشعاع يلي بيطلع منه وعم تحاول بنتي تقنعني فيه بدون فائدة

  5. غيث 2 January 2010

    شكرا قرح الله يسلم ايديك والله الوحدة فينا صايرة متل هالعصر عصر السرعة بدها كل شي باسرع ما يكون رح اجرب طريقتك على الميكروويف بس سؤال هل ممكن ان نعمله بالفرن بنفس الطريقة ولا رح تتغير الطعمة وسؤال تاني ممكن اي ميكروويف ولا يوجد انواع معينة منها لطهي الكاتو مع الشكر لك لهالفكرة الجديدة

  6. freesoul 3 January 2010

    انا جربت كاتو الموز اليوم الصبح بالمايكروويف وكتير طلع طيب و نفش كتير منيح. بس احتجت اضيف كمان دقيقتين للخبز فصارو عشر دقايق .بس متل ما قلتي طار وهو سخن حتى ما لحقت احط الصوص. حطيت بس حليب مركز محلى وطلع كمان رائع :zzz

  7. منى 3 January 2010

    ممم , الف هنا و صحة يا رب على الكيك , عندي شوي موز و جاي على بالي جربه , بركي بكرة اذا ربنا راد :zzz

  8. ام عمر 3 January 2010

    بصراحة حابة جربو بس خايفة :upset
    هلا اي ميكرويف بيمشي الحال ولا لازم يكون فيه خاصية الشوي ؟؟؟؟
    مستنية الرد

  9. freesoul 3 January 2010

    انا بشجعك تجربيه يا منى .اما بالنسبة للمايكروويف انا يللي عندي في خاصية الشوي .وطلع الكاتو كتير ناجح فما بعرف النتيجة بالنسبة لغير نوع من المايكروويف

  10. منى 3 January 2010

    انا الي عندي ما اله , معناها راحت علي , بس جاي على بالي جربه بالفرن العادي مع صوص الشوكولا :eek

  11. ام جنى عبيدات 4 January 2010

    يسلم ايديكي يارب.. المايكرويف اللي عندي فيه شوايه ب[img]null[/img] مابعرف استخدمها.. رح اجرب خصوصا هادالكيك بنفع للضيوف الفجاه :zzz

  12. سوزان 4 January 2010

    شلونك منوش والله اشتقنالك واشتقنا للموقع كتيييير :roll
    يسلم دياتك يا فروحة بالصراحة انا ما كنت مقتنعة بفكرة المايكرويف بعدين قلت لحالي شو خسرانة جربي :)
    حطيت الكاتو بالمايكرويف على عيار الشواية ربع ساعة و بالاخير طلع الكاتو معجن ومو مستوي ابدا قلت لحالي اكلتها هالمرة صواب غير شكل :upset
    بعدين خطرلي حطيت على عيار المايكرويف العادي لعشر دقايق والنتيجة :zzz
    روعة فعلا يسلمو ايديك كان كتير طيب ونفش وخاصة مع سوس الكراميل بيجنن
    بنصح الكل يجربوا ويا منوش انا عملت كاتو الجلاس والكل فكروه من عند شي محل فخم :grin
    يسلمو ايديك والله لا يضيع لك تعب يا قمر

  13. منى 4 January 2010

    تشتاق الك العافية يا رب سوزان , الف هنا على كيك الموز و كمان على كاتو الجلاس , ايه اكيد شغل افخم محل و لو :)

    كتير انبسطت انهم زبطوا معك .يعني هل الكيك بقدر احضره على الميكرويف العادي :?

