براونيز بكريما الخمس دقايق السرية
نصف كيلو لحمة شقف
2 ملعقة كبيرة سمنة أو مزيج من السمنة و الزبدة
2 كوب أرز مصري
كيلو أو كيلو و نصف من الباذنجان الكبير المدعبل
3 كوب من مرق سلق اللحمة
ملح
نصف ملعقة صغيرة بهار مشكل
ورق غار و زنجبيل كامل و بضع حبات قرنفل و فلفل أسود و حب الهال و أعواد قرفة لسلق اللحمة
سمنة أو زيت لتقلية اللحمة و شرائح الباذنجان
مكسرات محمصة حسب الرغبة
• تقلى اللحمة بالقليل من الزيت أو السمنة على نار متوسطة و تقلب حتى يتغير لونها و يجف مرقها تماماً .
• تغمر اللحمة بالماء المغلي ثم تضاف بهارات سلق اللحمة و بعد أن تغلي تغطى الطنجرة و تترك حتى تنضج اللحمة .
• يقشر الباذنجان و يقطع شرائح طولية أو دوائر حسب الرغبة ثم يرش بالملح و يترك جانباً لمدة نصف ساعة .
• يغسل الباذنجان و يجفف بمنشفة مطبخ نظيفة ثم يقلى بالسمنة أو الزيت حسب الرغبة حتى يشقر .
• يغسل الأرز جيداً ثم ينقع بالماء البارد و الملح لمدة نصف ساعة .
• توضع الثلاث أكواب من المرق على النار و تترك حتى تغلي ثم تضاف شرائح الباذنجان و تغطى الطنجرة و تترك حتى تغلي لمدة 10 دقائق كي تأخذ المرقة من نكهة الباذنجان , ترفع شرائح الباذنجان من المرق و توضع في وعاء مغطى كي تبقى ساخنة .
• يصفى الأرز من ماء النقع جيداً ثم يقلب بالسمنة حتى تتغلف كل حباته بشكل كامل ثم يصب فوقه مرق اللحمة المغلي و يترك حتى يغلي مجدداً ثم تهدى النار و يغطى القدر و تترك حتى تتشرب حبات الأرز كل المرق و تظهر الثقوب على وجه الأرز ثم يبعد القدر عن النار و يحرك الأرز بشوكة و يترك الأرز مغطى لمدة ربع ساعة حتى يتهدى و تتفلفل حباته .
• في وعاء غميق ترتب قطع اللحمة المسلوقة و فوقها نصف شرائح الباذنجان ثم نصف الأرز المطبوخ ثم باقي الباذنجان و باقي الأرز و يضغط بلطف للتخلص من كل الفراغات ثم تقلب المقلوبة على طبق مسطح كبير و تزيين بالمكسرات و تقدم فوراً مع اللبن و المخللات أو السلطة .
أفكار أخرى :
• تعد مقلوبة الزهرة ( القرنبيط بنفس الطريقة تماماً )
• لإعداد مقلوبة الكمأة , تنظف الكمأة جيدا و تفرك بالفرشاة للتخلص من الرمال المخبأة في قشرتها ثم تقطع إلى شرائح و لكل كوبان من الأرز نحتاج أربع أكواب من الكمأة , تقلى بالقليل من السمنة أو الزبدة لمدة 10 دقائق تقريباً ثم يتابع إعداد الوصفة كالسابق , و تحضر مقلوبة الفطر و البازلاء بنفس الطريقة .
يا سلاااااااااام شي كتير مشهي الله يسلم هالايدين يا رب أنا كتير بحب هالأكلة مع انو ما منعملها بالبيت :roll
في عندي برنامج مشان العبادة في رمضان حابة أبعتلك ياه ممكن تبعتيلي ايميلك مشان أبعتلك ياه عليه و إنت اذا حبيتي نشريه؟
أنا كنت بنزلو هون بالموقع بس ما بعرف شلون.
