براونيز بكريما الخمس دقايق السرية
مقلوبة القرنبيط من اطيب وصفات الشتي عندي , مع مخلل اللفت أو كاسة لبن عيران او سلطة حامضة , مممم يم يم . و هي الوصفة كانت كتير صعبة علي باول فوتتي ع المطبخ , تطلع معي شي طيب طعمتو متل المقلوبة , بس تطلع مقلوبة بس قالبة وجها , هيك قايمة و قاعدة لوقت ما صرت حضرها بغير طريقة , صرت أحط أول الشي الرز المبهر و المتبل بطنجرة كبيرة , و بحط فوقه قطع اللحمة و القرنبيط و بصب فوقهن المرقة المغلية شوي شوي و بعدها أطبخها و كاني عبطبخ رز عادي . بطفي النار و بخليها ربع ساعة ليتفلفل الرز و بعدها بجيب وعاء عميق دائري و برتب فيه اللحمة و القرنبيط و فوقهن الرز , بكبس بطبق مستدير و بخليهن كم دقيقة و بعدها بقلبهن , و هيك صارت مقلوبتي حمو بس طيبة و حلوة كمان . بقى انتي فيكي تحضريها بهي الطريقة أو تحضريها متل مو مذكور تحت بالوصفة , يعني بالطريقة الي بيعملوها امهاتنا 
المقلوبة أصولها بالرز المصري , بس بعد كتير تجارب طلع معي انو افضل نتيجة مناخدها اذا طبخنا نوعين رز مع بعضهن , انا بحب طعمة الرز المصري و فلفلة الرز البسمتي , وقت نستخدم نوعين مناخد طعمة و شكل و أكيد في فيكي تستعملوا نوع واحد
بالصحة و الهنا
1 كوب أرز مصري
1 كوب رز بسمتي
1 حبة زهرة متوسط الحجم
كيلو لحم غنم مقطع مكعبات كبيرة
ملح
بضع حبات هيل و فلفل أسود صحيح
حبة كبية بصل
2 ورق غار
عود كبير قرفة
نصف ملعقة صغيرة قرفة
نصف ملعقة صغيرة بهار مشكل
نصف ملعقة صغيرة فليفلة حمراء ناعمة
لوز أو صنوبر محمص
2 ملعقة كبيرة سمنة
3 كوب مرق
• يغسل اللحم يوضع في قدر متوسط و يغمر بالماء و بعد أن يغلي ترفع الرغوة عن سطح المرق ثم يضاف البصل و ورق الغار و بقية البهارات الصحيحة ثم يترك حتى ينضج و يمكن استعمال طنجرة الضغط لتقليل الوقت .
• يغسل نوعا الأرز و ينقعان معاً بالماء البارد و الملح لمدة نصف ساعة .
• يقطع رأس القرنبيط لزهرات صغيرة ثم تقلى بالزيت الغميق حتى تشقر . ترفع على ورق ماص .
• ترفع قطع اللحم . يصفى المرق ثم يتبل بالفليلفة الحمراء الناعمة و البهار المشكل و القرفة و يمكن إضافة رشة صغيرة من الكمون حسب الرغبة .
• في قدر متوسط تصف قطع القرنبيط أولا ثم اللحمة ثم الرز المنقوع .
• يصب المرق المغلي بلطف و حذر كي لا تختلط المقادير ببعضها البعض ثم توضع السمنة على الوجه.
• يترك القدر على نار متوسطة حتى يغلي ثم يغطى القدر و يترك لمدة 30 دقيقة أو حتى يمتص الرز كل الماء و تنضج حباته .
• يترك الرز و هو مغطى ليرتاح لمدة 10 دقائق ثم يكبس بلطف بطبق بنفس حجم الطنجرة و يترك لمدة 5 دقائق بعدها يقلب في طبق التقديم و يزين بالمكسرات المحمصة , و يمكن اتباع الطريقة التي ذكرتها في المقدمة و خصوصاً للمبتدئات .
