براونيز بكريما الخمس دقايق السرية
شايفين كم وصفة في النت للبطاطا المقلية , عربي و انكليزي !! أنا كلهم جربتهم , و النتيجة واحدة :: أبو الشباب بيقلي عندك موقع طبخ طويل و عريض و صحن بطاطا مقلية ما بتعرفي تعملي , و انا بدايق و بحط بقلبي و بخبي بس بقول لحالي معه حق , البطاطا بتطلع أحيانا مقرمشة و أحيانا لا , مرة منيحة و مرات شاربة زيت و متشتشة ..!
المهم بعد كذا مية تجربة , صرت جمع الاشيا و الملاحظات مع بعضها لحتى طلعت معي هل الوصفة , و هي هي أخيراً الوصفة الي كنت متمنية نزلها من زماان و الحمد لله و أخيرا ظبطت معي و شو بتجنن , خفيفة و مقرمشة من برة و طرية من جوى و نكهتها مممم
السر أو الشي بطريقة التقطيع , مهم كتير يكون كلهن بنفس الحجم و أفضل حجم متل الي ظاهر بالصورة , تاني شي النشاء رح يعطيها قرمشة مضمونة , تالت شي تغطية الزيت رح تخلي البطاطا ما تشرب زيت و بهيك بتبقى خفيفة , وأخر شي القلي مرتيين أول مرة لحتى تستوي من جوى و تاني مرة لحتى تقرمش من برة . بدها شوي شغل بس كتير مستاهلة ان شاء الله .
هلا المقالي في الفريزر بتأذي , انت اذا معودة تقلي اشيا و تحطيها بالفريزر فيكي تحضري كمية كبيرة من البطاطا و تجهزيها و تقليها اول قلية , بعدها تخليها تبرد و تقسميها على كميات صغيرة و تفرزيها , وقت اللزوم بتطالعي كيس و بتحمي الزيت و بتقليها القلية التانية , مهم بهيك حالة ما تكتري كمية البطاطا بكل مرة , و الأهم ان تنتبهي من طرطشة الزيت .
بالصحة و الهنا
4 حبة بطاطا كبيرة
ملعقة صغيرة ملح
ملعقة نشاء ( أو كورن فلاور )
زيت عادي
• تقشر البطاطا ثم تقطع لدوائر و تقطع لأصابع بأحجام متساوية .
• تغسل البطاطا بالماء ثم تغمر بالماء البارد و الملح و تترك لمدة ساعة و يمكن أن تترك لمدة 12 ساعة في البراد .
• تصفى البطاطا من الماء و تفرد على قطعة شاشة بيضاء و تترك حتى تجف تماماً .
• ترش البطاطا بالنشاء و تقلب حتى تتغطى به جيداً , ثم يوضع القليل من الزيت و تقلب حتى تتغطى البطاطا بالزيت بشكل كامل .
• يحمى الزيت على نار قوية و تقلى البطاطا على دفعتان أو ثلاثة و تترك حتى يبدأ لونها من التحول من اللون الأبيض إلى اللون الأشقر لمدة 4 – 5 دقائق , ترفع البطاطا على ورق ماص و تترك حتى تبرد .
• قبل وقت التقديم يحمى الزيت مرة ثانية ثم تقلى مرة ثانية حتى تشقر و تنتفخ و تصبح ذهبية ثم تقدم فوراً .