شي بيشهي عنجد الف شكر الك اخت منى بدي اسألك سؤال بايخ الكمأة شو الا اسم تاني صراحة اول مرة بسمع فيها :grin
هلا بدور
الله يجزيك كل الخير
اختي ابعتيلي البرنامج باي رد و انا رح انشره باسمك
هلا أختي ام نور
أختي الكمأة نوع من أنواع الفطر إلي بينت تحت الأرض من دون زراعة و أحيانا بيسموه نبات الرعد لان بيقولوا كل ما رعدت أكتر بتكبر الكماة أكتر , و هو بيكون غالي كتير
فيك تفوتي [URL=http://www.55a.net/firas/arabic/?page=show_det&id=553&select_page=3]لهون[/URL] لحتى تشوفي فوائدها الكبيرة و تعرفي عنها اكتر
الان عرفتها كلك زوء اختي هنا بفرنسا عندون اشكال وانواع من الفطر بس الحقيقة انا بستعمل او فطر العلب العادي او المجلد اما الطبيعي ولا مرة فكرت استعملو لان ما عندي فكرة كيف تشوفي العالم هنون شو بيشترو وبيهتموا في
أنا كنت بالأول خاف استعمل الطبيعي , أخاف ان يكون من النوع الي ممكن يسبب التسمم ..
, ألذ بكتير
بس مرة اتشجعت و جربته و كتير فرقت الطعمة
لهيك كل ما بيكون متوفر بستعمله , و إذا مو متوفر بستعمل المعلب و أمري للله
السلام عليكم و رحمة الله وكل عام و إنت بألف خير بمناسبة شهر رمضان المبارك.
منى أنا ما بعرف شلون أعمل attachment للبرنامج
ممكن تبعتيلي شلون مشان ألحئ أبعتوا و نبدا فيه مع أول أيام شهر رمضان المبارك؟ 8)
وشكرا كتير الك :zzz
على فكرة منزلة أكلات كتير طيبة الله يسلم ايديكي يا رب نشالله يكفيني الوئت و أئدر أتصفحون براحتي بس المشكلة صاير عندي شوي أزمة تلفون و نت ادعيلي :roll
الله يوفقك بدور يا رب
ان شاء الله تجربي شي وصفة و تكون على زووءك
الله يعطيك كل العافية اللي بالدنيا ..هادي الاكلة كنا نحتفل فيها لما كانت المرحومة تعملها..
انا بعملها باللحمة الناعمة 8)
بحمسها شوي بالزيت بس شي يتغيير لونها و بقلي البيتنجان و بصفوا بقاع طنجرة تيفال بالجوانب بس و بالنص برص اللحمة و فوقها بغطيها بكام شريحة بيتنجان بعدين طبقة رز خفيفة و فوقها شرائح بيتنجان و فوقها اللي بيبقى من الرز و بصب عليها مرقة لحمة مغلية لكل كاسة رز مستعملة كاستين مرقة و بس ترجع تغلي بخفف النار لمدة نص ساعة لحد ما ينفش الرز و يستوي
بعدين بطفي النار و برفع غطا الطنجرة و بتركها ربع ساعة تتبخر بعدين بقلبها بصينية كبيرة بتنزل متل القالب و بزينها باللوز و الصنوبر…
مع نجومية اللبن بالخيار ..
يا سلام وليمة غير شكل :p
فيه ناس بيعملوها بالدجاج بس انا ما بحبه
:grin الدجاج طيب كمان , بس باللحمةأطيب ..
بتعرف أخي أحمد الطريقة الي انت ذكرتها هي الطريقة الأصلية و التمام لتحضير المقلوبة , بس أنا كانت تتعقد معي كتير و الطبقة الي فوق من الرز ما تستوي و الطبقة الي تحت تخبص :roll و شي تعلق اللحمة
بالأخير واحدة من رفقاتي علمتني هل الطريقة و ارتحت عليها كتير ..