  14. farah 5 January 2010

    سامحوني على التأخر بالرد بس اشتراك النت كان منتهي
    على كل حال حبيبتي منى ما بتحتاجي شواية الميكروويف انا اصلا ما بشغلها ابدا هو الماكروييف العادي وبتشغليه 8دقائق ممكن يختلف من جهاز لآخر متل الأخت اللي جربته واحتاج معها دقيقتين كمان بس جربيه بتبعك وعلى مسؤليتي انشاء الله بيزبط

  15. farah 5 January 2010

    الله يسلمك يا لبان وانشاء الله بتجربيه وبيعجبك

    عزيزتي ايمان انشاء الله بتجربيهم وبيطلعوا على ذوقك ومتل ما قلتي انا بتذكر ساويه بس لاقي بالبراد زايد موزتين مسودين هم بيكونو مستويين كتير من قلبهم ومناسبين كتير لهيك وصفة ;)

    حبيبتي سمسة عجبني اسمك نصيحة جربي القرفة والزنجبيل معه رح تلاقي الوصفة اختلفت كتييير للأطيب وبالسبة للمكروييف بإذن الله ما بيضر انا كنت شوفه باوربا بالمستشفيات بيعتمدوا كتير عليه ولو كان بيضر هم اول ناس كانوا بطلوا استعماله فاتكلي على الله وجربي هالوصفة

    العزيزة غيث والله ما قلتي نحنا بحاجة اي طريقة توفرلنا الوقت وبالنسبة للفرن نفس الوصفة تماما بتدخليها فرن حرارته175 درجة بالقسم الأسفل من الفرن وبياخذ ساعة كاملة لذلك قررت جربه بالمكروويف وكانت النتيجة روعة فليش لأستنى ساعة :zzz
    وبالنسبة للمكروييف بتوقع اي نوع بيمشي حاله والشواية ما لها علاقة انشاء الله بيزبط معك وبيعجبك

    ألف صحة وهنا يا فري سول اسمك حلو الروح الحرة :)
    فرحت كتيير انك جربتيه ونجح معك وعلى فكرة انا ما بستعمل الشواية تبع المكرويف بس الحمد لله نجح معك

  16. farah 5 January 2010

    أهلين ام عمر حبيبتي ولا يهمك اي مكروييف بيمشي حاله وابدا ما بيحتاج شواية
    توكلي على الله وجربيه وانشاء الله بينجح معك وبتدعيلي ;)

    حبيبتي منى جربيه ما راحت عليكي ولاشي واكيد رح يزبط معك

    الله يسلمك يا ام جنى انتي مو بحاجة الشواية شغلي المكروويف بالنظام العادي وانشاء الله بيزبط معك

    الف صحة على البك والب كل من أكل يا سوزان الحمد لله اللي خطر ببالك تعيديه بالنظام العادي للمكروويف حقكم عليي انا كان لازم الفت نظركم انه ما بيحتاج الشواية :roll
    بتمنى الكل يجربه وينجح معه

  17. larooo 5 January 2010

    مممممم شكل الوصفة شي بشهي وسريعة
    بس ممكن اسأل اذا حدا بيعرف بيكربونات الصودا
    بالألماني شو ؟؟
    الله يعطيكم العافية :)

  18. om albara 5 January 2010

    يسلمو كتير علهوصفه بس بدي اعرف الكربونه هي نفسها البينكج بودر ولا غيرى وبلنسبه لدرجه الحرارة للميكرويف عالعالي او المتوسط

  19. farah 6 January 2010

    والله يا لاروانا بعرفها بالسويدي وبتخيل بتكون قريبة وهيbikarbonat
    انشاء الله تطلع نفس الكلمة وتعملي الوصفة وتعطينا رأيك ;)

    أختي ام البراء الكربونة هي غير البكنج بودر الكربونة اللي عادة بيستعملوها لنقع الحمص
    وبالنسبة للمكروويف على درجته العادية اللي بتستعمليها عادة لتسخين الأكل وانشاء الله تجربيها وتعجبك

  20. roro1 7 January 2010

    يسلمووووووووووووو كتير و شكلها كتير طيب و بد أطلب منكون شغلة إذا في أي حدا بيعرف كيف بينعمل كاتو قدرة قادر و بكون ممنونة :zzz :zzz :zzz