-
وصفات تانية ممكن تعجبك
بس كانها بتطلع دسمة شوي ، لانو كثرنا زيت :roll
بس مع هيك انا متاكده انو طعمها حيكون جنان
يسلموا الايادي يارب
الله
طلع عبالي قوم قشر فوج لا بوقرة شوفي انا احيانا لما يكون معي وقت بقلي البطاطا مرتين بتطلع طيبة :p بس ولا مرة خطرلي غير هيك ولكن النشا ميشان شو 
وكمان ليش تحطي زيت بعد النشا ضروري طالما رح تقليون بالزيت 
على افكارك يا منى شو مهمين
هلا وفا
بالعكس رح طلع خفيفة و لا ألذ لأن لما غلفناها بالزيت ما بقى تشرب زيت كتير على عكس ما اذا قليناها بشكل عادي 
يلا جربيها و ان شاء الله بتعجبك
هلا بالقمر ام نور
النشاء لحتى يضمن القرمشة و الزيت لحتى ما تشرب زيت و تبقى خفيفة و مقرمشة :zzz
جربيها و أكيدة ان شاء الله رح تعجبك
hi aklat kteer taybeh w kl shi jarrabto tele3 kteer tayeb bs bddi esalek eza bta3rfi elbatata elmanfokha keef btseer w shokran kteer
هلا بانة
عوافي على كل شي جربتيه يا حق
يا ريت تقوليلي شو جربتي :zzz
قصدك البطاطا المنفوخة ؟؟ هيك فهمت , ممكن تشرحيلي اكتر لحتى ااقدر ساعدك
البطاطا المنفوخه هي تقطع على شكل دوائر رفيعه مثل الشبس ثم كما اتذكر انه تقلى في زيت بين الوسط و الحامي و في نصف القلي يحمى الزيت و الفكره هي انه في النصف الاول يعمل الزيت على تطريتها و قليها و عندما نحمي النار بتنتفخ البطاطا و بيكون فيها مثل الجيبه لانو صارت طريه و النار تفختها انشالله تكون الطريقه كما اتذكرها
شكرا امونة على الاضافة , ان اء الله يكون هاي الوصفة المطلوبة من بانة
مممممممممممممم
شكل الصحن كتير مغري
بتعرفي انا اكتشفت طريقة القلي مرتين من المطاعم لانو و انتي واقفة بيقلو البطاطا بوقت قصير كتير و بتطلع مستوية ومقرمشة
مشان هيك استنتجت انو بيقلوها نص قلية بالبداية و بس يجي الزبون بيقلوها مرة تاني مشان تضل سخنة
بس انا لما جربتها دغري بتيبس و بتصير قاسية مدري كيف
شو السبب
Hi,yes thiss the recipe thats im asking for.I like how it looks and its so yummy.Ive eaten this potato in Aleppo.Im waiting to come back this summer and have the most delesious food in the world.thank u very much Mona & Eman for your efforts.w Allah yjzeekom el kheir.
السلام عليكم الله يجزيك الخير يا اختي على هالنصائح القيمة بتعرفي كانت قائمة طبخاتي الاخيرة هي الكارنيارك و المعكرونة غراتان و المكسيكانوكلهم رائعين الله يعطيك العافيةبدي اسالك ضروري البطاطا نقليها مرتين ما بيصير من مرة وحدة تقرمش لاني انا بصراحة فورا بحضرها بنفس اليوم وقت موعد وجبة الطعام وشكرا لك يا فنانة
انا جربت هالوصفة كتير نجحت معي وفعلا مقرمشة وطيبة وحتى ميشان الوقت قشرت كمية وقليتا مرة ولما بردت قسمتا باكياس ووضعتا بالفريزر وما فرقت نفس النتيجة :p وكل الشكر لا العسل منى
هلا بانو
بتنور حلب حبيبتي باحلى قمر , الله يسلمك و يخليك و الف شكر علىالدعوات .. هلا انا ما عندي وصفة تمام الها , ان شاء الله بس ما حصل وصفة منيحة ببقى بنزلها
هلا غيث
هنا و عوافي على قلبك و قلب حبابك يا حق , كتير انبسطت انهم عجبوك و الشكر ليك على ثقتك فيني
هلا لو بتجربيها بهل الطريقة للبطاطا رح تحكمي بنفسك , اول مرة مقرمشة بس تاني مرة كتيرررر مقرمشة , الشكر ليك على تواجدك و ردودك الحلوة
هنا و عوافي ام نور , و هل الفكرة حكاها مرة شيف , رح احكيها بالتفصيل ان شاء الله بس ارجع للبت لان النت هلا عندي معطل
هلا لنووشة
و الله ما بعرف :roll ,يمكن عم تزيدي عليها بالقلي أول مرة , لهيك لما عم تقليها المرة التانية عم تقسى معك .. جربيها هل المرة بطريقتي و ان شاء الله بتظبط معك
على فكرة انا جربت البامة بطريقتك و طلعت يمممي , رح نزل صورتها هل كم يووم :zzz
السلام عليكم …
كيفك مدام منى يسلمو كتير على طبق البطاطا..انا صرلي فترة طويلة عم اتعالج أنا والبطاطا مشان تظبط وتصير طيبة ..جربت أكتر من طريقة بس أكيك رح جرب هالطريقة ..