فكرة استعمال اللحمة الناعمة و خصوصا لما بيكون في اولاد بالعيلة و ما بيحبوا اللحمة الشقف..
نورت أخي مية اهلا و سهلا
السلام عليكم و رحمة الله و بركاته
كتير حلوة فكرة انك تخلي كل شي لحال و كمان هيك منقدر نساوي اطباق صغيرة لكل واحد طبقو
شي واحدما فهمتو منيح هو لمن نصفي الارز قلتي منحطله سمنة يعني منحطا متل ما هي و منقلب الرزعالبارد او فوق النار
ان شاء الله بكرا بدي جرباو يا ريتلحقي علي قبل ما ساويها مشان ما ظلني عم فكر ازا هي هيك او لا
بالتوفيق
سلام
هلا حبيبتي
منقلبه على نار وسط شي دقيقة أو دقيقتين لحتى يسخن و بعدها منصب فوقه المرق و هو عم يغلي
يلا عم استنى تجربتك و يا ريت يعجبك
السلام عليكم و رحمةالله و بركاته
يسلمو عالرد السريع الحمد لله اني ما ساويتو اليوم لاني كنت راح حط السمن مع الرز عالبارد
السبت ان شاء الله راح ساويه و خبرك بالنتيجة فيني حط زيت بدال السمن صح
بالتوفيق
سلام
اكيدة
انت و زووءك بس السمنة أطيب و كمان اتقل :zzz
السلام عليكم و رحمة الله و بركاته
ساويتهاالسبت الماضي و طلعت طعمتهابتجنن و شكلها كمان و لتاني يوم ظلت طيبة و يمكن اطيب و انا استخدمت مزيج من الزبدة و المارغرين و كنت كريمة في الاستخدام و يمكن مرة تانية جربها بالزيت بعتقد بتطلع كمان طيبة بس اخف شوي
جازاك الله خيرا و جعله في ميزان حسناتك
بالتوفيق
سلام
السلام عليكم و رحمةالله و بركاته
بدي اعرف شو منعير لما منعملا بالزهرة و كمان بالبازلاء يعني الزهرة منقليها او منغليها بالماء و كمان البازلاء شو لازم نعملهاو شو التغييرات اللي منساويها
بعرف تقلت عليك بس ضروري اعرف لان راح جربها يمكن بكرا او اللي بعدو بالزهرة و بعد فترة راح ساويها بالبازلاء
انا في الانتظار و سامحيني لاني عم اتعبك معي بس لو مو ضروري ما كنت سالتك هلأ لان بعرف بتكوني مشغولة
بالتوفيق
سلام
مشان الله ما تواخزيني ما انتبهت انك كاتبة انها بالنسبة للزهرة تعمل بنفس الطريقة تماماعلامات الصيام عم تظهر علي لكان بيصير سؤالي هل فينا ما نقليهاو نكتفي باننا نغليها بماء و شو منعمل للبازلاء
بالتوفيق
سلام
أكيد بتصير بالزيت , أصلا هلا أغلب ستات البيوت عم يحضروها بالزيت لحتى تطلع أخف , بس أنا بحب كل شي على الاصول
الزهرة ما أتوقع ان تكون طيبة من دون قلي و البازلاء بس بتقليها بالسمنة تقريباً 5 أو 10 دقايق و بتقلي اللحمة وبتعملي متل بافي الوصفة و فيك تضيفيلها كمان شوية جزر مفروم مع تقلاية البازلاء , نمممي
السلام عليكم و رحمة الله و بركاته
جازاك الله خيرا اختي منى قصدك انو نفس السمنة اللي قليت فيها اللحمة حط فيها اللحم و اسلقوو كمية السمنه ما تكون كتيرة مو هيك يعني يادوب ملعقة و نص او اتنين مو هيك و كمان البازلاء بتكون طازجة او فينا نستعمل بازلاء مطبوخة على البخار و متلجة
