كاتو التفاح بالصوص الذهبي


         وصفة : منى                 2007/04/19                 130 تعليقات
كاتو التفاح بالصوص الذهبي

كل واحدة فينا عندها وصفة أو أكتر لكاتو التفاح , هل الوصفة بحبها كتير لان سهلة و مقاديرها متوفرة دوما و بتعطينا كمية كبيرة , الكاتو طري و الصوص فوقه بيجنن و مكمل الطعمة . اطيب كاتو تفاح مع أطيب صوص ذهبي
أما سر الوصفة فهي طريقة تقطيع التفاح , بحب ااقطعه لقطع سميكة شوي لحتى تبقى ظاهرة وقت تقطيع الكاتو و يكون شكلها حلو , أما اذا بشرناه فرح يبان الكيك و كأنو معجن

بعد تجهيز الكيك رح تشوفي انو المزيج سميك شوي , ما فيخطأ بالمقاديرو لا تضيفي شوي سائل زيادة عن المقادير لان التفاح رح يطري الكاتو و يعطيه من نكهته , تاني شي المقدار متل ما قلت قبل كبير , لهيك خبزيه في قالب كبير بيوسع 12 كوب تقريباً و بعدها فيكي تقطعيه لقطع أصغر و ترتبيه بورق بليسيه و تزينيه متل الصورة , أخر الشي هل النوع بياخد وقت طويل بالفرن , حوالي الساعة و ربع و اذا طلع قبل هيك من الفرن رح يعجن .

بالصحة و الهنا

كوب و ثلث زيت أو زبدة مذوبة
3 كوب طحين كاتو
ملعقة كبيرة قرفة
ملعقة صغيرة بيكربونات الصودا
3 ملعقة صغيرة بيكنغ بودر
ملعقة صغيرة ملح
2 كوب سكر
3 بيضات من الحجم الكبير بدرجة حرارة الغرفة
3 – 4 حبة تفاح
كوب من الجوز المحمص ( اختياري )
فانيليا
صوص التوفي كريم
• يحمى الفرن على درجة 180 درجة مئوية و يدهن قالب واسع بسعة 12 كوب بالزبدة , ينخل الطحين و الملح و البكربونات الصودا و القرفة و البيكنغ بودر في وعاء كبير .

• يقشر التفاح و تنزع بذوره ثم يقطع لمكعبات سميكة بعض الشي , يجب ان تكون كمية التفاح المقشر ما يعادل 3 أكواب .

• يوضع السكر و البيض و الفانيليا في الخلاط و يمزج الكل حتى يذوب السكر , يضاف الزيت و يمزج حتى الحصول على سائل أصفر بلون الليمون ثم يسكب المزيج فوق الطحين المنخول و يقلب بلطف حتى يتجانس المزيج ثم يضاف التفاح و الجوز و يقلب حتى يمتزج التفاح و الجوز بالمزيج جيداً , سيكون المزيج سميك بعض الشيء .

• يقلب مزيج الكاتو المحضر في القالب المدهون ثم يخبز في الفرن المحمى لمدة ساعة و ربع أو حتى ينضج الكاتو .

• بعد ان يبرد الكاتو تماماً يوضع على طبق التقديم و يزين بصلصة التوفي كريم .
  • وصفات تانية ممكن تعجبك


التعليقات

  1. بدور 16 August 2007

    شكلا كتير طيبة :p
    يا رب أعرف أعملها متلك :?
    يسلمو إيديكي ياااا رب.

  2. منى 17 August 2007

    أكيد رح تعرفي :)

    و هدا الكاتو بقى ما في أسهل منه و نجاحه مضمون ان شاء الله ;)

    الله يسلمك و يخليك بدور 8)

  3. ام نور 21 September 2007

    انا اليوم عملت كاتو بالتفاح والموز كمان بحب كتير ضيف الفواكه عالكاتو بتعطي نكهة مميزة وحطيت رشة قرفة بس حطيت نص نشا ونص طحين ولبن وبدل صوص الذهبي حطيت كريمالان هاي الصوص ما عنا منا.وغدا بدي جرب العوامات جبت الطريقة من بابا اذا ظبطت بعطيكون المقادير لان صراحة ولا مرة مجربة :)

  4. منى 23 September 2007

    مية أهلا و سهلا فيك أختي ام نور :)

    ريتو عوافي و هنا على قلبك أختي ..

    ان شاء الله بانتظار وصفة العوامات و رح جربها اذا الله راد على الغميضة ;)

  5. قطة 23 September 2007

    يسلم أيدكي يا أم الميم أنا جربتها كتير طيبة

  6. منى 29 October 2007

    مية أهلا و سهلا فيك قطة ;)

    ان شاء الله هنا و صحة و عوافي يا رب

  7. ام نور 13 December 2007

    انشالله بوقرة رح اعمل هالنوع بالذات من الكاتو عانفس طريقتك بس لو ممكن تقوليلي اداش بالظبط بدو بالفرن :? جبت فرن صاحبتي عندا اتنان وكل يوم عم جرب نوع شكل تاري الفرن المنيح الو تاثير بالاكل فعلا عملت مبارح بسبوسة طلعت كانا جاهزة وجربت خلية النحل بعجينة امك الدهبية كمان روعة طلعت هالعجينة تحفة الله يخليليك امك يا رب

  8. ام نور 19 December 2007

    والله يا اخت منى يعجز لساني عن شكرك عا هالافكار وهالوصفات اد ما شي ناجح ومضمون وبيبيض الوج اليوم عملت هالقالب الكاتو مع اني دايما بعمل كاتو وبحط معو تفاح او اجاص المتوفر لدي ولكن هيدي اول مرة بعمل كاتو وبيطلع معي طيب هالاد مع انو مكوناتو كتير بسيطة وشغلو سهل وانا عم حضرو ما خطرلي رح يطلع هاللأد لان العجينة اصبحت كتير سميكة ولكن لما استوى شو طلع لين وخفيف وبينفخ كتير :p والاهم طعمة مع التوفي يمممممممممم

  9. منى 21 December 2007

    هنا و عوافي ام نور :)

    الله يخليك و يجبر بخاطرك اختي الكريمة على ردك الطيب ..

    عن جد اختي , ناس طيبة متلك و متل زوءك هي الي بتحلي الموقع و بتوره ;)

  10. فوفو 3 January 2008

    شكرا على هذه الوصفه اللذيذه لكن ما زبطت معي لانها هبطت وهي بالفرن اريد ان اعرف السبب لو سمحتي :?