بس سؤالي انو ممكن نضيف بهارات للبطاطا حتى تصير متل بطاطا كنتاكي مثلا؟؟
في مطعم اسمو Cook Door بالشام سيتي سنتر وأكيد ألو فروع هون وهون بس مابعرف إذا في بمدينة حلب بس المهم أنو بيعمل بطاطا بالبهارات بتجنن وكلما روح أنا وخطيبي مناكل منها ومتراهنين أنا وخطيبي أنو رح يجي يوم وأعرف ساوي من هالبطاطا اللذيذة بس لهلأ ماعرفت شو الوصفة … فساعديني مدام منى يستر على عرضك
يعني إذا بدنا نضيف البهارات بأي مرحلة رح يكون هدا الشي؟؟ قبل مانقليه بالمرة الثانية؟؟
وياترى في بهارات خاصة بالبطاطا؟؟
وشكرا كتير كتير ..ولكل المشاركين بالموقع ..
هلا نسرين
و عليكم افضل السلام و اتم التسليم , هادا المطعم ما اله فرع عنا , و يا ريت عرفت عن هل الطبق لان أخر مرة رحنا على الشام اكلنا فيه سندويش و كانوا طيبين , بس ما خطرلي جرب البطاطا , على كل فكرة كتير طيبة , البهارات بتضيفيها بعد أول قليةعلى ما أظن ..
في بهارات خاصة بالبطاطا , نحنا منشتريهامن المدينة عندي محل ابو زيد الهلالي بيبع بهارات بطاطا يممي , اكيد بالبزروية لازم تلاقي , يكون محل بتتعامل ماماتك معه دايما و بهاراته طيبة
على كل رح جرب ضيف بهارات للبطاطا و اذا ظبطت معي ببقى بضيفها للوصفة ..
الشكر ليك على الاضافة و على الرد , و ان شاء الله منفرح فيك قريب
السلام عليكم و رحمة الله و بركاته
اكيدلازم جرباان شاء الله
بس اديش فيها تظل بين القليه لاولى و التانيه
و كمان ما حطيتي ملح غير لما نقعتيها يعني هالملح كافي و كمان اديش كمية الملح مقارنة مع المي بخاف حط ملح كتير او قليل و تخرب البطاطا
بالتوفيق
سلام
هلا اختي
بتخلي البطاطا لحتى تبرد تمام , يعني نصف ساعة على الاقل , و ممكن ترشيها بالملح بس ما طلعت من النار تاني مرة و الملح ممكن تدوقي المي و تملحيها لحتى تصير على زووءك
السلام عليكم و رحمة الله و بركاته
جازاك الله خيرا اختي منى و ان شاء الله ستتم التجربة باقرب فرصة و بخبرك بالنتيجة
بالتوفيق
سلام
هاي منى بتعرفي انا هالوصفة اتعلمتها من موقعك بالصيف ومن يومها لهلأ بعمل نفس الطريقة بتجنننننن كتير مقرمشة هي بدها شوية تعب بس الصراحة انو تستاهل
شكرا عالاضافة عالايميل ويارب كون عند حسن ظنك
وبدي اسألك في وصفة البطاطا المنفوخة دورت كتير عليها ومالاقيتها واكيد مافي حدا غيرك بيعرف الطريقة كتير بيقدموها بالمطاعم وخصوصا صلنفة وطرطوس منفوخة متل البالون ياترى شو السر وراها غريب انو مومنزلتيهابالموقع
بتمنى تساعديني
سلام باي باي
هلا هاجر
الف صحة و هنا على البطاطا , بدها شغل بس بتطلع بالاخير يممي , انا الي لازم اشكرك على الايميلات الحلوة
اختي هل البطاطا هي سر من اسرار مطاعم كسب , و انا ما بعرف طريقة تحضيرها :roll
اذا شي نهار ربنا يسر و عرفت اكيد ما رح نزل الطريقة فورا
هلا فيكي
تسلمي يارب كلك زوووووووء
اي اوكي بيجي يوم ومنعرف السرهههههههه
وانا عم انتظر وشكرا عالتواصل معي الله يخليلنا اياكي يارب
ان شاء الله , صرت محمسة كتير لاعرفها , بركي بروح بشتغل مرمطون شي كم يوم هونيك و بحط عيوني على الفرن لحتى شوف شو القصة و شو الحكاية :grin
السلام عليكم جميعاً
