صلصة التوفي كريم


         وصفة : منى                 2007/04/23                 97 تعليقات
صلصة  التوفي كريم
كوب سكر
ربع باكيت زبدة , 50 غ
ثلاث ارباع كوب كريما سائلة خاصة بالطبخ أو علبة قشطة بحرارة الغرفة





• يوضع السكر على نار متوسطة في قدر سميك القاع و يحرك باستمرار حتى يذوب السكر ثم يشقر , و يستمر بالتحريك حتى الحصول على كراميل ذهبي .

• يبعد القدر عن النار ثم تضاف الزبدة و يحرك المزيج بسرعة كي لا تتشكل كتل و يمتزج السكر مع الزبدة .

• يضاف الكريم فريش أو القشطة و تحرك الصلصة ثم يعاد القدر للنار و تترك لمدة دقيقة أو دقيقتان حتى تسمك الصلصة قليلاً و تصبح ناعمة .

• تحفظ الصلصة في مرطبان صغير داخل البراد , و حين الاستخدام تسخن قليلاً في الميكروويف أو بوضع المرطبان في ماء ساخن .

أفكار و تنويعات :

يمكن تحضير الصوص بطريقة أسهل بدون استعمال الزبدة , توضع علبة القشطة في ماء ساخن جداً لمدة نصف ساعة , يذوب السكر حتى يصبح كراميل ثم تضاف علبة القشطة الدافئة و تقلب بسرعة مع السكر ثم توضع على النار و تترك لتغلي قليلاً حتى تصبح ناعمة و تذوب كل الكتل .


فكرة بسيطة لحل مشكلة التكتل من نهى :

لحل مشكلة التكتل أو الكلكعة ترفع القطع المتكتلة لإناء آخر و يضاف ملعقة كبيرة ماء - واحدة بس – و تترك قليلا حتى تفك و تنحل ثم تضاف مرة اخرى لبقية الصوص .


فكرة من نوارة لأسهل صلصة توفي :

توضع علبة حليب مركز محلى من دون فتح في طنجرة فيها ماء ساخن و تترك على النار ساعتين على نار هادية و تزاد كمية الماء كلما نقص , ثم تترك العلبة حتى تبرد قليلاً ثم تفتح , أصبحت صلصة التوفي جاهزة .
  • وصفات تانية ممكن تعجبك


التعليقات

  1. بدور 19 August 2007

    يعني اليوم كنت صايمة و دخلت عالموقع الظهر بس الله لطف وصار عطل بالنت و انقطع الخط و إلا كان ظلم بحئي اتفرج على هالأكلات الطيبة بدون ما أئدر أعمل أو آكل شي 8)
    يسلمو ايديكي على هالافكار الرائعة :p

  2. منى 19 August 2007

    كللك زووء , و كلامك متل العسل :)

    الله يتقبل صيامك بدور ..

    زكرتيني برمضان 8)

    مية هلا فيك

  3. بدور 5 September 2007

    بدي خبرك مأساتي العظيمة
    جربتا مرتين وماظبتت معي:
    أول مرة صار لونو بني وطعمتو مرة يعني حترئ السكر بس قوامو ظبط, كبيتو و عدتا تاني مرة آم صار متل الحجر أول ما حطيت القشطة و بطّل يدوب و كمان كبيتو اش أعمل :?
    وشكرا كتير ميمو الشطورة :zzz

  4. منى 5 September 2007

    و لا يهمك بدورة :)
    هل الصلصة فيها ملاحظات صغيرة و لازم تنتبهي عليها لحتى تطلع معك تمام التمام ان شاء الله ..

    أول الشي الطنجرة الي استعملتيهالازم تكون دبل ستانليس , و مش اي طنجري عادية .

    تاني الشي لازم تبقي عم تحركي السكر لحتى يدوب كله بس من دون ما يحترق , بس اشقر و داب كل السكر بعيده عن النار و حطي الزبدة كلها مرة واحدة و حركي و حركي لحتى تمتزج الزبدة بالسكر ..

    بعد ما تمتزج السكر و الزبدة رح بصير معك شي بيشبه التوفي الي بتمط و بتشط معك لما بتاكلي المارس .. عرفتيها ;)
    هدا دليل على نجاح الصلصة معك ..

    و بالاخير حطي القشطة و رجعيها على النار و خليها لحتى تسمك شوي , و بس ..

    لساامبارحة عملتها كان كتب كتاب رفيقتي و أخذت لها كاتو التفاح الي مزين بالتوفي كريم ..
    صار عليه مظااهرة و الله :grin

    جربيها مرة تانية و خبريني شو بيصير معك :)

  5. بدور 7 September 2007

    يسلمو كتير ميمو الحلوة على هالنصايح خلص رح عيدو مرة تالتة نشالله متل ما ئلتيلي و بخبرك النتائج عن ئريب ;)

  6. منى 8 September 2007

    إذا الله راد

    رح استنى التجربة الثانية :)

  7. منى 9 October 2007

    مية أهلا و سهلا نداء :)
    ان شاء الله ريتو عوافي و هنا و صحة يا رب ..