  11. منى 4 January 2008

    هلا فيك أختي :)

    ممكن يكون السبب حرارة الفرن ما كانت مناسبة , لازم تحمي الفرن لربع ساعة على الأقل قبل وضع الكيكة فيه

    كمان ممكن يكون البيض استعملتيه من البراد للخلاط على طول ؟؟

    و ممكن الطحين الي استعملتيه ما كان طحين مخصوص للحلويات ممكن يكون طحين عادي !

    يا ترى في هيك شي و إلا لأ :roll

  12. أم عباده 5 January 2008

    الله يعطيك العافية على هالكاتو
    شكلو رائع وأكيد رائحة خبزه شهيه
    أنابعمل فطيرة التفاح لانو مشهورة كتير هنا بالمانيا
    بس بدي أجرب هالكاتو اللي صورته بتشهي واكيد طعمتو أطيب
    تسلم هالايادي عالوصفات الحلوة

  13. منى 6 January 2008

    الله يسلمك ام عبادة :)

    ان شاء الله تجربي الكانو و تحبيه ;)

    الشكر ليك انت على ردودك الطيبة و وصفاتك المميزة في الموقع :)

  14. فوفو 9 January 2008

    شكرا على الرد بس انا حطت الفرن على الدرجه المكتوبه بس الطحين كان عادي يمكن هاد السبب وكمان حسيت انو درجة 180 عاليه كتير لانو الكيكه اتحمرت من فوق قبل ما تستوي عشان هيك انا نزلت الدرجه ل 160وشكرا مره ثانيه

  15. منى 9 January 2008

    هلا فيك أختي :)

    أكيد الطحين العادي هو السبب بأن ما نجحت معك هل الكيكة أو غيرها ;)

    أختي أنت فيك تتحكمي بفرنك و حراته و كل فرن بيختلف عن التاني و ممكن تعرفي طبيعة فرنك بعد كم تجربة ..

    ان شاء الله يكون عندك همة تجربيها مرة تانية و تكون على زوءك ;)

  16. kuwaiti_girl 7 February 2008

    شكل الكاتو رائع.. التفاح من فواكهي المفضله.. وعندي كذا استفسار. واسفه اذا غلبتك معي

    حاليا البيض المتوافر بحجم واحد وهو صغير نسبيا هل اضيف بيضه زياده

    واستفساري الثاني ما الفرق بين الطحين الفاخر وطحين الكاتو لاني لا اعلم اين اجد طحين الكاتو هنا
    وشكرا

  17. نهى 7 February 2008

    معلش أصلي جديدة على المطبخ وبالذات الحلويات بس نفسي ابقي شاطرة لان زوجى وابني بيحبوا الحلويات كتير..
    هل الكاتو هو الجاتوه؟؟
    كمان ما هو طحين الكاتو؟؟

  18. منى 9 February 2008

    هلا فيك نهى , و إن شاء الله بالتجربة رح تصري أشطر ست بيت ;)
    الكاتو هو نفسه الجاتوه و طحين الكاتو هو أي نوع مناسب لتحضير الحلويات :)

  19. منى 9 February 2008

    هلا أختي كويتية :)
    أختي البيض لما يكون صغير شوية تضيفي بيضة زيادة , و طحين الكاتو هو نفسه طحين الحلويات ;)
    و أي سؤال تاني من عيوني حبيبتي

  20. kuwaiti_girl 13 February 2008

    مشكورة غاليتي على الرد.. وعندي سؤال وسوري اذا عذبتك معاي

    بحثت عن طحين الحلويات او طحين الكيك في عده اماكن ولم اجده.. هنا يوجد لدينا 3 انواع من الطحين الابيض.. ومنهم الطحين الفاخر ثم الطحين الابيض العادي ثم طحين الابيض الخاص بالمخبوزات

    فهل يغني استخدام الطحين الفاخر في هذه الوصفه؟؟؟ ام يجب ان اضيف عده اضافات له؟؟

    وشكرا جزيلا عزيزتي

  21. منى 13 February 2008

    هلا فيك أختي :)
    بتستعملي الطحين الفاخر و في الوصفة مذكور البيكنغ بودر مع كربونات الصودا و بهيك صار طحينك جاهز للاستعمال في الكاتو ;)

    أي سؤال تاني انت تؤمري

  22. نهى 17 February 2008

    معلش كمان سؤال :roll
    هى بيكربونات الصودا هى هى بيكربونات الصوديوم؟؟ :upset

  23. منى 17 February 2008

    هلا نهولة :)
    و لا يهمك حبيبتي و حقك على كان لازم أوضح أكتر , بيكربونات الصودا هو نفسه بيكربونات الصوديم ;)

  24. basema 27 February 2008

    فعلاً هالكاتو طيب كثير كثير ونجاحه مضمون مثل ما قلت يا منى … بنصح الكل يجربوه … بس شو السـر إنو بالصورة عندك طالع لونه أغمق من اللي عندي ؟؟؟

  25. نهى 27 February 2008

    الفرن عندى ناره حامية بيحرق من تحت قبل مايكون استوى من النص كويس فغالبا فى الكيكة باخلى النار متوسطة واحط فى الرف اللى تحت صينية بها ماء عتى ينضج جيدا..
    معلش ياريت اعرف اسويه على نار ايه بالظبط مش بدراجات لان فرنى غير مدرج..
    يعنى نار عالية متوسطة ولا هادية؟؟

  26. منى 27 February 2008

    هلا بسمة :) أختي بالاول صحتين و هنا على قلبك و قلب كل العيلة , أما اللون لان الكاتو هون مغطى بصوص التوفي كريم ;)

  27. منى 27 February 2008

    هلا نهى :) الفرن بتشعليه على درجة حرارة متوسطة و هي نفس درجة الحرارة 180

  28. سمسمة 27 February 2008

    ان شاء الله بيعيشوا ايديكي كل شي فيه تفاح وقرفة طيب كتير واذا من تحت دياتك أكيدبياخد العقل

  29. منى 28 February 2008

    هلا سمسمة :) هدا بس من زووءك و لطفك حبيبتي , نور الموقع بأخت غالية و جديدة ;)

  30. randd 12 March 2008

    كثير روووووووووعه يا عسل 8)

  31. منى 14 March 2008

    انت الي عسل و الله , ان اء الله تجربيه و تحكمي بنفسك :)

