لحم بعجين


         وصفة : منى                 2007/06/13                 61 تعليقات
لحم بعجين



العجينة :

5 كوب طحين
4 ملعقة كبيرة سمنة ( أكثر من نصف كوب بقليل )
ملعقة كبيرة خميرة
ملعقة صغيرة و نصف ملح
2 ملعقة كبيرة و نصف سكر
كوب و نصف ماء حار ( أو أكثر حسب الحاجة )

لحم بالعجين عنتابلي :

نصف كيلو لحمة غنم مدهنة قليلاً
2 حبة كبيرة بصل ( اختياري )
2 حبة متوسطة فليلفة حمراء
4 فص ثوم
3 حبة كبيرة بندورة
باقة بقدونس
2 ملعقة كبيرة نعناع مفروم طازج
نصف ملعقة كبيرة بهار مشكل
2 ملعقة كبيرة معجون البندورة
2 ملعقة صغيرة فليلفة حمراء ناعمة
ملعقة صغيرة ملح
ربع كوب صنوبر


لحم بعجين بلدي :

نصف كيلو لحمة غنم مدهنة قليلاً
2 حبة كبيرة بصل
نصف كوب دبس رمان ( أكثر أو أقل حسب الذوق )
نصف ملعقة كبيرة بهارات مشكلة
ربع كوب صنوبر
ملح





• تحضر العجينة , توضع الخميرة و ملعقة من السكر في وعاء , يضاف نصف كوب من الماء الحار و تحرك حتى تذوب حبيبات الخميرة , يغطى الوعاء حتى ينتفخ و تظهر رغوة على وجهه و يتضاعف حجمه لمدة عشر دقائق تقريباً .

• في وعاء كبير يدعك الطحين و الملح و باقي السكر و السمنة مع مزيج الخميرة , يضاف باقي الماء الحار بالتدريج و تدعك العجينة باليد حتى تصبح طرية و ناعمة ثم تغطى و تترك لترتاح و تختمر لمدة ساعتين أو ثلاث ساعات تقريباً أو حتى يتضاعف حجمها.

• أثناء تخمير العجينة تحضر حشوة اللحمة و الخضار : يفرم البصل و البندورة و البقدونس و الفليفلة و النعناع فرماً ناعماً جداً أو تفرم في محضرة الطعام ثم يوضع مزيج الخضار في مصفاة و يضغط عليه بلطف ثم يترك حتى يجف منه مرق الخضار تماماً .

• تدعك اللحمة مع البهارات و الملح و مزيج الخضار المصفى و معجون البندورة و الصنوبر و تعجن جيداً ثم تغطى و تترك في البراد لتتمازج النكهات جيداً , يضاف المزيد من البهارات بعد تذوق العجينة للتأكد من جودة النكهة .

• تحضر الحشوة البلدية : يفرم البصل ناعماَ جداً ثم يدعك مع اللحمة و البهارات و الملح و الصنوبر و يضاف نصف دبس الرمان ثم تذاق الحشوة و يضاف المزيد من دبس الرمان حسب الذوق , ثم تغطى و توضع في البراد .

• يحمى الفرن لدرجة حرارة 200 – 220 درجة مئوية , تقطع العجينة إلى 24 كرة و ترق على سطح مرشوش بالطحين إلى دوائر رقيقة مع الانتباه كي لا تتمزق أثناء الرق .

• تصف الأقراص على صينية كبيرة غير لاصقة و تغطى بطبقة رقيقة من الحشوة المجهزة ثم تفرد الحشوة بأطراف الأصابع و تضغط الحشوة بالعجين حتى تلتصق بالعجين و تخبز على مراحل في الفرن الحامي .

• يقدم اللحم بعجين ساخناً مع اللبن العيران و السلطات المختلفة و المخلات .


  • وصفات تانية ممكن تعجبك


التعليقات

  1. Azhar 7 November 2007

    السلام عليكم ورحمة الله وبركاته،
    الأخت منى..
    شكرا جزيلا على هذا الموقع الرائع..
    من زمان وأنا متابعة لموقعك..
    والبارحة جربت هذه الوصفةبالحسوة البلدية طلعت كتير طيبة وبتشبه كتير أكلة معروفة عنا(بالقلمون ودمشق)هي الصفيحة..