    لو تعرفي شو انبسطت لان ظبطت معك و عجبتك :)

    و إذا بتحبي جربي كاتو التفاح , و أنا أكيدة ان رح تصير وصفتك المفضلة و على مسؤوليتي ;)

  8. nidaa84 9 October 2007

    والله يسلم ايديك على هل وصفةوصفة التوفى كريم حاولت احط التعليق تحت الوصفة بس مامشى الحال من يومين جربتها وطلعت بتجنن والضيوف كتير حبوها حطيت منها فوق ليالى لبنان بدال القطر طلعت بتجنن الف الف الف شكر

  9. ام نور 9 October 2007

    الصراحة اشتهيت جربها شكلا مميزة وفينا نستعملا على ايا شي حلو مهاك :?

  10. منى 9 October 2007

    هلا ام نور :)

    فيك تستعمليها بكتير كتير اشياء , أنت و خيالك و زوءك

    أنا بعمل فيها تارت التوفي و بزين فيها البوظة و أنواع الكاتويات المختلفة و كتير كتير بحبها
    دايما في عندي مرطبان صغير منها في البراد للأستعمالات الطارئة ;)

  11. ام نور 19 December 2007

    واخيرا جربت التوفي كريم كنت كتير مستصعبة بالاول خفت ما تظبط ,ولكن الحمدالله ولا اسهل ولا اروع ومن اول مرة طلعت ناجحة ومع اني عملت بطنجرة عادية اهم شي تنفيذا خطوة خطوة والان عم دور على وصفات ميشان استعملا فيون غير الكاتو لان فعلا بتبيض الوج ;) الله يبارك فيكي اخت منى

  12. منى 19 December 2007

    مية اهلا و سهلا ام نور :)

    الحمد الله انها ظبطت معك من أول مرة ..

    فيك تستعمليها مع كتير اشيا متل التارتات العادية او تارت الشوكولا و كاتو التمر و مع البوظة ,, يمممي :)

  13. فوفو 9 January 2008

    انا بصراحه جربتها بس غلبتني كتير لانو السكر كبتل معي ما بعرف ليش مع اني كنت احرك باستمرار بس بالنهايه زبطت معي وطلعت زاكيه بس احكيلي ليش السكر كبتل ويسلمو كتير على هاي الوصفه :)

  14. منى 9 January 2008

    هلا فيك أختي :)

    الحمد لله انها ظبطت معاك , و السكر ممكن يكبتل بس مو لدرجة انها تغلبك :roll و الله اختي ما عرفت شو سبب الي صار معك :?

    نورتي اختي :)

  15. نهى 6 February 2008

    بس عاوزة أسأل عن نوع القشطة:
    يعنى ممكن قيمر أو بوك ولا لازم القشطة اللى بتطلع على وش اللبن؟؟

  16. منى 6 February 2008

    هلا فيك أخت نهى :)
    أختي أكيد فيك تستخدمي القيمر أو البوك , بس البوك أحسن من القيمر لهل الوصفة لأنها حتكون بالقيمر ثقيلة شوية ;)

  17. نهى 27 February 2008

    لسة عاملاه دلوقتى طعمه حلو كتير بس كلكع بشكل فظيع.. مش عارفة ممكن أضربه فى الخلاط يبقي كويس ولا اعمل واحد تانى أحسن؟؟
    ياريت تفيديني اوام علشان اكمل جاتوه التفاح

  18. نهى 27 February 2008

    هو لازم أضيفه على الجاتوه ساخن او الجاتوه ساخن ولا ازاى بالظبط؟؟

  19. منى 27 February 2008

    هي المشكلة الي عم تواجه كل الاخوات :roll , اختي في ادامك حلين , اما انك تصفي الصوص و تتخلصي من كل القطع أو تعيدي تحضيره من أول و جديد و ان شاء الله المرة التانية بيصير معاك متل ما بتحبي :)

    الصوص بتحضريه و بتضيفيه على الكاتو و الصوص لسا ساخن بس بعد ما يبرد الكاتو تماماً ;)

  20. بتول الحلبية 8 March 2008

    هذا الموقع المفضل عندي للطبخ ما شاء الله عليك يا منى وعلى فنك وترتيبك الله يحميك ويبارك فيك كل شي منك حلو :)

  21. منى 8 March 2008

    هلا بأحلى بتول و أحلى حلبية و الله :)

    نور الموقع فيك و ألف شكر ليك على الكلام و الرد الحلو الي بيفتح النفس من على هل الصبح ;)

    يا ريت يا بتول لو جربتي من الموقع وصفات تخبريني 8)