كمان هل ينفع اسلق الارز مشان يطلع طري اكتر او حتى نطبخو بالبخار و بعدين نضيفلو مرق اللحم
بالتوفيق
سلام
السلام عليكم و رحمة الله و بركاته
بعتقد ان سلق الارز او طهيه بالبخار راح يختصر الوقت لان ما راح نخليه في الماء لنصف ساعة و كمان راح يتشرب مرق اللحم بسرعة بقى شو رايك بينفع او لا
بالتوفيق
سلام
فيك تستعملي بازلاء مفرزة و كمية السمنة بتتحكمي فيها حسب رغبتك , أما الرز فلازم ينطبخ مع مرقة اللحمة و البازلاء , يعني اذا سلقتيه لوحده رح يخسر كتير من النكهة المطلوبة
السلام عليكم و رحمة الله و بركاته
طيب لكان فيني انقعو لفترة اطول من نص ساعة يعني شي ساعة لحتى بعدين بسرعة ينضج
و بدي اسأل عن مقلوبة الدجاج بتنعمل بنفس الطريقة بس الدجاج بيظلو متل ما هو يعني ما منفتتو لقطع صغيرة و منخليه قطع كبيرة او شو
بالتوفيق
سلام
حبيت جربه بالفطر فيا ترى ضروري تكون اللحمة شقف ولا بيصير مفرومة ؟؟
أنت قلت أن الطريقة متلها تقريبا ،شو الاختلاف لكن ؟
آخر سؤال آنسة ، شو اسم جوزة الطيب بالانجليزي؟؟ما بعرف لا اسمها ولا شكلها ،شلون بدي جيبها!!!
هلا سارونات
فيك تنقيه قد ما بدك ساعتين أربع ساعات أأقل الشي نصف ساعة , و مقلوبة الدجاج بتسلقيه و بعدها بتنظفيه من العظم و بتستعملي المرق لطبخ الرز و فيك تقسميه لقطع صغيرة أو متل ما بتحبي
هلا أمولة
بيصيبر لحمة مفرومة أو شقف لابس بالشقف أطيب أكيد و الاختلاف بين الفطر و البانجان انك البانجان رح تقلييه لحاله بالزيت لحتى يشقر أما الفطر رح تقلييه مع اللحمة و بس , جوزة الطيب بالانكليزي هي Nutmeg و بركي اذا الله راد بحط صورة الها بنفس ردي هادا بس المسويات 
السلام عليكم و رحمة الله و بركاته
جازاك الله خيرا اختي منى
سبحان الله كنت راح اسألك كيف منساويها بالفطر اختي ايمان سبقتني بقولها بالتوفيق ان شاء الله و صحة و هنا على قلوبكم
و لا تنسي تخبرينابالنتيجة
اختي منى ظل في سؤال كمان و هو هل فينا نستعمل الفطر المعلب او لازم فطر طازج و ازا فينا نستعمل المعلب هل منخليه قطع كاملة او منقطعو لشرائح و قديش كمية الفطر
بالتوفيق
سلام
السلام عليكم و رحمة الله و بركاته
عفوا اختي منى في عندي كمان سؤالين بالاضافة للاسئلة السابقة ازا ممكن بدي اعرف
و كمان ما في مشكلة ازا استعملت لحم غنم ما هيك لان كنت مفكرة انها بتنعمل بس بلحم البقر
و السؤال التالي عن لما بدنا نعملها باللحمة المفرومة شو منضيف للحمة و كيف منساويها
بالتوفيق و فرحت كتير لانك استرجعتي نشاطك و كل يوم عم نتعلم وصفات جديدة من عندك
بالتوفيق
سلام
هلا أختي
ممكن تنعمل بالفطر المعلب , بالطبيعي أطيب , أنا بضيف لكل كوب رز 2 فطر و الفطر اكيد مقطه شرائح .