    أمي كانت تعملهابالبيت بس بعدين صارت تعمل الحشوة وتبعتها لعند الفران..
    ولما قرأت إنو العجينة اللي بتعمليها حضرتك هي بنفس طريقة الفران قررت جربها..
    ضفت مع الحشوة بندورة مفرومة ناعمة، طلعت كتير طيبة وعجبتو لزوجي كتير..

    أنا طولت كتير مو هيك!!

    عندي كم وصفة رح حاول ابعتلك ياهن للموقع عن قريب إن شاء الله.

  2. منى 7 November 2007

    بالعكس أخت أزهار :)

    كتير انبسطت بردك , بالفعل متل ما قلتي هل الوصفة قريبة للصفيحة , بس أظن أن الصفيحة بتكون أسمك شوي و إلا أنا غلطانة :roll

    أختي أنا كنت أحضر الوصفة بخميرة , و مرة سألت الفران فقال لي لأ ان هذه العجينة بالذات ما بدها خميرة فصرت هيك أعملها ..

    بس على فكرة في أخوات في منتدى لك جربوا الوصفة و خبرتني أكتر من واحدة أنها طلعت بالخميرة أطيب :roll

    ان شاء الله عوافي و هنا و صحة يا رب على قلبك و قلب زوجك ..

    و أنا بانتظار وصفاتك , لا تنسي ;)

  3. ام نور 1 December 2007

    اخت منى عش البلبل التي قصدتها الحشوة بيحطوا فيا طحينة ودبس رمان وبصل ولحمة بس المقادير بالظبط ما عندي فكرة بس بشوف الاخوات الحلبيات هون بيعملوا ولا اروع والعجينة بتطلع مورقة بيعملوا عا يدون خصوصي لا هالاكلة عم لبكك معي عاكل حال رح اسال شي اخت وخبرك لان ما جربت اعملا ولا مرة ;)

  4. منى 2 December 2007

    أختي ام نور نحنا منعمل عش البلبل بالطريقة الي قلت لك عليها, يعني بالعجينة الجاهزة و من دون طحينة ..

    بس في أخت من حماة جربت وصفة اللحم بعجين و خبرتني انهم بحماة بيضيفوا مع الحشوة طحينة ..

    يا ريت ام نور لو تعلميني الطريقة الي عم تقولي عليها و كيف ممكن تنعمل العجينة بكون ليك ممنونة ;)

  5. ام نور 5 December 2007

    تكرم عيونك رح اتعلما انشالله واعطيكي الطريقة كتير بيعملوا بالمناسبات وبتطلع طيبة بس لا زور صاحبتي لان انا ساكنة بمنطقة بعيدة ساعتين عن كل صاحباتي الشاطرين بالاكل ;)

  6. منى 5 December 2007

    الله يعطيك ألف عافية مقدما ام نور :)

    عزبتك معي ;) , عم استنى الوصفة اذا الله راد

  7. أم مــــالــــك 20 March 2008

    تسلم دياتك اخت منى :zzz يعني نفس طريقتنا بفلسطين لكن احنا بنسميها صفيحه :grin

  8. Eman 7 April 2008

    البارحة جربت اللحم بعجين وكان طيب ولذيذ ،لكن العجينة كانت سميكة شوي وما ارتقت معي منيح .
    وهي صورة لتطبيقي للوصفة:[img][IMG]http://i286.photobucket.com/albums/ll120/hodaleman/002.jpg[/IMG][/img]

  9. منى 10 April 2008

    يا ربي صحة و هنا و عوافي على قلبك :) شي بيشهي كتير

    يمكن الخميرة مو كتير منيحة :roll

  10. منى 11 October 2008

    مسا الخيرات و الليرات :) نحنا بحلب ما في شي اسمه صفيحة عندنا , كله لحم بعجين و هي نفسها وصفة الصفيحة ;)

  11. نور 21 November 2008

    مساء الخير أختي منى : هل هذه هي وصفة الصفيحة ؟؟ ولك كل الشكر ؟

  12. ام احمد الغالي 4 August 2009

    والله يا منى انا فتحت الصفحه وانا شميت ريحة اللحم بعجين
    ممممممممممم شي بيشهي
    يسلم دياتك يارب

  13. منى 12 August 2009

    الله يسلمك ام احمد و ان شاء الله شي مرة تجربيه و يكون يممي ;)