  22. نهى 9 March 2008

    ياريت تحددى علبة قشطة حجمها اد ايه بالظبط؟؟ :roll

  23. منى 10 March 2008

    هلا نهولة :) القشطة هي العلبة العادية بوزن 170 غرام ;)

  24. نهى 10 March 2008

    شكرا يامنى وآسفة تعبتك معايا

  25. منى 10 March 2008

    من عيوني و لو , انت بتامري :)

  26. نهى 18 March 2008

    السلام عليكم ورحمة الله وبركاته
    انا مش عارفة في ايه؟؟ الموقع من يومين وهو مش عاوز يفتح خالص.. مش عارفة ليه بيقع كل شوية؟!! :roll
    عموما الحمدلله على عودتكم..
    انا جربت حل بسيط لفك الكلكعة.. رفعت القطع المكلكعة فى اناء آخر واضفت ملعقة كبيرة ماء – واحدة بس – وتركتها قليلا ففكت سريعا واضفتها مرة اخرى لبقية الصوص وكانت رائعة

    ياريت اعرف ايميلك يامنى علشان لما الموقع يقع اعرف اسالك على اللى عاوزاه :)

  27. منى 18 March 2008

    الله يعطيكي الف عافية على هل الفكرة :) لو سمحتي اضفتها للوصفة فوق لمساعدة الاخوات لحل المشكلة اذا صارت معهم لا سمح الله

    الموقع صارت فيه مشكلة ان شاء الله لا بقى تنعاد , الله يسلمك اختي , ان شاء الله أسأل الأخت المسؤولة عن الأعضاء عن ايميلك و ابعت لك رسالة ;)

  28. أم مــــالــــك 15 April 2008

    فعلا روعهانا بستخدمها بمعظم حلوياتي وكحشوة للكاتوة طيبه كتير :p بنصح الجميع يجربها ويعتمدها كمان

  29. منى 16 April 2008

    هنا و عوافي ام مالك , الله يسلمك أختي و بتمنى الاخوات يجربوها و تعجبهم متلك ;)

  30. نوارة 1 June 2008

    هلا ميمو انا عملت صلصة التوفي بطريقة سهلة كتير بس مختلفة
    جبت علبة حليب مركز محلى وبدون ما افتحهاحطيتها بطنجرة فيها ماء ساخن وتركتها على النار ساعتين والماء عم يغلي وكل ما نقص الماء ارجع ازود
    بعدين تركت العلبة تبرد شوي وفتحتهاطلعت صلصة التوفي وحطيتها فوق كاتو التمر
    طلعت يممممي
    :)

  31. منى 1 June 2008

    نممممي نمممي , كتير سهلة و اكيد ما في اطيب منها ..

    خليلي عينك نوارة , لو سمحت رح ضيف الفكرة للوصفة فوق لحتى تستفاد كل الاخوات الي رح تجرب التوفي على طريقتك ;)

  32. سارونات 15 July 2008

    السلام عليكم و رحمة الله و بركاته

    اختي منى على قد ما بدي

    اعملها للصلصة على قد ماني

    خايفة ما تضبط

    اناعملت كراميل من قبل و كمان جربت الجاهز اللي بيجي مع الكريم كاراميل و لاحظت انه بييبس بسرعة فكيف هون ما راح ييبس و احنا نعمل كراميل كامل يعني بلون بني او اشقر لان الواحد ما بيعرف ايمتين بيوقف

    و يضيف الزيدة

    و كمان انا اول مرة راح

    استعمل القشطة راح ساوي

    القشطة اللي قلتي عنها فأديش

    بدي استعمل يعني 3 ملاعق كبار

    او اديش

    في شي كمان اليوم بحلقة منال

    العالم على ابوظبي عملة صلصة

    التوفي بالسكر البني الفاتح و

    حطت كل المكونات مع بعض مرة

    واحدة و بعدين حطتهم على النار

    و حركتهم

    و هاي الوصفة نصف كوب زبدة +

    نصف كوب كريمة + كوب و و ربع

    سكر بني فاتح يا ريت تجربوها

    وتعطوني خبر لان انا ما فيني

    دبر سكر بني

    فهل في طريقة نعمل سكر

    بني فاتح بالبيت اختي منى

  33. سارونات 29 August 2008

    السلام عليكم و رحمة الله و بركاته
    جربتها بس صار اللي كنت خايفة منو فبعد ما شلتها من على النار و قعدت عم قلب فيها و فرحانة لانها سائلة و على وشك اني حطا بالمرطبان الزجاجي بدات تجمدو جمدت كتير و من كتر ما جمدت لزقت بالطنجرة و ليكا هلأ بالبراد ازا صار هيك يعني لما راح استعملا و حطا فوق الكاتو راح تجمد و تنزع الكاتو يا ترى شو صار يمكن المشكلة بالقشطة اللي في البيت قوليلي فينا نساويها بحليب و كمان القشطة ساويتها بالبيت و ما جمدت يعني ظلت سائلة بالرغم من اني ظليت معها فترة طويلة بس ظلت سائلة و استعملتها هيك
    بالتوفيق
    سلام

  34. منى 30 August 2008

    هلا أختي سارونات :)
    الطريقة الي عملتها منال هي الطريقة الاميركية و هي سهلة كتير متل ما شفت بس بتحطي كل شي مع بعض , و انا مجربتها و طلعت لذيذة بس نزلت وصفة السكر الابيض لان متل ما شفتي السكر البني مو متوفررعند الكل :roll , و السكر البني مستحيل نعمله بالبيت .