  32. رنا 14 May 2008

    بالفعل روعة روعة روعة ونجح نجاح باهر وحلاوته انه شكل وطعمة يسلم دياتك :zzz

  33. منى 15 May 2008

    هلا رنونة :) صحتين و عوافي على قلبك يا حق , كتير انبسطت لان عجبك .. دعواتك ;)

  34. سارونات 14 July 2008

    السلام عليكم و رحمة الله و بركاته

    أختي منى

    عندي شوية اسئلة ادا سمحتي

    عندي تفاح اخضر شوي

    بينفع جرب الوصفه فيه او بلاها

    و بشتري تفاح ناضج تماما

    كمان هل فيني استبدل التفاح

    بالاجاص قولتك بتطلع حلوة او لا

    و شو كمان :? اي شي تاني

    بالنسبة للتوفي كريم هي بتنشف

    بسرعة او لا يعني لمن بحطا فوق

    الكيك بحطا بس وقت التقديم او

    فيني حط عليها كلها و خليها

    بالبراد ل 3 ايام

    و هل بقدر اعمل التوفي كريم و

    حطابعلبة و بستعملها لما بدي–
    حاسةانو ما بينفع –

    و مبروك لكل اللي جربوه و نجح
    معاهن و عقبال الكل ان شاء الله

    و عقبالي انا كمان :grin

    و الصينية اللي عملتيه فيها

    مستطيلة او دائرية

    يا الله على اسئلتي اللي ما

    بتخلص :? الله يعينك عليها

    و ربنا يوفقك و يعطيك الصحة و

    راحة البال و يسهل دربك يا رب

  35. سارونات 15 July 2008

    السلام عليكم و رحمة الله و

    بركاته

    امس كتبت رد

    طوييييييييييييييل و اكيد معبا

    اسئلة بس ما عم شوفو ما بعرف

    ازا عم بتم مراجعته او ما

    انبعث لان في عندي شوية مشاكل

    بكمبيوتري

    ازا وصل كان بها و ازا لا راح

    عيد اكتبو و شي نسيت قلك ياه

    امس و هو انا عندي كمية كبيرة شوي من الاجاص شوفيني اعمل

    فيها دورت عوصفات علىالنت بس

    شكله الاجاص المسكين ما بيحبوه

    كتير فبدي منك ازا بتقدري كل

    الوصفات اللي ممكن ينعمل فيها

    اجاص و ربنا يوفقك

  36. سارونات 17 July 2008

    السلام عليكم و رحمة الله وبركاته

    صارلي زمان كاتبة تعليق ما بعرف ازا وصل او لا بس اجتني رسالة فوق انه ستتم مراجعته و من ثم وضعه و كتبت تعليقات اخرى و لكن لم يظهر اي منها فهل هناك مشكلة تقنية

  37. منى 23 July 2008

    هلا سارونات :)
    حبيتي انا كنت مسافرة لهيك ما كانت الردود عم تطلع :)

    هلا نجي على الاسئلة , الصراحة انا ما جربته بتفاح أخضر , ما فيني فيدك :roll

    أتوقع ممكن تستعملي الاجاص , و كمان فيك تغطيها بالتوفي و هو ما رح ينشف ;)

    التوفي فيك تحفظيه بالبراد لمدة شهر , انا دايما بعمل هيك, لما بتلزمني بسخنها بحمام مائي لحتى تصير مريقة شوية و بستعملها متل ما بدي

    الصينية ما بتفرق شو ما متوفر عندك فيك تستعمليه , المهم الحجم يكون بسعة 12 كاسة

    رح ضيف كم وصفة للأجاص الحباب و ان شاء الله بيعجبوك ;)

  38. سارونات 3 August 2008

    السلام عليكم و رحمة الله و بركاته
    الحمد لله على سلامتك اختي منى
    الله يجازيك خير عالمساعدة
    مشكلتي بالصواني اللي عندي حجما زغير صار لازم اشتري صواني كبار ان شاء الله بس في عندي واحدة بعتقد بتوصل ل 12 كاسهبس هي مستطيلة فراح يصير الكاتو بالعرض يعني يمكن يصير كبير و مو مرتفع متل مانك شايفة صايره عندي مشكلة باختيار الصينية المناسبة قليلي اختي منى كيف فيني اعرف الصينية اللي بتناسب انا فكرت ان مقدار الطحين هو اللي يحدد حجم الصينية
    راح احكيلك اللي صار ساويت كيكة بسيطة كتييير و المفروض انها تنتفخ كتير بس كنت شاكة بحجم الصينية لانو كان زغير بس قلت خليني خاطر و ساويها فطلعت زغيرة و ما طلعت حتى نص الكيكة الاصلية لان الاصلية نفشت كتير :cry لهيك صرت بخاف من الحجم شكلي اكتشفت نوع فوبيا جديد الخوف من حجم الصواني :
    grin :cry
    شكرا على الاجوبة طمنتيني و ناطرة وصفات الاجاص بفارغ الصبر
    سامحيني لاني تعبتك معي
    سلام

  39. منى 4 August 2008

    مو مشكلة شو ما كان شكل الصينية , انا لهل النوع بالذات بحب حضره بصينية مستطيلة ;)

    الحجم ما فيك تعرفيه لحالك ,إذا مذكور بالوصفة كتير منيح , إذا لأ فيك تقدري حجم الصينية المناسب بشكل تقريبي من مقادير الكيك , بس مع ذلك ما رح أحكيلك كم مرة طلع تقديري غلط و الكاتو نفش و طفطق من الصينية :sigh

    هلا المهم أي قالب كيك في الموقع ممكن ساعدك بحجم الصينية المناسب اله , و ان شاء الله تجربي شي كاتو و لا تنسي تبعتيلي قطعة , لااازم دوق من تحت دياتك ;)

  40. سارونات 8 August 2008

    السلام عليكم و رحمة الله و بركاته
    جازاك الله خيرا اختي منى ما بعرف شو كنت راحاعمل من دون مساعدتك و ان شاء الله بجربا و بجرب الوصفات الثانية و تطلع حلوه
    بدي اسالك عن كوب القياس عرفت انك بتستعملي كوب الماء العادي بدي اعرف هل بتستعمليه لكل الوصفات و ازا ايه فيني اعرف الكوب كم يساوي من غرام طحين مشان قارنو مع الكوب اللي عندي
    ربنا يوفقك و يسهل دربك
    سلام

  41. منى 9 August 2008

    أنا بستعمل الكوب العادي و هو تقريبا نفس الكوب المقياسي , كمية الطحين لكل كوب 150 غ ;)

    هلا فيك أختي :)