  21. منى 7 January 2010

    رورو نورتينا اختي , بيتك و مطرحك :zzz

    الوصفة موجودة بالصورة على الرابط [URL=المقادير]التالي[/URL]ان شاء الله يعجبك

  22. larooo 11 January 2010

    اليوم جربت الوصفة ..والكاتو طلع طيب كتيييييير
    يسلمو ايدكي ..بس للأسف جربت اعمل صوص الكراميل
    وللأسف طلع سيئ جدا :upset
    طبعا الحق علي اكيد ..لأنو هي اول مرة جرب هيك شي
    اول شي طلع مر شوي ..كأنو طول عالنار ولما ضفت الحليب مدري شو صرلو كأنو عم اعمل تفاعل كيميائي
    :eek
    يمكن كان بارد شوي الحليب ..مابعرف ليش هيك صار
    بس اكلنا الكاتو لحالو …طيب كتير :grin

  23. منى 12 January 2010

    :grin ايه اكيد زودتي على السكر شوي , الف هنا و عافية على الكيك و سلم ديات فرح على هيك وصفة :zzz

  24. farah 12 January 2010

    ألف صحا وهنا يا لارو كتير فرحت انه نجح معك
    اما بالنسبة للصوص هادا يا ستي مرمر معناها حرقتي السكر زيادة شوي لازم تبعديه عن النار اول ما يصير لونه عقيقي فاتح واذا بتستعملي الحليب المركز لازم يزبط معك :roll يا ستي انشاء الله خيرها بغيرها انشاء الله بتعيديه وبينجح واذا بدك جربي صوس الشوكولا كمان كتير لذيذ معها :zzz

  25. sahreeg 15 January 2010

    باين فعلا بيشهى بس بقدر ابدل النسكافيه بالبن او كاكاوالا الغيه :upset

  26. farah 17 January 2010

    أهلين عزيزتي بتوقع فيكي تبدليه بالكاكاو اذا مصرة ما تستعملي النسكافيه :zzz
    على كل حال جربيه وخبرينا النتيجة

  27. غيث 25 January 2010

    الله يسلم ايديك فروحة عملت الكاتو طلع طيب وبيشهي والاحلى ما صدقت انو بوقت قياسي يطلع عندي هيك كاتو الله يعطيك العافية انا جربته مع صوص الشوكولا كتير لذيذ طلع وتغيير شكل شكرا لك فرح والله يجزيك الخير انت ومنى صاحبة الفضل بالتعرف على هيك اخوات لذيذات

  28. ام عمر 2 February 2010

    اختي فرني ما فيه خاصية الشوي ( قصدي المايكرويف)
    بقدر ساويه ولا لاء :upset :?

  29. farah 3 February 2010

    انشاء الله ألف صحةو هنا يا رب يا غيث ما بتعرفي اديش بينبل البي لما بلاقي في اخت من الأخوات جربت الوصفة ونجحت معها

    حبيبتي ام عمر ما بده شواية انا ذكرت الملاحظة بالردود بيكفي ميكروويف نظام التسخين العادي جربيه وانشاء الله بينجح معك وخبرينا النتيجة

  30. ام عمر 4 February 2010

    ريتو يسلم هالايدين خلص لكان لقوم جربو :zzz

  31. ام عمر 4 February 2010

    اخت فرح الله يجزيكي كل كل كل خير يا رب :)
    ويجزيها الخير لمنى لانو عرفنا على هالناس الطيبة :zzz
    ساويتو هلا صبيت عليه صوص الكراميل طلعت يمممممممممممممم :zzz بصراحة لما حطيتو بالمايكرويف قلت معقول يكلع كاتو مستوي ومو معجن !!!
    قلت يمكن يكلع جاج مشوي بدالو :grin
    روحي الله يبيض وجك :zzz

  32. farah 8 February 2010

    انشاء الله الف صحة وهنا والف الحمد لله ان نجح معك
    وما طلع دجاج مشوي :grin
    وانشاء الله بيبض وجهنا معكم دايما