    بتبعدي الكراميل عن النار أول ما يدوب السكر كله و صار لونه ذهبي أشقر و بتبعديها عن النار و تضيفي الزبدة

    هلا بعد ما جربتيها , إلي صار معك هو الي لازم يصير لان هل الصوص بس ما برد رح يجمد لهيك إذا حابة تستعمليها مرة تانية بتحطي المرطبان و هو مغطى بقلب مي مغلية و بتخليه على نار هااادية تقريباً 5 دقايق أو أكتر شوي و رح تشوفيها رجعت سائلة , بتستخدميها للتزويين و هي رح تجمد مرة تانية على وجه الكيك , أما إذا كانت مشكلتك أن الصلصة فيها حبيبات سكر معناها ان السكر ما دوبتيه منيح قبل اضافة الزبدة ..

    شو كمان , القشطة ما جمدت يا ترى اتبعتي طريقة تحضيرها تمام و الا غيرتي شي ؟ ممكن تستعملي الحليب عوض عن القشطة و انا كتير احيان بحضرها للبيت بالحليب لان أخف ;)

  35. سارونات 30 August 2008

    السلام عليكم و رحمة الله و بركاته
    كتير حلو اننا منقدر نستخدم الحليب انا راح صير ساويها بالحليب اكيد بس شو هي كمية الحليب و هل بيكون بارد او دافئ او شو
    بالنسبة للقشطة ساويت متل ما قلتي حتى باول مرة كانت كمية كنير زغيرة و ماضبطت و بعدين صرت كل ما اغلي حليب شيل الطبقة اللي فوق بعد ما يردو صرت خبيها بالبراد لحتى صارت عندي كمية كبيرة و بعدين ساويتها قولك هيدا هو السبب ما بعرف
    هلأ السكر منضيفلو الزبدة بس يشقر يعني ما مننطرو حتى يدوب تماما
    بالتوفيق
    سلام

  36. منى 30 August 2008

    كمية الحليب ثلاث أرباع كوب للصلصة , و بيكون دافي أحسن ..

    تجميع القشطة بيصير بس بتحفظيها بالفريزر لان بالبراد ممكن تخرب , و السكر لما بيشقر و بيدوب كله منضيف الزبدة , و تدويب السكر على نار واااطية كتير ;)

  37. سارونات 7 September 2008

    السلام عليكم و رحمة الله و بركاته
    كتير منيح هيك لكان راح صير استعمل حليب وراح جربا مرة تانية
    بس اللي عندي هلا شو ساوي فيها ما في شي كاتو بقدر احشيه بالتوفي او اشيا تانية ساويها فيها
    راح ساوي كيكة التمر بصلصة التوفي بتنصحيني استعمل التوفي اللي عملتو من قبل او انطر لحتى ساوي توفي جديد
    بالتوفيق
    سلام

  38. منى 9 September 2008

    ممكن تحشي فيهم تارت عادي أو كيك تمر و لا تساوي توفي جديد استعملي الي عندك ;)

  39. سارونات 10 September 2008

    السلام عليكم و رحمة الله و بركاته
    جازاك الله خيرااختي منى
    بالتوفيق
    سلام

  40. منى 10 September 2008

    و لو اختي مية هلا :)

  41. رنا 19 October 2008

    ياستي انا جربت التوفي اول مرة وعينك تشوف شو صار اول شي السكر ماداب منيح لانه كانت النار عالية قام خلطته بخلاط الايد قام انتزع الخلاط من حرارة السكر المهم طلع طيب بس حسيت برغم الخلط انه لسه حبيبات السكر مادابت والصلصة ماطلعت هيك ناعمة وصارت مريقة ..صرت استعملها على البوظة وكتير كانت طيبة
    مبارح رجعت جربتها بس تقيدت بالتعليمات وطلعت تماما متل ماعم توصفيها بس صارت بالمرطبان كتير ماكنة ومتل الحجر هادا شي عادي متل ماذكرتي بس لما سخنتها وحطيت عالبوظة صارت الزينة صلبة كتير ومو متل حشوة المارس اللينة يعني بتعلق بالاسنان :grin ياريت تقوليلي اذا فيني اضيف شي حتى تصير اطرى شوي مع العلم انه شكلها الحالي رائع للزينة بس متل ماقلتلك عم تعلق بالاسنان بشكل فظيع بقا ياريت تفيدني …والشعغلة التانية لاتقولي علي كرارة بس حبيت اوصفلك شو عم بيصير معي :grin ;) وشكرا يامنوشة ;) ياام الافكار