  42. سارونات 11 August 2008

    السلام عليكم و رحمة الله و بركاته
    تسلميلي يا اختي منى تعبتك معي طلع تقريبابنفس قياس الكاس اللي عندي هيك بحس براحة :zzz ان شاء الله راح ساويه هالاسبوع و بخيرك بالنتيجة بس بالنسبة للتفاح هل راح يطلع قطع بالكاتو خايفة لما قطعوقطعو قطع كبار قوليلي هيك بالتقريب اديش حجم القطع لزغيرةيعني قد حبة الكرز مثلا او اقل او اكتر
    كمان بالنسبة للتوفي راح حط القشطة اللي قلتي عليها اللي منعملا بالبيت بدي اسال بضيف القشطة عطول للكراميل او اخفق القشطة و كم ملعقة بحط
    ربنا يوفقك و يسهل دربك
    سلام

  43. منى 11 August 2008

    هلا أختي سارونات :)
    ان شاء الله بتساوييه و بيكون على زووءك , كتير سهل و طيب ره تقطعيه كل تفاحة لاربع اقسام بعدها كل ربع بتقطعيه بالطول و بعدها بتغرميه لمكعبات بسماكة نصف سنتيمتر تقريبا أو أقل ;)

    القشطة بتخفقيها و بتضيفي تقريبا 3 – 4 ملاعق منها ..

    عم انتظر اخبارك أختي ;)

  44. منامينو 17 November 2008

    هلا حبيبتي منى. يسلمو إيديكي ويسلم هالإبداع. وصفة راقية جدا وكتير عجبتني. حابة أجربها بس عندي سؤال زغير بالأول. هلأ بيكربونات الصودا اللي بتقصديهاهي نفسها الكربونة اللي منستعملها لنقع الحمص وبعمل الفلافل؟؟ طب إذا هي نفسها، لو حطينا ملعقة صغيرة ما بتمرمر؟؟ يعني قصدي نحط ملعقة زغيرة كاملة؟؟

    وميرسي يا عسل لكل وصفاتك الحلوة اللي جد عمتطلع روعة بالتجربة. ويسلملي ذوقك الحلو باختيار الوصفات. عن جد خرج إنها تتحول لكتاب ;) .. موفقة يا رب

  45. منى 19 November 2008

    انت الزووء حبيبتي :)
    الملعقة الي رح نستخدمها ملعقة صغيرة بس مسطحة و هي نفسها الكربونة الي نستعملها لنقع الحمص , لا تستغربي لان هي جزء من البيكنغ بودر ;)

    ان شاء الله تجرببي هل الكيك و يعجبك و لا تنسي تخبريني

  46. سلاف 29 November 2008

    قلت لحالي أحسن شيئ اكتبلك رد بموضوع الكاتو نفسه000
    شو بدي خبرك ما بعرف00 امبارح من لما رجعت من زيارتي فورا عالكمبيوتر وعالموقع بدي اكتبلك رد بس زوجي استلم الكمبيوتر وقلي شوي وشوي ومر الوقت ومافتت
    اليوم من اول مافتحت عيوني قلت افتح احكيلك عن الكاتو00 :zzz
    يسلم ايديكي يامنى والله وصفاتك بتبيض الوجه قدام الناس كلها 00 اما شو طلع كاتو ولا اطيب ولا اروع شيئ بجنن والله وكل اللي اكلوه قالولي مادقنا اطيب من هيك كاتو ولما سألوني من وين جبت الوصفه باختصار قلتلهن من ست الكل وملكة الكيك وملكة الشيفات كلهن منى بموقع بقمه طيبه

    بس والله من كتر مانجح معي وانا ماتوقعت كل هالنجاح لانه طلع سميك كتير 00 الفرحه نستني صور تجربتي00 ;) وطبعا زينته بصوص التوفي 00 عزبني شوي التوفي بس بعدين مشي الحال
    كنت بدي اسألك سؤال مابصير نساويه منى بقالب الكيك نفسه اللي بكون مدور وبالنص عالي ولا بيلزق ومابيزبط؟؟
    شكرا كتييييييييييير منى والله احترت مافي كلمات اتعبر00 الله يجزكي الجنه ويجزيكي كل خير يارب00

  47. rand 5 December 2008

    شكرا كتير الك الوصفة كانت ناجحة وطلعت طيبة كتير بس ما اتجرأت أجرب التوفي المرة الجاي ان شاء الله رح جربا معو

  48. منى 5 December 2008

    ان شاء الله :)
    الف هنا و عافية على الكيك , انا كتير عندي بيحبوه باليبيت حتى سادة :zzz هنا رنودة

  49. عيون ريم 2 March 2009

    حبيبتي جزاكي الله كل خير بجد انتي رائعه انا عملت الجاتو مع التوفي وطلع يمممممممي وعملته بقالب الكيك المفتوح بالوسط لاني مابحب قطع الكيك سميكه والتوفي من تحت اديكي يااااعسل وريحة التفاح والقرفه ممممممممم بتشهي تسلم اديكي ونور عنيكي بدنا اتجيبيلنا كيكات بالموز والكستناء اذا ما عليكي غلبه ياشف منى تسلميلي :zzz

  50. منى 3 March 2009

    مية هلا ريومة :)

    الف هنا , يا ستي وصفك شهااني كتير , ريتو عافية بكل لقمة و كل قطعة تفاح

    الف شكر الك للرد و التواجد و تكرم عيونك رح حاول نزل وصفات كمان للموز و الكستناء ;)

  51. teenh 10 March 2009

    يسلمو كتير واحلا موقع طبخ ونص البنات الحلبية عم يدخلو لهون ويتعلمو اكلاتكم الطيبة :zzz

  52. منى 11 March 2009

    مية هلا تبنا و على راسي و الله حلب و كل بناتها :zzz
    نورتي اختي

  53. DOUHA 7 August 2009

    هلاا منى
    مو كان في صورة؟؟؟ ويناااا

    ليكون بعتي القطعة لعندي :p

  54. منى 10 August 2009

    ليكون انت اكلتيها من غيابي :grin

  55. gsm 25 August 2009

    سلام عليكم إخت منى انا من شوي حطيت الجاتو على النار إتبعت الوصفة بس بصراحة ما حطيتلها بيكربونات لأنو ما عندي وإستعملت السكر العادي بدال السكر البني بقى إن شاء الله تطلع مزبوطة وتنجح معي وببقى بخبرك بالنتائج سلام يا حلو