  14. shams 6 January 2010

    تسلم دياتك انت كتير حليتيلي مشكلة بهاالموقع الحلو بالذات احنا بالغربة ومافي حدا نسألوا عن اكلات حلب الغالية الله يجزيك الخير يارب :)

  15. بشرى 17 March 2010

    فكرة حلوة كتير إنو ينعمل بالبيت .. أنا عم جيبو معي من حلب وفرزو وطالعو وقت الحاجة بس ما كتير عم حبو .. حطيتو على لائحة التجريب ان شاء الله ;) يسلم دياتك يارب :p

  16. منى 17 March 2010

    الله يسلمك بشورة :) ان شاء الله تجربيه و يطلع متل ما بتحبي

  17. محبةالمصطفى ملك 29 April 2010

    السلام عليكم
    أختي منى هلأ بدي أسألك يعني اذا بدي أجرب اللحم بعجين و اذا زبط معي رح أكون كتيييييييييييييير مبسوطة بس أحط خميرة ولا لأ برأيك انت؟
    لأنك حاطة الخميرة بالمقادير و بعدين عبتقولي انك ما عبتعملي بالخميرة :x
    ههههههههه أنا كرارة ما هيك :zzz
    يلا سلام

  18. منى 30 April 2010

    لا بالعكس :)

    انا اتعلمتها من ابو اللحم بعجين من دون خميرة , و نزلتها بالاول بنفس الطريقة , بس بالتجربة شفت ان بالخميرة احسن , لهيك في شوية لت و عجن بالردود , الطريقة اي كاتبتها هي الي معتمدتها , و انت فيك تحضريها كيف ما بتحبي ;)

  19. محبةالمصطفى ملك 1 May 2010

    رح أحضرها طبعا بطريقتك يا قمر :zzz
    و ان شا الله تنجح معي بس بدي أسألك معجون البندورة نفس ماء البندورة؟؟؟؟
    و اذا ما بدي أفرم الخضار بمحضرة الطعام بيمشي الحال و لا لأ؟
    و آخر سؤال هلأ مشتهية كتير أعرف طريقة تحضير رقائق برك الجبنة بالبيت اذا بتعرفي كيف؟؟؟؟

  20. منى 6 May 2010

    معجون البندورة هو دبس البندورة الي منشتريه من السوق لان نسبة الحموضة فيه اخف .
    فيكي تفرمي الخضار بمحضرة الطعام , و رح نزل البرك اذا ربنا راد ;)

  21. محبةالمصطفى ملك 6 May 2010

    يا الله شأد أنا فرحانة فيك
    يسلمو عالأجوبة بس دبس البندورة ما بنقدر نبدله بشي تاني بدون ما يتغير الطعم؟؟؟؟؟ :roll

  22. منى 7 May 2010

    خلص اذا مو متوفر بلاه , بتزبط كمان , بس لما بيتوفر اكيد بيطلع اطيب :zzz

    و انا كمان فرحانة بهل الطلة , نورتي اختي

  23. محبةالمصطفى ملك 11 May 2010

    يا منى الحلوة الأمورة اكيد جننتك و ين ما بتروحي بتشوفيني و أكيد هلأ صرتي هيك :(
    طيب اذا ما صرتي هيك :( بدي أسألك شو نوع الطحين ؟؟؟ و شو هي البهارا ت المشكلة
    اذا ممكن تجاوبيني لأني رح أعمل اللحم بعجين هالليومين :zzz

  24. منى 12 May 2010

    الله يسامحك , معناها لسا ما بتعرفيني منيح , انا رب العالمين سخرني لخدمة الناس الطيبة :zzz

    الطحين الي استعمله هو الطحين العادي مو طحين الكاتو . و البهارات هي الدقة الحلبية الي منشتريها من المدينة ;)

  25. محبةالمصطفى ملك 12 May 2010

    انت أحلى منوووووووووووووووووش

    أنا ولا مرة ما اشتريت من هالبهارات
    اذا ضروري مشان الطعم رح أوصي ماما؟؟

  26. منى 12 May 2010

    يا باتل :roll

    لكن شو بتستعملي للطبخ ؟؟

    لازما و حتما و لا بد يكونوا في المطبخ , م بس لهل الوصفة , كل الطبخ ببهارتنا غير شكل