  42. منى 21 October 2008

    ووواخ رنونة , شو زعلت على الخلاط , عوضك على الله ان شاء الله :roll

    سبب حبيبات السكر باول مرة عملتي التوفي ان النار عاليةفما لحق السكر يدوب و انه مريق ان ما خليته يعقد منيح على النار ;)

    تاني مرة العكس , خليتيها زيادة على النار و الحل انك ترجعيها على نار خفيفة مع شوية كريما أو حليب و تخليها تغلي بس لحتى يدوب التوفي في بقية الكريما و ان شاء الله رح تعجبك كتير , على فكرة هي رح تعلق بالسنان بس مو بطريقة فظيعة بطريقة لذيذة :grin

    يلا خبريني شو بيصير معك , و انا بفرح كتير بالردود الطويلة , مو العكس :zzz

  43. رنا 21 October 2008

    شكرا يامنوشة عالرد الله يمضي خطبة اخوكي على خير وتنبسطوا فيها لترجعيلنا بنشاطك الاكتر من رائع
    بس هي علقت بالاسنان بطريقة فظيعة حتى لزقت بصحن البوظة :grin احلى شي عمي قلي حطيلي بوظة قام جيت بيض وش وحطيتله توفي اول ماحط اول لقمة بتمه مابقا يقدر يحكي كانه تلزق بالصمغ ولو كان حاطط بدلة اسنان كانت انقلعت ههههههه
    بس رح جرب عدلها والحل تماما متل مااتوقعت شكرا كتير عالمتابعة …موووفقة ;)

  44. منى 21 October 2008

    هههههههههههههههههههههههه ,متت من الضحك على قصة الصمغ , على فكرة ممكن يكون التوفي مو من الزينة المفضلة عندك , مثلا ماما الله يخليها اذا شافت الكيك و عليها التوفي بتولول و ما بتبقى بتدوقه , يعني كمان شغلة زووء :)

    ااامين , شو متحمسة للخطبة , الله يسعدهم و يخليهم احلى عروسين بالدنيا كلها :zzz

  45. منى 13 November 2008

    هنا و الف عافية على قلبك :)

    لوسمحت اضفت وصفتك لحتى كل الأخوات تستفيد و الف شكر ليك عليها

  46. haya 13 November 2008

    شكرا يا اخت منى على هالوصفة انا عملتها وطلعت كثير زاكية ونالت اعجاب الجميع والحمدلله انها زبطت معي من اول مرة

  47. souha 13 December 2008

    هلا منى :)
    أنا كنت سمعانة من رفيقتي عن علبة النسلة يلي منحطها بمي مغلية و منعيفها ساعتين ع النار هي تعلمتها من دورة طبخ عند الراهبات بس ولا مرة جربتها لحد إمبارح و لما فتحت العلبة الصلصة سميكة بس ممكن تدهنيها على الكاتو أنا حطيتها بالبراد بعد ما غلفت العلبة منيح بس يا ترى لما بدي أستعملها حطها بالميكروويف شوي مشان تسيح لأنو بدي ياها تشر على جوانب الكاتو متل صورة كاتو التمر هلأ أنا طلعت معي لونها كاشف يعني مو متل الصورة هون و طعمتها حلوة كتير يا ترى هاد المزبوط
    كمان سؤال و النبي منين بتشتري شوكولا بيضاء و شقراء و سوداء من نوع فاخر و شو الماركة تبعيتهن :? عذبتك معي و أنا نازلة حكي
    هلأ متل ما فهمت من الردود إنو في مشرفة على الأعضاء منت فاكرة إنو إنتي بس بتقري الردود و بتنزليهم ع النت :)

  48. منى 13 December 2008

    انا هي الفكرة شفتها بحلقة من منال العالم و جربتها و طلع لونها كريم ..