  56. منى 26 August 2009

    ان شاء الله تزبط و انا عم استنى رايك :zzz

  57. gsm 26 August 2009

    سلام منونة والله مبارح بعد ما خبزت الجاتو شو طلعت ريحتها بتشهي روووووعة وكتيير طيبة بس في مشكلة صغيرة انا استعملت القالب يللي بينفتح وبعد ما قطعت القالب حسيت انو زيته كتيير شوي هي لازم يكون ولا ليكون انا خبصتلي خبصة بس والله زوجي عجبه كتيير حتى بعتت منه للجيران وكتيير حبوه :) يسلموا ايديك يا رب

  58. منى 26 August 2009

    لا هو ما رح يكون زيته كتير , ما بعرف اتوقع لانك غيرتي شي بالمقادير , استعمال الصواني و شكله ما اله علاقة
    يلا هل المرة مشيها و ان شاء الله المرة التانية تتوفر عندك بقية المقادير و تقدري تجربي الوصفة متل مو موجودة ;)

  59. مريوم 25 October 2009

    يعطيكي العافيه يا أحلى منى
    مبارح جربت هيدا الكيك
    و طلع كتير طيب، بس بيني و بينك الظاهر كانت ل كميه أكبر من ل صونيه فمن النص بقي مش مستوى كتير. وهبط لتحت لمن برد.
    ول الشغل التانية إنو ما كان عندي زيت إلى تقريبا c/d كوب فى حطيت أصبع زبد زيادة. بس قلت يمكن بدون الزبدة كان زبط. شو رأيك إنتي.
    والسؤال الأخير إذا ما بدي ل توفق يكون كتير ظاهر ، يعني بدي النكهة بس ما بدي شقف التفاح بالكيك شو بعمل .
    يعطيكي ألف عافيه و مشكورة على أطيب الوصفات.

  60. مريوم 2 November 2009

    hi mona.
    where are you my dear, i can see your reply on my questions.
    i hope you are ok and not busy :roll
    iam waiting your instructions :zzz
    sorry for writing in english but i don have arabic windows. 8)

  61. منى 2 November 2009

    هلا مريومة :)
    مشان الله لا تواخديني ,متل ما حزرت مشغولة كتير , ان شاء الله بالخير..

    الكيك هبط معك يمكن لان كان لازمه وقت اطول بالفرن و يمكن مشان الزيت , هلا ما كتير فهمت المقدار الي استبدلتيه , بقى فيك ترجعي تشرحيلي :?

    اذا حابة النكهة بس ممكن تطبخي التفاح على النار ليصير متل المعجون و بعدها تستعمليه عوض عن اللبن بكاتو اللبن على طريقتي , بيطلع كمان طيب ;)

    اسفة للتاخير و بانتظار توضيحك لحتى افم سبب الي صار اكتر

  62. مريوم 3 November 2009

    yee to2obreene ma koon 2az3agtek.
    but you know you spoiled us with your generousity.
    actually, i just had 2/3 cup of oil so i added on this 1/2 cup of butter. and i used the circular pan that is used for cheesecake with 10″ diameter.
    so thats my story 8)
    sorry for bothering you habeebte .

  63. مريوم 3 November 2009

    i jsut want to add something. the cake seemed to be done from the top. and it became “crispy” but in between was still need more baking. for this reason i moved it out from the oven.
    does this mean that the quantity was more than the pan?
    thank you again.

  64. منى 3 November 2009

    مريومة شو ازعل و ما ازعل , له انا بخدمة الناس الطيبة :zzz

    هلا كمية الزيت , سواء استعملتي زيت و زبد او بس زت لازم تكون كاسة و تلت , و انتي هيك قللتي الكمية شوي .

    اتوقع كان لازم تستعملي صينية اكبر و ما دام قلبه طري معناها اما ان صينيتك سميكة و صغيرة و اما ان كان بده كمان وقت بالفرن

    ان شاء الله ناوية حضر هل الكيك قريب و اذا صح الي بصوره بالخطوات لان مستاهل ان شاء الله و لحتى توضح الوصفة اكتر 8)

  65. tamara 2 December 2009

    حلوة وصفتج راح استعملها انشالله :zzz

  66. منى 5 December 2009

    ان شاء الله تجربيها و تكون على زووءك :) مية هلا اختي

  67. farah 7 December 2009

    تسلم ايديكي يا ست منى شكل الوصفة من الوصف لذيذة لأن ما في صورة :roll
    ناوية جربها وبطريقة ممكن تفاجئكم لأختصار الوقت بكرة اذا الله راد بعملها وبأتحفكم بالنتائج ادعولي

  68. منى 8 December 2009

    ان شاء الله تجربيها و تطلع تمام و متل ما بتحبي و انا بانتظار النتائج و كمان المفاجاة :zzz

  69. farah 8 December 2009

    يا ستي اليوم جربتها بس للأسف ما طلعت المفاجأة متل التوقعات :sigh
    بصراحة انا الفرن عندي غاز وعقدني بعمل الحلويات وبالذات الكيكات
    فمن فترة تعلمت طريقة صنع الكيك بالمايكروويف واعتمدت عدة وصفات كانت تطلع روعة بالذات كيك الموز اللي بياخد ساعة كاملة بالفرن و8 دقائق فقط بالمايكروويف فقلت لحالي بجرب كيكة التفاح هلأ هي استوت بعد 9 دقائق بس بالوسط بقيت طرية شوية مع اني ساويت نصف المقدار فتركتها كمان دقيقتين فهبطت شوي بس وحياتك طلعت كتييييييير طيبة والاولاد طاروا بالجاط وبالذات نكهة الجوز المحمص فيها كان رائع
    يعني بصراحة اذا ما عندك ضيوف الطريقة مختصرة جدا والمنظر بيتغطى بصوص الكراميل اللذيذ وبتسكت أفواه الاولاد اللي بتطالب دايما بالحلو ;)
    اذا حبيتي ابعتلك مقادير كيكة الموز تبع المايكروويف كيف فيي ابعتها دليني عالطريقة حبيبتي

  70. منى 9 December 2009

    و الله فكرة بتساعد للي عنده مشكلة بالفرن او حابب يحضر شي على السريع :zzz

    اكيد انا رح استنى الوصفة منك و فيكي تبعتيها كرد عادي و انا رح انشرها باسمك اذا ربنا راد ;)

  71. رنونة الحلوة 24 December 2009

    يسلموايديك مبين عالوصف طيب كتير وبدي جربو عن قريب ;) ;)