أختي اللحمة الاطيب لهل الوصفة لحمة غنم .
اللحمة المفرومة تقليها بالسمنة مع البهارات الي بتفضليها و بس
السلام عليكم و رحمة الله و بركاته
جازاك الله خيرا اختي منى
طيب و البقدونس بضيفو للحمة المفرومة او لا
و اخر سؤال ان شاء الله هو ان مقلوبة البطاطايعني بس بستبدل الباذنجان بالبطاطا و بتبع نفس الطريقة و لاحظت انك ما حكيتي عن مقلوبة البطاطا يعني هل ما بتطلع طيبة
بالتوفيق
سلام
لا اختي ما بدها بقدونس
و مقلوبة البطاطا ما بعرفها الصراحة , ما أتوقع بتطلع طيبة , بس ممكن مزج بانجان و بطاطا و قرنبيط مقلي , هيك الفلسطينية يستعملوا عدة أنواع من الخضار مع بعضهم :zzz
السلام عليكم و رحمة الله و بركاته
صار عندي كمأة و عبالي ساوي فيها مقلوبة الشرح واضح بس ما فهمت يعني منستعمل الكمأة و اللحمة الشقف مع بعض مو هيك يا ريت تشرحيلي اكتر شو منساوي بعذ تقلية الكمأة بالسمنة
و هل فينا نستعمل بس كمأة من غير لحمة و اذا فينا شو منساوي
كمان انابعرف انو الكمأة بتتقشر انت ما ذكرتي التقشير يعني قصدك ما منقشرهاكمان الشرائح هل بتكون رفيعة او سميكة او متل شرائح الفطر المعلب
ان شاء الله راح ساويها على يوم الخميس اذا الله راد لهيك بدي اعرف كل شي بالتفصيل و افهمو عالمضبوط
بالتوفيق
سلام
هلا أختي
اول الشي نفرك الكماية بفرشاية خشنة لحتى تروح كل حبات الرمل منها و هي خطوة مهمة في تنظيف الكماية , اما اذا قشرتيها فرح تروح كل طعمتها و فوايدها , اكيد ما بدها تقشير
بعدها نقطع الكماية لشرحات متل المشروم المعلب و نقليها مع اللحمة حتى تنشف مرقة اللحمة بعدها تغمريها بالمي و تخليها لتستوي و تطبقي الوصفة عادي
اذا حابة تستعملي كماية من دون لحمة تقلبي الكماية في السمنة و بعدها تغمريها بمرقة أو بمي مع مكعب ماجي و تخليها شي نصف ساعة , بعدها تطبقي فوقها الرز بشرط يكون عيار المرقة الباقية نفس عيار مية الرز
أختي هي ما بتصير من دون لحمة , بس اتوقعها بتطلع طيبة كمان إذا طبختيها بمرق اللحم اذا كنت ما بتحبي اللحمة
لو تعرفي يا منوش قديش بعز هالأكلة.. يمكن ما بتتخيلي المقلوبة بلا لحمة.. بس عنجد إذا جربتيها رح تغيري رأيك.. ماما الله يخليلي ياها كانت دائما تعملي ياها وتدعمني بالمكسرات بدل اللحمة 8)
و من زمان ما آكلتها.. عندي أبو الشباب ما بيحب البانجان المقلي.. بس لما شفت الصورة قررت دلع حالي شوي.. بما إنو دائما بعمل أطباق لحم وما بدوقها.. رح اتمرد واعمل مقلوبة لحالي
هلا دلوش
لا بتخيلها , لان انا ما باكل اللحمة الي فيها و بحب بس طعمة البانجان و الرز و المكسراااات
دلعي حالك و لا على بالك , اذا نحنا ما درنا بالنا على حالنا مين بده يدير ؟؟؟
يسلمو إيدين الجميع يارب
بس
حبيت أشارك بطريقتي بعمل المقلوبة
أول شي طبعا بسلق الدجاج مع بصلة وبهارات وبخليه ع جنب
وبقلي الباتنجان وبخليه ع جنب كمان
وبكون ناقعة الرز بمي وملح.