    و هي رح تكون حلوة لان الحليب المكثف هو حلو كتير :upset

    ممكن تسخنيها شوي قبل ما تزيني فيها الكيك بس بحمام مائي احسن :zzz

    الردود انا كلها بقراها بس مو بالضرورة انا الي نزلها, في مساعدة خارجية اكيد ;)

  49. souha 13 December 2008

    هلا منى أنا بعتلك إيميل بالجدول إنشاء الله يكون وصل ;)

  50. souha 13 December 2008

    منونة بس لو سمحتي ما جاوبتيني على سؤال الشوكولا

  51. منى 13 December 2008

    معلش سها العتب على الكبر :grin
    انا بجيب شوكولا من لي , من المعمل تبعهم , و الصراحة كتير احيان ما بيصحلي جيب من لي فبجرب نوع جديد , بشوفه اما عند كنان أو عند البنان :zzz

  52. souha 14 December 2008

    شو هاد كبر ما كبر ما بحب هالسيرة أبدا خاصة إنو كنا بالمدرية سوا يعني نفس العمر أنا و إنت لسانا صبايا :zzz
    سلام ;)

  53. souha 14 December 2008

    سوري منونة نسيت اسألك وصلك الإيميل إنشاء الله يكون مزبوط و مو طالع مخربط :)

  54. منى 15 December 2008

    ووواو سها :eek
    وصل الجدول و بيجنن , بقي بس اعرف نزله انا متل ما انت باعتيه لان مرتب كتير

    الله يعطيك الف عافية

    عم امزح على قصة الكبر :zzz نحنا لسا قطط و منغرف القلب :grin

  55. رنا 18 January 2009

    كيفك شو اخبارك شو عامله اكلات جديده

  56. منى 18 January 2009

    :grin منيحة كتير انا رنونة و مو ناقصني الا هل الطلة الحلوة , و الالكلات الجديدة بتشوفيها على الصفحة الرئيسية , يلا الحقيني :zzz

  57. Joory 20 February 2009

    السلام عليكم

    انا جديده بالموقع .. أهنيكي عالموقع الرائع

    عندي سؤال بكثير من وصفات الحلى

    أجد من ضمن المقادير كلمة (كريمه)

    ماالقصد بالكريمه هل هو دريم ويب أم كريمة الخفق ام ماذا؟؟

  58. Joory 20 February 2009

    السلام عليكم

    انا جديده بالموقع .. أهنيكي عالموقع الرائع

    عندي سؤال بكثير من وصفات الحلى

    أجد من ضمن المقادير كلمة (كريمه)

    ماالقصد بالكريمه هل هو دريم ويب أم كريمة الخفق ام ماذا؟؟

  59. منى 21 February 2009

    هلا جوري :)
    نورتي اختي في الموقع و اتمنى ان تجربي شي من الوصفات و يكون على زووءك

    أختي كل وصفة الها كريما خاصة , لما تكون كريما فريش او طازجة هي نفسها كريمة الخفق أما كريما الدريم ويب هي الكريما البودرةالي نخفقها مع المي او الحليب

    الوصفة هي يلزمها الكريم فريش او كريم الخفق :)

  60. عيون ريم 2 March 2009

    تسلم اديكي حبيبتي منى على هالتوفي الرائع انا اول مرة بعمله وطلع رااااااااااائع وما كبتل ولا بعلك ومتماسك بطريقه رائعه والطعم مممممممم مشيت على شرحك بحذاااااافيرها ههههه وعملته بالحليب ماكان عندي قشطه هههههههه بس روووووعه ترى انا عضوة جديدة عندكم وطبقت اكتر من وصفه من عندكم وطلعو رووووووووووعه تسلميلي :roll :zzz

  61. منى 3 March 2009

    هلا ريم :)
    نورتي و شرفتي ومية هلا فيك أختي
    الف الف صحة و هنا على التوفي , كتيررر انبسطت ان زبط معك , ريتو عافية يا رب :zzz

  62. ام سماوسارة 22 March 2009

    حبيبتي منى هاي اول مرة اشارك بهالموقع ومن فترة بس شفتو وبجد صار موقعي المفضل تعرفي ليش
    لان كل الوصفات فيه مجربة وهادا احلى شي
    سؤالي حبيبتي لما اعمل الصلصة واحطها عالكيك طيب لما تبرد هل راح تجمد عالكيك ولا تظلها محافظة على قوامها بصراحرة انا بدي ياها تكون زي مابلاقيها بالمارس تظل طرية
    والف شكر ليك والله يعطيك العافية
    وان شاء الله بميزان حسناتك :) :sigh :sigh :sigh

  63. منى 24 March 2009

    الله يسلمك ام سما , ربي يحفظلك سما و سارة و يكونوا من الصالحات الطاهرات النقيات الحافظات المسعدات في الدنيا و الاخرة :)

    اسفة للتاخر بالرد لن من يوميين كاملات ما فتت النت , كنت شوي مشغولة , نورتي و نور الموقع و مية اهلا و سهلا فيك

    الصلصة رح تبقى طرية و متل ما بتكون بالمارس , المهم ان لمن تغليها ما تزيدي عليها بالغلي و الا رح تسمك و تصير شوي قاسية

    نورتي اختي واي سؤال تاني من عيوني :)

  64. ام سما وسارة 30 March 2009

    تسلم عيونك يا قمر وتسلمي عالدعوات الحلوة اللي زيك والله احلى دعوة سمعتها بارك الله فيك
    وربي يعطيك الف عافية على تعبك ومجهودك الاكثر من روعة ومن نجاح الى نجاح ياااااارب :)