  72. أم نوران 5 January 2010

    الله يعطيكي العافية اخت منى كتيييييييييييير طيبة الكاتوي ساويتها و طلعت طيييييبة بس جوزي نقور منها قبل ما الحق اصورها,ان شاء الله برجع اعملا و ببقى ببعتلك الصورة…بس عنحد و صفاتك فزييييعة و عبقرية الله يجزيكي الخير..
    أم نوران

  73. منى 6 January 2010

    هلا ام نوران :)
    ريتو الف عافية على البك و قلب الباشا بكل لقمة , يلا هل المرة ما مشي الحال , ان شاء الله رح استنى الصورة مرة تانية ;)

  74. منى 6 January 2010

    هلا رنونة :)
    ان شاء الله تجربيه و يكون طيب و عم استنى رايك

  75. violet 22 April 2010

    السلام عليكم
    هلأ كربونات الصودا ضرورية ؟؟ هي لشو فائدتها وياترى موجودة عند اي سمان او سوبر ماركت
    وهي صلصة التوفي من وين بدي جيبها وياترى غالية ولا كيف
    على فكرة انا كمان بحلب

  76. violet 22 April 2010

    شفت طريقة الصلصة بس بظن انو ماي اساسية ماهيك

  77. منى 22 April 2010

    الكربونات متةفرة بكل محل و هي نفسها الي نستعملها لسلق الحمص ;)

    الصلصة منحضرها على ايدنا و اذا مو جاي على بالك فيك تستغني عنها

    اهلا و سهلا شرفتي و نورتي اختي

  78. violet 27 April 2010

    قلتلو لزوجي يشتري بيكربونات الصودا قام جبلي ظرف من بهارات الغوطة مكتوب عليه كربونة ياترى هي نفسها ولا لأ ياريت تطلع نفسها

  79. منى 28 April 2010

    هي نفسها:)
    لا تكتري منها , استعملي المقدار الموجود بالوصفة على الضبط و تكون المعلقة ممسوحة ;)

  80. violet 9 May 2010

    عملته بس طلع معجن :cry
    بس مع ذلك راح اكلنا
    جربت عملته مرة تانية بس على طريقتي بس قسمت التفاحات على طريقتك بس ماحبيته .. يمكن كل طريقة الها طريقة لوضع التفاح
    يمكن اجربه مرة تانية ويمكن ارجع لطريقتي مابعرف
    بس هلأ لما بتقولي ة صغيرة بكون قصدك معلقة الشاي الصغيرة كتير ولا المعلقة الصغيرة العادية ؟؟؟؟
    ويسلمو كترت حكي

  81. منى 10 May 2010

    ما دام طلع معجن معناها كان بده خبز اكتر , بصورة عامة كيكات الفواكهة بتاخد اكتر من الكيك العادي , ممكن ساعة و احيانا كتيرة ساعة و ربع :)

    لما بقول صغيرة ااقصد معلقة الشاي العادية

  82. laimuna 12 May 2010

    جربته وكتييييييير طلع طيب يم يممممم يسلمو ايديكي على الوصفة اللذيذة ويعطيكي الف عافية على الموقع الرائع :)

  83. منى 13 May 2010

    الله يعافيك الف الف صحة و هنا على البك :)

    نور الموقع اختي مية هلا فيك

  84. hajar 16 May 2010

    كتيرررررررر لذيذ هالكيك وفعلا لما بتقطعي التفاح قطع سمكية افضل من البشر وهادا هو الاختلاف الي حصل بين كيكتي وكيكتك :grin والحلو في هالكيكة هي طريقة التقديم بتقدميه مع الايس والكريم وفوقه التوفي شي روووووعة

  85. منى 17 May 2010

    الف الف صحة و هنا و عافية هاجر :)

    هل الكيك كتير مميز و بحبه كتير و انا مبسوطة انه نجح معك , الف صحة يا رب

  86. Amar 16 August 2010

    لدي وصفه لعمل الكاتوه وهي خاليه من أي نوع من أنواع الدهون ومناسبه لمرضى الكوليسترول وقد حصلت عليها من كتاب طبخ اختصاصيي لعمل الكاتوه:
    المقادير والسر هو طريقة خفق الكاتوه:
    لكل بيضتين متوسطتي الحجم 50 غ طحين و50 غ سكر وملعقه صغيره بيكينغ باودر.
    قليل من الفانيليا
    يمكن استعمال طحين من نوع (self raising) ويمكن استعمال طحين عادي مخصص للكاتوه.
    في حال عدم توفر خفاق كهربائي يفضل أن يتم خفق البيض والسكر في حمام مائي (يتم بوضع البيض والسكر في وعاء موجود على وعاء آخر يحوي ماء ساخن) حتى يتغير لونه ويكبر حجمه ، ثم يضاف الطحين المنخل مع البيكينغ بودر والتخليط بهدوء ، أما في حال توفر الخلاط الكهربائي فلا داعي للحمام المائي.
    يوضع في فرن محمى مسبقا على حراره 180 درجه أو رقم 4 والزمن اللازم يتراوح بين 20 إلى 30 دقيقه في الفرن.
    يمكن مضاعفة المقادير حسب الحاجه.
    عندما يبرد القالب يتم شقه إلى نصفين ثم يحشى بأنواع المربى المختلفه حسب الذوق.
    وهذا الكاتوه جيد لمرضى الكوليسترول لأنه لا يحوي أي دهون، ومع أنه يحوي على البيض ولكن البيض ضروري من وقت لآخر.

  87. yaso 1 September 2010

    السلام عليكم أخت منى أنا بدي جرب هاد الكاتو بس بدي اسألك
    لما بحط الكيكة بالفرن لازم خفف من حرارة ا
    لفرن ولا خليه ع 180
    عند اضافة الطحين لخليط البيض و السكر كم من الوقت نستمر بالخفق وهل لازم نخفق كتير :? :?

  88. منى 5 September 2010

    هلا ياسو :)
    حرارة الفرن بتبقى 180 و بكل الاحوال ممكن يكون فرنك مختلف لهيك اخبزي الكيك بالطريقة الي معودة عليها , انا بخبزه على 170 او 180

    لما منضيف الطحين منقلب شوي شوي و بلطف و نعومة لحتى يمتزجوا ;)

    ايا سؤال تاني من عيوني

  89. yaso 6 September 2010

    :cry :وبعد ما حطيتها بالفرن بشوي هبطت مع انو عملت نفس الطريقة والمقادير نفسها :? :? :?