  33. منى 9 February 2010

    :zzz

  34. سارونات 11 February 2010

    السلام عليكم و رحمة الله و بركاته

    منووووووووووووووووش اشتقتلك و اشتقت للموقع كتير

    كأنكم ما اشتقتولي :sigh :grin

    جازاك الله خيرا على الوصفة و ان شاء الله راح جربها

    سلام

  35. Mays 15 April 2010

    سلام يا صبايا

    فروحة حبيبتي ، أنا امبارح جربت الوصفة تبعك و لما طالعتو من الميكرويف كان بيجنن ، نافش و ري وريحته بتاخد العقل و فعلا قسمت قطعة و هو بعده سخن ودقتها كانت رائعة ، بس لوقت ما عملت الصوص و حطيته عليه نشف كتير و صار كإنوا إلو 3 إيام بدون غطا يعني صار متل البسكوت ، يا ترى شو السبب ؟؟؟؟ مع إني اتقيدت بالوصفة بحذافيرها :?

    و يا ترى فينا نعملوا بغير نوع فواكه ، يعني تفاح مثلا :x

  36. منى 15 April 2010

    سارونات كيف ما اشتقنالك , ان شاء الله الغيبة على خير ;)

    ميوسة , ان شاء الله تشوف فرح السؤال و تجاوبك , بس اتوقع انك زدتي لوقت الخبز بالنسبة لفرنك :roll

  37. farah 20 April 2010

    حبيبتي ميس تمام بتوقع متل ما ذكرت العزيزة منى شكلك زدتي الوقت شوي لأن عادة بيبقى لتاني يوم قطعة يتيمة وبتبقى طرية وبتجنن وبيصير حرب عليها مين بده يسبق وياكلها :grin
    حاولي تنقصي من الوقت دقيقة او دقيقة ونص جربي بطرف السكين الرفيع بالوسط وشوفي اذا نشف الخليط بيكون بيكفيها وقت اقل حسب جهازك وخبريني النتيجة وانشاء الله بيزبط معك ولا تخافي يهبط اذا فتحتي قبل وقت لذة هالوصفة انه ما بيهبط وفيكي تبقي تزيدي الوقت لحتى ينشف من الوسط

  38. farah 20 April 2010

    بالنسبة لنوع الفواكه بعد ما بعتت الرد انتبهت لباقي السؤال يا ستي انا جربت كيكة التفاح اللي منى منزلتها بس اخدت وقت اطول وبعد ما نفش خفس شوي بس اكلناه وكان لذيذ بس ما بظن مناسب اذا عندك حدا لأن شكله طلع عجبة :grin
    اذا بدك عندي وصفة تانية بالجزر للمكروويف او اي وصفة كيك بسيطة بدون فواكه فيكي تجربيها لحالك أنا معظم وصفاتي نتيجة تجارب مرتين فاشلة ومرة ناجحة بس مو مشكلة الوحدة بتتعلم من تجربتها

  39. منى 20 April 2010

    متل حكايتي فروحة , كتير احيان الوصفات الي بنزلها بيون في وراه اكتر من تجربة فاشلة , بس الحمد لله الواحد بيتعلم من غلطه و كل شي بيزيده خبرة :zzz

  40. Mays 28 April 2010

    يسلمو فروحة ع الرد :)
    إن شاء الله راح أجرب متل ما قلتي

  41. karamela 13 May 2010

    السلام عليكم اخت فرح
    انا عضوة جديدة بالموقع بس من زمان بجرب بالوصفات
    حبيت اتشكرك على هالوصفة الحلوة يعني ماضل اسهل من هيك بالعالم
    انا عملتها يوم عيد ميلاد زوجي وكنت يومها مريضة وماني حابة فوت هالمناسبة :sigh
    قام اجت وصفتك لتنقذني :) بس مو كتير لانو بصراحة ومن دون مبالغة بنتي اكلت تلت القالب على بين ما اجا ابوها :grin
    وبحب قول للاخوات اني طبقتها بحذافيرها مع صوص الشوكولا بس ضفتلها دقيقتين بالمايكرويف
    اخت فرح بس انا الي عندك طلب ان شاء الله ما بتخجليني :roll
    بدي مقادير كاتو الجزر بالمايكرويف
    وشكرا الك سلفا وللاخت منى اللي عرفتنا على بعض