-
وصفات تانية ممكن تعجبك
(3 votes, average: 4.67 out of 5)
السلام عليكم كيفك منى والاخوات وكل عام والجميع بخير بمناسبة السنة الهجرية وكل الاعياد التي مرت ولم يتسنى لي تعييد الموقع واسرة الموقع بسبب ظروف السفر والانشغال الشديد فيه وقد اشتقت لمنى وطبخاتها المنفنفة كتير الله يعطيك العافية وشو هالمقلوبة اللي منظرها بيجنن بقى كيف الطعمة ممموانا اموت بكل انواع المقلوبة الله يسلم هالديات يا حق انا بعملها بنفس طريقتك اللي بالمقدمة لانني لازلت بيخرب معي التطبيق دوما بس الطعمة ممتازة على كل رح جرب طريقتك لما جيب قرنبيط وبخبرك النتائج وشكرا لك
السلام عليكم و رحمة الله و بركاته
جازاك الله خيرا اختي منى و اخيرا مقلوبة القرنبيط انا قريت الوصفة بسرعة بس بعدين ان شاء الله راح اقراها منيح و اكتبها
اختي منى بالرد الجاي راح ابعثلك وصفة غراتان قرنبيط كتير بسيطة بس طيبة )) هيك قالو :grin )) و ان شاء الله تجربوها و تعجبكم يا رب
بالتوفيق
سلام
هلا غيوثة
بعد زمان , الحمد لله على السلامة و انا اشتقت الك كتير و دايما على البال و الله
ان شاء الله الكل كان تمام و الاخبار كلها حلوة
ان شاء الله تجربيها و تحبيها , نور الموقع بوجودك مرة تانية غيوثة حبيبتي
هلا سارونااات
لااا هيك تطور خطير بالاحداث :grin , مو مسدقة وصفة منك و كمان شكلها بيشهي
الله يسلمك و يخليك و بانتظالر وصفات تانية منك
الله يسلم ايديك منى أنا مالي مجربة المقلوبة بالزهرة بس بسمع عنها أنها لذيذة ان شاء الله بجربها عن قريب
عاشت الايادي اختي منى امس عملتها وطلعت روعه وخاصة انا اموت بطبخات القرنبيط يعطيكي الف عافية
هلا سمسومة
ان شاء الله تجربيها و تحبيها ,. سهلة و طيببببة
هلا منونة
ريتو مية الف صحة و عافية و هنا بكل لقمة
الله يعافي قلبك و بدنك , كتير انبسطت انك جربتيها و انها عجبتك
السلام عليكم و رحمة الله و بركاته
يخليلي ياكي اختي منى :grin نحنا عم نتعلم منك
انا ما حبيت حط الوصفة غير بعد ما جربتها اكتر من مرة و ان شاء الله تجربو الوصفة و تعجبكم بعتلك كمان وصفة غراتان بطاطاخفيف ان شاء الله وصلت بالسلامة :zzz
بالتوفيق
سلام
مرحبا حبيت من الصبح قوم اطبخ المقلوبة انا دايما بساويا بلبذنجان بس عجبتني الزهرة لان جوزي بحبا بس مقلية الله يستر اليوم لنشوف رديت فعلو من منظر وجهو ادعو يحبا لان جوزي حلبي والحلبية زويقا بلاكل
هلا ام كريم
اكيد ان شاء الله بيحبها , هادا متل جوزي , زوقه صعب كتير و بيعرف لو مغيرة نوع البهار و الله :grin
هلا فيكي اختي منى
جربت المقلوبة وطلعت زابطة وانقلبة ولا رزة هرت عجنب اكل جوزي قلتلو طيبة قال طيبة بس شكل يعني مو عطول :grin بس المهم طيبة واكل بدون زور الحمدالله يعطيكي العافية اختي الغالية على هلاكلة انا حبيتا
الف هنا على قلبك و قلب ابو كريم , كتير انبسطت انك جربتيها و عجبتك
السلام عليكم و رحمة الله و بركاته
اختي منى فيني اسأل ليش بهالمقلوبة شقف اللحمة بيكونو كبار يعني بس تغيير او في سبب معين
بالتوفيق
سلام
لا يا اختي بكل أنواع المقلوبة الاطيب انك تستعملي لحمة مقطعة قطع كبيرة
اليوم رح اعملا شكرا
عملتا انا اول يوم باكول زهرة بحياتي
جد طيبة يسلموا منى
هنا يا احلى ضحى , و عافية يا رب على قلبك بكل لقمة :zzz
والله من زمان على بالي هالأكلة تخيلي أكلتها من وقت كنت مخطوبة بالاردن وطعمتها تحت سناني تسلم دياتك يا عسل
انشاء الله بدي جربي اسمي جايبة زهرا بس اكيد جبهة الاولاد بدهم يعترضوا لأنهم بيحبوا منزلة الزهرا يا ترى بتعرفوها هي كتيييييير طيبة اذا مو موجودة بالموقع ممكن اضيفها بس كيف حبيبتي منى
دليني عالطرقة والله عندي كم وصفة بتوقع يعجبوكم
هلا فروحة
يا رب تجربيها و تطلع متل الي دقتيها و اطيب , شو بدنا نعمل كل الاولاد متل بعضهن و بينقوا على كتير اكلات :roll
المنزلة موجودة بالموقع , ممكن تطلعي على الوصفة و تشوفي اذا في عليها ملاحظات و الا تمام , ايا وصفة حابة تشاركي فيها ممكن تبعتيها كرد و ان ان شاء الله رح انشرها باسمك
ميرسي حبيبتي عالنصيحة واكيد رح شوف الوصفة واعطيكي رأي ونزل وصفة الكيك تبع المايكروويف
عم استنى ان شاء الله
جربتها اليوم وطلعت كتير طيبة بس الرز ما استوى كله منيح ..بس النتيجة كمبتدئة طلعت أحسن بكتير من يلي توقعته ..يسلم ايديك
عواقي و الف هنا و صحة
ممم معناها كانت كمية المي قليلة بالنسبة للرز , ان شا الله المرة التانية بيطلع تماااام و ع زوءك
نورتي
ya3nee eza estakhdamt rez basmatee adesh lazem 7et kameyet el may
المفروض كل كاسة رز بسمتي بتاخد كاسة و نص مي
الله يعطيك العافية
اليوم طبختها من وصفتك
بالعادة المقلوبات كلها مابيزبطو معي بس هالمرة ظبطت معي وطلعت طيبة
شكراً كتير
مليون عافية سارة شكرا كتيررر