  90. منى 6 September 2010

    ما دام هبطت معناها بدها بالفرن وقت اطول
    بصورة عامة كيكات الفواكهة بتاخد وقت اطول في الفرن من الكيك العادي ;)

  91. raghood 11 September 2010

    اخت منى السلام عليكم ورحمة الله وبركاته كيف حالك عملت الكاتو بس مدري كيف طلع معي هيك قاسي من بره ومن جوا معجن مازبط ممكن تفيديني بخبرتك؟

  92. منى 16 September 2010

    هلا رغودة :)
    الصينية لازم تكون واسعة و الكيك بياخد حوالي الساعة و ربع في الفرن لحتى يطلع تمام من برة و من جوى ;)

  93. raghood 18 September 2010

    السلام عليكم شكرا الك ياست الستات انشالله برجع بجربو مرة تانية ;) ;)

  94. منى 19 September 2010

    ان شاء الله هل المرة يظبط معك و يبيض وجك :)

  95. raghood 21 September 2010

    السلام عليكم كيفك ست منى انا كنت عم كوكش بقسم الكاتو فقرأت انو مالك مجربة كاتو البرتقال انا ازا بدك عندي وصفة لكاتو البرتقال وكتير لزيز ويعني ازا ماشالله حولك كلشي بيطلع معك ناجح مأحلاه هاد ومايركز لانو كتير سهل والله وكتير طيب وبنفس الوقت مقاديرو سهلة ومتوفرة دائما انا جبتو من موقع joy of baking والحمدلله من اول مرة زبط معي فإزا بتحبي ببعتلك وصفتو وانشالله تجربي وتقوليلي شو بصير معك

  96. منى 28 September 2010

    مسا الخير ام نور :)

    أكيد لوما الفرن المنيح ما في كاتو بينجح ;)

    الله يسلمك يا رب و يخليلك ماماتك و باباتك و كل أهلك بخير و عافية :)
    و ان شاء الله صحتين و هنا يا رب

    اختي هل الكاتو بده شي ساعة و ربع تقريبا حسب فرنك ..

    رح يعجبك كتير اذا الله راد , أخر مرة عملته يوم الخميس لان كان أخر يوم عندي بدرس الفرنسي , لما اجا جوزي قال لي من وقت ما دخلت على البناية شميت ريحة كتير طيبة و قلت أكيد هل الريحة طالعة من مطبخنا 8)

  97. tota2010 28 September 2010

    مرحبا منون شو هالصحن بيشهي والله جوعتيني بهالليل وما في وقت اعملها هلأ بتسمحيلي اخدها؟ :grin
    عفكرة انا ماخدة ع خاطري منك لأني سألتك عن الخفاقة في حلى الغريبة الاستنبولية وما رديتي وكل يوم عم بفتح وما بلاقي رد :sigh
    انا كتير مستعجلة عليها لأنه الكيكات ما بتنفش معي واذا بدي ساويها ع ايدي بحسها تخدرت من الخفق :cry
    ردي بسرعة يا منون الله يخليكي ويوفقك ويسعدك بحياتك وآخرتك ياااااارب :)

  98. om nabeel 28 September 2010

    يسلمو الايادي

  99. منى 3 October 2010

    هلا ام نبيل :)
    الله يسلمك اختي , مية هلا فيك

  100. Amar 3 October 2010

    أنا صرت أعمله على طول وبستعمل زيت زيتون وبينجح معي دائما، شكرا منى.

  101. منى 3 October 2010

    هلا رغودة :)
    لا كيف مو مجربته , في وصفة لكاتو البرتقال بحشوة غيرررر شكل بالقسم , بس انا اكيدة ممنوتك اذا شاركتي بوصفة جديدة , اسمه هلا البرتقال على الابواب و كتير مشتاقيله :zzz

    رح استنى وصفتك , و على فكرة الموقع الي ذكرتيه بحبه كتير ;)

  102. منى 3 October 2010

    هلا توتا :)
    لا تزعلي و الله خربطت , ها رديت عليك و بالتفصيل ;)

    خيلي عينك على هل الدعوات الحلوة , الله يختارلك الي فيه الخير و ان شاء الله تجربي هل الكيك و يكون يمييي :zzz

  103. منى 3 October 2010

    هلا قمر :)
    الف الف صحة و هنا على البك , يا ترى زيت الزيتون الي استعملتيه اله نوعبة خاصة ؟
    لان انا مرة جربت كاتو بزيت الزيتون و ما عجبني ابدا , حسيت ان نكهته قوية كتير .
    شو بتنصحيني ؟

  104. juman 13 October 2010

    مرحبا منى كيفك ان شالله تمام, يا ستي عندي استفسار ؟ بالمقادير حاكية سكر وما محددة نوعه وبالردود في اخت حاكية انة بني فيا ريت تفيديني :roll وكمان يسلمو ايديكي عالبرغل بالكوسا كتير طيبة حبا زوجي وبنتي اللي معزبتني بالاكل وما بعجبها العجب,, سلم دياتك و آسفة طولت عليكي

  105. منى 13 October 2010

    هلا فيك جمان :)
    الف هنا و عافية على الكوسا ببرغل , منيح الي عجبها للقطة :)

    انا استعمل سكر عادي , بس فيك تستعملي البني اذا حابة , ببيعطيه طعم طيب ;)

  106. juman 17 October 2010

    روعة روعة روعة حتى الكلمة قليلة عليه عملته مبارح وطلع كتير طيب,, يسلمو ايديكي يا رب

  107. فاديا 20 October 2010

    مرحبامنى أناكتيرحبيت الموقع
    وبهنيكي عليه :)

  108. منى 25 October 2010

    هلا جمان :)
    الف الف الف صحة يا قمر على البك , كتير مبسوطة انه عجبك و انه ظبط معك , هنا

    هلا فاديا :)
    من زووءك اختي , نورتينا و ان شاء الله تبقى معنا على طول

  109. larooo 30 November 2010

    عملته من يومين ..صحي هو طلع من فوق قاسي شوي ومعجن قليلاااا متل الاخوات ماحكوا ..مع اني خليته بالفرن ساعة وربع ..بس طلع طييييييييييب ..وقطع التفاح بقلبه كتير طيبة
    المرة الجاي رح جرب خليه مدة اطول بالفرن ..بس ياترى ماممكن يقسى اكتر من فوق ..لأنو حسيتو طلع الو قرشة من فوق ..الطبقة الفوقانية .. وتشققت شوي
    بس بيستاهل انو الواحد يعيده ..تسلم ايديكي منوش :)

  110. منى 1 December 2010

    لا لاروش هو مو المفروض لا يطلع قاسي و لا معجن :roll , بقى ما بعرق شو المشكلة

    يا ترى شو كانت درجة حرارة الفرن و على ايا رف خبزتي الكاتو ؟

  111. Amar 1 December 2010

    عذرا على التأخر بالرد.
    بالنسبه لزيت الزيتون أنا بستخدم Extra Virgin ، صحيح لما يكون سخن بتكون الطعمه قويه شوي لكن لما بيبرد بيتحسن كتير.
    حتى إني قللت من كمية الزيت وضفت بيضه زياده وكلن مقبول.

