كب كيك الموز الرائع


         وصفة : منى                 2018/11/19                 12 تعليقات
كب كيك الموز الرائع

كب كيك الموز الرائع



لما تلاقي موزات بديوا يسودوا على المرمرة , وحابة تعملي فيهم شي سهل وبياخد العقل .. فانا بنصحك بهي الوصفة الرررررائعة . يعني تقريبا لما يكونوا طالعين من الفرن رح يخلص نصهن ، وبعد شوي بس يفتروا رح يخلص النص التاني .. ريحة القرفة رح تخلي الجو دافي في كل البيت . وهي الوصفة واحدة من الوصفات المفضلة عنا في البيت . الكب كيك طري كتير كتير وفيه نكهة موز خفيفة مع ريحة القرفة والحلاوة الي بتحبها وبتحليك من دون ما تزعجك وبتخليك تشتهي قطعة تانية .
استعملت زيت مشان الطراوة وزبدة مشان النكهة وفي حال بدك تستعملي زبدة نباتي ما في مشكلة ، بس بالزبدة الحقيقية اطيب .
بديت اعملها باول ما بديت الكهربا تقطع عن حلب ، لما كان ما ممكن نستعمل خفاقة ، هي الوصفة بخلطة بسيطة بمضرب الايد بتكون جاهزة وما في توسيخ بس وعاء واحد 

الوصفة بسيطة وما فيها اسرار .. غير سر واحد .. ، وهو في حال زاد كب كيك فيك تحفظيهم في البراد ليوم تاني ، بس مهم قبل التقديم تخليهم برة في درجة حرارة الغرفة هيك بيكونوا اطيب . اتذكرت شغلتين تانيات مهمات.. ان تكون الموزات كتير كتير طرايا بيعطوا نكهة اطيب ، وكمان ننتبه بعد اضافة الطجين التقليب بيكون بس حتى تمتزج المواد ، الخفق الزيادة رح يخلي المافن قاسي وكتيم .

بالف صحة وهنا وبتمنى ما تحرموني من تفاعلكم وتعليقاتكم وملاحظاتكم ووجودكم .

ربع كوب حليب بحرارة الغرفة
2 ملعقة كبيرة عصير ليمون
2 كوب طحين حلويات
نصف ملعقة صغيرة قرفة
1 و نصف ملعقة صغيرة بيكنغ بودر
نصف ملعقة صغيرة بيكنغ صودا
نصف ملعقة صغيرة ملح
3 حبة كبيرة موز
ربع كوب زيت
ربع كوب زبدة مذوبة ومبردة قليلا
نصف كوب سكر عادي
نصف كوب سكر بني
2 بيض حجم كبير بدرجة حرارة الغرفة
فانيليا
1 - يحمى الفرن على درجة حرارة 220 مئوية , تغلف صينية كب كيك بالورق الخاص ( ما يقارب 14 قطعة ). يوضع الليمون على الحليب الفاتر ويترك جانبا لمدة عشر دقائق او حتى اعداد باقي الوصفة .
2- ينخل الطحين مع البيكنغ بودر والبيكنغ صودا والملح والقرفة ويوضع جانبا.
3- توضع حبات الموز في وعاء متوسط وتهرس بالشوكة او بهراسة البطاطا , يجب ان تكون حبات الموز مهروسة بشكل جيد . الكمية تكفي لملء كوب .
4- يضاف الزيت والزبدة المذوبة على الموز ويقلب الكل . يضاف السكر الابيض والسكر البني ويقلب من جديد . يضاف البيض والفانيليا والحليب المجهز .
5- يضاف الطحين المنخول ويقلب الكل بلطف حتى يتجانس المزيج ، لا يقلب المزيج بشكل زائد يعد ان يتجانس . يصب المزيج في القوالب المجهزة بحيث يملئ ثلاث ارباع قالب الكب كيك .
6- يخبز الكب كيك على درجة حرارة 220 لمدة 8 دقائق. تخفف الحرارة حتى 175 ويترك لمدة 15-20 دقية او حتى ينضج . لا يفتح بابا الفرن قبل مرور 15 دقيقة على وجود الكب كيك في الفرن .
7- يترك حتى يبرد ويقدم . يحفظ في وعاء محكم في درجة حرارة الغرفة .

التعليقات

  1. Haifa alwan 21 November 2018

    اكييييد طيبة وانتِ عم تحكي عن ريحة الكيك ودفا القرفة تخيلتا رح اجربا ومغذية كتير لابني الصغير هو كتير بحب الكب كيك بس بيتحسس من الحليب بحطلو بدالو حليب لوز … ❤️

    • منى 4 January 2019

      اهليين ياهيفا :)
      وهلق رجعت تذكرت الريحة على الحكي ..مممم

      معافى ان شالله ابنك والله يجعل الشفاء التان قريب ، صراحة ماعندي فكرة عن حليب اللوز ، بس اذا انت بتستخدميه بالعادة كبديل فاكيد بيزبط .

  2. الهامو 21 November 2018

    واو مدام منى هي الوصفة المفضلة عند بناتي وعندي كمان لأنها سهلة كتير

    • منى 4 January 2019

      اي عن جد ، واقتصادية كمان بتخلينا نحفظ النعمة :)

  3. Hanan 21 November 2018

    يعطيكي العافية روحي كتير طيبة هالوصفة وراح جربا ع طريقتك ان شاء الله

    • منى 4 January 2019

      ان شالله بتجربيها وبتحبيها وبتعتمديها :)
      بانتظار رايك

  4. الهامو 21 November 2018

    ييي عفوا نسيت قلك كمان انو انا بعملو مع الجوز المطحون نفس مقاديرك تماما منوش

    • منى 4 January 2019

      ممممممم .. اكيد اطيب واطيب ، شكرا على الفكرة

  5. Nada 24 November 2018

    شكلها لذيذ يسلموا ايديكي
    هاد حل ممتاز للموز لان الولاد بس يستوي الموز مابقى ياكلوه
    جزاك الله خيرا

    • منى 14 December 2018

      اهليين ياندى
      اي تمام وهيك منحفظ النعمة بشي طيييب

  6. الهامو 10 December 2018

    مرحبا منوش ..اذا بتسمحيلي دلعك يعني

تقييم الوصفة
عاديةقد أحضرهاجيدةممتازةأكثر من رائعة (12 votes, average: 3.58 out of 5)