  27. محبةالمصطفى ملك 21 May 2010

    هههههههههههههههههههههههههههههههههههههههه
    ضليت ساعة و أنا أفك الشيفرة بالأخير طلعت يا باطل :p
    ههههههههههههههه
    هلأ طبعا عندي مجموعة بهارات و منستعملها بالطبخ بس كل نوع لوحده(كمون.بهار.كزبرة.فليفلة.نعناع….
    انت هدول قصدك و لا قصدك أنواع محددة و مخلوطة آسفة لأني عبكتر الأسئلة بس من عمرنا منستعمل هالبهارات و بيطلع الأكل كتير طيب

    يعني مو معقول ما منحط شي للأكل أبدا :grin

  28. منى 22 May 2010

    يا ستي شايفة البهار , هو داااا

    نحنا منقول عليه بهار و هو بالحقيقة 7 بهارات ;)

  29. محبةالمصطفى ملك 22 May 2010

    عبتمزحي :eek ههههههههههههههههههه
    هلأ هاد سبع بهارات امممممممم
    معناها اختصاص حلب بس ما ؟
    و انا دائما بسأل نفسي هادا بهار أبيض و لا بهار أسود و لا اشو بالضبط؟؟؟
    هلأ مو اذا حطينا بعلبة شفافة بعد فترة بتبقع؟؟؟
    و على صفحة مخلل الخيار يا حلو

  30. منى 23 May 2010

    تمام هادا هو , هو بهار حلو و فلفل اسود و ورق غار و زنجبيل و حب هال و جوزة الطيب و قرفة , بنسب معينة ;)

    لاحقتك , دقيقة لجيب الباشاية

  31. محبةالمصطفى ملك 23 May 2010

    :grin

  32. أمــ نــــدى 14 September 2010

    يعطيك العافيه منى
    عن جد بتشهي , الله لا يحرمك الأجر
    ان شاء الله بجربها قريب

    لو تسمحي بدي أشارك معكم بوصفاتي
    لكن ما اعرف من وين أبدأ ؟
    :?

  33. منى 16 September 2010

    ان شاء الله تجربيها و تحبيها و تكون يمييي ;)

    ممكن تبعتي الوصفات عن طريق اتصل بنا و انا ان شاء الله رح انشرها باسمك :zzz

  34. raghd 11 March 2011

    حطي للحشو البلدي لبن زبادي بتطلع اطيب

  35. Jassy 21 May 2011

    السلام عليكم ورحمة الله

    منى منى منى :zzz طبعاً كالعادة حاكتبلك: من زمان بدي جرب هالوصفة. لك يا عيييييين عاللحم بعجين ما أطيبو.
    وكالعادة رح اكتب: ما توقعتو ينجح كل هالقد :grin .. خاصة الحشوة العينتابية، طلعت تماما متل الجاهزة بالطعم، بس التانية مدري كيف طلعت، طعمة البصل المقرمش وهيك، وما طلع لونها أسوووود متل العادة. بس طيبة وجوزي حب الحشوة البلدية آل لأنه ما بيعرف العينتابية (طبعا كل شي ما بيعرفو ما حيحبو ههههه). وآل هنة بالشام كمان عندون لحم بعجين :roll وهي غير الصفيحة.
    عملت نص الكمية، بس ما عرفت أديه لازم تطول بالفرن فشي خليتو 15 دقليلة، شي 10 شي 13 .. لأن ما عرفت حدد جاهزية اللحمة. والعجينة طلعت كتير حلو العامل معها، بس طلعت بتقرمش ومو متل الجاهز.
    طبعا هديك أني وي بدها الفرن الخاص …

    بس طيييييبة :) بس روح لعند أهلي عروسيا أكييييد رح اعملون ياها ورح ينبسطوا لأن أكيد صرلون زمان ما آكلينها :zzz :zzz :zzz واليوم عم جاكر ماما عالماسنجر فيها :grin 8)

    شكرا مجددا :) كلك ذوق.