  112. منى 1 December 2010

    مممم سمعت كتير ناس عم يجربوا بزيت الزيتون , ان شاء الله رح ارجع جربه

    شكرا كتير للنصيحة :zzz

  113. larooo 4 December 2010

    مابعرف شو القصة كانت ؟؟درجة الحرارة كانت 180 متل مو مكتوب ..وحطيتو مو على الرف النصاني على اللي تحته تكة لأنو الفرن بكون شغال فوق وتحت سوا
    مافيني شغلو بس من تحت ..مابعرف اذا هدا هو السبب
    بس ان شاء الله المرة الجاي بتكون النتائج احسن :)

  114. منى 5 December 2010

    ييييي خلص هي هي :roll

    اكيد هادا هو السبب , لان ما بده من فوق و لا ايا حرارة

    كيف بتعملي غير كاتويات ؟ ممكن تتبعي نفس الطريقةالي بتمشي مع فرنك ;)

  115. نجمة 4 January 2011

    السلام عليكم كيفك أخت منى جربت كاتو التفاح وطلع كتيير لذيذ :zzz بس حابة ائلك بالنسبة لصلصة التوفي جربت طريقة عندي وهي ثلاث ملاعق كبيرة سكر تذوب على النار حتى تصبح ذهبية اللون ثم نضيف علبة قشطة ونحرك بسرعة حتى لا تتكتل وطلعت زابطة بقى ما بعرف برأيك السكر قليل لأنو لما جربت الكاسة ونصف تكتلت معي وشكرا جزيلا لك

  116. منى 4 January 2011

    ما كتير فهمت عليك , هللا السكر لو كان معلقة او كاسة رح يدوب بنفس الطريقة ;)

    ما دام الطريقة زبطت معك ابقي عليها , كله نفس المبدا و نفس الطعمة

    الف الف صحة و هنا على البك , الحمد لله انه زبط معك و كان على زوووءك:)

  117. hussam 5 April 2011

    أخت منى ،
    1- هل يمكن التوضيح أكثر بشأن حجم قطع التفاح، لأنه في الحقيقة لا أمتلك الخبرة الكافية ، تقديريا هل يمكن أن تكون أبعاد كل قطعة تفاح هي : 0.25cmx0.25cmx0.25cm
    2- كيف أتأكد من حجم الصينية

    مع كل الشكر و التقدير لجهودكم

  118. منى 5 April 2011

    هلا اخي
    لا ابدا مو غريب , لان اول ما الواحد بيبدى ممكن يكون عنده اسئلة و استفسارات عن ابسط الاشيا

    المهم حجم النفاح تقريبا 1cmx1cmx0.5cm , تقريبا متل ما كانو امهاتنا يقطعوا التفاح للجيلو , و رح حاول حط صورة لحتى تبان اكتر
    حجم الصينيةبسعة 12 كاسة و لو كانت كبيرة بيكون احسن لحتى ما يطلع الكاتو سميك لان هون بيصير يعجن

    ايا سؤال تاني من عيوني

  119. zina 8 May 2011

    ألسلام عليكم مدام منى , كيفك ؟ بس سؤال اذا بتريدي فيني حطو بصينية الكاتو المبخوشة من النص( مو الي بينفك )بيزبط ولا لازم صينية عادية

  120. lalosh 18 November 2011

    مدام منى انا عنجد حبيتك بدون ما أشوفك .. الله يوفقك ويسعدك بكل حياتك يااااااااااارب

    اليوم عملتو لهالجاتو وكان بشهي كتير .. كل العيلة حبتو :)
    انا اسمي عالفيس بوك Alaa Shuhban نزلت صور لجاتو الاخضر والدجاج الاسباني :) رح ضل جرب كل شي بهالموقع لحتى صير فنانة متلك :*

  121. منى 19 November 2011

    تحبك العافية الاء خليلي عينك ;)

    صحتين و الف الف هنا , ان شاء الله بتصيري احسن بكتير و كلنا منتعلم من بعض و اكيد لا تنسي الموقع من كم وصفة اردنية اصيلة ;)

  122. منى 20 November 2011

    هلا زينة :)
    بيصير بس الافضل لو صينية كبيرة ;)

  123. lalosh 22 November 2011

    جربته جربته وطلع يممممممممممممممي رح انزله ان شاء الله عالفيس بوك ^_^

  124. ghad 17 April 2012

    الحمدلله زبطت معي و طعميت العيلة :) ان شاء الله تنفتح بوجهك ابواب الجنة :)

  125. منى 18 April 2012

    ابوس روحك , هي احلى دعوة بسمعها من زمااان , ان شاء الله انت كمان و ندخل برحمة ربنا :)

    صحتين و الف الف هنا و عافية على قلبك و قلب عيلتك الحلوة

  126. منى 18 April 2012

    هلا لولو :)
    صحتين و هنا و عافية يا رب على قلبك و قلب كل مين داقه ;)

  127. سارة 27 July 2013

    سؤال
    كربونات الصوديوم نفسها الكربونة تبيعت الفلافل و السوس ؟

    • منى 28 July 2013

      هي بذاتها

  128. نور طعمة 2 April 2014

    مرحبا منى كيفك ان شاء الله بخير,حابة جرب هالوصفة فيني استخدم خفاقة يدوية بالخفق,وممكن اخبز هالكيك بصينية فرن عادية ولا لازم قالب كيك,وشكرا الك على كل شي بتقدميه النا

    • منى 4 April 2014

      اهيين نور و اسفة ع التاخير بالرد
      قصدك خفاقة كهربا و الا خفاقة عادية ؟
      هل الوصفة كتير كبيرة ما بتوسع بقالب كيك لازم تستعملي صينية فرن ضخمة :)

      شكرا الك كتير لثقتك بوصفاتي , منورة

تقييم الوصفة
عاديةقد أحضرهاجيدةممتازةأكثر من رائعة (3 votes, average: 3.67 out of 5)