هالوصفة الطيبة أكيد ان شاء الله بدي ساويا لرفقاتي بس يجو لعندي مع بقية القائمة الي محضرتا أكيد من هون
بس بدي اسأل
شو الهدف من نقع البطاطا بالمي و الملح بالبداية
و فيني استغني عن هالخطوة
و شكراً مقدماً 8)
لا تستغني عن و لا خطوة , و هي الهدف منها ان تشيل النشا الزيادة من قلب البطاطا :zzz
منوووووووشة بدي أسألك بينفع بعد القلية الأولى نحطها بالفريزر لمدة؟؟؟
و أنا عندي طريقة كمان من النت بس لسه ما جربتها بس عكلام صاحبتها بتطلع البطاطا مقرمششششششششششششة بدك أكتبها؟
ايه بيصير اكيد
متل ما بتحبي , بس انا اغلب الطرق الي في النت مجربتها و ما عطتني النتيجة الي بدي ياها :roll
هلأ منوشة يعني اذا حطيتها بالفريزر بتصير متل البطاطا المجمدة اللي بالسوق و لا هي أطيب؟ :zzz
أختي منى(وان شاء الله أعز) هي الطريقة بس طبعا نقلتها متل ما كانت بالنت و أنا ما جربتها:
تجيبي البطاطس وتقشريها طبعا و تقطعيها أصابع
وبعدين أثناء التقطيع حطي قدر به ماء و مقدار مناسب من الملح على النار ولما تغلي المويه تضعي
عليها مقدار فنجان قهوه خل ابيض وتضيفي البطاطس وتتركيها لمدة خمس دقائق تغلي وبعدين
تصفيها من الماء و تسخني الزيت وتقليها عادي وراح تاخذ وقت اطول شوي من العادي في الزيت
لكن لا تنتظري حتى تأخذ لون أحمر طلعيها وهي شبه صفراء لأنك راح تلاحظي انها راح تكون
مقرمشه جداً من الخارج وبنفس الوقت طريه من الداخل يعني لو تركتيها لتاخذ اللون الأحمر او
الذهبي الداكن راح تطلع يابسه زياده عن اللازم جربيها وما راح تغيري هالطريقه
ممممم , جربتها بس مو بنفس التفاصيل و ما زبطت معي ابدا :roll
اذا حابة جربيها و خبرينا
ما بعرف عن البطاطا المجمدة الي بالسوق
لأ أكيد ما رح أجربها طالما مجربة شبيهتا 8)
هلأ أناأول مرة بدخل وان شاء الله بستفيد من هالموقع سلامات لكل المشتركات اخواتي :zzz
هلا فيك ام المنذر , نورتي و شرفتي مية هلا فيك
واو..إنو الواحد بتمرق عليه تفاصيل صغيرة صغيرة قد النملة..بس ما بيخطر عبالو إنو هالتفاصيل هيي سر نجاح كتير من الاكلات الطيبة..تسلم أناملك..لفتت نظري قصة النشا..رح نجرب ونحكيلك..
ياسلام شو بحب البطاطا الفريت وانا بعملا بطريقة قريبة من طريقتك مدام منى بعد ماقشرهاوقطعها بنقعا بمي سخنة ونشا مروب بقلبا وبعد ماصفيا بخل يالزيت يحما كتير وبنزلا عوجبات قليلة مشان تقرمش براحتا وبوطي الزيت شوي وبتركا لتستوي منيح ووتتقرمش وجربت مرة اقليا مرة تانية بس ماناسبتني الطريقة لانو ابين ماجيت بدي نزلا عالزيت كان الصحن خلص من النقورة :grin
شكرا كتير على وصفاتك الطيبة
اختي منى انا اريد شرح مفصل جدا
بنتاظر ردك
اهلا و سهلا نور الموقع
اسفة للتاخر بالرد
اقليها القلية الاولة لمدة خمس دقائق
اكتر من النشاء ولالا
وبعدين اخليها تبرد واطلعها من الفريزر
واقليها قلية تانية
اكتر من النشائ ولالا
انا انتظر ردك اختي منى بفراغ الصبر
النشا كمية مناسبة لحتى تغلف حبات البطاطا بشكل خفيف, متل مو مذكور بالوصفة لكل 4 حبات بيلزمنا ملعقة كبيرة من النشا
القلية الاولى حتى تصفر حبات البطاطا ، من دون ما تاخد لون زائد
القلية التانية قلية سريعة لحتى يصير لون الحبات ذهبي و مقرمش
بتمنى تكون كل الامور وضحت ، ايا سؤال تاني من عيوني