    مع التحية

    والسلام عليكم ورحمة الله

  36. joumana 20 July 2011

    تسلم ايديكي اخت منى بصراحة انا بالسعودية وكتير مشتهيه عليه وانشالله رح اجربه
    بس ععندي كم سؤال ياريت تجاوبيني عليهن
    1لازم ادهن الصينية شي قبل ماصف عليها العجينة.
    2كمان بدي اسأل بماانو العجينة الها خميرة مارح تنفش بالفرن وتبطل رقيقة؟؟؟
    3السؤال الاخير انشالله ماكون طولت عليكي بس كيف بدي اعرف انو استويت يعني اديش اتركها بالفرن
    وشكرا كتيييييييييييييير :zzz

  37. ام علاء 19 April 2013

    ازا بدي اعملها ب 3 كاسات طحين و تكون رئيئة كيف رح تكون المقادير بلييييييييييييز ردي علي انا لسة اول مرة رح اعملا و جوزي ناطر هل اكلة على احر من الجمر و بده ياها رقيقة.

    • منى 9 July 2014

      اهليين ام علاء :)
      شو رايك تعمليها كاستين و نص و تقسمي المقادير كلها ع التنين
      هي العجينة لازم تكون رقيقة , جربيها ما بتندمي , بتاخد العقل

  38. رانو 28 July 2013

    السلام عليكم منمن …هلكتك اسئلة من محل لمحل ..بس شو اعمل وصفاتك كلا لذيذة وماعندي ثقة غير بوصفاتك ..وبالغربة بتعرفي الوضع ..الله يفرجا ويرجعنا عبلدنا يارب …المهم. سؤالي عن عش البلبل ..انا عملت العجينة للشعيبيات وطلت طيبة ومورقة وقال نفسا بتصير لعش البلبل ..حابة جربه بس ماعبعرف اقدر كمية اللحمة ودبس اارمان ..وكمان ماما قالتلي مابدو بصل وناس قالولي بدو ..فاحترت..مالي غيرك يا منمن ..هﻷ مقدار العجينة بيعمل24قرص ..بقا اذا فيكي تعطيني مقادير تقريبية …والله يجزيكي الخير يارب

    • منى 29 July 2013

      بالعكس رانو بتنوري :)
      رح قلك مقاديري , يمكن لو قسمتيه ع النص بتكفيك لكميتك , بس كمان مو متاكدة مية بالمية : نصف كيلو لجمة , 2 معلقة كبيرة طحينة, بصلة ناعمة كتير كتير , ملح و بهار , معلقة كبيرة لبن لحتى ما تنشف اللحمة , و دبس رمان حسب ما بتحبي و حسب طعمة الدبس الي عندك

      شكرا رانو لدعمك و تواجدك الدائم , عم تونسيني هون

  39. Hadoosh 29 July 2013

    مرحا اخت منى انا متابعة موقعك من شي 5 سنوات بس هاي اول مرة بكتبلك, الحقيقة موقعك هو موقع الطبخ الوحيد اللي بوثق فيه وعندي استعداد جرب وصفاته الله يعطيك العافية. اللحم بعجين (اؤ الصفيحة) من الاكلات اللي بموت فيها ومن تحت ايدين ماما بتطلع طرية كتير و بتشهي, بهالغربة كتير مشتهيتها بس بتطلع معي مقرمشة ومو طرية, برايك شو السبب? سؤال تاني يا ترى فينا نستغني عن السمنة ونستعمل شي تاني..زيت نباتي او زيت زيتون? ؤشكرا كتير

    • منى 30 July 2013

      هلا حبيبة قلبي , ممنونة ردك و تواجدك الطيب هون و هل الكلام الحلو و بتمنى تبقي منورة ع طول :)
      ما دام عم تطلع مقرمشة معناها النار الي عم تخبزي عليها اللحم بعجين واطية , لازم تكون قوية لحتى يبقى العجين طري و بيشهي
      فيك تستبدلي السمنة بزيت عادي
      رح استنى رايك بعد التجربة , ان شا الله بتطلع ع زوءك

      • Hadoosh 7 January 2014

        مرحبا منى اول شي شكرا كتير على موقعك الرائع و وصفاتك الطيبة
        و اخيرا صار معي وقت و رجعت جربت كمان مرة خلال الاجازة بس والله نفس المشكلة العجينة ناشفة و خاصة الاطراف مع اني حميت الفرن شي نص ساعة على حرارة 240 ;(
        هل ممكن تكون المشكلة انو فرني عالكهربا? يا ترى ازا بحمي قلاية عالغاز و بخبز فيها بمشي الحال?
        شكرا كتير و اسفة طولت عليكي

        • منى 10 January 2014

          مية هلا فيك هدوش ..