نجي ع التطبيق بالطنجرة
بدوب شوية سمنة بقلب الطنجرة وبرش فوقها شوية رز (معلقة)، بعدين بصف شرائح بندورة كتير بتعطي طعمة طيبة، وبقشر فصوص ثوم وبوزعون متل ماهن فوق البندورة، وبرص شرايح الباتنجان ثم الدجاج منزوع الجلد،وبرش فوقون شوية بهارات وبصفي الرز وبحطه فوق الدجاج… ممكن أرص طبقة باتنجان بنص الرز وأخيرا بغمرهم بمرقة الدجاج بعد ما تتصفى وبتركها عالهادي لحتى تستوي بدون تحريك
وبقلبها وبتركها شي خمس دقايق
وبزينها بالصنوبر المحمص والبقدونس
عن جد رااااااائعة خاصة الالوان اللي فيها
[url=http://www.0zz0.com][img]http://www14.0zz0.com/2010/06/24/14/291383295.jpg[/img][/url]
[url=http://www.0zz0.com/realpic.php?s=14&pic=2010/06/24/14/291383295.jpg][img]http://www14.0zz0.com/thumbs/2010/06/24/14/291383295.jpg[/img][/url]
السلام عليكم ورحمة الله
ياي منيح فتت لهون قبل ما اعمل المقلوبة بكرا
(ان شاء الله تفوت منى قبل ما اعملها هههه)
هي أول شغلة.
نحنا كنا نحب المقلوبة كتير كتير كتير ونعملها يوم إيه يوم لاء على مدار سنتين تلاتة .. بعدين هيك قلت لحالها مدري ليه ههههه. من وقت ما اجتمعت مع جوزي لسه ما عملتها ولا مرة.
بس بتعرفي شلشتيني بالوصفة، كتير كتير بتختلف عن اللي بعرفها، واللي بعرفها مأصلة أصول تمام بحلب .. لذلك ما بعرف …
استغربت ان الباتنجان لحال والرز لحال
تاني شغلة، كنا نسلق الباتنجان سلقة خفيفة قبل القلي، وبعدين نقطع بيتنجاناية أو نص وحدة لقطع زغنووونة ونغليها بالمي، بتلاقيها دابت وعطت طعمتها للمي تماما.
بعدين منطبق طبقة باتنجان وطبقة رز، وبعدين نسلقون بالمي هديك.
يله منجرب طريقتك بكرا .. يسلمو
منشوف طريقة مين مأصلة :p 8) (طلعلي لسان يحكي وأصابيع تكتب أدام الشيف منى ومالنا بالقصر غير امبارح العصر ههههه).
شكرا كتير كتير
والقلب داعيلك
والسلام عليكم
هلا دلوش
لا بتخيلها , لان انا ما باكل اللحمة الي فيها و بحب بس طعمة البانجان و الرز و المكسراااات
دلعي حالك و لا على بالك , اذا نحنا ما درنا بالنا على حالنا مين بده يدير ؟؟؟
هلا Jassy
ممممم , هلا انا بطبخ البانجان بالمرقة و بعدها بطبخ فيه الرز لحتى يطلع معي شكلها حلو و هي معك حق مو حلبية اصيلة
بس البانجان ينسلق قبل القلي هي اول مرة اسمعها , بس فكرة الباذنان المقطع صغير حلوةةة كتير رح جربها ان شاء الله لما رح اعمل مقلوبة , اتوقعها طيبة كتير :zzz
الله يسامحك انا ما بحب هيك حكي , كلنا عم نتعلم من بعض و لوما حدى علمني ما كنت عرفت شي , بقى انا دوما كتير بحب اسمع و جرب طريقة غير طريقتي و الا بحياتي ما بصير احسن و ببقى بمحلي