  42. منى 13 May 2010

    الف هنا و صحة يا رب :zzz

  43. إسراء 19 May 2010

    السلام عليكم
    مبارح جربت هالوصفة وطلعت طيبة كتير واهم الشي انها مابدها غير 9 دقايق بالميكرويف بس صوص الشوكولا حسيتو مريء شوي بس مابعرف اذا هوي هيك لازم يكون مريء؟؟؟؟
    والله يعطيكن العافية على هالموقع الحلو :)

  44. منى 20 May 2010

    مية هلا فيك :) و الف هنا و صحة

  45. farah 25 May 2010

    الف صحة وهنا يا كرملا على ألبك والب الكل كتير فرحت انها نجحت معك وتكرم عينك رح اكتبلك هون مقادير كيكة الجزر لبين ما يصحلي زبطها ونزلها بوصفة لحالها: على فكرة الوصفة الأصلية ما فيها كاكاو بس لأن المكروويف ما بيعطي لون للكيكة فبدون كاكاو بتطلع لونها باهت اختاري انتي اللي بدك الوصفة : نصف كوب كاكاو – كوب طحين – 3 بيضات – كوب ونصف سكر – نصف كوب حليب او عصير برتقال – فانيليا – رشة ملح – ملعقة وربع صغيرة بكن باودر – برش جزرة وسط – ربع كوب زيت نباتي
    يخفق البيض والسكر والفانيليا جيدا ثم ينخل الطحين والكاكاو وتضاف باقي المقادير ونفس طريقة خبز كيكة الموز واذا ما بدك كاكاو نفس الكمية بدالها طحين انشاء الله ينجح معك وخبريني النتيجة

  46. منى 21 May 2011

    راااائعة يا فرح , مو معقول شو طيبة و سهلة , وصفة معتمدة تسلم ايديكي ;)

  47. farah 29 May 2011

    يا ستي ألف صحة وهنا والحمد لله انك جربتيها يعني بعد سنة ونصف من تنزيل الوصفة ;)

  48. منى 30 May 2011

    لا انا جربتها من زمااان , بس من دون الصلصات و كانت يممم , بس هلا جربتها كما انزلت و كانت مميزة كتير ;)

  49. ام كرم 24 July 2011

    مرحبا يا اخت فرح طبعا الجاتو شكله شي كتييرفاخر وانشالله راح اجربه بس انت عاملتيه بالصورة بقالب الكب كيك كيف دخلتيه المايكروييف او احكيلي شو اعمل

  50. لينا 30 July 2013

    مرحبا كتير حبيت فكرة المايكرويف وانشالله تظبط وتطلع طيبه يسلم ايديكي

    • منى 30 July 2013

      جربيها , كتير سهلة و طيبة و يممي :)

  51. ميرنا 6 January 2014

    منى يعطيك الف عافية كتير جربت من وصفات الموقع كلوا شي بيرفع الرأس والله والواحد بيشوف حالوا بي هيك أكل روعة عم يطلع معو بس دبي اطلب منك طلب كتير من صور الوصفات مو مبينة أبدا يا ريت تشيكي عليون لأنو ضروري الواحد يشوف صورة الأكلة قبل ما يعملها متل هالكيك مثلا مافي صورة

    • منى 6 January 2014

      الف عافية على قلبك ميرنا , منورتينا

      وصفات الموقع كلها رايحة و انا عم رجعهن بس بده شغل كتير , ان شا الله بيجهز بااقرب وقت

تقييم الوصفة
عاديةقد أحضرهاجيدةممتازةأكثر من رائعة (No Ratings Yet)