          مممم , طيب معناها عم تحطيها فترة طويلة بالفرن , هون دقيقة او دقيقتين بتفرق
          و المفروض تكون الحشوة مغطية العجينة ع الاكمل , ما تتركي فراغات لانه رح تلم شوي و تترك كم ملي ع الاطراف
          ما بتوقع اله علاقة الفرن ابدا ..

          بالعكس ايا سؤال انا تحت امرك و بتمنى كون ساعدت

          • Hadoosh 14 January 2014

            yeslamo kteer Mona, enshallah bajarrebha “bass yseer ma3e wa2et ;( ” w akeed bakhabrek shoo beseeer ma3e
            shokran kteeer

          • منى 17 January 2014

            شكرا الك هدوش :) بانتظارك

  40. رانو 1 August 2013

    صباح الخير منونة ..احكيلك عن فشلي الذريع بعش البلبل :( عندي لحمة خشنة شوي ..درتا عالماكينة فصارت متل الهبرة ..حطيتلا التتبيلة ومديتا فوق القراص ..وعالفرن ..اول شي نفشت هالعجينة وورقت ..وبعد شوي خفست ورقت ونشفت واللحمة نزت مي والوان ونشفت ..وصارت بتشبه كلشي الا عش البلبل :( واكتأبت طبعا بعد هالفشل …وماعرفت ليش هيك صار مع انو العجينة مجربتا بالشعيبيات طالعة تحفة …هلأ بعيدا عن الطبخ انا عرفتني عالموقع ام عبادة من كم سنة ..كنا جيران بحلب ..ورفقة ..وشفت بالفيسبوك من اصدقائك رحاب اختا ..وريم قداديحي رفيقيتي بالمدرسة ..حسيت اني بعرفك وخصوصي لما شفت الصورة ..الله يفرجا ويجمعنا بحلب وتكون بخير يارب

    • منى 4 August 2013

      صباح الفل رانو ..
      واااخ وااخ ع هل الافلام , يعلى قلبي , بس لا ياس مع الحياة و لا حياة مع الياس و اكيد مرة تانية بتزبط معك

      القلب ع القلب رانو و انا كمان حيت انو بعرفك , ممكن نكون كنا بنفس المدرسة او بنفس الحارة , الله يجمعنا ع خير رانو :)

  41. رانو 1 August 2013

    نسيت اقلك انو اللحمة طلعت متل الكبة وقواما بالاكل ابدا مو طيب لأني درتا …وسؤال انو كان لازم ادهن الصينية سمنةلحتى ما تنشف مع العلم انو توريق العجينة اكل سمن كتييير؟؟؟؟وآآآآسفة اني طولت عليكي

    • منى 4 August 2013

      بالعكس ما طولتي و لا شي
      اكيد رح تصير اللحمة مو طيبة اذا نعمتيها كتير , يلا الواحد بيتعلم من غلطوا ..
      الاحسن انو تدهنيها او تستعملي تيفال لحتى ما يروح تعبك ع الفاضي

  42. رانو 3 August 2013

    السلام عليكم …هلكتك يامنى ..بس قلت اقلك او عدت التجربة والحمد لله نجحت …نشفت اللحمة منيح ودهنت الصينية سمن ..وحميت الفرن منيح وزدت دهنة عاللحمة فزبطت ..وان شاء الله رح نزل الصورة …بس تنحل مشكلة البومي ﻷنه لهلأ ما مشي حاله ..وانا حابة اجع كل صوري بالابوم

    • منى 4 August 2013

      مممم , يا سلام اشتهيت شوفها , كتير منيح انها زبطت معك تمام و اخيراً , شكراً كتير لملاحظاتك . ان شا الله يستفيدوا منها الصبايا ..