  65. منى 31 March 2009

    مية هلا اختي و الف شكر الك للدعوات كمان :zzz

  66. طير الحرم 14 July 2009

    تسلم ايديكي يامنى جزاك الله خيرا

    عندي مشكله مع التوفي

    بيطلع حلو معي ومثل توفي المارس

    مشكلتي بعد لما يبرد بيصبح قاسي جدا ويكسر

    ليه تفتكري ايه الغلط اللي انا عملته؟

    انا بضيف ملعقه ماء ونقطة عصير ليمون للسكر في البداية لتبقيه سايل لكن باقي الطريقه نفس طريقتك تمام وبيطلع رائع وهو سخن ودافئ

    لكن لما بتركه يبرد تماما بيقسى

    تفتكري فين الغلط ياحبيبتي؟

  67. منى 14 July 2009

    هلا اختي :)
    المشكلة انك بتغلي التوفي كتير و بتخلي السوائل تتبخر منه اكتر من الازم لهيك بس ما برد بيقسى .

    الحل انك ما تخليه يغلي كتير و اذا هلا عندك توفي جامد ممكن تجربي تحطيه على نار هادية مع نتفة حليب و تخليه يغلي لحتى يرجع صوص ناعم , اتوقع هيك بيمشي الحال ;)

    لا بقى تطولي الغيبة يا عسل :zzz

  68. طير الحرم 14 July 2009

    ان شاء الله اجربه واقولك على النتيجه انا فعلا بطول التوفي على النار

    جزاك الله خيرا حبيبتي منى وان شاء الله مش بطول الغيبات :roll

  69. منى 15 July 2009

    تكرم عيونك و بدنا خدمة تحرز ;)

  70. مريوم 18 August 2009

    مساء الخير والعسل لاحلى منى
    بدي اشكرك من كل قلبي على هالوصفة السريعة و السهلة و بتبيض الوجه. اليوم استعملتها باكلة حلو روعة طلعت معي و عمبطلع على جوزي بياكلها و بشوف بعيونو بريق الامل بنجاح الوصفة.
    فقلت ضروري شارك الموقع بخبرتي المتواضعة، بس ما عرفت وين حط المشاركة. :?
    يا ريت لو تدليني على المكان المناسب حتى اكتبها.يعطيكي الف عافية ;)

  71. منى 20 August 2009

    هلا مريومة :)
    هنا و الف عافية على البك و البه يا حق :zzz

    فيكي تبعتي الوصفة كرد على ايا موضوع و انا رح انشرها باسمك ان شاء الله ;)

  72. برقوقة 24 August 2009

    شكرا الله يعافيكي :zzz

  73. منى 25 August 2009

    و يعافي قلبك و بدنك :) نورتي اختي

  74. DOUHA 24 October 2009

    انا جربتا صار مية مرة يمكن
    اول مرة شفت صعوبة شوي بس هلئ وانا نايمة بعملا وصرت اعمل مقدارين

    اهم شي تكون الطتجرة سمكية شوي وبس
    شكرا متى :zzz

  75. منى 25 October 2009

    برافو عليك ضحى :) متل ما قلتي بيصير بالاول الواحدة تلاقي صعبوبة بس بعدها بتصير ما في اسهل منها ;)

    الف صحة يا رب

  76. نوسنور 11 November 2009

    تسلم يدك ;)

  77. التواقة للخير 16 February 2010

    شهية جدا جدا :)

  78. galaxy83 7 June 2010

    حبيبتي ليه مينفعش اعمل كوبي من الاكلات بتاعتك لاني عايزه اسيفها عندي ومش عارفه وربنا يكرمك على الوصفات الجميله

  79. منى 7 June 2010

    هلا فيك اختي تواقة للخير :) نورتي الموقع و اتمنى تجربيها وتعجبك

  80. منى 7 June 2010

    هلا فيك اختي جلاكسي :)
    النسخ و اللصق ممنوع في الموقع بسبب السرقات الي بتصير عن الموقع , لهيك لحفظ الحقوق منعنا خاصة النسخ و اللصق . و حقك علي لان بعرف

    مية هلا فيك بالموقع نورتينا و شرفتينا و اتمنى تبقي منورة معنا على طول :zzz

  81. gharam 16 September 2010

    مرحبا اخت منى بتمنى انك تقبليني صديقة لهالموقع الحلو والله انك شهتيني ادخل ع المطبخ واعمل كل هالاكلات الطيبة اللي بتدل على زوءك وعلى فكرة انا حلبيه كمان
    وحابه اتعلم التشيز كيك بس بطريقه اسهل اذا بتقدري لانو في مقادير غير متوفرة بالاسواق عندي

