ورق الشوكي


         وصفة : منى                 2014/03/10                 8 تعليقات
ورق الشوكي

عم أحكي مع رفيقتي بالتلفون , كانت عم تتنغم بشيء عم تاكله و عم يقرمش تحت سنانها ، بالعادة لما بحكي بالتلفون و بيكون التاني عم ياكل شي و عم اسمع انا بادني صوت ” الخش الخش ” ، ممكن كتير أني اعتذر بشي شغلة و خلص المكالمة , و إذا حدى بمون عليه بقله انو شو هل الزوء حبيبي , خلص الي عم تاكله و بعدها احكي معي ..

أما رفيقتي مياسة كانت عم تنمنم و عم تقول امممم حامضة , طيبة … نسيت تعصيبتي الصغيرة الي بتطلع بهيك حالات و صار عندي فضول أعرف شو عم تاكل , قلتلها شو عم تاكلي مياسة خانم .. قالتلي ورق الشوكي , بتحبيه . قلتلها شو هاد ؟ قالتلي ورق الشوكي مع عصرة ليمونة ..

مممم , هلأ أنا الشوكية كاملة و شخصية ما شفتها بصغري و لا كبري , دوماً بيوصل على البيت مقشر و جاهز , و لما كنت صغيرة كنت فكر انو هو هيك بيطلع شكله على الشجرة , بس شوفهن أنو عم يجيبوه بكيس فيه مي و بيحطوه بمي و ليمون فوراً , فكانت فكرتي عن الشوكي انو هو نبات اله قشرة شفافة بس سميكة , متل قشرة البرتقالة بس على شفاف , و بقلب هل الثمرة في مي و قلب الشوكي , يعني شي بيشبه البيضة :D

منرجع لورق الشوكي , قلتلها كيف يعني ورق الشوكي , ما فهمت . قالتلي هلأ انت مو بتجيبي الشوكية بتقشريها ,, قلتلها مممم ( بقلبي لا بحياتي ما جبت الشوكية و قشرتها بس … ) اي , قالتلي طيب بتكبي اول كم ورقة لان بيكون ورق خشن , و بعدها بيطلعلك الورق الطري , بتقطفيه و بتغطسي طرفه بالليمون و الزيت و بتاكلي لقمة واحدة بس من كل ورقة , لقمة بيضا و طرية بس مقرمشة , لقمة طيبة يا منى خانم ..

امممم , حبيتها لهل الشغلة و حطيتها براسي , ما انا ام الخضرة النية , بقى لما كنت رايحة لأقضيلي شي شغلة و شفت شوكي كامل و حقيقي لأول مرة على البسطات الي ملت الشوارع , جبت 5 شوكيات لجرب وصفة مياسة خانم , قعدنا أنا و قطاطي على البلكون , جهزت عصير ليمون و حطيت معه زيت زيتون كردي جاينا طعمة من عفرين , و صرنا نقشر و نغمس و ناكل , يممم فعلاً لقمة طيبة
بالصحة و الهنا

شو لازمنا ؟

5 حبة أرضي شوكي

ربع كوب عصير ليمون

ربع كوب زيت زيتون

ملح و فلفل أسود

طريقة التحضير

ツ يقلب زيت الزيتون و عصير الليمون و الملح و الفلفل بالشوكة حتى يصبح صوص سميك .

ツترمى الأوراق الخشنة الخارجية من حبة الشوكي , تقطف الأوراق الداخلية , ورقة ورقة , تغمس بالصوص ثم يؤكل الجزء السفلي الأبيض الطري , لقمة واحدة لكل ورقة .

التعليقات

  1. nosheenzaza 11 July 2013

    حضرة جنابي فكرته نوع فواكي و اشتريته و ضليت شيل الورق و أكبه و بالأخير طلع القلب و ما عرفت شو هو و كبيته. يعني بحب أجري الشغلات الجديدة بس بدون تفكير مسبق.

    بعدين شفت وصفتك هي و شعرت بالخزي و العار :D

    • منى 11 March 2014

      هههههههههههههه ياااي فرطت ضحك

      معلش بتصير باحسن العائلات نوشين , المهم ما تكوني قلتي لحدى غيري :D

  2. MonChou 16 November 2014

    Marhaba Mouna Khanum

    Désolé, je n’ai pas de clavier arabe.
    Il faut arracher (pas couper, pour enlever les fils) la queu, frotter l’emplacement avec quelques gouttes de citron. Mettre dans une cocotte minute (presto) et cuire 10-12 minutes, après la reprise de la vapeur. Une fois refroidis, les manger feuille par feuille.

    Note: Meilleure avec la Ssauce Vinaigrette : 1/2 c-à-S Moutarde, se, poivre, 3 c-àS vinaigre, 9 c-à-S huile Mazola (ou autre mais pas Olive). Bien fouetter avant de servir

    Note 2: Cette sauce est utilisée pour la majorité des salades :o

    • منى 17 November 2014

      شكرا كتير للوصفة هياتها بتاخد العقل :)

      بس صار عندي كتير فضول عنك .. بس تعرفي تقرأي عربي ؟ و الا شو

      مية هلا

      • MonChou 21 November 2014

        Chukran laki

        J’ai déjà répondu (en Arabe, mais alphabet Latin), mais ma réponse est disparue

        Je suis Damascain-Français.. quitté la syrie à 18 ans (1968) donc, maintenant, 64 ans Nayant pas de clavier Arabe, suis obligé d’écrire en français ou anglais. Merci pour tout le bonheur de votre gentillesse …Allah yhanni ahlek fiki

        • منى 23 November 2014

          نورت و شرفت و مبسوطة بحضرتك كتير :)
          لا يا ريت تكتب فرنسي او انكليزي بفهمهن اكتر من العربي باحرف لاتينية
          ممم شكرا الك و لردك و الله يهنيني باحلا عيلة انترنتية

    • sami hicham 6 December 2014

      يمكنك الاستعانة بلوحة المفاتيح التالية إذا لم تكن تتوفر على لوحة مفاتيح: http://www.clavier-arabe-plus.ma

      • منى 7 December 2014

        شكرا سامي للمساعدة :)

تقييم الوصفة
عاديةقد أحضرهاجيدةممتازةأكثر من رائعة (7 votes, average: 5.00 out of 5)