      مشان الالبوم , انا بعتلك رسالة ع الفيس بوك , بس الظاهر ما قراتيها لسى :)

  43. رانو 4 August 2013

    اهلين منمن …ما وصلني شي عالفيس …وماقلتيلي معرفتك بريم قداديحي ورحاب باقي …معلش فضولية ..بس ﻷنو حابة كون بعرفك اكتر :)

  44. رانو 13 August 2013

    شكرا كتير منمن عالالبوم …واسفة على فضولي بس بالاول ماطلعولي تعليقاتك اللي فوق …ويسلمو على كلشي يامنى :)

  45. سلمى 22 December 2013

    ست منى يعطيكي الف عافية على هالوصفه ناوية عليها بكرا ان شاء الله حبيت أسالك اذا بنفع تتفرز بعد الخبز وكمان حبيت اعرف ايش يعني لبن عيران

  46. ريحانة التميمي 31 December 2013

    بتجنن وطريقتك فعﻻ تخلي الواحد ﻻزم يجربها بس طلعت معي جافه مع الأطراف أنت ماشاءالله رطبة للدرجة انك بتسفطيها عين الله تحرسك

    • منى 2 January 2014

      لما تجف الاطراف اما النار مو قوية عليها او لان حطيتيها لفترة زيادة بالفرن

      منورة يا حلوة

  47. omomara 28 May 2014

    هي الوصفة لو بقيت للصبح وأنا عم أدعي لك ما بكون وفيتك حقك
    دورت كتييييير لوقت وصلت لهون
    وما أخطأت والحمد لله

    كنت كل ما بسأل حدا عن طريقة اللحم بعجين بيعطيني طريقة الحشوة وبيقول لي أما العجينة ما بنعرف

    والحمدلله نجحت من أول مرة
    والكل صار ياكل ويتغزل فيها

    الله كريم بترجع سوريا وبنرجع ناكلها بسوريا

    دمت بخير

    • منى 28 May 2014

      الف الحمد لله , ريتو مية صة و عافية ع قلبك و الله العظيم قرحت من جوى قلبي انها كانت معك تمااام

      عوافي يا روح قلبي و منورة :)

  48. لارا مينا 4 July 2015

    يسلموا يسلمو ايسلموا …..
    وألف ألف ألف شكر ع الوصفة …
    جربتها أول مره وطلعت كأنها مثل الصحن المدور ممكن تحطي فيه أشياء و تقدميها فيه من كثر ماطلعت قاسية وبتقرمش وكانت صعبة يأكلوها الأطفال أو الكبار بالسن ، خبزتها في فرن كهربائي وشغلته من تحت وفوق على أعلى درجة ، وطلعت فاشلة بكل ماتعنيه الكلمة من معنى ، رجعت أخمن الغلط ، قلت أكيد فرن الكهرباء ، لأن الحشوة صفيتها من السوائل والعجينة مزبوطة ،

    طبعاً رجعت عملتها مره ثانية بالفرن الغاز شغلته من تحت على نار عالية ، وركبت الشبك على آخر رف وقريب جداً من الشعلة ، وحطيت صاج مثل صاج الكريب سميك ومسطح ماله حواف ويشبه كثير حجر البيتزا لحتى صار حامي ،
    ومباشرة نقلت الرغيف من الطبق ، للصاج الحامي ……..
    وعلى طول رجعت شغلت الفرن من فوق أول مادخلت الرغيف ،
    عشان يتحمر من تحت وفوق بنفس اللحظة ،
    وما أخذ معي ٥ دقايق بالكثير وطلع ناضج ومتحمر وطري ، وعين الله عليه ….
    طبعاً سرقت بعض الأشياء من مدونة طبخ لزوجين صوماليين مقيمين بكندا …
    كانوا عاملين لحم بعجين ، تقريباً نفس طريقتك ، بس هم حاطينها على أساس الوصفة تركية …
    وكانوا عاملين وصفات سورية برضه ، ومن وقت لوقت باخذ منهم أفكار لأن شغلهم كله بالفيديو …..

  49. لارا مينا 4 July 2015

    والاخوات اللي طلعت معهم قاسية ،
    ينتظروا عليها شوي بعد ما تصير جاهزة حوالي ٢٠ دقيقة ، وكل ما انتظروا عليها أكثر كل ماطلعت أطرى وأطرى …..
    ومن خلال تجربتي ،
    فرن الغاز بيكون حلو في عمل الخبز والدجاج المشوي اللي من دون سوائل ، لأنه حرارته أعلى بكثير من الكهرباء ….
    والفرن الكهرباء حلو للفطائر والكيك والبسكويت …..
    يعني بالخبرة وبالتكرار بتتضح الصورة أكثر بينهم ……

تقييم الوصفة
عاديةقد أحضرهاجيدةممتازةأكثر من رائعة (12 votes, average: 3.33 out of 5)