  82. ام ابراهيم 27 October 2010

    السلام عليكم
    انا عملت كيكة بالتمر اليوم و عملت لها صلصة التوفي جربت كمية بسيطة و جاءت مناسبة للكيكة و ماشاء الله تحفة طلعت
    انا استعملت الحليب لانه ما عندي الكرام فراش و اضفت قليل من الفانيليا لانه لم يعجبني رائحة الزبدة لكنها طلعت تحفة
    الواقع تلكعت او ما اضفت الحليب لكن رجعتها على النار لدقائق مع التحريك الشديد و محاولة ثرد القطع التي تجمدت على حافة الاناء و الحمد لله تلاشت من غير تغيير الاناء ولا شيء
    بارك الله فيك يا منى و اتمنى اكون صديقة لك انا من هواة الطبخ
    تقبلي مروري

  83. منى 9 November 2010

    مية هلا فيك احتي ام ابراهيم :)
    ما بتعرفي اديه انبسطت انها زبطت معك , بتعرفي انا متلك كتير احيان بحضرها بالحليب و بتطلع يم يم

    الف شكر الك للرد المفصل , ان شاء الله تستفاد منه بقية الاخوات

    نورتي 8)

  84. منى 9 November 2010

    هلا غرام :)
    من زووؤك اختي الف شكر الك للرد الحلو و الكلامات الي احلى

    في وصفة في الموقع لمكعبات تشيز كيك بمقادير بسيطة و متوفرة , اذا جربتيها رح تعجبك كتير ان شاء الله ;)

  85. منى 9 November 2010

    هلا جالاكسي:)
    اختي هل الميزة موقفة حالياً لحفظ حقوق الموقع :)

    نورتي و مية هلا فيك ;)

  86. منى 9 November 2010

    هلا فيك اختي التواقة للخير :)

    نورتي و مية هلا فيك , ان شاء الله تجربيها و كون طيبة و على زووءك ;)

  87. منى 9 November 2010

    هلا نوسنور :)
    الله يسلمك و يحفظك , نورتي و شرفتي ;)

  88. حلا البسآط 8 February 2011

    الف شكر على الصلصة المميزة

  89. حلا البسآط 8 February 2011

    شكرا صلصة أكثر من مميزة تقبلي مروري

  90. منى 8 February 2011

    مية هلا فيك و انا مبسوطة كتير بتواجدك الطيب معنا :)

  91. لمورة الامورة 4 July 2011

    مشكورة منى انا جرت الحليب المكثف وخليتو ساعتين وماصار شيي بنوب طلع طعمتو عادي كتييير بتعرفي ليش وياترى وممكن اعرف كم عمرك يامنى وكيف ضيف موضوع؟؟ ومشكورة حبيبتي :roll :roll

  92. ام هادي 7 May 2012

    لئيتااااااااااا
    لئيتااااااااااااااااا
    لئيتااااااااااااااااااااااا
    يسلمو كنت عم دور ع هالوصفة يسسسسلمو

  93. ام هادي 7 May 2012

    منى منى منى
    ئربي شوي لوشوشك شغلة بدانك “ما بدي حدا يسمعا ” كانو انا واياكي من جيل بعض انا موديل ال77 ;)

  94. منى 12 May 2012

    ان شاء الله تجربيها و تكون يمممي و مستاهل البحث ;)

    لا خيتو انا من موديل 92 :grin

  95. منى 12 May 2012

    الوصفة بدها كريم فريش او قشطة و هي يا دوب كم دقيقة و بتصير متل العسل , اذا بتحبي المرة التانية استعمليها و رح تعجبك ..

    فيك تبعتي وصفتك بمتل رد هون و انا بضيفهم باسمك اذا رب العالمين راد

  96. Malak Albash 13 March 2014

    منوشة رح نطلك هون كمان و حط كم سؤال من بعد إذنك ^_^
    أول سؤال بالمقادير مذكور كريمة او قشطة و بالتعليقات مذكور حليب ، معناها بيصير الحليب بدل الكريمة و بيعطيني نفس النتيجة ؟
    و الزبدة لازم تكون غير مملحة ؟
    و السكر ان كان خشن ممكن أو لأ ؟
    و بس :)

    • منى 13 March 2014

      اهليين ملوك , بتنوري وين ما رحتي :)

      لا هي الوصفة بالكريما حصرا , وين مذكور حليب ؟ ممكن يكون غلط مطبعي أو سؤال

      الزبدة حيوانية حصراً لان طيبة جربتها بتصير تفصل و تعزل و ما بتزبط ابدا , و الافضل تكون غير مملحة

      السكر ما بتفرق نوعيته , انا بحضرها بالسكر العادي

      مية هلا حبيبتي بايا سؤال :)

تقييم الوصفة
عاديةقد أحضرهاجيدةممتازةأكثر من رائعة (1 votes, average: 5.00 out of 5)